Avyakt murli du mardi 8 mai 1973

>

08-05-73 om shanti avyakt baapdaadaamdhuban

sarvochcha svamaan

sarva khajaanon se bharpoor karne vaale, mahaadaani,vardaani,mahaatyaagi va padmaapadma bhaagyashaali banaane vaale,vardaaneemoortta shivbaaba bole:-

vartamaan samay apne-aap ko kis svamaan mein samajhte ho? apne svamaan ko jaante ho? sabhi se bade-se-bada svamaan abhi hi hai yeh to jaante hi ho। lekin woh kaun-sa svamaan hai? bade-se bada svamaan abhi kaun-sa hai। jisko varnan karne mein hi dikhaai pade ki isse bada svamaan koi ho nahin sakta? woh kaun-sa hai?is samay ka bade-se-bada svamaan yahi hua ki ‘baap ke bhi abhi tum maalik bante ho।’ vishwa ke maalik banne se pahle vishwa ke rachayita ke bhi maalik bante ho। shiv baba ke bhi maalik ho। isliye ‘vaalekam salaam’kehte hain। supaatra bachcha baap ka bhi maalik hai। is samay baap ko bhi apna bana liya hai। saare kalpa mein baap ko aise apna nahin bana sakte ho। abhi to jab chaaho, jis roop mein chaaho,us roop se baap ko apna bana sakte ho। baap bhi is samay kis bandhan mein hai? (bachchon ke bandhan mein)। to rachayita ko bhi bandhan mein baandhane vaale,aisa svamaan phir kab anubhav karenge? rachayita ko sevaadhaari banaane vaale-baap ko gulaam bana diya na, apni seva ke liye। yeh hai shuddh svamaan। ismen abhimaan nahin hota hai। jahaan svamaan hota hai, vahaan abhimaan nahin hota hai। baap ko sevaadhaari banaaya lekin abhimaan nahin aayega। to apne aise shuddh svamaan mein-jahaan abhimaan ka naam nishaan nahin hai is sthiti mein sthit rehte ho?

jaise baap sadaiv haan bachche, meethe bachche, vishwa ke maalik bachche samajh kar apna sirtaaj banaate hain, aise sirtaaj sthiti mein sthit rehte ho?braahmanon ki choti ka sthaan kahaan hota hai? sir ke oopar hai na। to brahman choti arthaat baap ke sirtaaj। to jaise baap sadaiv bachchon ko svamaan dete hue aap samaan banaate hain, aise aap sabhi bhi har -- ek aatma ko sada svamaan dete baap samaan banaate rehte ho? yeh sada smriti mein rehta hai ki is samay sivaay ek baap se lene ke aur sabhi ko dena hai? tum aatmaon ko aatmaon se lena nahin hai parantu unhein dena hai। sirf ek baap se hi lena hai। jo liya hai, woh dena hai। daata hai na? yeh sada smriti mein rehta hai?athva jahaan dena hai, vahaan bhi lene ki ichchha rakhte ho?agar aatma,aatma dvaara kuchh-bhi lene ki ichchha rakhti hai to woh praapti kya hogi? alpa kaal ki hogi na? alpagya aatmaon se alpakaal ki hi praapti hogi। sarvagya baap se sadaakaal ki praapti hogi। to jahaan se lena hai vahaan le rahe hain aur jahaan dena hai vahaan de rahe ho? athva kabhi badli kar dete ho? agar aatma, aatma ko kuchh deti bhi hai to baap se liya hua hi to degi na?jara bhi kisi prakaar ki lene ki ichchha,apne svamaan se gira deti hai।

jab aap log bhi kisi aatma ko baap dvaara mila hua khazaana dene ke nimitta bhi banti ho to bhi smriti kya rehti hai? aatma ke paas apna kuchh hai kya?baap ke diye hue ko hi apna banaaya hai। jab auron ko bhi dene ke nimitta bante ho, us samay agar yeh smriti mein nahin rehta ki baap ka khazaana de rahe hain to un aatmaon ko shreshtha sambandh mein jod nahin sakte ho। kya aisi smriti mein rehte hue har karma karte ho?nasha bhi rahe apne shreshtha svamaan ka। unke saath-saath aur kya rehta hai? (khushi)। jitna buddhi mein nasha hoga,utni hi karma mein namrata-is nashe ki nishaani yeh hai। nasha bhi ooncha hoga lekin karma mein namrata rahegi। naynon mein sadaiv namrata hogi। isliye is nashe mein kabhi nuksaan nahin hota hai। samjha?

sirf nasha nahin rakhna। ek taraph ati nasha, doosri taraph ati namrata। jaise sunaaya ki oonch-te oonch baap bhi bachchon ke aage gulaam ban kar aate hain to namrata hui na?jitna oonch utni hi namrata-aisa balance rehta hai? athva jis samay nashe mein rehte ho,to kuchh sujhta hi nahin?kyonki jab apne is svamaan ke nashe mein rehte hain ki ham vishwa ke rachayita ke bhi maalik hain to aise nashe mein rahne vaale ka karttavya kya hoga? vishwa ka kalyaan namrata ke bina ho nahin sakta। baap ko bhi apna tab banaaya jab baap bhi namrata se bachchon ka sevaadhaari bana। aise hi follow father।

har samay yeh check karo ki baap se kitne khajaane mile hain? maaloom hai kitne khajaanon ke maalik ho?-(anginat) phir bhi mukhya to varnan karne mein aate hain na? is sangamayug mein mukhya kitne khajaane hain? aap logon ko kitne mile hain? sabhi se bade-se-bada khazaana to baap mila। pahle number ka khazaana to ye hai na? jaise kisi ko chaabi mil jaay to goya sab mil gaya। baap mil gaya arthaat sabhi kuchh mil gaya। aur kya mila? woh bhi saath-saath varnan karo। gyaan bhi hai aur ashta-shaktiyaan bhi hain। ek-ek shakti ko alag- alag varnan karo to alag-alag shakti bhi khajaane ke roop mein hai। is prakaar jo baap ke gun varnan karte ho, woh gun bhi khajaane ke roop mein varnan kar sakte ho। is reeti se is amoolya sangamayug ke samay ka ek second bhi khazaana hai। jaise khajaane se praapti hoti hai vaise is sangamayug ke ek-ek second se shreshtha praapti kar sakte ho। to yeh sangam ka samay arthaat ek-ek second anek padmon se jyaada bada khazaana hai। agar anek padma ikaththa karo aur sangamayug ka ek second doosri taraph rakho to bhi shreshtha sangam ka hi ek second gina jaayega। kyonki is ek second mein hi sada kaal ke praarabdha ki praapti hoti hai। sabhi ko sunaate ho na - ek second mein mukti aur jeevanmukti ka varsa le sakte ho। to ek second ki bhi value ho gai na? to sangam ka samay bhi bahut bada khazaana hai।

ab itne sabhi khajaane check karo ki ham in khajaanon ko apne andar kitna dhaaran kar sake hain? athva aisa to nahin ki koi khazaana dhaaran hua hai aur koi nahin hua hai? kisi bhi khazaane se adhoore to nahin rah gaye ho? vanchit to honge nahin lekin yadi adhoori praapti ki, to bhi chandravanshi ho gaye, sooryavanshi nahin hue। sooryavanshi arthaat sampanna। kisi bhi baat mein yadi sampanna nahin to sooryavanshi nahin kahenge। to sabhi khazaanon ko saamne rakhte hue apne-aap ko check karo ki yeh kahaan tak hai,kitni andaaz mein hain? aisa to nahin ki thode mein hi khush ho gaye hain।

to in sabhi khazaanon ko check karna aur saath-saath yeh bhi check karo ki jo bhi khazaane mile hain unke mahaadaani bane ho ya apne prati hi rakh liya hai? mahaadaani jo hote hain woh apna bhi doosron ko de dete hain, lekin phir bhi ve bhikhaari nahin bante। kyonki jo dete hain vo unke paas automatically badhta hai। to yeh bhi dekho ki pavitrata ka khazaana kahaan tak anek aatmaon ko daan diya hai? ateendriy sukh ka khazaana bhi dekhna hai ki jyaada apne prati lagaate ho ya vishwa ki seva arth lagaate ho?apni praapti to kar li na? lekin abhi ki stage vishwa ki seva ke prati lagaane ki hai। to yeh check karo ki har khazaana apne prati kahaan tak lagaaya hai? aur doosron ke prati kahaan tak lagaate hain? sampoorn stage isko kaha jaata hai। kya sarva khazaane auron ke prati lagaaye? agar apne purooshaartha ke prati hi gyaan ka khazaana va shaktiyon ka khazaana lagaate rehte ho to woh bhi sampoorn stage nahin hui। ab doosron ke prati lagaane ka samay hai। agar abhi tak bhi sarvashaktiyon ko apne prati hi prayog karte rahenge to doosron ke liye mahaadaani va vardaani kab banenge? ab aisa abhyaas karo jo apne prati lagaana na pade। agar sabhi khazaane doosron ke prati lagaate rahenge to aap khaali ho jaayenge kya?

jaise baap apne rest ka samay jo ki shareer ke liye aavashyak hai woh bhi apne prati na lagaakar vishwa-kalyaan arth lagaate rehte the aise sarvashaktiyaan bhi vishwa-kalyaan-prati lagen na ki apne prati। jab sabhi ko baap-samaan banna hai to baap-samaan stage bhi to dhaaran karenge na? doosron ko dene lag jaayenge to hi apne-aapko sarva baaton mein sampanna hone ka anubhav karenge। doosron ko padhaane mein apne ko padhaana automatically ho jaayega। abhi double arthaat doosron mein alag, apne mein alag time lagaate ho। abhi ek hi samay mein double kaam karo। kyonki samay kam hai। samay kam hota hai to double course ki study karte hain, yeh bhi aise hai। samay sameep aa raha hai। to doosron ko dene ke saath-saath apna jama karo। apne prati na lagaao। agar abhi tak bhi apne prati lagaate aur samay ganvaate rahenge to vishwa ke mahaaraajan nahin ban sakenge। lakshya to vishwa mahaaraajan banne ka hai na?

shuru mein jab gyaan gangaayen nikleen to us samay ki seva ki visheshta kya thi? us samay ke nikle hue vaaris aur is samay ki nikli hui aatmaon mein antar kyon?service to ab jyaada ho rahi hai lekin vaaris dikhaai nahin dete-kyon?kaaran, vistaar mein to bahut hai, lekin mool kaaran kya hai? us samay apna-pan nahin tha, vishwa ke kalyaan-arth apna sabhi kuchh dena hai, woh bhaavna thi। eknaami aur economy (Economy)vaale the। sabhi khazaanon ki economy thi। vyartha nahin ganvaate the। samay, shakti jo li hai, woh auron ko deni hai। arthaat mahaadaani-pan ki stage thi। kyonki vishesh nimitta bani hui theen। to us samay ki stage aur abhi ki stage dekho kitna pharka hai। abhi pahle apne saadhan sochenge, peechhe service ke saadhan arthaat pahle saalveshan (Salvation) peechhe service (Service)। parantu shuru mein tha pahle service, phir saalveshan mile,na mile। saalveshan se service karni hai yeh sankalp-maatra mein bhi nahin tha। saadhan ho to service ho,saathi ho to service ho, dharni ho to service ho-yeh sankalp nahin the। jahaan jaao,jaisi paristhiti ho aur jaisa prabandha ho,sahanshakti se seva ko badhaana hai। yeh mahaadaani ki stage hai।

svayan ke tyaag se auron ka bhaagya banta hai। jahaan svayan ka tyaag nahin vahaan auron ka bhaagya nahin banta। baap ne svayan ka tyaag kiya, tabhi to aap anek aatmaon ka bhaagya bana। to shuru ki sthiti mein svayan ke sabhi sukhon ka tyaag tha isse yeh bhaagya bane। ab jitna tyaag, utna bhaagya bana rahe ho auron ka। isliye vaaris chhip gaye hain। to ab phir se vahi mahaadaani banne ka sanskaar va sada sarva praapti hote hue bhi aur sarva saadhan hote hue bhi saadhan mein na aao,saadhna mein raho। abhi saadhna kam hai,saadhan jyaada hain। pahle saadhan kam the,saadhna jyaada thi। isliye abhi nirantar us saadhna mein raho arthaat saadhan hote hue bhi tyaag vritti mein raho। jisse thode samay mein oonchi aatmaon ka bhaagya bana sako। baapdaada ne sabhi ke haath mein ab aatmaon ke bhaagya ki rekha lagaane ki authority di hai। to aisa na ho ki apne tyaag ki kami ke kaaran anek aatmaon ke bhaagya ki rekha sampanna na kar sako। bahut jimmevaari hai। jaise-jaise samay sameep aata ja raha hai, vaise-vaise sankalp bhi vyartha na ganvaane ki jimmevaari harek aatma ke oopar badhti ja rahi hai। abhi apna bachpan nahin samajhna। bachpan mein jo kiya woh achha lagta tha। bachche ka albelaapan achha lagta hai,badappan nahin aur badon ka phir albelepan achha nahin lagta hai isliye samay ke pramaan apne svamaan ko kaayam rakhte hue jimmevaari ko sambhaalte jaao। samjha?

achha aise baap ko sarva-sambandhon se apna banaane vaale, sada sarva-khajaane sarva-aatmaon ke prati daan dene vaale mahaadaani, vardaani,mahaatyaagi aur padmaapadma bhaagyavaan bachchon ko yaad-pyaar aur namaste।