Avyakt murli du mercredi 13 juin 1973

>

13-06-73 om shanti avyakt baapdaadaamdhuban

roohaani yoddha

sarva bandhan mukta, trikaaldarshi,sarvashaktivaan,vishvakalyaankaari,shreshtha karma sikhaane vaale aur shreshtha jeevan vaale baba baale :-

apne ko roohaani sena ke mahaarthi samajhte ho? sena ke mahaarthi kisko kaha jaata hai?unke lakshan kya hote hain?mahaarthi arthaat is rath par savaar, apne ko rathi samjhe। mukhya baat ki apne ko rathi samajh kar is rath ko chalaane vaale apne ko anubhav karte ho? agar yuddha ke maidaan mein koi mahaarthi apne rath arthaat savaari ke vash ho jaae to kya woh mahaarthi, vijayi ban sakta hai ya aur hi apni sena ke vijayi-roop banne ki bajaay vighna- roop ban jaaega। halchal machaane ke nimitta ban jaaega। to jo bhi yahaan is roohaani sena ke yoddha ho,kya vahi is rath ke rathi bane ho?

jaise yoddhe sarva vyaktiyon, sarva-vaibhvon ka kinaara kar ‘yuddha aur vijay’-in do baaton ko sirf buddhi mein rakhte hue apne lakshya ko poorn karne mein lage hue hote hain। vaise hi apne-aap se poochho ki in do baaton ka lakshya hai?ya aur bhi kai baaten smriti mein rehti hain?aise yoddhe bane ho? kahin bhi raho lekin sadaiv yeh smriti rahe ki ham yuddha ke maidaan par upasthit hue yoddhe hain। yoddhe kabhi bhi aaraam pasanda nahin hote hain। yoddhe kabhi bhi aalasya aur albelepan ki sthiti mein nahin rehte, yoddhe kabhi bhi shatran ke bina nahin rehte, sadaiv shastradhaari hote hain, yoddhe kabhi bhi bhay ke vasheebhoot nahin hote, nirbhay hote hain, yoddhe kabhi bhi sivaay yuddha ke aur koi baaten buddhi mein nahin rakhte। sadaiv yoddhepan ki vritti aur vijayi banne ki smriti mein rehte hain। kya ham sabhi bhi ek-doosre ke saath vijayi rehte hain? is drishti se ek-doosre ko dekhte hain। aise hi roohaani yoddhon ki sadaiv drishti mein yeh rehta hai ki ham sabhi ek-doosre ke saath mahaaveer hain, vijayi hain। ham har second har kadam mein yuddha ke maidaan par upasthit hain। sirf ek hi lagan vijayi banne ki rehti hai। sarva sambandh va sarva prakriti ke saadhnon se apni buddhi ko detach kar diya hai? kinaara kar liya hai?ya yuddha ke maidaan mein ho lekin buddhi ki taaren, sambandh va koi bhi prakriti ke saadhnon mein lagi hui hai?apne ko sampoorn svatantra samajhte ho? ya koi baat mein partantra bhi ho?

sampoorn svatantra arthaat jab chaaho is deh ka aadhaar lo, jab chaaho is deh ke bhaan se aise nyaare ho jaao jo jara bhi yeh deh apni taraph kheench na sake। aise apni deh ke bhaan arthaat deh ke lagaav se svatantra,apne koi bhi puraane svabhaav se bhi svatantra,svabhaav se bhi bandhaaymaan na ho। apne sanskaaron se bhi svatantra। apne sarva laukik samparka va alaukik parivaar ke samparka ke bandhanon se bhi svatantra। aise svatantra bane ho? aise ko kaha jaata hai-’sampoorn svatantra’। aisi stage par pahunche ho va abhi tak ek chhoti-si karmendriy bhi apne bandhan mein baandh leti hai?

agar chhoti-si cheenti sher ko athva mahaarthi ko hairaan kar de to aise mahaarthi va sher ko kya kahenge? sher kahenge? ek vyartha sankalp master sarvashaktimaan ko hairaan kar de ya ek puraane 84janmon ka jadajdi bhoot sanskaar, master sarvashaktivaan,mahaaveer,vighna-vinaashak,trikaaldarshi,svad- rshan chakradhaari ko pareshaan kar le,purooshaartha mein kamjor bana de, aise master sarva- shaktivaan ko kya kahenge?jis samay is sthiti mein hote ho us samay apne oopar aashcharya nahin lagta? yeh shabd nikalna ki mujhe vyartha sankalp aate hain va puraane sanskaar va svabhaav apne vasheebhoot bana lete hain va baap ki yaad ka anubhav nahin hai,baap dvaara koi praapti nahin hai va chhote-se vighna se ghabra jaate hain, nirantar ati indriy sukh va harsha nahin rehta, khushi ka anubhav nahin hota, kya woh bol brahman kul bhooshan ke hain aise braahmanon ko kaun se brahman kahenge - ‘naamdhaari brahman’। agar sachche brahman kahlaate aur yeh bolte to dvaapar yugi braahmanon aur aise kahlaane vaale braahmanon mein kya antar hai?

vartamaan samay brahman banne vaali aatmaaen apne-aap ko dekhen ki kya braahmanpan ka pahla lakshan apne jeevan mein laaya hai? braahmanpan ka pahla lakshan kaun-sa hai - ‘aur sang tode ek sang jod’। agar apni karmendriyon ki taraph bhi jod hai to kya yeh braahmanon ka pahla lakshan hai? jab pahlepahle pratigya va pahla-pahla marjeeva janma ka bol braahmanon ka yahi hai ki-’ek baap doosra na koi’। yahi pahli pratigya hai। athva pahla lakshan hai। to pahle is lakshan va pratigya ko va pahle bol ko nibhaaya hai ya ek kehte hue bhi anekon taraph juta hua hai? to kya aisa naamdhaari brahman vijayi kahlaayega? braahmanon ke liye itne bade vishwa ke andar apna hi chhota-sa sansaar hai, aise chhote-se sansaar mein har kaarya karte aise brahman vishwa ke jin bhi aatmaon ko dekhte hain un ko sirf ek kalyaan ki hi bhaavna se dekhte hain। sambandh aur lagaav ki bhaavna se nahin। lekin sirf eeshvareey seva ke bhaav se। paanch tatvon ko dekhte hue,prakriti ko dekhte hue, prakriti ke vash nahin honge। lekin prakriti ko bhi satopradhaan banaane ke karttavya mein sthit honge। jo svayan prakriti ko parivartan karne vaale hain kya woh svayan prakriti ke vash honge? jo abhi prakriti ko vash nahin kar sakte woh bhavishya mein satopradhaan prakriti ke sukh ko nahin pa sakte। to prakriti ke vash to nahin hote ho? yeh to aisa hoga jaise koi doctor rogi ko bachaane jaaye lekin svayan rogi ban jaae। karttavya hai prakriti ko parivartan karne ka aur uske bajaay prakriti ke vash ho jaae to kya unko brahman kahenge? brahman to sabhi bane ho na? koi kahega kya ki main brahman nahin hoon। brahman banna arthaat aise lakshan dhaaran karna। to aise lakshandhaari ho ya naamdhaari ho?yeh apne aap se poochhenge।

brahman janma ki visheshta kya hai jo aur koi janma mein nahin hoti? brahman janma ki visheshta yeh hai ki anya sarva janma,aatmaon dvaara aatmaon ke hote hain lekin ek hi yeh brahman janma hai jo param pita paramatma dvaara direct janma hota hai। devta janma bhi shreshtha aatmaon dvaara hi hota hai। paramatma dvaara nahin। to brahman-janma ki visheshta jo saare kalpa ke anya koi janma mein nahin hai। aisi visheshta sampanna janma hai to un aatmaon ki bhi visheshta kya honi chaahiye?jo baap ke gun hain, vahi brahman aatmaon ke gun hone chaahiye। woh gun bhi is brahman janma ke sivaay aur koi janma mein nahin aa sakte। jaise is brahman jeevan mein trikaaldarshi,trinetri,gyaan swaroop bante ho vaise aur janma mein banenge kya?to jo sirf brahman jeevan ke gun hain yeh visheshtaae hain usko is brahman jeevan mein anubhav na kiya to phir kab karenge? brahman ban aur brahman jeevan ki visheshta ka anubhav na kiya to brahman ban kar kiya kya?

jaise anya aatmaon ko kehte ho ki paramatma ki santaan ho kar aur baap ko nahin jaante ho to kaudi tulya ho। aap aise kehte ho na sabhi ko? lekin koi heere tulya janma lekar bhi heere samaan jeevan nahin banaate hain। heera haath mein mile aur usko patthar samajh uska moolya na jaane, aise ko kya kaha jaata hai? - ‘mahaan samajhdaar’। doosra shabd to nahin bolna chaahiye, ulte roop ke mahaan samajhdaar kabhi aise to nahin ban jaate ho?to brahman janma ke moolya ko jaano। saadhaaran baat nahin hai। bas ham bhi brahman ban gae। sadaiv apne ko check karo ki brahman jeevan ko nibha raha hoon? achha।

aise shreshtha janma, shreshtha karma, shreshtha jeevan, shreshtha seva mein sada chalne vaale shreshtha aatmaon,vishwa-kalyaankaari aatmaon aur sarva-bandhanon se sampoorn svatantra aatmaon ko baapdaada ka yaad-pyaar,namaste।

is vaani ka saar

1. jaise yoddhe sarva-vyaktiyon,sarva vaibhvon se kinaara kar keval do baaton ko buddhi mein rakhte hain-’yuddha aur vijay’। vaise hi apne-aap se poochho ki in do baaton ka lakshya rakha hain ya aur bhi kai baaten smriti mein rehti hain! sadaiv yaad rakho ki ham har second, har kadam yuddha ke maidaan par upasthit hain।

2. agar chhoti-si cheenti sher ko athva mahaarthi ko hairaan kar de to aise mahaarthi va sher ko mahaarthi kahenge? kya isi prakaar agar ek vyartha sankalp master sarvashaktivaan ko hairaan kar de ya purooshaartha mein kamjor bana de to aise ko master sarvashaktivaan kahenge?