Avyakt murli du samedi 23 juin 1973

>

23-06-73 om shanti avyakt baapdaadaamdhuban

alaukik khazaane ke maalik

sarva kamjor aatmaon ko bal dene vaale, sarva aatmaon ke tamoguni svabhaav aur sanskaaron ko parivartan karne vaale aur padmaapadma bhaagyashaali banaane vaale baba bole :-

apne ko light house aur might house donon samajhte ho? vartamaan samay ki sthiti pramaan aap sabhi ka kaun-sa swaroop vishwa-kalyaan ka karttavya kar sakta hai?us swaroop ko jaante ho?is samay aavashyakta hai might house ke swaroop ki। kya aisa anubhav karte ho ki almighty baap ki santaan ham bhi might house bane hain? sarva shaktiyaan apne mein samaai hui samajhte ho?shaktivaan nahin lekin sarvashaktivaan। jinka ‘sarvashaktiyaan sampanna’ ke liye gaayan hai ki apraapta koi shakti nahin braahmanon ke khajaane mein।

jaise devtaaon ke liye gaayan hai, apraapta koi vastu nahin devtaaon ke khajaane mein,vaise aap braahmanon ka gaayan hai ki apraapta nahin koi shakti braahmanon ke khajaane mein kyonki master sarvashaktivaan hain। jab baap ka naam hi sarvashaktivaan almighty athoreti hai,arthaat sarvashaktiyon ke khajaane ke maalik ke baalak ho, to aise baalak jo baap ki sarvashaktiyon ke maalik hain to kya unke paas koi apraapti ho sakti hai? jo baalak so maalik hain। aisa koi hai jo apne ko baalak so maalik nahin samajhte hain? sabhi maalik baithe hain na? sarvashaktiyon ke khajaane ke maalik ho na?khajaane ke maalik kabhi yeh sankalp bhi kar sakte hain kya,ki hamaare paas sahanshakti nahin hai va maaya ko parakhne ki shakti nahin hai va gyaan ke khajaane ko sambhaalne ki shakti nahin hai va sankalpon ko samaane ki shakti nahin hai va khajaane ko sumiran karne ki shakti nahin hai? kitna bhi koi kaarya mein buddhi vistaar mein gai hui ho lekin vistaar ko ek second mein samaane ki shakti nahin hai?aise maalik ke kya yeh bol va yeh sankalp bhi ho sakta hai? agar hota hai to usko kya kahen? us samay ki stage ko va sthiti ko kya maalikpan ki sthiti kah sakte hain?

maalik sada maalik hi hota hai। abhi-abhi maalik, abhi-abhi bhikhaari aise master sarvashaktivaan hote hain kya?maalik se baar-baar royal (royal) bhikhaari kyon bante ho? baap ke saamne bhi jab bachcha aakar yeh kahe ki baba hamko madad karna, shakti dena aur sahaara dena, isko kya kaha jaata hai? kya isko royal bhikhaareepan nahin kahenge?yeh hain bhakti ke sanskaar। jaise devtaaon ke aage jaakar kehte the ki aap to sarvagun sampanna ho aur main… vaise hi baap ke aage master sarvashaktivaan aakar kehta hai ki baba aap to sarvashaktiyon ke saagar ho lekin mujh mein woh shakti nahin hai, nirbal hoon, maaya se haar kha leta hoon, vyartha sankalpon ko control nahin kar paata hoon aur maaya ke vighnon se ghabra jaata hoon to kya ye vahi bhakti ke sanskaar nahin hue?

sunaaya tha na ki baap jo hai, jaisa hai usko vaisa na maan kar bhaavna ke vash sarvavyaapi bhi kehte hain,isko bhi aap baap ki insult karte ho na?kade se kada shabd gaali dete ho। vaise hi apne shreshtha svamaan, master sarvashaktivaan,master gyaan, prem aur aananda sabhi ke saagar, apne liye phir kahe ki jara-si shakti ki kami hai to kya unko master saagar kahenge?ek to svayan ko master gyaan ka saagar,aananda ka saagar kahe phir yeh kahe to apni insult karna nahin hua kya?svayan hi svayan ki insult karna kya yeh braahmanon ka svamaan hai?yeh bol bolna va yeh sankalp karna isse apni bhi insult karte ho aur baap ki bhi insult karte ho-kaise?

ek to baap jo daata hai, svayan hi dene vaala hai aur kisi ke kahne se dene vaala nahin hai,to daata ko manushya banaana kya yeh insult nahin hai?kahne se kaun karta hai?-manushya। doosri baat baap ko bhi smriti dilaane vaale bante ho। isse kya siddha hota hai? kya baap ko apna karttavya karna bhool gaya hai? kya isliye aap baap ko smriti dilaate ho? baba, ‘aap to madadgaar hain hi, isliye madad karna’ is kahne ko kya kaha jaay? jab ki gaayan hi yeh hai ki brahman arthaat sarvapraapti swaroop। praapti swaroop ke paas apraapti kahaan se aayi?isliye kaha ki braahmanon ki stage power house hai। ab power house se pare ki bhaasha samjhe? power house ke yeh bol nahin hote hain। ab to final result out hone ka samay bhi sameep aa raha hai। final result ke samay mein bhi agar koi pahla paath hi padhta rahe,usmein bhi majboot na hua ho to aise ka result kya hoga? isliye phir bhi baapdaada kuchh samay pahle suna rahe hain ki jisko bhi highjump dena ho va aage badhna ho to abhi se chhah maas ke andar arthaat is varsha mein apne aap ko jis bhi stage par va jis bhi sthiti mein sthit karna chaahte ho,uske liye yeh chonsa hai। aise thode samay ke andar apne ko sampanna banaane ke liye saadhaaran purooshaartha nahin chalega। abhi to teevra purooshaartha arthaat sankalp, bol aur karma in teenon mein samaanta ka abhyaas karna usko kaha jaata hai-teevra purushaarthi।

jaise buddhi mein yeh sochte ho, samajhte ho ki ham daata ke bachche hain lekin bol aur karma mein antar hai। sankalp mein sochte ho ki ham sarva aatmaon se oonche brahman hain lekin bol aur karma mein antar hai। sochte hain ki vishvakalyaankaari hain lekin bol aur karma mein antar hai। to teenon hi samaan ho jaayen isko kaha jaata hai teevra-purooshaartha arthaat baap-samaan। to kya aise apne ko baap-samaan banaane ke liye samay de rahe hain? chhah maas ke baad is roohaani sena ke mahaaveer, ghodesvaar aur pyaade arthaat praja sabhi pratyaksha honge। jab tak aapas mein hi pratyaksha nahin honge to vishwa ke aage prakhyaat kab honge? aur vishwa ke aage prakhyaat nahin honge to pratyakshata kaise hongi? to svayan ko aur baap ko prakhyaat karne ke liye va baap ki pratyakshata karne ke liye ab last purooshaartha va last so fast purooshaartha kaun-sa rah gaya hai? fast purooshaartha kaun-sa hai jo fast hi last hai, isko jaante ho? kaun-sa purooshaartha saamne aata hai?fast purooshaartha ki vidhi kaun-si hai ki jisse baap samaan ban jaayenge? yeh siddhi hogi। bina vidhi ke siddhi nahin ho sakti। bahut baar sunaaya hai। sirf ek shabd hai। last so fast purooshaartha ki vidhi hai -- pratigya। koi bhi baat ki pratigya karna ki yeh karna hi nahin hai। yeh abhi karna hai। pratigya ki vidhi yeh hai ki last is fast। pratigya arthaat sankalp kiya aur swaroop hua। pratigya karne mein second lagta hai। to ab fast purooshaartha ek second ka hi hona chaahiye। kyonki sunaaya tha ki last paper ki jo result out hona hai। last paper ka samay kya milega? ek second। last paper ka time bhi fix hai aur paper bhi fix hai। paper sunaaya tha na-nashtomoha,smriti swaroop। ek second mein order hua -- nashtomoha ban jaao to ek second mein agar nashtomoha,smriti swaroop na bane,apne ko swaroop banaane arthaat yuddha karne mein hi samay ganva diya aur buddhi ko thikaane lagaane mein samay laga diya to kya ho jaayenge? -fail। to samay bhi ek second ka milna hai। yeh bhi pahle hi sun rahe hain। paper bhi pahle sun rahe hain to kitne paas hone chaahiye?fast purooshaartha ki vidhi hai - pratigya,pratigya se apne ko prakhyaat karo। baap ko prakhyaat karo arthaat pratigya se pratyakshata karo। yeh mushkil hai kya? himmat aur ulhaas aur nasha aur nishaana agar sada saath rakhenge to anek kalpa ke samaan full paas hue hi pade hain। koi mushkil nahin। sirf in chhah maas ke andar apne mukhya chaar subjects ko saamne rakhkar check karna ki chaaron mein paas marks hain?yeh hain kam-se-kam paas marks। lekin jo vishesh aatmaaen hain unko full marks lene ka lakshya rakhna hai। aise nahin samajhna ki do ya teen subjects mein achhe marks hain aur ek ya do mein kam hain to paas ho jaayenge। agar ek subject mein yadi koi fail hota hai to kya hota hai?jisko dobaara paper dena padta hai। uska woh varsha to khatma hua na? arthaat woh sooryavanshi se to miss hua na? sooryavansh ke pahle raajbhaagya aur prakriti ke first sarva praapti sampanna praarabdha se to miss ho jaayenge na? haan, yadi chadhti kala hote-hote treta mein aakar full marks lenge to tretaayug mein kuchh shreshtha praarabdha pa lenge। isliye yeh bhi nahin sochna। chaaron hi subjects mein first purooshaartha hai - full paas hona arthaat full marks lene hain। second purooshaartha sabhi subjects mein paas marks lene ka hai। aur teesra purooshaartha to karna hi nahin hai kyonki teesre ka to sochna hi nahin hai, baba phir bhi time de rahe hain। apne aapko sabhi subjects mein complete kar lo। samjha?teen group out karne hain। number 1ever ready group 2ready group 3 lazy group। is chhah maas ke andar apne ko parivartit kar first group mein laana hai arthaat ever ready group। order hua aur kiya। order maanne mein lazy nahin। in teen groups mein svayan bhi svayan ko darpan mein saakshaatkaar ho jaayega। jaise kalpa pahle brahmaakumaar (naarad) ne darpan mein apna saakshaatkaar kiya na vaise knowledge roopi darpan mein svayan hi svayan ka saakshaatkaar karenge ki main kis group mein hoon aur kis grade mein aane vaala hoon। jaisa group vaise grades honge na? achha।

sada svayan ke prati aur vishwa ke prati shubh chintak sthiti mein sthit rahne vaale, har second aur har sankalp shreshtha vyateet karne vaale, sada apne khajaane ki smriti aur sumiran mein rahne vaale, sada khushi ki khuraak mein bharpoor rahne vaale, sarva kamjor aatmaon ko bal dene vaale, sarva aatmaon ke tamoguni svabhaav aur sanskaaron ko parivartan karne vaale, saakshi aur sada saathi anubhav karne vaale, aise koton mein se koi aur koi mein se koi,padmaapadma bhaagyashaali aatmaon ko baapdaada ka yaad pyaar aur namaste।