Avyakt murli du dimanche 14 juillet 1974

>

14-07-74 om shanti avyakt baapdaadaamdhuban

baap ke samaan saphalta-moortta banne ke liye sarva ke prati shubh bhaavna

saphalta ke sitaare banaane vaale tatha sampoorn lakshya ki praapti karaane vaale har aatma ke shubh chintak shiv baba ne ye madhur mahaavaakya apni dharti ke roohaani sitaaron roopi bachchon ke sammukh uchchaare:-

aaj is sabha ke beech, baap-daada teen prakaar ke sitaare dekh rahe hain। gyaan-sitaare to aap sabhi ho parantu gyaan sitaaron mein bhi teen prakaar kaun-kaun se hain? ek hain saphalta ke sitaare, doosre hain lucky sitaare aur teesre hain ummeedon ke sitaare। harek sitaare ki, apni-apni duniya hai। kya aap sabhi ne apni-apni duniya dekhi hai ya sirf apne aap ko hi dekha hai? duniya arthaat rachna। kya aapko, apni rachna dikhaai deti hai?kya jaante ho ki rachna mein kitni aur kya-kya baaten dekhi jaati hain? aap apni rachna ko to dekhte honge na? jo baap ki rachna,so aapki rachna। aap to master rachayita ho na?aapne baap ki praja par hi to raajya nahin karna hai na?aap master rachayita nahin bante ho kya?sada rachna hi rahenge kya?rachna arthaat apni raajdhaani to bana rahe ho na? raajdhaani mein bhi nambarvaar to hote hain na?woh bhi kis aadhaar se hote hain aur unmein bhi,aapke hi bhakta hain। shaktiyon ke bhakta aur baap ke bhakta alag-alag hain।

aapke bhakta kaun banenge, kis hisaab se aapke bhakta banenge?jin aatmaon ko,jin shreshtha aatmaon dvaara va nimitta bani hui aatmaon dvaara kuchh-na-kuchh praapti ka anubhav hota hai,un dvaara koi saakshaatkaar hota hai aur ya koi vardaan praapti ka anubhav hota hai, to us aadhaar par, woh unki praja aur bhakta bante hain। jo sameep aatmaaen hoti hain; jin aatmaon ka,baap se sambandh bhi jut jaata hai aur saath-saath baap dvaara varse ke adhikaari bhi bante hain, ve royal family mein aate hain। ek hi samay mein,harek aatma,apni royal family bana rahi hai arthaat woh bhavishya sambandh va raajaghraana bhi bana rahi hai;praja bhi bana rahi hai aur bhakta bhi bana rahi hai। bhakton aur praja ki nishaani kya hogi? raajya ke sambandh mein aane ki baat to sunaai,parantu praja aur bhakta in donon mein antar kya hoga?praja keval gyaan aur yog ki praapti karne ki purushaarthi hogi, woh sambandh mein sameep nahin hogi, lekin door ke sambandh mein zaroor hogi। woh maryaada poorvak jeevan banaane mein, yathaayogya tatha yatha-shakti purushaarthi hogi, baaki aur bhi jo doosre subjects hain-dhaarna aur eeshvareey seva- unmein bhi yatha-shakti sahayogi hogi,lekin saphaltaamoorta nahin hogi। iseeliye woh solah kala sampoorn nahin ban paati। koi-na-koi sanskaar va svabhaav ke vasheebhoot hone ke kaaran, nirbal aatma highjump nahin de sakti। isliye royal parivaar mein va raajkul mein aane ke bajaay woh royal praja ban jaate hain। royal kul nahin,royal praja baaki bhakta jo honge, woh kabhi bhi, svayan ko adhikaari anubhav nahin karenge। unmein ant tak,bhaktapne ke sanskaar rahenge aur ve sada maangate hi rahenge-aasheervaad do, shakti do,kripa karo,bal do, ya drishti do aadi। aise maangane ke sanskaar va aadheen hone ke sanskaar unke last tak dikhaai denge। ve sadaiv jigyaasu roop mein hi rahenge। unhein bachchepan ka nasha maalikpan ka nasha, aur master sarvashaktimaan ka nasha dhaaran karaate bhi ve dhaaran nahin kar sakenge। ve thode mein hi raazi rahne vaale honge-yeh hai bhakton ki nishaani। abhi isse dekho ki praja aur bhakta kitne bane hain?bhakta kabhi bhi direct baap ke connection mein aane ki shakti nahin rakhte, ve sada aatmaon ke sambandh mein hi santushta rehte hain। unke baar-baar yahi bol rahenge, aap hi hamaare liye sab-kuchh ho, aapke paas aise bhakta bhi aavenge। na chaahte hue bhi harek nimitta bani hui aatmaon ki praja aur bhakta bante hi rehte hain। ab samjha! aapki duniya va rachna kya hai? aage chalkar harek ko yeh saakshaatkaar bhi hoga ki main kis raajdhaani mein raajyapad paane vaali hoon ya paane vaala hoon।

achha, yeh to hui sitaaron ki duniya arthaat unki rachna। sitaaron mein,pahle number sitaare hain-saphalta ke sitaare। saphalta ke sitaaron ki nishaani kya hai ki jisse ki svayan ko chaik kar sako ki main saphalta ka sitaara hoon ya hovanhaar sitaara hoon? lucky sitaaron ki nishaani aur ummeedvaar sitaaron ki nishaani kya hai? apne aap ko jaante hue bhi, baap-daada knowledge ke darpan dvaara teen stejis ka saakshaatkaar karaate hain। saakshaatkaar karna to sab chaahte ho na?divya- drishti se nahin, to knowledge ke darpan dvaara to kar sakte ho na? saphalta ke sitaaron ki nishaani yeh hai ki unke har sankalp mein dridhta hogi ki saphalta anek baar hui hai aur abhi bhi hui padi hai। honi chaahiye, hogi ya nahin hogi yeh svapna mein bhi kabhi unki smriti mein nahin aayega। balki unhein shat-pratishat nishchay hoga ki saphalta hamaari hui hi padi hai। unke har bol ki yeh visheshta hogi-ki ve har baat mein nishchay-buddhi honge aur unke bol mein, eeshvareey santaan ki khumaari dikhaai degi arthaat unmein eeshvareey nasha dikhaai dega। unmein deh-abhimaan ka nasha nahin dikhaai padega। unke bol dvaara sanshay buddhi vaala bhi, nishchay buddhi ho jaayega; kyonki unhein ek to eeshvareey khumaari hoti hai aur doosra unka har bol shaktishaali hota hai। unke bol saadhaaran va vyartha nahin hote aur unka har karma to shreshtha hota hi hai, lekin unmein visheshta yeh hogi ki unke har karma dvaara,anek aatmaon ka path-pradarshan hoga। jo gaayan bhi hai ki ‘jaise karma ham karenge, hamko dekh aur sabhi karenge’ aise unke har karma,anek aatmaon ko,ek paath padhaane ke nimitta ban jaavenge aur unka har karma shiksha-swaroop hoga। isko hi kaha jaata hai-samartha-karma। aise sankalp,bol aur karma vaala hi har baat mein sada svayan se santushta hoga। santushta hone ke kaaran hi woh harshit bhi hoga lekin use harshit banaana nahin padega balki woh svatah hi sada harshit hoga।

aise saphaltaamoorta se anya aatmaayen bhi sada santushta rahengi arthaat un sarva ki santushtata ki saphalta, pratyaksha phal ke roop mein dikhaai degi। bhavishya phal nahin, balki pratyaksha phal aise sada harshit aatma ko dekh kar, anya aatmaayen bhi,unke prabhaav se, duhkh va uljhan ki lahar se badal kar harshit ho jaavengi। arthaat aisi aatma ke samparka mein aur uske sameep aane se anya aatmaon par bhi harsha ka prabhaav pad jaayega। jaise soorya ke sameep va sammukh jaane vaale ke oopar, na chaahte bhi kirnen padti rehti hain। aise hi saphaltaamoorta ke harsha ki kirnen,anya aatmaon par bhi padti hain arthaat jaise ki baap ke sang ka rang,ek second mein anubhav karte ho। arthaat jab yog-yukta hote ho to baap ka sang lagta hai to uske rang ka anubhav hota na? aise hi saphalta ke sitaaron ke sang ka rang,anya aatmaon ko bhi anubhav hota hai। yeh hai saphaltaamoorta va saphalta ke sitaaron ki nishaani।

doosre hain lucky sitaare । uski nishaani kya hogi? lucky sitaare vishesh roop se baap ke snehi, baap ke charitra, baap ke sarva-sambandhon ke ras mein jyaada magna rehte hain। unke sankalp bhi jyaada shaktishaali nahin, lekin snehi honge। unki smriti roop mein bhi baap ke milan aur baap ke charitron ka jyaada varnan rahega। unki beej roop stage kam rahegi, lekin avyakt milan,avyakt sthiti aur sneh bhari rooh roohaan ismen ve jyaada rahenge। aisi aatmaon ko sneh ke kaaran aur sang tod,ek sang sarva-sambandh nibhaane ke kaaran hi sahayog praapta hota hai। unhein baap ke sahayog ke kaaran mehnat kam karni padti hai aur praapti adhik hoti hai। woh sadaiv aisa anubhav karte hain ki mera lakka achha hai;mujhe baap ki extra madad hai aur main to paar ho hi jaaoongi। mere jaisa sneh kisi ka bhi nahin hai। sahayog hone ke kaaran, unke bol phalak ke hote hain। pahle number vaale mein jhalak hoti hai, doosre number vaale mein jhalak nahin balki phalak hoti hai। woh baap samaan hote hain aur yeh baap snehi hote hain। lekin sahayog kyon aur kis aadhaar par mila ya ve lucky bhi kyon bane? iska mool aadhaar, sarva-sambandh tod ek sang jodna,is sambandh mein ve atoot aur atal hain। is kaaran unko lucky kaha jaata hai। saphaltaamoorta ke bol honge,yeh to hua hi pada hai aur lucky sitaaron ke bol honge, haan main samajhta hoon yeh avashya hoga,baap madadgaar banega-yeh hai doosri stage।

teesre hain ummeedvaar sitaare। aisi aatmaayen, sada saphalta praapta na hone ke kaaran,ummeed rakhti hain, ki karoonga zaroor,pahunchoonga zaroor va banoonga zaroor;lekin beech-beech mein kahi rookte bhi hai, atakte bhi hain aur kabhi-kabhi ve dilshikasta bhi hote hain। anek prakaar ke, bhinna-bhinna vighna aane ke kaaran, kabhi ve ghabraate hain aur kabhi ve mahaaveer ban jaate hain। kabhi baap ke milan ka unhein number milta hai aur kabhi unhein mehnat ke baad milta hai। isliye unka teesra number kahlaaya jaata hai। woh sada harshit nahin rahega aur woh sada santushta bhi nahin rahega। lekin, ummeed kabhi nahin chhodega। woh is nishchay se bhi kabhi dagmag nahin honge, ki main baap ka hoon। lekin nirbal hone ke kaaran, ve kabhi-kabhi dilshikasta ho jaate hain। yeh hain ummeedvaar sitaare, samjha! ab apne gyaan-darpan mein dekhna hai ki main kaun hoon yahi paheli hal karne aaye the na? aur ab ant mein bhi yahi paheli hal karni hai ki main kaun hoon?lakshya saphalta ka sitaara banne ka rakhna hai;kyonki baap-samaan banna hai। sirf baap snehi banne se khush nahin rehna hai।

baap-samaan banaane ke liye va saphaltaamoorta banne ke liye, aaj aapko do baaten sirf do shabdon mein sunaate hain। do shabd dhaaran karna to sahaj hai na? sadaiv sarva-aatmaon ke prati, samparka mein aate hue,sambandh mein aate hue aur seva mein aate hue apni shuddh bhaavna rakho। shubh bhaavna aur shuddh kaamna। chaahe aapke saamne koi bhi pareeksha ka roop aave aur chaahe dagmag karne ke nimitta ban kar aave lekin harek aatma ke prati aap shubh kaamna, aur shuddh bhaavna yeh do baaten har sankalp, bol aur karma mein laao, to aap saphalta ke sitaare ban jaayenge। yeh to sahaj hai na?braahmanon ka yahi dharma aur yahi karma hai। jo dharma hoga vahi karma hoga। baap ki har bachche ke prati yahi shubh kaamna aur shuddh bhaavna hai ki woh baap se bhi oonch bane। is kaaran jab chhoti-chhoti baaten dekhte va sunte hain, to samajhte hai ki ab usi ghadi se sab sampanna ho jaaven। master sarvashaktimaan yadi ve drishti va vritti ki baat kahen to kya shobhta hai?arthaat sarvashaktimaan baap ke aage,master sarvashaktimaan kamjori ki baaten karte hain to isliye ab baap ishaara dete hain ki ab master bano,kyonki svayan ko banaakar phir vishwa ko bhi banaana hai। samjha!

aise samajhdaar bachche, sunna aur karna samaan banaane vaale,har sankalp va har bol mein baap-daada ko follow karne vaale, saphalta ke sitaare lucky aur ummeedvaar sitaare, lakshya ko sampoorn paane ke adhikaari bachchon ko baap-daada ka yaad pyaar, good night aur namaste।

is murli ka saar

1. jo sameep ki aatmaaen hoti hain; jin aatmaon ka baap se sambandh bhi jut jaata hai aur saath-saath varse ke adhikaari bhi bante hain ve royal family arthaat raaj parivaar mein aate hain।

2. praja gyaan-yog ki purushaarthi hogi, lekin woh sambandh mein sameep nahin hogi। dhaarna evan eeshvareey seva mein yatha-shakti sahayogi hogi,kintu saphaltaamoorta nahin hogi aur woh kisi sanskaar va svabhaav ke vasheebhoot hogi।