Avyakt murli du samedi 11 octobre 1975 - 1

>

11-10-75 om shanti avyakt baapdaadaamdhuban

vijayi banne ke liye mukhya dhaarnaaen

kuchhek groups se milne par baapdaada ne unse jo prashn kie aur phir unhonne jo uttar diye unka saar yahaan likha hai:-

prashn:- vijayi banne ke liye kaunsi mukhya dhaarna ki aavashyakta hai?

uttarah -vijayi banne ke liye alert rahne ki avashyakta hai। ek hote hain alert rahne vaale, doosre hote hain albele rahne vaale। jo sada alert hote hain, ve kabhi maaya se dhokha nahin khaayenge, balki ve sada vijayi hi honge।

prashn:- 108ki maala mein aur 16000 ki maala mein aane ke chinha va nishaani kya hai?

uttarah -jo yahaan sada vijayi rehte hain, vahi vijay maala mein aayenge। isliye vaijayanti maala naam pada hai। jo kabhi-kabhi ke vijayi hain ve 16000 ki maala mein aayenge।

prashn:- kaun-sa lakshya rakhne se sada vijayi ban sakte hain?

uttar:- ham abhi ke vijayi nahin, kalpa-kalpa anek baar ke vijayi hain। jo baat anek baar ki jaati hai,to woh svabhaav-sanskaar mein svatah hi aa jaati hai। jaise aaj ki duniya mein jo baat nahin karni chaahiye parantu woh kar lete hain, to kah dete hain ki yeh to mera sanskaar ban gaya hai। to yahaan bhi anek baar ke vijayi hone ki ‘smriti vijay ka sanskaar bana’degi।

prashn:- vyartha ko samartha banaane ki tej machinery kaun-si honi chaahiye?

uttar:-jaise koi bhi cheej ki machinery powerful hoti hai, to kaam teji se hota hai, to yahaan bhi vyartha sankalp ko samartha karne ke liye buddhi roopi machinery powerful ho। buddhi bhi powerful tab hogi jab buddhi ka power house se connection hoga। yahaan connection tootta to nahin lekin loose zaroor ho jaata hai,atah ab woh bhi loose nahin hona chaahiye। tabhi vyartha ko samartha bana sakenge।

doosre group se mulaakaat

prashn:- brahman jeevan ka mukhya karttavya kya hai?

uttar:-baap ke yaad mein sada smriti swaroop hokar rehna। jaise mishri mithaas ka roop hoti hai vaise hi yaad swaroop aise ho jaao ki yaad alag hi na ho sake। agar baap ki yaad chhodi to baaki raha hi kya? jaise shareer se aatma nikal jaay to use murda hi kahenge? vaise hi yadi brahman jeevan se yaad nikal jaay to brahman jeevan kya hua?to aisa yaad-swaroop banna hai, to brahman jeevan ka karttavya hai - yaad-swaroop banna।

teesre group se mulaakaat

prashn:- dehli,yamuna ke kinaare par hai,yamuna kinaare ka gaayan kyon?

uttar:-jaise ab saakaar roop mein jaise yamuna kinaare nivaas karte ho, vaise buddhiyog dvaara svayan ko is deh aur deh ki puraani duniya ki smriti se kinaara kiya hua anubhav karo। sangamayugi arthaat kaliyugi duniya se kinaara kar dena। kinaara arthaat nyaara ho jaana। puraani duniya se nyaare ho gaye ho ki ab bhi uske pyaare ho?

prashn:- dashahre par sabhi raavan ka daah-sanskaar karte hain, lekin ab aapko kya karna hai?

uttarah -aapke apne mein jo raavan-pan ke sanskaar hain, un raavanpan ke sanskaaron ka sanskaar karo arthaat raavanpan ke sanskaaron ko sada ke liye chhutti dekar laabh uthaao। haddiyaan va raakh baandh kar saath nahin le jaana। raakh arthaat sankalp roop mein bhi raavanpan ke sanskaar nahin le jaana।

kuchhek mukhya bahnon se sambodhan

har samay apne ko nimitta bani hui samajhti ho? jo apne ko nimitta bani hui samajhti hain, unhon mein mukhya yeh visheshta hogi - jitni mahaanta utni namrata। donon ka balance hoga। tab hi nimitta bane hue kaarya mein saphaltaamoorta banenge। jahaan namrata ke bajaay mahaanta jyaada hai ya mahaanta ki bajaay namrata jyaada hai to bhi saphaltaamoorta nahin banenge। saphaltaamoorta banne ke liye donon baaton ka balance chaahiye। teachers woh hoti hain, jo sada apne ko baap samaan world servant samajh kar chalti hain। world servant hi vishwa-kalyaan ka kaarya kar sakte hain। teachers ko sadaiv yeh smriti rahni chaahiye, ki teacher ko svayan ko svayan hi teacher nahin samajhna chaahiye। yadi teecharpan ka nasha rakha to roohaani nasha nahin rahega। yeh nasha bhi bodeekonses hai। isliye sada roohaani nasha rahe ki - ‘main vishwa-kalyaankaari baap ki sahayogi vishwa kalyaankaari aatma hoon।’

kalyaan tab kar sakenge jab svayan sampanna honge। jab svayan sampanna nahin honge to vishwa-kalyaan nahin kar sakenge। sadaiv behad ki drishti rakhni chaahiye। behad ki seva-arth jab behad ka nasha hoga, tab behad ka raajya praapta kar sakengi। saphal teacher arthaat sada harshit rehna aur sarva ko harshitmukh banaana। samjha saphaltaamoorta ki nishaani? teacher ko saphaltaamoorta banna hi hai। baap aur seva ke sivaay aur koi baat uski smriti mein na ho। aisi smriti mein rahne vaali teacher sada samartha rahegi। kamzor nahin rahegi। aisi teacher ho?aisa samartha apne ko samajhti ho? samartha teacher hi saphaltaamoorta hoti hai। aisi hi ho na? teacher ko kamjori ke bol bolna bhi shobhta nahin hai। sanskaaron ke vasheebhoot to nahin ho na?kya sanskaaron ko apne vash mein karne vaali ho? complaint karne vaali teacher to nahin ho na? teachers to anekon ki kampalent ko khatma karne vaali hoti hain,phir to apni complaint to nahin honi chaahiye। teachers ko chance to bahut milte hain। complaint samaapta ho gai,phir to complete ho gaye1 baaki aur kya chaahiye?achha।

murli ka mukhya saar

1. vijayi banne ke liye sada alert rahne ki aavashyakta hai। jo sada alert hote hain, ve kabhi maaya se dhokha nahin khaate।

2. vyartha sankalpon vo samartha karne ke liye buddhi roopi machinery ko power house ke connection se powerful banaao।

3. braahman jeevan ka karttavya hai - yaad swaroop banna।

4. aap apne se raavanpan ke sanskaaron ka sada ke liye sanskaar karo,sankalp roop mein bhi raavanpan ke sanskaar saath na jaayen।

(5) sada yahi roohaani nasha rakho ki main vishwa-kalyaankaari baap ki sahayogi vishwa-kalyaankaari aatma hoon।