Avyakt murli du vendredi 24 octobre 1975 - 2

>

24-10-75 om shanti avyakt baapdaadaamdhuban

shaktiyon ka vishesh gun - nirbhayta

shiv-shakti sena ke sarvochcha adhipti sarvashaktivaan shiv baba ne panjaab va gujraat zone ki

shiv-shaktiyon ko sambodhit karte hue ye madhur mahaavaakya uchchaare :-

shaktiyon ka vishesh gun nirbhayta ka gaaya hua hai। woh apne mein anubhav karti ho? nirbhay sirf koi manushyaatma se nahin lekin maaya ke vaar se bhi nirbhay। jo maaya se ghabraane vaali nahin, usko shakti kaha jaata hai। maaya se darti to nahin ho? jo darta hai woh haar khaata hai। jo nirbhay hota hai usse maaya khud bhaybheet hoti hai, kyonki bhay ke kaaran shakti kho jaati hai aur samajh bhi kho jaati hai। vaise bhi jab kisi se bhay hota hai to hosh-havaas gum ho jaate hain, jo samajh hoti hai woh bhi gum ho jaati hai। to yahaan bhi jo maaya se ghabraate hain unki maaya se samajh kho jaati,isliye ve maaya ko jeet nahin sakte। to jaisa naam hai - shakti sena। to jab shaktipan ki visheshta - nirbhayta practical mein dikhaai de,tab kahenge shaktiyaan। kisi bhi prakaar ka bhay hai to use shakti nahin kahenge। abla jo hoti hai woh sadaiv adheen hoti hai,woh adhikaari nahin hoti। aap to adhikaari ho na? bhay ke kaaran adheen to nahin ho jaayengi? to panjaab ki shakti-sena aisi nirbhay hai?

jab se brahman bane ho to maaya ko challenge di hai ki - ‘‘aao maaya! jitna vaar karna ho,utna karo,main shiv-shakti hoon।’’ maaya ke parvash hona apni kisi kamzori ke kaaran hota hai। jahaan kamjori hai vahaan maaya hai। jaise jahaan gandagi hai vahaan machchhar zaroor paida hote hain। vaise hi maaya bhi, jahaan kamzori hoti hai woh wahin pravesh hoti hai। to kamzor hona arthaat maaya ka aahvaan karna। khud hi aahvaan karte aur khud hi darte, to phir aahvaan karte hi kyon ho? yeh nasha rakho ki - ‘‘ham hain hi ‘shiv-shakti sena’। kalpa pahle bhi maaya par vijayi bani theen। ab bhi vahi part phir repeat kar rahi hoon।’’ kitni hi baar ke vijayi ho? jo anek baar ka vijayi hai woh kitna nirbhay hoga? kya woh darenge? shaktiyon ne baap ko pratyaksha karne ka nagaada kaun-sa bajaaya hai? kumbhakran ko jagaane ke liye bada nagaada bajaao। chhota nagaada bajaati ho to kumbhakran karvat to badalte hain arthaat achha-achha to karte hain parantu phir so jaate hain। to unhon ke liye ab chhote-mote nagaade se kaam na hoga, isliye baar-baar samparka badhaana pade। unhon ka dosh nahin, woh to gahri neend mein hain। tumhaara kaam hai koi vishesh programme banaay unhon ko jagaana।

pravritti mein rehte apne ko sevaadhaari samajhne se hi baap ko sada saathi bana sakenge

panjaab se aaye hue gopon se mulaakaat karte samay avyakt baapdaada ne ye madhur mahaavaakya uchchaareh -

jaisa sthaan hota hai, us sthaan ki smriti se bhi sthiti mein bal milta hai। jaise madhuban-nivaasi kahne se pharishtaapan ki sthiti automatically ho jaati hai। pharishta arthaat jiska deh se rishta nahin। to jo bhi deh ke rishte hain woh sab yahaan bhool jaate hain। thode samay ke liye bhi yeh anubhav to karte ho na। yeh beech-beech mein madhuban mein aana; itna mushkil hote hue bhi yeh anubhav karne kyon aate ho? baar-baar yeh anubhav to karaaya jaata hai। yahaan ka anubhav vahaan smriti mein bal deta hai। isliye madhuban mein aana zaroori hai। vahaan pravritti mein rehte ho,woh bhi seva-arth। ghar samjhenge to ‘grihasthi’,sevaadhaari samjhenge to trustee। grihasthi mein chaaron or ke karma-bandhan kheenchenge। sevaadhaari samjhenge to trasteepan mein mera-pan khatma hoga। grihasthi mein mera-pan hota hai। mera-pan bahut lamba hai। jahaan mera-pan hai vahaan baap nahin ho sakta। jahaan mera-pan nahin vahaan baap hai। grihastheepan mein had ke adhikaari ban jaate ho - ‘‘mera maana jaay, mera suna jaay aur mere pramaan chalna chaahiye।’’ jahaan had ka adhikaar hai, vahaan behad ka adhikaar khatma ho jaata hai। ab beeti ko beeti karke fullstop lagaate jaao। fullstop bindi hota hai। fullstop nahin lagaate arthaat bindi roop mein sthit nahin hote to ya aashcharya (!) ya comma (,) ya question (?)laga dete ho। aashcharya ki nishaani kya kahe? jo kehte hain - ‘‘aise yeh hota hai kya! braahmanon mein yeh-yeh baat hoti hai!’’ yeh aashcharya ki nishaani ho gai। yeh bhi nahin hona chaahiye। yeh kyon hua? ‘kyon-kya’kehna yeh question hua। yeh bhi vyartha sankalp utpanna hone ka aadhaar hai। jo hota hai usko saakshi ho dekho। saakshi ke bajaay aatma ke saathi ban jaate ho,baap ke saathi ke bajaay aatma ke saathi ban jaate ho। ‘‘achha aisi baat hai!,main bhi aise samajhta hoon।’’ -yeh hai sunne ka saath aur sunaane ka saath। to jahaan aatma ke saathi bane to paramatma ke saathi kaise banenge? jitna samay aatma ka saathi, utna samay baap ke saathi nahin banenge। yeh khandit yog ho jaata hai। khandit cheez phainkane vaali hoti hai। vahi moorti jo poojne yogya hoti hai - jab woh khandit ho jaati hai to uski koi value nahin hoti। to yahaan bhi jab yog khandit, to shreshtha praapti nahin, arthaat value nahin। sada ke saathi। akhanda yogi। atoot yogi aur nirantar baapdaada ke saathi - aise hain panjaab nivaasi?

is murli ke vishesh tathya

1. jaisa sthaan hota us sthaan ki smriti se bhi sthiti mein bal milta hai।

2. pravritti mein rehte ghar samjhenge to grihasthi, sevaadhaari samjhenge to trustee।

3. ab beeti ko beeti karke fullstop (.) lagaate jaao to vyartha sankalpon ka chakkar chalna rook jaayega।

4. sirf manushyaatma se hi nahin balki maaya ke vaar se bhi nirbhay aatma‘shakti’ hai।

5. apni hi kisi kamzori ke kaaran maaya ke parvash hote hain।

6. main kalpa-kalpa ki anek baar ki vijayi aatma hoon - yeh yaad rahne se maaya se nirbhay rahege।