Avyakt murli du dimanche 25 janvier 1976

>

25-01-76 om shanti avyakt baapdaadaamdhuban

double light swaroop bano

nirantar yogi ki sthiti tak pahunchne ka maarga bataane vaale tatha double light swaroop banaane vaale shiv baba bole –

bhaktimaarga mein lakshmi ko mahaadaani dikhaate hain to mahaadaani ki nishaani kaunsi dikhaate hain? (lakshmi ka haath khula,dene ke roop mein dikhaaya jaata hai) sampatti jhalakti rehti hai। yeh shaktiyon ka yaadgaar hai। lakshmi arthaat sampatti ki devi। woh sthool sampatti nahin, knowledge ki sampatti,shaktiyon roopi sampatti ki devi arthaat dene vaali। to jo yeh chitra banaaya hai, aisi sampatti ki devi banna hai। chaahe knowledge deve, chaahe shaktiyaan deve। aisa jo yaadgaar chitra hai, chetan mein apne ko aisa anubhav karte ho? ek second bhi koi aapke saamne aave to bhi drishti se aisa anubhav kare ki mainne kuchh paaya। tab kahenge dene vaali devi। ab chaahiye yeh service,tab vishwa ka kalyaan hoga। itni sabhi aatmaon ko dena to zaroor hai, to dene ka swaroop sookshm aur ati shaktishaali। samay kam aur praapti oonchi। aise dene vaali shaktiyaan ya deviyaan kitni taiyaar hui hain? aisi kitni deviyaan hongi? isi pramaan yaadgaar mein bhi number hain। koi har samay dene vaali, koi kabhi-kabhi dene vaali, koi kinheen-kinheen ko dene vaali,koi sabhi ko dene vaali, koi kehti hai chonsa mile to karen, pheelda hogi ya sahayog milega to karenge। to unka yaadgaar kya hai? unki yaadgaar mein bhi tithi-taareekh fix hoti hai। jo sada ke karne vaale hote hain,unki pooja bhi sada hoti hai। jo samay va sahayog ke aadhaar se chonsa lete hain, unke yaadgaar ki date fix hoti hai। kai deviyon ke vastra badalne ki, har karma ki pooja hoti hai। isse siddha hai ki unhonne har karma karte, saara samay daan kiya hai,jisko ‘mahaadaani’kahenge। isliye unki mahaan pooja,mahaan yaadgaar hai। ek hoti hain jo sada saathiyon ke saath sneh nibha ke chalti hain, doosre saath hote bhi sneh ka saath nahin nibhaate। unke yaadgaar mein bhi saara samay pujaariyon ka saath nahin milta। jo yahaan svaartha ke liye aavenge,yaadgaar mein bhi spashta hota hai ki yeh kiska yaadgaar hai। yeh bhi raaz hai। abhi aisa banna hai। sada saathiyon ke saath sneh ka saath nibhaana hai,sirf samay par nahin, sada ke liye saath nibhaana hai। svaartha se nahin, kaam nikaalne ke liye nahin balki sneh se aur sada ke liye saath nibhaana hai। achha!

groups se mulaakaat

apne ko sada baap-daada ke saath anubhav karte ho? ya akela anubhav karte ho? jaise baap ko hajaaron bhujaaon vaala dikhaate hain,sarvashaktivaan hote hue bhi bachchon ke saath yaadgaar bhujaaon ke roop mein dikhaate hain, aise tum bachche hi apne ko sada sarvashaktivaan baap ke saath anubhav karte ho ya kabhi-kabhi anubhav karte ho? jo sada saath ka anubhav karenge,ve kabhi kisi dehdhaari ke saath ki aavashyakta anubhav nahin karenge। kabhi bhi kisi seva mein dehdhaari ka aadhaar nahin lenge। maryaada pramaan, sangathan pramaan sahayog lena alag baat hai। baaki kisi paristhiti mein dehdhaari ki yaad aaye ki yeh mujhe paristhiti se paar karenge,raay denge ya sahaara denge - isse siddha hai ki sarvashaktivaan ka sahaara sada saath nahin rehta। sada saath rahne vaale ka baap se sameep sambandh hone ke kaaran sankalp mein,rooh-roohaan mein bhi baba yaad aayega ki yeh baba se poochhen। koi nimitta teacher yaad aaye, koi saathi yaad aaye ya hamashreek yaad aaye - yeh bhi hota hai, woh bhi kaarya ke prati। lekin man mein, buddhi mein sada baba-baba yaad aaye। jab direct saath nibhaane ka vaayda hai, to vaayde ka phaayda uthaao। is samay to baap ke saath vyaktigat anubhav ho sakta hai, phir saare kalpa mein nahin hoga। jo sirf abhi ki hi praapti hai,phir hogi hi nahin, to uska poora-poora laabh uthaao। koi bhi baat ho, sada baba hi yaad rahe। isko kaha jaata hai ‘nirantar yogi।’ har kadam baap ki yaad rahe, to yeh bhi yog hua। aise nirantar yogi ho athva banna hai? jab baap svayan saath dene ka offer kar rahe hain, us offer ko sveekaar karna chaahiye na? jab aadha kalpa bhakti-maarga mein baap ko manaaya saath dene ke liye; abhi to baap khud offer kar rahe hain। to offer ko sveekaar karna chaahiye। jaise sthool mein koi kisi ko koi cheez offer kare, woh sveekaar na kare to isko sabhyata nahin samjhenge। yeh ijjat kahenge? yeh to god ki offer hai। sada baap ke saath arthaat nirantar yogi। woh to sada light roop hai, to aise sang se light roop bhi aur halke bhi ho jaayenge। to double light hui na। jab ‘light’bojh uthaane ke liye offer kar rahe hain to phir tum bojh kyon utha rahe ho? bojh vaala full speed mein chal nahin sakta। to ab in anek prakaar ke bojhon se halke ho jaao। apna kona-kona saaph karo, kichde ko andar hi andar sambhaal ke nahin rakho। aise nahin ki chonsa milega to denge। hai to kichda hi na,kichde se to keede paida hote hain। un ko rakhne ka arth hai unki vriddhi karna। to jab kichde se khaali rahenge tab baap dvaara mila hua khazaana apne mein bhar sakenge। achha!