Avyakt murli du vendredi 25 janvier 1980

>

25-01-1980 om shanti avyakt baapdaada madhuban

"bindu (gyaan sindhu paramatma) ka bindu (aatma) se milan"

aaj baap-daada milne ke liye aaye hain। murli to bahut suni hai। sarva murliyon ka saar ek hi shabd hai - ``bindu''jismen saara vistaar samaya hua hai। bindu to ban gaye ho na? bindu banna, bindu ko yaad karna aur jo kuchh beeta usko bindu lagaana। yeh sahaj anubhav hota hai na? yeh ati sookshm aur ati shaktishaali hai। jisse aap sab bhi sookshm pharishta ban,master sarva shaktivaan ban part bajaate ho। saar to sahaj hai na ya mushkil hai? double foreigners kya samajhte hain? sahaj hai ya double foreigners ko double easy hai?ab to baap-daada saar swaroop dekhna chaahte hain।

harek bachcha aisa divya darpan ho jis darpan dvaara har manushya aatma ko apne teenon kaal dikhaai den। aise trikaaldarshan karaane vaale darpan ho? jis darpan se, `kya tha' aur `abhi kya hoon'aur`bhavishya mein kya milna hai' - yeh teenon kaal spashta dikhaai dene se sahaj hi baap se varsa lene ke liye aakarshit hote hue aayenge। jab saakshaatkaar karenge arthaat jaanenge aur aise jaanenge jaise spashta dekhne ka anubhav ho। to jab jaanenge arthaat anubhav karenge va dekhenge ki anek janmon ki pyaas va anek janmon ki aashaayen - mukti mein jaane ki va svarga mein jaane ki, abhi poorn hone vaali hain to sahaj hi aakarshit hote aayenge। do prakaar ki aatmaayen hain। bhakta aatmaayen prem mein leen hona chaahti hain aur koi aatmaayen jyoti mein leen hona chaahti hain। donon hi leen hona chaahti hain। aisi aatmaon ko second mein baap ka parichay,baap ki mahima aur praapti sunaae, sambandh ki lavleen avastha ka anubhav karaao। lavleen honge to sahaj hi leen hone ke raaj ko bhi samajh jaayenge। to vartamaan samay `lavleen' ka anubhav karaao। bhavishya leen ka raasta bataao। to sahaj hi praja banaane ka kaarya ho jaayega। aise trikaaldarshi banaane ka divya darpan bane ho? aise divya darpan mein apne purooshaartha ke har samay ki result ka chitra kheencho ki samartha rahe ya vyartha mein gaye। vyartha ka poj aur samartha ka poj donon hi dikhaai denge। samartha ka poj kya hoga - master sarva shaktivaan va diltakhtansheen। vyartha ka poj kya hoga - sada yuddha ke roop mein yoddhe ka poj hoga। takhtansheen nahin lekin yuddha sthal par khade hain। takhtansheen saphalta moorta aur yuddha sthal mein khade hue mehanti ki moorta honge। chhoti-si baat mein bhi mehnat hi karte rahenge। woh yaad swaroop honge, woh phariyaad swaroop। aise apna bhi swaroop dekhte rahenge aur doosre ko bhi teenon kaal ka darshan karaayenge। aise divya darpan bano। samjha।

aaj to double foreigners aur gujraat se milna hai। donon ki dance karne mein raashi ek hi hai। woh bh naachte hain aur yeh bhi khoob naachte hain। gujraat vaale bhi prem swaroop hain aur double foreigners bhi pyaar ke anubhav ke aadhaar par bhaagte hain। gyaan ke saath-saath pyaar mila hai। us roohaani pyaar ne hi inhen prabhu ka banaaya hai। double pyaar milta hai। ek baap ka doosra parivaar ka। to pyaar ke anubhav ne parvaana banaaya hai। pyaar videshiyon ke liye chumbak ka kaam karta hai। phir sunne va marne ke liye bhi taiyaar ho jaate hain। yeh marna to pasanda hai na। ye marna arthaat svarga mein jaana। isliye marne vaale ke liye kehte hain - svarga gaya। woh marne vaale nahin jaate hain, lekin sangam par jo mara, woh svarga gaya। iski copy karke jo deh se marte hain uske liye akhbaar mein daalte hain ki phalaana svarga gaya। to marna pasanda hai na! apni marja se mare ho na, majboori se to nahin। yeh saari sabha marjeeva banne vaalon ki hai। kahaan saans rooka hua to nahin hai na puraani duniya mein। yahi wonder hai jo mare hue bhi hansate hain। (foreigners baba ki baaton se hans rahe the।)

aap logon ki Christian philosophy mein bhi hai ki murdo mein aakar jaan daalte hain। pahle murde bane phir jaan pad gai। naya janma ho gaya। is marne mein maja hai, dar nahin hai।

deedi ji se -vartamaan samay mahaaveeron ki vatan mein vishesh mahphil lagti hai। kyon lagti hai, woh jaanti ho? aajkal baap-daada ne jaise sthaapna mein brahma ke sampoorn swaroop dvaara saakshaatkaar karaane ki seva li, aise aajkal ashta ratan so ishta ratan unko bhi shakti ke roop mein saath-saath saakshaatkaar karaane ki seva karaate hain। sthool shareer dvaara saakaari eeshvareey seva mein busy rehte ho lekin aajkal ananya shreshtha aatmaon ki double seva chal rahi hai। jaise brahma dvaara sthaapna ki vriddhi hui vaise abhi shiv shakti ke combined saakshaatkaar dvaara saakshaatkaar aur sandesh milne ka kaarya aapke sookshm shareeron dvaara bhi ho raha hain। to baap-daada ananya bachchon ko is seva mein bhi sahayogi banaate hain। isliye sookshm seva ke practical plan ke kaaran vahaan mahphil lagti hai। isliye mahaaveer bachchon ko karma karte bhi kisi bhi karmabandhan se mukta,sada double light roop mein rehna hai। baap ne sookshm vatan mein emerge kiya, seva karaai - uski anubhooti aage chalkar bahut karenge। double seva ka part chal raha hai। baap-daada ananya bachchon ke sangathan dvaara bhakton ko aur vaigyaanikon ko, donon ko touching karaane ki seva karaate rehte hain। unmein ananya bhakti ke sanskaar bhar rahe hain jo aadha kalpa bhakti maarga ko chalaate rahenge। aur vaigyaanikon ko parivartan karne aur refine saadhan banaane mein। jo saadhan jaise hi sampanna honge to uska sukh sampoorn aatmaayen lengi। ye (vaigyaanik) nahin le sakenge। to donon hi kaarya sookshm seva dvaara ho rahe hain। samjha।

saare din mein sookshm vatan vaasi kitna samay hokar rehti ho? ki sthool seva jyaada hai। aap log kitna bhi busy raho, baap to apna kaarya kara hi lete hain। apne sampoorn aakaar ka anubhav kiya hai? jaise saakaar aakaar ho gaye, aap sabka bhi sampoorn aakaari swaroop hai। jo nambarvaar harek saakaar aakaar ban jaayenge। aakaar ban karke seva karna achha hai ya saakaar shareer parivartan kar seva karna achha। advance party to saakaar shareer parivartan kar seva kar rahi hai। lekin koi koi ka part ant tak saakaari aur aakaari roop dvaara bhi chalta hai। aapka kya part hai? kiska advance party ka part hai,kiska antah vaahak shareer dvaara seva ka part hai। donon part ka apna-apna mahatva hai। first second ki baat nahin। variety part ka mahatva hai। advance party ka bhi kaarya koi kam nahin hai। sunaaya na woh jor-shor se apne plan bana rahe hain। vahaan bhi naameegraami hain।

paarteeyon se - sabhi sada mani ke samaan chamakte ho? mani sada chamakti hai na। ek-ek mani ki kitni value hoti hai। vo amoolya ratan hain jiski keemat aaj ke maanav kuchh kar nahin sakte kyonki baap ke ban gaye na,jo baap ke bane woh amoolya ratan ho gaye। saare vishwa ke andar sarvashreshtha aatma ho gaye। itni khushi rehti hai? jaise shareer ka occupation sada yaad rehta hai vaise aatma ka occupation bhi kabhi bhoolna na chaahiye। sangamayug ka shreshtha bhaagya hi hai - baap ke amoolya ratan banna। is bhaagya ko bhool kaise sakte hain! sabhi seva mein sahayog dete hain। olraaunda sevaadhaari। seva ka chance milna, yeh bhi drama mein ek lift hai। jitni yagya seva karte hain utna praaptiyon ka prasaad svatah hi praapta ho jaata hai। nirvighna rehte hain। ek baari seva ki aur hajaar baari seva ka phal praapta ho gaya। sada sthool sookshm langar laga rahe। kisi ko santushta karna yeh sabse badi seva hai। mehmaan nivaaji karna,yeh sabse bada bhaagya hai, kehte bhi hain - mehmaan bhaagyashaali ke ghar mein aate hain।

2. sabhi maaya ko jaante hue maaya se anjaan rehte ho?jaise devtaayen `maaya'shabd ko hi nahin jaante,unse poochho ki maaya kya hai - to anjaan hai na। aise aap maaya ko jaante hue ``maaya''ke vaar se anjaan raho। maaya ko aise samaapta kar do jo naamnishaan hi khatma ho jaae। maaya kabhi mehmaan to nahin banti hain na। darvaaja banda hai? agar kila majboot hota hai to dushman nahin aata hai। oonch stage par rehna arthaat oonchi deevaar। kabhi bhi neeche ki stage mein nahin aana। jab baap ke ban gaye to baap ka banna arthaat mera pan samaapta hona। moh ki utpatti ka aadhaar hai - `mera'। jab mera hi nahin to moh kahaan se aaya। jab apne ko had ka rachayita samajhte ho to vikaaron ki utpatti hoti hai। sada bhaai-bhaai ki smriti mein raho to koi bhi vikaar utpanna nahin ho sakte।