Avyakt murli du dimanche 10 janvier 1982

>

10-01-82 om shanti avyakt baapdaada madhuban

"karmaateet stage ki vyaakhya"

sada karmabandhan mukta shiv baba bole:-

‘‘aaj baapdaada ‘raajya sabha' ko dekh rahe hain। harek bachcha svaraajya adhikaari,apne nambarvaar ‘karmaateet stage' ke takhta adhikaari hain। vartamaan sangamayugi svaraajya adhikaari aatmaon ka aasan kaho va sinhaasan kaho,woh hai - ‘karmaateet stage'। karmaateet arthaat karma karte bhi karma ke bandhanon se ateet। karmon ke vasheebhoot nahin lekin karmendriyon dvaara har karma karte hue adhikaareepan ke nashe mein rahne vaale। baapdaada har bachche ke nambarvaar raajya adhikaar ke hisaab se nambarvaar sabha dekh rahe hain। takhta bhi nambarvaar hai aur adhikaar bhi nambarvaar hai। koi sarva adhikaari hai aur koi - adhikaari hai। jaise bhavishya mein vishvamhaaraaja aur mahaaraaja - antar hai। aise yahaan bhi sarva karmendriyon ke adhikaari arthaat sarva karmon ke bandhan se mukta - isko kaha jaata hai ‘sarva adhikaari'। aur doosre ‘sarva'nahin, lekin adhikaari hain। to donon hi number ki takhtansheen darbaar dekh rahe hain। harek raajya adhikaari ke mastak par bahut sundar rang-birangi maniyaan chamak rahi hain। yeh maniyaan hain - ‘divya gunon' ki। jitna-jitna divya gundhaari bane ho utni hi maniyaan mastak par chamak rahi hain। kiski jyaada hain, kiski kam hai। chamak bhi harek ki apni-apni hai। aisa apna raajya sabha ka raajya adhikaari chitra ke darpan knowledge mein dikhaai de raha hai? sabhi ke paas darpan to hai। karmaateet chitra dekh sakte ho na?dekh rahe ho apna chitra?kitni sundar ‘raajya sabha' hai। karmaateet stage ka takhta kitna shreshtha takhta hai। isi stage ki adhikaari aatmaayen arthaat takhtansheen aatmaayen vishwa ke aage eeshta dev ke roop mein pratyaksha hongi। svaraajya adhikaari sabha arthaat ishta dev sabha। sabhi apne ko aise ishta dev aatma samajhte ho? aise param pavitra,sarva prati merciful, sarva prati master vardaata, sarva prati master roohaani sneh saagar, sarva prati shubh bhaavnaaon ke saagar, aise poojya ishta dev aatma ho। sabhi brahman aatmaon mein nambarvaar yeh sab sanskaar samaaye hue hain। lekin emerge roop mein abhi tak kam hain। abhi is ishta devaatma ke sanskaar emerge karo। varnan karne ke saath ‘smriti swaroop' so samartha swaroop ban, stage par aao। is varsha mein sarva aatmaayen yahi anubhav karen ki jinhen ham dhoondhate hain,jin aatmaon ko ham chaahte hain, jin shreshtha aatmaon se ham kuchh chaahna rakhte the, vahi shreshtha aatmaayen, yahi hain। sabke mukh se va man se yahi aavaaj nikle, ki yeh vahi hain। aise anubhav karen - bas, inhon se mile to baap se mile। jo kuchh mila hai, inhon dvaara hi mila hai। yahi master hain,guide hain,enjil hain,messenger hain। bas yahi hain, yahi hain, aur vahi hain - yeh dhun sabke andar lag jaae। inheen do shabdon ki dhun ho -’’yahi hain aur vahi hain''। mil gaye-mil gaye…yeh khushi ki taaliyaan bajaayen। aise anubhav karaao। aisi anubhooti karaane ke liye vishesh ashta shakti swaroop,alankaari shakti swaroop chaahiye। lekin shakti swaroop bhi maa ke swaroop mein chaahiye। aajkal sirf shakti swaroop se bhi santushta nahin honge lekin ‘shakti maa'। jo prem aur paalna dekar har baap ke bachche ko khushi ke jhoole mein jhulaayen। tab baap ke varse ke adhikaari ban saken। baap se milaane ke yogya banaane mein aap nimitta shakti ke roop mein aisa pavitra prem aur apni praaptiyon dvaara shreshtha paalna do, yogya banaao arthaat yogi banaao। master rachayita banna to sabko aata hai। alpakaal praapti karaane vaale naamdhaari jo mahaan aatmaayen hain,ve bhi rachna to bahut rach lete hain, prem bhi dete hain lekin paalna nahin de sakte hain। isliye followers ban jaate hain lekin paalna se bada kar baap se milaayen arthaat paalna dvaara baap ke adhikaari yogya aatma banaayen, yeh nahin kar sakte hain। isliye followers hi rah jaate, bachche nahin bante। baap ke varse ke adhikaari nahin bante hain। aise hi aap brahman aatmaon mein bhi rachna bahut jaldi rach lete ho arthaat nimitta bante ho lekin prem aur paalna dvaara un aatmaon ko avinaashi varse ke adhikaari banaana,ismen bahut kam yogya aatmaayen hain। jaise laukik jeevan mein maa bachche ko paalna dvaara shaktishaali banaati hai, jisse woh sada kisi bhi samasya ka saamna kar sake। sada tanduroosta rahe, sampattivaan rahe। aise aap shreshtha aatmaayen jagat maata ban ek do aatmaon ki maa nahin, ‘jagat maa', behad ki maa ban, man se aisa shaktishaali banaao jo sada aatmaayen apne ko vighna vinaashak, shakti sampanna, healthy aur wealthy anubhav karen। ab aisi paalna ki aavashyakta hai। aisi paalna vaale bahut kam hain। parivaar ka arth hi hai -‘prem aur paalna' ki anubhooti karaana। isi paalna ki pyaasi aatmaayen hain। to samjha,is varsha kya karna hai?

sabke mukh se yahi nikle ki hamaare sameep ke sambandhi humein mil gaye hain। pahle relation ki anubhooti karaao phir connection sahaj ho jaayega। ‘‘hamaare hamko mil gaye'' - aisi lahar chaaron or phail jaae। tab mukh se niklega -jinhen paana tha woh pa liya। jaise baap ko bhinna-bhinna sambandh se aap adhikaari aatmaayen anubhav karti ho। aise vo tadapti hui aatmaayen yahi anubhav karen ki jo kuchh milna hain, jo kuchh paana hai,inheen dvaara hi milna hai, paana hai। phir naam bhinna-bhinna kahenge। aise vaayumandal banaao। maa bhi bachche ko baap ka parichay svayan hi deti hai। maa hi bachche ko baap se milaati hai। apne tak nahin banaana hai lekin baap se connection jodne yogya banaana hai। sirf maa-maa kehte rahen,aise chhote bachche nahin banaana। lekin baba-baba sikhaana। varse ke adhikaari banaana। samjha?

jaise baap ke liye sabke mukh se ek hi aavaaj nikalti hai -’’mera baba''। aise aap har shreshtha aatma ke prati yeh bhaavna ho, mahsoosta ho, jo harek samjhe ki yeh - ‘meri maa'hai। yeh behad ki paalna। harek se mere-pan ki bhaavna aaye। harek samjhe ki yeh mere shubhchintak,sahayogi seva ke saathi hain। isko kaha jaata hai - ‘baap samaan'। isko hi kaha jaata hai - karmaateet stage ke takhtansheen। jo seva ke karma ke bhi bandhan mein na aao। hamaara sthaan,hamaari seva,hamaare student,hamaari sahayogi aatmaayen, yeh bhi seva ke karma ka bandhan hai। is karmabandhan se - ‘karmaateet'। to samjha - is varsha kya karna hai? karmaateet banna hai aur ‘‘yeh vahi hain,yahi sab kuchh hain,'' yeh mahsoosta dilaae,aatmaon ko sameep laana hai। thikaane par laana hai। apne prati bhi sunaaya aur seva ke prati bhi sunaaya। achha - sabka sankalp tha na ki abhi kya karna hai? kaun-si lahar phailaani hai। achha-

aise svaraajya adhikaari, karmaateet stage ke takhtansheen, sarva ko sameep sambandh ki anubhooti karaane vaale,behad ki prem bhari paalna dene vaale, aise ishta dev aatmaon ko baapdaada ka yaadapyaar aur namaste।''

shakti sena ko dekh baap ati harshit hote hain, shaktiyaan sada baap ki saathi hain iseelie gaayan hi hai - ‘shiv shakti'। shaktiyon ke saath baap ka bhi yaadgaar hai to combined ho gai na! shakti - shiv se alag nahin, shiv-shakti se alag nahin। aise combined। ek-ek jagatjeet ho, kam nahin ho। saare jagat par jeet paati ho। jagat par raajya karna hai na! us sena mein tukdiyaan hoti hain, do tukdi, chaar tukdi। yahaan behad hai। behad baap ki sena aur behad ke oopar vijay। baapdaada ko bhi khushi hoti hai,ek-ek bachcha had ka nahin,behad ka maalik hai।

sabhi bachche, baap ke mukh ho na?baap ke mukh arthaat mukh dvaara baap ka parichay dene vaale। isliye ‘gau mukh' ka bhi gaayan hai। sada mukh dvaara ‘baba-baba'nikalta hai,to mukh ka bhi mahatva ho gaya na!

baapdaada sabhi bachchon ko baap ke ghar ka aur baap ka shrringaar kehte hain, to baap ke ghar ka shrringaar ja rahe ho, auron ko shrringaar karaane ke liye। kitnon ko shrringaar karke laayenge?ek-ek ko baap ke aage guldasta laana padega। sabhi ratna amoolya ho kyonki baap ko jaana aur baap se sab kuchh paaya। to sada apne ko isi khushi mein rakhna aur sabko yahi khushi baantate rehna। achchhaasangam yug hai hi chalne aur chalaane ka yug। kisi bhi baat mein rookna nahin hai। chalne, chalaane mein apna aur sarva ka kalyaan hai। sangam par baapdaada sada aapke saath hain। kyonki abhi hi baap bachchon ke aage haajar-naazar hote hain। yaad kiya aur haajar hue। dekhte hue na dekho,sunte hue na suno, baap ki suno to chalte chalenge। achha