Avyakt murli du mardi 9 mars 1982

>

09-03-82 om shanti avyakt baapdaada madhuban

“holi manaane aur jalaane ki alauvvkik reettti”

holi ke uplakshya mein avyakt baapdaada ke uchchaare hue mahaavaakyah -

‘‘aaj haaista baap apne holeehanson se milne aaye hain। harek holeehans ki buddhi mein sada gyaan ke moti maanik ratan bhare hue hain। aise holeehans baapdaada ko bhi saare kalpa mein ek hi baar milte hain। aise vishesh holeehans se baapdaada saara hi sangamayug holi manaate rehte hain। sansaari log varsha mein ek do din holi manaate lekin manaane ke saath ganvaate bhi hain aur aap holi hans,manaate bhi ho to kamaate bhi ho, ganvaate nahin ho। baapdaada se sabhi bachche door baithe bhi holi mana rahe hain। baapdaada ke paas desh-videsh ke bachchon ka shreshtha sneh ka sankalp pahunch raha hai। sabhi bachchon ke naynon aur mastak ki pichkaari dvaara prem ki dhaara,ati sneh ki sugandhit pichkaari aa rahi hai। baapdaada bhi return mein sarva bachchon ko naynon ki pichkaari dvaara ashta shakti arthaat ashta rangon ki pichkaari se khel rahe hain। baapdaada dekh rahe hain jaise sthool rangon dvaara laal rang se laal bana dete hain। bhinnabhinna rangon se bhinna-bhinna roop bana dete hain aise har shakti ke roohaani rang se har shakti swaroop ban jaate hain, har gun swaroop ho jaate hain। drishti ke dvaara roop parivartan ho jaata hai। aisi roohaani holi manaane ke liye aaye ho na?

baapdaada pushpon ki varsha kar holi manaane ke bajaae harek bachche ko sada ke liye roohaab dvaara roohaani gulaab bana dete hain। svayan hi pushpa ban jaate hain। aisi holi sivaae baap aur bachchon ke koi mana nahin sakte hain। janma lete hi baap ne holi manaae holi bana diya। to woh hai manaane vaale aur aap ho sada ‘holi'banne vaale। sada har gun ka rang, har shakti ka rang,sneh ka rang laga hua hi hai। aise holi hans ho na! tilak lagaane ki bhi jaroorat nahin। ho hi sada tilakdhaari। avinaashi tilak laga hua hi hai na। jo mitaate bhi mit nahin sakta। alpakaal ke bajaae sadaakaal manaate rehte aur auron ko bhi banaate rehte। ve log to mangal milan ke liye gale milte hain lekin aap holi hans baapdaada ke gale ka haar hi ban gaye ho। sada gale ka haar ban chamakte hue ratna vishwa ke aage roshni phaila rahe ho। ek-ek ratna aise chamakte hue light swaroop ho jo hajaaron bulb bhi woh roshni nahin de sakte। aise chamakte hue ratna - apne light might swaroop ko jaante ho na! saare vishwa ko andhakaar se roshni mein le jaane vaale aap chamakte hue ratna ho। baapdaada aise holi hanson se vishesh din ke pramaan roohaani holi mana rahe hain।

holi jalaai bhi aur manaai bhi। jalaana aur manaana donon hi aata hai na? jalaane ke baad hi manaana hota hai। sankalp ki teeli se, jo bhi kuchh sva prati va seva prati vyartha sankalp arthaat kamzori ke sankalp sanskaar hain,sabko ikatthe karke teeli laga do,isi ko hi sookhi lakdiyaan kehte hain। to sabko ikatthe karke dridh sankalp ki teeli laga do। to jalaana bhi ho jaayega। jalaana hi manaana aur banna hai। teeli lagaane aati hai na? to jalaao aur manaao। arthaat sva ko sada ‘holi'banaao। aise to nahin teeli lagaate to teeli lagti hi nahin। teeli bhi maachis ke sambandh bina jalti nahin। to baap ke saath samparka sambandh hoga, abhyaas ki teeli par masaala theek hoga tab second mein sankalp kiya aur bana। to sab saadhan theek chaahiye। sambandh bhi chaahiye। abhyaas bhi chaahiye। sambandh hai aur abhyaas kam hai to mehnat ke baad saphalta milegi। second mein sankalp ka swaroop nahin ban sakenge। baar-baar sankalp karte-karte mehnat ke baad saphalta hogi। aap sabhi ke mehnat arthaat bhakti ka samay samaapta ho gaya na! bhakti ka arth hi hai mehnat! bhakti ka samay samaapta hua arthaat mehnat samaapta hui। ab bhakti ka phal lene ka samay hai। bhakti ka phal hai ‘gyaan'arthaat muhabbat na ki mehnat। 63janma mehnat ki,thodi va jyaada lekin mehnat to ki na! ab antim ek janma muhabbat ke samay bhi mehnat karenge kya? ab to mehnat ka phal khaao। phal khaane ke samay bhi beej bote rahenge kya! ab to sada baap ki muhabbat dvaara phal khaao arthaat sada phaleebhoot bano। phal khaao arthaat sada saphal raho। phal khaana arthaat sada holi manaana va holi ban jaana। ab mehnat karne ke,yuddha karne ke sanskaar samaapta karo। ab to raajya bhaagya pa liya phir yuddha kaahe ki? devpad ke bhaagya se bhi shreshtha bhaagya to ab paaya hai। svaraajya ka maja vishwa ke raajya mein bhi nahin hoga। to raajya bhaagyavaan aatmaayen abhi bhi yuddha kyon karti ho? isliye mehnat ke sanskaar,yuddha ke sanskaar va sankalp ki puraani lakdiyon ko aag laga do। yahi holi jalaao। baapdaada ko bhi bachchon ke mehnat ke sanskaar dekh taras padta hai। abhi tak bhi mehnat karenge to phal kab khaayenge?iska matlab albela nahin banna ki mehnat to karni nahin hai। albela nahin banna hai lekin sada muhabbat mein magan rehna hai। lavleen rehna hai। socha aur hua - aise abhyaasi bano। master sarvashaktivaan ho to sankalp kiya aur anubhooti hui - aise sahaj abhyaasi bano। shreshtha sankalpon ke khajaane ko swaroop mein laao। koi bhi shreshtha kaarya karte ho to sajaate ho na! jaise kal bhi shrringaar kiya na? (kal madhuban me 5 kanyaaon ka samarpan samaaroh hua jismen unhein khoob sajaaya gaya tha) shrringaari hui saji hui moorta bhi shubh nishaani hai। to aap sada shubh kaarya mein upasthit ho to sada gunon ke gahnon se sajaayen hue raho। sirf buddhi ki tijaari mein banda kar nahin rakho। sada gunon ke gahnon se saji sajaai hui moorta,yahi 16shrringaar arthaat 16 kala sampanna, sarvagun sampanna bano। aise oonche te oonche baap ke bachche sada suhaagin,sada bhaagyavaan aatmaayen bigar shrringaar ke kaise sajegi! suhaag ki nishaani bhi shrringaar hai aur raajya kul ki nishaani bhi shrringaar hai। to aap kaun ho? raajaaon ka raaja banaane vaale ke kul ke ho aur sada suhaagin ho। to gunon ke gahnon se saji sajaai roohaani moorta sada bano। aisi holi manaai hai?

madhuban mein holi manaai na? naachna,gaana yeh hai manaana। to sada gaate ho, sada naachte ho aur sthool mein bhi naacha aur gaaya bhi। manaaya na?gaaya bhi,khaaya bhi। yog bhi lagaaya,bhog bhi lagaaya। man bhi sada meetha, mukh bhi sada meetha। to holi ho gai na! hai hi kalpa kalpa ki holi। baaki kya karenge? gulbaasi daalenge? gulaab ki pattiyaan daalenge? svayan hi gulaab ho। baaki koi aasha rah gai ho to kal gulaab jal daal dena। rang mein to range hue hi ho। woh rang to mitaana padega aur yeh rang to jitna chadha hua ho utna achha hai।

aise sada roohaani gulaab, sada gyaan ke rang mein range hue,sada prabhu milan manaane vaale, sada gunon ke gahnon se saji sajaai hui moorta, baapdaada ke sameep aur samaan ratnon ko, chaahe door hain chaahe sammukh hain,lekin sabhi holi hanson ko baapdaada avinaashi holi banne ki mubaarak de rahe hain। saath-saath sarva lavleen aatmaon ko sneh ke respond mein yaadapyaar aur sarva shreshtha aatmaon ko namaste।''

party ke saath avyakt mulaakaat (gujraat)

1- aap sab bade te bade vyaapaari ho na? vishwa ke andar koi bhi itna bada business nahin kar sakta। jo hoshiyaar businessman hote hain ve kamaai ko badhaate jaate hain। laukik mein jab vriddhi hoti hai to ek-ek bindi lagaate jaate hain। aapko bhi bindi lagaana hai। main bhi bindi, baap bhi bindi। bade te bade vyaapaari ho lekin lagaana hai bindi। 6va 8 likhne mein mushkil bhi ho sakti hai lekin bindi to sab laga sakte ho। yeh sahaj bhi hai aur shreshtha bhi। saare din mein kitni bindi lagaate ho? jab question hota hai to bindi mit jaati hai। bindi ke bina question bhi hal nahin hota। to bindi lagaane mein sab hoshiyaar ho na?bindi lagaane mein samay bhi nahin lagta। main bhi bindi,baba bhi bindi। iske liye yeh bhi koi nahin kah sakta ki samay nahin hai। second ki baat hai। to jitne second milen bindi lagaao phir raat ko gino kitni bindi lagaai! kisi baat ko socho nahin, jo baat jyaada sochte ho vo jyaada badhti hai। sab soch chhod ek baap ko yaad karo, yahi dua ho jaayegi। yaad mein bahut phaayde bhare hain - jitna yaad karenge utna shakti bharti jaayegi, sahayog bhi praapta hoga। aur seva bhi ho jaayegi। achha -