Avyakt murli du samedi 27 mars 1982

>

27-03-82 om shanti avyakt baapdaada madhuban

“beejroop sthiti tatha alaukik anubhootiyaan”

beejroop shiv baba bindu aatmaon ke prati bole:-

‘‘aavaaj se pare rahne vaala baap, aavaaj ki duniya mein aavaaj dvaara sarva ko aavaaj se pare le jaate hain। baapdaada ka aana hota hi hai saath le jaane ke liye। to sabhi saath jaane ke liye ever ready ho va abhi tak taiyaar hone ke liye samay chaahiye? saath jaane ke liye bindu banna pade। aur bindu banne ke liye sarva prakaar ke bikhre hue vistaar arthaat anek shaakhaaon ke vriksha ko beej mein samaakar beejroop sthiti arthaat bindu mein sabko samaana pade। laukik reeti mein bhi jab bade vistaar ka hisaab karte ho to saare hisaab ko samaapta kar last mein kya kehte? kaha jaata hai - ‘kaho shiv arthaat bindi'। aise srishti chakra va kalpa vriksha ke andar aadi se ant tak kitne hisaab kitaab ke vistaar mein aaye? apne hisaab kitaab ki shaakhaaon athva vistaar roopi vriksha ko jaante ho na?deh ke hisaab ki shaakha,deh ke sambandhon ki shaakhaayen, deh ke bhinnabhinna padaarthon mein bandhani aatma banne ki shaakha, bhakti maarga aur gurooon ke bandhanon ke vistaar ki shaakhaayen, bhinna-bhinna prakaar ke vikarmon ke bandhanon ki shaakhaayen,karmabhog ki shaakhaayen, kitna vistaar ho gaya। ab in saare vistaar ko bindu roop ban bindi laga rahe ho? saare vistaar ko beej mein sama diya hai va abhi bhi vistaar hai?is jadajdeebhoot vriksha ki kisi bhi prakaar ki shaakha rah to nahin gai hai?sangamayug hai hi puraane vriksha ki samaapti ka yug। to he sangamayugi braahmanon! puraane vriksha ko samaapta kiya hai? jaise patte-patte ko paani nahin de sakte। beej ko dena arthaat sabhi patton ko paani milna। aise itne 84janmon ke bhinna-bhinna prakaar ke hisaab-kitaab ka vriksha samaapta karna hai। ek-ek shaakha ko samaapta karne ka nahin। aaj deh ke smriti ki shaakha ko samaapta karo aur kal deh ke sambandhon ki shaakha ko samaapta karo,aise ek-ek shaakha ko samaapta karne se samaapti nahin hogi। lekin beej baap se lagan lagaakar, lagan ki agni dvaara sahaj samaapti ho jaayegi। kaatna bhi nahin hai lekin bhasma karna hai। aaj kaatenge, kuchh samay ke baad phir prakat ho jaayega - kyonki vaayumandal ke dvaara vriksha ko natural paani milta rehta hai। jab vriksha bada ho jaata hai to vishesh paani dene ki aavashyakta nahin hoti। natural vaayumandal se vriksha badhta hi rehta hai va khada hua rehta hai। to is vistaar ko paaye hue jadajdeebhoot vriksha ko abhi paani dene ki aavashyakta nahin hai। yeh aatomaitik badhta jaata hai। aap samajhte ho ki purooshaartha dvaara aaj se deh sambandh ki smriti roopi shaakha ko khatma kar diya, lekin bina bhasma kiye hue phir se shaakha nikal aati hai। phir svayan hi svayan se kehte ho va baap ke aage kehte ho ki yeh to hamne samaapta kar diya tha phir kaise aa gaya! pahle to tha nahin phir kaise hua। kaaran? kaata, lekin bhasma nahin kiya। aag mein pada hua beej kabhi phal nahin deta। to is,hisaab-kitaab ke vistaar roopi vriksha ko lagan ki agni mein samaapta karo। phir kya rah jaayega? deh aur deh ke sambandh va padaartha ka vistaar khatma ho gaya to baaki rah jaayega ‘bindu aatma va beej aatma'। jab aise bindu,beej swaroop ban jaao tab aavaaj se pare beejroop baap ke saath chal sako। isliye poochha ki aavaaj se pare jaane ke liye taiyaar ho? vistaar ko samaapta kar diya hai? beejroop baap, beej swaroop aatmaon ko hi le jaayenge। beej swaroop ban gaye ho? jo ever ready hoga usko abhi se alaukik anubhootiyaan hoti rahengi। kya hongi?

chalte phirte, baithte,baatcheet karte pahli anubhooti- yeh shareer jo hisaabkitaab ke vriksha ka mool tana hai jisse yeh shaakhaayen prakat hoti hain, yeh deh aur aatma roopi beej, donon hi bilkul alag hain। aise aatma nyaarepan ka chalte phirte baar-baar anubhav karenge। knowledge ke hisaab se nahin ki aatma aur shareer alag hain। lekin shareer se alag main aatma hoon! yeh alag vastu ki anubhooti ho। jaise sthool shareer ke vastra aur vastra dhaaran karne vaala shareer alag anubhav hota hai aise mujh aatma ka yeh shareer vastra hai, main vastra dhaaran karne vaali aatma hoon। aisa spashta anubhav ho। jab chaahe is deh bhaan roopi vastra ko dhaaran karen, jab chaahe is vastra se nyaare arthaat dehbhaan se nyaare sthiti mein sthit ho jaayen। aisa nyaarepan ka anubhav hota hai? vastra ko main dhaaran karta hoon ya vastra mujhe dhaaran karta hai?chaitanya kaun?maalik kaun?to ek nishaani - ‘nyaarepan ki anubhooti'। alag hona nahin hai lekin main hoon hi alag।

doosri nishaani va anubhooti- jaise bhakton ko va aatmagyaaniyon ka va koi- koi parmaatma-gyaaniyon ko divya drishti dvaara jyoti bindu aatma ka saakshaatkaar hota hai, to saakshaatkaar alpakaal ki cheej hai, saakshaatkaar koi apne abhyaas ka phal nahin hai। yeh to drama mein part va vardaan hai। lekin ever ready arthaat saath chalne ke liye samaan bani hui aatma saakshaatkaar dvaara aatma ko nahin dekhengi lekin buddhiyog dvaara sada svayan ko saakshaat ‘jyoti bindu aatma'anubhav karegi। saakshaat swaroop banna sadaakaal hai aur saakshaatkaar alpakaal ka hai। saakshaat swaroop aatma kabhi bhi yeh nahin kah sakti ki mainne aatma ka saakshaatkaar nahin kiya hai। mainne dekha nahin hai। lekin woh anubhav dvaara saakshaat roop ki sthiti mein sthit rahengi। jahaan saakshaat swaroop hoga vahaan saakshaatkaar ki aavashyakta nahin। aise saakshaat aatma swaroop ki anubhooti karne vaale athaarti se,nishchay se kahenge ki mainne aatma ko dekha to kya lekin anubhav kiya hai। kyonki dekhne ke baad bhi anubhav nahin kiya to phir dekhna koi kaam ka nahin। to aise saakshaat aatma-anubhvi chalte-phirte apne jyoti swaroop ka anubhav karte rahenge।

teesri anubhooti- aisi samaan aatma arthaat ever ready aatma - saakaari duniya aur saakaari shareer mein hote hue bhi buddhiyog ki shakti dvaara sada aisa anubhav karegi ki main aatma chaahe sookshm vatan mein, chaahe mool vatan mein,vahaan hi baap ke saath rehti hoon। second mein sookshm vatan vaasi, second mein moolavtanvaasi,second mein saakaar vatan vaasi ho karmayogi ban karma ka part bajaane vaali hoon lekin anek baar apne ko baap ke saath sookshm vatan aur mool vatan mein rahne ka anubhav karenge।

phursat mili aur sookshm vatan va mool vatan mein chale gaye। aise sookshm vatan vaasi, moolavtanvaasi ki anubhooti karenge jaise kaarya se phursat milne ke baad ghar mein chale jaate hain। daphtar ka kaam poora kiya to ghar mein jaayenge va daphtar mein hi baithe rahenge! aise ever ready aatma baar-baar apne ko apne ghar ke nivaasi anubhav karengi। jaise ki ghar saamne khada hai। abhi-abhi yahaan,abhi-abhi vahaan। saakaari vatan ke kamre se nikal mool vatan ke kamre mein chale gaye।

aur anubhooti - aisi samaan aatma bandhanmukta hone ke kaaran aise anubhav karegi jaise udta panchhi ban oonche se oonche udte ja rahe hain aur oonchi sthiti roopi sthaan par sthit hote anubhav karenge ki yeh sab neeche hain। main sabse oopar hoon। jaise vigyaan ki shakti dvaara‘space'mein chale jaate hain to dharni ka aakarshan neeche rah jaata hai aur woh svayan ko sabse oopar anubhav karte aur sada halka anubhav karte hain। aise silence ki shakti dvaara svayan ko vikaaron ki aakarshan, va prakriti ki aakarshan sabse pare udti hui stage arthaat sada double light roop anubhav karenge। udne ki anubhooti sab aakarshan se pare oonchi hai। sarva bandhanon se mukta hai। is sthiti ki anubhooti hona arthaat oonchi udti kala va udti hui sthiti ka anubhav hona। chalte-phirte ja rahe hain, ud rahe hain, baap bhi bindu, main bhi bindu, donon saath-saath ja rahe hain। samaan aatma ko yeh anubhav aisa spashta hoga jaise ki dekh rahe hain। anubhooti ke netra dvaara dekhna, divya drishti dvaara dekhne se bhi spashta hai,samjha! aise to vistaar bahut hai phir bhi saar mein thodi-si nishaaniyaan sunaai। to aise ever ready ho arthaat anubhvi swaroop ho? saath jaane ke liye taiyaar ho na ya kahenge abhi ajun yeh rah gaya hai! aisi anubhooti hoti hai va seva mein itne busy ho gaye ho jo ghar hi bhool jaata hai। seva bhi iseelie karte ho ki aatmaon ko mukti va jeevanmukti ka varsa dilaaven।

seva mein bhi yeh smriti rahe ki baap ke saath jaana hai to seva mein sada achal sthiti rah sakti hai? seva ke vistaar mein saar roopi beej ki anubhooti ko bhoolo mat। vistaar mein kho nahin jaao। vistaar mein aate svayan bhi saar swaroop mein sthit rah aur auron ko bhi saar swaroop ki anubhooti karaao। samjha -achha।

aise sada saakshaat aatma swaroop ke anubhvi moorta, sada sarva hisaab-kitaab ke vriksha ko samaapta kar bindi lagaae bindi roop mein sthit rah bindu baap ke saath sada rahne vaale, abhi-abhi karmayogi, abhi-abhi sookshm vatan vaasi, abhi-abhi moolavtanvaasi aise sada abhyaasi aatma, sada apni udti kala ka anubhav karne vaali aatma,aise baap samaan ever ready aatmaon ko baapdaada ka yaadapyaar aur namaste।''

party ke saath:- (panjaab tatha gujraat zone)

1.maaya ki chhaaya se bachne ke liye chhatrachhaaya ke andar raho:- sada apne oopar baap ke yaad ki chhatrachhaaya anubhav karte ho?yaad ki chhatrachhaaya hai। is chhatrachhaaya ko kabhi chhod to nahin dete? jo sada chhatrachhaaya ke andar rehte hain ve sarva prakaar ke maaya ke vighnon se safe rehte hain। kisi bhi prakaar se maaya ki chhaaya pad nahin sakti। yeh5 vikaar,dushman ke bajaae daas bankar sevaadhaari ban jaate hain। jaise vishnu ke chitra mein dekha hai - ki saamp ki shayya aur saamp hi chhatrachhaaya ban gaye। yeh hai vijayi ki nishaani। to yeh kiska chitra hai? aap sabka chitra hai na। jiske oopar vijay hoti hai woh dushman se sevaadhaari ban jaate hain। aise vijayi ratna ho। shaktiyaan bhi grihasthi maataaon se, shakti sena ki shakti ban gai। shaktiyon ke chitra mein raavan ke vansh ke daityon ko paanv ke neeche dikhaate hain। shaktiyon ne asuron ko apne shakti roopi paanv se daba diya। shakti kisi bhi vikaari sanskaar ko oopar aane hi nahin degi।

2.gyaan ka daan karne vaale sachche-sachche mahaadaani bano- sada buddhi dvaara gyaan saagar ke kanthe par rahne vaale arthaat saagar ke dvaara mile hue akhut khajaane ke maalik apne ko samajhte ho? saagar jaise sampanna hai, akhut hai, akhanda hai, aise hi aatmaayen bhi master, akhanda,akhut khajaanon ke maalik hain। jo khajaane mile hain usko mahaadaani ban auron ke prati kaarya mein lagaate raho। jo bhi sambandh mein aane vaali bhakta va saadhaaran aatmaayen hain unke prati sada yahi lagan rahe ki bhakton ko bhakti ka phal mil jaae,bichaare bhatak rahe hain, bhatakna dekhkar taras aata hai na! jitna merciful banenge utna bhatakti hui aatmaon ko sahaj raasta bataayenge। sandesh dete chalo - yeh nahin socho ki koi nikalta hi nahin hai। aap mahaadaani bano, sandesh dete raho, ulhana na rah jaae। avinaashi gyaan ka kabhi vinaash nahin hota। aaj sunenge, ek maas baad sochenge aur sochkar sameep aa jaayenge। isliye kabhi bhi dilshikasta nahin banna। jo karta hai uska banta hai। aur jiski karte ho woh bhi aaj nahin to kal maanenge zaroor। to akhut seva athak bankar karte raho। kabhi bhi thakna nahin kyonki baapdaada ke paas sabka jama ho hi jaata hai aur jo karte ho uska pratyakshaphal khushi bhi mil jaati hai।

3-vaataavran ko powerful banaane ka lakshya rakho to seva ki vriddhi ke lakshan dikhaai denge:- jaise mandir ka vaataavran door se hi kheenchata hai, aise yaad ki khushbu ka vaataavran aisa shreshtha ho jo aatmaon ko door se hi aakarshit kare ki yeh koi vishesh sthaan hai। sada yaad ki shakti dvaara svayan ko aage badhaao aur saath-saath vaayu mandal ko bhi shaktishaali banaao। sevaakendra ka vaataavran aisa ho jo sabhi aatmaayen khinchati hui aa jaaen। seva sirf vaani se hi nahin hoti,mansa se bhi seva karo। harek samjhe mujhe vaataavran powerful banaana hai, ham jimmevaar hain। aisa jab lakshya rakhge to seva ki vriddhi ke lakshan dikhaai denge। aana to sabko hai, yeh to pakka hai। lekin koi seedhe aa jaate hain, koi chakkar lagaakar, bhatakne ke baad aa jaate hain। isliye ek-ek samjhe ki main jaagti jyoti bankar aisa deepak banoon jo parvaane aapehi aayen। aap jaagti jyoti bankar baithenge to parvaane aapehi aayenge।

4-phursat mein rahne vaali aatmaon ki seva bhi phursat se karo-to saphalta milegi:- vaanaprasthi jinhon ko sada phursat hai,jo retired hain,unki seva ke liaae thodi mehnat karni padegi - ve sirf card baantane se nahin aayenge। phursat vaalon ki seva bhi phursat arthaat samay dekar karni padegi kyonki ve apne ko vaanaprasthi hone ke kaaran anubhvi samajhte hain। unhein anubhav ka abhimaan hota hai। isliye unki seva ke liye thoda jyaada samay dena pade aur tareeka bhi mitrata ka, sneh milan ka ho। samjhaane ka nahin। mitrata ke naate se unhon ko milo। aise nahin sunaao ki yeh baat aap nahin jaante ho,main jaanta hoon। anubhav ki len-den karo। unki baat ko suno to samjhenge yeh humein regard dete hain। kisi ko bhi sameep laane ke liye unki visheshta ka varnan karo phir unhein apna anubhav sunaakar sameep le aao। agar kahenge course karo, gyaan suno to nahin sunenge isliye anubhav sunaao। baapdaada ko abhi aise vaanaprasthiyon ka guldasta bhent karo। unhein mitrata ke naate se sahayogi banaakar bulaao।

5.nirmaan bano to nav nirmaan ka karttavya aage badhta rahega:- sada apne ko seva ke nimitta bane hue seva ka shrringaar samajhkar chalte ho? sevaadhaari ki mukhya visheshta kaun-si hai? sevaadhaari arthaat nirmaan karne vaale sada nirmaan। nirmaan karne vaale aur nirmaan rahne vaale। nirmaanta hi seva ki saphalta ka saadhan hai। nirmaan banne se sada seva mein halke rahenge। nirmaan nahin, maan ki ichchha hai to bojh ho jaayega। bojh vaala sada rookega। teevra nahin ja sakta। isliye nirmaan hain ya nahin hain uski nishaani ‘halka'hoga। agar koi bhi bojh anubhav hota hai to samjho nirmaan nahin hain।

6.sachche roohaani sevaadhaari arthaat sarva sambandhon ki anubhooti ek baap se karne aur karaane vaale- sarva sambandh ek baap se hain,baap sada sammukh mein haajar-naazar hain, aisa anubhav hota hai?tumheen se khaaoon, tumheen se baithoon, tumheen se sunoon…iska anubhav hota hai na? baap hi sachcha mitra ban gaya to auron ko mitra banaane ki jaroorat hi nahin। jo sambandh chaahiye us sambandh se baapdaada sada sammukh mein haajar-naazar hain। to shikshak arthaat sarva sambandhon ka ras ek baap se anubhav karne vaali, isko kaha jaata hai - ‘sachche sevaadhaari'। svayan mein hoga to auron ko bhi anubhooti kara sakengi। agar nimitta bani hui aatmaon mein koi bhi rasna ki kami hai to aane vaali aatmaon mein bhi woh kami rah jaayegi। to sarva rasnaaon ka anubhav karo aur karaao।

7. ham allaah ke bageeche ke pushpa hain - is svamaan mein raho- sada apne ko baapdaada ke arthaat allaah ke bageeche ke phool samajhkar chalte ho? sada apne aap se poochho ki main roohaani gulaab ban sada roohaani khushbu phailaata hoon? jaise gulaab ki khushbu sabko meethi lagti hai,chaaron or phail jaati hai,to woh hai sthool,vinaashi cheej aur aap sab avinaashi sachche gulaab ho। to sada avinaashi roohaaniyat ki khushbu phailaate rehte ho? sada isi svamaan mein raho ki ham allaah ke bageeche ke pushpa ban gaye - isse bada svamaan aur koi ho nahin sakta। ‘vaah mera shreshtha bhaagya' - yahi geet gaate raho। bholaanaath se sauda kar liya to chatur ho gaye na! kisko apna banaaya hai?kisse sauda kiya hai? kitna bada sauda kiya hai? teenon lok hi saude mein le liye। aaj ki duniya mein sabse bade te bada koi bhi dhanvaan ho lekin itna bada sauda koi nahin kar sakta,itni mahaan aatmaayen ho - is mahaanta ko smriti mein rakhkar chalte chalo।

8. braahmanon ka karttavya hai - khushi ka daan kar mahaadaani banna- sabse bade se bada khajaana,khushi ka khajaana hai, jo khajaana apne paas hota hai use daan kiya jaata hai। aap khushi ke khajaane ka daan karte raho। jisko khushi denge woh baar-baar aapko dhanyavaad dega। dukhi aatmaon ko khushi ka daan de diya to aapke gun gaayenge। mahaadaani bano,khushi ke khajaane baanto। apne hamjinsa ko jagaao। raasta dikhaao। seva ke bina brahman jeevan nahin। seva nahin to khushi nahin। isliye seva mein tatpar raho। roj kisi na kisi ko daan zaroor karo। daan karne ke bina neend hi nahin aani chaahiye।

prashn-baapdaada ke gale mein kaun se bachche maala ke roop mein piroye rehte hain?

uttar-jinke gale arthaat mukh dvaara baap ke gun, baap ka diya hua gyaan va baap ki mahima nikalti rehti,jo baap ne sunaaya vahi mukh se aavaaj nikalta,aise bachche baapdaada ke gale ka haar ban gale mein piroye rehte hain।

achha - omshaanti।