Avyakt murli du dimanche 11 avril 1982

>

11-04-82 om shanti avyakt baapdaada madhuban

“vyartha ka tyaag kar samartha bano”

sarva samartha shiv baba bole:-

‘‘aaj baapdaada apne sarva vikarmaajeet arthaat vikarma- sannyaasi aatmaon ko dekh rahe hain। brahman aatma banna arthaat shreshtha karma karna aur vikarma ka sannyaas karna। harek brahman bachche ne brahman brahman bante hi yeh shreshtha sankalp kiya ki ham sabhi ab vikarma se sukarma ban gaye। sukarma aatma shreshtha brahman aatma kahlaai jaati hai। to sankalp hi hai vikarmaajeet banne ka। yahi lakshya pahle-pahle sabhi ne dhaaran kiya na! isi lakshya ko rakhte hue shreshtha lakshan dhaaran kar rahe ho। to apne aap se poochho - vikarmon ka sannyaas kar vikarmaajeet bane ho? jaise laukik duniya mein bhi uchcha royal kul ki aatmaayen koi saadhaaran chalan nahin kar sakteen vaise aap sukarma aatmaayen vikarma kar nahin sakteen। jaise had ke vaishnav log koi bhi taamsi cheej sveekaar kar nahin sakte,aise vikarmaajeet vishnuvanshi - vikarma va vikalpa ka tamoguni karma va sankalp nahin kar sakte। yeh brahman dharma ke hisaab se nishedh hai। aane vaali jigyaasu aatmaon ke liye bhi direction likhte ho na ki sahaj yogi ke liye yeh-yeh baaten nishedh hain to aise braahmanon ke liye va apne liye kya-kya nishedh hain woh achhi tarah se jaante ho? jaante to sabhi hain aur maante bhi sabhi hain lekin chalte nambarvaar hain। aise bachchon ko dekh baapdaada ko is baat par ek hansi ki kahaani yaad aai jo aap log sunaate rehte ho। maante bhi hain,kehte bhi hain lekin kehte hue bhi karte hain। is par doosron ko tote ki kahaani sunaate ho na। kah bhi raha hai aur kar bhi raha hai। to isko kya kahenge? aisa brahman aatmaon ke liye shreshtha lagta hai? kyonki brahman arthaat shreshtha। to shreshtha kya hai? sukarma ya saadhaaran karma? jab brahman saadhaaran karma bhi nahin kar sakte to vikarma ki to baat hi nahin। vikarmaajeet arthaat vikarma, vikalpa ke tyaagi। karmenndriyon ke aadhaar se karma ke bina rah nahin sakte। to deh ka sambandh karmenndriyon se hai aur karmenndriyon ka sambandh karma se hai। yeh deh aur deh ke sambandh ke tyaag ki baat chal rahi hai। karmenndriyon ka jo karma ke saath sambandh hai - us karma ke hisaab se vikarma ka tyaag। vikarma ke tyaag bina sukarma va vikarmaajeet ban nahi sakte। vikarma ki paribhaasha achhi tarah se jaante ho। kisi bhi vikaar ke anshamaatra ke vasheebhoot ho karma karna arthaat vikarma karna hai। vikaaron ke sookshm swaroop,royal swaroop donon ko achhi tarah se jaante ho aur iske oopar pahle bhi suna diya hai ki braahmanon ke royal roop ke vikaar ka swaroop kya hai? agar royal roop mein vikaar hai va sookshm anshamaatra hai to aisi aatma sada sukarma ban nahin sakti।

amritvele se lekar har karma mein check karo ki sukarma kiya va vyartha karma kiya va koi vikarma bhi kiya? sukarma arthaat shreemat ke aadhaar par karma karna। shreemat ke aadhaar par kiya hua karma svatahhi sukarma ke khaate mein jama hota hai। to sukarma aur vikarma ko check karne ki vidhi yeh sahaj hai। is vidhi ke pramaan sada check karte chalo। amritvele ke uthne ke karma se lekar raat ke sone tak har karma ke liye ‘shreemat'mili hui hai। uthna kaise hai, baithna kaise hai, sab bataaya hua hai na! agar vaise nahin uthte to amritvele se shreshtha karma ki shreshtha praalabdha bana nahin sakte। arthaat vyartha aur vikarma ke tyaagi nahin ban sakte। to is sambandh ka bhi tyaag। vyartha ka bhi tyaag karna pade। kai samajhte hain ki koi vikarma to kiya nahin। koi bhool to ki nahin। koi aisa bol to bola nahin। lekin vyartha bol,samartha banne nahin denge। arthaat shreshtha bhaagyavaan banne nahin denge। agar vikarma nahin kiya lekin vyartha karma bhi kiya to vartamaan aur bhavishya jama to nahin hua। shreshtha karma karne se vartamaan mein bhi shreshtha karma ka pratyakshaphal khushi aur shakti ki anubhooti hogi। svayan ke prati bhi pratyakshaphal mil jaata hai aur doosre bhi aisi shreshtha karma aatmaon ko dekh purooshaartha ke umang utsaah mein aate hain ki ham bhi aise ban sakte hain। to apne prati pratyakshaphal aur doosron ki seva। double jama ho gaya। aur vartamaan ke hisaab se bhavishya to jama ho hi jaata hai। is hisaab se dekho ki agar vyartha arthaat saadhaaran karma bhi kiya to kitna nuksaan hua?to aise kabhi nahin socho ki saadhaaran karma kiya - yeh to hota hi hai। shreshtha aatma ka har kadam shreshtha,har karma shreshtha, har bol shreshtha hoga। to samjha, tyaag ki paribhaasha kya hui! vyartha arthaat saadhaaran karma, bol,samay, iska bhi tyaag kar sada samartha, sada alaukik arthaat padmaapadma bhaagyavaan bano। to vyartha aur saadhaaran baaton ko bhi underline karo। iske albelepan ka tyaag। kyonki aap sabhi brahman aatmaon ka vishwa ke manch par hero aur heroine ka part hai। aisi hero paartadhaari aatmaon ka ek-ek second,ek-ek sankalp, ek-ek bol, ek-ek karma, heere se bhi jyaada moolyavaan hai। agar ek sankalp bhi vyartha hua to jaise heere ko ganvaaya। agar keemti se keemti heera kiska gir jaae,kho jaae to woh sochega na - kuchh ganvaaya hai। aise ek heere ki baat nahin। anek heeron ki keemat ka ek second hai। is hisaab se socho। aise nahin ki saadhaaran roop mein baithe-baithe saadhaaran baaten karte-karte samay bita do। phir kya kehte - koi buri baat to nahin ki,aise hi baaten kar rahe the, aise hi baithe the, baaten kar rahe the। aise hi chal rahe the। yeh aise-aise karte bhi kitna samay chala jaata hai। aise hi nahin lekin heere jaise hain। to apne moolya ko jaano। aapke jad chitron ka kitna moolya hai। ek second ke darshan ka bhi moolya hai। aapke ek sankalp ka bhi itna moolya hai jo aaj tak usko vardaan ke roop mein maana jaata hai। bhakta log yahi kehte hain ki ek second ka sirf darshan de do। to darshan ‘samay'ki value hai, vardaan ‘sankalp' ki value, aapke bol ki value - aaj bhi do vachan sunne ke liye tadapte hain। aapke drishti ki value aaj bhi nazar se nihaal kar lo, aise pukaarte rehte hain। aapke har karma ki value hai। baap ke saath shreshtha karma ka varnan karte gadgad hote hain। to itna amoolya hai aapka har second, har sankalp। to apne moolya ko jaan vyartha aur vikarma va vikalpa ka tyaag। to aaj tyaag ka paath kya pakka kiya? ‘‘aise hi aise''shabd ke albelepan ka tyaag। jaise kehte hain aajkal ki chaalu bhaasha। to braahmanon ki bhi aajkal chaalu bhaasha yeh ho gai hai। yeh chaalu bhaasha chhod do। har second alaukik ho। har sankalp alaukik arthaat amoolya ho। vartamaan aur bhavishya double phal vaala ho। jaise dekha hai na - kabhi-kabhi ek mein do ikatthe phal hote hain। do phal ikatthe nikal jaate hain। to aap shreshtha aatmaon ka sada double phal hai arthaat double praapti hai। bhavishya ke pahle vartamaan praapti hai। aur vartamaan ke aadhaar par bhavishya praapti hai। to samjha - double phal khaao। single nahin। achha-

sada vikarmaajeet, har second ko amoolya ban aur banaane ki seva mein lagaane vaale aise double hero, double phal khaane vaale,vyartha aur saadhaaran ke mahaatyaagi,sada baap samaan shreshtha sankalp aur karma karne vaale maha-maha bhaagyavaan aatmaon ko baapdaada ka yaadapyaar aur namaste।''

party ke saath

prashn:- ek bal aur ek bharose par chalne vaale kis baat par nishchay rakhkar chalte rehte hain?

uttar:- ek bal ek bharosa arthaat sada nishchay ho ki jo saakaar ki murli hai, vahi murli hai, jo madhuban se shreemat milti hai vahi shreemat hai, baap sivaay madhuban ke aur kahin mil nahin sakta। sada ek baap ki padhaai mein nishchay ho। madhuban se jo padhaai ka paath padhaaya jaata,vahi padhaai hai,doosri koi padhaai nahin। agar kahaan bhog aadi ke samay sandeshi dvaara baba ka part chalta hai to yeh bilkul wrong hai, yeh bhi maaya hai, isko‘ek bal ek bharosa nahin kahenge'। madhuban se jo murli aati hai us par dhyaan do, nahin to aur raaste par chale jaayenge। madhuban mein hi baba ki murli chalti hai, madhuban mein hi baba aate hain isliye harek bachcha yeh saavdhaani rakhe,nahin to maaya dhokha de degi।

prashn:- sangam par hi tum bachche beggar to prince ban gaye ho! kaise?

uttar:- puraani duniya aur puraane sanskaaron se beggar aur gyaan ke khajaane, shaktiyon ke khajaane, sabke raajya adhikaari arthaat prince। pahle adheen aatma the - kabhi tan ke, kabhi man ke, kabhi dhan ke। lekin ab adheenta arthaat begarpan samaapta hua,ab adhikaari ban gae। abhi svaraajya - phir vishwa ka raajya।