Avyakt murli du samedi 15 janvier 1983

>

15-01-83 om shanti avyakt baapdaada madhuban

sahajyogi aur prayogi ki vyaakhya

sada sahajyogi ki sthiti mein sthit karne vaale sukh ke saagar shiv baba bole :-

aaj baap daada apne sahayogi bhujaaon ko dekh rahe hain। kaise meri sahayogi bhujaayen shreshtha kaarya ko saphal bana rahi hain। har bhuja ke divya alaukik kaarya ki raphtaar ko dekh baapdaada harshit ho roohrihaan kar rahe the। baapdaada dekhte rehte hain ki koi-koi bhujaayen sada athak aur ek hi shreshtha umang aur utsaah aur teevragti se sahayogi hain aur koi-koi kaarya karte rehte lekin beech-beech mein umang utsaah ki teevragti mein antar pad jaata hai। lekin sada athak teevragti vaali bhujaaon ke umang utsaah ko dekhte-dekhte svayan bhi phir se teevragti se kaarya karne lag padte hain। ek do ke sahayog se gati ko teevra banaate chal rahe hain।

baapdaada aaj teen prakaar ke bachche dekh rahe the। ek sadaashaj yogi। doosre har vidhi ko baar-baar prayog karne vaale prayogi। tarsare sahayogi। vaisen hain teenon hi yogi lekin bhinna-bhinna stage ke hain। sahajyogi, sameep sambandh aursarva praapti ke kaaran sahaj yog ka sada svatah anubhav karta hai। sada samartha swaroop hone ke kaaran isi nashe mein sada anubhav karta ki main hoon hi baap ka। yaad dilaana nahin padta svayan ko main aatma hoon,main baap ka bachcha hoon। ‘‘main hoon hi’’sada apne kois anubhav ke nashe mein praapti swaroop natural nishchay karta hai। sahayogi ko sarva siddhiyaan svatah hi anubhav hoti hain। isliye sahajyogi sada hi shreshtha umang utsaah khushi mein ekras rehta hai। sahajyogi sarva praaptiyon ke adhikaari swaroop mein sada shaktishaali sthiti mein sthit rehte hain।

prayog karne vaale prayogi sada har swaroop ke, har point ke, har praapti swaroop ke prayog karte hue us sthiti ko anubhav karte hain। lekin kabhi saphalta ka anubhav karte,kabhi mehnat anubhav karte। lekin prayogi hone ke kaaran, buddhi abhyaas ki prayogshaala mein busy rahne ke kaaran 75% maaya se safe rehte hain। kaaran? prayogi aatma ko shauk rehta hai ki naye te naye bhinnabhinna anubhav karke dekhe। isi shauk mein lage rahne ke kaaran maaya se prayogshaala mein safe rehte hain। lekin ekras nahin hote। kabhi anubhav hone ke kaaran bahut umang utsaah mein jhoomte aur kabhi vidhi dvaara siddhi ki praapti kam hone ke kaaran umang utsaah mein pharka pad jaata hai। umang utsaah kam hone ke kaaran mehnat anubhav hoti hai। isliye kabhi sahajyogi, kabhi mehnat vaale yogi। ‘‘hoon hi’’ ke bajaay ‘‘hoon hoon’’। ‘‘aatma hoon’’ bachcha hoon, master sarva shaktivaan hoon’’ - is smriti dvaara siddhi ko paane ka baar-baar prayatna karna padta hai। isliye kabhi to is stage parasthit hote jo socha aur anubhav hua। kabhi baar-baar sochne dvaara swaroop ki anubhooti karte hain। isko kaha jaata hai - prayogi aatma। adhikaar ka swaroop hai sahajyogi। baar-baar adhyayan karne ka swaroop hai prayogi aatma। to aaj dekh rahe the- sahaj yogi kaun aur prayogi kaun hai? prayogi bhi kabhi kabhi sahajyogi ban jaate hai। lekin sada nahin। jis samay jo position hoti hai, usi pramaan sthool chehre ke pose bhi badalte hai। man ki position ko bhi dekhte hain। aur pose ko bhi dekhte hain। saare din mein kitni pose badalte ho। apne bhinna-bhinna pose ko jaante ho? svayan ko saakshi hokar dekhte ho?baapdaada sada yeh behad ka khel jab chaahe tab dekhte rehte hain।

jaise yahaan laukik duniya mein ek ke hi bhinna-bhinna pose hansi ke khel mein svayan hi dekhte hain। videsh mein yeh khel hota hai? yahaan practical mein aisa khel to nahin karte ho na। yahaan bhi kabhi bojh ke kaaran mote ban jaate hain aur kabhi phir bahut sonchane ke sanskaar ke kaaran andaaj se bhi lambe ho jaate hain aur kabhi phir dilshikasta hone ke kaaran apne ko bahut chhota dekhte hain। kabhi chhote ban jaate, kabhi mote ban jaate,kabhi lambe ban jaate hain। to aisa khel achha lagta hai?

sabhi double videshi sahajyogi ho? aaj ke din ka sahaj yogi ka chart raha? sirf prayog karne vaale prayogi to nahin ho na। double videshi madhuban se sadaakaal ke liye sahajyogi rahne ka anubhav lekar ja rahe ho? achha - sahayogi bhi yogi hain iska phir sunaayenge।

(sabhi teachers neeche haal mein murli sun rahi theen)

baapdaada ke saath nimitta sevaadhaari kaho, nimitta shikshak kaho to aaj saathiyon ka group bhi aaya hua hai na। chhote to aur hi ati priy hote hain। neeche hote bhi sab oopar hi baithe hain। baapdaada chhote va bade lekin himmat rakhne vaale seva ke kshetra mein svayan ko sada busy rakhne vaale sevaadhaariyon ko bahut bahut yaadapyaar de rahe hain। isliye tyaagi ban anekon ke bhaagya banaane ke nimitta banaane vaale sevaadhaariyon ko baapdaada tyaag ki vishesh aatmaayen dekh rahe hain। aisi vishesh aatmaon ko vishesh roop se badhaai ke saath-saath yaadapyaar। double kamaal kaun si hai? ek to baap ko jaanne ki kamaal ki। doordesh,dharma ka parda reeti rasam, khaan-paan sabki bhinnata ke parde ke beech rehte hue bhi baap ko jaan liya। isliye double kamaal। parde ke andar chhip gaye the। seva ke liye ab janma liya hai। bhool nahin ki lekin drama anusaar seva ke nimitta chaaron or bikhar gaye the। nahin to itni videshon mein seva kaise hoti। sirf seva ke kaaran apna thode samay ka naam maatra hisaab kitaab joda,isliye double kamaal dikhaane vaale sada baap ke sneh ke chaatrak, sada dil se ‘mera baba’ ke geet gaane vaale, ‘jaana hai,jaana hai,’ 12maas isi dhun mein rahne vaale,aise himmat kar baap daada ke madadgaar banne vaale bachchon ko yaadapyaar au namaste।

sevaadhaari bhaai bahnon se :-mahaayagya ki mahaaseva ka prasaad khaaya? prasaad to kabhi bhi kam hone vaala nahin hai। aisa avinaashi mahaaprasaad praapta kiya?kitna vairayti prasaad mila?sadaakaal ke liye khushi, sada ke liye nasha,anubhooti aise sarva prakaar ka prasaad paaya? to prasaad baantakar khaaya jaata hai। prasaad aankhon ke oopar, mastak ke oopar rakhkar khaate hain। to yeh prasaad okhon me sama jaae। mastak mein smriti swaroop ho jaae arthaat sama jaae। aisa prasaad is mahaayagya mein mila?mahaaprasaad lene vaale kitne mahaan bhaagyavaan hue aise chance kitnon ko milta hai? bahut thodon ko un thodo mein se aap ho। to mahaan bhaagyavaan ho gaye na। jaise yahaan baap aur seva iske sivaae teesra kuchh bhi yaad nahin raha, to yahaan ka anubhav sada kaayam rakhna hai। vaise bhi kahaan jaate hain to vishesh vahaan se koi na koi yaadgaar le jaate hain, to madhuban ka vishesh yaadgaar kya le jaayenge? nirantar sarva praapti swaroop ho rahenge। to vahaan bhi jaakar aise hi rahenge ya kahenge vaayumandal aisa tha, sang aisa tha। parivartan bhoomi se parivartan hokar jaana। kaisa bhi vaayumandal ho lekin aap apni shakti se parivartan kar lo। itni shakti hai na। vaayumandal ka prabhaav aap par na aave। sabhi sampanna ban karke jaana।

maataaon ke saath -maataaon ke liye to bahut khushi ki baat hain - kyonki baap aaya hi hai maataaon ke liye। gaoopaal bankar gau maataaon ke liye aaye hain। isi ka to yaadgaar gaaya hua hai। jisko kisi ne bhi yogya nahin samjha lekin baap ne yogya aapko hi samjha - isi khushi mein sada udte chalo। koi duhkh ki lahar aa nahin sakti। kyonki sukh ke saagar ke bachche ban gaye। sukh ka saagar mein samaane vaalon ko kabhi duhkh ki lahar nahin aa sakti hai - aise sukh swaroop।