Avyakt murli du samedi 7 mai 1983

>

07-05-83 om shanti avyakt baapdaada madhuban

braahmanon ka sansaar - begampur

begampur ka baadshaah banaane vaale, sada sukhdaata shiv baba bole:-

aaj begampur ke baadshaah apne master begampur ke baadshaahon se milne aaye hain। yeh sangamayugi baadshaahon ki sabha hai। isi baadshaahi se bhavishya praalabdha praapta karte hain। baapdaada dekh rahe hain ki sabhi bachche begam arthaat kisi bhi prakaar ke gam arthaat dukh se pare, aise baadshaah bane hain! braahmanon ka sansaar - begampur hai। sangamayugi brahman sansaar ke adhikaari aatmaayen arthaat begampur ke baadshaah। sankalp mein bhi gam arthaat dukh ki lahar na ho - aise bane ho?begampur ke baadshaah sada sukh ki shaiyya par sukhmay sansaar mein svayan ko anubhav karte ho?braahmanon ke sansaar va brahman jeevan mein dukh ka naam nishaan nahin kyonki braahmanon ke khazaane mein apraapta koi vastu nahin। apraapti duhkh ka kaaran hai। praapti sukh ka saadhan hai। to sarva praapti swaroop arthaat sukh swaroop! aise sada sukh swaroop bane ho?sukh ke saadhan-sambandh aur sampatti yahi vishesh hain। socho - avinaashi sukh ka sambandh praapta hai na! sambandh mein bhi koi ek sambandh ki bhi kami hoti hai to dukh ki lahar aati hai। brahman sansaar mein sarva sambandh baap ke saath avinaashi hain। koi ek sambandh ki bhi kami hai kya?sarva sambandh avinaashi hain to dukh ki lahar kaise hogi? sampatti mein bhi sarva khazaane va sarva sampatti ka shreshtha khazaana ‘gyaan dhan’ hai, jisse sarva dhan ki praapti svatah hi ho jaati hai। jab sampatti, sambandh sab praapta hain to begampur arthaat begam sansaar hai। sada sukh ke sansaar ke baalak so maalik arthaat baadshaah ho। baadshaah bane ho ki abhi ban rahe ho? baapdaada bachchon ke dukh ki lahar ki baaten sunkar va dekhkar kya sochte hain? sukh ke saagar ke bachche, begampur ke baadshaah phir dukh ki lahar kahaan se aai! avashya sukh ke sansaar ki boundary se baahar chale jaate hain। koi na koi artificial aakarshan va nakli roop ke peechhe aakarshit ho jaate hain। jaise kalpa pahle ke yaadgaar kathaaon mein dikhaate hain - seeta aakarshit ho gai aur maryaada ki lakeer arthaat sukh ke sansaar ki boundary paar kar li, to kahaan pahunch gai?shok vaatika mein। jab boundary ke andar hain to jangal mein bhi mangal hai। tyaag mein bhi bhaagya hai। bin kodi hote baadshaah hain। beggary jeevan mein bhi prince ki jeevan hai। aisa anubhav hai na! sansaar se pare madhuban mein aate ho to kya anubhav karte ho? hai chhote se sthaan par kone mein lekin pahunchte hi kehte ho ki satayugi svarga se bhi shreshtha sansaar mein pahunch gaye hain। to jangal mein mangal anubhav karte ho na। sookhe pahaadon ko heere jaisa shreshtha sukh ka sansaar anubhav karte ho। sansaar hi badal gaya, aisa anubhav karte ho na। aise hi brahman aatmaayen jahaan bhi hon dukh ke vaayumandal ke beech bhi kamal samaan। duhkh se nyaare, begampur ke baadshaah ho। tan ke beemaari ke duhkh ki lahar va man mein vyartha halchal ke duhkh ki lahar va vinaashi dhan ke apraapti ki va kami ke dukh ki lahar, svayan ke kamzor sanskaar va svabhaav va anya ke kamzor svabhaav aur sanskaar ke duhkh ki lahar,vaayumandal va vibrations ke aadhaar par dukh ki lahar,sambandh samparka ke aadhaar par duhkh ki lahar, apni taraph kheench leti hai! nyaare ho na! sansaar badal gaya to sanskaar bhi badal gaye। svabhaav badal gaya isliye sukhmay sansaar ke ban gaye। vaise to beggar ban gaye arthaat yeh deh roopi ghar bhi apna nahin। beggar ho gaye na। lekin baap ke sarva khazaanon ke maalik bhi to ban gaye। svaraajya adhikaari bhi ban gaye। aisa nasha va khushi rehti hai?isko hi kaha jaata hai - ‘begampur ke baadshaah’। to sabhi baadshaah baithe ho na। baadshaahi ka haalchaal theek chal raha hai? sabhi raajya kaarobaari aapke order mein chal rahe hain?koi bhi aap baadshaahon ko dhokha to nahin deta? ji haajir va ji hajoor karne vaale sabhi raajya kaarobaari hain?apni darbaar lagaate ho? raajaaon ki to darbaar lagti hai - to sabhi darbaari yathaartha kaarya kar rahe hain?khazaanon se bhandaare bharpoor hain? itne bhandaare bharpoor hain jo sada mahaadaani ban daan karte raho to bhi akhut bhandaar ho। check karte ho? brahmaakumaar to ban hi gaye,yogi to ban hi gaye, is albelepan ke nashe mein checking to nahin bhool jaate ho? sada apne raajya kaarobaar ki checking karo। samjha! checking karna to aata hai na। majority puraane anubhviyon ka sangathan hai na। anubhvi arthaat athaarti vaale। kaun si athaarti? svaraajya ki athaarti। aisi athaarti vaale ho na! abhi to aaj aaye ho। checking karaane, certificate lene aaye ho na ki ham theek baadshaah hain! certificate lekar jaayenge na ki kaun se raaje hain - naamdhaari hain ya kaamdhaari। yeh sab sheeshamhal mein aapehi dekh lenge। achha –

sada sukh ke sansaar mein rahne vaale, begampur ke baadshaahon ko, sada raajya adhikaari samartha aatmaon ko,sada sarva dukh ki lahron se nyaare aur sukhdaata baap ke pyaare, aise anubhav ki athaarti vaali shreshtha aatmaon ko baapdaada ka yaad-pyaar aur namaste।’’

daadiyon se

sabhi baap samaan bachchon ko dekh baapdaada harshit hote hain। sada samaan aatmaayen ati pyaari lagti hain। to yeh saara sangathan samaan aatmaon ka hai। baapdaada sada samaan bachchon ko saathi dekhte hain। vishwa ki parikrama lagaate to bhi saath aur bachchon ki rekh dekh karne jaate to bhi saath। sada saath hi saath hai isliye samaan aatmaayen hain hi sada ke yogi। yog lagaane vaale nahin lekin hain hi lavleen। alag hi nahin hain to yaad kya karenge। svatah yaad hai hi। jahaan saath hota hai to yaad svatah rehti hai। to samaan aatmaon ki stage saath rahne ki hai। samaaye hue rahne ki hai। to sada har kadam mein aage-aage bachche, peechhe-peechhe baap। har kaarya mein sada aage। bachche aage hain aur baap sakaash to kya lekin sadaasaath ka anubhav karaate hain। jaise baap auron ko sakaash dete hain vaise samaan bachche bhi sakaash bhi dene vaale ho gaye। aisa sangathan hai na! vishesh mankon ki vishesh maala hai। svatah taiyaar ho rahi hai na maala! taiyaar karni nahin padti lekin ho rahi hai। vaise agar number nikaalen ya number den to question uthenge lekin svatah hi nambarvaar set hote ja rahe hain। achha –

kumaaron ke saath alag-alag group se

1. godly youth group -laukik reeti se woh youth group apni-apni buddhi anusaar kaarya kar rahe hain lekin unhon ka kaarya nuksaan karna hai। aap logon ka kaam hai sthaapna ke kaarya mein sada sahayogi banna। kabhi koi bhi kaaran va vighna aaye to uska nivaaran sahaj kar sakte ho? kumaar group mein baapdaada ki sada ummeeden rehti hain। itne youth himmat aur umang rakh sada ke vijayi ban jaaen to vishwa mein vijay ka jhanda uthaakar saare vishwa mein ghoomen। sada udti kala mein ja rahe ho,koi rookti kala vaala to nahin hai। youth group arthaat sada shaktishaali seva karne vaale। youth jo chaahe woh kar sakte hain। woh vinaashkaari aur aap sthaapna ke kaarya vaale। ve ashaanti machaane vaale aur aap shant swaroop ho। shanti phailaane vaale ho। kumaaron ke liye to bahut taiyaari kar rahe hain। aise pakke kumaar hon jo kabhi halchal mein na aaven। aise nahin, yahaan naam baala ho aur phir vahaan puraani duniya mein chale jaaen। kai kumaar pahle bahut umang utsaah se seva mein chalte phir thoda bhi takkar hua to puraani duniya mein chale jaate। chhodi hui cheez phir se jaakar len to achha lagta hai! aap sabne bhi puraani duniya chhod di hai na! agar koi rassi bandhi hogi to hilte rahenge। to sada apne ko ‘godly youth group’samjho। itne sab kumaar refresh hokar khazaanon se bharpoor hokar jaayenge to dekhne vaale kahenge yeh ‘devaatma’bankar aa gaye। aisa koi kamaal ka plan banaao। youth ko dekhkar government bhi ghabraati hai। government ko bhi raasta dikhaane ke nimitta aap log banenge। kumaaron ko sada seva ke shaktishaali plan banaane chaahiye। parantu yaad aur seva ka sada balance rahe। achha -

sada nirvighna rahne ki goodmorning jab hogi to nirvighna honge na! jab satayug goodmorning hoga to nirvighna honge। abhi nirvighna banne ki goodmorning। shubh din kehte hain na। shubh praatah kehte hain to shubh praatah arthaat jismen ashubh kuchh nahin। aap sabki sada hi shubh praatah hai। shubh din hai aur shubh raatri hai। to sada nirvighna arthaat shubh। isliye nirvighna bhav ki goodmorning। achha –

vidaai ke samay

satguru ki kripa aapka varsa ban gaya। isliye kripa karo, yeh sankalp karne ki bhi aavashyakta nahin। ho hi vrikshapti ke bachche। to brihaspati ki dasha, guru ki kripa sab svatah hi praapta hai। maangane ki aavashyakta hi nahin। maangane se chhoot gae, sankalp karne se bhi chhuda diya। abhi maangane ka kuchh raha hai kya! baap ke bhi sir ke taaj ho gaye। woh maangega kya! to vrikshapti divas ki, brihaspati ke dasha ki sada hi bachchon ko badhaai sahit yaad-pyaar।

om shanti।