Avyakt murli du samedi 2 mars 1985

>

02-03-85om shanti avyakt baapdaadaamdhuban

vartamaan eeshvareey janma - amoolya janma

ratnaagar baapdaada apne bachchon prati bole

aaj ratnaagar baap apne amoolya ratnon ko dekh rahe hain। yeh alaukik amoolya ratnon ki darbaar hai। ek ek ratna amoolya hai। is vartamaan samay ke vishwa ki saari property va vishwa ke saare khajaane ikatthe karo uske antar mein ek ek eeshvareey ratna kai guna amoolya hain। aap ek ratna ke aage vishwa ke saare khajaane kuchh bhi nahin hai। itne amoolya ratna ho। yeh amoolya ratna sivaae is sangamayug ke saare kalpa mein nahin mil sakte। satayugi-dev-aatma ka part is sangamayugi eeshvareey amoolya ratna banne ke part ke aage second number ho jaata hai। abhi tum eeshvareey santaan ho, satayug mein daivi santaan honge। jaise eeshvar ka sabse shreshtha naam hai,mahima hai,janma hai, varma hai, vaise eeshvareey ratnon ka va eeshvareey santaan aatmaon ka moolya sarvashreshtha hai। is shreshtha mahima ka va shreshtha moolya ka yaadgaar abhi bhi9 ratnon ke roop mein gaaye aur pooje jaate hain। 9 ratnon ko bhinna-bhinna vighna vinaashak ratna gaaya jaata hai jaisa vighna vaisi visheshta vaala ratna ring banaakar pahante hain va locket mein daalte hain। va kisi bhi roop se us ratna ko ghar mein rakhte hain। abhi last janma tak bhi vighna-vinaashak roop mein apna yaadgaar dekh rahe ho। nambarvaar zaroor hain lekin nambarvaar hote hue bhi amoolya aur vighna vinaashak sabhi hain। aaj bhi shreshtha swaroop se aap ratnon ka aatmaayen svamaan rakhti hain। bade pyaar se svachchhata se sambhaal ke rakhti hain। kyonki aap sabhi jo bhi ho chaahe apne ko itna yogya nahin bhi samajhte ho lekin baap ne aap aatmaon ko yogya samajh apna banaaya hai। sveekaar kiya - ‘tu mera main tera’। jis aatma ke oopar baap ki najar padi woh prabhu najar ke kaaran amoolya ban hi jaate hain। parmaatma drishti ke kaaran eeshvareey srishti ke, eeshvareey sansaar ke shreshtha aatma ban hi jaate hain। paarasnaath se sambandh mein aaye to paaras ka rang lag hi jaata hai। isliye parmaatma-pyaar ki drishti milne se saara kalpa chaahe chaitanya devtaaon ke roop mein, chaahe aadha kalpa jad chitron ke roop mein va bhinna-bhinna yaadgaar ke roop mein, jaise ratnon ke roop mein bhi aapka yaadgaar hai, sitaaron ke roop mein bhi aapka yaadgaar hai। jis bhi roop mein yaadgaar hai,saara kalpa sarva ke pyaare rahe ho। kyonki avinaashi pyaar ke saagar ke pyaar ki najar saare kalpa ke liye pyaar ke adhikaari bana deti hai। isliye bhakta log aadhi ghadi ek ghadi ki drishti ke liye tadapte hain ki najar se nihaal ho jaaven। isliye is samay ke pyaar ki najar,avinaashi pyaar ke yogya bana deti hai। avinaashi praapti svatah hi ho jaati hai। pyaar se yaad karte, pyaar se rakhte। pyaar se dekhte।

doosri baat- svachchhata arthaat pavitrata। tum is samay baap dvaara pavitrata ka janma-siddha adhikaar praapta karte ho। pavitrata va svachchhata apna svadharma jaante ho - isliye pavitrata ko apnaane ke kaaran jahaan aapka yaadgaar hoga vahaan pavitrata va svachchhata abhi bhi yaadgaar roop mein chal rahi hai। aur aadhaakalpa to hai hi pavitra paalna। pavitra duniya। to aadhaakalpa pavitrata se paida hote, pavitrata se palte aur aadhaakalpa pavitrata se pooje jaate hain।

teesri baat- bahut dil se, shreshtha samajh, amoolya samajh sambhaalte hain। kyonki is samay svayan bhagwan maat-pita ke roop se aap bachchon ko sambhaalte hain arthaat paalna karte hain। to avinaashi paalna hone ke kaaran,avinaashi sneh ke saath sambhaalne ke kaaran saara kalpa badi raayalti se,sneh se,regard se sambhaale jaate ho। aise pyaar, svachchhata,pavitrata aur sneh se sambhaalne ke avinaashi paatra ban jaate ho। to samjha,kitne amoolya ho? har ek ratna ka kitna moolya hai! to aaj ratnaagar baap har ek ratan ke moolya ko dekh rahe the। saare duniya ki akshoni aatmaayen ek taraph hain lekin aap 5paandav akshoni se shaktishaali ho। akshoni aapke aage ek ke baraabar bhi nahin hain। itne shaktishaali ho। to kitne moolyavaan ho gaye! itne moolya ko jaante ho? ki kabhi-kabhi apne aapko bhool jaate ho। jab apne aapko bhoolte ho to hairaan hote ho। apne aapko nahin bhoolo। sada apne ko amoolya samajh karke chalo। lekin chhoti si galti nahin karna। amoolya ho lekin baap ke saath ke kaaran amoolya ho। baap ko bhoolkar sirf apne ko samjhenge to bhi wrong ho jaayega। banaane vaale ko nahin bhoolo। ban gaye lekin banaane vaale ke saath bane hain, yeh hai samajhne ki vidhi। agar vidhi ko bhool jaate to samajh,besmajh ke roop mein badal jaati। phir main-pan aa jaata hai। vidhi ko bhoolne se siddhi ka anubhav nahin hota। isliye vidhi poorvak apne ko moolyavaan jaan vishwa ke poorvaj ban jaao। hairaan bhi nahin ho ki - main to kuchh nahin। na yeh socho ki main kuchh nahin, na yeh samjho ki main hi sab kuchh hoon। donon hi wrong hain। main hoon lekin banaane vaale ne banaaya hai। baap ko nikaal dete ho to paap ho jaata hai। baap hai to paap nahin hai। jahaan baap ka naam hai vahaan paap ka naam nishaan nahin। aur jahaan paap hai vahaan baap ka naamnishaan nahin hai। to samjha apne moolya ko।

bhagwan ki drishti ke paatra bane ho, saadhaaran baat nahin। paalna ke paatra bane ho। avinaashi pavitrata ke janma-siddha adhikaar ke adhikaari bane ho। isliye janma siddha adhikaar kabhi mushkil nahin hota hai। sahaj praapta hota hai। aise hi svayan anubhvi ho ki jo adhikaari bachche hain unhon ko pavitrata mushkil nahin lagti। jinhon ko pavitrata mushkil lagti woh dagmag jyaada hote hain। pavitrata svadharma hai,janma siddha adhikaar hai to sada sahaj lagega। duniya vaale bhi door bhaagte hain woh kislie? pavitrata mushkil lagti hai। jo adhikaari aatmaayen nahin unhon ko mushkil hi lagega। adhikaari aatma aate hi dridh sankalp karti ki pavitrata baap ka adhikaar hai, isliye pavitra banna hi hai। dil ko pavitrata sada aakarshit karti rahegi। agar chalte-chalte kahaan maaya pareeksha lene aati bhi hai, sankalp ke roop mein,svapna ke roop mein to adhikaari aatma knowledgeful hone ke kaaran ghabraayegi nahin। lekin knowledge ki shakti se sankalp ko parivartit kar degi। ek sankalp ke peechhe anek sankalp paida nahin karegi। ansh ko vansh ke roop mein nahin laayegi। kya hua, yeh hua…yeh hai vansh। sunaaya tha na kyon se queue laga dete hain। yeh vansh paida kar dete hain। aaya aur sada ke liye gaya। paper lene ke liye aaya, paas ho gaye, samaapta। maaya kyon aai,kahaan se aai। yahaan se aai vahaan se aai। aani nahin chaahiye thi। kyon aa gai। yeh vansh nahin hona chaahiye। achha aa bhi gai to aap bithaao nahin। bhagaao! aai kyon…aisa sochenge to baith jaayegi। aai aage badhaane ke liye, paper lene ke liye। class ko aage badhaane ke liye,anubhvi banaane ke liye aai! kyon aai,aise aai, vaise aai yeh nahin socho। phir sochte hain kya maaya ka aisa roop hota hai? laal hai,hara hai,peela hai। is vistaar mein chale jaate hain। ismen nahin jaao। ghabraate kyon ho। paar kar lo। paas with honour ban jaao। knowledge ki shakti hai, shastra hain। master sarvashaktivaan ho, trikaaldarshi ho, triveni ho। kya kami hai! jaldi mein ghabraao nahin। cheenti bhi aa jaati to ghabra jaate hain। jyaada sochte ho। sochna arthaat maaya ko mehmaani dena। phir woh ghar bana degi। jaise raaste chalte koi gandi cheez dikhaai bhi de to kya karenge! khade hokar sochenge ki yeh kisne phenki,kyon-kya hua! honi nahin chaahiye,yeh sochenge va kinaara kar chale jaayenge। jyaada vyartha sankalpon ke vansh ko paida hone na do। ansh ke roop mein hi samaapta kar do। pahle second ki baat hoti hai phir usko ghanton mein, dinon mein, maas mein badha dete ho। aur agar ek maas ke baad poochhenge ki kya hua tha to baat second ki hogi। isliye ghabraao nahin। gahraai mein jaao - gyaan ki gahraai mein jaao, baat ki gahraai mein nahin jaao। baapdaada itne shreshtha moolyavaan ratnon ko chhote-chhote mitti ke kanon se khelte hue dekhte to sochte hain yeh ratna, ratnon se khelne vaale,mitti ke kanon se khel rahe hain! ratna ho ratnon se khelo!

baapdaada ne kitne laadapyaar se paala hai phir mitti ke kan kaise dekh sakenge। phir maile hokar kehte - abhi saaph karo, saaph karo। ghabra bhi jaate hain। abhi kya karoon, kaise karoon। mitti se khelte hi kyon ho। woh bhi kan jo dharni mein pade rahne vaale। to sada apne moolya ko jaano।

achha - aise saare kalpa ke moolyavaan aatmaon ko, prabhu pyaar ki paatra aatmaon ko, prabhu paalna ki paatra aatmaon ko,pavitrata ke janma-siddha adhikaar ke adhikaari aatmaon ko,sada baap aur main is vidhi se siddhi ko paane vaali aatmaon ko, sada amoolya ratna ban ratnon se khelne vaale royal bachchon ko baapdaada ka yaadapyaar aur namaste!

party se - sada baap ke naynon mein samaai hui aatma svayan ko anubhav karte ho? naynon mein kaun samaata hai?jo bahut halka bindu hai। to sada hain hi bindu aur bindu ban baap ke naynon mein samaane vaale। baapdaada aapke naynon mein samaaye hue hain aur aap sab baapdaada ke naynon mein samaaye hue ho। jab naynon mein hai hi baapdaada to aur kuchh dikhaai nahin dega। to sada is smriti se double light raho ki main hoon hi bindu। bindu mein koi bojh nahin। yeh smriti swaroop sada aage badhaata rahega। aankhon mein beech mein dekho to bindu hi hai। bindu hi dekhta hai। bindu na ho to aankh hote bhi dekh nahin sakte। to sada isi swaroop ko smriti mein rakh udti kala ka anubhav karo। baapdaada bachchon ke vartamaan aur bhavishya ke bhaagya ko dekh harshit hain,vartamaan kalam hai bhavishya ke takdeer banaane ki। vartamaan ko shreshtha banaane ka saadhan hai - badon ke eeshaaron ko sada sveekaar karte hue svayan ko parivartan kar lena। isi vishesh gun se vartamaan aur bhavishya takdeer shreshtha ban jaati hai। achha – om shanti।