Avyakt murli du mercredi 6 mars 1985

>

06-03-85om shanti avyakt baapdaadaamdhuban

‘holi’ka roohaani rahasya

patit paavan shiv baba apne bachchon prati bole

aaj holiest, highest baap apne holi aur happy hanson se holi manaane aaye hain। trimoorti baap teen prakaar ki holi ka divya raaz sunaane aaye hain। vaise sammagayug holi yug hai। sammagayug utsav ka yug hai। aap shreshtha aatmaon ka har din, har samay utsaah bhara utsav hai। agyaani aatmaayen svayan ko utsaah mein laane ke liye utsav manaate hain। lekin aap shreshtha aatmaon ke liye yeh brahman jeevan utsaah ki jeevan hai। umang, khushi se bhari hui jeevan hai। isliye sangamayug hi utsav ka yug hai। eeshvareey jeevan sada umang utsaah vaali jeevan hai। sada hi khushiyon mein naachte, gyaan ka shaktishaali amrit peete, sukh ke geet gaate, dil ke sneh ke geet gaate, apni shreshtha jeevan bita rahe hain। agyaani aatmaayen ek din manaati,alpakaal ke utsaah mein aati phir vaise ki vaisi ho jaati। aap utsav manaate hue holi ban jaate ho aur doosron ko bhi holi banaate ho। woh sirf manaate hain, aap manaate ban jaate ho। log teen prakaar ki holi manaate hain - ek jalaane ki holi। doosri rang lagaane ki holi। teesri mangal milan manaane ki holi। ye teenon holi hain roohaani rahasya se। lekin woh sthool roop mein manaate rehte hain। is sammagayug par aap mahaan aatmaayen jab baap ki banti ho arthaat holi banti ho to pahle kya karti ho? pahle sab puraane svabhaav sanskaar yog agni se bhasma karte ho arthaat jalaate ho। uske baad hi yaad dvaara baap ke sang ka rang lagta hai। aap bhi pahle jalaane vaali holi manaate ho phir prabhu sang ke rang mein rang jaate ho arthaat baap samaan ban jaate ho। baap gyaan saagar to bachche bhi sang ke rang mein gyaan swaroop ban jaate hain। jo baap ke gun woh aapke gun ho jaate। jo baap ki shaktiyaan woh aapka khajaana ban jaata। aapki property ho jaati। to sang ka rang aisa avinaashi lag jaata jo janma-janmaantar ke liye yeh rang avinaashi ban jaata hai। aur jab sang ka rang lag jaata, yeh roohaani rang ki holi mana lete to aatma aur paramatma ka,baap aur bachchon ka shreshtha milan ka mela sada hi hota rehta। agyaani aatmaon ne aapke is roohaani holi ko yaadgaar ke roop mein manaana shuru kiya hai। aapki practical utsaah bhari jeevan ka bhinna bhinna roop mein yaadgaar manaakar alpakaal ke liye khush ho jaate। har kadam mein, aapke shreshtha jeevan mein jo visheshtaayen praapta hui unko yaad kar thode samay ke liye woh bhi mauj manaate rehte hain। yeh yaadgaar dekh va sun harshit hote ho na ki hamaari visheshtaaon ka yaadgaar hai! aapne maaya ko jalaaya aur woh holika banaake jala dete hain। itni ramneek kahaaniyaan banaai hain jo sunkar aapko hansi aayegi ki hamaari baat ko kaise bana diya hai! holi ka utsav aapke bhinna-bhinna praapti ke yaad roop mein manaate hain। abhi aap sada khush rehte ho। khushi ki praapti ka yaadgaar bahut khush hokar holi manaate hain। us samay sab dukh bhool jaate hain। aur aap sada ke liye dukh bhool gaye ho। aapki khushi ki praapti ka yaadgaar manaate hain।

aur baat manaane ke samay chhote bade bahut hi halke ban, halke roop mein manaate hain। us din ke liye sabhi ka mood bhi halka rehta hai। to yeh aapke double light banne ka yaadgaar hai। jab prabhu-sang ke rang mein rang jaate ho to double light ban jaate ho na। to is visheshta ka yaadgaar hai। aur baat - is din chhote bade kisi bhi sambandh vaale samaan svabhaav mein rehte hain। chaahe chhota-sa potra bhi ho woh bhi daada ko rang lagaayega। sabhi sambandh ka,aayu ka bhaan bhool jaate hain। samaan bhaav mein aa jaate hain। yeh bhi aapke vishesh samaan bhaav arthaat bhaai- bhaai ki sthiti aur koi bhi deh ke sambandh ki drishti nahin। yeh bhaai-bhaai ki samaan sthiti ka yaadgaar hai। aur baat - is din bhinna-bhinna rangon se khoob pichkaariyaan bhar ek do ko rangate hain। yeh bhi is samay ki aapki seva ka yaadgaar hai। koi bhi aatma ko aap drishti ki pichkaari dvaara prem swaroop banaane ka rang, aananda swaroop banaane ka rang, sukh ka, shanti ka, shaktiyon ka kitne rang lagaate ho? aisa rang lagaate ho jo sada laga rahe। mitaana nahin padta। mehnat nahin karni padti। aur hi har aatma yahi chaahti ki sada in rangon mein rangi rahoon। to sabhi ke paas roohaani rangon ki roohaani drishti ki pichkaari hai na! holi khelte ho na! yeh roohaani holi aap sabke jeevan ka yaadgaar hai। aisa baapdaada se mangal milan manaaya hai jo milan manaate baap samaan ban gaye। aisa mangal milan manaaya hai jo combined ban gaye ho। koi alag kar nahin sakta।

aur baat - yeh din sabhi beeti hui baaton ko bhulaane ka din hai। 63 janma ki beeti ko bhula dete ho na! beeti ko bindi laga dete ho। isliye holi ko beeti so beeti ke arth mein bhi kehte hain। kaisi bhi kadi dushmani ko bhool milan manaane ka din maana jaata hai। aapne bhi aatma ke dushman aasuri sanskaar, aasuri svabhaav bhool kar prabhu milan manaaya na! sankalp maatra bhi puraana sanskaar smriti mein na aaye। yeh bhi aapke is bhoolne ki visheshta ka yaadgaar mana rahe hain। to suna aapki visheshtaayen kitni hain? aapke har gun ka, har visheshta ka,karma ka alag-alag yaadgaar bana diya hai। jiske har karma ka yaadgaar ban jaae, jo yaad kar khushi mein aa jaaen woh svayan kitne mahaan hain? samjha-apne aapko ki aap kaun ho?holi to ho lekin kitne vishesh ho!

double videshi bhal yeh apni shreshthata ka yaadgaar na bhi jaante ho lekin aapke yaad ka mahatva duniya vaale yaad kar yaadgaar bana rahe hain। samjha holi kya hoti hai? aap sab to rang mein range hue ho। aise prem ke rang mein rang gaye ho jo sivaae baap ke aur kuchh dikhaai nahin deta। sneh mein hi khaate-peete, chalte, gaate,naachte rehte ho। pakka rang lag gaya hai na ki kachcha hai?kaun sa rang laga hai? kachcha va pakka? beeti so beeti kar li?galti se bhi puraani baat yaad na aave। kehte ho na,kya karen aa gai। yeh galti se aa jaati hai। naya janma, nai baaten, naye sanskaar, nai duniya, yeh braahmanon ka sansaar bhi naya sansaar hai। braahmanon ki bhaasha bhi nai hai! aatma ki bhaasha nai hai na! woh kya kehte aur aap kya kehte! paramatma ke prati bhi nai baaten hain। to bhaasha bhi nai,reet rasam bhi nai। sambandh-samparka bhi naya, sab naya ho gaya। puraana samaapta hua। naya shuru hua,naye geet gaate ho। puraane nahin। kya, kyon ke hain puraane geet। aha, vaah,oho! yeh hain naye geet। to kaun se geet gaate ho? haay-haay ke geet to nahin gaate ho na! haay-haay karne vaale duniya mein bahut hain,aap nahin ho। to avinaashi holi mana li arthaat beeti so beeti kar sampoorn pavitra ban gaye। baap ke sang ke rang mein rang gaye ho। to holi mana li na!

sada baap aur main, saath-saath hain। aur sangamayug sada saath rahenge। alag ho hi nahin sakte। aisa umang utsaah dil mein hai na ki - main aur mera baba! ki parde ke peechhe teesra bhi koi hai? kabhi chooha kabhi billi nikal aati, aise to nahin! sab samaapta ho gaye na! jab baap mila to sab kuchh mila। aur kuchh rehta nahin। na sambandhi rah jaata, na khajaana rah jaata,na shakti,na gun rah jaata,na gyaan rah jaata, na koi praapti rah jaati। to baaki aur kya chaahiye। isko kaha jaata hai - holi manaana। samjha!

aap log kitna mauj mein rehte ho। bephkar baadshaah! bin kaudi baadshaah! begampur ke baadshaah! aisi mauj mein koi rah na sake। duniya ke saahookaar se saahookaar ho va duniya mein naameegraami koi vyakti ho, bahut hi shaastravaadi ho, vedon ke paath padhne vaale ho, naudha bhakta ho, number one saainsadaan ho,koi bhi occupation vaale ho lekin aisi mauj ki jeevan nahin ho sakti। jismen mehnat nahin। muhabbat hi muhabbat hai। chinta nahin। lekin shubhchintak hai,shubhchintan hai। aisi mauj ki jeevan saare vishwa mein chakkar lagaao,agar koi mile to le aao। isliye geet gaate ho na। madhuban mein, baap ke sansaar mein maujen hi maujen hain। khaao to bhi mauj, soo to bhi mauj। goli lekar sone ki jaroorat nahin। baap ke saath so jaao to goli nahin leni padegi। akele sote ho to kehte haay bladapreshar hai, darda hai। tab goli leni padti। baap saath ho,bas baba aapke saath so rahe hain, yeh hai goli। aisa bhi phir samay aayega jaise aadi mein davaaeeyaan nahin chalti thi। yaad hai na। shuru mein kitni samay davaaeeyaan nahin thi। haan, thoda malaai makkhan kha liya। davaai nahin khaate the। to jaise aadi mein practice karaai hai na। the to puraane shareer। ant mein phir woh aadi vaale din repeat honge। saakshaatkaar bhi sab bahut vichitra karte rahenge। bahuton ki ichchha hai na - ek baar saakshaatkaar ho jaae। last tak jo pakke honge unhon ko saakshaatkaar honge phir vahi sangathan ki bhatti hogi। seva poori ho jaayegi। abhi seva ke kaaran jahaan tahaan bikhar gaye ho! phir nadiyaan sab saagar mein sama jaayengi। lekin samay naajuk hoga। saadhan hote hue bhi kaam nahin karenge। isliye buddhi ki line bahut clear chaahiye। jo touch ho jaae ki abhi kya karna hai। ek second bhi deri ki to gaye। jaise woh bhi agar button dabaane mein ek second bhi deri ki to kya result hogi? yeh bhi agar ek second touching hone mein deri hui to phir pahunchna mushkil hoga। woh log bhi kitna attention se baithe rehte hain। to yeh buddhi ki touching। jaise shuru mein ghar baithe aavaaz aaya, bulaava hua ki aao, pahuncho। abhi niklo। aur phauran nikal pade। aise hi ant mein bhi baap ka aavaaz pahunchega। jaise saakaar mein sabhi bachchon ko bulaaya। aise aakaar roop mein sabhi bachchon ko - ‘aao-aao’ ka aahvaan karenge। sab aana aur saath jaana। aise sada apni buddhi clear ho aur kahaan attention gaya to baap ka aavaaz, baap ka aahvaan miss ho jaayega। yeh sab hona hi hai।

teachers soch raheen hain - ham to pahunch jaayenge। yeh bhi ho sakta hai ki aapko vahaan hi baap direction den। vahaan koi vishesh kaarya ho। vahaan koi auron ko shakti deni ho। saath le jaana ho। yeh bhi hoga lekin baap ke direction pramaan rahen। manmat se nahin। lagaav se nahin। haay mera centre; yeh yaad na aaye। phalaana jigyaasu bhi saath le jaaun,yeh ananya hai,madadgaar hai। aisa bhi nahin। kisi ke liye bhi agar rooke to rah jaayenge। aise taiyaar ho na! isko kehte hain ever ready। sada hi sab kuchh sameta hua ho। us samay sametne ka sankalp nahin aave। yeh kar loon, yeh kar loon। saakaar mein yaad hai na - jo serviceable bachche the unhon ki sthool bag baggage sada taiyaar hoti thi। train pahunchne mein 5 minute hain aur direction milta tha ki jaao। to bag baggage taiyaar rehte the। ek station pahle train pahunch gai hai - aur woh ja rahe hain। aise bhi anubhav kiya na। yeh bhi man ki sthiti mein bag baggage taiyaar ho। baap ne bulaaya aur bachche ji haajar ho jaaen। isko kehte hain ever ready। achha –

aise sada sang ke rang mein range hue, sada beeti so beeti kar vartamaan aur bhavishya shreshtha banaane vaale,sada parmaatma-milan manaane vaale,sada har karma yaad mein rah karne vaale arthaat har karma ka yaadgaar banaane vaale, sada khushi mein naachte - gaate sangamayug ki mauj manaane vaale, aise baap samaan baap ke har sankalp ko catch karne vaale, sada buddhi shreshtha aur spashta rakhne vaale, aise holi happy hanson ko baapdaada ka yaadapyaar aur namaste!’’

baapdaada ne sabhi bachchon ke patron ka uttar dete hue holi ki mubaarak di -

chaaron or ke desh videsh ke sabhi bachchon ke sneh bhare, umang-utsaah bhare aur kahaan-kahaan apne purooshaartha ke pratigya bhare sabhi ke patra aur sandesh baapdaada ko praapta hue। baapdaada sabhi holi hanson ko sada ‘‘jaisa baap vaise main’’yeh smriti ka vishesh slogan vardaan ke roop mein yaad dila rahe hain। koi bhi karma karte sankalp karte pahle check karo jo baap ka sankalp woh yeh sankalp hai। jo baap ka karma vahi mera karma hai? second mein check karo aur phir saakaar mein laao। to sada hi baap samaan shaktishaali aatma ban saphalta ka anubhav karenge। saphalta janma-siddha adhikaar hai, aisa sahaj praapti ka anubhav karenge। saphalta ka sitaara main svayan hoon to saphalta mere se alag ho nahin sakti। saphalta ki maala sada gale mein piroi hui hai arthaat har karma mein anubhav karte rahenge। baapdaada aaj ke is holi ke sangathan mein aap sabhi holi hanson ko sammukh dekh rahe hain, mana rahe hain। sneh se sabhi ko dekh rahe hain - sabhi ke visheshta ki variety khushbu le rahe hain। kitni meethi khushbu hai harek ke visheshta ki! baap har vishesh aatma ko visheshtaaon se dekhte hue yahi geet gaate - ‘vaah mera sahaj yogi bachcha, vaah mera padmaapadma bhaagyashaali bachcha’। to sabhi apni-apni visheshta aur naam sahit sammukh apne ko anubhav karte hue yaadapyaar sveekaar karna aur sada baap ki chhatrachhaaya mein rah maaya se ghabraana nahin। chhoti baat hai,badi baat nahin hai। chhoti ko bada nahin karna। badi ko chhota karna। oonche rahenge to bada chhota ho jaayega। neeche rahenge to chhota bhi bada ho jaayega। isliye baapdaada ka saath hai, haath hai to ghabraao nahin,khoob udo,udti kala se second mein sabko paar karo। baap ka saath sada hi safe rakhta hai। aur rakhega। achha - sabhi ko sikeeldha,laadla kah baapdaada holi ki mubaarak de rahe hain। achha - (phir to baapdaada se sabhi bachchon ne holi manaai tatha picnic ki)

baandheliyon ko yaadapyaar dete hue - baandheliyon ki yaad to sada baap ke paas pahunchti hai aur baapdaada sabhi baandheliyon ko yahi kehte ki yog arthaat yaad ki lagan ko agni roop banaao। jab lagan agni roop ban jaati to agni mein sab bhasma ho jaata। jo yeh bandhan bhi lagan ki agni mein samaapta ho jaayenge aur svatantra aatma ban jo sankalp karte uski siddhi ko praapta karengi। snehi ho, sneh ki yaad pahunchti hai। sneh ke respond mein sneh milta hai lekin abhi yaad ko shaktishaali agni roop banaao। phir woh din aa jaayega jo sammukh pahunch jaayengi।

party se - sabhi ke mastak par sada bhaagya ka sitaara chamak raha hai na! sada chamakta hai? kabhi timtimaata to nahin hai? akhanda jyoti baap ke saath aap bhi akhanda jyoti arthaat sada jagne vaale sitaare ban gaye। aise anubhav karte ho। kabhi vaayu hilaati to nahin hai deepak va sitaare ko? jahaan baap ki yaad hai woh avinaashi jagamgaata hua sitaara hai। timtimaata hua nahin। light bhi jab timtim karti hai to banda kar dete hain, kisi ko achhi nahin lagti। to yeh bhi sada jagamgaata hua sitaara। sada gyaan soorya baap se roshni le auron ko bhi roshni dene vaale। seva ka umang utsaah sada kaayam rehta hai। sabhi shreshtha aatmaayen ho, shreshtha baap ki shreshtha aatmaayen ho।

yaad ki shakti se saphalta sahaj praapta hoti hai। jitna yaad aur seva saath-saath rehti hai to yaad aur seva ka balance sada ki saphalta ki aasheervaad svatah praapta karaata hai। isliye sada shaktishaali yaad swaroop ka vaataavran banne se shaktishaali aatmaon ka aahvaan hota hai aur saphalta milti hai। nimitta laukik kaarya hai lekin lagan baap aur seva mein hai। laukik bhi seva prati hai, apne lagaav se nahin karte, direction pramaan karte hain, isliye baap ke sneh ka haath aise bachchon ke saath hai। sada khushi mein gaao, naacho yahi seva ka saadhan hai। aapki khushi ko dekh doosre khush ho jaayenge to yahi seva ho jaayegi। baapdaada bachchon ko sada kehte hain - jitna mahaadaani banenge utna khajaana badhta jaayega। mahaadaani bano aur khajaanon ko badhaao। mahaadaani ban khoob daan karo। yeh dena hi lena hai। jo achhi cheez milti hai woh dene ke bina rah nahin sakte।

sada apne bhaagya ko dekh harshit raho। kitna bada bhaagya mila hai, ghar baithe bhagwan mil jaae isse bada bhaagya aur kya hoga! isi bhaagya ko smriti mein rakh harshit raho। to duhkh aur ashaanti sada ke liye samaapta ho jaayenge। sukh swaroop,shant swaroop ban jaayenge। jiska bhaagya svayan bhagwan banaaye woh kitne shreshtha hue। to sada apne mein naya umang, naya utsaah anubhav karte aage badhte chalo। kyonki sangamayug par har din ka naya umang, naya utsaah hai।

jaise chal rahe hain, nahin। sada naya umang,naya utsaah sada aage badhaata hai। har din hi naya hai। sada svayan mein va seva mein koi na koi naveenta zaroor chaahiye। jitna apne ko umang utsaah mein rakhenge utna nai-nai touching hoti rahegi। svayan kisi doosri baaton mein busy rehte to nai touching bhi nahin hoti। manan karo to naya umang rahega। achha - omshaanti।