Avyakt murli du lundi 18 mars 1985

>

18-03-85om shanti avyakt baapdaadaamdhuban

santushtata

dilvaala baapdaada apne diltakhtansheen bachchon prati bole

aaj dilvaala baap apne snehi diltakhtansheen bachchon se dil ki rooh- roohaan karne aaye hain। dilvaala apne sachchi dil vaalon se dil ki len-den karne, dil ka haal-chaal sunne ke liye aaye hain। roohaani baap roohon se rooh- roohaan karte hain। yeh roohon ki rooh-roohaan sirf is samay hi anubhav kar sakte ho। aap roohon mein itni sneh ki shakti hai jo roohon ke rachayita baap ko rooh- roohaan ke liye nirvaan se vaani mein le aate ho। aisi shreshtha rooh ho jo bandhanmukta baap ko bhi sneh ke bandhan mein baandh dete ho। duniya vaale bandhan se chhudaane vaale kah kar pukaar rahe hain aur aise bandhanmukta baap bachchon ke sneh ke bandhan mein sada bandhe hue hain। baandhane mein hoshiyaar ho। jab bhi yaad karte ho to baap haajar hai na! hajoor haajar hai। to aap vishesh double videshi bachchon se rooh-roohaan karne aaye hain। abhi season mein vishesh tarna bhi double videshiyon ka hai। majority double videshi hi aaye hue hain। madhuban nivaasi to hain hi madhuban ke shreshtha sthaan nivaasi। ek hi sthaan par baithe hue vishwa ki variety aatmaon ka milan mela dekhne vaale hain। jo aate hain woh jaate hain lekin madhuban nivaasi to sada rehte hain।

aaj vishesh double videshi bachchon se poochh rahe hain ki sabhi santushta maniyaan ban baapdaada ke taaj mein chamak rahe ho? sabhi santushta maniyaan ho? sada santushta ho?kabhi svayan se asantushta va kabhi brahman aatmaon se asantushta va kabhi apne sanskaaron se asantushta va kabhi vaayumandal ke prabhaav se asantushta to nahin hote ho na! sada sab baaton se santushta hain?kabhi santushta, kabhi asantushta ko santushtamni kahenge?aap sabne kaha na ki ham santushtamni hain। phir aise to nahin kahenge ki ham to santushta hain lekin doosre asantushta karte hain। kuchh bhi ho jaae lekin jo santushta aatmaayen hain woh kab bhi apni santushtata ki visheshta ko chhod nahin sakte hain। ‘santushtata’ - brahman jeevan ka vishesh gun kaho ya khajaana kaho ya vishesh jeevan ka shringaar hai। jaise koi priy vastu hoti hai to priy vastu ko kabhi chhodte nahin hain। santushtata visheshta hai। santushtata brahman jeevan ka vishesh parivartan ka darpan hai। saadhaaran jeevan aur brahman jeevan। saadhaaran jeevan arthaat kabhi santushta kabhi asantushta। brahman jeevan mein santushtata ki visheshta ko dekh agyaani bhi prabhaavit hote hain। yeh parivartan anek aatmaon ka parivartan karne ke nimitta ban jaata hai। sabhi ke mukh se yahi nikalta ki yeh ‘sada santushta arthaat khush rehte hain।’ jahaan santushtata hai vahaan khushi zaroor hai। asantushtata khushi ko gaayab karti hai। yahi brahman jeevan ki mahima hai। sada santushtata nahin to saadhaaran jeevan hai। santushtata saphalta ka sahaj aadhaar hai। santushtata sarva brahman parivaar ke snehi banaane mein shreshtha saadhan hai। jo santushta rahega uske prati svatah hi sabhi ka sneh rahega। santushta aatma ko sada sabhi svayan hi sameep laane va har shreshtha kaarya mein sahayogi banaane ka prayatna karenge। unhon ko mehnat nahin karni padegi ki mujhe sameep laao। mujhe sahayogi banaao। ya mujhe vishesh aatmaon ki list mein laao। sochna bhi nahin padega। kehna bhi nahin padega। santushtata ki visheshta svayan hi har kaarya mein golden chancellor bana deti hai। svatah hi kaarya arth nimitta bani hui aatmaon ko santushta aatma ke prati sankalp aavega hi। aaair chance milta hi rahega। santushtata sada sarva ke svabhaav sanskaar ko milaane vaali hoti hai। santushta aatma kabhi kisi ke bhi svabhaav sanskaar se ghabraane vaali nahin hoti hai। aisi santushta aatmaayen bani ho na! jaise bhagwan aapke paas aaya aap nahin gaye। bhaagya svayan aapke paas aaya। ghar baithe bhagwan mila। bhaagya mila। ghar baithe sarva khajaanon ki chaabi mili। jab chaaho jo chaaho khajaane aapke hain। kyonki adhikaari ban gaye ho na। to aise sarva ke sameep aane ka,seva mein sameep aane ka chance bhi svatah hi milta hai। visheshta svayan hi aage badhaati hai। jo sada santushta rehta hai usse sabhi ka svatah hi dil ka pyaar hota hai। baahar ka pyaar nahin। ek hota hai - kisi ko raaji karne ke liye baahar ka pyaar karna। ek hota hai - dil ka pyaar। naaraaz na ho uske liye bhi pyaar karna padta hai। lekin woh pyaar ko sada lene ka paatra nahin banta। santushta aatma ko sada sabhi ka dil ka pyaar milta hai। chaahe koi naya ho va puraana ho, koi kisko parichay ke roop se jaanta ho ya nahin jaanta ho lekin santushtata us aatma ki pahchaan dilaati hai। har ek ki dil hogi isse baaten karen,isse baithen। to aise santushta ho?pakke ho na! aise to nahin kehte - ban rahe hain। nahin! ban gaye hain।

santushta aatmaayen sada maayaajeet hain hi। yeh maayaajeet vaalon ki sabha hai na। maaya se ghabraane vaale to nahin hain na। maaya aati kiske paas hai? sabhi ke paas aati to hai na! aisa koi hai jo kahe maaya aati hi nahin?aati sabke paas hai lekin koi ghabraata hai koi pahchaan leta hai isliye sambhal jaata hai। maryaada ki lakeer ke andar rahne vaale baap ke aagyaakaari bachche maaya ko door se hi pahchaan lete hain। pahchaanne mein deri karte hain,va galti karte hain tab maaya se ghabra jaate hain। jaise yaadgaar mein kahaani suni hai - seeta ne dhokha kyon khaaya?kyonki pahchaana nahin। maaya ke swaroop ko na pahchaanne kaaran dhokha khaaya। agar pahchaan len ki yeh brahman nahin, bhikhaari nahin, raavan hai to shok vaatika ka itna anubhav nahin karna padta। lekin pahchaan deri se aai tab dhokha khaaya aur dhokhe ke kaaran duhkh uthaana pada। yogi se viyogi ban gai। sada saath rahne se door ho gai। praapti swaroop aatma se pukaarne vaali aatma ban gai। kaaran? pahchaan kam। maaya ke roop ko pahchaanne ki shakti kam hone kaaran maaya ko bhagaane ke bajaae svayan ghabra jaate hain। pahchaan kam kyon hoti hai,samay par pahchaan nahin aati, peechhe kyon aati। iska kaaran? kyonki sada baap ki shreshtha mat par nahin chalte। koi samay yaad karte hain, koi samay nahin। koi samay umang-utsaah mein rehte, koi samay nahin rehte। jo sada ki aagya ko ullanghan karte arthaat aagya ki lakeer ke andar nahin rahne ke kaaran maaya samay par dhokha de deti hain। maaya mein parakhne ki shakti bahut hai। maaya dekhti hai ki is samay yeh kamzor hai। to is prakaar ki kamzori dvaara isko apna bana sakte hain। maaya ke aane ka raasta hai hi - kamzori। jara-sa bhi raasta mila to jhat pahunch jaati hai। jaise aajkal daaku kya karte hain! darvaaja bhale banda ho lekin venteeletar se bhi aa jaate hain। jara-sa sankalp maatra bhi kamzor hona arthaat maaya ko raasta dena hai। isliye maayaajeet banne ka bahut sahaj saadhan hai - ‘sada baap ke saath raho।’ saath rehna arthaat svatah hi maryaadaaon ki lakeer ke andar rehna। ek-ek vikaar ke peechhe vijayi banne ki mehnat karne se chhoot jaayenge। saath raho to svatah hi jaise baap vaise aap। sang ka rang svatah hi lag jaayega। beej ko chhod sirf shaakhaaon ko kaatne ki mehnat nahin karo। aaj kaam jeet ban gaye,kal krodh jeet ban gaye,nahin। hain hi sada vijayi! jab beejroop dvaara beej ko khatma kar denge to baar-baar mehnat karne se svatah hi chhoot jaayenge। sirf beejroop ko saath rakho। phir yeh maaya ka beej aisa bhasma ho jaayega jo phir kabhi bhi us beej se ansh bhi nahin nikal sakta। vaise bhi aag mein jale hue beej se kabhi phal nahin nikal sakta।

to saath raho, santushta raho to maaya kya karegi! surrender ho jaayegi। maaya ko surrender karna nahin aata hai?agar svayan surrender hain to maaya uske aage surrender hai hi। to maaya ko surrender kiya hai ya abhi taiyaari kar rahe ho? kya haal-chaal hai? jaise apne surrender hone ki ceremony manaate ho vaise maaya ko surrender karne ki ceremony mana li hai ya manaani hai? holi ho gaye maana ceremony ho gai,jal gai। phir vahaan ja karke aise to patra nahin likhenge ki kya karen, maaya aa gai। khushkhabri ke patra likhenge na। kitni surrender ceremony manaai hai, hamaari to ho gai lekin aur aatmaon dvaara bhi maaya ko surrender karaaya। aise samaachaar likhenge na! achha –

jitne umang-utsaah se aaye ho utna hi baapdaada bhi sada bachchon ko aise umang-utsaah se santushta aatma ke roop mein dekhne chaahte hain। lagan to hai hi। lagan ki nishaani hai - jo itna door se sameep pahunch gaye ho। din raat lagan se din ginte-ginte yahaan pahunch gaye। lagan na hoti to pahunchna bhi mushkil hota। lagan hai ismen to paas ho। paas certificate mil gaya na। har subject mein paas। phir bhi baapdaada bachchon ko aaphreen dete hain। kyonki pahchaanne ki najar tej hai। door rehte bhi baap ko pahchaan liya। saath arthaat desh mein rahne vaale nahin pahchaan sakte। lekin aap log door baithe bhi pahchaan gaye। pahchaan kar baap ko apna banaaya va baap ke bane। iske liye baapdaada vishesh aaphreen dete hain। to jaise pahchaanne mein aage gaye vaise maayaajeet banne mein bhi number one ban sada baap ki aaphreen lene ke yogya avashya banenge। jo baapdaada koi bhi maaya se ghabraane vaali aatma ko aapke paas bhejen ki in bachchon se ja karke maayaajeet banne ka anubhav poochho। aisa ekjaampal bankar dikhaao। jaise mohjeet parivaar prasiddha hai vaise maayaajeet centre prasiddha ho! yeh aisa centre hai jahaan maaya ka kab vaar nahin hota। aana aur baat hai vaar karna aur baat hai। to ismen bhi number lene vaale ho na। ismen number one kaun banega? landan,Australia banega va America banega? pairis banega, jarman banega, braajeel banega, kaun banega? jo bhi banen। baapdaada aise chaitanya myujayam announce karenge। jaise aabu ka myujayam number one kehte hain। seva mein bhi to sajaavat mein bhi। aise maayaajeet bachchon ka chaitanya myujayam ho। himmat hai na?uske liye abhi kitna samay chaahiye? golden jubilee mein bhi unko inaam denge jo pahle hi kuchh karke dikhaayenge na। last so fast ho dikhaao। bhaarat vaale bhi race karen। lekin aap unse bhi aage jaao। baapdaada sabhi ko aage jaane ka chance de rahe hain। 8 number mein aa jaao। aath ko hi inaam milega। aise nahin sirf ek ko milega। yeh to nahin sochte ho - landan aur Australia to puraane hain,ham to abhi naye-naye hain। sabse chhota naya kaun sa centre hai?sabse chhota jo hota hai woh sabhi ko pyaara hota hai। vaise bhi chhoton ko kaha jaata hai - bade to bade hain lekin chhote baap samaan hain। sabhi kar sakte hain। koi badi baat nahin। grees, taimpa,rom yeh chhote hain। yeh to bade umang mein rahne vaale hain। taimpa kya karega?tempal banaayega? woh ramneek bachchi aai thi na-unko kaha tha ki taimpa ko tempal banaao। jo bhi taimpa mein aave to har ek chaitanya moorti ko dekh harshit ho। aap shaktishaali taiyaar ho jaao। sirf aap raaje taiyaar ho jaao phir praja jhat banegi। royal family banne mein time lagta hai। yeh royal family,raajdhaani ban rahi hai phir praja to dher aa jaayegi। itni aa jaayegi jo aap dekh-dekh tang ho jaayenge। kahenge baba ab bas karo lekin pahle raajya adhikaari takhtansheen to ban jaaen na। taajdhaari tilakdhaari ban jaaen tab to praja bhi ji hajoor kahegi। taajdhaari hoga nahin to praja kaise maanegi ki yeh raaja hai। royal phemli banne mein time lagta hai। aap achhe samay par pahunche ho jo royal family mein aane ke adhikaari ho। abhi praja ka samay aane vaala hai। raaja banne ki nishaani jaante ho na?abhi se svaraajya adhikaari vishwa raajya adhikaari ban jaao। abhi se raajya adhikaari banne vaalon ke sameep aur sahayogi banne vaale vahaan bhi sameep aur raajya chalaane mein sahayogi banenge। abhi seva mein sahayogi phir raajya chalaane mein sahayogi। to abhi se check karo। raaje hain ya kabhi raaja kabhi praja ban jaate! kabhi adheen kabhi adhikaari। sada ke raaje ho?to kitne aap lucky ho? yeh nahin sochna - ham to peechhe aaye hain। woh peechhe aane vaalon ko sochna padega। aap achhe samay par pahunch gaye ho। isliye lucky ho। yeh nahin sochna ham peechhe aaye hain, raaja ban sakenge va nahin। royal phemli mein aa sakenge va nahin। sada yeh socho ham nahin aayege to kaun aayenge?aana hi hai,pata nahin yeh kar sakenge va nahin। pata nahin yeh hoga va kya…nahin। pata hai ki hamne har kalpa kiya hai। kar rahe hain aur sada karenge। samjha!

kabhi yeh bhi nahin sochna ham videshi hain, yeh deshi hain। yeh indian hain,ham foreigner hain। hamaara tareeka apna,inhon ka apna। yeh to sirf parichay ke liye double videshi kehte hain। jaise yahaan bhi kehte yeh karnaatak vaale hain, yeh yu.pi. vaale hain। ho to brahman na! chaahe indian hon, chaahe videshi hon,sabhi brahman hain। ham videshi hain yeh sochna hi wrong hai। naya janma to brahma ki godi mein hua na। yeh sirf parichay ke liye kaha jaata। lekin sanskaar mein va samajhne mein kabhi bhi antar nahin samajhna। brahman vansh ke ho na! America,aphreeka vansh ke to nahin ho na। sabhi ka parichay kya denge। shiv vanshi brahmaakumaar-kumaariyaan। ek hi vansh ho gaya na। kabhi bhi bolne mein pharka nahin rakho। indian aise karte, videshi aise karte, nahin। ham ek hain। baap ek hai। raasta ek hai। reeti-rasma ek hai। svabhaav sanskaar ek hain। phir deshi aur videshi antar kahaan se aaya? apne ko videshi kahne se door ho jaayenge। ham brahma vanshi sab brahman hain। ham videshi hain,ham gujraati hain…isliye yeh hota hai। nahin,sab ek baap ke hain। yahi to visheshta hai jo bhinna-bhinna sanskaar milkar ek ho gaye hain। bhinna-bhinna dharma, bhinna-bhinna jaati-paanti sab samaapta ho gaya। ek ke ho gaye arthaat ek ho gaye। samjha!

rooh-roohaan hui na। baapdaada ko yeh raunak achhi lagti hai। madhuban ki raunak hai na! ghar ki raunak sada bachche hote। kitni achhi raunak ho! madhuban aap logon se saj gaya hai। ek visheshta bahut achhi hai! seva mein bahut achhi lagan hai। padhaai mein bhi hain lekin ismen koi koi thode albele hain। seva ki lagan mein majority achhe hain। aur seva ki lagan hi nirvighna bana rahi hai। busy rahne ke kaaran anek prakaar ki maaya se chhoot gaye ho। jo bhi aaye hain, lagan vaale hain। agle varshon se is varsha ki result achhi hai। seva ki vriddhi ka record bhi achha hai। anubhvi aatmaayen lagti ho। anubhvi jaldi halchal mein nahin aate। anubhvi na hone ke kaaran oonche bhi jaldi jaayenge, neeche bhi jaldi aayenge। lekin is varsha majority ki result nirvighna achhi hai। ab baaki maayaajeet banne mein number lena hai। achha –

sada santushtata ki visheshta vaali vishesh aatmaon ko, sada santushtata dvaara seva mein saphalta paane vaale bachchon ko, sada raajya adhikaari so vishwa-raajya adhikaari shreshtha aatmaon ko,sada nishchay dvaara har kaarya mein number one banne vaale bachchon ko baapdaada ka yaadapyaar aur namaste।’’

videshi bhaai-bahinon se avyakt baapdaada ki mulaakaat - (1)sada apne ko baap samaan master sarvashaktivaan anubhav karte ho?jaisa baap vaise bachche hain na! sarvashaktiyon ka varsa bachchon ka adhikaar hai। to jab bhi jis shakti ko jis roop se kaarya mein lagaane chaaho vaise laga sakte ho! master sarvashaktivaan ki smriti shaktiyon ko emerge karti hai। jis samay jis shakti ki aavashyakta hogi us samay is smriti se kaarya mein laga sakte ho। aise anubhav karenge jaise yeh shareer ki shaktiyaan baahen hain, paanv hain, aankhen hain… jis samay jo shakti use karne chaahen vaise kar sakte hain, vaise yeh sookshm shaktiyaan kaarya mein laga sakte hain। kyonki yeh bhi apna adhikaar hai। lekin iska adhikaar hai master sarvashaktivaan ki smriti।

(2) seva mein nimitta banna yeh bhi shreshtha bhaagya hai - is bhaagya ko sada aage badhaane ke liye vishesh svayan ko double light samjho। kisi bhi prakaar ka bojh khushi ki anubhooti sada nahin karaayega। jitna apne ko double light anubhav karenge utna bhaagya padmaguna badhta jaayega। baapdaada double light rahne vaale bachchon ke har kaarya mein madadgaar hain। jitna seva mein nimitta banne ka bhaagya milta hai utna double light sthiti se udti kala mein udne ke vishesh anubhvi ban sakte ho। double light sthiti mein rahne se sada khushi mein naachte rahenge aur khushi ke mahaadaani ban khushi ki khaan badhaate rahenge।

patron ke uttar dete hue:- sabhi bachchon ke dil ke yaadapyaar ke saaz baapdaada ne sune। jis sneh se, dil ke umang se sabhi bachchon ne yaadapyaar bheji hai usi sneh se baapdaada yaadapyaar de rahe hain। aise snehi diltakhtansheen bachchon ko dilaaraam baap ki dil se yaadapyaar sveekaar ho। sada hi aise umang mein rahne se safe bhi rahenge aur aage bhi badhte rahenge। achha –