Avyakt murli du jeudi 20 février 1986

>

20-02-86om shanti avyakt baapdaadaamdhuban

udti kala se sarva ka bhala

sada kalyaankaari shiv baba bole

aaj vishesh double videshi bachchon ko double mubaarak dene aaye hain। ek doordesh mein bhinna dharma mein jaate hue bhi najdeek bhaarat mein rahne vaali anek aatmaon se jaldi baap ko pahchaana। baap ko pahchaanne ki arthaat apne bhaagya ko praapta karne ki mubaarak aur doosri jaise teevragti se pahchaana vaise hi teevragti se seva mein svayan ko lagaaya। to seva mein teevragti se aage badhne ki doosri mubaarak। seva ki vriddhi ki gati teevra rahi hai aur aage bhi double videshi bachchon ko vishesh kaarya arth nimitta banna hai। bhaarat ke nimitta aadi ratnon ne, vishesh aatmaon ne sthaapna ke kaarya mein bahut majboot foundation ban kaarya ki sthaapna ki aur double videshi bachchon ne chaaron or aavaaj phailaane ki teevragti ki seva ki aur karte rahenge। isliye baapdaada sabhi bachchon ko aate hi, janmate hi bahut jaldi seva mein aage badhne ki vishesh mubaarak de rahen hain। thode samay mein bhinna-bhinna deshon mein vistaar seva ka kiya hai,isliye aavaaj phailaane ka kaarya sahaj vriddhi ko pa raha hai। aur sada double light ban double taajdhaari banne ka sampoorn adhikaar praapta karne ka teevra purooshaartha avashya karenge। aaj vishesh milne ke liye aaye hain। baapdaada dekh rahe hain ki sabhi ki dil mein khushi ke baaje baj rahen hain। bachchon ki khushi ke saaj, khushi ke geet baapdaada ko sunaai dete hain। yaad aur seva mein lagan se aage badh rahe hain। yaad bhi hai, seva bhi hai lekin abhi addition kya hona hai?hain donon hi lekin sada donon ka balance rahe। yeh balance svayan ko aur seva me baap ki blessing ke anubhvi banaata hai। seva ka umang utsaah rehta hai। abhi aur bhi seva mein yaad aur seva ka balance rakhne se jyaada aavaaj bulanda roop mein vishwa mein goonjega। vistaar achha kiya hai। vistaar ke baad kya kiya jaata hai? vistaar ke saath abhi aur bhi seva ka saar aisi vishesh aatmaayen nimitta banaani hain jo vishesh aatmaayen bhaarat ki vishesh aatmaon ko jagaayen। abhi bhaarat mein bhi seva ki rooprekha, samay pramaan aage badhti ja rahi hain। netaayen,dharmanetaayen aur saath-saath abhinetaayen bhi samparka mein aa rahe hain। baaki kaun rahe hain?samparka mein to aa rahe hain,netaayen bhi aa rahe hain lekin vishesh raajnetaayen unhon tak bhi sameep samparka mein aane ka sankalp utpanna hona hi hai।

sabhi double videshi bachche udti kala mein ja rahe ho na! chadhti kala vaale to nahi ho na! udti kala hai? ‘udti kala hona arthaat sarva ka bhala hona।’jab sabhi bachchon ki ekras udti kala ban jaayegi to sarva ka bhala arthaat parivartan ka kaarya sampanna ho jaayega। abhi udti kala hai lekin udti ke saath-saath stages hai। kabhi bahut achhi stage hai aur kabhi stage ke liye purooshaartha karne ki stage hain। sada aur majority ki udti kala hona arthaat samaapti hona। abhi sabhi bachche jaante hain ki udti kala hi shreshtha sthiti hai। udti kala hi karmaateet sthiti ko praapta karne ki sthiti hai। udti kala hi deh mein rehte, deh se nyaari or sada baap aur seva mein pyaare-pan ki sthiti hai। udti kala hi vidhaata aur vardaata stage ki sthiti hai। udti kala hi chalte phirte pharishta va devta donon roop ka saakshaatkaar karaane vaali sthiti hai।

udti kala sarva aatmaon ko bhikhaareepan se chhudaae baap ke varse ke adhikaari banaane vaali hai। sabhi aatmaayen anubhav karengi ki ham sab aatmaon ke ishta dev va ishta deviyaan va nimitta bane hue jo bhi anek devtaayen hain, sabhi is dharni par avatrit ho gae hain। satayug mein to sab sadgati mein honge lekin is samay jo bhi aatmaayen hai - sarva ke sadgatidaata ho। jaise koi bhi drama jab samaapta hota hai to ant mein sabhi actors stage par saamne aate hain। to abhi kalpa ka drama samaapta hone ka samay aa raha hai। saari vishwa ki aatmaon ko chaahe svapna mein,chaahe ek second ki jhalak mein, chaahe pratyakshata ke chaaron or ke aavaaj dvaara yeh zaroor saakshaatkaar hona hai ki is drama ke hero paartadhaari stage par pratyaksha ho gaye। dharti ke sitaare, dharti par pratyaksha ho gaye। sab apne-apne ishta dev ko praapta kar bahut khush honge। sahaara milega। double videshi bhi ishta dev, ishta deviyon mein hain na! ya golden jubilee vaale hain? aap bhi usmein ho ya dekhne vaale ho? jaise abhi golden jubilee ka drishya dekha। yeh to ek ramneek part bajaaya। lekin jab final drishya hoga usmein to aap saakshaatkaar karaane vaale honge ya dekhne vaale honge? kya honge? hero actor ho na! abhi emerge karo woh drishya kaisa hoga। isi antim drishya ke liye abhi se trikaaldarshi ban dekho ki kaisa sundar drishya hoga aur kitne sundar ham honge। saje sajaaye divya gun moortta pharishte so devta, iske liye abhi se apne ko sada pharishte swaroop ki sthiti ka abhyaas karte hue aage badhte chalo। jo chaar vishesh subject hain - gyaan moorta,nirantar yaad moorta, sarva divyagun moorta, ek divya gun ki bhi kami hogi to 16 kala sampanna nahin kahenge। 16kala, sarva aur sampoorn yeh teenon mahima hain। sarvagun sampanna kehte ho, sampoorn nirvikaari kehte ho aur 16 kala sampanna kehte ho। teenon visheshtaayen chaahiye। 16kala arthaat sampanna bhi chaahiye, sampoorn bhi chaahiye aur sarva bhi chaahiye। to yeh check karo। sunaaya tha na ki yeh varsha bahutkaal ke hisaab mein jama hone ka hai phir bahutkaal ka hisaab samaapta ho jaayega, phir thoda kaal kahne mein aayega, bahutkaal nahin। bahutkaal ke purooshaartha ki line mein aa jaao। tabhi bahutkaal ka raajya bhaagya praapta karne ke adhikaari banenge। nahin to bahut kaal ka raajya bhaagya badal kuchh kam raajya bhaagya praapta hone ke adhikaari banenge। do chaar janma bhi kam hua to bahutkaal mein ginti nahin hogi। pahla janma ho aur pahla prakriti ka shreshtha sukh ho। one-one- one ho। sabmen one ho। uske liye kya karna padega? seva bhi number one,sthiti bhi number one tab to one-one mein aayenge na! to satayug ke aadi mein aane vaale number one aatma ke saath part bajaane vaale aur number one janma mein part bajaane vaale। to sanvat bhi aarambha aap karenge। pahle-pahle janma vaale hi pahli taareekh pahla maas pahla sanvat shuru karenge। to double videshi number one mein aayenge na। achha - pharishtepan ki dress pahanne aati hai na! yeh chamkeeli dress hai। yeh smriti aur swaroop banna arthaat pharishta dress dhaaran karna। chamakne vaali cheez door se hi aakarshit karti hai। to yeh pharishta dress arthaat pharishta swaroop doordoor tak aatmaon ko aakarshit karegi। achha –

aaj yu.ke. ka tarna hai। yu.ke.vaalon ki visheshta kya hai? london ko satayug mein bhi raajdhaani banaayenge ya sirf ghoomne ka sthaan banaayenge? hai to united kingdom na! vahaan bhi kingdom banaayenge ya sirf kings jaakar chakra lagaayenge? phir bhi jo naam hai, kingdom kehte hain। to is samay seva ka kingdom to hai hi। saare videsh ke seva ki raajdhaani to nimitta hai hi। kingdom naam to theek hai na! sabhi ko yunaait karne vaali kingdom hai। sabhi aatmaon ko baap se milaane ki raajdhaani hai। yu.ke. vaalon ko baapdaada kehte hain ‘O.ke.’rahne vaale। yu.ke. arthaat O.ke. rahne vaale। kabhi bhi kisi se bhi poochhen to ‘O.ke.’,aise hain na! aise to nahin kahenge - haan - hain to sahi। lamba shvaans uthaakar kehte hain - haan। aur jab theek hote hain to kehte hain - haan O.ke., O.ke। pharka hota hai। to sangamayug ki raajdhaani, seva ki raajdhaani jismen raajya satta arthaat royal family ki aatmaayen taiyaar hone ki prerna chaaron or phaile। to raajdhaani mein raajya adhikaari banaane ka raajasthaan to hua na। isliye baapdaada har desh ki visheshta ko vishesh roop se yaad karte hain aur visheshta se sada aage badhaate hain। baapdaada kamzoriyaan nahin dekhte hain, sirf ishaara dete hain। bahut achhe-achhe kehte-kehte bahut achhe ho jaate hain। kamzor ho, kamzor ho kehte ho to kamzor ho jaate। ek to pahle kamzor hote hain doosra koi kah deta hai to moorchhit ho jaate hain। kaisa bhi moorchhit ho lekin usko shreshtha smriti ki, visheshtaaon ki smriti ki sanjeevni booti khilaao to moorchhit se surjeet ho jaayega। sanjeevni booti sabke paas hai na! to visheshtaaon ke swaroop ka darpan uske saamne rakho। kyonki har brahman aatma vishesh hai। koto mein koi hai na। to vishesh hui na! sirf us samay apni visheshta ko bhool jaate hain। usko smriti dilaane se vishesh aatma ban hi jaayenge। aur jitni visheshta ka varnan karenge to usko svayan hi apni kamzori aur hi jyaada spashta anubhav hogi। aapko karaane ki jaroorat nahin hogi। agar aap kisko kamzori sunaayenge to woh chhipaayenge। taal denge, main aisa nahin hoon। aap visheshta sunaao। jab tak kamzori svayan hi anubhav na kare tab tak parivartan kar nahin sakte। chaahe 50varsha aap mehnat karte raho। isliye is sanjeevni booti se moorchhit ko bhi surjeet kar udte chalo aur udaate chalo। yahi yu.ke.karta hai na! achha –

landan se aur-aur sthaanon par kitne gaye hain? bhaarat se to gaye hain,landan se kitne gaye hain? Australia se kitne gaye?Australia ne bhi vriddhi ki hai aur kahaan-kahaan gaye? gyaan gangaayen jitna door-door bahti hain utna achha hai। yu.ke.Australia,America,Europe mein kitne centre hain? (sabne apni-apni sankhya sunaai)

matlab to vriddhi ko praapta kar rahe ho। abhi koi vishesh sthaan raha hua hai? (bahut hain) achha uska plan bhi bana rahe ho na?videsh ko yeh lift hai ki bahut sahaj centre khol sakte hain। laukik seva bhi kar sakte hain aur alaukik seva ke bhi nimitta ban sakte hain। bhaarat mein phir bhi nimantran par centre sthaapan hone ki visheshta rahi hai lekin videsh mein svayan hi nimantran svayan ko dete। nimantran dene vaale bhi khud aur pahunchne vaale bhi khud to yeh bhi seva mein vriddhi sahaj hone ki ek lift mili hui hai। jahaan bhi jaao to do teen milkar vahaan sthaapna ke nimitta ban sakte ho aur bante rahenge। yeh drama anusaar gift kaho, lift kaho,mili hui hai। kyonki thode samay mein seva ko samaapta karna hai to teevragti ho tab to samay par samaapta ho sake। bhaarat ki vidhi aur videsh ki vidhi mein antar hai isliye videsh mein jaldi vriddhi ho rahi hai aur hoti rahegi। ek hi din mein bahut hi centre khul sakte hain। chaaron or videsh mein nimitta rahne vaale videshiyon ko seva ka chance sahaj hai। bhaarat vaalon ko dekho‘veesa’bhi mushkil milti hai। to yeh chance hai vahaan ke rahne vaale hi vahaan ki seva ke nimitta bante hain isliye seva ka chance hai। jaise last so fast jaane ka chance hai vaise seva ka chance bhi fast mila hua hai isliye ulhana nahin rahega ki ham peechhe aaye। peechhe aane vaalon ko fast jaane ka chance bhi vishesh hai isliye har ek sevaadhaari hai। sabhi sevaadhaari ho ya centre par rahne vaale sevaadhaari hain? kahaan bhi hain seva ke bina chain nahin ho sakti। seva hi chain ki nindra hai। kehte hain - chain se sona yahi jeevan hai। seva hi chain ki nindra kaho, sona kaho। seva nahin to chain ki neend nahin। sunaaya na, seva sirf vaani ki nahin,har second seva hai। har sankalp mein seva hai। koi bhi yeh nahin kah sakta - chaahe bhaaratvaasi chaahe videsh mein rahne vaale koi brahman yeh nahin kah sakte ki seva ka chance nahin hai। beemaar hai to bhi mansa seva, vaayumandal banaane ki seva,vibration phailaane ki seva to kar hi sakte hain। koi bhi prakaar ki seva karo lekin seva mein hi rehna hai। ‘seva hi jeevan hai। brahman ka arth hi hai sevaadhaari’। achha –

‘sada udti kala sarva ka bhala’ sthiti mein sthit rahne vaale, sada svayan ko pharishta anubhav karne vaale, sada vishwa ke aage ishta dev roop mein pratyaksha hone vaale dev aatmaayen, sada svayan ko vishesh aatma samajh auron ko bhi visheshta ka anubhav karaane vaale vishesh aatmaon ko baapdaada ka yaadapyaar aur namaste।’’

party se

sada svayan ko karmayogi anubhav karte ho? karmayogi jeevan arthaat har kaarya karte yaad ki yaatra mein sada rahe। yeh shreshtha kaarya shreshtha baap ke bachche hi karte hain aur sada saphal hote hain। aap sabhi karmayogi aatmaayen ho na! karma mein rehte ‘nyaara aur pyaara’ sada isi abhyaas se svayan ko aage badhaana hai। svayan ke saath-saath vishwa ki jimmevaari sabhi ke oopar hai। lekin yeh sab sthool saadhan hain। karmayogi jeevan dvaara aage badhte chalo aur badhaate chalo। yahi jeevan ati priy jeevan hai। seva bhi aur khushi bhi ho। donon saath-saath, theek hain na! golden jubilee to sabhi ki hai। golden arthaat satopradhaan sthiti mein sthit rahne vaale। to sada apne ko is shreshtha sthiti dvaara aage badhaate chalo। sabhi ne seva achhi tarah se ki na! seva ka chance bhi abhi hi milta hai phir yeh chance samaapta ho jaata hai। to sada seva mein aage badhte chalo। achha