Avyakt murli du vendredi 23 janvier 1987

>

23-01-87om shanti avyakt baapdaadaamdhuban

saphalta ke sitaare ki visheshtaaen

gyaansoorya, gyaan-chandrama baapdaada apne naye-so-kalpa puraane bachchon ke sammukh paramatma taaraamandal ka haal sunaate hue bole

aaj gyaan-soorya, gyaan-chadrama apne chamakte hue taaraamandal ko dekh rahe hain। woh aakaash ke sitaare hain aur yeh dharti ke sitaare hain। woh prakriti ki satta hai, yeh parmaatma-sitaare hain, roohaani sitaare hain। woh sitaare bhi raat ko hi pragat hote hain, yeh roohaani sitaare, gyaan-sitaare,chamakte hue sitaare bhi brahma ki raat mein hi pragat hote hain। woh sitaare raat ko din nahin banaate, sirf soorya raat ko din banaata hai। lekin aap sitaare gyaan-soorya,gyaan-chandrama ke saath saathi ban raat ko din banaate ho। jaise prakriti ke taaraamandal mein anek prakaar ke sitaare chamakte hue dikhaai dete hain, vaise parmaatma-taaraamandal mein bhi bhinna-bhinna prakaar ke sitaare chamakte hue dikhaai de rahe hain। koi sameep ke sitaare hain aur koi door ke sitaare bhi hain। koi saphalta ke sitaare hain to koi ummeedvaar sitaare hain। koi ek sthiti vaale hain aur koi sthiti badalne vaale hain। woh sthaan badalte, yahaan sthiti badalte। jaise prakriti ke taaraamandal mein puchchhal taare bhi hain। arthaat har baat mein,har kaarya mein ‘‘yeh kyon'', ‘‘yeh kya'' - yeh poochhne ki poonchh vaale arthaat question rma karne vaale puchchhal taare hain। jaise prakriti ke puchchhal taare ka prabhaav prithvi par bhaari maana jaata hai,aise baar-baar poochhne vaale is brahman parivaar mein vaayumandal bhaari kar dete hain। sabhi anubhvi ho। jab svayan ke prati bhi sankalp mein ‘kya' aur‘kyon' ka poonchh lag jaata hai to man aur buddhi ki sthiti svayan prati bhaari ban jaati hai। saath-saath agar kisi bhi sangathan beech va seva ke kaarya prati ‘kyon', ‘kya', ‘aisa', ‘kaisa',… - yeh question rma ki queue ka poonchh lag jaata hai to sangathan ka vaataavran va seva kshetra ka vaataavran phauran bhaari ban jaata hai। to svayan prati,sangathan va seva prati prabhaav pad jaata hai na। saath-saath kai prakriti ke sitaare oopar se neeche girte bhi hain, to kya ban jaate hain? patthar। parmaatma-sitaaron mein bhi jab nishchay, sambandh va sva-dhaarna ki oonchi sthiti se neeche aa jaate hain to patthar buddhi ban jaate hain। kaise patthar buddhi ban jaate? jaise patthar ko kitna bhi paani daalo lekin patthar pighlega nahin, roop badal jaata hai lekin pighlega nahin। patthar ko kuchh bhi dhaaran nahin hota hai। aise mein jab patthar buddhi ban jaate to us samay kitna bhi,koi bhi achhi baat mahsoos karaao to mahsoos nahin karte। kitna bhi gyaan ka paani daalo lekin badlenge nahin। baaten badalte rahenge lekin svayan nahin badlenge। isko kehte hain patthar buddhi ban jaate hain। to apne aap se poochho - is parmaatma-taaraamandal ke sitaaron beech, main kaun-sa sitaara hoon?

sabse shreshtha sitaara hai saphalta ka sitaara। saphalta ka sitaara arthaat jo sada svayan ki pragti mein saphalta ko anubhav karta rahe arthaat apne purooshaartha ki vidhi mein sadaiv sahaj saphalta anubhav karta rahe। saphalta ke sitaare sankalp mein bhi svayan ke purooshaartha prati bhi kabhi ‘pata nahin yeh hoga ya nahin hoga', ‘kar sakenge ya nahin kar sakenge' - yeh asphalta ka ansh-maatra nahin hoga। jaise slogan hai - saphalta janma-siddha adhikaar hai, aise woh svayan prati sada saphalta adhikaar ke roop mein anubhav karenge। adhikaar ki paribhaasha hi hai bina mehnat,bina maangane se praapta ho। sahaj aur svatah praapta ho - isko kehte hain adhikaar। aise hi ek - svayan prati saphalta, doosra - apne sambandh-samparka mein aate hue,chaahe brahman aatmaon ke,chaahe laukik parivaar va laukik kaarya ke sambandh mein,sarva sambandh-samparka mein, sambandh mein aate, samparka mein aate kitni bhi mushkil baat ko saphalta ke adhikaar ke aadhaar se sahaj anubhav karenge arthaat saphalta ki pragti mein aage badhte jaayenge। haan,samay lag sakta hai lekin saphalta ka adhikaar praapta hokar hi rahega। aise,sthool kaarya va alaukik seva ka kaarya arthaat donon kshetra ke karma mein saphalta ke nishchaybuddhi vijayi rahenge। kahaan-kahaan paristhiti ka saamna bhi karna padega, vyaktiyon dvaara sahan bhi karna padega lekin woh sahan karna unnati ka raasta ban jaayega। paristhiti ko saamna karte,paristhiti,svasthiti ke udti kala ka saadhan ban jaayegi,arthaat har baat mein saphalta svatah, sahaj aur avashya praapta hogi।

saphalta ka sitaara, uski vishesh nishaani hai - kabhi bhi sva ki saphalta ka abhimaan nahin hoga, varnan nahin karega,apne geet nahin gaayega lekin jitni saphalta utna namrachit,nirmaan,nirmal svabhaav hoga। aur (doosre) uske geet gaayenge lekin woh svayan sada baap ke gun gaayega। saphalta ka sitaara kabhi bhi question rma nahin karega। sada bindi roop mein sthit rah har kaarya mein auron ko bhi ‘drama ki bindi' smriti mein dilaaye, vighnavinaashak banaaye, samartha banaaye saphalta ki manjal ke sameep laata rahega। saphalta ka sitaara kabhi bhi had ki saphalta ke praapti ko dekh praapti ki sthiti mein bahut khushi aur paristhiti aai va praapti kuchh kam hui to khushi bhi kam ho jaaye - aisi sthiti parivartan karne vaale nahin honge। sada behad ke saphaltaamoorta honge। ekras,ek shreshtha sthiti par sthit honge। chaahe baahar ki paristhiti va kaarya mein baahar ke roop se auron ko asphalta anubhav ho lekin saphalta ka sitaara, asphalta ki sthiti ke prabhaav mein na aaye, saphalta ke svasthiti se asphalta ko bhi parivartan kar lega। yeh hai saphalta ke sitaare ki visheshtaayen। abhi apne se poochho - main kaun hoon?sirf ummeedvaar hoon va saphalta swaroop hoon?'ummeedvaar banna bhi achha hai,lekin sirf ummeedvaar ban chalna, pratyaksha saphalta ka anubhav na karna, ismen kabhi shaktishaali,kabhi dilshikasta…yeh neeche-oopar hone ka jyaada anubhav karte hain। jaise koi bhi baat mein agar jyaada neeche-oopar hota rahe to thakaavat ho jaati hai na। to ismen bhi chalte-chalte thakaavat ka anubhav dilshikasta bana deta hai। to naaummeedvaar se ummeedvaar achha hai, lekin saphalta swaroop ka anubhav karne vaala sada shreshtha hai। achha। suna taaraamandal ki kahaani? sirf madhuban ka haal taaraamandal nahin hai, behad brahman sansaar taaraamandal hai। achha।

sabhi aane vaale naye bachche, naye bhi hain aur puraane bhi bahut hain। kyonki anek kalpa ke ho, to ati puraane bhi ho। to naye bachchon ka naya umang-utsaah milan manaane ka drama ki noondh pramaan poora hua। bahut umang raha na। jaayen-jaayen…itna umang raha jo direction bhi nahin suna। milan ki masti mein masta the na! kitna kaha - kam aao, kam aao, to koi ne suna? baapdaada drama ke har drishya ko dekh harshit hote hain ki itne sab bachchon ko aana hi tha, isliye aa gaye hain। sab sahaj mil raha hai na? mushkil to nahin hai na?yeh bhi drama anusaar, samay pramaan rehearsal ho rahi hai। sabhi khush ho na? mushkil ko sahaj banaane vaale ho na? har kaarya mein sahayog dena,jo direction milte hain usmein sahayogi banna arthaat sahaj banaana। agar sahayogi bante hain to 5000 bhi sama jaate hain aur sahayogi nahin bante arthaat vidhipoorvak nahin chalte to 500 bhi samaana mushkil hai। isliye, daadiyon ko aisa apna record dikhaakar jaana jo sabke dil se yahi nikle ki 5000, paanch sau ke baraabar samaae hue the। isko kehte hain‘mushkil ko sahaj karna'। to sabne apna record badhiya bhara hai na? saartiphket (pramaan-patra) achha mil raha hai। aise hi sada khush rehna aur khush karna,to sada hi taaliyaan bajaate rahenge। achha record hai, isliye dekho, drama anusaar do baar milna hua hai! yeh nayon ki khaatiri drama anusaar ho gai hai। achha।

sada roohaani saphalta ke shreshtha sitaaron ko, sada ekras sthiti dvaara vishwa ko roshan karne vaale, gyaan-soorya,gyaan-chandrama ke sada saath rahne vaale, sada adhikaar ke nishchay se nashe aur namrachit sthiti mein rahne vaale, aise parmaatma-taaraamandal ke sarva chamakte hue sitaaron ko gyaan-soorya,gyaan-chandrama baapdaada ki roohaani sneh sampanna yaadapyaar aur namaste।

party se mulaakaal

(1) apne ko sada nirvighna,vijayi ratna samajhte ho? vighna aana, yeh to achhi baat hai lekin vighna haar na khilaayen। vighnon ka aana arthaat sada ke liye majboot banaana। vighna ko bhi ek manoranjan ka khel samajh paar karna -isko kehte hain ‘nirvighna vijayi'। to vighnon se ghabraate to nahin? jab baap ka saath hai to ghabraane ki koi baat hi nahin। akela koi hota hai to ghabraata hai। lekin agar koi saath hota hai to ghabraate nahin,bahaadur ban jaate hain। to jahaan baap ka saath hai, vahaan vighna ghabraayega ya aap ghabraayenge?sarvashaktivaan ke aage vighna kya hai? kuchh bhi nahin। isliye vighna khel lagta, mushkil nahin lagta। vighna anubhvi aur shaktishaali bana deta hai। jo sada baap ki yaad aur seva mein lage hue hain, busy hain, woh nirvighna rehte hain। agar buddhi busy nahin rehti to vighna va maaya aati hai। agar busy rahi to maaya bhi kinaara kar legi। aayegi nahin,chali jaayegi। maaya bhi jaanti hai ki yeh mera saathi nahin hai,abhi paramatma ka saathi hai। to kinaara kar legi। anginat baar vijayi bane ho, isliye vijay praapta karna badi baat nahin hai। jo kaam anek baar kiya hua hota hai,woh sahaj lagta hai। to anek baar ke vijayi। sada raaji rahne vaale ho na?maataayen sada khush rehti ho?kabhi roti to nahin? kabhi koi paristhiti aisi aa jaaye to royengi? bahaadur ho। paandav man mein to nahin rote? yeh ‘kyon hua', ‘kya hua' -aisa rona to nahin rote? baap ka bankar bhi agar sada khush nahin rahenge to kab rahenge?baap ka banna maana sada khushi mein rehna। na duhkh hai, na duhkh mein royenge। sab duhkh door ho gaye। to apne is vardaan ko sada yaad rakhna। achha।

(2) apne ko is roohaani bageeche ke roohaani roohe gulaab samajhte ho? jaise sabhi phoolon mein gulaab ka pushpa khushbu ke kaaran pyaara lagta hai। to woh hai gulaab aur aap sabhi hain roohe gulaab। roohe gulaab arthaat jismen sada roohaani khushbu ho। roohaani khushbu vaale jahaan bhi dekhenge, jisko bhi dekhenge to rooh ko dekhenge, shareer ko nahin dekhenge। svayan bhi sada roohaani sthiti mein rahenge aur doosron ki bhi rooh ko dekhenge। isko kehte hain - ‘roohaani gulaab'। yeh baap ka bageecha hai। jaise baap unche-te-ooncha hai, aise bageecha bhi oonche-te-ooncha hai jis bageeche ka vishesh shringaar roohe gulaab aap sabhi ho। aur yeh roohaani khushbu anek aatmaon ka kalyaan karne vaali hai।

aaj vishwa mein jo bhi mushkilaaten hain, uska kaaran hi hai ki ek-do ko rooh nahin dekhte। deh-abhimaan ke kaaran sab samasyaayen hain। dehi-abhimaani ban jaayen to sab samasyaayen samaapta ho jaayen। to aap roohaani gulaab vishwa par roohaani khushbu phailaane ke nimitta ho,aise sada nasha rehta hai? kabhi ek, kabhi doosra nahin। sada ekras sthiti mein shakti hoti hai। sthiti badalne se shakti kam ho jaati hai। sada baap ki yaad mein rah jahaan bhi seva ka saadhan hai,chaans lekar aage badhte jaao। parmaatma-bageeche ke roohaani gulaab samajh roohaani khushbu phailaate raho। kitni meethi roohaani khushbu hai jis khushbu ko sab chaahte hain! yeh roohaani khushbu anek aatmaon ke saath-saath apna bhi kalyaan kar leti hai। baapdaada dekhte hain ki kitni roohaani khushbu kahaan-kahaan tak phailaate rehte hain? jara bhi kahaan deh-abhimaan mix hua to roohaani khushbu original nahin hogi। sada is roohaani khushbu se auron ko bhi khushboodaar banaate chalo। sada achal ho?koi bhi halchal hilaati to nahin? kuchh bhi hota hai,sunte, dekhte thoda bhi halchal mein to nahin aa jaate? jab ‘nothing new'hai to halchal mein kyon aayen? koi nai baat ho to halchal ho। yeh ‘kya', ‘kyon'anek kalpa hui hai - isko kehte hain ‘drama ke oopar nishchaybuddhi'। sarvashaktivaan ke saathi hain,isliye beparvaah baadshaah hain। sab phikar baap ko de diye to svayan sada bephikar baadshaah। sada roohaani khushbu phailaate raho to sab vighna khatma ho jaayenge।

(3) har karma karte ‘karmayogi aatma' anubhav karte ho? karma aur yog sada saath-saath rehta hai? karmayogi har karma mein svatah hi saphalta ko praapta karta hai। karmayogi aatma karma ka pratyakshaphal usi samay bhi anubhav karta aur bhavishya bhi jama karta, to double phaayda ho gaya na। aise double phal lene vaali aatmaayen ho। karmayogi aatma kabhi karma ke bandhan mein nahin phansengi। sada nyaare aur sada baap ke pyaare। karma ke bandhan se mukta - isko hi ‘karmaateet'kehte hain। karmaateet ka arth yeh nahin hai ki karma se ateet ho jaao। karma se nyaare nahin, karma ke bandhan mein phansane se nyaare, isko kehte hain - karmaateet। karmayogi sthiti karmaateet sthiti ka anubhav karaati hai। to kisi bandhan mein bandhane vaale to nahin ho na? auron ko bhi bandhan se chhudaane vaale। jaise baap ne chhudaaya,aise bachchon ka bhi kaam hai chhudaana, svayan kaise bandhan mein bandhenge? karmayogi sthiti ati pyaari aur nyaari hai। isse koi kitna bhi bada kaarya ho lekin aise lagega jaise kaam nahin kar rahe hain lekin khel kar rahe hain। chaahe kitna bhi mehnat ka, sakhta khel ho, phir bhi khel mein maja aayega na। jab mallayuddha karte hain to kitni mehnat karte hain। lekin jab khel samajhkar karte hain to hansate-hansate karte hain। mehnat nahin lagti, manoranjan lagta hai। to karmayogi ke liye kaisa bhi kaarya ho lekin manoranjan hai, sankalp mein bhi mushkil ka anubhav nahin hoga। to karmayogi group apne karma se anekon ka karma shreshtha banaane vaale,isi mein busy raho। karma aur yaad combined,alag ho nahin sakte।

(4) sada baap ki ati snehi, sahayogi aatmaayen anubhav karte ho?snehi ki nishaani kya hoti hai? jisse sneh hota hai uske har kaarya mein sahayogi zaroor honge। ati snehi aatma ki nishaani sada baap ke shreshtha kaarya mein sahayogi hogi। jitna-jitna sahayogi, utna sahaj yogi kyonki baap ke sahayogi hain na। din-raat yahi lagna rahe - baba aur seva,iske sivaae kuchh hai hi nahin। agar laukik kaarya bhi karte ho to baap ki shreemat pramaan karte ho, isliye woh bhi baap ka kaarya hai। laukik mein bhi alaukikta hi anubhav karenge,kabhi laukik kaarya samajh na thakenge, na phansenge, nyaare rahenge। to aise snehi aur sahayogi aatmaayen ho। nyaare hokar karma karenge to bahut achha karma hoga। karma mein phansakar karne se achha nahin hota, saphalta bhi nahin hoti,mehnat bhi bahut aur praapti bhi nahin। isliye sada baap ke sneh mein samaai hui sahayogi aatmaayen hain। sahayogi aatma kabhi bhi maaya ki yogi ho nahin sakti, uska maaya se kinaara ho jaayega। har sankalp mein‘baba'aur‘seva', to jo neend bhi karenge, usmein bhi bada aaraam milega, shanti milegi, shakti milegi। neend,neend nahin hogi, jaise kamaai karke khushi mein lete hain। itna parivartan ho jaata hai! ‘baba-baba'karte raho। baba kaha aur kaarya saphal hua pada hai। kyonki baap sarvashaktivaan hai। sarvashaktivaan baap ki yaad svatah hi har kaarya ko shaktishaali bana deti hai।

(5) apne ko raajarishi, shreshtha aatmaayen anubhav karte ho?raajarishi arthaat raajya hote hue bhi rishi arthaat sada behad ke vairaagi। sthool desh ka raajya nahin hai lekin sva ka raajya hai। sva-raajya karte hue behad ke vairaagi bhi ho, tapasvi bhi ho kyonki jaante ho puraani duniya mein hai hi kya। is duniya ko kehte hi ho asaar sansaar,koi saar nahin। jitna hi banaane ki koshish karte hain,utna hi bigadta hai। to asaar hua na। to asaar sansaar se svatah hi vairaag aa jaata hai kyonki asaar sansaar se braahmanon ka shreshtha sansaar mil gaya। shreshtha sansaar mil gaya to asaar se vairaag svatah ho jaayega। vairaag arthaat lagaav na ho। agar lagaav hota hai to buddhi ka jhukaav hota hai। jis taraph lagaav hoga, buddhi usi taraph jaayegi। isliye raajarishi ho, raaje bhi ho aur saath-saath behad ke vairaagi bhi ho। rishi tapasvi hote hain। kisi bhi aakarshan mein aakarshit nahin hone vaale। sva-raajya ke aage yeh had ki aakarshan kya hai? kuchh bhi nahin। to apne ko kya samajhte ho? raajarishi। kisi bhi prakaar ka lagaav rishi banne nahin dega, tapasvi ban nahin sakenge। tapasya mein ‘lagaav' hi vighna-roop ban kar aata hai। tapasya bhang ho jaati hai। isliye, maaya ki aakarshan se sada pare raho। koi bhi sambandh mein lagaav na ho। maataaon ko potre-dhotre achhe lagte hain, isliye thoda lagaav ho jaata hai। paandavon ka phir kisse lagaav hota hai?kamaane mein,paisa ikattha karne mein। jeb mein paisa to hona chaahiye na! lekin jo baap ki lagna mein rehte hain, woh lagaav mein nahin rehte, usko sab sahaj praapta hota hai। brahman jeevan mein 10roopaya bhi 100ban jaata hai। itna dhan mein vriddhi ho jaati hai! pragti padne se 10, 100ka kaam karta hai, vahaan 100, 10 ka kaam karega। kyonki abhi economy ke avtaar ho gaye na। vyartha bach gaya aur samartha paisa, taakat vaala paisa hai। kaala paisa nahin hai, saphed hai, isliye shakti hai। to raajarishi aatmaayen hain - is vardaan ko sada yaad rakhna। kahaan lagaav mein nahin phans jaana। na phanso, na nikalne ki mehnat karo।

(6) apne ko sada harshit rahne vaali shreshtha aatma anubhav karte ho? harshitmukh,harshitchitta। iski yaadgaar aapke yaadgaar chitron mein bhi dikhaate hain। koi bhi devi ya devta ki moorti banaayenge to usmein chehra jo dikhaate hain,woh sada harshit dikhaate hain। agar koi serious (gambheer) chehra hoga to devta ka chitra nahin maanenge। to harshitmukh rahne ka is samay ka gun aapke yaadgaar chitron mein bhi hai। harshitmukh arthaat sada sarva praaptiyon se bharpoor। jo bharpoor hota hai vahi harshit rah sakta hai। agar koi bhi apraapti hogi to harshit nahin rahenge। kitni bhi harshit rahne ki koshish karen,baahar se hansenge lekin dil se nahin। koi baahar se hansate hain to maaloom pad jaata hai - yeh dikhaave ka hansana hai, sachcha nahin। to aap sab dil se sada muskaaraate raho। kabhi chehre par duhkh ki lahar na aaye। kisi bhi paristhiti mein duhkh ki lahar nahin aani chaahiye kyonki duhkh ki duniya chhod di, sangam ki duniya mein aa gaye। achha।