Avyakt murli du lundi 2 novembre 1987

>

02-11-87om shanti avyakt baapdaadaamdhuban

sva-parivartan ka aadhaar - ‘sachche dil ki mahsoosta'

kalpavriksha ke har chaitanya patte ka pata rakhne vaale, merciful baapdaada apne bachchon prati bole

aaj vishwa-parivartak, vishwa-kalyaankaari baapdaada apne snehi, sahayogi,vishwa-parivartak bachchon ko dekh rahe hain। har sva ek parivartan dvaara vishwa-parivartan karne ki seva mein lage hue hain। sabhi ke man mein ek hi umang-utsaah hai ki is vishwa ko parivartan karna hi hai aur nishchay bhi hai ki parivartan hona hi hai athva yeh kahen ki parivartan hua hi pada hai। sirf nimitta baapdaada ke sahayogi,sahajyogi ban vartamaan aur bhavishya shreshtha bana rahe hain।

aaj baapdaada chaaron or ke nimitta vishwa-parivartak bachchon ko dekhte hue ek vishesh baat dekh rahe the - hain sabhi ek hi kaarya ke nimitta, lakshya bhi sabhi ka sva-parivartan aur vishwa-parivartan hi hai lekin sva-parivartan va vishwa-parivartan mein nimitta hote hue bhi nambarvaar kyon? koi bachche sva-parivartan bahut sahaj aur sheeghra kar lete aur koi abhi-abhi parivartan ka sankalp karenge lekin svayan ke sanskaar va maaya aur prakriti dvaara aane vaali paristhitiyaan va brahman parivaar dvaara chuktu hone vaale hisaab-kitaab shreshtha parivartan ke umang ko kamzor kar dete hain aur kai bachche parivartan karne ki himmat mein kamzor hain। jahaan himmat nahin,vahaan umang-utsaah nahin। aur sva-parivartan ke bina vishwa-parivartan ke kaarya mein dil-pasanda saphalta nahin hoti। kyonki yeh alaukik eeshvareey seva ek hi samay par teen prakaar ke seva ki siddhi hai, woh teen prakaar ki seva saath-saath kaunsi hai? ek - vritti, doosra - vibration,teesra - vaani। teenon hi shaktishaali nimitta, nirmaan aur nihsvaartha is aadhaar se hain, tab dil-pasanda saphalta hoti hai। nahin to, seva hoti hai, apne ko va doosron ko thode samay ke liye seva ki saphalta se khush to kar lete hain lekin dil-pasanda saphalta jo baapdaada kehte hain, woh nahin hoti hai। baapdaada bhi bachchon ki khushi mein khush ho jaate hain lekin dilaaraam ki dil par yatha-shakti result note zaroor hoti rehti। ‘shaabaas,shaabaash!'zaroor kahenge kyonki baap ki har bachche ke oopar sada vardaan ki drishti aur vritti rehti hai ki yeh bachche aaj nahin to kal siddhisva roop banne hi hain। lekin vardaata ke saath-saath shikshak bhi hai,isliye aage ke liye attention bhi dilaate hain।

to aaj baapdaada vishwa-parivartan ke kaarya ki aur vishwa-parivartak bachchon ki result ko dekh rahe the। vriddhi ho rahi hai, aavaaj chaaron or phail raha hai, pratyakshata ka parda khulne ka bhi aarambha ho gaya hai। chaaron or ki aatmaon mein abhi ichchha utpanna ho rahi hai ki najdeek jaakar dekhen। suni-sunaai baaten abhi dekhne ke parivartan mein badal rahi hain। yeh sab parivartan ho raha hai। phir bhi drama anusaar abhi tak baap aur kuchh nimitta bani hui shreshtha aatmaon ke shaktishaali prabhaav ka parinaam yeh dikhaai de raha hai। agar majority is vidhi se siddhi ko praapta karen to bahut jaldi sarva brahman siddhi-swaroop mein pratyaksha ho jaayenge। baapdaada dekh rahe the - dilapsanda, lokapsanda,baap-pasanda saphalta ka aadhaar‘sva parivartan' ki abhi kami hai aur ‘sva-parivartan'ki kami kyon hai? uska mool aadhaar ek vishesh shakti ki kami hai। woh vishesh shakti hai - mahsoosta ki shakti।

koi bhi parivartan ka sahaj aadhaar mahsoosta-shakti hai। jab tak mahsoosta-shakti nahin aati, tab tak anubhooti nahin hoti aur jab tak anubhooti nahin tab tak brahman jeevan ki visheshta ka foundation majboot nahin। aadi se apne brahman jeevan ko saamne laao।

pahla parivartan - main aatma hoon, baap mera hai - yeh parivartan kis aadhaar se hua?jab mahsoos karte ho ki ‘haan, main aatma hoon, yahi mera baap hai।' to mahsoosta anubhav karaati hai, tab hi parivartan hota hai। jab tak mahsoos nahin karte, tab tak saadhaaran gati se chalte hain aur jis ghadi mahsoosta ki shakti anubhvi banaati hai to teevra purooshaarthi ban jaate hain। aise jo bhi parivartan ki vishesh baaten hain - chaahe rachayita ke baare mein, chaahe rachna ke baare mein, jab tak har baat ko mahsoos nahin karte ki haan, yeh vahi samay hai,vahi yog hai,main bhi vahi shreshtha aatma hoon - tab tak umang-utsaah ki chaal nahin rehti। koi ke vaayumandal ke prabhaav se thode samay ke liye parivartan hoga lekin sadaakaal ka nahi hoga। mahsoosta ki shakti sadaakaal ka sahaj parivartan kar legi।

isi prakaar sva-parivartan mein bhi jab tak mahsoosta ki shakti nahin, tab tak sadaakaal ka shreshtha parivartan nahin ho sakta hai। ismen vishesh do baaton ki mahsoosta chaahiye। ek - apni kamzori ki mahsoosta। doosri - jo paristhiti va vyakti nimitta bante hain, unki ichchha aur unke man ki bhaavna va vyakti ki kamzori ya parvash ke sthiti ki mahsoosta। paristhiti ke paper ke kaaran ko jaan svayan ko paas hone ke shreshtha swaroop ki mahsoosta mein ho vi - main shreshtha hoon,svasthiti shreshtha hai,paristhiti paper hai। yeh mahsoosta sahaj parivartan kara legi aur paas kar lenge। doosre ki ichchha va doosre ke sva-unnati ki bhi mahsoosta apne sva-unnati ka aadhaar hai। to sva-parivartan - mahsoosta ki shakti bina nahin ho sakta। ismen bhi ek hai - sachche dil ki mahsoosta, doosri - chaturaai ki mahsoosta bhi hai। kyonki knowledgeful bahut ban gaye hain। to samay dekh apne ko siddha karne ke liye, apna naam achha karne ke liye us samay mahsoos bhi kar lenge lekin us mahsoosta mein shakti nahin hoti jo parivartan kar lenve। to dil ki mahsoosta dilaaraam ki aasheervaad praapta karaati hai aur chaturaai vaali mahsoosta thode samay ke liye doosre ko bhi khush kar lete, apne ko bhi khush kar dete।

teesre prakaar ki mahsoosta - man maanta hai ki yeh theek nahin hai, vivek aavaaj deta hai ki yeh yathaartha nahin hai lekin baahar ke roop se apne ko mahaarthi siddha karne ke liye,apne naam ko kisi bhi prakaar se parivaar ke beech kamzor ya kam na karne ke kaaran vivek ka khoon karte rehte hain। yeh vivek ka khoon karna bhi paap hai। jaise aapghaat mahaapaap hai, vaise yeh bhi paap ke khaate mein jama hota hai। isliye baapdaada muskaraate rehte hain aur unmein man ke doylaag bhi sunte rehte hain। bahut sundar doylaag hote hain। mool baat - aisi mahsoosta vaale yeh samajhte hain ki kisko kya pata padta hai, aise hi chalta hai… lekin baap ko pata har patte ka hai। sirf mukh se sunne se pata nahin padta, lekin pata hote bhi baap anjaan ban bholepan mein bholaanaath ke roop se bachchon ko chalaate hain। jabki jaante hain, phir bhola kyon bante? kyonki merciful baap hai,samjha? aise bachche chatursujaan baap se bhi athva nimitta aatmaon se bhi bahut chatur ban saamne aate hain। isliye baap merciful,bholaanaath ban jaate hain।

baapdaada ke paas har bachche ke karma ka, man ke sankalpon ka khaata har samay ka spashta rehta hai। dilon ko jaanne ki aavashyakta nahin hai lekin har bachche ke dil ki har dhadkan ka chitra spashta hi hai। isliye kehte hain ki main har ek ke dil ko nahin jaanta kyonki jaanne ki aavashyakta hi nahin, spashta hai hi। har ghadi ke dil ki dhadkan va man ke sankalp ka chart baapdaada ke saamne hai। bata bhi sakte hain, aise nahin ki nahin bata sakte hain। tithi, sthaan,samay aur kyaak ya kiya - sab bata sakte hain। lekin jaante hue bhi anjaan rehte hain। to aaj saara chart dekha।

sva-parivartan teevragti se na hone ke kaaran -‘sachchi dil ke mahsoosta' ki kami hai। mahsoosta ki shakti bahut meethe anubhav kara sakti hai। yeh to samajhte ho na। kabhi apne ko baap ke noore ratan aatma arthaat naynon mein samaai hui shreshtha bindu mahsoos karo। naynon mein to bindu hi sama sakta hai, shareer to nahin sama sakega। kabhi apne ko mastak par chamakne vaali mastak-mani,chamakta hua sitaara mahsoos karo, kabhi apne ko brahma baap ke sahayogi, right hand saakaar brahman roop mein brahma ki bhujaayen anubhav karo, mahsoos karo। kabhi avyakt pharishta swaroop mahsoos karo। aise mahsoosta shakti se bahut anokhe,alaukik anubhav karo। sirf knowledge ki reeti varnan nahi karo,mahsoos karo। is mahsoosta-shakti ko badhaao to doosre taraph ki kamzori ki mahsoosta svatah hi spashta hogi। shaktishaali darpan ke beech chhota-sa daag bhi spashta dikhaai dega aur parivartan kar lenge। to samjha, sva parivartan ka aadhaar mahsoosta shakti hai। shakti ko kaarya mein lagaao, sirf ginti karke khush na ho - haan,yeh bhi shakti hai,yeh bhi shakti hai। lekin sva prati, sarva prati, seva prati sada har kaarya mein lagaao। samjha? kai bachche kehte ki baap yahi kaam karte rehte hain kya? lekin baap kya kare,saath to le hi jaana hai। jab saath le jaana hai to saathi bhi aise hi chaahiye na। isliye dekhte rehte hain aur samaachaar sunaate rehte ki saathi samaan ban jaaen। peechhe-peechhe aane vaalon ki to baat hi nahin hai, woh to dher honge। lekin saathi to samaan chaahiye na। aap saathi ho ya baaraati ho?baaraat to bahut badi hogi,isliye shiv ki baaraat mashhoor hai। baaraat to variety hogi lekin saathi to aise chaahiye na। achha।

yeh eastern zone hai। eastern zone kya kar raha hai? pratyakshata ka soorya kahaan se uday karenge?baap mein pratyakshata hui, woh baat to ab puraani ho gai। lekin ab kya karenge? puraani gaddi hai - yeh to nasha achha hai lekin ab kya karenge? abhi koi naveenta ka soorya uday karo jo sab ke mukh se nikle ki yeh eastern zone se naveenta ka soorya prakat hua! jo kaarya abhi tak kisi ne na kiya ho,woh ab karke dikhaao। function, seminar kiye, aai.pi. (vishishta vyakti) ki seva ki, akhbaaron mein daala - yeh to sabhi karte lekin naveenta ki kuchh jhalak dikhaao। samjha?

baap ka ghar so apna ghar hai। aaraam se sab pahunch gaye hain। dil ka aaraam sthool aaraam bhi dila deta hai। dil ka aaraam nahin to aaraam ke saadhan hote bhi beaaraam hote। dil ka aaraam hai arthaat dil mein sada raam saath mein hai, isliye koi bhi paristhiti mein aaraam anubhav karte ho। aaraam hai na,ki aanaajaana beaaraam lagta hai? phir bhi meethe drama ki bhaavi samjho। mela to mana rahe ho na। baap se milna, parivaar se milna - yeh mela manaane ki bhi meethi bhaavi hai। achha।

sarvashaktishaali shreshtha aatmaon ko, har shakti ko samay par kaarya mein laane vaale sarva teevra purooshaarthi bachchon ko, sada sva-parivartan dvaara seva mein dilapsanda saphalta paane vaale dilkhush bachchon ko, sada dilaaraam baap ke aage sachchi dil se spashta rahne vaale saphalta-swaroop shreshtha aatmaon ko dilaaraam baapdaada ka dil se yaadapyaar aur namaste।

vidaai ke samay

mukhya bhaai-bahinon ke saath - baapdaada sabhi bachchon ko samaan banaane ki shubh bhaavna se udaane chaahte hain। nimitta bane hue sevaadhaari baap-samaan banne hi hain, kaise bhi baap ko banaana hi hai kyonki aise-vaise ko to saath le hi nahin jaayenge। baap ki bhi to shaan hai na। baap sampanna ho aur saathi langada ya loola ho to sajega nahin। loole-langade baaraati honge,saathi nahin। isliye shiv ki baaraat sada looli-langadi dikhaai gai hai kyonki kuchh kamzor aatmaayen dharmaraajpuri mein paas hone laayak banengi।

sarva ke sahayog se sukhmay sansaar kaaryakram ke baare mein - yeh to vishay aisi hai jo svayan sabhi sahayog dene ki offer karenge। sahayog se phir sambandh mein bhi aayenge। isliye aape hi offer hogi। sirf shubh-bhaavna, shubh-kaamna-sampanna seva mein sevaadhaari aage badhen। shubh bhaavna ka phal praapta nahin ho - yeh ho hi nahin sakta। sevaadhaariyon ke shubh bhaavna,shubh kaamna ki dharni sahaj phal dene ke nimitta banegi। phal taiyaar hai, sirf dharni taiyaar hone ki thodi-si deri hai। phal to phataaphat niklenge lekin uske liye yogya dharni chaahiye। abhi woh dharni taiyaar ho rahi hai।

vaise seva to sabhi ki karni aavashyak hai lekin phir bhi jo vishesh sattaayen hain, unmein se sameep nahin aaye hain। chaahe raajya satta vaalon ki seva hui hai ya dharma satta vaalon ki hui hai, lekin sahayogi bankar ke saamne aayen,samay par sahayogi banen - uski aavashyakta hai। uske liye to shaktishaali baan lagaana padega। dekha jaata hai ki shaktishaali baan vahi hota hai jismen sarva aatmaon ke sahayog ki bhaavna ho, khushi ki bhaavna ho,sadbhaavna ho। isse har kaarya sahaj saphal hota hai। abhi jo seva karte ho, woh alag-alag karte ho। lekin jaise pahle jamaane mein koi kaarya karne ke liye jaate the to saare parivaar ki aasheervaad lekar ke jaate the। woh aasheervaad hi sahaj bana deti hai। to vartamaan seva mein yeh addition (abhivriddhi) chaahiye। to koi bhi kaarya shuru karne ke pahle sabhi ki shubh bhaavnaayen, shubh kaamnaayen lo,sarva ke santushtata ka bal bharo, tab shaktishaali phal niklega।

abhi itni mehnat karne ki aavashyakta nahin hai। sab khokhle hue pade hain। mehnat karne ki jaroorat nahin। phoonk do aur udkar yahaan aa jaaen - aise khokhle hain। aur aajkal to sab samajh rahe hain ki aur koi power chaahiye jo control kar sake - chaahe raajya ko, chaahe dharma ko। andar se dhoondh rahe hain। sirf brahman aatmaon ki seva ki vidhi mein antar chaahiye,vahi mantra ban jaayega। abhi to mantra chalaao aur siddhi ho। 50 varsha mehnat ki। yeh sab bhi hona hi tha,anubhvi ban gaye। abhi har kaarya mein yahi lakshya rakho ki‘sarva ke sahayog se saphalta' - braahmanon ke liye yeh topic hai। baaki duniya vaalon ke liye topic hai - ‘sarva ke sahayog se sukhmay sansaar'। achha।

ab to aap sabke siddhi ka pratyaksha roop dikhaai dega। koi bigda hua kaarya bhi aapki drishti se, aapke sahayog se sahaj hal hoga jiske kaaran bhakti mein dhanya-dhanya karke pukaarenge। yeh sab siddhiyaan bhi aapke saamne pratyaksha roop mein aayengi। koi siddhi ke reeti se aap log nahin kahenge ki ‘haan, yeh ho jaayega',lekin aapka direction svatah siddhi praapta karaata rahega। tab to praja jaldi-jaldi banegi, sab taraph se nikal kar aapki taraph aayenge। yeh siddhi ka part abhi chalega। lekin pahle itne shaktishaali bano jo siddhi ko sveekaar na karo, tab yeh pratyakshata hogi। nahin to,siddhi dene vaale hi siddhi mein phans jaaen to phir kya karenge?to yeh sab baaten yahaan se hi shuru honi hain। baap ka jo gaayan hai ki woh surgeon bhi hai, engineer bhi hai, vakeel bhi hai, judge bhi hai - iska practical sab anubhav karenge, tab sab taraph se buddhi hatkar ek taraph jaayegi। abhi to aapke peechhe bheed lagne vaali hai। baapdaada to yeh drishya dekhte hain aur kabhi-kabhi ab ke drishya dekhte hain - bahut pharka lagta hai। aap ho kaun, woh baap jaanta hai! bahut-bahut wonderful part hone hain, jo khyaal- khvaab mein bhi nahin hain। sirf thoda rooka hua hai, bas। jaise parda kabhi-kabhi thoda atak jaata hai na। jhanda bhi lahraate ho to kabhi atak jaata hai। aise abhi thoda-thoda atak raha hai। aap jo hai, jaise ho - bahut mahaan ho। jab aapki visheshta pratyaksha hogi tab to ishta banenge। aakhir to bhakta maala bhi pratyaksha hogi na। lekin pahle thaakur sajkar taiyaar hon tab to bhakta aayen na। achha।

party se mulaakaat

aap sabhi shreshtha aatmaayen sabki pyaas bujhaane vaale ho na? woh hai sthool jal aur aapke paas hai - ‘gyaan amrit'। jal alpakaal ki pyaas bujhaae tripta aatma bana deta hai। to sarva aatmaon ko amrit dvaara tripta karne ke nimitta bane hue ho na। yeh umang sada rehta hai? kyonki,pyaas bujhaana - yeh mahaan punya hai। pyaase ki pyaas bujhaane vaale ko punya aatma kehte hain। aap bhi mahaan punya aatma ban sabhi ki pyaas bujhaane vaale ho। jaise pyaas se manushya tadaphte hain, agar paani na mile to pyaas se tadphenge na। aise, gyaan-amrit na milne se aatmaayen duhkh-ashaanti mein tadaph rahi hain। to unko gyaan amrit dekar pyaas bujhaane vaali punya aatmaayen ho। to punya ka khaata anek janmon ke liye jama kar rahe ho na? ek janma mein hi anek janmon ka khaata, anek janmon ke liye jama kar rahe ho na? ek janma mein hi anek janmon ka khaata jama hota hai। to aapne itna jama kar liya hai na?itne maalaamaal ban gaye jo auron ko bhi baant sakte ho! apne liye bhi jama kiya aur doosron ko bhi dene vaale daata bane। to sada yeh check karo ki saare din mein punyaatma bane, punya ka kaarya kiya ya sirf apne liye hi khaaya-piya mauj kiya? jama karne vaale ko samajhdaar kaha jaata hai, jo kamaaye aur khaaye usko samajhdaar nahin kahenge। jaise bhojan khaane ke liye phursat nikaalte ho kyonki aavashyak hai, aise yeh punya ka kaarya karna bhi aavashyak hai। to sada ki punya aatma ho, kabhi-kabhi ki nahin। chance mile to karen,nahin। chance lena hai। samay milega nahin,samay nikaalna hai। tab jama kar sakenge। is samay jitna bhi bhaagya ki lakeer kheenchane chaaho,utna kheench sakte ho kyonki baap bhaagya-vidhaata aur vardaata hai। shreshtha knowledge ki kalam baap ne apne bachchon ko de di hai। is kalam se jitni lambi lakeer kheenchani chaaho, kheench sakte ho। achha।