Avyakt murli du samedi 11 novembre 1989

>

11-11-89 om shanti avyakt baapdaadaamdhuban

divyata - sangamayugi braahmanon ka shringaar hai

aaj divya buddhi vidhaata, divya drishti daata apne divya janmadhaari, divya aatmaon ko dekh rahe hain। baapdaada ne har ek bachche ko divya jeevan arthaat divya sankalp,divya bol,divya karma karne vaali divya moortiyaan banaaya hai। divyata aap sangamayugi bachchon ka shreshtha shringaar hai। ek hai saadhaaranta, doosra hai divyata। divyata ki nishaani aap sabhi jaante ho। divya-jeevandhaari aatma kisi bhi aatma ko apne divya naynon dvaara arthaat drishti dvaara saadhaaranta se pare divya anubhootiyaan karaayegi। saamne aane se hi saadhaaran aatma apni saadhaaranta ko bhool jaayegi। kyonki aajkal ke samay anusaar vartamaan ke saadhaaran jeevan se majority aatmaayen santushta nahin hain। aage chalkar yeh aavaaj sunenge ki yeh jeevan koi jeevan nahin hai, jeevan mein kuchh naveenta chaahiye।

‘‘alaukikta'', ‘‘divyata''jeevan ka vishesh aadhaar hai - yeh anubhav karenge। kuchh chaahiye, kuchh chaahiye - is ‘chaahiye'ki pyaas se chaaron or dhoondhenge। jaise sthool paani ki pyaas mein tadapta hua maanav chaaron or paani ki boond ke liye tadaphta hai, aise divyata ki pyaasi aatmaaen chaaron or anchali lene ke liye tadaphti hui dikhaai dengi। tadaphti hui kahaan pahunchengi?aap sabke paas। aise divyata ke khazaane se bharpoor bane ho? har samay divyata anubhav hoti hai va kabhi saadhaaran,kabhi divya?jab baap ne divya drishti,divya buddhi ka vardaan de diya to divya buddhi mein saadhaaran baaten aa nahin sakti। divya janmadhaari brahman tan se saadhaaran karma kar nahin sakta। chaahe dekhne mein logon ke liye saadhaaran karma ho। doosron ke samaan aap sab bhi vyavhaar karte hain, vyaapaar karte hain va government ki naukri karte hain, maataayen khaana banaati hain। dekhne mein saadhaaran karma hai lekin is saadhaaran karma mein bhi aapka aur logon se nyaara ‘‘alaukik'' divya karma ho। mahaan antar isliye sunaaya ki divya janmadhaari brahman tan se saadhaaran karma nahin karte, man se saadhaaran sankalp nahin kar sakte, dhan ko saadhaaran reeti se kaarya mein nahin laga sakte। kyonki tan,man aur dhan - teenon ke trustee ho,isliye maalik baap ki shreemat ke bina kaarya mein nahin laga sakte। har samay baap ki shreemat divya karma karne ki milti hai।

isliye check karo ki saare din mein saadhaaran bol aur karma kitna samay raha aur divya alaukik kitna samay raha? kai bachche kahaan-kahaan bahut bhole ban jaate hain। check karte hain lekin bholepan mein। samajhte hain - saare din mein koi vishesh galti to ki nahin, bura socha nahin, bura bola nahin। lekin yeh check kiya ki divya va alaukik karma kiya? kyonki saadhaaran bol va karma jama nahin hota, na mitta hai, na banta hai। vartamaan ka divya sankalp va divya bol aur karma bhavishya ka jama karta hai। jama ka khaata badhta nahin hai। to jama karne ke hisaab mein bhole ban jaate hain - khush rehte hain ki mainne vesta nahin kiya। lekin sirf ismen khush nahin rehna hai। vesta nahin kiya lekin best kitna banaaya?kai baar bachche kehte hain - mainne aaj kisko duhkh nahin diya। lekin sukh bhi diya?duhkh nahin diya-isse vartamaan achha banaaya। lekin sukh dene se jama hota hai। woh kiya va sirf vartamaan mein hi khush ho gaye?sukhdaata ke bachche sukh ka khaata jama karte। sirf yeh nahin check karo ki duhkh nahin diya lekin sukh kitna diya। jo bhi samparka mein aaye master sukhdaata dvaara har kadam mein sukh ki anubhooti kare। isko kaha jaata hai - ‘divyata va alaukikta'।

to checking bhi saadhaaran se guhya checking karo। har samay yeh smriti rakho ki ek janma mein 21 janmon ka khaata jama karna hai। to sab khaate check karo-tan se kitna jama kiya? man ke divya sankalp se kitna jama kiya? aur dhan ko shreemat pramaan shreshtha kaarya mein lagaakar kitna jama kiya? jama ke khaato taraph vishesh attention do। kyonki aap vishesh aatmaon ka jama karne ka samay is chhote se janma ke sivaae saare kalpa mein koi samay nahin hai। aur aatmaon ka hisaab alag hai। lekin aap shreshtha aatmaon ke liye -’’ab nahin to kab nahin''। to samjha kya karna hai?ismen bhole nahin bano। puraane sanskaaron mein bhole mat bano। baapdaada ne result dekhi। kitni baaton ki result mein jama ka khaata bahut kam hai, uska vistaar phir sunaayenge।

sabhi sneh mein sab kuchh bhulaakar ke pahunch gaye hain। baapdaada bhi bachchon ka sneh dekh ek ghadi ke sneh ka return anek ghadiyon ki praapti ka deta hi rehta hai। aap sabhi ko itne bade sangathan mein aane ke liye kya-kya pakka karaaya। pahle to patraani banna padega, 4din hi rehna padega। aana-jaana hi padega। to sab baaten sunte hue bhi sneh mein pahunch gaye। yeh bhi apna lakka samjho jo itna bhi mil raha hai phir bhi jad moortiyon ke darshan ke samaan khade-khade raat to nahin bitaate ho na। teen pair prithvi to sabko mili hai na। yahaan bhi aaraam se baithe ho। jab aage vriddhi hogi to svatah hi vidhi bhi parivartan hoti rahegi। lekin sadaiv yeh anubhav karo ki jo bhi mil raha hai,woh bahut achha hai। kyonki vriddhi to honi hi hai aur parivartan bhi hona hi hai। to sabhi ko aaraam se rehna-khaana mil raha hai na। khaana aur sona- do cheezen hi chaahiye। maataaon ko to bahut khushi hoti hai kyonki bana banaaya bhojan yahaan milta hai। vahaan to banaao, bhog lagaao - phir khaao। yahaan bana hua, bhog laga hua bhojan milta hai। isliye maataaon ko to achha aaraam hai। kumaaron ko bhi aaraam milta hai। kyonki unhon ke liye bhi badi problem khaana banaane ki hi hai। yahaan to aaraam se bana hua bhojan khaaya na। sadaiv aise easy raho। jiske sanskaar easy rahne ke hote hain, unko har kaarya sahaj anubhav hone ke kaaran easy rehte hain। sanskaar tight hain to circumstance bhi tight ho jaate hain, sambandh-samparka vaale bhi tight vyavhaar karte hain। tight arthaat kheenchaataan mein rahne vaale। to sabhi drama ke har drishya ko dekh-dekh harshit rahne vaale ho na। va kabhi achhe-bure ke aakarshan mein aa jaate ho? na achhe mein, na bure mein - kisi mein aakarshit nahin hona hai, sadaiv harshit rehna hai। achha।

sada har kadam mein divyata anubhav karne vaale aur karaane vaale divya moortiyon ko,sada apne jama ke khaate ho badhaane vaale knowledgeful aatmaon ko,sada har samasya ko easy sthiti dvaara easy paar karne vaale - aise samajhdaar bachchon ko, anek aatmaon ke jeevan ki pyaas ko bujhaane vaale master gyaan saagar shreshtha aatmaon ko, gyaan saagar baapdaada ka yaadapyaar aur namaste।

baambe (saantaakuraj-paarla) group:- baambe nivaasi bachche sarva khazaanon se sampanna ho na। sada apne ko sampanna aatma hoon - aise anubhav karte ho na? sampannata,sampoornata ki nishaani hai। sampoornata ki checking apni sampannata se kar sakte ho। kyonki sampoornata maana sarva khazaanon se full hona। jaise chandrama jab sampanna hota hai to sampannata uski sampoornata ki nishaani hoti hai। isse aur aage nahin badhega, bas itni hi sampoornata hai। jara bhi kinaari kam nahin hoti hai,sampanna hota hai। to aap sabhi gyaan,yog, dhaarna,seva-sabhi mein sampanna - isi ko hi sampoornata kaha jaata hai। isse jaan sakte ho ki sampoornata ke sameep hain ya door hain! sampanna ho arthaat sampoornata ke sameep ho। to sab sameep ho?kitne sameep ho? 8 tak, 100tak ya 16000 tak।8 ki sameepta,phir 100 ki sameepta aur phir16000 ki sameepta। kitne sameepta vaale hain - yahi check karna hai। achha hai। phir bhi duniya ke koton se aap bahut-bahut bhaagyavaan ho। woh tadaphne vaale hain aur aap sampanna aatmaayen ho। praapti swaroop aatmaayen ho। yeh khushi hai na। roj apne se baat karo ki hamaare sivaae aur kaun khush rah sakta hai? to yahi vardaan sada smriti mein rakhna ki sameep hain, sampanna hain। abhi to sameep milna bhi ho gaya। jaise sthool mein sameep achha lagta hai, vaise sthiti mein bhi sada sameep arthaat sada sampanna bano। achha।

gujraat-poona group:- sabhi drishti dvaara shaktiyon ke praapti ki anubhooti karne ke anubhvi ho na। jaise vaani dvaara shakti ki anubhooti karte ho। murli sunte ho to samajhte ho na - shakti mili। aise drishti dvaara shaktiyon ki praapti ke anubhooti ke abhyaasi bane ho ya vaani dvaara anubhav hota hai,drishti dvaara kam? drishti dvaara shakti catch kar sakte ho? kyonki catch karne ke abhyaasi honge to doosron ko bhi apne divya drishti dvaara anubhav kara sakte hain। aage chalkar vaani dvaara sabko parichay dene ka samay bhi nahin hoga aur circumstance bhi nahin honge to kya karenge?vardaani drishti dvaara, mahaadaani drishti dvaara mahaadaan, vardaan denge। drishti dvaara shanti ki shakti, prem ki shakti - sukh va aananda ki shakti sab praapta hoti hai। jad moortiyon ke aage jaate hain to jad moorti bolti to nahin hai na। phir bhi bhakta aatmaon ko kuchh-na-kuchh praapti hoti hai। tab to jaate hain na। kaise praapti hoti hai? unke divyata ke vibration se aur divya naynon ki drishti ko dekh vibration lete hain। koi bhi devta ya devi ki moorti mein vishesh attention naynon ke taraph dekhenge। face(face) ki taraph attention jaata hai kyonki mastak ke dvaara vibration milta hai, naynon dvaara divyata ki anubhooti hoti hai। woh to hain jad moortiyaan। lekin kiski hain? aap chaitanya moortiyon ki jad moortiyaan hain। yeh nasha hai ki hamaari moortiyaan hain? chaitanya mein yeh seva ki hai tab jad moortiyaan bani hain। to drishti dvaara shakti lena aur drishti dvaara shakti dena,yeh practice karo। shanti ke shakti ki anubhooti bahut shreshtha hai। jaise vartamaan samay science ki shakti ka kitna prabhaav hai, har ek anubhav karte hain lekin science ki shakti nikli kisse? silence ki shakti se na! jab science ki shakti alpakaal ke liye praapti kara rahi hai,to silence ki shakti kitni praapti karaayegi। to baap ke divya drishti dvaara svayan mein shakti jama karo। to phir jama kiya hua samay par de sakenge। apne liye hi jama kiya aur kaarya mein laga diya arthaat kamaaya aur khaaya। jo kamaate hain aur kha karke khatma kar dete hain unka kabhi jama nahin hota। aur jiska jama ka khaata nahin hota usko samay par dhokha milta hai। dhokha milega to duhkh ki praapti hogi। aise hi silence ki shakti jama nahin hogi, drishti ke mahattva ka anubhav nahin hoga to last samay shreshtha pad praapta karne mein dhokha kha lenge। phir duhkh hoga, pashchaataap hoga। isliye abhi se baap ki drishti dvaara praapta hui shaktiyon ko anubhav karte jama karte raho। to jama karna aata hai? jama hone ki nishaani kya hogi? nasha hoga। jaise saahookaar logon ke chalne,baithne,uthne mein nasha dikhaai deta hai aur jitna nasha hota utni khushi hoti hai। to yeh hai roohaani nasha। is nashe mein rahne se khushi svatah hogi। khushi hi janma-siddha adhikaar hai। sada khushi ki jhalak se auron ko bhi roohaani jhalak dikhaane vaale bano। isi vardaan ko sada smriti mein rakhna। kuchh bhi ho jaae - khushi ke vardaan ko khona nahin। samasya aayegi aur jaayegi lekin khushi nahin jaaye। kyonki khushi hamaari cheez hai,samasya paristhiti hai,doosre ke taraph se aai hui hai। apni cheez ko to sada saath rakhte hain na। paraai cheez to aayegi bhi aur jaayegi bhi। paristhiti maaya ki hai,apni nahin hai। apni cheez ko khona nahin hota hai। to khushi ko khona nahin। chaahe yeh shareer bhi chala jaae lekin khushi nahin jaae। khushi se shareer bhi jaayega to badhiya milega। puraana jaayega naya milega, to gujraat aur mahaaraashtra vaale is mahaanta mein sada rehna। khushi mein mahaan banna। achha।

aandhra pradesh-karnaatak group:- is drama ke andar vishesh part bajaane vaali vishesh aatmaayen hain - aise anubhav karte ho?jab apne ko vishesh aatma samajhte hain to banaane vaala baap svatah yaad rehta hai, yaad sahaj lagti hai। kyonki ‘sambandh'yaad ka aadhaar hai। jahaan sambandh hota hai vahaan yaad svatah sahaj ho jaati hai। jab sarva sambandh ek baap se ho gaye to aur koi raha hi nahin। ek baap sarva sambandhi hai - is smriti se sahajyogi ban gaye। kabhi mushkil to nahin lagta?jab maaya ka vaar hota hai tab mushkil lagta hai? maaya ko sada ke liye vidaai dene vaale bano। jab maaya ko vidaai denge tab baap ki badhaaiyaan bahut aage badhaayengi। bhakti maarga mein kitni baar maanga ki duaayen do,blessing do। lekin abhi baap se blessing lene ka sahaj saadhan bata diya hai - jitna maaya ko vidaai denge utni blessing svatah milengi। parmaatma-duaayen ek janma nahin lekin anek janma shreshtha banaati hain। sada yeh smriti mein rakhna ki ham har kadam mein baap ki, brahman parivaar ki duaayen lete sahaj udte chalen। drama mein vishesh aatmaayen ho, vishesh karma kar anek janmon ke liye vishesh part bajaane vaale ho। saadhaaran karma nahin vishesh karma,vishesh sankalp aur vishesh bol hon। to aandhra vaale vishesh seva yahi karo ki apne shreshtha karma dvaara, apne shreshtha parivartan dvaara anek aatmaon ko parivartan karo। apne ko aaina banaao aur aapke aaine mein baap dikhaai de। aisi vishesh seva karo। to yahi yaad rakhna ki main divya aaina hoon mujh aaine dvaara baap hi dikhaai de। samjha। achha।