Avyakt murli du jeudi 21 décembre 1989

>

21-12-89 om shanti avyakt baapdaadaamdhuban

tridev rachayita dvaara vardaanon ki praapti

avyakt baapdaada apne bachchon prati bole

aaj tridev rachayita apni saakaari aur aakaari rachna ko dekh rahe hain। donon rachna ati priy hain। isliye rachta,rachna ko dekh harshit hote hain। rachna sada yeh khushi ke geet gaati ki ‘‘vaah rachta''aur rachta sada yeh geet gaate - ‘‘vaah meri rachna''। rachna priy hai। jo priy hota hai usko sada sab-kuchh dekar sampanna banaate hain। to baap ne har ek shreshtha rachna ko vishesh teenon sambandh se kitna sampanna banaaya hai! baap ke sambandh se daata ban gyaan khazaane se sampanna banaaya,shikshak roop se bhaagyavidhaata ban anek janmon ke liye bhaagyavaan banaaya, satguru ke roop mein vardaata ban vardaanon se jholi bhar dete। yeh hai avinaashi sneh va pyaar। pyaar ki visheshta yahi hai - jisse pyaar hota hai uski kami achhi nahin lagegi,kami ko kamaal ke roop mein parivartan karenge। baap ko bachchon ki kami sada kamaal ke roop mein parivartan karne ka sada shubh sankalp rehta hai। pyaar mein baap ko bachchon ki mehnat dekhi nahin jaati। koi mehnat aavashyak ho to karo lekin braahmanjeevan mein mehnat karne ki aavashyakta hi nahin hai। kyonki daata, vidhaata aur vardaata - teenon sambandh se itne sampanna ban jaate ho jo bina mehnat roohaani mauj mein rah sakte ho। varsa bhi hai,padhaai bhi hai aur vardaan bhi hain। jisko teenon roopon se praapti ho,aise sarva praapti vaali aatma ko mehnat karne ki kya aavashyakta hai! kabhi varse ke roop mein va baap ko daata ke roop mein yaad karo to roohaani adhikaareepan ka nasha rahega। shikshak ke roop mein yaad karo to godly student arthaat bhagwan ke student hain - is bhaagya ka nasha rahega। satguru har kadam mein vardaanon se chala raha hai। har karma mein shreshtha mat - vardaata ka vardaan hai। jo har kadam shreshtha mat se chalte hain usko har kadam mein karma ki saphalta ka vardaan sahaj,svatah aur avashya praapta hota hai। satguru ki mat shreshtha gati ko praapta karaati hai। gati-sadgati ko praapta karaati hai। shreshtha mat aur shreshtha gati। apne sweet hom arthaat gati aur sweet raajya arthaat sadgati - isko to praapta karte hi ho lekin brahman aatmaon ko aur vishesh gati praapta hoti hai। woh hai is samay bhi shreshtha mat ke shreshtha karma ka pratyakshaphal arthaat saphalta।

yeh shreshtha gati sirf sangamayug par hi aap braahmanon ko praapta hai। isliye kehte hain - ‘jaisi mat vaisi gat'। vo log to samajhte hain marne ke baad gati milegi,isliye ‘ant mati so gati'kehte hain। lekin aap brahman aatmaon ke liye is antim marjeeva janma mein har karma ki saphalta ka phal arthaat gati praapta hone ka vardaan mila hua hai। vartamaan aur bhavishya - sada gati-sadagti hai hi hai। bhavishya ki intajaar mein nahin rehte ho। sangamayug ki praapti ka yahi mahatva hai। abhi-abhi karma karo aur abhi-abhi praapti ka adhikaar lo। isko kehte hain - ek haath se do,doosre haath se lo। kabhi mil jaayega va bhavishya mein mil jaayega,yeh dilaase ka sauda nahin hai। ‘turant daan mahaapunya',aisi praapti hai। isko kehte hain - jhatpat ka sauda। bhakti mein intajaar karte raho - mil jaayega, mil jaayega …। bhakti mein hai kabhi aur baap kehte hain - abhi lo। aadi sthaapna mein bhi aapki prasiddhata thi ki yahaan saakshaatkaar jhatpat hota hai। aur hota bhi tha। to aadi se jhatpat ka sauda hua। isko kehte hain rachta ka rachna se sachcha pyaar। saare kalpa mein aisa pyaara koi ho hi nahin sakta। kitne bhi naameegraami pyaare hon lekin yeh hai avinaashi pyaar aur avinaashi praapti। to aisa pyaara koi ho hi nahin sakta। isliye baap ko bachchon ki mehnat par raham aata hai। vardaani, sada varse ke adhikaari kabhi mehnat nahin kar sakte। bhaagyavidhaata shikshak ke bhaagyavaan bachche sada paas with honour hote hain। na fail hote hain, na koi vyartha baat feel karte hain।

mehnat karne ke kaaran do hi hain - ya to maaya ke vighnon se fail ho jaate va sambandh-samparka mein, chaahe braahmanon ke, chaahe agyaaniyon ke - donon sambandh mein karma mein aate chhoti-si baat mein vyartha feel kar dete hain jisko aap log flu ki beemaari kehte ho। flu kya karta hai? ek to sheking (halchal) hoti hai। usmein shareer hilta hai aur yahaan aatma ki sthiti hilti hai, man hilta hai aur mukh kaduva ho jaata hai। yahaan bhi mukh se kaduve bol bolne lag padte hain। aur kya hota hai? kabhi sardi, kabhi garmi chadh jaati hai। yahaan bhi jab feeling aati hai to andar josh aata hai, garmi chadhti hai - isne yeh kyon kaha,yeh kyon kiya? yeh josh hai। anubhvi to ho na। aur kya hota hai? khaana-peena kuchh achha nahin lagta hai। yahaan bhi koi achhi gyaan ki baat bhi sunaayenge,to bhi unko achhi nahin lagegi। aakhir result kya hoti? kamzori aa jaati hai। yahaan bhi kuchh samay tak kamzori chalti hai। isliye na fail hon,na feel karo। baapdaada shreshtha mat dete hain। shuddh feeling rahe - ‘main sarvashreshtha arthaat koton mein koi aatma hoon, main dev aatma, mahaan aatma, brahman aatma, vishesh paartadhaari aatma hoon।'is feeling mein rahne vaale ko vyartha feeling ka flu nahin hoga। is shuddh feeling mein raho। jahaan shuddh feeling hogi vahaan ashuddha feeling nahin ho sakti। to flu ki beemaari se arthaat mehnat se bach jaayenge aur sada svayan ko aisa anubhav karenge ki ham vardaanon se pal rahe hain, vardaanon se aage ud rahe hain, vardaanon se seva mein saphalta pa rahe hain।

mehnat achhi lagti hai va mehnat ki aadat pakki ho gai hai? mehnat achhi lagti va mauj mein rehna achha lagta hai?koi-koi ko mehnat ke kaam bagair aur koi kaam achha nahin lagta hai। unko kursa par aaraam se bithaayenge to bhi kahenge hamko mehnat ka kaam do। yeh to aatma ki mehnat hai aur aatma 63janma mehnat kar thak gai hai। 63janma dhoondhate rahe na। kisko dhoondhane mein mehnat lagti hai na। to thake hue pahle hi ho। 63 janma mehnat kar chuke ho। ab ek janma to mauj mein raho। 21 janma to bhavishya ki baat hai। lekin yeh ek janma vishesh hai। mehnat aur mauj - donon ka anubhav kar sakte ho। bhavishya mein to vahaan yeh sab baaten bhool jaayengi। maja to abhi hai। doosre mehnat kar rahe hain,aap mauj mein ho। achha!

teachers ne bhakti ki hai? kitne janma bhakti ki hai? is janma mein to nahin ki hai na! aapki bhakti pahle janma mein poori ho gai। kab se phir bhakti shuru ki?kiske saath shuru ki? brahma baap ke saath-saath aapne bhi bhakti ki hai। kaun-se mandir mein ki?to bhakti ki bhi aadi aatmaaen ho aur gyaan-maarga ki bhi aadi aatmaaen ho। aadi ki bhakti mein avyabhichaari bhakti hone kaaran bhakti ka aananda, sukh us samay ke pramaan kam nahin hua। woh sukh aur aananda bhi apne sthaan par shreshtha raha।

bhakta-maala mein aap ho?jab bhakti aapne shuru ki to bhakta-maala mein nahin ho?double foreigners bhakta-maala mein the? bhakta bane ya bhakta-maala mein the? abhi sab soch rahe hain ki ham the va nahin the! vijay maala mein bhi the,bhakta-maala mein bhi the? pujaari to bane lekin bhakta-maala mein the? bhakta-maala alag hai। aap to gyaani so bhakta bane। woh hain hi bhakta। to bhakta-maala aur gyaaniyon ki maala mein antar hai। gyaaniyon ki maala hai - ‘vijay maala'। aur jo sirf bhakta hain, aise naudha bhakta jo bhakti ke bina aur baat sunna hi nahin chaahte,bhakti ko hi shreshtha samajhte hain। to bhakta-maala alag hai, gyaan maala alag hai। bhakti zaroor ki lekin bhakta-maala mein nahin kahenge। kyonki bhakti ka part bajaane ke baad aap sabko gyaan mein aana hai। woh naudha bhakta hain aur aap naudha gyaani ho। aatma mein sanskaaron ka antar hai। bhakta maana sada mangata ke sanskaar honge। main neech hoon, baap ooncha hai - yeh sanskaar honge। woh royal bhikhaari hain aur aap aatmaon mein adhikaareepan ke sanskaar hain। isliye parichay milte hi adhikaari ban gaye। samjha?bhakton ko bhi koi jagah do na। donon mein aap aayenge kya?unhon ka bhi aadhaakalpa hai,aapka bhi aadhaakalpa hai। unhon ko bhi gaayanmaala mein aana hi hai। phir bhi duniya vaalon se to achhe hain। aur taraph to buddhi nahin hai, baap ki taraph hi hai। shuddh to rehte hain। pavitrata ka phal milta hai - ‘‘gaayan yogya hone ka''। aapki pooja hogi। unhon ki pooja nahin hoti, sirf stechyu banaake rakhte hain gaayan ke liye। meera ka kabhi mandir nahin hoga। devtaaon misal meera ki pooja nahin hoti, sirf gaayan hai। abhi last janma mein chaahe kisi ko bhi pooj leven। dharni ko bhi poojen to vriksha ko bhi poojen। lekin niyam pramaan unhon ka sirf gaayan hota hai, poojan nahin। aap poojya bante ho। to aap poojneey aatmaaen ho- yeh nasha sada smriti mein rakho। poojya aatma kabhi koi apvitra sankalp ko touch bhi nahin kar sakti। aise poojya bane ho! achha!

chaaron or ke varse ke adhikaari aatmaon ko,sada padhaai mein paas with honours hone vaale, sada vardaanon dvaara vardaani ban auron ko bhi vardaani banaane vaale - aise baap, shikshak aur satguru ke pyaare, sada roohaani mauj mein rahne vaali shreshtha aatmaon ko baapdaada ka yaadapyaar aur namaste।

panjaab - raajasthaan group:- sada apne ko holeehans anubhav karte ho?holeehans arthaat samartha aur vyartha ko parakhne vaale। woh jo hans hote hain vo kankad aur ratna ko alag karte hain, moti aur patthar ko alag karte hain। lekin aap holeehans kisko parakhne vaale ho?samartha kya hai aur vyartha kya hai, shuddh kya hai aur ashuddha kya hai। jaise hans kabhi kankad ko chug nahin sakta - alag karke rakh dega, chhod dega, grahan nahin karega। aise aap holeehans vyartha ko chhod dete ho aur samartha sankalp ko dhaaran karte ho। agar vyartha aa bhi jaae to dhaaran nahin karenge। vyartha ko agar dhaaran kiya to holeehans nahin kahenge। woh to bagula dhaaran karta hai। vyartha to bahut suna, bola, kiya lekin uska parinaam kya hua? ganvaaya,sab-kuchh ganva diya na। tan bhi ganva diya। devtaaon ke tan dekho, aur abhi ke tan dekho kya hain?kitna antar hai! javaan se bhi buddhe achhe hain। to tan bhi ganvaaya, man ka sukh-shanti bhi ganvaaya, dhan bhi ganvaaya। aapke paas kitna dhan tha? athaah dhan kahaan gaya?vyartha mein ganva diya। abhi jama kar rahe ho ya ganva rahe ho?holeehans ganvaane vaala nahin, jama karne vaala। abhi 21 janma tan bhi achha milega aur man bhi sada khush rahne vaala hoga। dhan to aise hoga jaise abhi mitti hai। abhi mitti ka bhi moolya ho gaya hai lekin vahaan ratnon se to khelenge,ratnon se makaan ki sajaavat hogi। to kitna jama kar rahe ho! jiske paas jama hota hai usko khushi hoti hai। agar jama nahin hota to dil chhoti hoti hai, jama hota hai to dil badi hoti hai। abhi kitni badi dil ho gai hai!

to har kadam mein jama ka khaata badhta jaata hai ya kabhi-kabhi jama karte ho?apna chart achhi tarah se dekha hai? aise samay par bhi kabhi-kabhi vyartha to nahin chala jaata?abhi to samay ki value ka pata pad gaya hai na। sangam ka ek second kitna bada hai! kahne mein to aayega ek-do second hi to gaya lekin ek second kitna bada hai! yeh yaad rahe to ek second bhi nahin ganvaayenge। second ganvaana maana varsha ganvaana - sangam ke ek second ka itna mahattva hai! to jama karne vaale hain,ganvaane vaale nahin। kyonki ya to hoga ganvaana,ya hoga kamaana। saare kalpa mein kamaai karne ka samay abhi hai। to holeehans arthaat svapna mein,sankalp mein bhi kabhi vyartha ganvaayenge nahin।

holi arthaat sada pavitrata ki shakti se apvitrata ko second mein bhagaane vaale। na keval apne liye balki auron ke liye bhi। kyonki saare vishwa ko parivartan karna hai na। pavitrata ki shakti kitni mahaan hai, yeh to jaante ho na! pavitrata aisi agni hai jo second mein vishwa ke kichde ko bhasma kar sakti hai। sampoorn pavitrata aisi shreshtha shakti hai! ant mein jab sab sampoorn ho jaayenge to aapke shreshtha sankalp mein lagan ki agni se yeh sab kichda bhasma ho jaayega। yog jvaala ho। ant mein aise dheere- dheere seva nahin hogi। socha aur hua - isko kehte hain ‘vihang maarga ki seva'। abhi apne mein bhar rahe ho,phir kaarya mein lagaayenge। jaise deviyon ke yaadgaar mein dikhaate hain ki jvaala se asuron ko bhasma kar diya। asur nahin lekin aasuri shaktiyon ko khatma kar diya। yeh kis samay ka yaadgaar hai? abhi ka hai na। to aise jvaalaamukhi bano। aap nahin banenge to kaun banega! to abhi jvaalaamukhi ban aasuri sanskaar,aasuri svabhaav-sab-kuchh bhasma karo। apne to kar liye hain na ya apne bhi kar rahe ho? achha!

panjaab vaale nirbhay to ban gaye। darne vaale to nahin ho na?jvaalaamukhi ho, darna kyon? mare to pade hi ho,phir darna kisse? aur raajasthaan ko to ‘‘raajya-adhikaari''kabhi bhoolna nahin chaahiye। raajya bhool karke raajasthaan ki reti to yaad nahin aa jaati ? vahaan ret bahut hoti hai na! to sada naye raajya ki smriti rahe। sabhi nirbhay jvaalaamukhi ban prakriti aur aatmaon ke andar jo tamogun hai use bhasma karne vaale bano। yeh bahut bada kaam hai,speed se karenge tab poora hoga। abhi to vyaktiyon ko hi sandesh nahin pahuncha hai, prakriti vi to baat peechhe hai। to speed tej karo। gali-gali mein centre hon। kyonki circumstance pramaan ek gali se doosri gali mein ja nahin sakenge, ek-do ko dekh bhi nahin sakenge। to ghar-ghar mein,gali-gali mein ho jaayega na। achha!

udeesa, gulbarga,vishaakhaapattanam group:- teenon sthaan ke sada ek sthiti mein sthit rahne vaale ho? shareer ke sthaan bhinnabhinna hain lekin aatmaon ka sthaan ek hai। chaahe kahaan se bhi aaye ho lekin sthiti sada ekras ho। ekras sthiti kya hai? ek ki smriti mein rehna arthaat ekras sthiti mein rehna। agar ek ke bajaay doosra koi bhi yaad aaya to ekras ke bajaay bahuras sthiti ho jaayegi। to sabhi ekras rahne vaale ho ya kabhi-kabhi doosra ras kheenchata hai?kabhi baal-bachche kheenchate hain?sadaiv yeh socho - ‘‘jis samay aur koi ras aakarshit karta hai, agar usi samay aapka antim samay ho to kya result hogi''! oonch pad pa sakenge?to sadaiv aise hi samjho ki ek second mein kya bhi ho sakta hai! har second ka attention rakho। sadaiv ‘‘ek''ka paath pakka rakho। ek baap, ek hi sangam ka samay hai aur ekras sthiti mein rehna hai aur ek baap se sarva praapti karni hai। ‘‘ek''ka paath padhna aata hai? sabhi ko satayug mein hi aana hai na! ya treta mein raaja ban jaao - yeh achha hai?brahman jeevan arthaat sampoorn jeevan। sampoorn aatma satayug mein aayegi। brahman bankar agar ek yug ka sukh liya aur ek yug ka nahin liya to kya kiya! to sada yahi yaad rakhna ki oonche te oonche baap dvaara sada ke liye oonche te ooncha varsa - 21janma ka adhikaar lene vaale hain। jab sampoorn banne ka lakshya rakhte ho to lakshan bhi aise hi dhaaran karo। agar lakshya kamzor hoga to lakshan bhi kamzor honge। baapdaada sabhi bachchon ko oonche te ooncha banaate hain, number one banaate hain, second number nahin banaate। jab daata sampoorn de raha hai to lene vaale kam kyon lo? poora hi lena chaahiye na। achha!

sabhi sthaan nirvighna sthaan hain,vighna aate hain? baapdaada ke paas to sab samaachaar pahunch jaata hai। jitna- jitna shaktishaali aatma banenge utna yeh vighna samaapta ho jaayenge,vighna himmat nahin rakhenge aane ki। abhi himmat rakhte hain aane ki,chaahe aap usko mita do lekin aate to hain na! aaye hi kyon?vighna sva ke lagna ke kaaran door se hi neeche ho jaaen aur aap oopar ho jaao। kyonki vighnon mein samay to dena padta hai na। vaayumandal to badalta hai na। chaahe koi svayan nirvighna ho lekin agar centre par baar-baar vighna aate hain to usmein bhi samay dena padta hai। vaayumandal badal jaata hai। to kyon nahin aisa powerful vaataavran banaao jo vighna sada kamzor rahen aur aap sarvashaktivaan raho - aisi himmat hai? dekhna, taareekh yaad rakhna। jab prakriti ki shakti vaayumandal ko parivartan kar sakti hai, garam ko thanda bana sakti hai - thande ko garam bana sakti hai to aap kya nahin kar sakte? to vaayumandal powerful banaao। kyonki seva hi yeh hai ki pahle sva ko nirvighna banaana hai aur phir auro ko bhi nirvighna banaana hai। seva lene vaale nahin, sevaadhaari ho। agar bahut samay vidhnon ke vash hote rahenge to ant mein nirvighna nahin rahenge। isliye bahutkaal ki nirvighna avastha chaahiye। to abhi vighnon ko aane nahin dena। kamzor aatmaon ko bhi baap dvaara praapta hui shakti de shaktishaali banaao - ‘yahi shreshtha seva hai'। parichay dena, course karaana yeh koi badi baat nahin hai। lekin aatmaon ko shaktishaali banaana - yahi sachchi seva hai। himmat aap rakhenge aur madad baap karenge। achha!

gujraat group:- sada apne ko nishchaybuddhi vijayi aatmaaen anubhav karte ho? nishchay ki nishaani hai -‘‘vijay''। agar apne mein va baap mein nishchay hai to nishchay ki vijay nahin ho - yeh ho hi nahin sakta। agar vijay aadhi hoti hai, poori nahin hoti to iska kaaran hai nishchay ki kami। ‘nishchay aur vijay, yeh ek-do ke pakke saathi hain'। jahaan nishchay hoga vahaan vijay zaroori hai। kyonki nishchay hai ki baap sarvashaktivaan hai aur sarvashaktivaan baap ke nishchay se vijay kaise nahin hogi! aur apne mein bhi nishchay hai ki main master sarvashaktivaan hoon, to vijay kahaan jaayegi? nishchaybuddhi ki kabhi haar ho nahin sakti। nishchaybuddhi auron ko bhi haar se chhudaane vaale hain, svayan kaise haar kha sakte hain। to vijayi banne ka phaaundeshan hai ‘‘nishchay'', foundation agar pakka hai to building hil nahin sakti,nishchint rehte hain। agar foundation kachcha hai to thoda-sa bhi toophan aayega,thodi bhi dharni hilegi to bhay hoga ki yeh building hamaari gir nahin jaae ya crack (daraar) nahin ho jaae। lekin foundation pakka hoga to nirbhay honge। aise hi nishchay ka foundation pakka hai to koi toofaan hila nahin sakta। to aise vijayi ho ya kabhi-kabhi thodi daraar pad jaati hai? ya kabhi thodi khidkiyaan,darvaaje ke sheeshe hilte hain? toofaan lagta hai ya dharni ki halchal hoti hai to kya hota hai?halchal to nahin hoti hai na! halchal mein achal rehna - isko kaha jaata hai - nishchaybuddhi vijayi ratna। sirf baap mein nishchay nahi,apne aap mein bhi nishchay aur drama mein bhi nishchay। vaah drama vaah! agar drama mein nishchay hoga to akalyaan ki baat bhi kalyaan mein badal jaayegi। nishchay mein itni shakti hai! dikhaai aise dega ki akalyaan ki baat hai lekin usmein bhi kalyaan chhipa hua hoga। pahle hilaane ke liye aisa roop aayega bhi lekin aapko hila nahin sakta। aise pakke ho ya thoda-thoda hilte ho? sankalp va svapna mein bhi hilte to nahin? kyonki sankalp mein bhi agar thodi-si kamzori aa gai to sankalp ka prabhaav vaani par padta, vaani ka prabhaav karma par padta। iseelie baap ne pahle sankalp ko hi badli kiya hai, sankalp karte ho - ‘main shareer nahin, aatma hoon।'yeh shuddh sankalp hai, is sankalp se jeevan badal gai। agar sankalp kamzor hain to jeevan bhi kamzor ban jaayegi।

to sada nishchay hai ki main master sarvashaktivaan hoon। kitna bhi maaya hilaaye,hilte to nahin? koi maaya se darta to nahin? sabhi bahaadur ho ya sochte ho maaya ko aana nahin chaahiye? aadhaakalpa maaya ke saathi rahe ho aur abhi aane nahin dete। kyonki abhi jaan gaye ho ki yeh bade-te-bada dushman hai। pahle to maaloom nahin tha ki maaya kya hai। maayaajeet banne ka arth hi hai - nishchaybuddhi vijayi। to har karma karne ke pahle nishchay pakka ho। vaise bhi dekho,agar koi taakat vaala, bahaadur nahin hota hai to koi bhi kaam karne se pahle kamzori ka sankalp karta hai - kar sakenge, nahin kar sakenge, hoga ya nahin hoga? taakat vaale ko yeh sanshay nahin uth sakta। use kaho yeh bhaari cheez uthaao to jaldi utha lega aur kamzor ko kaho to sochega। to aise soch chalta hai ki yeh kaam to badhiya hai lekin hoga ya nahin hoga?maaya ke anek svaroopon ko jaan gaye। knowledgeful ban gaye ho na। maaya bhi bhinna-bhinna roop se aati hai। woh bhi jaanti hai ki is roop se mujhe jaan jaayenge। to naya-naya roop dhaaran karti hai। phir kehte hain - mujhe to yeh pata hi nahin tha, aise bhi hota hai kya! lekin knowledgeful kabhi soch nahin sakta,woh jaanta hai। to sabhi nishchaybuddhi vijay ho! vijay janmasiddha adhikaar hai। janmasiddha adhikaar koi chheen nahin sakta। achha!

maataayen nishchay mein pakki hain ya paandav? kisi ko bhi aage rakhna, doosron ko aage rakhne mein svayan aage hain hi। paandav maataaon ko aage rakhte ho? maataayen dhaal hain, dhaal ko aage rakha jaata hai ya samajhte ho ki aage ham hain?vaise bhi dekho, maataayen paalna karti hain, paalna ke sanskaar maataaon mein hain, to maataayen maaya se bachne ki paalna achhi karengi। aisi maataayen ho ya khud hi haar khaane vaali ho?majboot ho na। baap maataaon ke liye itna kah raha hai aur maataayen agar kachchi hui to sabhi kachche ho jaayenge। kabhi kachche nahin banna, sada pakke hi rehna। achha! chhote bachche bhi bahut hoshiyaar hain। chhote bhi maa-baap ke guru ban jaate hain। achha!

teenon nishchay saath-saath rahen - baap, aap aur drama।

kabhi sankalp mein bhi koi hila na sake। ‘angad'ban jaao। naakhoon ko bhi hila na sake। taang to chhodo lekin naakhoon ko bhi maaya hila nahin sakti। aise angad ban jaao। phir bhi gujraat ki dharni mein kuchh-na-kuchh bhaavna rehti hai। to bhaavna ka phal ‘‘gyaan''mil gaya। achha hai - apne hamjinsa ke oopar taras aana chaahiye, raham aana chaahiye। kyonki samajhte hain na - kal ham kya the aur aaj kya ban gaye! apne jeevan ke anubhav se doosron ke oopar raham aata hai na! merciful ban jyaada-se-jyaada hamjinsa ko jagaao। achha! sabhi santushta ho na। ya thoda-thoda kisi se asantushta ho jaate ho? kisse santushta, kisse asantushta। ek-do mein kabhi asantushta to nahin hote? isko chance milta hai,hamko nahin milta - aise to nahin! baapdaada ke paas sab samaachaar aata hai। chhoti-chhoti baaten hoti hain, badi nahin hoti। lekin kya bhi ho jaae, santushtata na jaae। baaten aate bhi hain aur chali jaati hain lekin baaton ke saath santushtata nahin jaaye। kyonki santushtata gai to sab-kuchh gaya। achha!