Avyakt murli du lundi 30 novembre 1992

>

30-11-92 om shanti avyakt baapdaadaamdhuban

sarva khazaanon se sampanna bano - duaae do, duaae lo

duaaon ke khazaane se sampanna banaane vaale baapdaada apne‘gyaani tu aatma’ bachchon prati bole -

aaj sarva khazaanon ke maalik apne sampanna bachchon ko dekh rahe hain। har ek bachche ko anek prakaar ke avinaashi akhut khazaane mile hain aur aise khazaane hain,jo sarva khazaane ab bhi hain aur aage bhi anek janma khazaanon ke saath rahenge। jaante ho ki khazaane kaunse aur kitne mile hain? khazaanon se sada praapti hoti hai। khazaanon se sampanna aatma sada bharpoorta ke nashe mein rehti hai। sampa-nnata ki jhalak unke chehre mein chamakti hai aur har karma mein sampannata ki jhalak svatah hi najar aati hai। is samay ke manushya-tmaaon ko vinaashi khazaanon ki praapti hai, isliye thoda samay nasha rehta hai aur saath nahin rehta hai। isliye duniya vaale kehte hain-khaali hokar jaana hai। aur aap kehte ho ki bharpoor hokar jaana hai। aap sabko baapdaada ne anek khazaane diye hain।

sabse shreshtha pahla khazaana hai-gyaan-ratnon ka khazaana। sabko yeh khazaana mila hai na। koi vanchit to nahin rah gaya hai na। is gyaan-ratnon ke khazaane se vishesh kya praapti kar rahe ho? gyaan-khazaane dvaara is samay bhi mukti-jeevanmukti ki anubhooti kar rahe ho। muktidhaam mein jaayenge va jeevanmukta dev pad praapta karenge-yeh to bhavishya ki baat hui। lekin abhi bhi mukta jeevan ka anubhav kar rahe ho। kitni baaton se mukta ho, maaloom hai? jo bhi duhkh aur ashaanti ke kaaran hain, unse mukta hue ho। ki abhi mukta hona hai? abhi koi vikaar nahi aata? mukta ho gaye। agar aata bhi hai to vijayi ban jaate ho na। to kitni baaton se mukta ho gaye ho! laukik jeevan aur alaukik jeevan-donon ko saath rakho to kitna antar dikhaai deta hai! to abhi mukti bhi praapta ki hai aur jeevanmukti bhi anubhav kar rahe ho। anek vyartha aur vikalpa, vikarmon se mukta banna-yahi jeevanmukta avastha hai। kitne bandhanon se mukta hue ho?chitra mein dikhaate ho na-kitne bandhanon ki rassiyaan manushyaatmaaon ko bandhi hui hain! yeh kiska chitra hai? aap to woh nahin ho na। aap to mukta ho na। to jeevan mein rehte jeevanmukta ho gaye। to gyaan ke khazaane se vishesh mukti-jeev-nmukti ki praapti ka anubhav kar rahe ho।

doosra-yaad arthaat yog dvaara sarva shaktiyon ka khazaana anubhav kar rahe ho। kitni shaktiyaan hain?bahut hain na! aath shaktiyaan to ek sample roop mein dikhaate ho, lekin sarva shaktiyon ke khazaanon ke maalik ban gaye ho।

teesra-dhaarna ki subject dvaara kaunsa khazaana mila hai?sarva divya gunon ka khazaana। gun kitne hain? bahut hain na। to sarva gunon ka khazaana। har gun ki, har shakti ki visheshta kitni badi hai! har gyaan-ratna ki mahima kitni badi hai!

chauthi baat-seva dvaara sada khushi ke khazaane ki anubhooti karte ho। jo seva karte ho usse vishesh kya anubhav hota hai?khushi hoti hai na। to sabse bada khazaana hai avinaashi khushi। to khushi ka khazaana sahaj,svatah praapta hota hai।

paanchava-sambandh-samparka dvaara brahman parivaar ke bhi samparka mein aate ho,seva ke bhi sambandh mein aate ho। to sambandh-samparka dvaara kaunsa khazaana milta hai? sarva ki duaaon ka khazaana milta hai। yeh duaaon ka khazaana bahut bada khazaana hai। jo sarva ki duaaon ke khazaanon se bharpoor hai, sampanna hai usko kabhi bhi purooshaartha mein mehnat nahin karni padti। pahle hai maat-pita ki duaae aur saath mein sarva ke sambandh mein aane se sarva dvaara duaae। sabse bade te bade teevra gati se aage udne ka tej yantra hai-’duaae’। jaise-science ka sabse bade te bada teevra gati ka rocket hai। lekin duaaon ka rocket usse bhi shreshtha hai। vighna jara bhi sparsha nahin karega, vighna-proof ban jaate। yuddha nahin karni padti। sahaj yogayukta, yuktiyukta har karma, bol,sankalp svatah hi ban jaate hain। aisa yeh duaaon ka khazaana hai। sabse bada khazaana is sangamayug ke samay ka khazaana hai।

vaise khazaane to bahut hain। lekin jo khazaane sunaaye,sirf in khazaanon ko bhi apne andar samaane ki shakti dhaaran karo to sada hi sampanna hone kaaran jara bhi halchal nahin hogi। halchal tab hoti hai jab khaali hai। bharpoor aatma kabhi hilegi nahin। to in khazaanon ko check karo ki sarva khazaane svayan mein samaaye hain? in sabhi khazaanon se bharpoor ho? va koi mein bharpoor ho, koi mein thoda abhi bharpoor hona hai?khazaane mile to sabhi ko hain na। ek dvaara,ek jaise khazaane sabhi ko mile hain। alag-alag to nahin baanta hai na। ek ko laakh, doosre ko karod diya ho-aise to nahin hai na?lekin ek hain sirf lene vaale-jo milta hai lete bhi hain lekin mila aur khaaya-piya, mauj kiya aur khatma kiya। doosre hain jo mile hue khazaanon ko jama karte-khaaya-piya,mauj bhi kiya aur jama bhi kiya। teesre hain-jama bhi kiya, khaaya-piya bhi lekin mile hue khazaane ko aur badhaate jaate hain। baap ke khazaane ko apna khazaana banaae badhaate jaate। to dekhna hai ki main kaun hoon-pahle number vaala, doosre va teesre number vaala?

jitna khazaane ko sva ke kaarya mein ya anya ki seva ke kaarya mein use karte ho utna khazaana badhta hai। khazaana badhaane ki chaabi hai-use karna। pahle apne prati। jaise-gyaan ke ek-ek ratna ko samay par agar sva prati use karte ho, to khazaana use karne se anubhvi bante jaate ho। jo khazaane ki praapti hai woh jeevan mein anubhav ki ‘authority’ban jaati hai। to authority ka khazaana add (Add,jama) ho jaata hai। to badh gaya na। sirf sunna aur baat hai। sunna maana lena nahin hai। samaana aur samay par kaarya mein lagaana-yeh hai lena। sunne vaale kya karte aur samaane vaale kya karte-donon mein mahaan antar hai।

sunne vaalon ka baapdaada drishya dekhte hain to muskuraate hain। sunne vaale samay par paristhiti pramaan va vighna pramaan,samasya pramaan point ko yaad karte hain ki baapdaada ne is vighna ko paar karne ke liye ye-ye points di hain। aisa karna hai, aisa nahin karna hai-repeat karte,yaad karte rehte hain। ek taraph point repeat karte rehte, doosre taraph vasheebhoot bhi ho jaate hain। bolte hain-aisa nahin karna hai,yeh gyaan nahin hai, yeh divya gun nahin hai, samaane ki shakti dhaaran karni hai, kisko duhkh nahin dena hai। repeat bhi karte rehte hain lekin fail bhi hote rehte hain। agar us samay bhi unse poochho ki ye right hai? to javaab denge-right hai nahin lekin ho jaata hai। bol bhi rahe hain,bhool bhi rahe hain। to unko kya kahenge?sunne vaale। sunna bahut achha lagta hai। point badi achhi shaktishaali hai। lekin use karne ke samay agar shaktishaali point ne vijayi nahin banaaya va aadha vijayi banaaya to usko kya kahenge? sunne vaale kahenge na।

samaane vaale jaise koi paristhiti ya samasya saamne aati hai to trikaaldarshi sthiti mein sthit ho sva-sthiti dvaara par-sthiti ko aise paar kar lete jaise ki kuchh tha hi nahin। isko kaha jaata hai samaana arthaat samay par kaarya mein lagaana, samay pramaan har shakti ko, har point ko,har gun ko order se chalaana। jaise koi sthool khazaana hai, to khazaane ko svayan khazaana use nahin karta lekin khazaane ko use karne vaali manushyaatmaae hain। vo jab chaahen, jitna chaahen, jaise chaahen, vaise use kar sakti hain। aise yeh jo bhi sarva khazaane sunaae,unke maalik kaun? aap ho va doosre hain?maalik hain na। maalik ka kaam kya hota hai? khazaana usko chalaaye ya vo khazaane ko chalaaye? to aise har khazaane ke maalik ban samay par gyaani arthaat samajhdaar, knowledgeful,trikaaldarshi hokar khazaane ko kaarya mein lagaao। aise nahin ki samay aane par order karo sahan shakti ko aur kaarya poora ho jaaye phir sahan shakti aaye। samaane ki shakti jis samay,jis vidhi se chaahiye-us samay apna kaarya kare। aise nahin-samaaya to sahi lekin thoda-thoda phir bhi mukh se nikal gaya, aadha ghanta samaaya aur ek second samaane ke bajaae bol diya। to isko kya kahenge?khazaane ke maalik va gulaam?

sarva shaktiyaan baap ke adhikaar ka khazaana hai,varsa hai,janma siddha adhikaar hai। to janmasiddha adhikaar ka kitna nasha hota hai! chhota-sa raajkumaar hoga, kya khazaana hai, uska pata bhi nahin hoga lekin thoda hi smriti mein aane se kitna nasha rehta-main raaja ka bachcha hoon! to yeh maalikpan ka nasha hai na। to khazaanon ko kaarya mein lagaao। kaarya mein kam lagaate ho। khush rehte ho-bharpoor hai,sab mila hai। lekin kaarya mein lagaana, usse svayan ko bhi praapti karaana aur doosron ko bhi praapti karaana-usmein nambarvaar ban jaate hain। nahin to number kyon bane? jab dene vaala bhi ek hai,deta bhi sabko ekras hai,phir number kyon? to baapdaada ne dekha-khazaane to bahut mile hain,bharpoor bhi sabhi hain, lekin bharpoorta ka laabh nahin lete। jaise laukik mein bhi kaiyon ko dhan se aananda ya laabh praapta karne ka tareeka aata hai aur koi ke paas hoga bhi bahut dhan lekin use karne ka tareeka nahin aata, isliye hote hue bhi jaise ki nahin hai। to underline kya karna hai?sirf sunne vaale nahin bano, use karne ki vidhi se ab bhi siddhi ko praapta karo aur anek janmon ki sadgati praapta karo।

divya gun bhi baap ka varsa hai। to praapta hue varse ko kaarya mein lagaana kya mushkil hai। order karo। order karna nahin aata?maalik ko hi order karna aata। kamjor ko order karna nahin aata, woh sochega-kahoon va nahin kahoon,pata nahin madad milegi va nahin milegi…। apna khazaana hai na। baap ka khazaana apna khazaana hai। ya baap ka hai aur hamaara nahin hai? baap ne kislie diya?apna banaane ke liye diya ya sirf dekhkar khush hone ke liye diya?karma mein lagaane ke liye mila hai। result mein dekha jaata hai ki sabhi khazaanon ko jama karne ki vidhi kam aati hai। gyaan ka arth bhi yeh nahin ki point repeat karna ya buddhi mein rakhna। gyaan arthaat samajh-trikaaldarshi banne ki samajh,satya-asatya ki samajh, samay pramaan karma karne ki samajh। isko gyaan kaha jaata hai।

agar koi itna samajhdaar bhi ho aur samay aane par besamjhi ka kaarya kare-to usko gyaani kahenge? aur samajhdaar agar bes-majh ban jaaye to usko kya kaha jaayega? besmajh ko kuchh kaha nahin jaata। lekin samajhdaar ko sabhi ishaara denge ki-yeh samajhdaari hai?to gyaan ka khazaana dhaaran karna, jama karna arthaat har samay, har kaarya, har karma mein samajh se chalna। samjha?to aap mahaan samajhdaar ho na।‘gyaani tu aatma’ ho ya ‘gyaan sunne vaali tu aatma’ ho?check karo ki aise gyaani tu aatma kahaan tak bane hain-practical karma mein, bolne mein…। aise to sabse haath uthvaao to sab kahenge-ham lakshmi-naaraayan banenge। koi nahin kahega ki ham raam-seeta banenge। lekin koi to banenge na। sabhi kahenge-ham vishwa-mahaaraaja banenge। achha hai, lakshya aisa hi ooncha rehna chaahiye। lekin sirf lakshya tak nahin, lakshya aur lakshan samaan hon। lakshya ho vishwa-mahaaraajan aur karma mein ek gun ya ek shakti bhi order nahin maane, to woh vishwa ka mahaaraaja kaise banenge?apna hi khazaana apne hi kaam mein nahin aaye to vishwa ka khazaana kya sambhaalenge?isliye sarva khazaanon se sampanna bano aur vishesh vartamaan samay yahi sahaj purooshaartha karo ki sarva se, baapdaada se har samay duaae lete rahen।

duaae kisko milti hain? jo santushta rah sabko santushta kare। jahaan santushtata hogi vahaan duaae hongi। aur kuchh bhi nahin aata ho-koi baat nahin। bhaashan nahin karna aata hai-koi baat nahin। sarva gun dhaaran karne mein mehnat lagti ho, sarva shaktiyon ko control karne mein mehnat lagti ho-usko bhi chhod do। lekin ek baat yeh dhaaran karo ki duaae sabko deni hain aur duaae leni hain। ismen koi mehnat nahin karni padegi। karke dekho। ek din amritvele se lekar raat tak yahi kaarya karo-duaae deni hain, duaae leni hain। aur phir raat ko chart check karo-sahaj purooshaartha raha ya mehnat rahi? aur kuchh bhi nahin karo lekin duaae do aur duaae lo। ismen sab aa jaayega। divya gun, shaktiyaan aape hi aa jaayengi। koi aapko duhkh de to bhi aapko duaae deni hain। to sahan shakti, samaane ki shakti hogi na,sahansheelta ka gun hoga na। andarastood hai।

duaae lena aur duaae dena-yeh beej hai, ismen jhaad svatah hi samaaya hua hai। iski vidhi hai-do shabd yaad rakho। ek hai ‘shiksha’aur doosri hai‘kshama’,raham। to shiksha dene ki koshish bahut karte ho, kshama karna nahin aata। to kshama karni hai। kshama karna hi shiksha dena ho jaayega। shiksha dete ho to kshama bhool jaate ho। lekin kshama karenge to shiksha svatah aa jaayegi। shikshak banna bahut sahaj hai। saptaah-course ke baad hi shikshak ban jaate hain। to kshama karni hai,merciful banna hai। sirf shikshak nahin banna hai। kshama karenge-abhi se yeh sanskaar dhaaran karenge tab hi duaae de sakenge । aur abhi se duaae dene ka sanskaar pakka karenge tabhi aapke jad chitron se bhi duaae lete rahenge। chitron ke saamne jaakar kya kehte hain? dua karo, marsa (raham) do…। aapke jad chitron se jab duaae milti hain to chaitanya mein aatmaon se kitni duaae milengi! duaaon ka akhut khazaana baapdaada se har kadam mein mil raha hai, lene vaala leve। aap dekho, agar shreemat pramaan koi bhi kadam uthaate ho to kya anubhav hota hai? baap ki duaae milti hain na। aur agar har kadam shreemat par chalo to har kadam mein kitni duaae milengi, duaaon ka khazaana kitna bharpoor ho jaayega!

koi bhal kya bhi deve lekin aap usko duaae do। chaahe koi krodh bhi karta hai, usmein bhi duaae hain। krodh mein duaae hain ki ladaai hai? chaahe koi kitna bhi krodh karta hai lekin aapko yaad dilaata hai ki main to parvash hoon, lekin aap master sarvashaktivaan ho। to duaae mili na। yaad dilaaya ki aap master sarvashaktivaan ho, aap sheetal jal daalne vaale ho। to krodhi ne duaae di na। woh kya bhi kare lekin aap us se duaae lo। sunaaya na-gulaab ke pushpa mein bhi dekho kitni visheshta hai,kitni gandi khaad se, badbu se khud kya leta hai? khushbu leta hai na। gulaab ka pushpa badbu se khushbu le sakta aur aap krodhi se duaae nahin le sakte? vishwa-mahaaraajan gulaab ka pushpa banna chaahiye ya aapko banna chaahiye? yeh kabhi bhi nahin socho ki yeh theek ho to main theek hooon, yeh system theek ho to main theek hooon। kabhi saagar ke aage jaakar kahenge-’’he lahar! aap badi nahin, chhoti aao, tedhi nahin aao, seedhi aao’’? yeh sansaar bhi saagar hai। sabhi lahren na chhoti hongi,na tedhi hongi, na seedhi hongi,na badi hongi,na chhoti hongi। to yeh aadhaar nahin rakho-yeh theek ho jaaye to main ho jaaoon। to paristhiti badi ya aap bade?

baapdaada ke paas to sab baaten pahunchti hain na। yeh theek kar do to main bhi theek ho jaaoon। is krodh karne vaale ko sheetal kar do to main sheetal ho jaaoon। is khitkhit karne vaale ko kinaare kar do to centre theek ho jaayega। aise roohrihaan nahin karna। aapka slogan hi hai-’’badla na lo, badal kar dikhaao।’’yeh aisa kyon karta hai,aisa nahin karna chaahiye,isko to badalna hi padega…। parantu pahle sva ko badlo। sva-parivartan se vishwa-parivartan va anya ka parivartan। ya anya ke parivartan se sva parivartan hai? slogan wrong to nahin bana diya hai?kya karenge?sva ko badlenge ya doosre ko badalne mein samay ganvaayenge? ‘‘chaahe ek varsha bhi lagaakar dekho-sva ko nahin badlo aur doosron ko badalne ki koshish karo। samay badal jaayega lekin na aap badlenge, na vo badlega।’’samjha? sarva khazaanon ke maalik banna arthaat samay par khazaanon ko kaarya mein lagaana।

kai aise hote hain-kai achhi-achhi cheejen hoti hain to khush hote rehte hain ki hamaare paas sab-kuchh hai। lekin jab samay aata hai to yaad hi nahin aayega ya woh cheej milegi nahin। kaaran kya hota hai? samay-prati-samay usko kaarya mein nahin lagaaya। to sirf dekh-kar ke khush nahin hona lekin har khazaane ka maja lo, mauj manaao। gyaan ke khazaane se mauj manaao, samajh se kaarya karo,siddhi ko praapta karo,shaktiyon ko order par chalaao-yeh hai mauj manaana। gunon ko svayan prati kaarya mein lagaao aur doosron ko bhi gun-daan karo,gyaan-daan karo, shaktiyon ka daan karo। agar koi nirbal hai to shakti dekar usko bhi sampanna banaao। isko kaha jaata hai bharpoor aatma। achha!

sarva khazaanon se sampanna aatmaon ko,sarva khazaanon ko kaarya mein lagaane vaale,badhaane vaale ‘gyaani tu aatmaae’bachchon ko,sarva khazaanon ko maalik ban samay par vidhipoorvak kaarya mein lagaane vaali shreshtha aatmaon ko,har shakti,har gun ki authority ban svayan mein aur sarva mein bharne vaali vishesh aatmaon ko,sada duaaon ke khazaane se sahaj purooshaartha ka anubhav karne vaali sahajyogi aatmaon ko baapdaada ka yaad, pyaar aur namaste।

daadiyon se mulaakaat

baapdaada second mein kitni baaten kar sakta hai?samay kam aur baaten bahut। kyonki pharishte ishaaron se hi samajhte hain। to yeh drishti ki bhaasha pharishtepan ki nishaani hai। yeh bhi baapdaada sikhaate rehte hain। aajkal ke samay pramaan agar vaani dvaara kisko sunaao to samay bhi chaahiye, saahas bhi chaahiye। agar meethi drishti dvaara samjhaane ka prayatna karte hain to kitna sahaj ho jaata hai! samay anu-saar yeh drishti dvaara parivartan hona aur parivartan karaana-yahi kaam mein aayega। sunaate hain to sab kehte hain-hamko pahle se hi pata hai। lekin meethi drishti aur shubh vritti-yeh ek minute mein ek ghanta samjhaane ka kaarya kar sakta hai। aajkal yahi vidhi shreshtha hai aur ant mein bhi yahi kaam mein aayegi। follow father karte jaayenge। vighna ko bhi manoranjan samajhkar chalte rehte hain। vaah drama vaah! chaahe kisi bhi prakaar ka drishya ho lekin ‘vaah-vaah’hi ho। achha hai, baapdaada bachchon ki himmat, umang-ullaas dekh khush hain aur badhaate rehte hain। yahi nimitta banne ki lift ki vishesh gift hai। achha!

avyakt baapdaada ki personal mulaakaat

group nan.1

shreshtha sthiti ka aadhaar hai-shreshtha smriti

sabhi ko double nasha rehta hai ki main shreshtha aatma maalik bhi hoon aur phir baalak bhi hoon?ek hai maalikpan ka roohaani nasha aur doosra hai baalakpan ka roohaani nasha। yeh double nasha sada rehta hai ya kabhi-kabhi rehta hai? baalak sada ho ya kabhi-kabhi ho?baalak sada baalak hi hai na। parmaatma-baalak hain aur phir saare aadi-madhya-ant ko jaanne vaale maalik hain। to aisa maalikpan aur aisa baalakpan saare kalpa mein aur koi samay nahin rah sakta। satayug mein bhi parmaatma-bachche nahin kahenge,devaatmaaon ke bachche ho jaayenge। teenon kaalon ko jaanne vaale maalik-yeh maalikpan bhi is samay hi rehta hai। to jab is samay hi hai, baad mein merge ho jaayega, to sada rehna chaahiye na। double nasha rakho। is double nashe se double praapti hogi-maalikpan se apni anubhooti hoti hai aur baalakpan ke nashe se apni praapti। bhinna-bhinna praaptiyaan hain na। yeh roohaani nasha nuksaan vaala nahin hai। roohaani hai na। dehbhaan ke nashe nuksaan mein laate hain। vo nashe bhi anek hain। dehbhaan ke kitne nashe hain? bahut hain na-main yeh hoon, main yeh hoon, main yeh hoon…। lekin sabhi hain nuksaan dene vaale, neeche laane vaale। yeh roohaani nasha ooncha le jaata hai, isliye nuksaan nahin hai। hain hi baap ke। to baap kahne se bachpan yaad aata hai na। baap arthaat main bachcha hoon tabhi baap kehte hain। to saara din kya yaad rehta hai? ‘‘mera baba’’। ya aur kuchh yaad rehta hai? baba kahne vaala kaun?bachcha hua na। to sada bachche hain aur sada hi rahenge।

sada is bhaagya ko saamne rakho arthaat smriti mein rakho-kaun hoon,kiska hoon aur kya mila hai! kya mila hai-uski kitni lambi list hai! list ko yaad karte ho ya sirf copy mein rakhte ho?copy mein to sabke paas hoga lekin buddhi mein emerge ho-main kaun?to kitne uttar aayenge?bahut uttar hain na। uttar dene mein, list bataane mein to hoshiyaar ho na। ab sirf smritisvaroop bano। smriti aane se sahaj hi jaisi smriti vaisi sthiti ho jaati hai। sthiti ka aadhaar smriti hai। khushi ki smriti mein raho to sthiti khushi ki ban jaayegi aur duhkh ki smriti karo to duhkh ki sthiti ho jaayegi। baap ek hi kaam dete hain-yaad karo ya smriti mein raho। ek hi kaam mushkil hota hai kya? kabhi bahut kaam ikatthe ho jaate hain to kanphyooj (Confuse; moonjhana) ho jaate hain-itne kaam kab karen,kaise karen…। ek hi kaam ho to ghabraane ki jaroorat nahin hoti na। to baap ne ek hi kaam diya hai na। bas, yaad karo। isi yaad mein hi sab-kuchh aa jaata hai। to yaad karo ki maalik bhi hain,baalak bhi hain! roohaani nashe mein rahne se kya milta aur bhoolne se kya hota-donon anubhav hain na। bhoolne ki aadat to 63janmon se hai। lekin yaad kitna samay karna hai? ek janma। aur yeh janma bhi kitna chhota-sa hai! to‘sada’ shabd ko underline karna। achha! sabhi sada khush ho na। yeh socho ki ham khush nahin honge to kaun hoga? maataae bhi sada khush rehti ya kabhi-kabhi thodi duhkh ki lahar aati hai? chaahe kitna bhi duhkhamay sansaar ho lekin aap sukh ke saagar ke bachche sada sukh-swaroop ho। duhkh mein duhkhi ho jaate ho kya?jaante ho ki sansaar ka samay hi duhkh ka hai। lekin aapka samay kaunsa hai?sukh ka hai na ki thoda-thoda duhkh ka hai? sansaar mein to duhkh badhna hi hai। kam nahin hona hai, ati mein jaana hai। lekin aap duhkh se nyaare ho। theek hai na। achha hai, mauj mein raho। kya bhi hota rahe lekin ham mauj mein rahne vaale hain। mauj mein rehna achha hai na।

group nan.2

samasyaaon ke pahaad ko udti kala se paar karo

sabhi apne purooshaartha ko sada check karte rehte ho? aapka purooshaartha teevra gati ka hai va samay teevra gati se aage badh raha hai,kya kahenge? samay tej hai aur aap dheele ho? samay rachta hai ya rachna hai? rachna chaahe kitni bhi powerful ho,phir bhi rachta to rachta hi hoga na। to samay ka aahvaan aapko karna hai ya samay aapka aahvaan karega?samay aapka aahvaan kare ki aao mere maalik! to jaise samay ki raphtaar sada aage badhti jaati hai, rookti nahin hai। chaahe giraavat ka samay ho, chaahe badhne ka samay ho lekin samay kabhi rookta nahin hai, sada aage badhta jaata hai। samay ko koi rokna chaahen to bhi nahin rookta hai। aur aapko koi roke to rookte ho? rook jaate ho na। rookna nahin hai। kaisi bhi paristhiti aa jaaye, kaisi bhi samasyaaon ka pahaad aage aa jaaye lekin aap rookne vaale ho kya? udti kala vaale ho na। to pahaad ko bhi kya karenge? udti kala hogi to second mein paar kar lenge। to chadhti kala vaale ho ya udti kala vaale ho? udne vaale kabhi rookenge nahin। bina manzil ke agar udne vaali cheej rook jaaye to kya hoga? chalte-chalte plen manzil ke pahle hi rook jaaye to accident hoga na। to aap bhi udti kala vaale ho। udti kala vaale manzil ke pahle kahaan rookte nahin। ya thak jaate ho to rook jaate ho?

jahaan praapti hoti hai, praapti vaala kabhi thakta nahin। businessmen ko anubhav hai na। graahak deri se bhi aaye to bhi thakenge nahin, aahvaan karte hain-aao…। kyon nahin thakte? kyonki praapti hai। to aapko kitni praaptiyaan hain? har kadam mein padmon ki praapti hai। saare world mein aisa saahookaar koi hai jisko kadam mein padmon ki kamaai ho? kitne bhi naameegraami hon lekin itne saahookaar koi nahin hain। chakkar lagaakar aao। dekho, videsh mein koi mil jaaye? kitna bhi bada ho lekin aapke aage woh kuchh bhi nahin hai। to itni badi praapti vaale kabhi thak nahin sakte। praapti ko bhoolna arthaat thakna। us business mein to kitni mehnat karni padti hai aur mehnat ke baad bhi milega kya? chalo,jyaada mein jyaada karod mil jaayen, milte to nahin hain lekin mil jaayen। aur yahaan to padmon ki baat hai। to sada apni praaptiyon ko saamne rakho। sirf purooshaartha nahin karo, purooshaartha ke pahle praaptiyon ko saamne rakho। agar maaloom hota hai ki yeh milna hai, to purooshaartha ko bhool jaate hain,praapti ko hi saamne rakhte hain। usko purooshaartha dikhaai nahin dega, praapti hi dikhaai degi। kheti ka kaam bhi karte hain to kya dikhaai deta hai? mehnat dikhaai deti hai ya phal dikhaai deta hai? phal ki khushi hoti hai na। to yeh smriti rakhne se kabhi thakenge nahin। na thakenge, na gati teevra se dheemi hogi, sada teevra gati hogi।

gujraat vaalon ki to teevra gati hai na। gujraat ki maataayen bhi teevra, jaldi-jaldi chalti hain। dekho, garba karte ho to mota ho, boodha ho-kitna jaldi-jaldi karte hain। doosre to dekhenge ki yeh itna mota kaise karega?lekin kitna fast karte hain! to gujraat vaalon ko teevra gati ki aadat hai। jab shareer teevra chal sakta hai to aatma nahin chal sakti? gujraat ki visheshta hi sada khush rahne ki hai। gujraat vaale sabhi garba jaante hain। beemaar ko bhi kaho ki raas karne ke liye aao-to aa jaayenge, bistar se bhi uth padenge। to yeh nishaani hai khushi ki, mauj manaane ki। mauj ki nishaani gujraat mein jhoola ghar-ghar mein hota hai। to jaise shareer ki mauj manaate ho,to aatma ko bhi to mauj mein rehna hai। to gujraat ka arth hua mauj mein rahne vaale,khushi mein rahne vaale। lekin sada, kabhi-kabhi nahin। gujraat vaalon ki kabhi bhi khushi kam ho,yeh ho nahin sakta। itna pakka nishchay hai ya kabhi-kabhi moonjh bhi jaate ho? jab baap ko apni sab jimmevaariyaan de di, to aap mauj mein hi rahenge na। jimmevaariyaan maatha bhaari karti hain। jab bhi khushi kam hoti hai to kehte ya sochte ho ki-kya karen,yeh bhi sambhaalna padta hai na, karna padta hai na,jimmevaari hai na। us samay sochte ho na। lekin jimmevaar baap hai, main nimitta-maatra hoon। meri jimmevaari hai-to bhaareepan hota hai। baap ki jimmevaari hai, main nimitta hoon-to halke ho jaayenge। halka udega। bhaari cheej udegi nahin,baar-baar neeche aa jaayegi। thoda bhi sankalp aaya-mujhe karna padta hai, mujhe hi karna hai-to bhaareepan hua। to double light ho na। ya thoda-thoda bojh hai? sada udte raho। udti kala arthaat teevra gati।

aap log to bahut-bahut bhaagyavaan ho jo udti kala ke samay par aaye ho। jaise aajkal ke bachche kehte hain na ki ham bhaagyavaan hain jo bailgaadi ke samay nahin the,motargaadi ke time par aaye hain। aajkal ke bachche puraanon ko yahi kehte hain ki-aap logon ka jamaana bailgaadi ka tha, hamaara jamaana aeroplane ka hai। to unhon ko kitna nasha rehta hai! aapko bhi yeh nasha rehna chaahiye ki ham udti kala ke samay par aaye hain। samay bhi,dekho, aapka sahayog ban gaya। to achhi tarah se udo। apne paas chhote-mote bojh nahin rakho-na purooshaartha ka bojh, na seva ka bojh,na sambandh-samparka nibhaane ka bojh। koi bojh nahin। ya thoda-thoda bojh rakhna achha hai?aadat padi hui hai na। 63janma se bojh uthaate aaye, beech-beech mein woh aadat abhi bhi kaam kar leti hai। lekin bojh uthaane se kya mila? bhaari rahe aur bhaari rahne se neeche girte gaye। abhi to chadhna hai na। achha! gujraat vaale kabhi bhi aise nahin kahenge ki kya karen, kaise karen,maaya aa gai। maaya se darne vaale ho। ya vijay praapta karne vaale ho?ladte rahenge to chandravanshi mein chale jaayenge। isliye sada vijayi। haar khaane vaale nahin। haar khaana kamjoron ka kaam hai, brahman to sada bahaadur hain। achha!

group nan3

raajayogi woh jo apni karmendriyon ko eeshvareey law and order par chalaaye

aavaaj mein aana sahaj lagta hai na। aise hi,aavaaj se pare hona itna hi sahaj lagta hai?aavaaj mein aana sahaj hai। va aavaaj se pare hona sahaj hai?aavaaj mein aana sahaj hai aur aavaaj se pare hone mein mehnat lagti hai? vaise aap aatmaon ka aadi swaroop kya hai? aavaaj se pare rehna ya aavaaj mein aana? to abhi mushkil kyon lagta hai? 63 janmon ne aadi sanskaar bhula diya hai। jab anaadi sthaan ‘paramdham’aavaaj se pare hai, vahaan aavaaj nahin hai aur aadi swaroop aatma mein bhi aavaaj nahin hai-to phir aavaaj se pare hona mushkil kyon? yeh madhya-kaal ka ulta prabhaav kitna pakka ho gaya hai! brahman jeevan arthaat jaise aavaaj mein aana sahaj hai vaise aavaaj se pare ho jaana-yeh bhi abhyaas sahaj ho jaaye। iski vidhi hai-raaja hokar ke chalna aur karma-indriyon ko chalaana। raaja order kare-yeh kaam nahin hona hai;to praja kya karegi?maanna padega na।

aajkal to koi raaja hi nahin hai, praja ka praja par raajya hai। isliye koi kiska maanta hi nahin hai। lekin aap log to raaj-yogi ho na। aapke yahaan praja ka praja par raajya nahin hai na। raaja ka raajya hai na। to baap kehte hain-’’he raaje! aapke control mein aapki praja hai?ya kabhi control se baahar ho jaati hai? roz raajya-darbaar lagaate ho?’’ roj raatri ko raajya darbaar lagaao। apne raajya kaarobaari karmendriyon se haalchaal poochho। jaise raaja raajya-darbaar lagaata hai na। to aap apni raajya-darbaar lagaate ho? ya bhool jaate ho,so jaate ho?raajya-darbaar lagaane mein kitna time lagta hai? unhon ke raajya-darbaar mein to khitkhit hoti hai। yahaan to khitkhit ki baat hi nahin hai। apojishan to nahin hai na। ek ka hi control hai। kabhi-kabhi apne hi karmachaari apojishan karne lag padte hain। to raajayogi arthaat master sarvashaktivaan raaja aatma,ek bhi karmendriy dhokha nahin de sakti। stop kaha to stop। order par chalne vaale hain na। kyonki bhavishya mein law aur order par chalne vaala raajya hai। to sthaapna yahaan se honi hai na।

yahaan hi ‘aatma’ raaja apni sarva karmendriyon ko law aur order par chalaane vaali bane, tabhi vishwa-mahaaraajan ban vishwa ka raajya law aur order par chala sakti hai। pahle svaraajya law aur order par ho। to kya haalchaal hai aapke raajya-darbaar ka? oopar-neeche to nahin hai na। sabhi ka haal theek hai?koi gadbad to nahin hai? jo yahaan kabhi-kabhi order mein chala sakta hai aur kabhi-kabhi nahin chala sakta-to vahaan bhi kabhi-kabhi ka raajya milega,sada ka nahin milega। foundation to yahaan se padta hai na। to sada check karo ki main sada akaal takhtansheen svaraajya chalaane vaali raaja ‘aatma’hoon? sabhi ke paas takhta hai na। kho to nahin gaya hai?to takhta par baithkar raajya chalaaya jaata hai na। ya takhta par aaraam se albele hokar so jaayenge?takhta par rehna arthaat raajya-adhikaari banna। to takhtansheen ho ya kabhi utar aate ho?

sada smriti rakho ki‘‘main ‘aatma’to hoon lekin kaunsi aatma? raaja‘aatma’,raajya-adhikaari‘aatma’hoon, saadhaaran‘aatma’nahin hoon।’’raajya-adhikaari aatma ka nasha aur saadhaaran aatma ka nasha- ismen kitna pharka hoga! to raaja ban apni raajya kaarobaar ko check karo-kaunsi karmendriy baar-baar dhokha deti hai? agar dhokha deti hai to usko check karke apne order mein rakho। agar albele hokar chhod denge to uski dhokha dene ki aadat aur pakki ho jaayegi aur nuksaan kisko hoga? apne ko hoga na। isliye kya karna hai? akaal takhtansheen ban check karo।

bhavishya mein kya banne vaale ho-iska yathaartha parichay kis aadhaar par kar sakte ho?koi aadhaar hai jisse aapko pata pad jaaye ki main bhavishya mein kya banne vaala hoon? lakshya achha rakho। kyonki abhi result out nahin hui hai। chairs (kursiyon) ka game (khel) hota hai na,to last mein seeti bajti hai। us last seeti par pata padta ki kaun vijayi hota hai। abhi koi bhi fix nahin hua hai, sivaae first number ke। do to fix ho gaye hain, abhi 6 mein margin hai। lekin sunaaya na-first vishwa-mahaaraajan ya vishwa-mahaaraani nahin banenge to first division mein to aayenge na। first number mein ek hota hai lekin first division mein bahut hote hain। to first number mein nahin aayenge lekin first division mein aa sakte hain। vahaan royal family ka pad bhi itna hota hai jitna takhta-nasheen raaja-raani ka hota hai। isliye first division ka lakshya sada rakhna। royal family vahaan kam nahin hoti hai-itna hi pad hota hai,itna hi regard hota hai jitna lakshmi-naaraayan ka। to first royal family mein aana bhi itna hi hai jitna lakshmi-naaraayan banna। isliye purooshaartha karna, chance hai। to lakshya to bahut achha rakha hai।

baapdaada ne pahle bhi sunaaya ki baapdaada ko yahi khushi hai jo aur kisi bhi baap ko nahin ho sakegi-jo sabhi bachche kehte hain ki ham raaja hain। praja koi nahin kehta। to ek baap ke itne ra॰je bachche hon to kitne nashe ki baat hai! aur sabhi lakshmi-naaraayan banne vaale hain। isliye baapdaada ko khushi hai। samjha?ye variety group hai। lekin baapdaada to sabhi ko madhuban nivaasi dekh rahe hain। aapki asli address kya hai? baambe hai, raajasthaan hai, Bangalore hai… kya hai?nashtomoha banne ki yahi sahaj yukti hai ki mera ghar nahin samjho। mera ghar hai,mera parivaar hai- to nashtomoha nahin ho sakenge। seva-sthaan hai,ghar madhuban hai। to sada ghar mein rehte ho ya seva-sthaan par rehte ho?seva-sthaan samajhne se nashtomoha ho jaayenge। meri jimmevaari,mera kaam hai,mera vichaar yeh hai, meri pharja-adaai hai…-ye sab moh utpanna karta hai। seva ke nimitta hoon। jo sachcha sevaadhaari hota hai uski visheshta kya hoti hai? sevaadhaari sada apne ko nimitta samjhega, mera nahin samjhega। aur jitna nimitta bhaav hoga utna nirmaan honge, jitna nirmaan honge utna nirmaan ka kartavya kar sakenge। nimitta bhaav nahin to deh-bhaan se pare nirmaan ban nahin sakenge। isliye sevaadhaari arthaat samarpanta। sevaadhaari mein agar samarpan bhaav nahin to kabhi seva saphal nahin ho sakti,meraapan ka bhaav saphalta nahin dilaayega।

double videshi videsh mein kyon gaye ho? seva ke liye na। lekin ho madhuban nivaasi। bhaarat nivaasi ho ya videsh nivaasi ho? bhaarat ki aatmaae ho na। dekho, agar aap double videshi nahin bante to seva mein bhaashaaon ki kitni problem hoti! ek khaas school banaana padta sab bhaashaae seekhne ke liye। abhi sahaj seva to ho rahi hai na। to seva arth videsh mein pahunch gaye ho। raajya bhaarat mein karna hai na। vishwa hi bhaarat ban jaayega। America aadi sab bhaarat ban jaayega। abhi to tukda-tukda ho gaya hai। sabhi ne maha-bhaarat se apna-apna tukda le liya hai। jo liya hai vo dena padega na। kyonki bhaarat mahaadaani hai,isliye sabko tukda- tukda de diya hai। aapko kehna nahin padega ki hamko tukda de do, aapehi denge। to sadaiv behad ka nasha rakho ki ham sabhi behad ke raajya-adhikaari hain! sva-raajya ki sthiti dvaara vishwa ke raajya ki apni takdeer ko jaan sakte hain। agar abhi svaraajya theek nahin hai to samajh lo-vishwa ka raajya bhi pahle nahin milega, peechhe milega। to sabhi ke paas darpan hai na। naarad ko aaina diya na ki-’’dekho main kaun hoon?lakshmi ko varne vaala hoon?’’to yeh svaraajya ki sthiti darpan hai। is darpan mein aap svayan hi dekh sakte hain ki kya banne vaala hoon? achha!

group nan.4

ham kalpa-kalpa ke vijayi hain-is nishchay se badi baat ko bhi chhota banaao

sabhi ko sabse jyaada kaunsi khushi hai?sabse jyaada khushi ki baat yeh hai ki jinke oopar duniya ke aatmaon ki koi nazar nahin unke oopar param aatma ki nazar pad gai! aajkal ke jamaane mein chunaav hota hai na। to aapko kisne chuna?chunaav mein koi gadbad hui hai kya? koi kharcha karna pada hai kya?to baap ne ham aatmaon ko chun liya, apna bana liya। duniya ki nazar mein ati saadhaaran aatmaae theen, lekin baap ki nazar mein mahaan aatmaae, vishesh aatmaae ho। to isi khushi mein raho-kal kya the aur aaj kya ban gaye, kiski najar mein aa gaye! duniya-vaalon ne thukra diya aur baap ne apna bana liya। kitni thokron se bacha liya! 63janma thokren hi khaai na। chaahe bhakti ki,to bhi thokren khaai। apni pravritti ki life mein bhi bhinna-bhinna prakaar ki thokren khaate rahe। aur baap ne aakar thikaana de diya। jab thikaana mil jaata hai to thokar khaana banda ho jaata hai। to thikaana mil gaya hai na। to kya the aur kya ban gaye! svapna mein tha ki itna mahaan banenge? lekin kitna sahaj ban gaye! kuchh bhi mushkil nahin dekhni padi। kitna shreshtha bhaagya hai! to kaunsa geet gaate ho? paana tha vo pa liya। yeh geet automatic chalta rehta hai। mukh se gaane ki aavashyakta nahin hai lekin dil gaati rehti hai। yeh dil ki teprikorda kabhi kharaab nahin hoti, baar-baar chalaana nahin padta, svatah hi chalti rehti hai na। achha!

sabhi ne maaya ko jeet liya hai? sabhi maayaajeet ban gaye ho? ki abhi vijayi banna hai? maaya ka kaam hai khel karna aur aapka kaam hai khel dekhna। khel mein ghabraana nahin। ghabraate hain to woh samajh jaati hai ki ye ghabra to gaye hain,ab lagaao isko achhi tarah se। maaya bhi to jaanne mein hoshiyaar hai na। kuchh bhi ho jaaye, ghabraana nahin। vijay hui hi padi hai। isko kaha jaata hai sampoorn nishchaybuddhi। pata nahin kya hoga, haar to nahin jaaoonga, vijay hogi va nahin…-ye nahin। sadaiv yeh nasha rakho ki paandav sena ki vijay nahin hogi to kiski hogi! kaurvon ki hogi kya?to aap kaun ho? paandavon ki vijay to nishchit hai na।

koi bhi badi baat ko chhota banaana ya chhoti baat ko badi banaana apne haath mein hai। kiska svabhaav hota hai chhoti baat ko bada banaane ka aur kiska svabhaav hota hai badi baat ko chhota banaane ka। to maaya ki kitni bhi badi baat saamne aa jaaye lekin aap usse bhi bade ban jaao to woh chhoti ho jaayegi। aap neeche aa jaayenge to woh badi dikhaai degi aur oopar chale jaayenge to chhoti dikhaai degi। kitni bhi badi paristhiti aaye, aap oonchi sva-sthiti mein sthit ho jaao to paristhiti chhoti-si baat lagegi aur chhoti-si baat par vijay praapta karna sahaj ho jaayega। nishchay rakho ki anek baar ke vijayi hain। abhi koi is kalpa mein vijayi nahin ban rahe hain, anek baar vijayi bane hain। isliye koi nai baat nahin hai, puraani baat hai। lekin us samay yaad aaye। aise nahin-time beet jaaye, peechhe yaad aaye ki ye to chhoti baat hai, mainne badi kyon bana di। samay par yaad aave ki main kalpa-kalpa ka vijayi hoon।

maataaon ko nasha hai?maataaon ka to bhaagya khul gaya। maataae kya se kya ban gai! jin maataaon ko logon ne neeche giraaya, paanv ki juti bana di, to paanv sabse neeche hota hai aur juti to paanv ke bhi neeche hoti hai,aur baap ne sir ka taaj bana diya। maataaon ko jyaada khushi hai na! to khushi mein naachna hota hai। to naachti ho? paanv se nahin, man se khushi mein naacho। baap mila, sab-kuchh mila। jab baap ko khushi hoti hai to bachchon ko bhi khushi hogi na। aaj ke vishwa mein aur sab-kuchh mil sakta hai lekin sachchi khushi nahin mil sakti। aur aapko sachchi khushi mili। baap ko yaad bhi isliye karte ho kyonki praapti hai। baap pyaara tab lagta hai jab varsa de। baap ne khushi ka khazaana de diya। isliye khushi-khushi se yaad karte ho। chaahe koi padma kharcha kare lekin yeh khushi nahin mil sakti। to aapne kya kharcha kiya? koi kaudi lagaai? ‘baba’ kaha aur khazaana mila! to bin kaudi baadshaah ban gaye! lagaaya kuchh nahin aur ban gaye baadshaah!

sabse bade te bada baadshaah kaunsa hai? (bephikra baadshaah) to aap bephikra baadshaah ho? ya yahaan aakar bephikra ho,vahaan jaakar phikra hoga?maataaon ko phikra hoga-bachchon ko kya karen,potron ko kya karen? yahaan bhi nahin hai, vahaan bhi nahin hoga। aajkal ke baadshaah hain phikra ke baadshaah aur aap ho bephikra baadshaah। bachche ko koi phikra hota hai kya? jab baap baitha hai to bachche bephikra hote hain। to bephikra baadshaah ban gaye ho। vaise bhi koi bhi baat ka phikra karo to phikra karne vaale ko kabhi bhi saphalta nahin milti। phikra karne vaala samay bhi ganvaata, svayan ko bhi ganvaata, kyonki energy (Energy; shakti) vesta hoti hai,aur kaam ko bhi ganva deta-jis kaam ke liye phikra karta woh kaam bhi bigaad deta। to saphalta agar chaahiye to uski vidhi hai-bephikra banna। aise baadshaah!

sevaaon ki koi nai invention nikaalo। lakshya rakhne se touching svatah hi hoti hai। seva mein aage badhna arthaat svayan ke purooshaartha mein bhi aage badhna। jo sachchi dil se seva karte hain vo sada unnati ko praapta karte hain। agar mixture seva karte hain to saphalta nahin hoti,svaunnati bhi nahin hoti। achha!

group nan.5

achha bano to sarva ichchhaayen svatah hi poori ho jaayengi

sada apne mastak par vijay ka tilak laga hua anubhav hota hai? avinaashi tilak avinaashi baap dvaara laga hua hai। to tilak hai smriti ki nishaani। tilak sada mastak par lagaaya jaata hai। to mastak ki visheshta kya hai? yaad ya smriti। to vijay ke tilakdhaari arthaat ‘sada vijay bhav’ ke vardaani। jo smritisvaroop hain ve sada vardaani hain। vardaan aapko maangane ki aavashya-kata nahin hai। vardaan de do-maangate ho?maangana kya chaahiye-yeh bhi aapko nahin aata tha। kya maangana chaahiye-woh bhi baap hi aakar sunaate hain। maangana hai to poora varsa maango। baaki had ka vardaan-ek bachcha de do,ek bachchi de do, ek makaan de do,achhi vaali kaar de do, achha pati de do…-yahi maangate rahe na। behad ka maangana kya hota hai-vo bhi nahin aata tha। iseelie baap jaante hain ki itne neeche gir gaye jo maangate bhi had ka hain, alpakaal ka hain। aaj kaar milti hai,kal kharaab ho jaati hai, accident ho jaata hai। phir kya karenge? phir aur maangenge-doosri kaar de do! aap to adhikaari ban gaye। behad ke baap ke behad ke varse ke adhikaari ban gaye। abhi svatah hi vardaan praapta ho hi gaye। jab daata ke bachche ban gaye, vardaata ke bachche ban gaye-to vardaan ka khazaana bachchon ka hua na। to jab vardaanon ka khazaana hi hamaara hai to maangane ki kya aavashyakta hai!

abhi khushi mein raho ki maangane se bach gaye। jo soch mein bhi nahin tha woh saakaar roop mein mil gaya। har baat mein bharpoor ho gaye, koi kami nahin। aapke devtaai jeevan mein bhi jo gaayan karte hain usmein bhi sarva gun sampanna kehte hain, thode-thode gun sampanna nahin kehte। sarva gun sampanna, 16 kala sampanna। 14 kala to nahin kehte na। purooshottam kehte hain, saadhaaran puroosh nahin kehte hain। purooshon mein bhi uttam। to sarva arthaat sampanna aur sampoorn ho gaye। kyonki baap sarvashaktivaan hai, to aap sabhi bhi sarva bane na-sarva gun sampanna,master sarvashaktivaan। to itni khushi rehti hai? vaise bhi bina maange jo milta hai usko achha maana jaata hai। to baap ne varse ke adhikaar ke roop mein sab de diya, adhikaar mein kami nahin chhodi। koi cheej ki kami hai kya?chhota makaan hai,badhiya aur bada makaan hona chaahiye-yeh sochte ho? bada makaan mil jaaye to geeta-paathshaala khol den-yeh sochte ho? yeh maangate ho? maangana nahin hai। maangane se milna nahin hai। kyonki maangana arthaat ichchha। had ki ichchha ho gai na। chaahe seva-bhaav ho,lekin ‘maangana’-yeh right nahin। maangane ki aavashyakta hi nahin hai,agar aapka behad ki seva ka sankalp bina had ki ichchha ke hoga to avashya poora hoga। ichchha rakhne vaale ki ichchha poori nahin hogi। lekin achha banne vaale ki ichchha poori hogi, svatah hi praapti ho jaayegi। is-liye kuchh bhi maangane ki aavashyakta nahin hai। praapti-swaroop ho na। ki ‘maangane vaala swaroop’ho? shubh ichchha svatah hi poorn hoti hai। sochenge bhi nahin ki kya hoga, kaise hoga,lekin svatah hi praapti ho jaayegi। yeh socha tha ki ham itne oonche brahman ban jaayenge? nahin socha tha। lekin sahaj ban gaye na।

sada bharpoor raho। bharpoor aatma achal hogi। jo bharpoor nahin hoga usmein halchal hogi। is samay bhi bharpoor bane ho, phir bhavishya mein jab raajya karenge to bhi kitne bharpoor honge! koi kami nahin hogi। aur jab poojya bante ho to aapke mandir bhi kitne bharpoor ho jaayenge! bhaarat ke mandiron se aur log maalaamaal hue। jab jad chitra mandir bhi aapke itne sampanna the to aap kitne sampanna honge! apraapti ka naam-nishaan nahin hoga। satayug mein koi apraapti hogi? abhi koi apraapti hai?sab-kuchh mil gaya! achha,satayug mein baap (shivbaaba) hoga? to apraapti hui ya nahin hui? ho gai na। to satayug se bhi jyaada sarva praaptiyaan abhi hain। kitni khushi,kitna nasha hai!

sada yeh smriti mein rakho ki ham hi aadha kalpa raajya-adhikaari bante hain aur aadha kalpa poojya aatmaae bante hain aur sangam par sarva praapti sampanna aatma bante hain। to saara kalpa bharpoor ho na! kyonki is samay ki sampannata saare kalpa raajya ke roop mein aur poojya roop mein chalti hai। abhi bhi dekho-chaahe kaliyug ka ant hai, phir bhi svayan sookhi roti khaayenge lekin devtaaon ko badhiya bhog lagaayenge। chaitanya manushyon ko rahne ka sthaan nahin hoga, phutpaath par sote hain, jhopdiyaan lagaakar sote hain aur aapke jad chitra kitne vidhipoorvak mandiron mein rehte hain! to chaitanya ko jagah nahin milti lekin aapke jad chitron ko bhi jagah dete hain! kitne bade-bade mandir hain! aur moorti kitni hoti hai! teen pair prithvi chaahiye lekin mandir kitne bade banaate hain! to is antim janma mein bhi aap aatmaae kitni sampanna ho! jad chitra bhi aapke sampanna hain। to chaitanya mein bhi sampanna ho na।

saare kalpa ka shreshtha bhaagya ab mil raha hai। mil gaya। bhaagyavidhaata ne har bachche ki saare kalpa ki takdeer ki lakeer kheench di। saara kalpa naam baala hoga। to itna nasha rehta hai?samajhte ho-hamaari pooja ho rahi hai? kiski pooja ho rahi hai? aapka mandir hai? ya bade-bade mahaarthiyon ke mandir hain?jo brahman banta hai woh brahman so devta banta hai aur devta so poojya zaroor banta hai। nambarvaar hain lekin poojya zaroor bante hain। mandiron mein bhi nambarvaar hain na। koi moorti ki pooja dekho kitna vidhipoorvak hoti hai! aur koi mandiron mein kabhi-kabhi pooja hoti hai। jo kabhi-kabhi yaad mein rehta hai uski moorti ki pooja bhi kabhi-kabhi hoti hai aur jo sada yaad mein rehte hain,sada shreemat par chalte hain unki pooja bhi sada hoti hai। jo har karma mein karmayogi banta hai, uski pooja bhi har karma ki hoti hai। bade-bade mandiron mein har karma ki pooja hoti hai-bhojan ki bhi hogi,jhoole ki bhi hogi, sone ki bhi hogi to uthne ki bhi hogi। to jitni yaad utna raajya,utni pooja। abhi apne aapse poochho ki main kitna yaad mein rehta hoon?