Avyakt murli du dimanche 20 décembre 1992

>

20-12-92 om shanti avyakt baapdaadaamdhuban

aagyaakaari hi sarva shaktiyon ke adhikaari

sarvashaktivaan baapdaada apne master sarvashaktivaan bachchon prati bole -

aaj sarva shaktiyon ke daata baapdaada apne shakti sena ko dekh rahe hain। sarvashaktivaan baap ne sabhi brahman aatmaon ko samaan sarva shaktiyon ka varsa diya hai। kisko kam shakti va kisko jyaada-yeh antar nahin kiya। sabhi ko ek dvaara,ek saath, ek samaan shaktiyaan di hain। to result dekh rahe the ki ek samaan milte hue bhi antar kyon hai? koi sarva shakti sampanna bane aur koi sirf shakti sampanna bane hain,sarva nahin। koi sada shaktisvaroop bane, koi kabhi-kabhi shaktisvaroop bane hain। koi brahman aatmaae apni sarva-shaktivaan ki authority se jis samay, jis shakti ko order karti hain woh shakti rachna ke roop mein master rachta ke saamne aati hai। order kiya aur haazar ho jaati hai। koi order karte hain lekin samay par shaktiyaan haazar nahin hoteen, ‘ji-haazar’nahin hoti। iska kaaran kya? kaaran hai-jo bachche sarvashaktivaan baap, jisko hazoor bhi kehte hain, haazar-naazar bhi kehte hain-to jo bachche hazoor arthaat baap ke har kadam ki shreemat par, har samay ‘ji-haazar’va har aagya mein ‘ji-haazar’practical mein karte hain,to ‘ji-haazar’karne vaale ke aage har shakti bhi ‘ji-haazar’va ‘ji master hazoor’karti hai।

agar koi aatmaayen shreemat va aagya jo sahaj paalan kar sakte hain woh karte hain aur jo mushkil lagti hai woh nahin kar sakte-kuchh kiya,kuchh nahin kiya, kabhi ‘ji-haazar’, kabhi‘haazar’-iska pratyaksha saboot va pratyaksha pramaan roop hai ki aisi aatmaon ke aage sarva shaktiyaan bhi samay pramaan haazar nahin hoti hain। jaise-koi paristhiti pramaan samaane ki shakti chaahiye to sankalp karenge ki ham avashya samaane ki shakti dvaara is paristhiti ko paar karenge,vijayi banenge। lekin hota kya hai? second number vaale arthaat kabhi-kabhi vaale samaane ki shakti ka prayog karenge-10baar samaayenge lekin samaate hue bhi ek-do baar samaane chaahte bhi sama nahin sakenge। phir kya sochte hain? mainne kisko nahin sunaaya, mainne samaaya lekin yeh saath vaale the, hamaare sahayogi the, sameep the-isko sirf ishaara diya। sunaaya nahin,ishaara diya। koi shabd bolne nahin chaahte the,sirf ek-aadha shabd nikal gaya। to isko kya kaha jaayega? samaana kahenge? 10ke aage to samaaya aur ek-do ke aage sama nahin sakte,to isko kya kahenge?samaane ki shakti ne order maana?jabki apni shakti hai, baap ne varse mein diya hai, to baap ka varsa so bachchon ka varsa ho jaata। apni shakti apne kaam mein na aaye to isko kya kaha jaayega?order maanne vaale ya order na maanne vaale kaha jaayega?

aaj baapdaada sarva brahman aatmaon ko dekh rahe the ki kahaan tak sarva shaktiyon ke adhikaari bane hain। agar adhikaari nahin bane, to us samay paristhiti ke adheen banna pade। baapdaada ko sabse jyaada raham us samay aata hai jab bachche koi bhi shakti ko samay par kaarya mein nahin laga sakte hain। us samay kya karte hain?jab koi baat saamna karti to baap ke saamne kis roop mein aate hain? gyaani-bhakta ke roop mein aate hain। bhakta kya karte hain?bhakta sirf pukaar karte rehte ki yeh de do। bhaagte baap ke paas hain,adhikaar baap par rakhte hain lekin roop hota hai royal bhakta ka। aur jahaan adhikaari ke bajaae gyaani-bhakta athva royal bhakta ke roop mein aate hain,to jab tak bhakti ka ansh hai, to bhakti ka phal sadgati arthaat saphalta, sadgati arthaat vijay nahin praapta kar sakte। kyonki jahaan bhakti ka ansh rah jaata vahaan bhakti ka phal gyaan arthaat sarva praapti nahin ho sakti, saphalta nahin mil sakti। bhakti arthaat mehnat aur gyaan arthaat muhabbat। agar bhakti ka ansh hai to mehnat zaroor karni padti aur bhakti ki rasma-rivaaj hai ki jab bheed padegi tab bhagwan yaad aayega, nahin to albele rahenge। gyaani-bhakta bhi kya karte hain? jab koi vighna aayega to vishesh yaad karenge।

ek hai-seva prati yaad mein baithna aur doosra hai-sva ki kamjori ko bharne liye yaad mein baithna। donon mein antar hai। jaise-abhi bhi vishwa par ashaanti ka vaayumandal hai to seva prati sangathit roop mein vishesh yaad ke programme banaate ho,woh alag baat hai। woh to daata ban dene ke liye karte ho। woh maangane ke liye nahin karte ho, auron ko dene ke liye karte ho। to woh hua seva prati। lekin apni kamjori bharne ke prati samay par vishesh yaad karte ho aur vaise albelepan ki yaad hoti hai। yaad hoti hai,bhoolte nahin ho lekin albelepan ki yaad aati hai-ham to hain hi baba ke, aur hai hi kaun। lekin yathaartha shaktishaali yaad ka pratyaksha-pramaan samay pramaan shakti haazar ho jaae। kitna bhi koi kahe-main to yaad mein rehti hi hoon va rehta hi hoon, lekin yaad ka swaroop hai saph-lata। aise nahin-jis samay yaad mein baithte us samay khushi bhi anubhav hoti,shakti bhi anubhav hoti aur jab karma mein,sambandh-samparka mein aate us samay sada saphalta nahin hoti। to usko karmayogi nahin kaha jaayega। shaktiyaan shastra hain aur shastra kis samay ke liye hota hai? shastra sada samay par kaam mein laaya jaata hai।

yathaartha yaad arthaat sarva shakti sampanna। sada shaktishaali shastra ho। paristhiti roopi dushman aaya aur shastra kaam mein nahin aaye,to isko kya kaha jaayega? shaktishaali ya shastra dhaari kahenge?har karma mein yaad arthaat saphalta ho। isko kaha jaata hai karmayogi। sirf baithne ke time ke yogi nahin ho। aapke yog ka naam baitha-baitha yogi hai ya karmayogi naam hai? karmayogi ho na। nirantar karma hai aur nirantar karmayogi ho। jaise karma ke bina ek second bhi rah nahin sakte, chaahe soye hue ho-to woh bhi sone ka karma kar rahe ho na। to jaise karma ke bina rah nahin sakte vaise har karma yog ke bina kar nahin sakte। isko kaha jaata hai karmayogi। aise nahin samjho ki baat hi aisi thi na, circumstance hi aise the, samasya hi aisi thi, vaayumandal aisa tha। yahi to dushman hai aur us samay kaho-dushman aa gaya, isliye talvaar chala na sake, talvaar kaam mein laga nahin sake, ya talvaar yaad hi nahin aaye, ya talvaar ne kaam nahin kiya-to aise ko kya kaha jaayega?shastra dhaari?shakti-sena ho। to sena ki shakti kya hoti hai? shastra । aur shastra hain sarva shaktiyaan। to result kya dekha? majority sada samay par sarva shaktiyon ko order par chala saken-ismen kami dikhaai di। samajhte bhi hain lekin saphalta-swaroop mein samay pramaan ya to shaktiheen ban jaate hain ya thoda-sa asphalta ka anubhav kar phauran saphalta ki or chal padte hain। teen prakaar ke dekhe।

ek-usi samay dimaag dvaara samajhte hain ki yeh theek nahin hai, nahin karna chaahiye lekin us samajh ko shaktisvaroop mein badal nahin sakte।

doosre hain-jo samajhte bhi hain lekin samajhte hue bhi samay va samasya poori hone ke baad sochte hain। woh thode samay mein sochte hain,woh poora hone ke baad sochte।

teesre-mahsoos hi nahin karte ki yeh wrong hai,sada apne wrong ko right hi siddha karte hain। arthaat satyata ki mahsoosta-shakti nahin। to apne ko check karo ki main kaun hoon?

baapdaada ne dekha ki vartamaan samay ke pramaan sada aur sahaj saphalta kin bachchon ne praapta ki hai। usmein bhi antar hai। ek hain sahaj saphalta praapta karne vaale aur doosre hain mehnat aur sahaj-donon ke baad saphalta paane vaale। jo sahaj aur sada saphalta praapta karte hain unka mool aadhaar kya dekha? jo aatmaayen sada svayan ko nirmaanchit ki visheshta se chalaate rehte hain, vahi sahaj saphalta ko praapta hote aaye hain। ‘nirmaan’shabd ek hai lekin nirmaan-sthiti ka vistaar aur nirmaan-sthiti ke samay pramaan prakaar… woh bahut hain। us par phir koi samay sunaayenge। lekin yeh yaad rakhna ki nirmaan banna hi svamaan hai aur sarva dvaara maan praapta karne ka sahaj saadhan hai। nirmaan banna jhukna nahin hai lekin sarva ko apni visheshta aur pyaar mein jhukaana hai। samjha?

sabhi ne result suni। samay aapka intazaar kar raha hai aur aap kya kar rahe ho? aap samay ka intajaar kar rahe ho? maalik ke baalak ho na। to samay aapka intazaar kar raha hai ki ye mere maalik mujh samay ko parivartan karenge। woh intajaar kar raha hai aur aapko intajaam karna hai, intajaar nahin karna hai। sarva ko sandesh dene ka aur samay ko sampanna banaane ka intajaam karna hai। jab donon kaarya sampanna hon tab samay ka intajaar poora ho। to aisa intajaam sab kar rahe ho? kis gati se? samay ko dekh aap bhi kehte ho ki bahut fast samay beet raha hai। itne varsha kaise poore ho gaye-sochte ho na! avyakt baap ki paalna ko bhi 25varsha hone ko ho gaye। kitna fast samay chala! to aapki gati kya hai?fast hai?ya fast chalkar kabhi-kabhi thak jaate ho,phir rest karte ho? kar rahe hain-yeh to drama ke bandhan mein bandhe hue hi ho। lekin gati kya hai, isko check karo। seva ho rahi hai, purooshaartha ho raha hai, aage badh rahe hain-yeh to theek hai। to ab gati ko check karo, sirf chalne ko check nahin karo। gati ko check karo,speed ko check karo। samjha?sabhi apna kaam kar rahe ho na। achha!

chaaron or ke sada baap ke aage ‘ji-haazar’karne vaale,sada master sarvashaktivaan ban sarva shaktiyon ko svayan ke order mein chalaane vaale,sarva shaktiyaan ‘ji-haazar’ka part bajaane vaali-aise sada saphaltaamoorta aatmaayen, sada har karma mein yaad ka swaroop anubhav karne vaale aur karaane vaale-aise anubhvi aatmaon ko sada har karma mein, sambandh mein, samparka mein nirmaan ban vijayi-ratna banne vaale, aise sahaj saphaltaamoorta shreshtha bachchon ko baapdaada ka yaadapyaar aur namaste।

avyakt baapdaada ki personal mulaakaat

group nan.1

saadhaaran karma mein bhi oonchi sthiti ki jhalak dikhaana hi follow father karna hai

sada sangamayugi purooshottam aatma hain-aise anubhav karte ho?sangamayug ka naam hi hai purooshottam। arthaat purooshon se uttam puroosh banaane vaala yug। to sangamayugi ho?aap sabhi purooshottam bane ho na। aatma puroosh hai aur shareer prakriti hai। to purooshottam arthaat uttam aatma hoon। sabse number one purooshottam kaun hai? (brahma baba) iseelie brahma ko aadi dev kaha jaata hai। ‘pharishta brahma’ bhi uttam ho gaya aur phir bhavishya mein dev aatma banne ke kaaran purooshottam ban jaate। lakshmi-naaraayan ko bhi purooshottam kahenge na। to purooshottam yug hai, purooshottam main aatma hoon। purooshottam aatmaon ka kartavya bhi sarvashreshtha hai। utha, khaaya-peeya,kaam kiya-yeh saadhaaran karma nahin, saadhaaran karma karte bhi shreshtha smriti, shreshtha sthiti ho। jo dekhte hi mahsoos kare ki yeh koi saadhaaran vyakti nahin hain। jaise-jo asli heera hoga woh kitna bhi dhool mein chhipa hua ho lekin apni chamak zaroor dikhaayega, chhip nahin sakta। to aapki jeevan heere tulya hai na।

kaise bhi vaataavran mein hon, kaise bhi sangathan mein hon lekin jaise heera apni chamak chhipa nahin sakta, aise purooshottam aatmaon ki shreshtha jhalak sabko anubhav honi chaahiye। to aise hai ya daphtar mein jaakar,kaam mein jaakar aap bhi vaise hi saadhaaran ho jaate ho? abhi gupta mein ho,kaam bhi saadhaaran hai। iseelie paandavon ko gupta roop mein dikhaaya hai। gupta roop mein raajaai nahin ki,seva ki। to doosron ke raajya mein government-servant kahlaate ho na। chaahe kitna bhi bada officer ho lekin servant hi hai na। to gupta roop mein aap sab seva-dhaari ho lekin sevaadhaari hote bhi purooshottam ho। to woh jhalak aur phalak dikhaai de।

jaise brahma baap saadhaaran tan mein hote bhi purooshottam anubhav hota tha। sabhi ne suna hai na। dekha hai ya suna hai? abhi bhi avyakt roop mein bhi dekhte ho-saadhaaran mein purooshottam ki jhalak hai! to follow father hai na। aise nahin-saadhaaran kaam kar rahe hain। maataayen khaana bana rahi hain,kapde dhulaai kar rahi hain-kaam saadhaaran ho lekin sthiti saadhaaran nahin,sthiti mahaan ho। aise hai? ya saadhaaran kaam karte saadhaaran ban jaate hain?jaise doosre,vaise ham-nahin। chehre par vo shreshtha jeevan ka prabhaav hona chaahiye। yeh chehra hi darpan hai na। isi se hi aapki sthiti ko dekh sakte hain। mahaan hain ya saadhaaran hain-yeh isi chehre ke darpan se dekh sakte hain। svayan bhi dekh sakte ho aur doosre bhi dekh sakte hain। to aise anubhav karte ho? sadaiv smriti aur sthiti shreshtha ho। sthiti shreshtha hai to jhalak automatically shreshtha hogi।

jo samaan sthiti vaale hain ve sada baap ke saath rehte hain। shareer se chaahe kisi kone mein baithe hon,kinaare baithe hon, peechhe baithe hon lekin man ki sthiti mein saath rehte ho na। saath vahi rahenge jo samaan honge। sthool mein chaahe saamne bhi baithe hon lekin samaan nahin to sada saath nahin rehte,kinaare mein rehte hain। to sameep rehna arthaat samaan sthiti banaana। isliye sada brahma baap samaan purooshottam sthiti mein sthit raho। kai bachchon ki chalan aur chehra laukik reeti mein bhi baap samaan hota hai to kehte hain-yeh to jaise baap jaisa hai। to yahaan chehre ki baat to nahin lekin chalan hi chitra hai। to har chalan se baap ka anubhav ho-isko kehte hain baap samaan। to sameep rehna chaahte ho ya door? is ek janma mein sangam par sthiti mein jo sameep rehta hai,woh paramdham mein bhi sameep hai aur raajdhaani mein bhi sameep hai। ek janma ki sameepta anek janma sameep bana degi।

har karma ko check karo। baap samaan hai to karo, nahin to change kar do। pahle check karo, phir karo। aise nahin-karne ke baad check karo ki yeh theek nahin tha। gyaani ka lakshan hai-pahle soche, phir kare। agyaani ka lakshan hai-karke phir sochte। to aap ‘‘gyaani tu aatma’’ ho na। ya kabhi-kabhi bhakta ban jaate ho?panjaab vaale to bahaadur hain na। man se bhi bahaadur। chhoti-si maaya cheenti ke roop mein aaye aur ghabra jaayen-nahin। challenge karne vaale। student kabhi paper se ghabraate hain?to aap bahaadur ho ya chhote se paper mein bhi ghabraane vaale ho? jo yogya student hote hain vo aahvaan karte hain ki jaldi se paper ho aur class aage badhe। jo kamjor hote hain vo sochte hain-date aage badhe। aap to hoshiyaar ho na।

yeh nishchay pakka ho ki ham hi kalpa-kalpa ke vijayi hain aur ham hi baar-baar banenge। itna purooshaartha kiya hai? aap nahin banenge to kaun banenge?aap hi vijayi bane the, vijayi bane hain aur vijayi rahenge। ‘vijayi’shabd bolne se hi kitni khushi hoti hai! chehra badal jaata hai na। jo sada vijayi rehte vo kitna khush rehte hain! iseelie jab bhi koi kisi bhi kshetra mein vijay praapta karta hai to khushi ke baaje bajte hain। aapke to sada hi baaje bajte hain। kabhi bhi khushi ke baaje banda na hon। aadha kalpa ke liye rona banda ho gaya। jahaan khushi ke baaje bajte hain vahaan rona nahin hota। achha!

group nan.2

yathaartha nirnay ka aadhaar-nishchaybuddhi aur nishchint sthiti

sada apne ko vijayi ratna anubhav karte ho?sada vijayi banne ka sahaj saadhan kya hai?sada vijayi banne ka sahaj saadhan hai-ek bal ek bharosa। ek mein bharosa aur usi ek bharose se ek bal milta hai। nishchay sada hi nishchint banaata hai। agar koi samajhte hain ki mujhe nishchay hai, to uski nishaani hai ki vo sada nishchint hoga aur nishchint sthiti se jo bhi kaarya karega usmein zaroor saphal hoga। jab nishchint hote hain to buddhi judgement yathaartha karti hai। agar koi chinta hogi,phikra hoga,halchal hogi to kabhi judgement theek nahin hogi। taraaju dekha hai na। taraaju ki yathaartha taul tab hoti hai jab taraaju mein halchal nahin ho। agar halchal hogi to yathaartha nahin kaha jaayega। aise hi, buddhi mein agar halchal hai, phikra hai, chinta hai to halchal zaroor hogi।

iseelie yathaartha nirnay ka aadhaar hai-nishchaybuddhi,nishchint। sochne ki bhi aavashyakta nahin। kyonki follow father hai na। yeh karoon,woh karoon…-ye tab soche jab apna kuchh karna ho। follow karna hai na। to follow karne ke liye sochne ki aavashyakta nahin। kadam par kadam rakhna। kadam hai shreemat। jo shreemat mili hai usi pramaan chalna arthaat kadam par kadam rakhna। to sochne ki aavashyakta hai kya? nahin hai na। nishchint hain to sada hi nirnay yathaartha denge। jab nirnay yathaartha hoga to vijayi honge। nirnay theek nahin hota to zaroor halchal hai। jab bhi koi halchal ho to socho ki brahma baap ne kya kiya?kyonki brahma baap karma ka sample hai। brahma baap ne har kadam shreemat par uthaaye। to follow father। sirf follow hi karna hai, koi naya raasta nahin nikaalna hai, sochna nahin hai। jab manmat mix karte ho tab mushkil hota hai। ek-mushkil hoga, doosra-asphal। mehnat to ki hai na। gaanv mein kheti ka kaam karte hain to mehnat karte hain। yahaan to mehnat nahin karni hai। sahaj pasanda hai ya mehnat? mehnat karke, anubhav karke dekh liya।

ab baap kehte hain-mehnat chhod mohabbat mein raho, lavleen raho। jo lav mein leen hota hai usko mehnat nahin karni padti hai। brahman maana mauj, brahman maana mehnat nahin। baap ne kaha aur bachchon ne kiya-ismen mehnat ki kya baat hai! bachchon ka kaam hai karna, sochna nahin। sahaj yogi ho na। sada vijayi ratna ho na। yeh roohaani nishchay chaahiye ki ham nahin banenge to kaun banenge! itna atal nishchay ho। jab follow father kar rahe ho to kaun banenge। vahi banenge na। nishchay to nishchay hi hua na। agar nishchay mein 10%, 20% kam hua to nishchay nahin kahenge।

jo sada vijayi hai usi ko hi bephikra baadshaah kaha jaata hai। jo abhi baadshaah banta hai vo hi bhavishya mein baadshaah banenge। abhi bephikra baadshaah nahin to bhavishya mein bhi nahin। to raaja banne vaale ho ya auron ko raajya karte hue dekhenge? svaraajya hai to vishwa-raajya hai। aise adhikaari ho?adheen to nahin hote-kya karen, sanskaar pakka hai? aise to nahin-chaahte nahin lekin ho jaata hai? isko kahenge adheen। to kabhi adheen to nahin ho jaate? krodh karna to nahin chaahte lekin aa jaata hai। chaahte nahin hain lekin maj-boor ho jaate hain। nahin। adhikaari ban gaye to adheenta samaapta hui। jaise chaahen,jo chaahen woh kar sakte hain। adhikaari ke sankalp mein yeh kabhi nahin aayega ki-’’chaahte nahin hain, ho jaata hai, purooshaartha kar rahe hain,ho jaayega।’’isse siddha hai ki adheen hain। jo adheen hoga woh adhikaari nahin। jo adhikaari hoga vo adheen nahin। ya raat hogi ya din hoga। donon ikatthe nahin। ‘adhikaar’aur ‘adheenta’-donon ikatthe nahin chal sakte। maataayen adhikaari ban gai?logon ne kahaan phenk diya aur baap ne kahaan rakh diya! logon ne paanv ki jutti bana diya aur baap ne sir ka taaj banaaya। khushi hai na। kahaan jooti, kahaan taaj-kitna pharka hai! abhi to shaktisvaroop ban gaye। paandav bhi shaktiroop mein dekhte hain na। shiv shakti bhi vijayi hain to paandav bhi vijayi hain। avinaashi nishchay, avinaashi nasha hai to sada hi vijay nishchit hai। achha!

group nan.3

sada tandaroosta rahne ke liye roj khushi ki khuraak khaaiye

sabhi apne ko khushanseeb aatmaayen anubhav karte ho?jo khushanseeb aatmaayen hain unke man mein sada khushi ke geet bajte hain।‘‘vaah mera shreshtha bhaagya!’’-yeh geet bajta hai na। yeh khushi ka geet gaana to sabhi ko aata hai na। chaahe boodha ho, chaahe bachcha ho, chaahe javaan ho-sabhi gaate hain। aur man mein hai hi kya jo chale। yahi khushi ke geet bajenge na। aur sab baaten khatma ho gai। bas, baap aur main, teesra na koi। jab aisi sthiti ban jaati hai tab khushi ke geet bajte hain-’’vaah baba vaah, vaah mera bhaagya vaah!’’ vaise bhi gaaya hua hai-’khushi’sabse badi khuraak hai, khushi jaisi aur koi khuraak nahin। jo khushi ki khuraak khaane vaale hain vo sada tandurusta rahenge, healthy rahenge, kabhi kamjor nahin honge। jo achhi khuraak khaate hain vo shareer se kamjor nahin hote hain। khushi hai man ki khuraak। man kabhi kamjor nahin hoga, sada shaktishaali। man aur buddhi sada shaktishaali hain to sthiti shaktishaali hogi। aisi shaktishaali sthiti vaale sada hi achal-adol rahenge। to khushi ki khuraak khaate ho? ya kabhi khaate ho, kabhi bhool jaate ho?aise hota hai na। shareer ke liye bhi taakat ki cheejen dete hain to kabhi khaate hain, kabhi bhool jaate hain। yeh khuraak kis samay khaate ho?kabhi khaao, kabhi na khaao-aise to nahin hai।

sabse badi khushi ki baat hai-baap ne apna bana liya! duniya vaale tadapte hain ki bhagwan ki ek second bhi nazar pad jaaye aur aap sada naynon mein samaaye hue ho! vo to ek ghadi ki nazar kehte hain aur aap rehte hi baap ki nazron mein ho। iseelie title hai-noore ratna aankhon ke noor। to ve tadapte hain aur aap sama gaye। isko kaha jaata hai khushanseeb। socha nahin tha lekin ban gaye। apna naseeb dekhkar ke nashe mein rehte ho na। vaah-vaah! abhi ‘haay-haay’to nahin karte na। kabhi ‘haay-haay’ karte ho? thoda bhi duhkh ki lahar anubhav hui arthaat ‘haay-haay’hui। ‘‘haay! yeh hona nahin chaahiye, aise ho gaya…’’-kabhi duhkh ki lahar aati hai? sukhdaata ke bachche ko duhkh kahaan se aaya? saagar ke bachche ho aur paani sookh jaae to use kya kahenge?duhkh ki lahar samaapta hui?kabhi tan ka,kabhi dhan ka,kabhi beemaari ka duhkh hota hai? kabhi potre-dhotre beemaar ho jaae,kabhi kheti mein nuksaan ho jaae-to duhkh hoga?

sada yeh smriti mein rahe ki ham sukhdaata ke bachche master sukhdaata hain। jo daata hai,uske paas hai tabhi to dega na। to itna hai jo master daata bano? jiske paas apne khaane ke liye hi nahin ho woh daata kaise banega। isliye jaisa baap vaise bachche। baap ko saagar kehte hain। saagar arthaat behad,khutta nahin। kitna bhi saagar ko sukhaate hain,khutta nahin। to aap bhi master saagar ho, nadi-naale nahin। bhaagyavidhaata baap ban gaya। to baap ke paas jo hai woh bachchon ka hai। bhaagya aapka varsa hai। varsa sambhaalne aata hai? ya ganvaane vaale ho? kai bachchon ko sambhaalna nahin aata to khatma kar dete hain aur kaiyon ko sambhaalna achha aata hai to badha dete hain। aap kaun ho?badhaane vaale। aisa bhaagya saare kalpa mein abhi milta hai। to aisi amoolya cheez badhaani hai,na ki ganvaani hai। badhaane ka saadhan hai-baantana।

jitna auron ko bhaagyavaan banaayenge arthaat bhaagya baantenge utna bhaagya badhta jaayega। gaayan hai na-jab brahma ne bhaagya baanta to soye hue the kya? to brahma ne bhaagya baanta aur brahmaakumaar-kumaari kya karte? bhaagya baantate ho na। jitna baantenge utna badhega। doosra dhan kharcha karne se kam hota hai aur yeh bhaagya jitna kharchenge utna badhega। paandav to kamaane mein hoshiyaar hote hain। kyonki jaante ho ki ek janma jama ka hai aur anek janma khaane ke hain। satayug mein kamaai karenge kya? aaraam se khaate rahenge। ek janma ka purooshaartha aur anek janma ki praalabdha। to janma-janma ke liye isi ek janma mein ikaththa karna hai। achha! sabhi santushta ho na। brahman jeevan mein agar santushta nahin rahe to kab rahenge। abhi hi santushtata ka maja hai। brahman jeevan ka lakshan hi hai santushta rehna। santushta hain to khush hain,agar santushta nahin to khush nahin। achha!

group nan.4

drama ke gyaan ki smriti har vighna ko ‘nothing-new’kar degi

apne ko sada vighna-vinaashak aatma anubhav karte ho? ya vighna aaye to ghabraane vaale ho? vighna-vinaashak aatma sada hi sarva shaktiyon se sampanna hoti hai। vighnon ke vash hone vaale nahin,vighna-vinaashak। kabhi vighnon ka thoda prabhaav padta hai? kabhi bhi kisi bhi prakaar ka vighna aata hai to smriti rakho ki-vighna ka kaam hai aana aur hamaara kaam hai vighna-vinaashak banna। jab naam hai vighna-vinaashak,to jab vighna aayega tab to vinaash karenge na। to aise kabhi nahin sochna ki hamaare paas yeh vighna kyon aata hai? vighna aana hi hai aur humein vijayi banna hai। to vighna-vinaashak aatma kabhi vighna se na ghabraati hai, na haar khaati hai। aisi himmat hai? kyonki jitni himmat rakhte hain, ek guna bachchon ki himmat aur hajaar guna baap ki madad। to jab itni baap ki madad hai to vighna kya mushkil hoga? isliye kitna bhi bada vighna ho lekin anubhav kya hota hai?vighna nahin hai lekin khel hai। to khel mein kabhi ghabraaya jaata hai kya? khel karne mein khushi hoti hai na! aise khel samajhne se ghabraayenge nahin lekin khushi-khushi se vijayi banenge। sada drama ke gyaan ki smriti se har vighna ko ‘nothing new’ samjhega। nai baat nahin,bahut puraani hai।

kitne baar vijayi bane ho? (anek baar) yaad hai ya aise hi kehte ho? suna hai ki drama repeat hota hai,iseelie kehte ho ya samajhte ho anek baar kiya hai?agar drama ki point buddhi mein clear hai ki hu-ba-hu repeat hota hai, to us nishchay ke pramaan hu-ba-hu jab repeat hota hai,to anek baar repeat hua hai aur ab repeat kar rahe hain। lekin nishchay ki baat hai। agle kalpa mein aur koi vijayi bane aur is kalpa mein aap vijayi bano-yeh ho nahin sakta। kyonki jab bana-banaaya drama kehte hain, to bana hua hai aur bana rahe hain arthaat repeat kar rahe hain। aisa nishchaybuddhi achal-adol rehta hai।

achalghar kiska yaadgaar hai? gyaan ke raazon mein jo achal rehta hai uska yaadgaar achalghar hai। to yeh nasha rehta hai na ki ham practical mein apna yaadgaar dekh rahe hain। jo sada vighna-vinaashak sthiti mein sthit rehta hai woh sada hi double light rehta hai। koi bojh hai?sab-kuchh tera kar liya hai?ki aadha tera,aadha mera? 75% baap ka, 25% mera? kabhi tera kah do,aur jab matlab ho to mera kah do? mera-mera kehte to anubhav kar liya, kya mila? tera kahne se bharpoor ho jaayenge। mera-mera kahenge to khaali ho jaayenge। sada double light arthaat sab-kuchh tera। jara bhi agar moh hai to mera hai। tera arthaat nirmohi।

group nan.5

sab-kuchh samarpit kar ever ready bano

sabhi apne ko har kadam mein padmon ki kamaai jama karne vaale samajhte ho?kitna jama kiya hai? arab,kharab-kitna jama kiya hai?hisaab kar sakte ho? aajkal ka computer hisaab kar sakta hai? to saare kalpa mein aur saare world mein aisa saahookaar koi hoga? aap sabhi ho? ya koi kam ho, koi jyaada ho? sabhi bharpoor ho? sadaiv ye nasha rahe ki har kadam mein padmon ki kamaai karne vaali aatma hoon। laukik duniya mein kehte hain ki itna kama kar ikaththa karen jo vansh ke vansh khaate rahen। to aapki kitni generation (peedhiyaan) khaati rahengi?ek janma mein anek janmon ki kamaai jama kar li hai aur anek janma aaraam se khaate rahenge। satayug mein amritvele uthkar yog lagaayenge? yog ki siddhi praapta karenge। jaise-padhaai tab tak padhi jaati hai jab tak paas nahin ho jaate। to anek janmon jitna jama kiya hai?kabhi bhi vinaash ho jaaye to aapka jama rahega na। ya kahenge-thoda samay mile to aur kar len? abhi aur time chaahiye?ever ready ho?aap yahaan aaye ho aur yahin vinaash shuru ho jaae to centre ya centre ka saamaan yaad aayega? kuchh yaad nahin aayega। itne bephikra baadshaah bane ho na! jab deh bhi apni nahin to aur kya apna hai! tan, man,dhan-sab de diya na! jab sankalp kiya ki sab-kuchh tera,to ever ready ho gaye na। sabhi ne dridh sankalp kar liya hai ki main baap ki aur baap mera। sankalp kiya ya dridh sankalp kiya?koi phikra nahin hai। koi aisi khabar aa jaaye to phikra hoga? flat yaad nahin aayega? achha hai, pakke hain। jab brahman banna hi hai to pakka banna hai,kachcha banne se kya phaayda! jeete-ji mar gaye ki thoda-thoda shvaans chalta hai? kahaan shvaans chhip to nahin gaya hai?

dekho,baap ka bachchon se pyaar hai। to pyaar ki nishaani kya hoti hai? pyaar ki nishaani hai-jisse pyaar hota hai us par sab nyauchhaavar kar dete hain। to baap ne sab varsa aapko de diya na! kuchh apne liye rakha hai? aur dekho, aisa koi pyaar nahin kar sakta jo roj itna pyaar ka patra likhe। roj yaad-pyaar milta hai na। to bachchon ka pyaar hai tab baap pyaar ka respond dete hain। aapka bhi itna hi pyaar hai na। ki baap se bhi jyaada pyaar hai? pyaar ki aur nishaani hai ki-jisse pyaar hoga usse kabhi alag nahin honge। to baap bachchon ko kabhi alag nahin karta,sada saath hai aur sada saath rahenge। aur koi hai hi nahin jiska saath pakdo। baap samaan banne ka purooshaartha fast gati se kar rahe ho na। sameep aane vaale ho na। kaunsi maala mein aane vaale ho? (108) 16108mein aane vaala koi nahin hai?to 108 ki maala double videshiyon ki banni hai? achha hai, lakshya sada shreshtha rakhna hi yathaartha purooshaartha hai।

mansa-seva aur vaacha-seva-donon karte ho ya ek karte ho? double seva karte ho?sahaj kaunsi lagti hai? (kuchh ne mansa seva mein aur kuchh ne vaacha seva mein haath uthaaya, kuchh ne donon mein hi haath uthaaya) donon hi abhyaas zaroori hain। kyonki jaisa samay vaisi seva kar sakenge। to sabhi jagah seva achhi chal rahi hai। videsh mein satayug ke aadi ki jo sankhya hai unmein se kitne taiyaar kiye hain? ek laakh taiyaar hue hain? India8 laakh kare to foreign ek laakh to kare। kab karenge? kitna time chaahiye? abhi sabhi ko samaachaar gaya hai na! ek maas mein ek to kar sakte ho na। ho sakta hai? to 12maas mein kitne ho jaayenge?samay aap maalikon ka intazaar kar raha hai। kam se kam 9 laakh to taiyaar chaahiye na। mansa aur vaacha-double seva se jaldi se jaldi seva ko badhaao। seva ka umang achha rehta hai। lekin sadaiv aage badhte rehna hai। isliye seva ka umang hai aur aage umang ko badhaao। baapdaada bachchon ke purooshaartha ki lagan aur seva ki lagan-donon ko dekh harshit hote hain। isliye bahut fast gati se taiyaar karo।

sabhi udti kala vaali aatmaae ho na। double foreigners majboot hain?ghabraane vaale to nahin ho na! baapdaada sadaiv kehte hain ki double foreigners abhi ek shabd sada ke liye samaapta karo। kaunsa shabd? (kabhi-kabhi) to pheenish (samaapta) kiya?ki abhi bhi‘sam-time’(Sometime;kabhi-kabhi) hai! jab baap ka pyaar sada hai to bachchon ka bhi pyaar sada hai। ya ‘sam-time’hai? to‘sam-time’ shabd khatma hua? kyonki ab se sada khush rahne ka, sada shaktishaali rahne ka abhyaas karenge to bahut samay ka purooshaartha ant mein kaam mein aayega। aise kabhi nahin sochna ki aage chalkar ho jaayenge। sab santushta ho?drishti mili aur vardaan mila-’’sam-time pheenish’’। ‘sada’ shabd ko sada yaad rakhna।

is samay sabhi madhuban nivaasi ho। madhuban nivaasi banna achha lagta hai na। orijinal address (pata) madhuban hai na। ghar hai madhu-ban aur gaye hain seva-sthaan par। saare vishwa ki seva honi hai, isliye alag-alag sthaanon par seva karne ke liye gaye ho। lekin orijinal madhuban nivaasi ho aur aage bhi bhaarat par hi raajya karne vaale ho। bhaarat hi sabse mahaan aur sabse sundar banega।

jo pahli baar aaye hain unhon ko vardaan hai ki sada number pahla lena hai। number one banne ke liye jo har samay win karta hai woh one hota hai। fast gati se udte rehna। taakat hai na। pankh majboot hain?kiske kamjor to nahin hain?gyaan aur yog-ye donon pankh majboot honge to udte rahenge। gyaan arthaat har kadam shreemat par chalne ki samajh। yaad arthaat sada baap ke saath ka anubhav karna। to donon hi pankh majboot hain na। agar kisi bhi prakaar ki kamjori hai to kamjori sahaj ko mushkil kar deti hai aur shakti-shaali hain to mushkil sahaj ho jaayega, asambhav bhi sambhav ho jaayega। itne powerful ho na।

daadiyon se mulaakaat

vartamaan samay kaunsa balance chal raha hai? ek taraph dhamaal, doosre taraph kamaal। kuchh bhi ho lekin kamaal hi ho rahi hai na। har kshetra mein aap log to aage hi badh rahe ho na। to duniya mein hai dhamaal aur aapke paas samaachaaron mein kamaal hai। jitni dhamaal hogi utni aapki kamaal hogi aur pratyaksha hote jaayenge। duniya vaale darte hain aur aap aur hi nirbhay hote hain। nirbhay ho ya dhamaal se darte ho? jitni dhamaal dekhte ho utna yahi sochte hain ki aaj dhamaal hai aur kal hamaari kamaal hui hi padi hai! balance chal raha hai na। dekho, degree bhi mil rahi hai,(daadi ji ko udaypur university se doctorate ki degree milne vaali hai) makaan bhi mil rahe hain। jo asambhav baaten hain vo sambhav ho rahi hain। to yeh kamaal hai na। nimantran bhi mil rahe hain। kuchh samay pahle yeh nahin tha, abhi badh raha hai। to kamaal badh rahi hai na। ye baap brahma dvaara fast gati ki seva ka saboot dikha rahe hain। jo mushkil baaten hoti hain ve samay anusaar aisi sahaj hoti jaayengi jaise hui hi padi hon! isliye aapko bhay nahin hai। sochte ho ki ye kab dhamaal to honi hi hai aur hamaari kamaal bhi honi hi hai। koi darte hain-karphyu laga, ye civil vaar ho rahi hai, kya hoga! darte ho?drama anusaar yeh sabhi aur purooshaartha ko majboot karte hain। achha! aur sab theek hai? (daadi ji ko thodi khaansi hai) tabiyat ka hisaab chuktu kar rahi ho। ek to aayu ke hisaab se bhi hisaab chuktu hota hai aur doosra rahasya yeh hai ki mahaarthiyon ko sab hisaab yahin chuktu karna hai, jara bhi rehna nahin hai। baapdaada ko to khel lagta hai। jab brahma baap ne cross (Cross;paar) kiya to aap sabko bhi cross to karna hi hai। ya to hai yogbal se sahaj cross karna, ya to hai dharmaraaj ke cross (shooli) par chadhna। to ye cross kar rahe hain, isliye cross par nahin chadhenge। achha!

Christmas prati baapdaada ka sandesh

jinhonne bhi Christmas ke,new-year ke card bheje hain-sabhi bachchon ko baapdaada ka padma guna yaad, pyaar sveekaar ho। Christmas ka arth hai bada din। vo bada din manaate hain aur aap sab badi dil vaale ho। to badi dil rakhne vaale jo hote hain vo sada svayan bhi bharpoor rehte hain aur doosron ko bhi bharpoor rakhte hain। to badi dil se bada din manaane vaalon ko mubaarak। ‘Christmas-de’ki gift to baapdaada ne sabhi ko vardaan diye। yeh sabse badi gift hai। blessing yaad hai na। achha!