Avyakt murli du jeudi 18 février 1993

>

18-02-93 om shanti avyakt baapdaadaamdhuban

brahman jeevan ka shvaans-sada umang aur utsaah

sarva bachchon ko shiv jayanti ki mubaarak dete hue avyakt baapdaada bole -

aaj trimoorti shiv baap sarva bachchon ko vishesh tri-sambandh se dekh rahe hain। sabse pahla pyaara sambandh hai-sarva praaptiyon ke maalik vaaris ho, vaaris ke saath eeshvareey vidyaarthi ho, saath-saath har kadam mein follow karne vaale satguru ke pyaare ho। trimoorti shiv baap bachchon ke bhi yeh teen sambandh vishesh roop mein dekh rahe hain। vaise to sarva sambandh nibhaane ki anubhvi aatmaayen ho lekin aaj vishesh teen sambandh dekh rahe hain। yeh teen sambandh sabhi ko pyaare hain। aaj vishesh trimoorti shiv jayanti manaane ke umang se sabhi bhaag-bhaagkar pahunch gaye hain। baap ko mubaarak dene aaye ho va baap se mubaarak lene aaye ho?donon kaam karne aaye ho। jab naam hi hai shiv jayanti va shivraatri,to trimoorti kya siddha karta hai? prajaapita brahma dvaara kya karte hain? aap braahmanon ki rachna rachte hain na। unhon ki phir paalna hoti hai। to trimoorti shabd siddha karta hai ki baap ke saath-saath aap brahman bachche bhi saath hain। akela baap kya karega! isliye baap ki jayanti so aap brahman bachchon ki bhi jayanti। to baap bachchon ko is alaukik divya janma ki va is diamond jayanti ki padmaapadma guna mubaarak de rahe hain। aap sabke mubaarak ke patra, card baap ke paas pahunch hi gaye aur abhi bhi kai bachche dil se mubaarak ke geet ga rahe hain-chaahe door hain,chaahe sammukh hain। door vaalon ke bhi mubaarak ke geet kaanon mein sunaai de rahe hain। return mein baapdaada bhi desh-videsh ke sarva bachchon ko padma-padma badhaaiyaan de rahe hain।

yeh to sabhi bachche jaante hi ho ki brahman jeevan mein koi bhi utsav manaana arthaat sada umang-utsaah bhari jeevan banaana। braahmanon ki alaukik dictionary mein manaane ka arth hai banna। to sirf aaj utsav manaayenge va sada utsaah bhari jeevan banaayenge?jaise is sthool shareer mein shvaans hai to jeevan hai। agar shvaans khatma ho gaya to jeevan kya hogi? khatma। aise brahman jeevan ka shvaans hai-sada umang aur utsaah। brahman jeevan mein har second umang-utsaah nahin to brahman jeevan nahin। shvaans ki gati bhi normal (saamaanya) honi chaahiye। agar shvaans ki gati bahut tej ho jaae-to bhi jeevan yathaartha nahin aur slow ho jaae-to bhi yathaartha jeevan nahin kahi jaayegi। high pressure ya lo pressure ho jaata hai na। to isko normal jeevan nahin kaha jaata। to yahaan bhi check karo ki-’’mujh brahman jeevan ke umang-utsaah ki gati normal hai? ya kabhi bahut fast,kabhi bahut slow ho jaati?ekras rehti hai?’’ ekras hona chaahiye na। kabhi bahut,kabhi kam-yeh to achha nahin hai na। isliye sangamayug ki har ghadi utsav hai। yeh to vishesh manoranjan ke liye manaate hain। kyonki brahman jeevan mein aur kahaan jaakar manoranjan manaayenge! yahaan hi to manaayenge na! kahaan vishesh saagar ke kinaare par ya bageeche mein ya club mein to nahin jaayenge na। yahaan hi saagar ka kinaara bhi hai, bageecha bhi hai to club bhi hai। yeh brahman club achhi hai na! to brahman jeevan ka shvaans hai-umang-utsaah। shvaans ki gati theek hai na। ki kabhi neeche-oopar ho jaati hai?baapdaada har ek bachche ko check karte rehte hain। ye kaan mein lagaakar check nahin karna padta। aajkal to science ne bhi sab automatic nikaale hain।

to shiv jayanti va shivraatri donon ke rahasya ko achhi tarah se jaan gaye ho na! donon hi rahasya svayan bhi jaan gaye ho aur doosron ko bhi spashta suna sakte hain। kyonki baap ki jayanti ke saath aapki bhi hai। apne birth-de (janma-din) ka rahasya to suna sakte ho na! yaadgaar to bhakta log bhi badi bhaavna se manaate hain। lekin antar yeh hai ki woh shivraatri par har saal vrat rakhte hain aur aap to picnic karte ho। kyonki aap sab ne janmate hi sadaakaal ke liye arthaat sampoorn brahman jeevan ke liye ek baar vrat dhaaran kar liya,isliye baar-baar nahin karna padta। unhon ko har saal vrat rakhna padta hai। aap sabhi brahman aatmaon ne janma lete hi yeh vrat le liya ki ham sada baap samaan sampanna aur sampoorn rahenge। yeh pakka vrat liya hai ya thoda kachcha…?jab aatma aur parmaaatma ka sambandh avinaashi hai to vrat bhi avinaashi hai na। duniya vaale sirf khaan-paan ka vrat rakhte hain। isse bhi kya siddha hota hai? aapne brahman jeevan mein sada ke liye khaan-paan ka bhi vrat liya hai na। ki yeh free hai-khaana-peena jo bhi chaahe kha lo? pakka vrat hai va ‘‘kabhi-kabhi thak jaao to vrat tod do? kabhi time nahin milta to kya banaayen, kuchh bhi mangaakar kha leven?’’ thoda-thoda dheela karte ho?dekho, aapke bhakta vrat rakh rahe hain। chaahe saal mein ek baar bhi rakhte hain lekin maryaada ko paalan to kar rahe hain na। to jab aapke bhakta vrat mein pakke hain, to aap kitne pakke ho? pakke ho? kabhi-kabhi thoda dheela kar dete ho-chalo,kal bhog laga denge, aaj nahin lagaate। yeh bhi aap brahman aatmaon ki jeevan ke behad ke vrat ke yaadgaar bane hue hain।

vishesh is din pavitrata ka bhi vrat rakhte hain। ek-pavitrata ka vrat rakhte;doosra-khaan-paan ka vrat rakhte;teesra-saara din kisi ko bhi kisi prakaar ka duhkh ya dhokha nahin denge-yeh bhi vrat rakhte hain। lekin aap ka is brahman jeevan ka vrat behad ka hai,unhon ka ek din ka hai। pavitrata ka vrat to brahman janma se hi dhaaran kar liya hai na! sirf brahmacharya nahin lekin paanchon hi vikaaron par vijay ho-isko kehte hain pavitrata ka vrat। to socho ki pavitrata ke vrat mein kahaan tak saphal hue hain? jaise brahmacharya arthaat kaam mahaashatru ko jeetne ke liye vishesh attention mein rehte ho, aise hi aur bhi chaar saathi jo kaam mahaashatru ke hain, unka bhi itna hi attention rehta hai? ki uske liye chhutti hai-thoda-thoda krodh bhal kar lo?chhutti hai nahin, lekin apne aapko chhutti de dete ho। dekha gaya hai ki krodh ke baal-bachche jo hain unko chhutti de di hai। krodh mahaabhoot ko to bhagaaya hai lekin uske jo baal-bachche hain unse thodi preet abhi bhi rakhi hai। jaise chhote bachche achhe lagte hain na। to yeh krodh ke chhote bachche kabhi-kabhi pyaare lagte hain! vrat arthaat sampoorn pavitrata ka vrat। kai bachche bahut achhi-achhi baaten sunaate hain। kehte hain-’’krodh aaya nahin lekin krodh dilaaya gaya,to kya karen? mere ko nahin aaya lekin doosra dilaata hai।’’bahut ma॰je ki baaten karte hain। kehte hain-aap bhi us samay hote to aapko bhi aa jaata। to baapdaada kya kahenge? baapdaada bhi kehte-achha,tumko maaph kar diya, lekin aage phir nahin karna।

shivraatri ka arth hi hai-andhakaar mitaae prakaash laane vaali raatri। master gyaan-soorya prakat hona-yeh hai shivraatri। aap bhi master gyaan-soorya ban vishwa mein andhakaar ko mitaae roshni dene vaale ho। jo vishwa ko roshni dene vaala hai woh svayan kya hoga? svayan andh-kaar mein to nahin hoga na। deepak ke maaphik to nahin ho?deepak ke neeche andhiyaara hota hai, oopar roshni hoti hai। aap master gyaan-soorya ho। to master gyaan-soorya svayan bhi prakaash-swaroop hai, light-might roop hai aur doosron ko bhi light-might dene vaale hain। jahaan sada roshni hoti hai vahaan andhakaar ka savaal hi nahin, andhakaar ho hi nahin sakta। to sampoorn pavitrata arthaat roshni। andhakaar mitaane vaali aatmaon ke paas andhakaar rah nahin sakta। rah sakta hai? aa sakta hai? chalo,rahe nahin lekin aakar chala jaae-yeh ho sakta hai? agar kisi bhi vikaar ka ansh hai to usko roshni kahenge ya andhakaar kahenge? andhakaar khatma ho gaya na। shivraatri ka chitra bhi dikhaate ho na। usmein kya dikhaate ho? andhakaar bhaag raha hai। ki thoda-thoda rah gaya? is shivraatri par vishesh kya karenge? kuchh karenge ya sirf jhanda lahraayenge?jaise sada pratigya karte ho ki ham yeh nahin karenge, yeh nahin karenge… aur phir karenge bhi-aise to nahin?pahle bhi sunaaya hai ki pratigya ka arth hi hai ki jaan chali jaae lekin pratigya na jaaye। kuchh bhi tyaag karna pade, kuchh bhi sunna pade lekin pratigya na jaaye। aise nahin-jab koi samasya nahin tab to pratigya theek hai, agar koi samasya aa gai to samasya shaktishaali ho jaae aur pratigya uske aage kamjor ho jaae। isko pratigya nahin kaha jaata। vachan arthaat vachan। to aise pratigya man se karen, kahne se nahin। kahne se karne vaale us samay to shaktishaali sankalp karte hain। kahne se karne vaale mein shakti to rehti hai lekin sarva shaktiyaan nahin rahteen। jab man se pratigya karte ho aur kisse pratigya ki?baap se। to baap se man se pratigya karna arthaat man ko ‘manmanaabhav’bhi banaana aur manmanaabhav ka mantra sada kisi bhi paristhiti mein yantra ban jaata hai। lekin man se karne se yeh hoga। man mein aaye ki mujhe yeh karna nahin hai। agar man mein yeh sankalp hota hai ki-koshish karenge; karna to hai hi; banna to hai hi; aise nahin karenge to kya hoga;kya karenge, isliye kar lo…। isko kaha jaayega thodi-thodi majboori। jo man se karne vaala hoga woh yeh nahin sochega ki karna hi padega…। woh yeh sochga ki baap ne kaha aur hua hi pada hai। nishchay aur saphalta mein nishchit hoga। yeh hai first number ki pratigya। second number ki pratigya hai- banna to hai,karna to hai hi, pata nahin kab ho jaaye। yeh ‘to’, ‘to’…karna arthaat tota ho gaya na। baapdaada ke paas har ek ne kitni baar pratigya ki hai, woh saara file hai। file bahut bade ho gaye hain। abhi file nahin bharna hai, final karna hai। jab koi baapdaada ko kehte hain ki pratigya ki chitki likhaayen, to baapdaada ke saamne saari file aa jaati hai। abhi bhi aise karenge?file mein kaagaj add karenge ki final pratigya karenge?

pratigya kamjor hone ka ek hi kaaran baapdaada ne dekha hai। woh ek shabd bhinna-bhinna royal roop mein aata hai aur kamjor karta hai। woh ek hi shabd hai-body-konses ka ‘main’। yeh ‘main’shabd hi dhokha deta hai।‘main’ yeh samajhta hoon, ‘main’ hi yeh kar sakta hoon, ‘mainne’jo kaha vahi theek hai, ‘mainne’jo socha vahi theek hai-to ‘bhinna-bhinna’royal roop mein yeh main-pan pratigya ko kamjor karta hai। aakhir kamjor hokar ke dilshikasta ke shabd sochte hain-main itna sahan nahin kar sakta; apne ko itna ekdam nirmaan kar doon, itna nahin kar sakta;itni samasyaayen paar nahin kar sakte, mushkil hai। yeh ‘main-pan’kamjor karta hai। bahut achhe royal roop hain। apni life mein dekho-yahi ‘main-pan’sanskaar ke roop mein, svabhaav ke roop mein,bhaav ke roop mein, bhaavna ke roop mein,bol ke roop mein, sambandh-samparka ke roop mein aur bahut meethe roop mein aata hai?shivraatri par yeh ‘main’-’main’ ki bali chadhti hai। bhakta bechaaron ne to bakri ke ‘main-main…’karne vaale ko bali chadhaaya। lekin hai yeh ‘main-main’, iski bali chadhaao। yaadgaar to aap logon ka aur roop mein mana rahe hain। bali chadh chuke hain ya abhi thodi ‘main-pan’ ki bali rahi hui hai? kya result hai? pratigya karni hai to sampoorn pratigya karo। jab baap se pyaar hai, pyaar mein to sab paas hain। koi kahega-baap se 75% pyaar hai, 50% pyaar hai?pyaar ke liye sab kahenge-100% se bhi jyaada pyaar hai! baap bhi kehte hain ki sabhi pyaar karne vaale hain,ismen paas hain। pyaar mein tyaag kya cheej hai! to pratigya man se karo aur dridh karo। baar-baar apne aapko check karo ki pratigya powerful hai ya pareeksha powerful hai?koi na koi pareeksha pratigya ko kamjor kar deti hai।

double videshi to vaayda karne mein hoshiyaar hain na। todne mein nahin,jodne mein hoshiyaar ho। baapdaada sabhi double videshi bachchon ka bhaagya dekh harshit hote hain। baap ko pahchaan liya-yahi sabse bade te badi kamaal ki hai! doosri kamaal-variety vriksha ki daaliyaan hote hue bhi ek baap ke chandan ke vriksha ki daaliyaan ban gaye! ab ek hi vriksha ki daaliyaan ho। bhinnata mein ekta laai। desh bhinna hai, bhaasha bhinna-bhinna hai, culture bhinna-bhinna hai lekin aap logon ne bhinnata ko ekta mein laaya। abhi sabka culture kaunsa hai? brahman culture hai। yeh kabhi nahin kehna ki hamaara videsh ka culture aise kehta hai; ya bhaaratvaasi kahen ki hamaare bhaarat ka culture aise hota hai। na bhaarat, na videsh-brahman culture। to bhinnata mein ekta-yahi to kamaal hai! aur kamaal kya ki hai? baap ke bane to sab prakaar ki alag-alag rasma-rivaaj,dincharya aadi sab milaakar ek kar di। chaahe America mein hon, chaahe london mein hon,kahaan bhi hon lekin braahmanon ki dincharya ek hi hai। ya alag hai? videsh ki dincharya alag ho, bhaarat ki alag ho-nahin। sabki ek hai। to yeh bhinnata ka tyaag-yeh kamaal hai। samjha, kya-kya kamaal ki hai?jaise aap baap ke liye gaate ho na ki-baap ne kamaal kar di! baap phir gaate hain-bachchon ne kamaal kar di। baapdaada dekh-dekh harshit hote hain। baap harshit hote hain aur bachche khushi mein naachte hain।

seva bhi chaaron or-videsh ki,desh ki sunte rehte hain। donon hi seva mein race kar rahe hain। programmes sabhi achhe hue hain aur aage bhi hote rahenge। yeh dridh sankalp use kiya arthaat saphal kiya। jitna dridh sankalp ko saphal karte jaayenge utni sahaj saphalta anubhav karte jaayenge। kabhi bhi yeh nahin socho ki yeh kaise hoga। ‘kaise’ ke bajaae socho ki ‘aise’ hoga। sangam par vishesh var-daan hi hai-asambhav ko sambhav karna। to ‘kaise’shabd aa hi nahin sakta। yeh hona mushkil hai nahin। nishchay rakhkar chalo ki yeh hua pada hai, sirf practical mein laana hai। yeh repeat hona hai। bana hua hai, bane hue ko banaana arthaat repeat karna। isko kaha jaata hai sahaj saphalta ka aadhaar dridh sankalp ke khazaane ko saphal karo। samjha, kya hoga, kaise hoga-nahin। hoga aur sahaj hoga! sankalp ki halchal hai to woh saphalta ko halchal mein le aayegi। achha!

chaaron or ke sada utsav manaane vaale,sada umang-utsaah se udne vaale,sada sampoorn pratigya ke paatra adhikaari aatmaayen,sada as-mbhav ko sahaj sambhav karne vaale, sada har prakaar ki pareeksha ko kamjor kar pratigya ko powerful banaane vaale,sada baap ke pyaar ke return mein kuchh bhi tyaag karne ki himmat vaale, aise trimoorti shiv baap ke janma-saathi, brahman aatmaon ko alaukik janmadin ki yaad, pyaar aur mubaarak। baapdaada ki vishesh shreshtha aatmaon ko namaste।

baapdaada ne daadi tatha daadi jaanki ko gale lagaaya aur bole-

dekhne vaalon ko bhi khushi hai। sabhi sada brahma baap ki bhujaaon mein samaaye hue hain। sada brahma baap ki bhujaayen sabhi bachchon ki sephti ka saadhan hain। to kahaan rehte ho? bhujaaon mein rehte ho na! jo pyaare hote hain vo sada bhujaaon mein hote hain। seva mein baapdaada ki bhujaayen ho aur rahne mein baap ki bhujaaon mein rehte ho। donon hi drishya anubhav hote hain na। kabhi bhujaaon mein sama jaao aur kabhi bhujaayen ban-kar seva karo! kaunsi bhuja ho? right hand। right hainda ho na! lephat to nahin ho na। right hand ka arth hi hai-shreshtha kaarya karne vaale। lephat hand to aapki praja ki bhi praja hogi। lekin aap sabhi brahman right hand ho। yeh nasha hai ki ham bhagwan ke right hand hai? koi rivaaji mahaatma, dharmaatma ke nahin, param aatma ke right hand hain! donon ko dekhkar ke sab khush hote hain। nimitta aatmaon ko thakaate to nahin ho? achhi-achhi kahaaniyaan sunaate hain। achha hai। aap logon ko sarva anubhvon ki khaan bharne ke nimitta hain ye। achha! conference va retreat-donon ki result achhi rahi! achha! videsh ke nimitta bane hue aadi ratna bhi achhi andaaz mein aaye hue hain। koi-koi door hote bhi sameep hain। phir bhi achhe pahunch gaye hain। (17taareekh ko 10varshon se gyaan mein chalne vaale bhaai-bahnon ka vishesh samaaroh gaya) achha hai, himmat ki mubaarak! 10 varsha nishchaybuddhi ban paar kiya hai, to achal-adol rahne ki mubaarak। abhi phir 10varsha vaalon ko kya karna hai?jaise 10varsha samasyaaon ko paar karte himmat-umang se chalte udte rahe ho, aise hi phir abhi jaldi sthaapna ki diamond jubilee honi hai, usmein phir part lena। diamond jubilee ka bhi in advance pakka hai na। jyaada din to nahin hain। achha drishya tha, baap ko achha laga। roohaaniyat ka drishya achha tha!

avyakt baapdaada ki personal mulaakaat

group nan.1

sangam ka har second achhe te achha hai - is nishchay se sahajyogi bano

sabhi points ka saar kya hai?point banna। sab points ka essence hua-point banna। to pvaait banna sahaj hai ya mushkil hai?jo sahaj baat hoti hai vo sada hoti hai aur mushkil hoti hai to sometime (Sometime-kabhi-kabhi) hoti hai। sabse easy (sahaj) kya hai? point। point ko likhna sahaj hai na! jab bhi point roop mein sthit nahin hote to question-mark ki queue hoti hai na! question-mark mushkil hota hai! to jab bhi question-mark aaye to uske badle easy ‘point’laga do। kisi bhi baat ko samaapta karna hota hai to kehte hain-isko bindi laga do। fullstop lagaana aata hai na! fullstop lagaane ka sahaj slogan yaad rakho-jo hua,jo ho raha hai,jo hoga woh achha hoga! kyonki question tab uthta hai jab achha nahin lagta hai। isliye sangamayug hai hi achhe te achha, har second achhe te achha। isse sada sahaj yogi jeevan ka anubhav karenge! ‘achha’kahne se achha ho hi jaata hai। svayan bhi achhe aur jo act karenge woh bhi achhi! achhe ko dekhkar ke doosre aakarshit avashya honge। sabhi achha hi pasanda karte hain। achha! seva achhi chal rahi hai na! sankhya bhi badhaao aur quality bhi badhaate chalo। aise mike taiyaar karo jo ek ke naam se anekon ka kalyaan ho jaae। svayan sada santushta ho? apne liye to koi question nahin hai na! ‘nishchay’ hai phaau-ndeshan,nishchay ka foundation hoga to karma automatically shreshtha honge। pahle smriti nishchay ki hoti hai। sankalp mein nishchay arthaat dridhta hogi to karma automatically phal denge। achha! sabhi khush aur santushta hain! sada khushi mein naachne vaale hain! halchal ka samay samaapta ho gaya। past ko past kiya aur future to hai hi bahut sundar! golden future hai!

group nan.2

sarva khazaanon ko saphal karna hi samartha aatma ki nishaani hai

sada apne ko baap ke samartha bachche anubhav karte ho?samartha aatmaon ki nishaani kya hai? samartha aatmaayen koi bhi khazaane ko vyartha nahin karengi। samartha arthaat vyartha ki samaapti। sangamayug par baap ne kitne khazaane diye hain? sabse bada khazaana hai shreshtha sankalpon ka khazaana। sangam ka samay-yeh bhi bade te bada khazaana hai। sarva shaktiyaan-yeh bhi khazaana hai;sarva gun-yeh bhi khazaana hai। to sabhi khazaanon ko saphal karna-yeh hai samartha aatma ki nishaani। sada har khazaane saphal hote hain ya vyartha bhi ho jaate hain?kabhi vyartha bhi hota hai?jitna samartha bante hain to vyartha svatah hi khatma ho jaata hai। jaise-roshni ka aana aur andhakaar ka jaana। kyonki jaante ho ki-har khazaane ki value kitni badi hai,sangamayug ke purooshaartha ke aadhaar par saare kalpa ki praalabdha hai! to ek second,ek shvos,ek gun ki kitni value hai! agar ek bhi sankalp va second vyartha jaata hai to saara kalpa uska nuksaan hota hai। to itna yaad rehta hai? ek second kitna bada hua! to kabhi bhi aise nahin samajhna ki sirf ek second hi to vyartha hua! lekin ek second anek janmon ki kamaai ya nuksaan ka aadhaar hai। gaaya hua hai na-kadam mein padmon ki kamaai hai। ek kadam uthaane mein kitna time lagta hai? second hi lagta hai na। second ganvaana arthaat padmaapadma ganvaana। is value ko sada saamne rakhte hue saphal karte jaao। chaahe svayan ke prati, chaahe auron ke prati-saphal karte jaao to saphal karne se saphaltaamoorta anu-bhav karenge। saphalta samartha aatma ke liye janmasiddha adhikaar hai। birth-right (Birth Right) mila hai na! koi bhi karma karte ho-gyaan-swaroop hokar ke karma karne se saphalta avashya praapta hoti hai। to saphalta ka aadhaar hai-vyartha na ganvaakar saphal karna। aise nahin-vyartha nahin ganvaaya। lekin saphal bhi kiya?jitna kaarya mein lagaayenge utna badhta jaayega।

khazaanon ko badhaana aata hai? saphal karna arthaat lagaana। to sada kaarya mein lagaate ho ya jab chance milta hai tab lagaate ho? har samay check karo-chaahe mansa, chaahe vaacha, chaahe sambandh-samparka se saphal zaroor karna hai। saare din mein kitnon ki seva karte ho?agar sevaadhaari seva nahin kare to achha nahin lagega na। to vishwa-sevaadhaari ho! har din seva karni hi hai! sada yaad rakho ki jo bhi akhut khazaane mile hain vo dene hi hai। daata ke bachche ho,to roz dena zaroor hai। jo mahaadaani hote hain vo ek din bhi dene ke bina nahin rah sakte। agar vaacha ka chance nahin milta to mansa karo, mansa ka nahin milta to apne karma va practical life dvaara seva karo। kai kehte hain ki aaj koi student mila hi nahin, koi sunne vaala nahin mila। lekin mansa-seva to behad ki seva hai। mansa-seva karni aati hai?jitna aap mansa se, vaani se svayan sample (Sample) banenge, to sample ko dekhkar ke svatah hi aakarshit honge। to aap sabhi first-class sample ho na। first-class sample first-class ko laayega na! sirf dridh sankalp rakho to sahaj ho jaayega। agar koi bhi vyartha sankalp apne andar hi hoga ki pata nahin saphalta milegi va nahin milegi-to yeh sankalp saphalta ko bhi peechhe kar deta hai! isliye jab samay parivartan ka hai to parivartan hona hi hai,hua hi pada hai! himmat ka kadam uthaao to madad hai hi hai। himmat vaale ho na। khushi se bolo-haan ji! paandav thode gambheer hain? soch rahe hain! samartha aatma hoon-yeh baar-baar yaad rakhna। to kamaal karke dikhaayenge। achha! abhi jitne aaye ho usse 10guna badhaakar aana। mushkil hai?to kyon nahin kehte ho ki 10guna nahin, 100guna badhaakar ke aayenge। kitni duaayen milengi! seva ki duaayen bahut sahaj udaane vaali hain। udne vaale ho na। doosre varsha result dekhenge। achha!

group nan.3

vardaani varsha mein dridhta se saphalta ka sahaj anubhav karo

vardaan aur mehnat mein kya antar hai?ek hota hai bahut mehnat ke baad phal milna aur doosra hota hai nimitta mehnat aur var-daan se saphalta। is varsha jo yeh dridh sankalp karenge ki ‘‘vyartha sankalp svapna-maatra bhi nahin aaye’’-aisa dridh sankalp karenge to saphalta sahaj anubhav karenge। laabh lena chaahiye na। dekhenge-kaun is vardaani varsha ka phaayda leta hai? chaahe svayan prati bhi jis baat ko mushkil samajhte ho vo sahaj anubhav kar sakte ho, sirf question mark ko khatma karo। question-mark saphalta praapta karne mein deevaar ban jaata hai। isliye is deevaar ko khatma karo। samjha? yeh dridhta saphalta ki chaabi ban jaayegi। to chaabi ko use karo। chaabi use karni aati hai?chaabi hai ya kho jaati hai?kyonki maaya ko bhi yeh chaabi achhi lagti hai। dekho,koi bhi kahaan vaar karta hai to pahle aap se chaabi maangega। to maaya bhi pahle chaabi uda leti hai। aap sochenge-mera sankalp to bahut achha tha lekin kyon nahin hua? kyonki beech se dridhta ki chaabi kho jaati hai। chaabi sambhaalne mein maataayen jyaada hoshiyaar hoti hain। paandavon ko chaabi sambhaalni aati hai? ya kabhi miss kar dete ho?

sabhi ka lakshya seva ke prati va svayan ke prati bahut achha hai,sirf lakshya ko practical mein laane ke liye beech-beech mein attention rakhna padta hai। kabhi-kabhi ek baat miss kar dete ho-’attention’ki ‘ki’ (Key;chaabi) ko uda dete ho। to kya ho jaata hai? (tension) to jahaan tension hota hai na, vahaan mushkil ho jaata hai। attention ka bhi tension kar dete ho। baapdaada kehte hain na- attention rakho,attention rakho। to attention ko bhi tension mein badli kar dete hain। sada yahi smriti mein rakho ki baapdaada ki sada madad arthaat sahayog ka haath mere sir par hai। yeh chitra sada emerge roop mein rakho। to jiske sir par baap ka haath hai uske mastak par sada vijay ka tilak hai hi hai। to apne mastak par sada vijay ka tilak najar aata hai? ya kabhi mit jaata hai?jaise baap avinaashi hai,aap aatmaayen bhi avinaashi hain-to yeh vijay ka tilak bhi avinaashi laga hua hai।

achha hai,seva ka umang-utsaah jitna rakhte jaate ho utna sahaj nirvighna bante ho। kyonki seva mein buddhi busy rehti hai। khaali rahne se kisi aur ko aane ka chance hai aur busy rahne se sahaj nirvighna ban jaate hain। to busy rehte ho?ki thoda busy rehte ho,thoda khaali rehte ho? buddhi bhi busy rahe,sirf haath-paanv nahin। man aur buddhi ka time-table banaana aata hai?roj banaate ho ya jab phursat milti hai tab banaate ho?jaise karma ka time-table roz banaate ho na, aise man-buddhi ka time-table banaao। kyonki aap sabse bade te bade,oonche te oonche ho। baap to bachchon ko aage rakhta hai na। to jitne vi.aai.pi. (V.I.P.) hote hain,ve kya karte hain? time-table par chalte hain। to aap se ooncha saare chakra mein koi hai? to time-table par chalna pade na। achha!

yu.ke. mein seva-sthaan aur seva achhi chal rahi hai। sthaan lene mein to mekaap (Make Up;kami poori karna) kar rahe ho, lekin sthiti mein bhi mekaap kar rahe ho? achhi result hai, kyon? kyonki aap sabhi ke badi dil ka sahayog hai। yeh sahayog hi seva badi kar raha hai। chaahe nimitta koi bhi banta hai lekin dekha gaya ki yu.ke. vaalon ki har kaarya mein dil badi hai, uska pratyaksha phal mil raha hai। abhi yu.ke. ko follow karo। phreensa,kenaada,sab follow karo। abhi jinhen sahayogi banaaya hai unhon ko vaaris banaao। ek taraph vaaris banaao, doosri taraph mike banaao। London vaalon ne itna bada mike nahin nikaala hai jo India tak aavaaj aaye। London ka London mein hi aavaaj hai। aap to vishwa-kalyaankaari ho na। jab badi dil rakhne vaale ho to seva ka pratyakshaphal bhi bada nikalna hi hai। koi bhi kaarya karo to svayan karne mein bhi badi dil aur doosron ko sahayogi banaane mein bhi badi dil। kabhi bhi svayan prati va sahayogi aatmaon ke prati, saathiyon ke prati sankuchit dil nahin rakho। yeh vidhi bahut achhi hai। badi dil rakhne se-jaise gaaya hua hai ki mitti bhi sona ho jaati hai-kamjor saathi bhi shaktishaali saathi ban jaata hai, asambhav saphalta sambhav ho jaati hai। badi dil vaale ho na। ‘main’-’main’ karne vaale to nahin ho na। yeh ‘main’-’main’ jo karta hai use kahenge bakri dil aur badi dil vaale ko kahenge sher dil। shaktiyon ki savaari kiske oopar hai?bakri ke oopar ya sher ke oopar?sher par hai na। aap bhi shakti sena ho। to sher par savaari hai na। ‘mai’-’main’ko bali chadha liya na, samaapta kar diya। to sada yeh smriti mein rakho ki har second, har sankalp ko saphal karte hue saphalta ka adhikaar har samay praapta karte rahenge। achha!

group nan. nan. 4

bindu roop ya double light rehna hi udti kala ka sahaj saadhan hai

sada apne ko kaunse sitaare samajhte ho? (saphalta ke sitaare, lucky sitaare, chamakte hue sitaare,ummeedon ke sitaare)baap ki aankhon ke taare। to naynon mein kaun sama sakta hai?jo bindu hai। aankhon mein dekhne ki visheshta hai hi bindu mein। jitna yeh smriti rakhenge ki ham baap ke naynon ke sitaare hain,to svatah hi bindu roop honge। koi badi cheez aankhon mein nahin samaayegi। svayan aankh hi sookshm hai,to sookshm aankh mein samaane ka swaroop hi sookshm hai। bindu-roop mein rehte ho?yeh bada lamba-chauda shareer yaad aa jaata hai? baapdaada ne pahle bhi sunaaya tha ki har karma mein saphalta va pratyakshaphal praapta karne ka saadhan hai-roz amritvele teen bindu ka tilak lagaao। to teen bindu yaad hain na। lagaana bhi yaad rehta hai? kyonki agar teenon hi bindi ka tilak sada laga hua hai to sadaiv udti kala ka anubhav hota rahega। kaunsi kala mein chal rahe ho? udti kala hai? ya kabhi udti, kabhi chalti, kabhi chadhti? sada udti kala। udne mein maja hai na। ya chadhne mein maja hai? chaaron or ke vaayumandal mein dekho ki samay udta rehta hai। samay chalta nahin hai, ud raha hai। aur aap kabhi chadhti kala,kabhi chalti kala mein honge to kya result hogi?samay par pahun-chenge?to pahunchne vaale ho ya pahunchne vaalon ko dekhne vaale ho? sabhi pahunchne vaale ho, dekhne vaale nahin। to sada udti kala chaahiye na।

udti kala ka kya saadhan hai? bindu roop mein rehna। double light। bindu to hai lekin karma mein bhi light। double light ho to zaroor udenge। aadha kalpa bojh uthaane ki aadat hone kaaran baap ko bojh dete hue bhi kabhi-kabhi utha lete hain। tang bhi hote ho lekin aadat se majboor ho jaate ho। kehte ho ‘tera’lekin bana dete ho ‘mera’। sva unnati ke liye va vishwa-seva ke liye kitna bhi kaarya ho woh bojh nahin lagega। lekin mera maanna arthaat bojh hona। to sadaiv kya yaad rakhenge? mera nahin, tera। man se, mukh se nahin। mukh se tera-tera bhi kehte rehte hain aur man se mera bhi maante rehte hain। aisi galti nahin varna।

bindu-swaroop mein sthit hona arthaat double light banna। badi cheej ko uthaana mushkil hota hai, chhoti cheej ko uthaana sahaj hota hai। chhote bindu roop ko smriti mein rakhte ho ya lambe shareer ko yaad rakhte ho?yaad ke liye kaha jaata hai-buddhi mein yaad rakhna। moti cheej ko yaad rakhte ho aur chhoti cheej ko chhod dete ho,isliye mushkil ho jaata hai। life mein bhi dekho-chhota banna achha hai ya bada banna achha hai? chhota banna achha hai। to chhota swaroop yaad rakhna achha hai na। kya yaad rakhenge? bindu। sahaj kaam diya hai ya mushkil?to phir ‘kabhi-kabhi’kyon karte?sahaj kaam to‘sada’ ho sakta hai na। jab baap bhi bindu, aap bhi bindu, kaam bhi bindu se hai-to bindu ko yaad karna chaahiye। to abhi dot (bindu) ko nahin bhoolna। bojh nahin uthaana। achha! yeh variety guldasta hai। achha! sabhi ek-do ke saathi hain। win karna sahaj hai। kyon sahaj hai? (baba saath hai) aur anek baar vijayi bane hain to repeat karne mein kya mushkil hai! koi nai baat karni hoti hai to mushkil lagta hai aur kiya hua kaam phir se karo to mushkil lagta hai kya? to kitni baari vijayi bane ho?kitna sahaj hai! kiye hue kaarya mein kabhi question nahin uthega-kaise hoga, kya hoga, theek hoga, nahin hoga। kiya hua hai to easy ho gaya na। kitna easy? bahut easy hai! abhi easy lag raha hai vahaan ja ke mushkil ho jaayega? sada easy। jab mushkil lage to yaad karo-’’kitne baari kiya hai to mushkil ke bajaaye easy ho jaayega।’’ sabhi bahaadoor hain। kya yaad rakhenge? bindu। banna bhi bindu hai, lagaana bhi bindu hai। full stop lagaana arthaat bindu lagaana। to isko bhoolna nahin। achha!

group nan.5

self par raajya karne vaale bephikra baadshaah bano

sada apne ko raaja samajhte ho? self par raajya hai arthaat svaraajya adhikaari ho। aur doosre kaunse raaja ho? bephikra baadshaah। bephikra baadshaah is samay bante ho। kyonki satayug mein phikra va bephikra ka gyaan hi nahin hai। kal kya the aur aaj kya bane ho! bephikra baadshaah ban gaye na! bephikra banne se bhandaare bharpoor ho gaye hain। brahman jeevan arthaat bephikra baadshaah। svaraajya mila-sab-kuchh mila। svaraajya mila hai? kabhi koi karmendriyaan to dhokha nahin deti? kabhi-kabhi thoda khel karti hain to kantro-ling power ya ruling power kam hai। to sadaiv chalte-phirte yeh smriti sada rahe ki-main svaraajya adhikaari bephikra baadshaah hoon। baap aaya hi hai aap sabke phikra lene ke liye। to phikra de diya na। thoda chhipaake to nahin rakha hai?pocket check karke dekho। buddhi roopi,man roopi pocket donon hi dekho। jab hain hi baap ke bachche, to bachche bephikra hote hain। kyonki baap daata hai,to daata ke bachchon ko kya phikra hai! achha, yeh kaunsi bhaasha vaale hain? (spenish,portugeej) dekho, science ke saadhan aapke kaam mein to aa rahe hain na! drama anusaar science vaalon ko bhi touch tabhi hua hai jab baap ko aavashyakta hai। saadhan use karna alag cheez hai aur saadhnon ke vash hona alag cheez hai। to aap saadhnon ko use karte ho ya saadhnon ke vash ho jaate ho? kabhi koi saadhan apni taraph kheenchate to nahin hain? master creator hokar ke creation se laabh bhale lo। agar vasheebhoot ho gaye to duhkh denge। achha!

amritvele3.00 baje svayan avyakt baapdaada ne shiv-dhvaj phahraaya aur usi sthaan par khade rahkar brahma vatson ko sambodhit karte hue bole-

aaj ke is-shivraatri kaho va shivjayanti kaho-shivraatri va shivjayanti ke utsav ki sabhi ko padmaapadma guna mubaarak ho! sada har second umang-utsaah badhaate-badhaate is vishwa ko hi utsaah bhara apna raajya bana lenge। aaj auron ke raajya mein sevaadhaari ban seva kar rahe ho aur kal apne svaraajya ke saath vishwa ke raajya ke raajya adhikaari bane ki bane! to sada har second utsaah bharna aur duaayen lena। har second duaayen lete jaao aur duaayen dete jaao। aapki duaaon se sada sarva aatmaayen sukhi ho jaayengi। vo din aaya ki aaya-jab sabhi aatmaayen baap ke jhande ke neeche, chhatrachhaaya ke neeche khadi hongi! to mubaarak ho! chaaron or ke bachchon ko, dil mein rahne vaale bachchon ko mubaarak ho! mubaarak ho!!