Avyakt murli du jeudi 18 janvier 1996

>

18-01-96 om shanti avyakt baapdaadaamdhuban

‘‘sada samartha rahne ki sahaj vidhi- shubhaachintan karo aur shubh chintak bano’’

aaj sneh sampanna smriti divas hai। chaaron or ke bachchon ke sneh ka,dil ka aavaaz baapdaada ke paas pahunch gaya hai। yeh sneh sukh swaroop sneh hai। baapdaada is divas ko smriti divas ke saath-saath samarthi divas kehte hain। kyonki brahma baap ne apne saakaar swaroop mein sarva kaarya karne ki samaarthiyaan arthaat shaktiyaan saakaar roop mein bachchon ko arpan kiya। is divas ko san shows father ke vardaan ka din kaha jaata hai। saakaar roop mein bachchon ko aage kiya aur pharishta roop mein apne bachchon ki aur vishwa ki seva aarambha kiya। ye18 January ka divas brahma baap ke sampoorn nashtomoha smriti swaroop ka raha। jaise geeta ke 18adhyaay ka saar hai - bhagwan ne arjun ko nashtomoha smriti swaroop banaaya। to ye 18 ka yaadgaar hai ki brahma baap kitna hi bachchon ke prati ati snehi rahe,jo bachche anubhvi hain ki sada seva ke nimitta bachchon ko kitna yaad karte - anubhav hai na! moh nahin raha lekin dil ka pyaar raha। kyonki moh usko kaha jaata hai jismen apna svaartha ho। to brahma baap ka apna svaartha nahin raha, lekin bachchon mein seva arth ati sneh raha। phir bhi saath rehte,bachchon ko saamne dekhte bhi koi deh ke roop mein yaad sataai nahin। ekdam nyaara aur pyaara raha। isliye kaha jaata hai smriti swaroop nashtomoha। koi meraapan nahin raha, dehbhaan se bhi nashtomoha। to ye divas aise follow father ka paath padhaane ka divas raha।

ye avyakt divas duniya ki anzaan aatmaon ko parmaatma kaarya ki taraph jagaane ka raha। kyonki majority log brahma baap ko dekhkar yahi sochte ya samajhte the ki inhon ka param aatma brahma hai। ye brahmaakumaariyaan,brahma ko hi bhagwan maanti hain। aur brahma ne saakaar mein part parivartan kiya to kya sochne lage ki abhi to brahmaakumaariyon ka bhagwan chala gaya aur ye brahmaakumaariyon ka kaarya aaj nahin to kal samaapta ho jaayega। lekin aap jaante hain ki inhon ka karaavanhaar brahma dvaara bhi paramatma tha,hai aur ant tak rahega। to ye parmaatma kaarya hai, vyakti ka kaarya nahin hai। ye pahchaan brahma baap ke saakaar part parivartan hone ke baad samajhte hain ki inhon ko koi shakti chala rahi hai, abhi bhi bichaare paramatma ko nahin jaante। lekin koi shakti kaarya kara rahi hai,vo kaun-si shakti hai, usko bhi dekh rahe hain, soch rahe hain aur aakhir to samajhna hi hai। to kiska kaarya hai? brahma baap ka ya param aatma ka brahma dvaara?kiska kaarya hai?

jo bachche saakaar ke baad mein aaye hain vo sochte hain ki brahma baba ne apna saakaar part itna jaldi kyon poora kiya?ham to dekhte na! ham to milte na! sochte ho na?lekin kalpa pahle ka bhi gaayan hai ki kaurav sena ke nimitta bane hue mahaaveer ka kalyaan kis dvaara hua?shakti dvaara hua na! to shaktiyon ka part drama mein saakaar roop mein noondha hua hai। aur sab maante bhi hain ki maatri shakti ke bina is vishwa ka kalyaan hona asambhav hai। to brahma baap pharishta kyon bana? saakaar part parivartan kyon hua? agar brahma baap pharishta roop nahin dhaaran karta to aap itni aatmaayen yahaan pahunch nahin paati। kyonki vaayumandal ki bhraantiyaan is vishwa kraanti ke kaarya ko halka kar rahi thi। to brahma baap ka pharishta banna aap jyaada se jyaada bachchon ke bhaagya khulne ka kaaran raha। abhi pharishte roop mein jo seva ki fast gati hai vo dekh rahe ho na! fast gati hui ya kam hui hai? fast hui hai na! to fast gati hui tabhi aap yahaan pahunche ho। nahin to soye hue the achhi tarah se। to aaj ka divas aisa nahin hai jaise log manaate hain - chala gaya, chala gaya। lekin umang-utsaah aata hai ki follow father, ham bhi aise smriti swaroop nashtomoha banen। ye practical paath padhne ka divas hai।

aaj aap kisi ke bhi dil se duhkh ke aansu nikle?nikle ya andar- andar thoda aaya! jisko duhkh ki thodi bhi lahar aai vo haath uthaao। duhkh hua? nahin hua? aaj ke din to brahma baap ko seva ka saathi banne ka din hai। aap sab saathi ho ki saakshi ho? seva mein saathi aur maaya ki paristhitiyon se saakshi। maaya ko to welcome kiya hai na ki ghabraate ho-haay, kya ho gaya! thoda-thoda ghabraate ho? maaya ke halke-halke roopon ko to aap bhi jaan gaye ho aur maaya bhi sochti hai ki ye jaan gaye hain lekin jab koi bhi vikraal roop ki maaya aave to sada saakshi hokar khel karo। jaise vo kushti ka khel hota hai na, dekha hai ki dikhaayen?yahaan bachche karke dikhaate hain na! to samjho ki ye kushti ka khel,khel rahe hain,achhi tarah se maaro। ghabraao nahin, khel hai। to saakshi hokar khel karne mein maza aata hai aur maaya aa gai,maaya aa gai to ghabra jaate hain। kuchh bhi taakat abhi maaya mein nahin hai। sirf baahar ka sher ka roop hai lekin billi bhi nahin hai। sirf aap logon ko ghabraane ke liye bada roop le aati hai phir sochte ho pata nahin ab kya hoga! to yeh kabhi nahin kaho - kya karoon, kaise hoga,kya hoga…,lekin baapdaada ne pahle bhi yeh paath padhaaya hai ki jo ho raha hai vo achha aur jo hone vaala hai vo aur achha। brahman banna arthaat achha hi achha hai। chaahe baaten aisi hoti hain jo kabhi aapke svapna mein bhi nahin hoti aur kai baaten aise hoti hain jo agyaan kaal mein nahin hogi lekin gyaan ke baad hui hain, agyaankaal mein kabhi business neeche-oopar nahin hua hoga aur gyaan mein aane ke baad ho gaya,ghabra jaate hain - haay, gyaan chhod den! lekin koi bhi paristhiti aati hai us paristhiti ko apna thode samay ke liye shikshak samjho। shikshak kya karta hai? shiksha deta hai na! to paristhiti aapko vishesh do shaktiyon ke anubhvi banaati hai - ek-sahanshakti,nyaaraapan,nashtomoha aur doosra-saamna karne ki shakti ka paath padhaati hai jisse aage ke liye aap seekh lo ki ye paristhiti,ye do paath padhaane aai hai। aur jo kehte rehte ho ham to trustee hain,mera kuchh nahin hai, thagi se to nahin kehte! dil se kehte ho? trustee ho ki thoda grihasthi ho?kabhi grihasthi ban jaate kabhi trustee ban jaate?

new year mein baapdaada ko do-chaar khilaune diye the, usmein kya tha ki ek taraph karo to bhaai hai,doosre taraph karo to female hai, ek hi khilauna badal jaata tha। ek second mein vo ho jaata, ek second mein vo ho jaata। to aap aise khilaune to nahin ho, abhi-abhi grihasthi, abhi-abhi trustee। thoda-thoda,kabhi-kabhi to ho jaata hai? ghabraate ho na to maaya samajh jaati hai ki ye ghabra gaya hai, maaro achhi tarah se। isliye ghabraao nahin। trustee hain arthaat pahle se hi sab kuchh chhoot gaya। trustee maana sab baap ke havaale kar diya। mera kya hoga! - bas ga ga aata hai na to gadbad hoti hai। sab achha hai aur achha hona hi hai,nishchinta hai - isko kaha jaata hai samartha swaroop। to aaj ka din kaun sa hai? samartha banne ka, nashtomoha hone ka। sirf baba bahut yaad aaye,geet gaane ka nahin hai। to brahma baap ka pharishta roop hona drama mein parmaatma kaarya ko pratyaksha karne ka nimitta kaaran bana। brahma baba hai ya hai nahin? (hai) dikhaai to deta nahin!

dekho aap jo peechhe aaye ho vo bahut lucky ho। kyon?abhi seva ke bane banaaye saadhnon ke samay par aaye। makkhan nikaala 60varsha vaalon ne aur makkhan khaane vaale aap aa gaye। aaj history suni hogi na,itni mehnat aap karte to bhaag jaate। aur vartamaan samay seva ka vaayumandal bana hua hai। abhi chaahe president hai, chaahe prime minister hai,chaahe koi bhi neta hai, majority ye to maante hain na ki kaarya achha hai, ham kar sakte hain ya nahin, vo baat alag hai। harek ka part apna hai। lekin achha kaarya hai aur ye kaarya aur aage badhna chaahiye ye to kehte hain na! pahle kya kehte the ki brahmaakumaariyon ki shakla bhi nahin dekhna। agar shuru mein nimantran dene jaate bhi the na to darvaaja banda kar dete the। to aap to achhe time par aaye ho na! seva ka chance bahut hai। jitni seva karne chaaho utni kar sakte ho। abhi sabhi samajhte hain ki saakaar brahma ke baad bhi brahmaakumaariyon ne silver jubilee bhi mana li, golden bhi mana li, abhi diamond tak pahunch gaye hain। kyonki koi bhi bada guru chala jaata hai to gadbad ho jaati hai। yahaan gadbad hai kya?yahaan to aur hi vriddhi hai,badhta jaata hai। to isse siddha hai ki ye kaarya karaane vaala baap param aatma hai, nimitta maadhyam brahma baap hai। abhi bhi maadhyam brahma baap hai। ye part alag cheez hai lekin maadhyam drama mein pahle saakaar brahma raha aur abhi pharishta roop mein brahma hai। brahma ko pita kahenge,rachta to brahma hai na। ye to part beech-beech mein bachchon ki paalna karne ke liye nimitta hai। baaki rachta brahma hai aur rachna ke kaarya mein abhi bhi ant tak brahma ka hi part hai।

to aaj saare din mein kiske paas maaya aai? koi potra-dhotra yaad nahin aaya?to sada aise samartha raho aur iski sabse sahaj vidhi hai do shabd yaad rakho। do shabd yaad rah sakte hain na? saari murli bhool jaaye lekin do shabd yaad rakho aur practical mein karte chalo। vo do shabd,jaante bhi ho,koi nai baat nahin hai, ek hai shubh chintan,negative ko bhi pojetiv karo, isko kehte hain shubh chintan। negative pojetiv ho sakta hai aur badal sakte ho sirf check karo ki karma karte bhi shubh chintan chala? aur doosra sabhi ke prati shubh chintak,to shubh chintan aur shubh chintak donon ka sambandh hai। agar shubh chintan nahin hai to shubh chintak bhi nahin ban sakte। isliye in do baaton ka attention rakhna। samjha?kya karenge?yahin nahin bhool jaana। kyonki abhi dekha gaya hai ki bahut aisi samasyaayen hain, log hain jo aapke vaani se nahin samajhte lekin shubh chintak ban shubh vibration do to badal jaate hain। aur ek baat se mukta bhi hona hai। is brahman jeevan mein mukta hone vaale ho na, mukta hone ki 9baaten bata di,agar in nau baaton se mukta ho gaye to nau ratna ban sakte hain। to aaj baapdaada ek baat ki smriti dila rahe hain - kabhi bhi koi bhi shaareerik beemaari ho, man ka toofaan ho, tan mein halchal ho, pravritti mein halchal ho,seva mein bhi halchal hoti hai to kisi bhi prakaar ke halchal mein dilshikasta kabhi nahin hona। badi dil vaale bano। baap ki dil kitni hai,chhoti hai kya! baap badi dil vaale hain aur bachche chhoti dil kar dete hain, beemaar ho gaye to rona shuru kar denge। darda ho gaya, darda ho gaya। to dilshikasta hona davaai hai?beemaari chali jaayegi ki badhegi? jab hisaab-kitaab aa gaya, darda aa gaya to hisaab-kitaab aa gaya na, lekin dilshikasta se beemaari ko badha dete ho। isliye himmat vaale bano to baap bhi madadgaar banenge। aise nahin, ro rahe hain-haay kya karoon, kya karoon aur phir socho ki baba ki to madad hai hi nahin। madad usko milti hai jo himmat rakhte hain। pahle bachche ki himmat phir baap ki madad hai। to himmat to haar li aur sochne lagte ho ki baap ki madad to mili nahin,baba bhi time par to karta hi nahin hai! to aadhe akshar yaad nahin karo, baba madadgaar hai lekin kiska?to aadha bhool jaate ho aur aadha yaad karte ho ki baba bhi pata nahin mahaarthiyon ko hi karta hai,hamko to karta hi nahin hai, hamko to deta hi nahin hai। pahle aap, mahaarthi peechhe। lekin dilshikasta nahin bano aur man mein agar koi uljhan aa bhi jaati hai to aise samay par nirnay shakti chaahiye aur nirnay shakti tab aa sakti hai jab aapka man baap ke taraph hoga। agar apne uljhan mein honge to haan-na, haan-na,isi uljhan mein rah jaayenge। isliye man se bhi dilshikasta nahin bano। aur dhan bhi neeche-oopar hota hai, jab karodaptiyon ka hi neeche-oopar hota hai to aap log uske aage kya ho। vo to hona hi hai। lekin aap logon ko nishchay pakka hai ki jo baap ke saathi hain, sachche hain to kaisi bhi haalat mein baapdaada daal-roti zaroor khilaayega। do-do sabji nahin khilaayega, daal-roti khilaayega। lekin aise nahin karna ki kaam se thak karke baith jaao aur kaho baba daal-roti khilaayega। aise albele ya aalasya vaale ko nahin milega। baaki sachchi dil par saaheb raaji hai। aur parivaar mein bhi khitkhit to honi hai। jab aap log kehte ho ki ati ke baad ant hona hai,kehte ho! ati mein ja raha hai aur jaana hai to parivaar mein khitkhit na ho, ye nahin hona hai,hona hai! lekin aap trustee ban,saakshi ban paristhiti ko baap se shakti le hal karo। grihasthi bankar sochenge to aur gadbad hogi। pahle bilkul nyaare trustee ban jaao। mera nahin। ye meraapan-mera naam kharaab hoga,meri glaani hogi,mera bachcha aur mujhe…, meri saas mere ko aise karti hai… ye meraapan aata hai na to sab baaten aati hain। mera jahaan bhi aaya vahaan buddhi ka phera ho jaata hai, badal jaate hain। agar buddhi kahaan bhi uljhan mein badalti hai to samajh lo ye meraapan hai, usko check karo aur jitna suljhaane ki koshish karenge utna uljhega। isliye sabhi baaton mein kya nahin banna hai? dilshikasta nahin banna hai। kya nahin banenge? (dilshikasta) sirf kehna nahin, karna hai। bhagwan ke bachche hain ye to pakka vaayda hai na, isko to maaya bhi nahin hila sakti। jab ye pakka vaayda hai, nishchay hai to bhagwan ke bachche bhi dilshikasta ho jaayen, to badi dil rakhne vaale kaun honge? aur koi honge? aap hi ho na! to kya karenge?abhi samartha bano aur san shows father ka paath pakka karo। kachcha nahin karo,pakka karo। sabhi himmat vaale ho na?himmat hai?achha।

diamond jubilee ki khushi hai na? baapdaada samaachaar sunte hi rehte hain। achha kiya pahle dilli mein aarambha kiya,raajdhaani mein apna paanv jama liya। abhi sabhi kar rahe hain। lekin yaad rakhna ki baapdaada ne is diamond jubilee varsha mein koi na koi har zone ko kaam diya hai। youth ko kaam diya hai, kumaariyon ko kaam diya hai, pravritti vaalon ko kaam diya hai to kaam karna nahin bhool jaana। baapdaada ke paas koi na koi,chaahe chhota sa nekles bana ke laao, chaahe kangan bana ke laao, chaahe bada haar bana ke laao, lekin laana zaroor hai। haath khaali nahin aana hai। himmat hai na?banaayenge na? baapdaada to kahenge chalo kangan hi laao। kyonki bahut aatmaayen andar tension se bahut duhkhi hain। sirf bichaaron mein aage badhne ki himmat nahin hai। to aap master sarvashaktimaan unhon ko himmat do, to aa jaayenge। jaise kisko taang nahin hoti hai na to lakdi ki taang banaakar dete hain to chalta to hai na! to aap himmat ki taang de do। lakdi ki nahin dena, himmat ki do। bahut duhkhi hain, raham dil bano। baapdaada to agyaani bachchon ko bhi dekhta rehta hai na ki andar kya haalat hai! baahar ka show to bahut achha tiptop hai lekin andar bahut-bahut duhkhi hain। aap bahut achhe samay par bachcha bane arthaat bach gaye। achha।

chaaron or ke sarva samartha aatmaon ko,sarva maaya jeet, prakriti jeet aatmaon ko,sada san shows father karne vaale bachchon ko, sada dil khush rahne vaale bachchon ko baapdaada ka yaad-pyaar aur namaste।

aaj videsh vaale bachche bhi bahut yaad aa rahe hain। chaaron or madhuban se man ki lagan lagi hui hai। baapdaada bhi sabhi bachchon ko saamne dekh vishesh yaad aur seva ka yaad-pyaar de rahe hain।

daadi ji se

nainon ki bhaasha se sarva vardaan mil gaye na! baap ke sneh aur himmat ke haath sada mastak par hai hi hai।

daadiyon se

ye sabhi samartha saathi hain na! sabhi maaya ko achhi tarah se jaanne vaale ho। aap nimitta bane hue aatmaon ke kaaran diamond jubilee mana rahe hain। (baapdaada ne daadiyon ko saamne bithaaya) aap logon ko bhi dekhne mein maza aata hai na! to baapdaada aaj amritvele diamond jubilee ke ek-ek ratna ko dekh rahe the। to mix to hain lekin chaahe chhota sangathan puraana hai aur naya sangathan bhi aapke saathi bane hain, nayon mein bhi achhe-achhe hain, naam nahin lete hain lekin guldasta himmat vaala nimitta hai tab ye kaarya diamond jubilee tak pahunch gaya hai। diamond jubilee ke last mein kaun-sa jhanda lahraayenge?yahi, jo phool baandh karke karte ho! ‘baap aa gaya’ - ye jhanda lahraao। ki kapde vaala,phoolon vaala lahraayenge?diamond jubilee mein naveenta honi chaahiye na। bachche baap se vanchit rah jaayen to raham padta hai na! anaath ban gaye hain। unhon ko baap ka parichay to denge na! nahin to aap sabke kaan pakdenge। vo log hi aapke kaan pakdenge ki kyon nahin bataaya, kyon nahi bataaya। to baapdaada dekh rahe hain ki aisa plan banaayen jismen sabhi samjhen। dhoondhate to hain ki kahaan hai,kahaan hai lekin kahaan hai?yahaan hai-ye address to denge na! to aise plan banaana। meeting karte ho na, aisa plan banaao jo sabko address mil jaaye।

taamilnaadu ke raajyapaal mahaamhim do.em.channaaredi prati avyakt baapdaada ke madhur mahaavaakya

apne ko baalak so maalik samajhte hain? jo baalak hain vo maalik zarur hain। to sada apne ko baalak so maalik - ye samajhte raho। saara parivaar aapko baalak so maalik samajhte hain। to baap ke jo avinaashi khazaane hain, shaktiyaan,gun, gyaan,sab khajaanon ke maalik ban gaye। isi khushi mein, isi nashe mein sada raho। jo aapki natural visheshta hai dridhta ki, vo dridhta ki shakti abhi is gyaan maarga mein bhi bahut kaarya mein aayegi।

baapdaada ne dekha hai ki kaisi bhi paristhitiyaan saamne aati hain lekin dil shikasta nahin hote ho। himmat rakhte ho। himmat ki visheshta hai isko sirf abhi alaukik kaarya mein lagaao। jo chaaho vo kar sakte ho। virodhiyon ko bhi shant kar sakte ho। baapdaada ne dekha jab se praja ka raajya shuru hua hai tab se governor ya minister to bahut bane hain, aap bhi bane ho lekin vartamaan samay aapki ek bhaagya ki lottery hai vo kaun-si? jo is eeshvareey kaarya ke pratyakshata karne mein aap nimitta bane। chaahe thode samay ke liye pad mila lekin jo bhi is gyaan sarovar mein baap ko pahchaanenge to uska nimitta banne vaale ko share mil jaata hai। to aap bahut bade share holdar ban gaye। aur saath-saath dekho duaaen to kaarya ke kaaran auron ko bhi milti hain lekin aapko itne braahmanon ki duaaen mili। to ek-ek brahman kitna bada hai to braahmanon ki duaaye hain,kyonki braahmanon ko bhi chance milta hai baapdaada se milne ka। to braahmanon ki duaaen aapko automatic mil rahi hain to aapke bhavishya bank mein jama ho raha hai। kaaran kya hai? ki baap aur parivaar se pyaar hai। dil ka pyaar hai, svaartha ka pyaar nahin। to jo dil ka pyaar hota hai uska pratyaksha phal milta hai,jo svaartha ka pyaar hota hai usmein saphalta nahin milti। aur dil ka pyaar saphalta dilaata hai।

aapke paas ek golden chaabi hai। pata hai kaun si golden chaabi aapko mili hai? (aapke vardaan) vo to hai hi lekin chaabi hai, sabse badhiya chaabi hai dridhta। dridhta hi saphalta ki chaabi hai। to ye chaabi aapke paas hai। seva ki hai aur karte rahenge-ye baap jaante hain। to jahaan pyaar hai na vahaan bhool nahin sakte hain। aur ye manushyaatma ka pyaar nahin hai, eeshvareey pyaar hai। pyaar sada nazdeek laata hai। theek hai na! achha,parivaar theek hai? parivaar ko bhi yaad dena। jahaan bhi jaayenge, seva karenge।

naaraayan daada se

kadam aage badha rahe ho na? kadam aage badhaana arthaat follow father। to badha hai kadam? beej avinaashi direct baap dvaara pada hua hai-ye bhaagya kam nahin hai! to isi bhaagya ko aage badhaate chalo। dekho sabhi daadiyon ka aapse kitna pyaar hai! to pyaar ka respond hai aage badhaana। baaki theek hai sab, parivaar theek hai? achha!

jagdeesh bhaai ji se

achha kiya dilli ne। dilli ne number le liya। abhi aur bhi aise mike taiyaar karo jo aapke taraph se bolen ki ye parmaatma maarga hai। aur karne ke nimitta to aap bane hue ho hi। aadi se vardaan hai isliye karte chalo। baaki achha kiya dilli ne,apni himmat,unity aur saphalta-teenon dikhaai। sabhi ko mubaarak to hai hi lekin ye ek kaarya ki mubaarak hai। abhi aage bhi karna hai।

baapdaada ne nau ratnon mein aane ke liye jin 9baaton se mukta banne ka ishaara diya hai woh nimna likhit hain:-

1.krodh mukta

2.vyartha sankalp mukta।

3.lagaav mukta।

4.parmat, parchintan aur pardarshan mukta।

5.abhimaan va apmaan mukta।

6.jhamela mukta।

7.vyartha bol,disturb karne vaale bol se mukta।

8.aprasannata mukta।

9.dilshikasta mukta।