Avyakt murli du mardi 27 février 1996

>

27-02-96 om shanti avyakt baapdaadaamdhuban

‘‘satyata ka foundation hai pavitrata aur nishaani hai-chalan va chehre mein divyata’’

aaj sat-baap, sat-shikshak,satguru apne chaaron or ke satyata ke shakti swaroop bachchon ko dekh rahe hain। satyata ka foundation pavitrata hai। aur satyata ka practical pramaan chehre par aur chalan mein divyata hogi। duniya mein bhi anek aatmaayen apne ko satyavaadi kehte hain va samajhte hain lekin sampoorn satyata pavitrata ke aadhaar par hoti hai। pavitrata nahin to sada satyata rah nahin sakti hai। to aap sabka foundation kya hai? pavitrata। to pavitrata ke aadhaar par satyata ka swaroop svatah aur sahaj sada hota hai। satyata sirf sach bolna, sach karna isko nahin kaha jaata lekin sabse pahla satya jisse aapko pavitrata ki va satyata ki shakti aai, to pahli baat hai apne satya swaroop ko jaana, main aatma hoon-ye satya swaroop pahle nahin jaante the। lekin pahla satya apne swaroop ko jaana। main phalaani hoon ya phalaana hoon, body ke hisaab se woh satya swaroop tha? satya swaroop hai pahle sva swaroop aur phir baap ke satya parichay ko jaana। achhi tarah se apna satya swaroop aur baap ka satya parichay jaan liya hai? teesri baat-is srishti chakra ko bhi satya swaroop se jaana। yeh chakra kya hai aur ismen mera part kya hai! to apna part achhi tarah se spashta roop se jaan liya? aapka part achha hai na? sabse achha part sangamayug ka kahenge। lekin aapka dev aatma ka part bhi vishwa mein saare chakra ki aatmaon se shreshtha hai। chaahe dharma aatmaayen, mahaan aatmaayen bhi part bajaati hain lekin vo aatma aur shareer donon se pavitra nahin hain aur aap dev aatmaayen shareer aur aatma donon se pavitra hain, jo saare kalpa mein aur koi aatma aisi nahin। to pavitrata ka foundation sivaae aapke aur koi bhi aatma ka shreshtha nahin hai। aapko dev aatma ka part yaad hai?paandavon ko yaad hai? dev aatma ki pavitrata natural roop mein rahi hai। mahaan aatmaayen, aatmaon ko pavitra banaati hain lekin bahut purooshaartha se,natural nahin। na natural hai na nature roop mein hai। aur aapki aadha kalpa pavitrata ki jeevan natural bhi hai aur nature bhi hai। koi purooshaartha vahaan nahin hai। yahaan ka purooshaartha vahaan natural ho jaata hai। kyonki vahaan apvitrata ka naam-nishaan nahin, maaloom hi nahin ki apvitrata bhi hoti hai। isliye aapke pavitrata ka practical swaroop devta arthaat divyata ka hai। is samay duniya vaale kitna bhi apne ko satyavaan samjhen lekin sva swaroop ki satyata hi nahin jaante। baap ke satya parichay ko hi nahin jaante। to sampoorn satya swaroop nahin kahenge। aapmen bhi satyata ki shakti sada tab rahegi jab apne aur baap ke satya swaroop ki smriti rahegi,to svatah hi har sankalp bhi aapka satya hoga। abhi kabhi bhool bhi jaate ho, body conscious mein aa jaate ho to sankalp sada satyata ke shaktishaali ho,pavitrata ke shaktishaali ho, woh sada nahin rehta। sada rehta hai ki vyartha bhi hota hai? to vyartha ko satya kahenge?jhooth to bola hi nahin to kyon nahin satya hai? agar koi yeh samajhkar baithe ki main kabhi bhi jhooth nahin bolti,sada sach bolti lekin satyata ki parakh hai ki sankalp, bol,karma, sambandh-samparka sabmen divyata anubhav ho। bol sach rahe hain lekin divyata nahin hai, dekhte ho na-kai baar-baar kahenge main sach bolti, main sach bolti। main sada sachchi hoon lekin bol mein,karma mein agar divyata nahin hai to doosre ko aapka sach, sach nahin lagega। yahi samjhenge ki yeh apne ko siddha kar rahi hai lekin samajh mein nahin aata ki yeh satya hai। satya ko siddha karne ke liye siddha karne ki aavashyakta nahin hai। agar apne satya ko jidda se siddha karte hain to woh divyata dikhaai nahin deti hai। ye saadhaaranta hai,jo duniya mein bhi karte hain। aur baapdaada satya ki nishaani ek slogan mein kehte hain, saakaar dvaara bhi suna jo sachcha hoga woh kaise dikhaai dega! sach to nach। sada khushi mein naachta rahega। jab jidda karke siddha karte to aap apna ya doosre ka chehra note karenge to woh khushi ka nahin hoga। thoda sochne ka aur thoda udaasi ka hoga। naachne ka nahin hoga। sach to bitho nach,sachcha khushi mein naachta hai। to khushi mein jeevan ke din ya raat bahut achhi lagti hai। aur thoda bhi satya mein asatya mix hai to us samay ki jeevan itni achhi nahin lagegi। to satyata ka arth hi hai satya swaroop mein sthit hokar chaahe sankalp,chaahe bol,chaahe karma karna।

aajkal duniya vaale to spashta kehte hain ki aajkal sachche logon ka chalna hi mushkil hai,jhooth bolna hi padega। lekin kai samay par, kai paristhitiyon mein brahman aatmaayen bhi mukh se nahin bolti lekin andar samajhti hain ki kahaan-kahaan chaturaai se to chalna hi padta hai। usko jhooth nahin kehte lekin chaturaai kehte hain। to chaturaai kya hai? yeh to karna hi padta hai! to woh spashta bolte hain aur brahman royal bhaasha mein bolte hain। phir kehte hain mera bhaav nahin tha, na bhaavna thi na bhaav tha lekin karna hi padta hai,chalna hi padta hai। lekin brahma baap ko dekha, saakaar hai na, niraakaar ke liye to aap bhi sochte ho ki shiv baap to niraakaar hai,oopar maje mein baitha hai, neeche aave to pata pade kya hai! lekin brahma baap to saakaar swaroop mein aap sabke saath hi rahe, student bhi rahe aur satyata va pavitrata ke liye kitni aapozeeshan hui to chaalaaki se chala? logon ne kitna raay di ki aap seedha aise nahin kaho ki pavitra rehna hi hai,yeh kaho ki thoda-thoda raho। lekin brahma baap ghabraaya?satyata ki shakti dhaaran karne mein sahanshakti ki bhi aavashyakta hai। sahan karna padta hai, jhukna padta hai, haar maanni padti hai lekin woh haar nahin hai, us samay ke liye haar lagti hai lekin hai sada ki vijay।

satyata ki shakti se aaj diamond jubilee mana rahe hain। agar pavitrata aur satyata nahin hoti to aaj aapke chehron se, chalan se aane vaalon ko jo divyata anubhav hoti hai woh nahin hoti। chaahe pyaada bhi hai, nambarvaar to hai hi na। mahaarthi bhi hain,naam ke mahaarthi nahin,lekin jo sachche mahaarthi hain arthaat satyata ki shakti se chalne vaale mahaarthi hain। jo paristhiti ko dekhkar satyata se zara bhi kinaara kar lete, kehte hain aur kuchh nahin kiya ek do shabd aise bol diye, dil se nahin bole aise baahar se thoda bol diye to yeh sampoorn satyata nahin hai। satyata ke peechhe agar sahan bhi karna padta to woh sahan nahin hai bhal baahar se lagta hai ki ham sahan kar rahe hain lekin aapke khaate mein woh sahan shakti ke roop mein jama hota hai। nahin to kya hota ki agar koi thoda sa bhi sahan karne mein kamjor ho jaata hai to use asatya ka sahaara zaroor lena padta hai। to us samay aise lagta hai jaise sahaara mil gaya,theek ho gaya lekin uske khaate mein sahanshakti jama nahin hoti hai। to baahar se aise samjhenge ki ham bahut achhe chalte hain, hamko chalne ki chaturaai aa gai hai, lekin agar apna khaata dekhenge to jama ka khaata bahut kam hoga। isliye chaturaai se nahin chalo, ek do ko dekhkar bhi kaapi karte hain, yeh aise chalti hai na to iska naam bahut achha ho gaya hai, yeh bahut aage ho gai hai aur ham sachche chalte hain na to ham peechhe ke peechhe hi rah gaye। lekin woh peechhe rehna nahin hai, woh aage badhna hai। baap ke aage,aage badhte ho aur doosron ke aage chaahe peechhe dikhaai bhi do lekin kaam kisse hai! baap se ya aatmaon se? (baap se) to baap ke dil mein aage badhna arthaat saare kalpa ke praalabdha mein aage badhna। aur agar yahaan aage badhne mein aatmaon ko copy karte ho,to us samay ke liye aapka naam hota hai,shaan milta hai, bhaashan karne vaali list mein aate ho, centre sambhaalne ki list mein aate ho lekin saare kalpa ki praalabdha nahin banti। jisko baapdaada kehte hain mehnat ki,beej daala,vriksha bada kiya, phal bhi nikla lekin kachcha phal kha gaye, hamesha ke liye praalabdha ka phal khatma ho jaata hai। to alpakaal ke shaan, maan,naam ke liye copy nahin karo। yahaan naam nahin hai lekin baap ke dil mein number aage naam hai। isliye diamond banna hai to yeh sab checking karo। zara bhi royal roop ka daag diamond mein chhipa hua to nahin hai?to satyata ki shakti se divyata ko dhaaran karo। kuchh bhi sahan karna pade,ghabraao nahin। satya samay pramaan svayan siddha hoga। kehte bhi ho na ki satya ki naav dolti hai lekin doobti nahin,to kinaara to le lenge na। nirbhay bano। agar kahaan bhi saamna karna padta hai to brahma baap ke jeevan ko aage rakho। brahma baap ke aage duniya ki paristhitiyaan to thi lekin variety bachchon ki bhi paristhitiyaan raheen lekin sangathan mein hote, jimmevaari hote satyata ki shakti se vijayi ho gaye। bachchon ki khitkhit brahma baap ne nahin dekhi kya? brahma baap ke aage bhi variety sanskaar vaali aatmaayen rahi, lekin itni sab paristhitiyaan hote hue satyata ki sva-sthiti ne sampoorn bana diya।

to aap sabko kya banna hai? chaturaai to nahin hai na! bahut achha bolte hain - mainne kuchh nahin kiya thoda chaturaai se to chalna hi padta hai। lekin kab tak?to sahanshakti dhaaran kar asatya ka saamna karo। prabhaav mein nahin aa jaao। kai samajhte hain ki hamne mahaarthiyon mein bhi aise dekha na to follow to mahaarthiyon ko karna hai na,abhi brahma baba to saamne hain nahin, mahaarthi hain usko follow kiya। lekin agar mahaarthi bhi mix karta hai,chaturaai se chalta hai to us samay mahaarthi, mahaarthi nahin hai। us samay grahchaari mein hai na ki mahaarthi hai। iseelie baap ne kya slogan diya-follow father ya sister brother?to saakaar karma mein brahma baap ko aage rakho,follow karo aur ashareeri banne mein niraakaar baap ko follow karo। chaahe achhe-achhe bachche bhi hain lekin woh bhi follow father karte hain। to aapko kya karna hai? follow father। pakka ya thoda-thoda advantage milta hai to le lo bhavishya mein dekha jaayega? kai aise bhi sochte hain ki satayug mein chaahe kam pad paayenge lekin sukhi to honge hi। duhkh to hoga hi nahin। sab praaptiyaan to hongi। chaahe praja ki bhi praja hogi to bhi apraapti to hogi nahin, to abhi to maza le len,peechhe dekha jaayega। lekin yeh alpakaal ka maza, saza ke bhaagi bana dega। to woh manjoor hai, saja khaayenge thodi! woh bhi maza le lo? nahin!

to teenon baaten yaad rakho-pavitrata,satyata aur divyata। aise saadhaaran bol nahin, saadhaaran sankalp nahin,saadhaaran karma nahin, divyata। divyata ka arth hi hai divya gun dvaara karma karna, sankalp karna, vahi divyata hai। jaise log poochhte hain na ki paap karma kya hota hai? to aap kehte ho ki koi bhi vikaar ke vash karma karna yeh paap hai। aise samjhaate ho na! to divyata arthaat divya gun ke aadhaar par man-vachan aur karma karna। to satyata ka mahatva jaana!

(drill)

ek second mein apne ko ashareeri bana sakte ho? kyon?sankalp kiya main ashareeri aatma hoon, to kitna time laga? second laga na! to second mein ashareeri, nyaare aur baap ke pyaare - ye drill saare din mein beech-beech mein karte raho। karne to aati hai na? to abhi sab ek second mein sab bhoolkar ekdam ashareeri ban jaao। (baapdaada ne 5 minute drill karaai)achha।

chaaron or ke sarva pavitrata ke foundation ko sada majboot rakhne vaale,sada satyata ki shakti se vishwa mein bhi satayug arthaat satyata ki shakti ke vibration phailaane vaale sada har samay man-vaani-karma teenon mein divyata dhaaran karne vaale, sada follow father karne ke natural abhyaas vaali aatmaon ko baapdaada ka yaadapyaar aur namaste।

is drill ko din mein jitna baar jyaada kar sako utna karte rehna। chaahe ek minute karo। teen minute,do minute ka time na bhi ho ek minute, aadha minute yeh abhyaas karne se last samay ashareeri banne mein bahut madad milegi। ban sakte hain? abhi sabhi ashareeri hue ya yuddha mein, mehnat karte-karte time poora ho gaya? second mein ban sakte ho! bahut kaam hai phir bhi ban sakte ho? mushkil nahin hai? yu.N. mein bahut bhaag daud kar rahi ho aur ashareeri banne ki koshish karo,hoga? agar yeh abhyaas samay prati samay karenge to aise hi natural ho jaayega jaise shareer bhaan mein aana, mehnat karte ho kya?main phalaani hoon, yeh mehnat karte ho?natural hai। to yeh bhi natural ho jaayega। jab chaaho ashareeri bano, jab chaaho shareer mein aao। achha kaam hai aao is shareer ka aadhaar lo lekin aadhaar lene vaali main aatma hoon, woh nahin bhoole। karne vaali nahin hoon,karaane vaali hoon। jaise doosron se kaam karaate ho na। us samay apne ko alag samajhte ho na! vaise shareer se kaam karaate hue bhi karaane vaali main alag hoon,yeh practice karo to kabhi bhi body conscious ki baaton mein neeche oopar nahin honge। samjha।

double videshi aage jaane chaahte ho na! hain bhi achhe, attention achha hai। seva mein bhi umang-utsaah achha hai। aur badhta rahega।

double videshiyon se poochh rahe hain ki sabhi ne is varsha jo seva ki, jo project mila, usmein santushta rahe?sabhi ne programme kiya na? to santushta hain?haan ya na?kuchh bhi seva karo chaahe jigyaasu course vaale aave ya nahin aave lekin svayan,svayan se santushta raho। nishchay rakho ki agar main santushta hoon to aaj nahin to kal yeh message kaam karega, karna hi hai। ismen thoda sa udaas nahin bano। kharcha to kiya… programme bhi kiya… lekin aaya koi nahin। student nahin badhe, koi harja nahin aapne to kiya na। aapke hisaab-kitaab mein jama ho gaya aur unhon ko bhi sandesh mil gaya। to time par sabhi ko aana hi hai, isliye karte jaao। kharcha bahut hua, usko nahin socho। agar svayan santushta ho to kharcha saphal hua। ghabraao nahin, pata nahin kya hua! kai bachche aise kehte hain mera yog theek nahin tha, tabhi yeh hua। kisse yog tha? aur koi hai kya jisse yog tha?yog hai aur sada rahega। baaki koi season ka phal hai, koi har samay ka phal hai। to agar aaya nahin to season ka phal hai,season aayegi। dilshikasta nahin bano। kyonki shreemat ko to maana na। shreemat pramaan kaarya kiya। iseelie shreemat ko maanna yeh bhi ek saphalta hai। badhte jaao, karte jaao। aur hi pashchaataap karke aapke paanv padenge ki aapne kaha hamne nahin maana। yahaan hi aap deviyaan banengi। aapke paanv par padenge, tabhi to bhakti mein bhi paanv padenge na। to woh time bhi aana hai jo sab aapke paanv padenge ki aapne kitna achha hamaara kalyaan kiya।

abhi to aai.pi. bhi achhe-achhe laate hi ho। baapdaada ke paas to result aati hi hai to achhe-achhe vi.aai.pi., aai.pi. bhi laaye, woh bhi saphalta hui। aage bachchon ka programme bhi kiya na। bachchon mein kitne bachche foreign ke the? (100)ek sau foreign ke the aur abhi phir mahilaaon ka kar rahe ho। woh bhi taiyaari kar rahe ho। to aage badh rahe ho na? pahle jab kehte the aai.pi. laao to kehte the foreign se bahut mushkil hai, bahut mushkil hai,yeh jayanti bolti thi। abhi kya bolti hai?sahaj। aur yeh diamond jubilee hai na to dekho bhaarat mein bhi jo programme hue hain woh bhi majority sabhi jagah bahut saphal hua hai। kyonki yeh jo vidhi rakhi hai na ki sabhi diamond jubilee ke kaaran deepak jagaane aaven, to woh samajhte hain hamko koi position mila। vaise kahenge aao sunne to nahin aate। to diamond jubilee ki vidhi ke kaaran abhi aai.pi. connection mein achhe aaye hain aur aate rahenge। kyonki agyaani hain na to sirf sunne jaana hai,to deh abhimaan aata hai। aur kuchh karna hai to samajhte hain kuchh position hai। to jisko jo chaahiye woh de diya, aapka kaam ho gaya,abhi deepak jagaane mein vaise socho to kya hai? lekin woh khush ho jaate hain। samajhte hain hamaara regard rakha। to desh videsh mein diamond jubilee ki jo seva kar rahe ho woh saphal hai aur rahegi। achha।

mahilaayen kitni aa rahi hain? (180) unke nimitta kaun-kaun hain?seva achhi lagti hai na?thakte to nahin?

teachers haath uthaao। teachers thakti ho? jo thoda-thoda kabhi thakta ho? woh to haath uthaayenge nahin। jo kabhi thakta nahin teachers mein woh haath uthaao। paandav haath utha rahe hain, bahnon ne nahin uthaaya to paandav paas ho gaye। mubaarak। thako nahin। jis samay thakaavat feel ho na to kahaan bhi jaakar dance shuru kar do। chaahe bathroom mein। kya hai isse mood change ho jaayegi। chaahe man ki khushi mein naacho, agar woh nahin kar sakte ho to sthool mein geet bajaao aur naacho। foreign mein dance to sabko aata hai। dance karne mein to hoshiyaar hain। pharishta dance to aata hai। achha।

(sheel daadi aur raami behen baapdaada ke sammukh aai tatha gale mili)

apne ghar madhuban mein pahunch gai na। khush hai na?khush rehti ho aur sada khush raho। bahut achha himmat se hisaab-kitaab ko chuktu kiya। himmat achhi hai। diamond jubilee manaane aai ho na। (raami se) theek hai?

(madhuban ke praphulla bhaai ne accident mein shareer chhoda hai) bachcha achha tha aur seva ke umang-utsaah mein bhi raha lekin hisaab-kitaab ka time banta hai to koi na koi kaaran se ban hi jaata hai। baaki bachcha svayan theek tha। (baba jab bachchon ko madad karta hai to us time kyon nahin ki?)unka hisaab usi driver se usi sthaan se hota hai। bhaavi ko nahin taal sakte। (doctor ne bachaane ke bahut prayaas kiye) sabhi ka pyaar bhi tha। mrityu ki date tal nahin sakti। bhagwan bhi badal nahin sakta।

gyaan sarovar mein SpARC meeting (research) ke liye aaye hue bhaai bahinon se

sabhi research karne ke liye ikatthe hue hain। achha hai jitna antarmukhta ke kamre mein baith research karenge utna achhe se achhi touching hongi। aur isi touching se anek aatmaon ko laabh milega। to achha hai। karte raho lekin prayog aur yog donon ka balance rakhte aage badhte chalo। baaki achha hai। jitna manan karo utna hi makkhan nikalta hai। to koi na koi achha maakhan nikaalenge jo sabmen shakti bhare। achha।