Avyakt murli du vendredi 28 novembre 1997

>

28-11-97 om shanti avyakt baapdaadaamdhuban

behad ki seva ka saadhan - roohaani personality dvaara nazar se nihaal karna

aaj baapdaada apne anek kalpa ke milan manaane vaale laadle,sikeeldhe bachchon se phir se milan manaane aaye hain। avyakt milan to sada manaate hi ho lekin avyakt se vyakta roop mein milan manaane ke liye sabhi bachche bhaarat va videsh se phir se apne ghar pahunch gaye hain। baapdaada dekh rahe hain ki chaaron or bachche apne-apne sthaan par bhi milan mana rahe hain। yeh milan roohaani alaukik milan hai। is milan mein baapdaada aur bachchon ke sneh ka saakaar swaroop hai।

aaj baapdaada apne bachchon ki roohaani personality ko dekh rahe hain। har ek bachche ki roohaani personality kitni shreshtha hai। aisi roohaani personality saare kalpa mein aur kisi ki bhi nahin hai kyonki aap sabki personality banaane vaala oonche te ooncha baap hai। aap bhi apni roohaani personality ko jaante hain na? sabse bade te badi personality hai - svapna va sankalp mein bhi sampoorn purity ki personality। nambarvaar hai lekin phir bhi vishwa ki sarva aatmaon se shreshtha hai। to baapdaada har ek ke mastak se personality ki jhalak dekh rahe hain। purity ke saath-saath sabke chehre aur chalan mein roohaaniyat ki bhi personality hai। aur personality kya hoti hai?jo khazaanon se sampanna hote hain, uski bhi personality hoti hai lekin kitne bhi bade-bade sampanna aatmaayen hon,aapke aage woh sampanna aatmaayen bhi kuchh nahin hain kyonki woh bhi avinaashi sukh-shanti ke khazaane se khaali hain। aapke paas jo sampatti hai uske aage arab-kharab-pati bhi baap se sukh-shanti maangane vaale hain aur aap sada avinaashi khazaanon se bharpoor ho। woh khazaane aaj hain kal nahin lekin aapka khazaana na koi loot sakta hai, na koi aatma khazaane ko hila sakti hai। akhut hai,akhanda hai। aisi personality vaale aap bachche ho। sabse oonche te oonchi personality vaale phir bhi aatmaon dvaara, vinaashi dhan dvaara, vinaashi occupation dvaara personalities banti hain va kahlaai jaati hain। lekin aapko oonche te oonche param aatma ne shreshtha personality vaale bana diya। to apne oonchi personality ka roohaani nasha rehta hai? rehta hai to haath hilaao।

baapdaada ko itne shreshtha personality vaale bachche dekh kitni khushi hoti hai। aapko bhi hoti hai? baapdaada bachchon ki aisi shreshthata ko dekh kya geet gaate hain, jaante ho? aap bhi gaate hain, baap bhi gaate hain। baap ka geet sunaai deta hai ya tape ka geet sunaai deta hai?baapdaada ki tape nyaari hogi na, automatic hai। chalaane ki mehnat nahin karni padti। aur dil ka geet dil vaale hi sun sakte hain। sirf kaan vaale nahin, dil vaale। to sabhi dil vaale ho na?dilvaala mandir mein aapka chitra hai na? sabhi ne apna chitra dekha hai? baapdaada to sada bachchon ke chitra aur charitra dekhte rehte hain। to aaj personality ko dekh rahe the। sada yeh personality smriti mein emerge rahe। hai hi, nahin। hai, dikhaai deve। anubhav mein aaye। sada aisi personality mein rahne vaale ki nishaani kya hogi? jis nishaani se samajh jaaen ki yeh apne personality mein hai? agar yeh roohaani personality emerge roop mein rehti hai to unke nayan, unka chehra, chalan,sankalp aur sambandh sab prasannata vaale honge। sada prasannachit,prashnichitta nahin, prasannichit। agar prashnachit hai to chalan bhi personality vaali nahin। chehre par bhi prasannata ki jhalak nahin। kuchh bhi ho jaae,personality vaale ki prasannata chhip nahin sakti। merge nahin ho sakti। prasannachit aatma; koi kaisi bhi aatma pareshaan ho, ashaanta ho usko apne prasannata ki nazar se prasanna kar degi। jo baap ka gaayan hai ‘‘najar se nihaal karne vaale'', woh sirf baap ka nahin hai aapka bhi yahi gaayan hai। aur abhi samay pramaan jitna samay sameep aa raha hai to nazar se nihaal karne ki seva karne ka samay aayega। saat din ka course nahin hoga, ek nazar se prasannachit ho jaayenge। dil ki aash aap dvaara poorn ho jaayegi। to sabhi kya samajhte ho? aadi seva ke ratna kya samajhte hain? aisi seva kar sakte ho na?

abhi dekho aap logon ne 40 varsha seva ki ya jyaada bhi ki,koi ka ek do saal kam bhi hoga, kiska jyaada bhi hoga। abhi aap logon ne apne saathiyon ko yeh seva sikha di aur nimitta bhi bana diya। abhi aap kya karenge? vo seva to woh bhi kar rahe hain। aap aadi ratna ho to nyaari aur pyaari seva karenge na? abhi phir utsav manaayenge ki nazar se nihaal kitne kiye। 9 laakh mein se kitne banaaye?aage to 33karod bhi hain, 9 laakh to uske aage kuchh nahin hain। beej to yahaan hi daalna hai na? to dekhenge ki aadi seva ke ratna ab aur kya kamaal dikhaate hain। yeh kamaal to dikhaai, sevaakendra banaaye, achhe-achhe programme kiye, uski to padamguna mubaarak hai। do prakaar ke bachche hain jo pahle vaale hain woh hain sthaapna ke nimitta bachche aur aap log ho vishesh seva ke aadi ke bachche। yeh (daadiyaan) hain jad sthaapna vaale aur aap sab (seva ke aadi ratna) hain pahla-pahla tana। to tana to majboot hota hai na। tana par hi sab aadhaar hota hai। tana se hi sab shaakhaayen nikalti hain। jad vaale to sookshm mein shakti dete hain lekin jo practical mein hota hai,dikhaai deta hai, woh tana dikhaai deta hai। to daadiyaan abhi gupta ho gai hain, sakaash dene vaali aur practical mein stage par aane vaale aap nimitta banen, (sammaan samaaroh mein aai hui sabhi badi bahinon se baapdaada ne haath uthvaaya) iseelie baapdaada kaam de rahe hain। samaaroh to bahut achha manaaya na। baapdaada ne sab dekha। saji hui moortiyon ko dekha। us samay to aap logon ko bhi yahi roohaani anubhav ho raha tha ki ham chaitanya moortiyaan hain। aise hi lag raha tha jaise saji hui moortiyaan mandiron se shaantivan mein pahunch gai hain।

to baapdaada abhi bachchon se chaahte hain ki abhi fast seva shuru karo। jo hua woh bahut achha। ab samay pramaan auron ko jyaada vaani ka chance do। abhi auron ko mike banaao,aap might banke sakaash do। to aapki sakaash aur unhon ki vaani, yeh double kaam karegi। tab hi 9 laakh sahaj ban jaayenge। abhi aap sabhi chaahe function mein baithe ya aur bhi mahaarthi hain to mahaarthiyon ki abhi seva hai - sarva ko sakaash dena। behad ki seva ke maidaan mein aana। jab baap avyakt vatan,ek sthaan par baithe chaaron or ke vishwa ke bachchon ki paalna kar sakte hain, kar rahe hain to kya aap ek sthaan par baithe baap samaan behad ki seva nahin kar sakte ho?aadi ratna arthaat follow father। behad mein sakaash do। kai bachche apne se bhi poochhte hain aur aapas mein bhi poochhte hain ki behad ka vairaagya kaise aayega?dikhaai to deta nahin hai,lekin behad ki seva mein apne ko busy rakho to behad ka vairaagya svatah hi aayega kyonki yeh sakaash dene ki seva nirantar kar sakte ho, ismen tabiyat ki baat,samay ki baat - yeh sahaj ho jaati hai। din raat is behad ki seva mein lag sakte ho। jaise brahma baap ko dekha raat ko bhi kaise aankh khuli aur behad ki sakaash dene ki seva hoti rahi। to yeh behad ki seva itna busy kar degi jo behad ka vairaagya svatah hi dil se aayega। programme se nahin। yeh karen,yeh karen - yeh plan to banaate ho,lekin busy behad ki seva mein rehna - yeh sabse sahaj saadhan hai kyonki jab behad ko sakaash denge to najdeek vaale to automatic sakaash lete rahenge। is behad ki sakaash dene se vaayumandal automatic banega। abhi yeh nahin socho ki itne centre ke jimmevaar hain va zone ke jimmevaar hain! aap sabhi ko state ke raaja banna hai ya vishwa ka? kya banna hai? vishwa ka na? aadi ratna ho to vishwa ko sakaash dene vaale bano। agar 20centre, 30 centre ya do adhaai sau centre ya zone,yeh buddhi mein rahega to yeh bhi tana ka kaam nahin hai। yeh to taal taaliyaan bhi kar sakti hain। aap to tana ho। tana se sabko sakaash pahunchti hai। aap sabhi bhi yeh sochte ho ki behad ka vairaagya aana chaahiye, yeh to bahut achha। abhi vinaash ho jaae। lekin 9laakh hi taiyaar nahin kiye, to satayug ke aadi mein aane vaali sankhya hi taiyaar nahin hai aur vinaash ho gaya to kaun aayega? kya2-3 hajaar par raajya karenge? 4- 5 laakh par raajya karenge?isliye ab behad ki seva ka part praarambh karo। paandav kya samajhte hain? behad ki seva karenge na? paandav taiyaar hain? abhi yeh had ki baaten behad mein jaane se aapehi chhoot jaayengi। chhudaane se nahin chhootengi। behad ki sakaash se parivartan hona fast seva ka result hai।

baapdaada jaante hain ki naazuk paristhitiyon mein nimitta bani aatmaon ne seva ka pratyaksha pramaan diya hai। lekin aap sabhi ka foundation va second ka parivartan ka mool anubhav yahi hai ki brahma baap ko dekha aur brahman ban gaye। seva ka vardaan mila aur seva mein lag gaye। baapdaada ne sabhi ke anubhav bhi sune। achhe anubhav sunaaye। to jaise aap logon ka anubhav hai,brahma baap ko dekha aur sochna bhi nahin pada। sahan karne ka bhi anubhav nahin hua ki sahan kar rahe hain। badi baat nahin lagi। aise abhi har shreshtha brahman aatma ko dekhen aur aatma mein (brahman mein) brahma baap dekhen। yeh hai seva ka fast saadhan,kya brahma baap ne aapko course karaaya? course to peechhe kiya। lekin dekha aur ho gaye। to jaise brahma baap mein baap samaaya hua tha iseelie mehnat nahin lagi। aise aap sabhi bhi baapdaada ko apne mein samaate hue nazar se nihaal karo। jo aap sabka anubhav hai, anubhvi ho। dekha aur fida ho gaye। jaise abhi sochte hain,training lete hain phir trial par aate hain, phir koi chala jaata hai koi rehta hai। itni mehnat aapne li?training ki kya? trial par rahe kya?bas aaye aur kho gaye। aisi seva jab ek brahma baap ne ki to aap itne brahman aatmaayen nahin kar sakti ho kya? aapki personality apna bana de। brahma baap ki bhi personality thi na। chaahe soorat ki, chaahe seerat ki lekin personality thi tab aakarshit hue। to follow father। jab baap ne aapko aadi mein nimitta banaaya to jo aadi ke hain,seva ke nimitta va sthaapna ke foundation unko ant tak seva mein rehna hi hai। tabiyat ke kaaran shareer se chakkar nahin laga sakte lekin man se to laga sakte ho? usmein to kharcha bhi nahin, veeza lene ki bhi jaroorat nahin। bhaag daud ki bhi jaroorat nahin। lete-lete bhi kar sakte ho। kya samajhte ho?ab aisa koi plan banaao। naya paath shuru karo। abhi ek function to mana liya na। jo seva ki uska pratyaksha phal mil gaya। abhi nai seva karo। achha।

baapdaada sirf saamne vaalon ko nahin kah rahe hain,sabhi bachchon ko kah rahe hain। videsh mein bhi jo sun rahe hain unhon ko bhi kah rahe hain। jahaan bhi sun rahe hain, chaahe shaantivan mein sun rahe hain,chaahe oopar paandav bhavan mein, chaahe videsh mein, jahaan bhi hain vahaan baapdaada sabhi ke liye kah rahe hain। ab behad ke sevaadhaari bano। samay behad ki seva mein lagaao। behad ki seva mein samay lagaane se samasya sahaj hi bhaag jaayegi kyonki chaahe agyaani aatmaayen hain,chaahe brahman aatmaayen hain lekin agar samasya mein samay lagaate hain va doosron ka samay lete hain to siddha hai ki woh kamjor aatmaayen hain,apni shakti nahin hai। jisko shakti nahin ho, paanv langada ho aur usko aap kaho daud lagaao, to lagaayega ya girega? to samasya ke vash aatmaayen chaahe brahman bhi hain lekin kamjor hain, shakti nahin hai, to woh kahaan se shakti laayen?baap se direct shakti le nahin sakta kyonki kamjor aatma hai। to kya karenge? kamjor aatma ko doosre koi ka blood dekar taakat mein laate hain, koi shaktishaali injection dekar taakat mein laate hain, to aap sabmen shaktiyaan hain। to shakti ka sahayog do,gun ka sahayog do। unhon mein hai hi nahin, apna do। pahle bhi kaha na - daata bano। woh asmartha hain,unhon ko samarthi do। gun aur shakti ka sahayog dene se aapko duaayen milengi aur duaayen lift se bhi tej rocket hain। aapko purooshaartha mein samay bhi dena nahin padega,duaaon ke rocket se udte jaayenge। purooshaartha ki mehnat ke bajaae sangam ke praalabdha ka anubhav karenge। duaayen lena - woh seekho aur sikhaao। apna natural attention aur duaayen, attention bhi tension mix nahin hona chaahiye, natural ho। knowledge ka darpan sada saamne hai hi। usmein svatah sahaj apna chitra dikhaai deta hi rahega। iseelie kaha ki personality ki nishaani hai prasannachit। yeh kyon, kya,kaise। yeh ke ke ki bhaasha samaapta। duaayen lena aur dena seekho। prasanna rehna aur prasanna karna - yeh hai duaayen dena aur duaayen lena। kaisa bhi ho aapki dil se har aatma ke prati har samay duaayen nikalti rahen - iska bhi kalyaan ho। iski bhi buddhi shant ho। yeh aisa, yeh vaisa - aisa nahin। sab achha। yeh ho sakta hai? duaayen dene aati hain?lene to aati hain, dene bhi aati hain?denge nahin to lenge kaise?do aur lo। yeh kare nahin,main karoon। brahma baap ka sada slogan raha, brahma baap baar-baar yaad dilaate rahe - jo karma main karoonga,mujhe dekh aur karenge। jab doosre karenge tab main karoonga … yeh slogan nahin। jo main karoonga mujhe dekh aur karenge। nahin to slogan change kar do aur jagdamba maa ka vishesh slogan raha - hukmi hukm chala raha hai। woh chala raha hai,ham nimitta ban chal rahe hain। to donon slogan sada yaad rakho, emerge। hai hi, suna hai … yaad to rehta hai…, nahin। karma mein dikhaai de। to kya karenge?duaayen lenge, duaayen denge ki glaani karenge, feel karenge - yeh aisa, yeh vaisa? nahin। usko duaayen do। kamjor hai,vasheebhoot hai। bhaasha aur sankalp badli karo। yeh sankalp maatra bhi na ho ki yeh badle, nahin। main badloon। aur baaton mein to main main ka aata hai lekin jis baat mein main aana chaahiye,usmein aur kare to karen,yeh kya? achha kaam hoga to kahenge main। aur aisa koi kaam hoga to kahenge isne kiya, isne kaha। ulta ho gaya na। koi kya bhi karta hai, mujhe kya karna hai,mujhe kya sochna hai, mujhe kya kehna hai,ismen main-pan laao। body conscious vaala main nahin, seva ka main। to aise hi shreshtha vibration phailaao। abhi vaani kam kaam karti hai, dil ka sahayog, dil ke vibration bahut jaldi kaam kar sakte hain। to yeh ho sakta hai?

agar ho sakta hai to shubh kaarya mein deri kyon?ab se ho sakta hai? paandav sunaao। phir vahaan jaakar nahin badal jaana। vahaan jaakar kahenge - baapdaada to kehte hain lekin saakaar mein to ham hain na। baapdaada ko kya pata,kya hota hai। aise nahin kehna। maataayen kya kahengi? baapdaada bachchon ko sambhaale to pata pade, aise sochengi? baapdaada ne aap badon ko sambhaala, chhote kya badi baat hain। to vahaan jaakar badal nahin jaana। aap logon ka ek geet hai na - badal jaae duniya na badlenge ham। yeh geet pakka hai, right hai? agar theek hai to haath uthaao। phir to aapki jo 21veen senchuri ki conference hai na woh practical ho jaayegi। theek hai na! practical mein srishti ko naksha dikhaao। yeh hoga, hoga nahin, ho gaya hai। kya hua? agar maanon aapne glaani ya distarbens sahan bhi kar liya, sama bhi liya to aapka sahan karna,samaana,aapke liye apni raajdhaani nishchit hona। aapko kya nuksaan hua?phaayda hi hua। dekhne mein aata hai - bada mushkil hai। baat bahut badi hai lekin aapne sahan kiya,samaaya aur aapka stamp lag gaya, aapki raajdhaani ban gai। to phaayda hua ya nuksaan hua?

abhi is season mein baapdaada aisa chaaron or ka swaroop dekhne chaahte hain। har season mein vahi baaten sunna achha nahin lagta। vahi kathaayen, kathaayen,kathaayen… to baapdaada bhi bachchon se prashn karte hain ki aakhir yeh baaten kab tak? ya to samay bata do ki ek saal aur chaahiye, do saal aur chaahiye। iski bhi date to fix karo। function ki date to jaldi fix ho gai। sabhi ke function ki date fix kar li hai, is function ki date kaun si hai?

sabhi door-door se pyaar se aaye hain। baapdaada videsh ko bhi dekh raha hai। bhinna time hote bhi bahut pyaar se samay dekar sun rahe hain। (videsh mein 200 sthaanon par saitlaait dvaara murli sun rahe hain) dekho yeh bhi fast gati hai na। yahaan ka aavaaz videsh mein 200 sthaan par pahunch raha hai,yeh bhi aavaaz ki gati fast hai na। yeh bhi invention hai na। to aap silence ke power ki gati fast nahin kar sakte ho? science ne bhaarat ka aavaaz videsh tak pahunchaaya aur aap svapna va sankalp ki pavitrata hi sabse bade se badi personality hai। 77 apne dil ki shubh bhaavnaayen aatmaon ko nahin pahuncha sakte ho! pahuncha sakte hain na? nahin to science aage chali jaayegi,silence ki power thoda kam dikhaai degi। isliye silence ki shakti ko pratyaksha karo। sabhi mein hai। ek brahman bhi nahin hai jo kahe ki mere mein silence ki shakti nahin hai। sabhi mein hai, kitne brahman hain?itne braahmanon ki sakaash kya nahin kar sakti?sabhi mein silence ki shakti hai?to abhi ek minute mein sabhi apne silence ki shakti emerge karo। ekdam silence man se, tan se emerge karo।

(baapdaada ne dead silence ki drill karvaai) achha।

chaaron or ke sarva vishesh aatmaon ko sada roohaani personality ke nashe mein rahne vaali aatmaon ko,sada behad ki seva mein svayan ko busy rakhne vaali nimitta vishwa kalyaankaari aatmaon ko,sada brahma baap aur jagdamba ka slogan saakaar mein laane vaali,oonch te oonch nazar se nihaal karne ki seva mein sada rahne vaali baap samaan aatmaon ko baapdaada aur jagdamba maa ka yaadapyaar aur namaste।

daadiyon tatha bade bhaaeeyon se

sabhi ka dil ka umang-utsaah bahut achha hai। abhi dil ka umang- utsaah emerge karna hai। sankalp bahut achhe-achhe karte hain। lekin practical mein aane mein samaane ki shakti aur kalyaan ki bhaavna isko emerge karna padega,tabhi sankalp saakaar mein honge। yeh baaten to ek saagar ki lahre hain, lahron ko kya dekhna। woh to abhi-abhi uthti hain abhi-abhi merge ho jaati hain। lekin saagar samaan samaane ki shakti, silence ki power ki shakti ratna paida karegi। to achha hai। abhi aap logon ki sakaash chaahiye। kamjoron ko bal do। apne purooshaartha ka samay doosron ko sahayog dene mein lagaao। to aapka purooshaartha svatah hi jama hota jaayega। doosron ko sahayog dena arthaat apna jama karna। abhi aisi lahar phailaao - dena hai, dena hai, dena hi dena hai। salvation lena nahin hai, salvation dena hai। dene mein lena samaaya hua hai। theek hai na। foundation to pakka hai। baapdaada ki sakaash to hai hi। abhi aap aatmaon ke sakaash ki aavashyakta hai। baap ki direct itni power lene ki himmat nahin hai, baap to de rahe hain lekin kamjor aatma le nahin paati hai, unhon ko aap logon ka sahayog chaahiye। bas paath pakka kar lo - aaj ke din kitni aatmaon ko nihsvaartha sahayog diya। aap dena shuru karenge, karte bhi ho lekin aur underline। to sabke paas woh lahar phailegi।

(bhoopaal bhaai se)-shaantivan kitna bada ho gaya। ab saare bhaarat ke sevaakendron se, paandav bhavan se, gyaan sarovar se, chaaron or se shaantivan bada ho gaya hai। to badi dil। achha hai, mehnat bhi achhi kar rahe hain।

abhi yu.pi. ka tarna hai na। yu.pi. vaale haath uthaao, jo seva mein hain khade hojaao। bahut achha। seva ka pratyaksha phal hai khushi। to khushi ho rahi hai na?yeh pratyaksha phal avinaashi rahe। sabhi achhe seva ka saboot de rahe hain iseelie baapdaada kehte hain saboot dene vaale sapoot bachche। to kitnon ki duaayen li? dil se seva karna arthaat duaaon ka darvaaja khulna। to seva ki arthaat duaayen li। to duaayen jama karte jaao। achha।

aadi ratna bhi achha saboot de rahe hain। madhuban vaale bhi seva mein achha part baja rahe hain। madhuban vaale to sada baapdaada ke saath ka anubhav sahaj karne vaale hain। madhuban arthaat madhuban ka baba। to madhuban vaale sada baap ke saath hain। seva ke liye baapdaada sada dil se duaayen dete hain। har ek bachchon ki seva baapdaada sada dekhte hain। har ek centre ki seva ka record baapdaada ke paas rehta hai। madhuban ka apna,videsh ka apna, bhaarat ka apna, baapdaada to geeta paathshaalaayen bhi dekhte hain। aap log to do chaar paanch jagah mein chakkar lagaate ho, baapdaada to geeta paathshaala ka bhi chakkar lagaate hain।

achha geeta paathshaala vaale utho, khade ho jaao।mubaarak ho। teen pair dekar teenon lokon ke maalik ban gaye। chatur nikle na। diya teen pair aur liya teen lok। baapdaada to aapki geeta paathshaalaayen,classes ka bhi chakkar lagaate hain। daadiyon ko time nahin milta hai na iseelie baapdaada chakra lagaate hain। isliye to avyakt bane hain na। (daadi ji se) aapka kaam bhi abhi avyakt roop mein baapdaada karta hai।

baapdaada sab note karte hain, geeta paathshaala vaale,class karaane vaale kis vidhi se chalte hain, kis vidhi se sote hain, kis vidhi se khaate-peete hain,sab note karta hai। kahaan-kahaan theek nahin hota hai। geeta paathshaala ya kahaan bhi seva karne vaale hain, woh sthaan vidhi poorvak ho, svachchha aur maryaada poorvak bhi ho। aur jo bhi dincharya hai,woh brahman jeevan ke niyam pramaan ho, aise chalaao nahin, chalta hai …। baapdaada jyaada kehte nahin hain, samajhte hain thoda mushkil lagega, iseelie kuchh baaten to chhod dete hain। chhodna chaahiye nahin lekin chhod dete hain। aise kabhi nahin samajhna ki kaun dekhta hai, phir bhi himmat rakhkar pravritti mein rehte seva ke nimitta bane hain, yeh baapdaada ko dekhkar khushi hoti hai। baaki check karna yeh aapka kaam hai। baap nahin kahenge, aapka kaam hai। agar baap kahenge ya daadiyaan kahengi na to chaar-chaar page ka patra aayega,aisa hai,aisa hai… isliye baapdaada kehte nahin hain। ishaara dete hain ki maryaadaapoorvak apne aapko check karo aur change karo। achha। sabhi ek do se pyaare ho aise nahin jo aage baithe hain woh pyaare hain। aap unhon se bhi pyaare ho।

achha-om shanti।