Avyakt murli du dimanche 14 décembre 1997

>

14-12-97 om shanti avyakt baapdaadaamdhuban

vyartha aur negetiv ko avoid kar award lene ke paatra bano

aaj baapdaada apne parmaatma pyaar ke paatra aatmaon ko dekh rahe hain। parmaatma pyaar aanandamay jhoola hai jis sukhdaai jhoole mein sada jhoolte rehte hain। parmaatma pyaar anek janmon ke duhkhon ko ek second mein samaapta kar deta hai। parmaatma pyaar sarva shakti sampanna hai,jo nirbal aatmaon ko shaktishaali bana deta hai। aise shreshtha parmaatma pyaar ke aap kitni thodi si aatmaayen paatra ho। aisi shreshtha paatra aatmaon ko baapdaada dekh-dekh harshit hote hain। jaise baap harshit hote hain vaise bachche bhi harshit hote hain lekin nambarvaar। baapdaada to yahi har bachche ko dil se vardaan dete hain ki sada parmaatma pyaar ke jhoole mein jhoolne vaale avinaashi ratna bhav। is pyaar ke jhoole se man roopi paanv neeche nahin karo kyonki saare vishwa ki aatmaon se param aatma ke laadle ho, pyaare ho। to baapdaada yahi bachchon ko duaayen dete hain isi parmaatma pyaar mein lavleen raho। aise lavleen aatmaon ke paas koi bhi par-sthiti va maaya ki halchal aa nahin sakti। neeche paanv rakhte ho to maaya bhi bhinna-bhinna khel khelne aati hai,bhinna-bhinna roop dhaaran kar aakarshit karti hai। lavleen aatmaon ke sarva shaktiyon ke aage maaya aankh uthaakar bhi nahin dekh sakti। aapka teesra netra, jvaalaamukhi netra maaya ko shaktiheen kar deta hai। to aap sab jo vishesh aatmaayen ho,sabhi braahmanon ko baapdaada dvaara janmate hi teesra netra mila hua hai। lekin baap dekhte hain kabhi-kabhi bachchon ka teesra netra bahut mehnat ka purooshaartha karte-karte thak jaata hai aur thakne ke kaaran band ho jaata hai। maaya ko bhi dekhne ki aankh bahut dooraadeshi vaali hai, door se dekh leti hai। abhi to maaya bhi samajh gai hai ki ab hamaara raajya gaya ki gaya,isliye maaya se ghabraao nahin। khushi-khushi se, sarva shaktiyon ke aadhaar se unko vidaai do। aane ka chance nahin do, vidaai do। woh bhi brahman aatmaon se,shreshtha aatmaon se vaar kartekarte thak gai hai। aap khud kamjori ke kaaran maaya ka aahvaan karte ho, woh thak gai hai lekin aap aahvaan karte ho to woh bhi chance le leti hai। abhi shaktiheen ho gai hai। aap sabka anubhav kya kehta hai?abhi maaya mein pahle jaisi shakti hai? usmein shakti hai ya aap shaktishaali ho? woh trial to karegi kyonki aap hi aahvaan karte ho to woh chance kyon nahin degi। kamjor bante kyon ho?baap ka yeh question hai ki master sarvashaktivaan ho ya nahin?sabhi master sarvashaktivaan ho? kabhi-kabhi sarvashaktivaan ho ya sada sarvashaktivaan ho? kya ho? sada shaktishaali ho?to maaya ko kah den ki abhi jaao? aap use nahin bulaana। baap maaya ko kehte hain abhi samaapta karo। to maaya baap ko kehti hai ki mujhe aahvaan karte hain। to baap kya kare?agar kisi bhi prakaar ki kamjori chaahe man mein, chaahe vachan mein, chaahe sambandh-samparka mein aati hai to samjho maaya ko aahvaan kiya। usko bhi aahvaan ka vibration bahut jaldi pahunchta hai।

yeh maha utsav to bahut achhe mana rahe ho। lekin utsaah sada rahe isliye utsav mana rahe ho। is varsha bahut utsav mana rahe ho na? (is group mein eeshvareey seva ke aadi ratna bhaaeeyon ka sammaan samaaroh tatha teachers bahinon ki silver jubilee ka kaaryakram rakha gaya hai) har group mein utsav mana rahe hain to baap samajhte hain ki yeh varsha utsav manaana arthaat maaya ko vidaai dena। aise nahin golden chunni pahankar baith jaao, golden chunni pahanna maana golden aged banna। drishya to bahut achha lagta hai lekin sada golden sthiti ki chunni va dupatta pada rahe। aise nahin dupatta utra, utsav poora hua aur jaise the vaise rahe। yeh utsaah dilaane ka function hai। to jinhonne utsav manaaya hai ya manaane ke liye aaye hain woh haath uthaao। baapdaada khush hai। khoob manaao lekin manaana arthaat banna aur banaana। utsav manaane samay apne aapko underline karo sada yaad aur seva ke utsaah mein rahne vaali aatma hoon। baapdaada ko bhi drishya achha lagta hai। to yeh varsha baapdaada maaya ko vidaai dene ka varsha manaane chaahte hain। to aisa utsav manaayenge na?kal jo manaayenge, aisa hi manaayenge na? silver jubilee manaayenge na?golden jubilee ho, silver jubilee ho lekin hai to utsav na! aise nahin sochna ki ham to silver jubilee vaale hain, pahle golden vaale banen phir ham banen। aise nahin sochna। aur jinhonne nahin bhi manaaya hai, woh bhi aise nahin samajhna ki jo utsav manaane vaale hain unhon ke liye baapdaada kah rahe hain। sabhi ke liye kah rahe hain। brahman jeevan ka utsav to manaaya hai na! brahman to sabhi ban gaye ya brahman bhi ban rahe hain?ban gaye hain। to brahman janma ka utsav manaane vaali aatmaayen arthaat sada utsaah mein rehna aur auron ko bhi utsaah mein laana। yahi braahmanon ka occupation hai। woh brahman to mukh se katha karte hain, aap brahman mukh se bhi bolte to utsaah dilaane ke liye bolte hain। kaisi bhi aatma ho chaahe aapke virodhi aatma ho, kyonki hisaab-kitaab bhi yahaan hi chuktu hona hai। lekin kaisi bhi aatma ho braahmanon ka kaam hai utsaah bhari kahaani sunaana। utsaah ki baaten sunaana। woh rota ho, aap unhein utsaah mein nacha do। jab koi dil mein utsaah hota hai to kya hota hai? paanv naachne lagte hain। jaise yeh function karte ho na। to last mein kya karte ho?sab dance karte hain na। yeh to paanv ki dance hai। brahman aatma sivaae utsaah dilaane aur utsaah mein rahne ke bina rah nahin sakti। utsaah mitaane vaali baaten hoti hain aur hongi lekin baapdaada is varsha mein yahi sab bachchon se shubh aash rakhte hain ki beeti so beeti, aaj tak jo bhi kaisi bhi aatmaayen sambandh-samparka mein rahi hain,jaisi bhi hain,chaahe negetiv bhi hain, saamna karne vaali bhi hain, brahman jeevan ko hilaane vaali bhi hain lekin is varsha mein negetiv aur vesta drishtikon samaapta karo। sneh do, shakti do। agar sneh nahin de sakte,shakti nahin de sakte to dekhte, sunte,samparka mein aate vesta aur negetiv baaton ko dil mein dhaaran karne mein avoid karo। man aur buddhi mein dhaaran nahin ho,avoid karo। parivartan karo। negetiv ko va vesta ko parivartan karke dil mein samaao। aise donon baaton ko jo avoid karega usko baapdaada dvaara, brahman parivaar dvaara bahut achhe te achha,bade te bada award milega। aur aatmaon ko to award dene vaali aatmaayen hoti hain। award milta hai na? to yeh parmaatma award hai। avoid karo, award lo। himmat hai? achha।

paandavon ne jinhonne function manaaya,unhon mein himmat hai? award lenge? sabhi ne haath uthaaya,aaj ki date underline karna। aaj kaun si date hai? (14 December) to har maas ki 14 taareekh apne ko check karna। achha - silver jubilee vaale jo samajhte hain award lenge, woh haath uthaao। aise dekha-dekhi nahin uthaao। sharma ke kaaran nahin uthaao। baapdaada chance dete hain, agar koi mein himmat nahin hai to nahin uthaao, koi harja nahin। baapdaada aur sakaash dega, aisi koi baat nahin hai। aise koi hain jo samajhte hain aur thodi himmat chaahiye? koi silver jubilee vaali teachers aisi hain? chalo yahaan haath nahin uthaao, sharma aata ho to likhkar dena। jab function manaao tab dena,samajhte ho hamko extra himmat chaahiye,to uske liye vishesh tuition rakhenge। jo padhaai mein kamjor hota hai to kya karte hain?tuition rakhte hain na?achha। madhuban vaale haath uthaao। khade ho jaao। madhuban vaale chance achha lete hain। achha - madhuban vaale award lenge? sabhi ne uthaaya? tuition nahin chaahiye?bahaadur hain। achha - baapdaada hisaab lenge। mubaarak ho madhuban vaalon ko।

baaki jo kone-kone se snehi,sahayogi, sambandh mein rahne vaale naye puraane bachche aaye hain, unhon ko vishesh baapdaada ek to aane ki mubaarak dete hain, doosra maryaada mein chalne ki bhi mubaarak dete hain। kam se kam ek saal to naye bhi maryaadaapoorvak chale hain tab yahaan pahunche hain। koi chatur bhi honge lekin majority to maryaada ko paalan karne vaale hain। to pravritti mein rehte maryaada mein chalne vaali, maryaada rakhne vaali aatmaon ko maryaada ki bhi mubaarak hai।

achha - maataayen himmat rakhti ho ki ham maaya ko vidaai denge? agar haan to ek haath ki taali bajaao। achha - pravritti vaale paandav,himmat hai?award lena hai? ek haath ki taali bajaao। baapdaada ko bhi khushi hoti hai,dekho behad ka haal, behad ka nasha chadhaata hai na। aaraam se baithne ki jagah to hai na?abhi aapka ulhana hoga ki door se dekh nahin sakte hain। lekin abhi to phir bhi aap bahut aaraam se baithkar sun to sakte, T.vi. mein dekh to sakte। jab 9laakh taiyaar karenge to kya hoga? phir baithne ki jagah milegi?iseelie jo jitna pahle aaya woh bhaagyavaan hai। to jaise abhi aap log apne se pahle vaalon ka bhaagya gaate ho ki aap bahut achhe hain। aise baapdaada kehte hain ki abhi jo aap aaye ho na, unhon ko bhi peechhe vaale kahenge,aap bahut bhaagyavaan hain। vriddhi to honi hai na?nahin to raajdhaani kaise banegi?

to yeh varsha vidaai aur badhaai ka hai aur is varsha mein vishesh jo bachchon ne sankalp kiya hai, woh practical mein karne vaalon ko baapdaada ki extra madad bhi milegi। sirf dridh rehna। beech-beech mein drama paper lega lekin sankalp mein dridh rehna,sankalp roopi paanv hile nahin, achal rahe to baapdaada dvaara extra madad ki anubhooti hogi। sirf lene ki shakti chaahiye। ek bal,ek bharosa… kuchh bhi ho jaae, banna hi hai। yeh sankalp roopi paanv majboot rakhna। to baaten aayengi bhi lekin aise hi anubhav karenge jaise plen mein baadal neeche rah jaate hain aur svayan baadlon ke oopar rehte hain। baadal ek manoranjan ka drishya ban jaata hai। aise kitne bhi kaale baadlon jaisi baaten hon, jismen kuchh samasya ka hal ya samaadhaan us samay dikhaai na bhi de lekin yeh dridh nishchay ho ki yeh baadal aaye hain jaane ke liye। yeh baadal bikharne vaale hi hain, rahne vaale nahin hain। aise udti kala ki stage par sthit ho jaao to kitne bhi gahre kaale baadal bikhar jaayenge aur aap dridhta ke bal se saphal hue hi pade hain। ghabraao nahin, yeh kaise hoga! achha hoga,kyonki baapdaada jaante hain jitna samay sameep aa raha hai utna nai-nai baaten, sanskaar,hisaab-kitaab ke kaale baadal aayenge। yahaan hi sab chuktu hona hai। kai bachche kehte hain ki din-pratidin aur hi aisi baaten badhti kyon hain? jin bachchon ko dharmaraajpuri mein cross nahin karna hai,unhon ke sangam ke is antim samay mein svabhaav-sanskaar ke sab hisaab-kitaab yahaan hi chuktu hone hain। dharmaraajpuri mein nahin jaana hai। aapke saamne yamdoot nahin aayenge। yeh baaten hi yamdoot hain, jo yahaan hi khatma honi hain iseelie beemaari baahar nikalkar khatma hone ki nishaani hai। aise nahin socho ki yeh to dikhaai nahin deta hai ki samay sameep hai aur hi vyartha sankalp badh rahe hain! lekin yeh chuktu hone ke liye baahar nikal rahe hain। unhon ka kaam hai aana aur aapka kaam hai udti kala dvaara, sakaash dvaara parivartan karna। ghabraao nahin। kai bachchon ki visheshta hai ki baahar se ghabraana dikhaai nahin deta hai lekin andar man ghabraata hai। baahar se kahenge nahin-nahin, kuchh nahin। yeh to hota hi hai lekin andar uska sek hoga। to baapdaada pahle se hi suna deta hai ki ghabraane vaali baaten aayengi lekin aap ghabraana nahin। apne shastra chhod nahin do। jo ghabraata hai na to jo bhi haath mein cheez hoti hai woh gir jaati hai। to jab yeh man mein bhi ghabraate hain na to shastra va shaktiyaan jo hain woh gir jaati hain, merge ho jaati hain। iseelie ghabraao nahin, pahle se hi pata hai। trikaaldarshi bano, nirbhay bano। brahman aapas mein sambandh mein nirbhay nahin banna, maaya se nirbhay bano। sambandh mein to sneh aur nirmaan। koi kaisa bhi ho aap dil se sneh do, shubh bhaavna do, raham karo। nirmaan ban usko aage rakh aage badhaao। jisko kaha jaata hai kaaran roopi negetiv ko samaadhaan roopi positive banaao। yeh kaaran,yeh kaaran,yeh kaaran… kaaran va samasya ko positive samaadhaan banaao।

baapdaada ko ek baat par kabhi-kabhi hansi aati hai। pata hai kaun si baat?jaante ho?ek taraph to challenge karte hain - baba ham prakriti jeet banenge। prakriti ko bhi parivartan karenge, yeh kehte ho na?prakriti ko badlenge na?aisi challenge karne vaale prakriti ko parivartan kar sakte hain। lekin jab sambandh-samparka mein koi baaten hoti hain to usko samaadhaan nahin kar sakte। parivartan nahin kar sakte। hansi ki baat hai na - prakriti jad hai uske liye to challenge hai lekin brahman aatmaon ko parivartan karna, woh nahin hota hai। aur phir kya sochte hain? woh ho nahin sakta, yeh hona hi nahin hai। ho hi nahin sakta, badal hi nahin sakta। to prakriti ko kaise badlenge?khud badalkar auron ko badlo। chalo woh wrong hai, 100percent wrong hai। lekin aapka vaayda kya hai? baap se kya vaayda kiya hai? sva parivartan se vishwa ka parivartan karenge? yeh vaayda hai ya bhool gaye hain?haan to sab karte ho। kaisi bhi baaten hon,baaton ko badalne ke liye madad bhale lo lekin yeh badalna hi mushkil hai,yeh certificate nahin do। kisne aapko authority di hai certificate dene ki? to yeh sochna ki yeh to hona hi nahin hai, yeh to theek hoga hi nahin। kisne aapko judge banaaya? aise hi judge ki kursi par baith jaate ho? ya to vakeel bante, bahut kaayde kaanoon bataate,bahas karte,aisa nahin aisa। aisa nahin aisa। na vakeel bano, na judge bano। yeh authority baapdaada ne di nahin hai, jo nimitta hain unka sahayog lo। woh nimitta aatmaayen bhi baapdaada ki raay se karti hain। apni manmat nahin chalaati hain।

to is varsha mein yeh sab baaten samaapta karo arthaat man se parivartan karo,avoid karo,oopar pahunchaaya, jimmevaari khatma। aapse parivartan nahin hota to nimitta aatmaon tak pahunchaana yeh aapka pharja hai। phir khud law haath mein nahin uthaao,tabhi award ke paatra banenge। to sada utsaah mein raho aur utsaah badhaao, yahi smriti mein baapdaada emerge kar rahe hain। jab svayan utsaah mein rahenge to sabhi ko haath mein haath arthaat man ke sneh ka haath mein haath le naachenge, khush rahenge। sthool haath nahin, man se sneh ke sahayog ka haath। isko hi haath mein haath milaana kaha jaata hai। sneh kya nahin kar sakta aur yeh parmaatma sneh hai, parmaatma pyaar hai। woh kya nahin kar sakta! asambhav brahman dictionary mein hai hi nahin। utsaah vaala kabhi bhi kisi bhi baat mein niraash, dilshikasta nahin hota।

to yeh paandav jo vishesh utsav mana rahe hain,woh kya karenge? har ek paandav yeh dridh sankalp karo ki mujhe parivartan karne ki jimmevaari hai kyonki aadi paalna vaale ho na? to brahma baap ne kya kiya?jimmevaari uthaai na? ya kaha yeh to badalna hi nahin hai? yeh to hona hi nahin hai? nahin। itni aatmaon ka parivartan karke dikhaaya na? chalo doosron ko nahin dekho, apne ko to dekh sakte ho,aapka parivartan to kiya? ya aapki kamjoriyaan dekhi?nahin dekhi। to brahma baap ki paalna lene vaale nimitta ho,follow brahma ko karne ke liye। ismen aise nahin samjho - yeh to badon ki jimmevaari hai, ham to direction par chalne vaale hain। nahin। sva-parivartan se sarva ke sambandh-samparka mein parivartan laane ki jimmevaari har chhote bade ki hai। jab baapdaada poochhte hain kya banenge?to sabhi kya kehte hain? vishwa raajan banenge। chhota-mota bhi nahin, vishwa mahaaraaja banenge। to jab vishwa mahaaraaja banne ki jimmevaari hai to sambandh-samparka mein parivartan karne ki jimmevaari nahin hai? har ek aatma baap ki paalna ka return - parivartan karne mein jimmevaar hai,sahayogi hai। aise hai? yeh group to paalna lene vaala hai। to paalna lena uska return hai - baap samaan paalna dena,ismen chhote nahin bano। ismen har ek bada hai। chaahe ek saal vaala bhi hai to bhi jimmevaar hai। to aap to 30 saal se puraane ho। to baapdaada is group ko parivartak group kehte hain। chalo kahaan jhukna bhi pade,kya brahma baap ko jhukna nahin pada? virodh nahin dekha? sabse jyaada gaali to brahma baap ne khaai। opposition sabse bada brahma baap ne dekha। agar do chaar bhi opposition mein hain to kya badi baat hai?to samjha yeh group kaun sa hai? parivartak group। theek hai na? naam pasanda hai? kaam pasanda hai? sirf naam nahin, kaam bhi। achha –

silver jubilee vaala group kya karega? yeh to hain hi nimitta teachers। to yeh silver jubilee manaane vaala group sada apne utsaah ke features, harshit,khush rahne ke features dvaara anek aatmaon ko harshaayenge। teachers ka kaam hi hai, rota koi aave aur naachta jaave। pareshaan koi aave aur apni shaan mein sthiti ho jaae। pareshaan ka arth hi hai,shaan se pare ho jaata hai। to teachers ka kaam hai pareshaan ko shaan mein sthit karna। yeh hai silver jubilee manaane vaalon ki seva। aise nahin khud hi pareshaan ho। kai aise jigyaasu kehte bhi hain ki baahar se pareshaan hokar aate hain aur kabhi-kabhi koi-koi sab nahin hain, koi-koi teacher hi pareshaan hoti hain, to hamko kya shaan mein sthit karengi। lekin nahin,teachers arthaat sada apne features dvaara har aatma ki seva kare। bolne ka time nahin ho, koi harja nahin। ek second mein apne harshit dil se, harshit man se parmaatma sneh se (aatma ka sneh nahin) parmaatma sneh dvaara,drishti dvaara usko bhi harshit bana de। teachers agar kabhi pareshaan hote bhi ho galti se,hona nahin chaahiye lekin galti se ho bhi jaate ho to phauran baapdaada se connection jodkar,roohrihaan karke usi samay apne ko theek karo। yahaan baapdaada se connection karne ka drama dikhaaya na? (kal bambai ke chhote bachchon ne baapdaada se roohrihaan ka ek drama kiya tha) to aap baapdaada se connection nahin kar sakte ho kya? aapke paas wireless set nahin hai kya? aajkal to satellite hai na, woh to phauran ho jaata hai। to teachers ke paas hai? sabke paas hai sirf samay par use karo। samay par sirf smriti ka switch on karo bas। phir dekho second mein parivartan hota hai ya nahin। jis samay koi aisi baat ho to yeh drama yaad karna। lagaana connection। to samjha silver jubilee vaalon ko kya karna hai? baapdaada ko to teachers sabse jyaada yaad rehti hain। kyon? jo bhi seva ke nimitta hain to brahma baap ki bhujaaen bankar nimitta hain। to baap samaan seva mein hain na। isliye aise nimitta sevaadhaari baapdaada ko sada yaad hain। aise nahin samajhna ki jinhon ki golden jubilee hui woh yaad hain, aap nahin। pahle aap। chhoton ke oopar aur hi jyaada sneh hota hai। isliye abhi mujhe badalna hai, mujhe bigdi ko banaana hai, doosra bigaade, mera kaam hai banaana। yeh shikaayat nahin, yeh bigaadte hain na, yeh karte hain na। nahin। woh bigaadne mein hoshiyaar hain,aap apne kaam mein hoshiyaar ho। bigaadne vaala hoshiyaar,banaane vaala kam kyon? aap hoshiyaar ho jaao, bigaadne vaala kya bhi kare। to bigdi ko banaane vaale baap samaan aap aatmaayen ho। yeh kaam karenge to haath hilaao। karenge, pakka?ya vahaan jaakar kahenge daadi kya karen? shikaayat to nahin karenge? aaj sab shikaayat ka file yahaan shaantivan ke diamond haal mein khatma karke jaao। harshit rehna hai aur harshit banaana hai। theek hai na? silver jubilee vaalon se mile na? ab shikaayat to nahin hogi na,hamse to mile nahin? aaj do group hain। lekin baap ko paandav bhi pyaare hain to teachers bhi pyaari hain। to kya samajhti ho?ho sakta hai?kaandh hilaao। paandav ho sakta hai ki hona hi hai?kya kahenge,hua hi pada hai? ek ek kaandh hilaao। yahi kaho ham nahin karenge to kaun karega। baapdaada ki aashaaon ke sitaare aap bachche ho। to aap nahin karenge to kaun karega? achha।

maataayen sab khush ho?koi takleeph to nahin hui? (sabhi ne taaliyaan bajaai) inhon ko yeh do haath ki taali bajaana achha lagta hai। achha paandav sab theek hain? koi takleeph nahin?shaantivan achha bana hai,pasanda hai?baapdaada to khush hote hain ki sabhi bachchon ke sahayog se yeh shaantivan bana hai। aap sabke sahayog se yeh sthaan bana hai। isliye shaantivan ke sarva sahayogi aatmaon ko baapdaada padamguna mubaarak dete hain।

double foreigners haath uthaao, dekho double foreigners se har season bahut achhi saj jaati hai। double foreigners madhuban ke shrringaar ho। aapko dekh karke sabhi ko bahut khushi hoti hai। kyon khushi hoti hai, jaante ho? kyonki aap foreigners bahut foreign culture ki deevaaren todkar aaye ho,yeh jo geet bajta hai na - woh aap double foreigners ke liye bahut achha hai। bhaarat vaalon ne deevaaren todkar aane ki himmat rakhi lekin double foreigners ne double deevaaren tay karke apna vishesh part noondh liya। to jahaan bhi double foreigners hain, sun rahe hain, un sabko bhi baapdaada padamguna mubaarak dete hain। double foreigners is brahman parivaar ke vishesh diamond ho। to diamond chamakta hai, kitna pyaara lagta hai। aise double foreigners is brahman parivaar mein brahman yug mein bahut-bahut chamakte hue vishesh aatmaayen hain। foreign ke patra bhi aaye hain, to jinhonne bhi patra bheje hain,baapdaada ke paas to sabke dil ki baaten pahunch hi jaati hain। umang-utsaah aur teevra purooshaartha ki khushbu achhi aa rahi hai। abhi samay jaise jaise beetta jaata hai,to baapdaada dekh rahe hain ki double foreigners majority abhi knowledgeful achhe ban gaye hain। maaya ko parakhne ki nazar ab achhi tej ho rahi hai। isliye baapdaada patron se khushbu lete hain aur sachchi dil vaale hain। girne ki bhi sachchaai likhte hain to udne ki bhi sachchaai likhte hain। saaph dil hain। to jahaan saaph dil hai,to baapdaada sada kehte hain saaph dil muraad haansil। jo umangen,aashaayen rakhte hain woh praapta ho jaati hain arthaat muraad haansil ho jaati hai। baapdaada ki madad ko catch karne mein achhe hain isliye patra bhejne vaale va apne apne sthaan par sunne vaale va chaaron or ke double foreigners ko baapdaada dil se padamguna yaadapyaar,mubaarak de rahe hain। achha।

baambe ke sevaadhaari group haath uthaao। achha kiya hai। baambe ko to baapdaada nar-desaavar kehte hain। kamaane vaala bachcha। baapdaada baambe ko sada yaad karta hai। achhi himmat se kar rahe ho, sab santushta hain iski mubaarak। baambe mein achhe- achhe mahaarthi hain,ek do se aage hain। koi kisi se kam nahin hai। baapdaada visheshta ke aadhaar se kehte hain। achhi himmat ki। baapdaada ko khushi hai ki baambe seva ki stage par aaya। achha lag raha hai na?seva ki stage achhi hai na? achha। har ek apne naam se samjhe ki mere ko mubaarak aur yaad-pyaar special hai। sirf naam nahin le rahe hain। agar naam lenge to maala ban jaayegi। achha।

chaaron or ke parmaatma pyaar ke sukhmay, aanandamay jhoole mein jhoolne vaali lucky aur lovely aatmaon ko,sada dridh sankalp dvaara samaadhaan swaroop shreshtha aatmaon ko,sada parmaatma award lene ke paatra hero paartadhaari aatmaon ko,sada baapdaada ki paalna ka return dene vaale baap ke diltakhta nasheen aatmaon ko baapdaada ka padamguna, arab-kharab se bhi jyaada yaadapyaar aur namaste।

daadi jaanki tatha sarva daadiyon ko drishti dete hue:-

achhi duty li hai?sabhi ko khushi mein nachaane ki duty achhi hai। abhi yahi chaahiye। shiksha sunne koi nahin chaahta। to sabhi aadi ratna yeh duty vishesh bajaao। koi kaisa bhi ho lekin aapke saamne aane se khushi mein naachna shuru kar de। direct daata ke bachche ho na aur pahli rachna ho। to aadi rachna ka prabhaav to hai na। to baapdaada bhi aadi ratnon ko vishesh sneh deta hai special। abhi aise saathiyon ko taiyaar karo jo vaayumandal phailaayen।

achha। om shanti।