Avyakt murli du lundi 30 mars 1998

>

30-03-98 om shanti avyakt baapdaadaamdhuban

sarva praaptiyon ki smriti emerge kar achal sthiti ka anubhav karo aur jeevanmukta bano

aaj bhaagya vidhaata baap apne vishwa mein sarva shreshtha bhaagyavaan bachchon ko dekh rahe hain। har bachche ke bhaagya ki mahima svayan bhagwan ga rahe hain। baap ki mahima to aatmaayen gaati hain lekin aap bachchon ki mahima svayan baap karte hain। aise kabhi svapna mein bhi socha ki hamaara itna shreshtha bhaagya bana hua hai lekin bana hua tha, ban gaya। duniya ke log kehte hain bhagwan ne hamko racha lekin na bhagwan ka pata hai, na rachna ka pata hai। aap har ek bhaagyavaan bachcha anubhav aur fakhur se kehte ho ki ham shiv vanshi brahmaakumaar brahmaakumaariyaan hain। hamko maaloom hai ki humein baapdaada ne kaise racha! chaahe chhota bachcha hai, chaahe bujurga paandav hai, shaktiyaan hain kisi se bhi poochhenge aapka baap kaun hai, to kya kahenge?falak se kahenge na ki hamko shiv baap ne brahma baap dvaara racha isliye ham bhagwan ke bachche hain। bhagwan se direct milte hain, na sirf param aatma va bhagwan hamaara baap hai lekin woh baap bhi hai, shikshak bhi hai aur satguru bhi hai। sabko yeh nasha hai? (taali bajaai) ek haath ki taali bajaana - abhi yeh bhi exercise bujurgo ko sikhaani padegi। bachchon ko khush dekh baapdaada bhi khushi mein jhoolte hain aur sada kehte - vaah mere har ek shreshtha bhaagyavaan vishesh aatmaayen…। baap ke roop mein parmaatma paalna ka anubhav kar rahe ho। yeh parmaatma paalna saare kalpa mein sirf is brahman janma mein aap bachchon ko praapta hoti hai, jis parmaatma paalna mein aatma ko sarva praapti swaroop ka anubhav hota hai। parmaatma pyaar sarva sambandhon ka anubhav karaata hai। parmaatma pyaar apne deh bhaan ko bhi bhula deta, saath-saath anek svaartha ke pyaar ko bhi bhula deta hai। aise parmaatma pyaar, parmaatma paalna ke andar palne vaali bhaagyavaan aatmaayen ho। kitna aap aatmaon ka bhaagya hai jo svayan baap apne vatan ko chhod aap godly students ko padhaane aate hain। aisa koi teacher dekha jo roz savere-savere doordesh se padhaane ke liye aave? aisa teacher kabhi dekha?lekin aap bachchon ke liye roz baap shikshak ban aapke paas padhaane aate hain aur kitna sahaj padhaate hain। do shabdon ki padhaai hai - aap aur baap, inheen do shabdon mein chakkar kaho, drama kaho,kalpa vriksha kaho saari knowledge samaai hui hai। aur padhaai mein to kitna dimaag par bojh padta hai aur baap ki padhaai se dimaag halka ban jaata hai। halke ki nishaani hai ooncha udna। halki cheez svatah hi oonchi hoti hai। to is padhaai se man-buddhi udti kala ka anubhav karti hai। to dimaag halka hua na! teenon lokon ki knowledge mil jaati hai। to aisi padhaai saare kalpa mein koi ne padhi hai। koi padhaane vaala aisa mila। to bhaagya hai na! phir satguru dvaara shreemat aisi milti hai jo sada ke liye kya karoon, kaise chaloon,aise karoon ya nahin karoon, kya hoga… yeh sab questions samaapta ho jaate hain। kya karoon, kaise karoon,aise karoon ya vaise karoon… in sab questions ka ek shabd mein javaab hai - follow father। saakaar karma mein brahma baap ko follow karo,niraakaari sthiti mein ashareeri banne mein shiv baap ko follow karo। donon baap aur daada ko follow karna arthaat question mark samaapta hona va shreemat par chalna। yeh mushkil hai?poochhne ki aavashyakta padti hai kya?copy karna hai, apna dimaag nahin chalaana hai। baap samaan banna arthaat follow father karna। mushkil hai ya sahaj hai? sahaj hai na? 30 saal vaale haath uthaao,achha 30saal mein mushkil laga ya sahaj hai? abhi dekho 30 saal vaalon ko bhi sahaj laga to aap jo peechhe-peechhe aaye unhon ke liye mushkil hai ya sahaj hai? sahaj hai na? (garmi ke kaaran sabhi ke haathon mein rang-birangi pankhe hain jo hila rahe hain) achha hai, pankhon ki rimjhim bhi achhi lag rahi hai। scene achhi hai। naveenta honi chaahiye na। to is group ki yeh bhi naveenta hai,yeh bhi T.vi. mein aa gaya। achha hai sabhi bhaag-bhaag kar pahunch gaye hain,baapdaada bhi sneh ki mubaarak dete hain। dekho, aur jo bhi had ke guru hote hain kitne vardaan dete hain, ek ya das, jyaada nahin dete hain। lekin aapko satguru dvaara roz vardaan milta hai। aisa guru kab dekha?nahin dekha na! aap logon ne hi dekha lekin kalpa-kalpa dekha। to sada apne bhaagya ki praaptiyon ko saamne rakho। sirf buddhi mein merge nahin rakho, emerge karo। merge rakhne ke sanskaar ko badalkar emerge karo। apni praaptiyon ki list sada buddhi mein emerge rakho। jab praaptiyon ki list emerge hogi to kisi bhi prakaar ka vighna vaar nahin karega। woh merge ho jaayega aur praaptiyaan emerge roop mein rahengi।

baapdaada jab sunte hain ki aaj kisi bhi kaaran se koi-koi bachche mehnat karte hain, yuddha karte hain, yog lagaane chaahte lekin lagta nahin hai, soul conscious ke badle body conscious mein aa jaate hain to baapdaada ko achha nahin lagta hai। kaaran kya? apne bhaagya ki praaptiyaan emerge nahin rehti,merge rehti hain। phir jab koi yaad dilaata hai to sochne lagte hain hona to aisa chaahiye…! isliye bahut sahaj purooshaartha hai - praaptiyon ko emerge rakho। jab se brahman banen tab se apne bhaagya ko smriti mein rakho। halchal mein nahin aao, achal bano kyonki yahaan aabu mein yaadgaar kya hai? achalghar hai ya halchal ghar hai? achalghar hai na? yeh kiska yaadgaar hai? aapka yaadgaar hai na? to jab bhi koi sookshm purooshaartha ka maarga mushkil lage,buddhi jyaada halchal mein ho, to apne yaadgaar ko smriti mein laao। kai baar bachche gyaan ki point bolte bhi hain ki main aatma hoon, drama hai, yeh to vighna hai, yeh to sidescene hai,bolte bhi rehte lekin hilte bhi rehte। hilte-hilte bolte rehte। jab aisi buddhi ban jaae jo achal nahin ho sake to madhuban ka achalghar yaad rakho। yeh to sthool cheez hai na! sookshm to nahin hai। aankhon se dekhne ki cheez hai, mera yaadgaar achalghar hai, halchal ghar nahin hai kyonki baapdaada is varsha ko sarva bachchon ke prati mukti varsha manaana chaahte hain। aisa nahin ho haath uthvaayen to koi ka uthe,koi ka nahin uthe, nahin। sabhi khushi-khushi se haath ki taali bajaave, (sabhi bajaane lage) chalo abhi baja di to theek hai, lekin aise hi baapdaada is varsha ke samaapti mein itni zor se taali bajaate dekhe। abhi to bajaai achha hai lekin tab bhi bajaana। bajaayenge? dekho haath ki taali bajaake to khush kar diya lekin baapdaada naye varsha mein jo apna 18January vishesh brahma baap ke shareer se mukta hone ka din hai, to 18 January mein baapdaada phir haath uthvaayega ki mukti varsha manaaya ya sirf socha?manaana hai,manaana hai - sochte to nahin rah gaye, swaroop mein laaya va sochte-sochte last mein bhi sochte rahenge! yeh result baapdaada dekhne chaahte hain। dikhaayenge?achha। yaad rahega na! praaptiyon ko saamne rakho। baap ki yaad ke saath, baap ne jo diya woh bhi emerge karo - kya banaaya aur kya mila!

baapdaada is varsha ke baad har bachche ko jeevan-mukta sthiti mein dekhenge। bhavishya mein jeevanmukta honge lekin sanskaar jeevanmukta ke abhi se hi emerge karne hain। aur nirantar karmayogi,nirantar sahaj yogi, nirantar mukta aatma ke sanskaar abhi se anubhav mein laao, kyon?baapdaada ne pahle bhi ishaara diya hai ki samay ka parivartan aap vishwa parivartak aatmaon ke liye intajaar kar raha hai। prakriti aap prakritipti aatmaon ka vijay ka haar leke aavaahna kar rahi hai। samay vijay ka ghanta bajaane ke liye aap bhavishya raajya adhikaari aatmaon ko dekh rahe hain ki kab ghanta bajaayen, bhakta aatmaayen woh din sada yaad kar rahi hain ki kab hamaare poojya dev aatmaayen hamaare oopar prasanna ho humein mukti ka vardaan dengi! duhkhi aatmaayen pukaar rahi hain ki kab duhkh harta sukh karta aatmaayen pratyaksha hongi! isliye yeh sab aapke liye intajaar va aavaahna kar rahe hain। isliye he merciful, vishwa kalyaankaari aatmaayen abhi inhon ke intajaar ko samaapta karo। aapke liye sab rooke hain। aap sab mukta ho jaao to sarva aatmaayen, prakriti,bhagat mukta ho jaaen। to mukta bano, mukti ka daan dene vaale master daata bano। abhi vishwa parivartan ki jimmevaari ke taajdhaari aatmaayen bano। jimmevaar ho na! baap ke saath madadgaar ho। kya aapko raham nahin aata, dil mein duhkh ke vilaap mahsoos nahin hote। he vishwa parivartak aatmaayen abhi apne jimmevaari ki taajposhi manaao। abhi function to bahut kiye, lekin function ki result kya?bas sirf golden chunni aur taaj pahan liya, manaaya … ismen baapdaada bhi khush hai lekin chunni pahanna,maala pahanna, chindi lagaana, paandavon ne pagdi bhi taaj muaaifak pahni, to yeh manaana arthaat jimmevaari sambhaalna। bachche khush hue,baap usse bhi jyaada khush hue lekin bhavishya kya! dupatta almaari mein, chindi almaari mein sambhal gai, bas yahi manaana hai। nahin। yeh dupatta golden sthiti ki yaad nishaani hai। almaari mein sirf nahin rakh dena lekin man mein smriti mein rakhna। manaana arthaat baap ke kaarya mein jimmevaar banna। pasanda hai na! ya chunni pahan li bahut achha hua? achha hua bhi। baapdaada bhi samajhte hain bahut achha hua। lekin avinaashi sahayogi banna।

is varsha ke liye jo baapdaada ne ishaara diya iske last mein 18 January mein, mukti varsha ka utsav manaayenge।taali bajaane vaale samajhte hain ham banenge?phir yeh nahin kehna ki baba banne to chaahte the lekin kya karen, yeh ho gaya, woh ho gaya। aisi baaton se bhi mukti। banna hi hai। kya karen, nahin। is bhaasha se bhi mukti। hona hi hai,banna hi hai,kuchh bhi ho jaae। baapdaada ne pahle bhi kaha 100himaalay jitne bade te bade vighna bhi aa jaaen to bhi hatenge nahin,haar nahin khaayenge,taajposhi mukti varsha avashya manaayenge। baapdaada roz chart dekhega। aise nahin yahaan se jaao to train mein hi kaho pata nahin kya ho gaya, ghar mein gaye to bagule aur hans ki ladaai lag gai,aise nahin kehna yeh ho gaya, yeh ho gaya …। yeh nahin sunenge। aapke patra vesta paper box mein daalenge, sunenge nahin। dridh sankalp karo - hona hi hai। jahaan dridhta hai vahaan saphalta nahin ho,asambhav hai। to sabhi dridh sankalp vaale hain na।teachers haath uthaao, teachers bahut hain। saare centres khaali karke aaye hain kya?

dekho ek khushkhabri sunaate hain - baapdaada ne dekha, abhi dekha hai, suna hai ki sarva madhuban vaalon ne apne parivartan ka lakshya bahut achha rakha hai,lakshan to dekhenge lekin lakshya bahut achha rakha hai, apne mein antar jo aaya hai woh bhi likha hai lekin baapdaada ko khushi hai antar aana shuru hua,aage hota rahega। lekin sabhi ne apne dridh sankalp ka umang-utsaah achha dikhaaya hai। abhi kaagaj mein hai lekin kaagaj mein bhi pahla kadam to hai। to baapdaada ko khushi hui kyon? saare world ke liye he arjun madhuban nivaasi hain। nimitta madhuban nivaasi hain, second number desh-videsh ki nimitta sevaadhaari teachers hain aur sarva sahayogi saathi saara parivaar brahman aatmaaye hain। to madhuban ka naksha baapdaada dekhenge woh bilkul badla hua dikhaai de। madhuban vaale to kam aaye honge। kaeeyon ne to likha hi nahin hai। aage baithne vaalon ne kam likha hai, bahut busy rahe hain। lekin jab kaam milta hai to likhne mein bhi marks jama hoti hain। agar nahin likha to marks extra kam ho gai, nuksaan kar diya। jo bhi direction milte hain, direct baap dvaara milte hain, chaahe nimitta aatmaayen daadiyon dvaara milte hain, usko regard dena ati aavashyak hai। ismen na bahaana dena,na albelaapan karna। aage ke liye baapdaada bata deta hai ki marks jama nahin hui। isliye isko mahatva dena arthaat mahaan banna। halki baat nahin karo। bachche bade chatur hain, kahenge baapdaada to jaante hi hain na। jaante to hain lekin kaha kyon?jaante hue kaha na! to aise chhudaana nahin chaahiye, bahut aise kaarya hain,chhote-chhote jisko haan ji karne mein extra marks jama hoti hain। kai aise students hain jo kisi bhi past ke sanskaar ke vash bahut achhe umang-utsaah mein badhte hain lekin koi na koi sunahri dhaaga, bahut maheen dhaaga unko aage badhne nahin deta। woh samajhte bhi hain ki yeh maheen dhaaga raha hua hai, lekin… lekin hi kahenge। lekin aise bhi purushaarthi hain jo chhoti-chhoti common baaton mein haan ji karne se marks le lete hain। aur ho sakta hai ki woh thodi-thodi marks ikatthi hote hue woh aage bhi nikal sakte hain, aise bhi baapdaada ke paas example ke roop mein hain isliye sahaj tareeka hai chhoti-chhoti haan ji karne mein marks jama karte jaao। kat nahin karo, jama karo। baaki baapdaada ne dekha majority ne apna umang-utsaah achha dikhaaya hai isliye dridh sankalp ke liye vishesh un madhuban nivaasi bachchon ko baapdaada haan ji karne ki mubaarak dete hain। yaadapyaar bhi de rahe hain। laakh-laakh guna yaadapyaar de rahe hain। kyon?madhuban hai baapdaada ke swaroop ko pratyaksha karne ka sheeshamhal। to ek baat ki to khushi hai, abhi kaagaj mein aaya hua,karma mein laana hi hai। theek hai na! achha। mubaarak ho।

30 varsha vaale to bahut mauj mein hain na! (1000 aaye hain) dekho baapdaada kahenge uth jaao, to maataayen iske bajaae aage aa jaayengi, isliye uthaate nahin hain। ceremony vaale haath khada karo। baapdaada ko is group ke liye bahut-bahut-bahut dil se sammaan hai kyon? yahi paandav hain,yahi maataayen hain jinhonne seva ki sthaapna mein, centres sthaapan karne mein jab beggary life thi, beggary life mein centre khule hain, aise aaeevel ke samay is sena ne apne tan-man-dhan se nimitta ban ke sevaasthaan sthaapan kiye hain। aaeevel ke samay jo sahayogi banta hai unka aath aana, aath karod ban jaate hain। baapdaada ko yaad hai - khud baandheli hote hue bhi ek katori mein aata, ek katori mein cheeni, ek katori mein ghi,aise katori-katori karke laati thi। to socho kitne sachchi dil vaale rahe। apne ghar kharche se baapdaada ke centre chalaaye hain, apne personal jama khaate se, apne kharche se bachat karke centre sthaapan kiye hain, to kitna bhaagya hai inhon ka! aise samay par sahayogi aatmaon ko baapdaada bhi namaste kehte hain। inhon ke anubhav bahut achhe hain, saara bhaagvat inhon ka hai। isliye baapdaada khush hain aur sabhi bahut umang-utsaah se prayatna kar pahunch gaye hain,uske liye bhi baapdaada khush hain। lakdiyaan leke chali to aai hain। aapko do taange hain,inhon ko teen taange hain। jab chalti hain to scene to achhi lagti hai na। inhon ko chalaake dekho। kal inhon ki thodi yaatra nikaalna, class se bhandaare tak bas। dekhna kaise chalti hain,bahut achhi scene lagegi। koi bhi girna nahin। agar girne vaale ho to baith jaana, girna nahin। dekho baapdaada to chaahte hain inhon ko dance karaayen lekin aap sab disturb ho jaayenge,isliye baithe hi baithe khushi mein naacho, haath paanv se nahin। achha hai। aap logon ko bhi achha laga na। bujurgon ki duaayen bahut achhi hoti hain। paandav bhi achhe hain,paandavon ne bhi sahayog kam nahin diya hai। bhaagdaud karne vaale to paandav hi rahe hain। iseelie paandavon ko bhi dil se baapdaada aur sarva parivaar ki taraph se bahut-bahut duaayen hain। achha।

(baal brahmachaari yugal bhi baithe hain) jo baal brahmachaari hain woh apni jagah par hi uthkar khade ho jaao, achha yeh ikatthe baithe hain। haath hilaao। dekho ab tak jo vijay ka vrat liya hai usmein rahne ka inaam to milna hi hai,mila bhi hai। aage ke liye sada svapna maatra bhi, sankalp maatra bhi pavitrata ka khandan nahin ho। akhanda pavitrata- yeh hai baal brahmachaariyon ka lakshya aur lakshan। abhi tak ki mubaarak hai lekin aage bhi baapdaada yahi kahenge ki sada amar bhav ke vardaani rehna hi hai। amar hain na! khandit to nahin na! dekho khandit moorti ka kabhi poojan nahin hota hai, to koi bhi vrat agar khandit hota hai to woh amar vardaani aatma nahin ban sakta hai aur aisa poojya jo dvaapar se kaliyug ant tak poojya bane, aise ishta nahin ban sakte,isliye sada amarbhav। achhi himmat rakhi hai,himmat ki madad sada milti rahegi, adhikaari ho lekin akhanda baal brahmachaari।5 varsha, 10varsha - yeh nahin,akhanda। jahaan tak brahman jeevan hai, yeh amar bhav ke vardaani rahen। theek hai na! manjoor hai? himmat hai? ek haath ki taali bajaao।

(10 saal vaale 200 double videshi bhaai bahinon ki bhi ceremony hai)

yeh to bahut lucky hain। double foreigners ne bhi number jeet liya hai। baapdaada ko khushi hai ki double foreigners peechhe nahin rahe hain, number sabmen achha le rahe hain। yeh dikhaata hai ki jaise abhi thode samay mein make up kar rahe hain, aise hi last mein bhi teevra purooshaartha dvaara number achhe te achhe le lenge। aise nishchay hai na! nishchay hai? 108 ki maala mein aana hai na?achha - 108ki maala double foreigners ki hogi aur India vaalon ki? aapki to hogi na। baapdaada ne chhutti di hai jitne bhi 108 mein aane chaahen, chaahe bhaarat vaale, chaahe videsh vaale donon ko chhutti hai, baapdaada maala badha lenge, lekin aapko avashya daalenge, rahne nahin denge। samjha। translation ho rahi hai। achha hai। translation karne vaale ko bhi mubaarak।

baapdaada to inhon ko (saamne baithe hue madhuban vaalon ko) bhi mubaarak dete hain,jo aage aage kaam ke liye baithe hain, cabin mein bhi baithe hain, tapasya achhi karte hain। ek baat mein to marks le lenge, dil se seva mein to marks le lenge। yeh bhi achha hai, is khaate mein aapko extra marks milengi। dil se karna। tang hoke nahin karna, are kya karen - yeh to tang karke rakha hai, aise nahin। kitna bhi tang karen lekin aap harshit rehna। pyaar se kaho aao bahinen, aao bhaai, kya chaahiye… theek hai na! ya nahin-nahin, abhi nahin। bhale cheez nahin do, cheez dene ki nahin hai, nahin de sakte hain koi harja nahin, lekin meethe bol to de sakte ho na। meethe bol bhi aadhi cheez milne ka anubhav kara dete hain। abhi nahin, abhi nahin jaao, jaao … aise nahin। haan ji। karenge,dekhenge, denge। dil to le lo, cheez to bhale nahin do aur santushta karne ka lakshya hoga to cheez bhi aa jaati hai। baapdaada ne dekha hai agar koi bhi stock vaale ki dil hai ki mujhe yeh karna hi hai,pata nahin kahaan se cheejen le aate hain,kahaan se stock bhar jaata hai। sirf dil ho। madhuban vaale hain bahut hoshiyaar। cheez laane mein bhi hoshiyaar hain। hoshiyaar to hain, tabhi to duty mili hai na। agar drama ne nimitta banaaya hai to koi na koi visheshta to hai jis visheshta ne madhuban mein nimitta banaaya hai। sirf us visheshta ko samay prati samay thoda sa shant bhaav, prem bhaav se nimitta bano। baaki athak to hain। madhuban jaise athak aur kahaan bhi nahin hain। athak bhav ka vardaan to madhuban ko hai। abhi is varsha madhuban kya karega?

abhi mukta varsha mein number one madhuban nivaasi। theek hai? ho sakta hai ya mushkil hai? (haan ji) phir to baapdaada madhuban vaalon ko bhi golden badge dega। madhuban vaalon ko badge dena hai aur sabhi ko diya hai madhuban vaalon ko mukta varsha ki prize denge। achha badge denge aapko। achha।

(raajasthaan ne seva sambhaali hai)-raajasthaan ne itni bheed ko sambhaal liya na। dekho baapdaada ko kehna nahin chaahiye, lekin ishaara de rahe hain sabhi itne aaye,bahut-bahut mubaarak ho, bhale aaye। sirf ek baat baapdaada kahe,sunne ke liye taiyaar ho?khaas teachers sunne ke liye taiyaar hain? achha। bhale aaye, padamguna welcome, parantu… itla dena yeh teachers ka farja hai। achaanak aa gaye,baapdaada ko to khushi hai,baapdaada to vatan mein rehte hain, lekin aap log to saakaar mein rehte ho na,to dekho aap logon ko hi dhoop mein tent mein sona pada,chaahe bachchon ko khushi hai, koi bura nahin maante hain lekin teachers ka farja hai sankhya pahle se sunaana। itni takleeph jo thodi bahut hui hai,woh nahin hoti। jo hua woh bahut achha hua, yeh shaantivan ka haal to bhar gaya na। yeh to achha hua। sirf itla karne se aap logon ka bahut-bahut achha prabandha hota। aage ke liye aap aayenge, aapka svaagat hai, baapdaada ne yeh bhi scene dekhi ki kitne log dhoop mein sthaan milne ke pahle baithe hain, baapdaada ko achha nahin lagta। pahle se pata hone se aapki reservation book ho jaati,phir aapko aise baithna nahin padta। isliye jo thodi bahut takleeph hui, uska kaaran itla nahin hua। isliye aage aaraam se aana,aao bhale aao,lekin aaraam se aana। suna teachers ne। aage se aise nahin karna। pankhe to theek mile hain na। peechhe vaale pankhe hilaao। (15 hajaar pankhe sabke haathon mein hain) baahar baithne vaalon ko pahle se hi baapdaada number one yaadapyaar de rahe hain aur madhuban vaale jo tyaag kar khaas security par seva prati baithe hain, unhon ko vishesh laakh guna mubaarak ho। sambhaal rahe hain na! aur aaj jo desh videsh mein door baithe sameep ka anubhav kar rahe hain,un sabhi desh vaalon ko baapdaada khaas-khaas-khaas yaadapyaar de rahe hain। achha saadhan hai। achha।

raajasthaan,kaanpur kidvai nagar vaale, Indore vaale jinhonne bhi madad ki hai utho। achha hai dekho double punya mil gaya। vartamaan seva ki duaayen mili aur bhavishya seva ki praalabdha jama hui। to raajasthaan ya jo bhi madadgaar bane, un sabhi ko baapdaada dil se sada seva mein takhta par rah duaayen lete raho, duaayen dete raho aise amar raho, achha part bajaaya,uske liye sabhi khushi se aapko dhanyavaad de rahe hain।

double videshiyon ki season achhi rahi? sabhi double videshi is season mein vishesh jama ka khaata badha ke ja rahe hain! aise hai?jama kiya hai?bahut achha।

achha। abhi agar aap sabhi ko achaanak direction mile ki abhi-abhi ashareeri ban jaao to ban sakte ho ki halchal hogi?kyon? last samay ka yahi abhyaas paas with honour banaayega। to abhi baapdaada bhi kehte hain ek second mein sab baaton ko kinaare kar ashareeri bhav। (drill) achha।

chaaron or ke ati shreshtha bhaagyavaan,parmaatma paalna ke adhikaari aatmaayen, parmaatma padhaai ke adhikaari, paramatma satguru ke vardaanon ke adhikaari, sada dridhta dvaara saphalta ke adhikaari, sada akhanda yogi,achal yogi,sada vishwa sakaash dene ke liye avinaashi sukh,shanti va sachche pyaar ka stock jama ho।parivartan ki jimmevaari ke taajdhaari,sada sarva praaptiyon ko emerge roop mein anubhav karne vaale aise vishesh aatmaon ko baapdaada ka yaadapyaar aur namaste।

(aaj baapdaada ko daadi ji ne poore diamond haal mein chakra lagvaaya,baapdaada ne sabhi bhaai bahinon ko drishti di - sabha mein kareeb 20-21 hajaar bhaai bahinen haal ke andar-baahar upasthit the)

daadiyon se:- season ki samaapti nirvighna hui? baapdaada yahi vartamaan samay dekhne chaahte hain ki jo vishesh nimitta aatmaayen hain,jaise mukh ka aavaaz science ke saadhnon se door baithe pahunchta hai, aise man ka aavaaz sankalp yeh bhi aise hi pahunche,jaise yeh science dvaara mukh ka aavaaz pahunchta hai। jaise shuru mein saakshaatkaar hote the, ishaare milte the, aur usi ishaare se kaeeyon ko jaagriti bhi aai, aise abhi jo aadi mein hua woh ant mein, pahle to sthaapna thi to ek brahma baap dvaara saakshaatkaar hua, lekin abhi practical mein shaktiyon ka part hai,brahma baap shiv baap gupta hai, backbone hai lekin stage par shaktiyon ka part hai, to shaktiyaan ananya bhi bahut hain। woh ek brahma baap ne kiya, abhi aisi manobal ki shakti pratyaksha ho jaise mukh ka aavaaz clear pahunchta hai na। aise man ka aavaaz dheere-dheere pahunchta jaae,baap aa gaya। sirf yeh aavaaz bhi pahunch gaya to dhoodhne to lagenge। phir aapehi pahunchenge। lekin yeh manobal ki seva abhi honi chaahiye। yeh saare vishwa tak aavaaz kuchh science aur kuchh silence ki shakti dvaara hi pahunchega,jisko man ka aavaaz pahunchega woh samjho jyaada sameep aayenge aur jisko mukh ka aavaaz pahunchega, unmein se nambarvaar honge। isliye abhi yeh silence ki visheshta kya hai aur silence ke bal se kya-kya kar sakte hain, ho sakta hai is vishay par jyaada attention kyonki samay kam hai aur seva vishwa ki har aatma ko sandesh pahunchaana hai। isliye baapdaada ne kaha ki kuchh sunaayenge kyonki nimitta to aap ho vaayumandal mein lahar phailaane ke nimitta to aap hi hain। hain na? to aisi lahar phailaao। sabhi sahayogi ban jaao। abhi man ka aavaaz mukh ke aavaaz se bhi jyaada kaam kar sakta hai। to aise group banaao jo is kaarya ke roochi vaale hon aur iski rehearsal karte rahen। jaise pahle shuru mein yaad ka abhyaas kiya, seva ke naye-naye plans banaaye to usse itni vriddhi hui hai na। abhi jaise pahli rachna hui, mukh dvaara direct, phir hui mansa sankalp dvaara brahma dvaara, abhi hai shaktiyon dvaara, jo kehte hain ki shaktiyon ne baan chalaaye। to yeh baan jo sankalp dvaara spashta aavaaz pahunch jaae, koi bula raha hai, koi kuchh kah raha hai। jaise koi-koi ko svapna peechhe pad jaata hai,jab tak woh kaam poora nahin karta to baar-baar svapna usko jaagrit karta rehta। kai riddhi-siddhivaale bhi kuchh vidhi se karte hain। lekin yog ki vidhi dvaara yeh aavaaz phaile। aise seva ke plan banaao। jaise abhi yeh utsavon ka varsha manaaya na। abhi woh to ho gaya, abhi phir aisi koi lahar phailaao jo vihang maarga ki seva ho। mukh ki vihang maarga ki sevaayen to bahut ki। uski result to hai hi। abhi phir koi naveenta। samjha। dekhenge kaun-kaun ismen number leta hai।

achha। sabhi theek hain?sabhi milkar seva kar rahe hain। to seva ka pahaad bhi paar ho jaata hai।

achha। om shanti।