Avyakt murli du jeudi 28 mars 2002

>

28-03-2002 om shanti avyakt baapdaadaamdhuban

is varsha ko nirmaan, nirmal varsha aur vyartha se mukta hone ka mukti varsha manaao

aaj baapdaada apne chaaron or ke bachchon ke mastak mein chamakti hui teen lakeeren dekh rahe hain। ek lakeer hai prabhu paalna ki,doosri lakeer hai shreshtha padhaai ki aur teesri lakeer hai shreshtha mat ki। teenon hi lakeer chamak rahi hain। yeh teenon lakeer sarva ke bhaagya ki lakeere hain। aap sabhi bhi apni teenon lakeeren dekh rahe ho na! prabhu paalna ka bhaagya sivaae aap brahman aatmaon ke aur kisi ko bhi praapta nahin hota hai। parmaatma paalna jis paalna se kitne shreshtha poojyaneey ban jaate ho। kabhi svapna mein bhi aisa socha tha ki mujh aatma ko parmaatma padhaai ka adhikaar praapta hona hai। lekin abhi saakaar mein anubhav kar rahe ho। svayan satguru amritvele se raat tak har karma ki shreshtha mat de karma bandhan ke parivartan mein,karma sambandh mein aane ki shreemat dene ke nimitta banaayenge - yeh bhi svapna mein nahin tha। lekin abhi anubhav se kehte ho hamaara har karma shreemat par chal raha hai। aisa anubhav hai? aisa shreshtha bhaagya har bachchon ka baapdaada bhi dekh-dekh harshit hote hain। vaah mere shreshtha bhaagyavaan vaah! bachche kehte vaah baba vaah! aur baap kehte vaah bachche vaah!

aaj amritvele se bachchon ke do sankalpon se yaad baapdaada ke paas pahunchi। ek to kai bachchon ko apna account dene ki yaad thi। doosri - baap ke sang ke rang ki holi yaad thi। to sabhi holi manaane aaye ho na! braahmanon ki bhaasha mein manaana arthaat banna। holi manaate hain arthaat holi bante hain। baapdaada dekh rahe the brahman bachchon ka holiest banna kitna sarva se nyaara aur pyaara hai। vaise dvaapar ke aadi ki mahaan aatmaayen aur samay prati samay aaye hue dharma pitaayen bhi pavitra, holi bane hain। lekin aapki pavitrata sabse shreshtha bhi hai, nyaari bhi hai। koi bhi saare kalpa mein chaahe mahaatma hai, chaahe dharma aatma hai,dharma pita hai lekin aap ki aatma bhi pavitra, shareer bhi pavitra, prakriti bhi satopradhaan pavitra, aisa holiest koi na bana hai, na ban sakta hai। apna bhavishya swaroop saamne laao। sabke saamne apna bhavishya roop aaya? ya pata hi nahin hai ki banoonga ya nahin banoonga! kya banoonga! kuchh bhi banenge lekin honge to pavitra na! shareer bhi pavitra, aatma bhi pavitra aur prakriti bhi pavitra paavan,sukhdaai… nishchay ki kalam se apna bhavishya chitra saamne la sakte hain। nishchay hai na! teachers ko nishchay hai? achha ek second mein apna bhavishya chitra saamne la sakte ho?chalo krishna nahin banenge,lekin saathi to banenge na! kitna pyaara lagta hai। aaaartista banna aata hai ya nahin aata hai? bas saamne dekho। abhi saadhaaran hoon, kal (drama ka kal,yeh kal nahin jo kal aayega) to kal yeh pavitra shareerdhaari banna hi hai। paandav kya samajhte ho? pakka hai na, shakya to nahin hai - pata nahin banenge ya nahin banenge?shakya hai?nahin hai na! pakka hai। jab raajayogi hain to raajya adhikaari banna hi hai। baapdaada kai baar yaad dilaate hain ki baap aapke liye saugaat laaye hain to saugaat kya laaye hain?sunahri duniya, satopradhaan duniya ki saugaat laaye hain। to nishchay hai, nishchay ki nishaani hai roohaani nasha। jitna apne raajya ke sameep aa rahe ho, ghar ke bhi sameep aa rahe ho aur apne raajya ke bhi sameep aa rahe ho,to baar-baar apne sweet hom aur apne sweet raajya ki smriti spashta aani hi chaahiye। yeh sameep aane ki nishaani hai। apna ghar, apna raajya aisa hi spashta smriti mein aaye, teesre netra dvaara spashta dikhaai de। anubhav ho aaj yeh, kal yeh। kitne baar part poora kar apne ghar aur apne raajya mein gaye ho,yaad aata hai na! aur ab phir se jaana hai। double foreigners spashta yaad aata hai ki kheenchana padta hai, pata nahin kya banega, kaisa hoga! kheenchana padta hai ya spashta hai? yaad hai? spashta hai? peechhe vaalon ko yaad hai? gallery mein baithne vaalon ko yaad hai? (aaj ki sabha 16-17 hazaar ki hai) baapdaada dekh rahe hain,baahar bhi baithe hain aur vishwa ke kone-kone mein bhi baithe hain। to holi mana li na? ho hi holi, to holi kya manaayenge! yeh to sangamayug ke suhej hain।

to baapdaada aaj sabka account dekhenge na! bhoola nahin hai। sabne apna account rakha,jinhonne accurate apna account rakha hai, niyam pramaan, kaam chalaau nahin, yathaartha roop se jaisa bhi hai lekin account apna poora rakha hai, sachcha-sachcha account, chalaau nahin, woh bada haath uthaao। jinhonne rakha hai, likha hai nahin, rakha hai। thodon ne rakha hai। achha peechhe vaale jinhonne rakha hai, khade ho jaao। achha। double foreigners jinhonne rakha hai woh utho। achha mubaarak ho। achha - jinhonne nahin rakha hai unhon se haath nahin uthvaate hain। uthaana achha nahin lagega na। lekin jinhonne sachcha-sachcha account rakha hai, baapdaada ke paas to spashta ho hi jaata hai। kaiyon ne thoda hisaab se nahin,jaise average nikaala jaata hai na, aise bhi rakha hai। accurate bahut thodon ne likha hai ya rakha hai। phir bhi baap ke direction ko maana isliye baapdaada ne do prakaar ki extra marks unhon ki badhaai, kyonki shreemat par chalna yeh bhi ek subject hai। to shreemat par chalne ki subject mein paas hue isliye first number vaalon ko baapdaada ne apne taraph se 25 marks badhaai,jo pahla number hain aur jo doosra number hain usko 15 marks badhaai। yeh extra lift baapdaada ne apne taraph se di। to final paper mein aapki yeh marks jo hain woh jama hongi। paas with honour hone mein madad milegi। lekin jinhonne nahin rakha hai,koi bhi kaaran hai, hai to albelaapan aur to kuchh nahin hai lekin phir bhi koi bhi kaaran se agar nahin rakha hai to baapdaada kehte hain ki phir bhi ek maas apna account abhi se rakho aur agar abhi bhi ek maas accurate, number one vaala account rakhenge, to baapdaada uski marks kat nahin karenge,jo shreemat pramaan nahin kar sake hain। samjha। kat nahin karenge lekin karna zaroori hai। shreemat na maanne se marks to kat hoti hain na! ant mein jab aap apna potaamel drama anusaar dil hai ke T.vi. mein dekhenge aur T.vi. nahin,apne hi dil ki T.vi. mein baapdaada dikhaayenge,to usmein is shreemat ki marks kat nahin karenge। phir bhi baapdaada ka pyaar hai। samajhte hain ki bahut janma ke albelepan ke sanskaar pakke hain na,to ho jaata hai। lekin abhi albele nahin banna, nahin to phir peechhe bataayenge kya hoga, abhi nahin bataate hain kyonki baapdaada ne sabhi ki vartamaan samay ki result dekhi। chaahe double foreigners,chaahe bhaaratvaasi, sabhi bachchon ki result mein dekha ki vartamaan samay albelepan ke bahut naye-naye prakaar bachchon mein hain। anek prakaar ka albelaapan hai। man hi man mein soch lete hain,sab chalta hai…। aajkal ka sab baaton mein yeh vishesh slogan hai - ‘‘sab chalta hai’’ - yeh albelaapan hai। saath mein thoda-thoda bhinna-bhinna prakaar ka purooshaartha va sva-parivartan mein albelepan ke saath kuchh percent mein aalasya bhi hai। ho jaayega, kar hi lenge… baapdaada ne naye-naye prakaar ki albelepan ki baaten dekhi hain। isliye apna sachcha,sachchi dil se albele roop se nahin, account zaroor rakho।

aaj is season ka last tarna hai na! to baapdaada result suna rahe hain। sunaaye na! ki nahin sirf pyaar karen? yeh bhi pyaar hai। har ek se baapdaada ka itna pyaar hai ki sabhi bachche brahma baap ke saath-saath apne ghar mein chalen। peechhe-peechhe nahin aaven, saathi banke chalen। to samaan to banna pade na! bina samaanta ke saathi banke nahin chal sakenge aur phir apne raajya ka pahla janma, pahla janma to pahla hi hoga na! agar doosre-teesre janma mein aa bhi gaye, achha raaja bhi ban gaye, lekin kahenge to doosra-teesra na! saath chalen aur brahma baap ke saath pahle janma ke adhikaari banen - yeh hai number one paas with honour vaale। to paas-with-honour banna hai ya paas marks vaale bhi theek hain? kabhi bhi yeh nahin sochna ki jo ham kar rahe hain,jo ho raha hai woh baapdaada nahin dekhte hain। ismen kabhi albele nahin hona। agar koi bhi bachcha apne dil ka chart poochhe to baapdaada bata sakte hain lekin abhi bataana nahin hai। baapdaada har ek mahaarthi, ghodesvaar… sabka chart dekh rahe hain। kai baar to baapdaada ko bahut taras aata hai, hain kaun aur karte kya hain? lekin jaise brahma baap kehte the na - yaad hai kya kehte the? gud jaane gud ki gothri jaane। shiv baba jaane aur brahma baba jaane kyonki baapdaada ko taras bahut padta hai lekin aise bachche baapdaada ke raham ke sankalp ko touch nahin kar sakte, catch nahin kar sakte। iseelie baapdaada ne kaha - bhinna-bhinna prakaar ka royal albelaapan baap dekhte rehte hain। aaj baapdaada kah hi dete hain ki taras bahut padta hai। kai bachche aise samajhte hain ki satayug mein to pata hi nahin padega kaun kya tha,abhi to mauj mana lo। abhi jo kuchh karna hai kar lo। koi rokne vaala nahin, koi dekhne vaala nahin। lekin yeh galat hai। sirf baapdaada naam nahin sunaate, naam sunaayen to kal theek ho jaaen।

aaj dhuriya mana rahe hain na। dhuriye mein ek-do ko jo bhi hota hai spashta de dete hain। to samjha kya karna hai, paandav samjha ki nahin samjha! chal jaayega? chalega nahin kyonki baapdaada ke paas har ek ki har din ki report aati hai। baap-daada aapas mein bhi roohroohaan karte hain। to baapdaada sabhi bachchon ko phir se ishaara de rahe hain ki samay sab prakaar se ati mein ja raha hai। maaya bhi apna ati ka part baja rahi hai, prakriti bhi apna ati ka part baja rahi hai। aise samay par brahman bachchon ka apne taraph attention bhi ati arthaat man-vachan-karma mein ati mein chaahiye। saadhaaran purooshaartha nahin। baapdaada ne ishaara diya bhi hai ki 66 varsha mein abhi tak 6 laakh taiyaar kiye hain। abhi 9 laakh bhi nahin hue hain। to vishwa kalyaani aatmaayen vishwa ki sarva aatmaon ka kalyaan kab karenge? aur 66 varsha chaahiye kya? 66 varsha aur nahin chaahiye? double foreigners ko chaahiye? nahin chaahiye? to kya karenge?chalo aadha,33 varsha chaahiye?nahin chaahiye। 33 varsha bhi nahin chaahiye to kya karenge?vaise baapdaada ne dekha hai ki seva se lagan achhi hai। seva ke liye ever ready hain,chance mile to pyaar se seva ke liye ever ready hain। lekin abhi seva mein addition karo - vaani ke saath-saath mansa, apni aatma ko vishesh koi-na-koi praapti ke swaroop mein sthit kar vaani se seva karo। maano bhaashan kar rahe ho to vaani se to bhaashan achha karte hi ho lekin us samay apne aatmik sthiti mein vishesh chaahe shakti ki,chaahe shanti ki, chaahe parmaatma-pyaar ki, koi na koi vishesh anubhooti ki sthiti mein sthit kar mansa dvaara aatmik-sthiti ka prabhaav vaayumandal mein phailaao aur vaani se saath-saath sandesh do। vaani dvaara sandesh do, mansa aatmik sthiti dvaara anubhooti karaao। bhaashan ke samay aapke bol aapke mastak se,naynon se,soorat se us anubhooti ki seerat dikhaai de ki aaj bhaashan to suna lekin parmaatma pyaar ki bahut achhi anubhooti ho rahi thi। jaise bhaashan ki result mein kehte hain bahut achha bola, bahut achha, bahut achhi baaten sunaai, aise hi aapke aatma-swaroop ki anubhooti ka bhi varnan karen। manushya aatmaon ko vibration pahunche, vaayumandal bane। jab science ke saadhan thanda vaataavran kar sakte hain, sabko mahsoos hota hai bahut thandaai achhi aa rahi hai। garam vaayumandal anubhav kara sakte hain। science sardi mein garmi ka anubhav kara sakti hai, garmi mein sardi ka anubhav kara sakti, to aapki science kya prem swaroop, sukh swaroop, shant swaroop vaayumandal anubhav nahin kara sakti! yeh reesarcha karo। sirf achha-achha kiya lekin achhe ban jaayen, tab samaapti ke samay ko samaapta kar apna raajya laayenge। kyon, aapko apna raajya yaad nahin aata?sangamayug shreshtha hai woh theek hai, heere tulya hai। lekin he merciful, vishwa kalyaani bachche, apne duhkhi ashaanta bhaai bahnon par raham nahin aata?umang nahin aata, duhkhamay sansaar ko sukhmay bana den,yeh umang nahin aata? duhkh dekhne chaahte,doosron ka duhkh dekhkar bhi raham nahin aata?aapke bhaai hain, aapki bahinen hain to duhkh dekhna achha lagta hai?apna dayaalu,kripaalu swaroop emerge karo। sirf seva mein nahin lag jaao, yeh programme kiya, yeh programme kiya… chalo varsha poora hua। abhi merciful bano। chaahe drishti se, chaahe anubhooti se,chaahe aatmik sthiti ke prabhaav se, merciful bano। merciful bano। 66 varsha samaapta ho chuke hain। kam nahin hain 66 varsha। brahma baap ko avyakt hote bhi 33 varsha ho gaye hain। brahma baap kab-kab kehte bhi hain, kab bachche aayenge,darvaaja kholne ke liye। to ghar ka darvaaja saath mein kholenge ya peechhe-peechhe aayenge? intajaar kar raha hai। to seva mein addition karo। isse baapdaada guarantee de rahe hain ki thode samay mein agar is vidhi se seva ki to aapke paas quality ki varsha ho jaayegi। vaaris quality ki baarish padegi। itni mehnat karne ki zaroorat hi nahin padegi। kehna hi nahin padega - abhi yeh kaarya hona hai, ismen sahayogi bano,nahin। sahayog ki svayan offer karne vaale honge। lekin saadhaaran purooshaartha,saadhaaran vidhi ki seva ko parivartan karo। chhim-chhim honi chaahiye। honi to hai hi। sirf anubhooti karaane ki vidhi socho, sirf bhaashan aur course karaane ki nahin,woh bahut kara liye। vargaakran ke programme bhi bahut kar liye। jo aaye us par chhaap lage, 9 laakh ki chhaap lag jaae। samjha। kya karna hai?kehte the service ka plan sunaana,kaha tha na?abhi koi chhim-chhim karke dikhaao। abhi dheemi chaal hai। jaise lakshmi ke liye kehte hain na, donon haathon se sampatti ki chhim-chhim ho rahi hai, to aap abhi shreshtha brahman ban anubhootiyon ki chhim-chhim karo। lekin anubhooti woh kara sakenge jo aur vyartha chintan, vyartha darshan aur vyartha samay ganvaane vaale nahin honge। aajkal thoda-thoda, baapdaada ne thoda dekha hai। woh bhi sunaayen kya? achha aaj sab suna dete hain। holi hai na! to holi mein bura nahin maante hain। achha।

baapdaada ne ek baat aur bhi dekhi hai,sunaana achha nahin lagta। kabheekbhi koi-koi bachche,achhe-achhe bhi doosron ki baaton mein bahut padte hain। doosron ki baaten dekhna, doosron ki baaten varnan karna… aur dekhte bhi vyartha baaten hain। visheshta ek do ki varnan karna,woh kam hai। har ek ki visheshta dekhna, visheshta varnan karna,unki visheshta dvaara unko umang utsaah dilaana, yeh kam hai। lekin vyartha baaten jin baaton ko,baapdaada kehte hain chhod do, apni to chhodne ki koshish karte,lekin doosre ki dekhne ki bhi aadat hai। usmein time bahut jaata hai। baapdaada ek vishesh shreemat de rahe hain - hai common baat lekin time bahut vesta jaata hai। bol mein nirmaan bano। bol mein nirmaanta kam nahin honi chaahiye। bhale saadhaaran shabd bolte hain, samajhte hain,ismen to bolna hi padega na! lekin nirmaanta ke bajaae agar koi authority se,nirmaan bol nahin bolte to thoda kaarya ka,seat ka,5 percent abhimaan dikhaai deta hai। nirmaanta braahmanon ke jeevan ka vishesh shringaar hai। nirmaanta man mein, vaani mein, bol mein, sambandh-samparka mein…ho। aise nahin teen baaton mein to main nirmaan hoon,ek mein kam hoon to kya hua! lekin woh ek kami paas with honour hone nahin degi। nirmaanta hi mahaanta hai। jhukna nahin hai,jhukaana hai। kai bachche hansi mein aise kah dete hain kya mujhe hi jhukna hai, yeh bhi to jhuke। lekin yeh jhukna nahin hai vaastav mein paramatma ko bhi apne oopar jhukaana hai, aatma ki to baat hi chhodo। nirmaanta niranhakaari svatah hi bana deti hai। niranhakaari banne ka purooshaartha karna nahin padta hai। nirmaanta har ek ke man mein,aapke liye pyaar ka sthaan bana deti hai। nirmaanta har ek ke man se aapke prati duaayen nikaalegi। bahut duaayen milengi। duaayen, purooshaartha mein lift se bhi rocket ban jaayengi। nirmaanta aisi cheez hai। kaisa bhi koi hoga, chaahe busy ho, chaahe kathor dil vaala ho, chaahe krodhi ho, lekin nirmaanta aapko sarva dvaara sahayog dilaane ke nimitta ban jaayegi। nirmaan, har ek ke sanskaar se svayan ko chala sakta hai। real gold hone ke kaaran svayan ko mould karne ki visheshta hoti hai। to baapdaada ne dekha hai ki bol-chaal mein bhi, sambandh-samparka mein bhi, seva mein bhi ek do ke saath nirmaan svabhaav vijay praapta kara deta hai। isliye is varsha mein vishesh baapdaada is varsha ko nirmaan, nirmal varsha ka naam de rahe hain। varsha manaayenge na। manaana maana banna। sirf kehna nahin, haan yeh varsha hai। banna hai। banna hai na? bas aise bolo jo sab kahen aur bhi moti hamko sunaao, moti do। aise nahin kahen - nahin,nahin yeh to suno nahin, jaao। aise nahin। heere-moti mukh se niklen। abhimaan se bolne se kisko duhkh kyon dete ho! duhkh ke khaate mein jama to hoga na। aap samajhte ho kya hua bol diya, aise hi to hai। lekin duhkh ke khaate mein jama hota hai। samjha। iseelie account rakhna। aise nahin abhi to account de diya? rakhne se phaayda hai।

baapdaada ne dekha kaiyon ne purooshaartha achha kiya hai। attention diya hai। to kya yaad rakhenge? nirmaan। tab nirmaan ka karttavya phataaphat hoga। nirmaan bano,nirmaan karo। phir aapehi bolenge, baba abhi to chhim-chhim ho gai hai। honi hi hai। saare vishwa ki aatmaayen aho prabhu kahke bhi aapke aage jhukni hain। to suna varsha ki seva ka sunaaya na! abhi dekhenge kaun-sa centre,kaun-sa zone,zone mein bhi kaun-sa centre is vidhi se vaaris nikaalte hain। abhi koi vaarison ki chhim-chhim karo। woh hogi anubhooti karaane se। sabse bade te badi authority anubhav hai। anubhvi ko koi badal nahin sakta। achha। double foreigners ko ek second mein koi bhi vyartha baat,koi bhi negative baat,koi bhi beeti baat, usko man se bindi lagaana aata hai?

double foreigners jo samajhte hain ki kaisi bhi beeti hui baat, achhi baat to bhoolni hai hi nahin,bhoolni to vyartha baaten hi hoti hain। to koi bhi baat jisko bhoolne chaahte hain, usko second mein bindi laga sakte hain? jo foreigners laga sakte hain, woh seedha, lamba haath uthaao। mubaarak ho। achha, jo samajhte hain ki ek second mein nahin ek ghanta to lagega hi?second to bahut thoda hai na! ek ghante ke baad bindi lag sakti hai,woh haath uthaao। jo ghante mein bindi laga sakte hain, woh haath uthaao। dekha, foreigners to bahut achhe hain। bhaaratvaasi bhi jo samajhte hain ek ghante mein nahin aadhe din mein bindi lag sakti hai, woh haath uthaao। (koi ne haath nahin uthaaya) hain to sahi,baapdaada ko pata hai। baapdaada to dekhta rehta hai,haath nahin uthaate, lekin lagta hai। lekin samjho aadha din lage,ek ghanta lage aur aapko advance party ka nimantran aa jaae to? to kya result hogi? ant mate so gati kya hogi? samajhdaar to ho na? isliye apni mansa ko busy rakhenge na, mansa seva ka timetable banaayenge apna to bindi lagaane ki aavashyakta nahin padegi। bas, honge hi bindi roop। isliye abhi apne man ka timetable fix karo। man ko sada busy rakho, khaali nahin rakho। phir mehnat karni padti hai। oonche-te-oonche bhagvan ke bachche ho, to aapka to ek-ek second ka timetable fix hona chaahiye। kyon nahin bindi lagti, uska kaaran kya? brake powerful nahin hai। shaktiyon ka stock jama nahin hai iseelie second mein stop nahin kar sakte। kai bachche koshish bahut karte hain,jab baapdaada dekhte hain mehnat bahut kar rahe hain, yeh nahin ho, yeh nahin ho… kehte hain nahin ho lekin hota rehta hai। baapdaada ko bachchon ki mehnat achhi nahin lagti। kaaran yeh hai,jaise dekho raavan ko maarte bhi hain, lekin sirf maarne se chhod nahin dete hain, jalaate hain aur jalaake phir haddiyaan jo hain, woh aajkal to nadi mein daal dete hain। koi bhi manushya marta hai to haddiyaan bhi nadi mein daal dete hain tabhi samaapti hoti hai। to aap kya karte ho? gyaan ki points se, dhaarna ki points se us baat roopi raavan ko maar to dete ho lekin yog agni mein svaaha nahin karte ho। aur phir jo kuchh baaton ki haddiyaan bach jaati hain na - woh gyaan saagar baap ke arpan kar do। teen kaam karo - ek kaam nahin karo। aap samajhte ho purooshaartha to kiya na,murli bhi padhi, 10 baari murli padhi phir bhi aa gai kyonki aapne yog agni mein jalaaya nahin,svaaha nahin kiya। agni ke baad naam nishaan gum ho jaata hai phir usko bhi baap saagar mein daal do, samaapta। isliye is varsha mein baapdaada har bachche ko vyartha se mukta dekhne chaahte hain। mukta varsha manaao। jo bhi kami ho, us kami ko mukti do, kyonki jab tak mukti nahin di hai na,to muktidhaam mein baap ke saath nahin chal sakenge। to mukti denge?mukti varsha manaayenge? jo manaayega woh aise haath kare। manaayenge? ek-do ko dekh liya na, manaayenge na! achha hai। agar mukti varsha manaaya to baapdaada jauhraaton se jadi hui thaaliyon mein bahutabhut mubaarak, greetings,badhaaiyaan denge। achha hai, apne ko bhi mukta karo। apne bhaai-bahnon ko bhi duhkh se door karo। bichaaron ke man se yeh to khushi ka aavaaj nikle - hamaara baap aa gaya। theek hai। achha।

baaki daadiyaan poochhti hain -baapdaada ka programme kya hoga?yahi question hai na! to baapdaada kehte hain jaise ab tak programme chal raha hai, usi vidhi se chalna hi hai। baaki kabhi aavashyakta hui to daadiyon ki dil poori karenge, lekin aavashyakta hui to। daadi samajhti hai baap ka aana to bahut sahaj hai na। kyon nahin baapdaada aave। lekin rath ko bhi to dekho। 33 varsha part bajaana bhi aaphreen hai। itni badi shaktiyon ko dhaaran karna, chhoti baat nahin hai। daadi kya karti hai bataayen, koi bhi baat hogi kahegi abhi-abhi jaao, sandesh leke aao। to bachchi kehti hai daadi abhi to din hai, raat ko jaayenge। nahin, nahin,abhi-abhi jaao। marna to padta hai na। shareer se to marna padta hai na। chaahe sandesh ho, chaahe baapdaada ki padhraamni ho। padhraamni to badi baat hai lekin sandesh mein bhi ashareeri,meetha marna hai lekin marna to hai na! isliye phir bhi baapdaada ka daadiyon ke liye bahutabhut- bahut regard aur pyaar hai। pyaar ki rassi mein baandhana achhi tarah se aata hai। achha।

meeting ke bhaai-bahnon se jo bhi meeting ke liye aaye hain woh utho। achha। aur bhi aane vaale honge। meeting mein isi vidhi se service ke plan banaana aur mukta varsha manaane ki sahaj vidhi bataana - ek do ko raay dena। is varsha mein sab mukta ho jaaen। ho sakta hai? ek varsha mein ho sakta hai? bolo,ho sakta hai?haan to bahut achhi kar rahe hain, dil khush kar diya। aise hi khush karna। bas har ek apne ko mukta karo, doosre ko nahin dekho। apni jimmevaari to le sakte ho na। agar har ek ne apni-apni jimmevaari le li to sab ho jaayega। aapko follow karne vaale aapehi follow karenge। example to bano na। achha। to aisa plan banaana। yeh kaampharens hui,yeh bhaashan hua,yeh nahin। man ki sthiti ke programme banaana। achha।

seva ka tarna - raajasthaan, Indore ka hai -sevaadhaari bahut hain। group bhi bada hai na! achha sabhi ne apne punya ka khaata jama kiya! duaayen li?yeh bahut sahaj vidhi hai, jama karne mein sabse sahaj vidhi hai,duaayen do arthaat duaayen lo। duaayen dena hi dua lena hai। to aap sabne duaaon ka khaata jama kiya, to aapke khaate mein marks jama ho gai hain। achha hai, yeh bhi ek chance milta hai। to pahle sunaaya tha na - woh hote hain university ke chancellor, aap ho punya ke khaate ka chance lene vaale chancellor। to bahut achha kiya। sabhi ne achhi seva ki। sabko sukh diya। theek rahe na! seva theek rahi? seva mein koi takleeph to nahin hui?nahin। bahut achha।

cultural wing, social wing aur sikyooriti wing ki meeting chal rahi hai

cultural varga -cultural varga vaale sabhi cultural karne vaali aatmaon ko brahman culture bhi sikhaate ho na! to cultural aur culture donon hi sikhaate sabhi aatmaon ko baap ke sameep laate raho। cultural to manoranjan hai,to sada manoranjan kaise rahe, woh shiksha va woh vidhi bhi sikhaake sabhi ko sada khush banaana। achha hai yeh bhi service ka saadhan achha hai। lekin donon saath-saath hon। to sab seva mein santushta ho na! santushta ho?

sikyooriti vaale - man ki sikyooriti,tan ki sikyooriti aur dhan ki sikyooriti teenon hi sikyooriti aaj ke jamaane mein bahut aavashyak hain। 99 sikyooriti vaalon ko pahle aatmaon ko man se vikaaron ki sikyooriti aur tan se bure karma karne ki sikyooriti aur dhan ko saphal karne ki sikyooriti… to teenon hi kaam karte ho na! ya sirf sikyooriti sthool to nahin karte na, pahle man ki sikyooriti,jitni apne man ki sikyooriti hogi, utni hi doosre ko bhi man ki sikyooriti mein aage badha sakenge। achha kaam hai,bahut aavashyak kaarya hai। sikyooriti sabse aavashyak hai aur aise sikyooriti vaale to vishwa ke liye bahut kalyaankaari aatmaayen hain। to bahut achha kaarya kar rahe ho aur sada aage badhte rehna, badhaate rehna। achha।

social varga - har varga ka kaarya to bahut sundar hai। vartamaan samay mein social varga ka kaarya bhi aavashyak hai। aur social worker mein visheshta hoti athak aur pyaar se har kaarya mein social work karna। to aap to master sarvashaktivaan hain, isliye athak bhi hain aur har kaarya mein har vidhi se social varga dvaara aatmaon ka kalyaan kar bhi rahe hain aur karte bhi rahenge। theek hai na? bahut achha। abhi har ek varga jo baapdaada ne vidhi sunaai usi vidhi pramaan programme banaana। theek hai na! achha।

chaaron or ke sarva holiest aatmaon ko,sada nirmaan ban nirmaan karne vaale baapdaada ke sameep aatmaon ko,sada apne purooshaartha ki vidhi ko fast,teevra kar sampanna banne vaale snehi aatmaon ko,sada apne bachat ka khaata badhaane vaale teevra purushaarthi,teevra buddhi vaale bachchon ko vishaal buddhi ki mubaarak bhi hai aur holi ki bhi arthaat second mein ho li, bindi lagaane vaale bachchon ko bahut-bahut yaad-pyaar, kone-kone ke bachchon ko baapdaada vishesh yaad-pyaar de rahe hain। aapke potaamel bhi mile hain,yaad-pyaar ke patra bhi mile hain, card bhi mile hain aur dil ke sankalp bhi pahunche hain,dil ki roohroohaan bhi pahunchi hai,un sabke return mein baapdaada padamguna yaad- pyaar de rahe hain। yaad-pyaar ke saath sabhi bachchon ko namaste।

daadiyon se baapdaada ki mulaakaat

abhi bhi jitna najdeek se aap milte ho,utna kaun milta hai! (nirmalshaanta daadi se)achha part baja rahi ho। prakriti ko chalaane ka dhang achha hai। (baba chalaata hai) aur aap chal rahi ho। chalaane vaala chala raha hai। sabhi achhe chal rahe hain। shareer ko achha chalaane ka dhang aa gaya hai। achha hai,jo ho raha hai achha hai। achha।

om shanti।