Avyakt murli du vendredi 6 mars 2020

> om shanti 06-03-20 madhuban

praanapyaare avyakt baapdaada ke ati snehi, sada vishwa kalyaankaari ban sukh shaantimay duniya banaane vaale, sada ek raajya, ek dharma ki sthaapna ke nimitta teachers bahinen tatha desh videsh ke sarva brahman kul bhooshan bhaai bahinen,

eeshvareey sneh sampanna madhur yaad ke saath holi ke paavan parva ki aap sabko bahut-bahut haardik badhaaeeyaan।

abhi to holi ka tyohaar saamne aa raha hai, meethe baba ne ham sabki jeevan hi holi bana di। har ek ne holi ke arth swaroop mein sthit ho, ho li arthaat beeti ko beeti kar, ek ke ho liye। puraane sanskaaron ki holi jalaakar holi ban gaye। phir ek do se mangal milan manaate, sanskaar milan ki raas karte, har ek ko apne shreshtha sang ka rang lagaate svarnim duniya laane ki seva kar rahe hain। aise sundar yaadgaar parva ki sabhi ko padamguna mubaarak ho। mubaarak ho।

aaj to pyaare avyakt baapdaada ke divya avatran ka avyakti divas hai। eastern zone, (bangaal, bihaar, udeesa, aasaam) tatha nepaal aur taamilnaadu ke kareeb 20-21 hajaar bhaai bahinen baba ke ghar mein pahunche hue hain। sabhi pyaar ke saagar mein lavleen ho, apni avyakti sthiti dvaara avyakt milan ki anubhootiyaan kar rahe hain। double videshi bhaai bahinon ki bhi bahut achhi rimjhim hai। is baar 100 se bhi adhik deshon ke bhaai bahinen baba ke ghar mein pahunch gaye hain। sabhi deshon ki mukhya badi bahinen va bhaai bhi aaye hue hain। sabhi ne poore varsha ke liye sva-unnati aur sevaaon par bahut achhi roohrihaan ke saath sevaaon ke naye-naye plans banaaye hain।

ham sabki ati priy daadi jaanki ji, (ahamdaabaad se) daadi guljaar ji (mumbai se) sookshm roop mein apne shaktishaali vibration dvaara apni upasthiti ki anubhootiyaan kara rahe hain। avyakt vatan se pyaare baapdaada apne bachchon ko divya vardaanon evan sookshm shaktiyon se saja rahe hain। sabhi aane vaale bhaai bahinen baba ke ghar mein aakar khoob refresh ho, poora-poora santushta hokar baapdaada aur daivi parivaar ko dil ki duaayen dete hain। yeh bhi meethe baapdaada ki kamaal hai jo avyakt vatan mein hote bhi bachchon ko apni poori bhaasna va paalna de rahe hain। video dvaara bhi har ek aisa hi anubhav karte jaise baapdaada ham sabke beech mein upasthit ho hamaare sabhi prashnon ka hal de rahe hain। abhi to naazuk samay ki paristhitiyaan bhi vikraal roop mein aa rahi hain। baba kehte bachche drama ki bhaavi sada kalyaankaari hai। humein to samay pramaan yog ki shaktiyon ko badhaana hai aur apne pavitra shuddh vibration dvaara bhaybheet aatmaon ko shanti va shakti ki sakaash deni hai। achha - sabhi ko bahut-bahut yaad… om shanti।

06-03-20 om shanti “avyakt-mahaavaakya” video 31-03-07 madhuban

"sapoot ban apni soorat se baap ki soorat dikhaana , nirmaan (seva) ke saath nirmal vaani , nirmaan sthiti ka balance rakhna"

aaj baapdaada chaaron or ke bachchon ke bhaagya ki rekhaayen dekh harshit ho rahe hain। sabhi bachchon ke mastak mein chamakti hui jyoti ki rekha chamak rahi hai। naynon mein roohaaniyat ki bhaagya rekha dikhaai de rahi hai। mukh mein shreshtha vaani ke bhaagya ki rekha dikhaai de rahi hai। hothon mein roohaani muskaraahat dekh rahe hain। haathon mein sarva parmaatma khajaane ki rekha dikhaai de rahi hai। har yaad ke kadam mein padmon ki rekha dekh rahe hain। har ek ke hriday mein baap ke lav mein lavleen ki rekha dekh rahe hain। aisa shreshtha bhaagya har ek bachcha anubhav kar rahe hain na! kyonki yeh bhaagya ki rekhaayen svayan baap ne har ek ke shreshtha karma ki kalam se kheenchi hai। aisa shreshtha bhaagya jo avinaashi hai, sirf is janma ke liye nahin hai lekin anek janmon ki avinaashi bhaagya rekhaayen hain। avinaashi baap hai aur avinaashi bhaagya ki rekhaayen hain। is samay shreshtha karma ke aadhaar par sarva rekhaayen praapta hoti hain। is samay ka purushaartha anek janma ki praalabdha bana deta hai।

sabhi bachchon ko jo praalabdha anek janma milni hai, baapdaada woh abhi is samay, is janma mein purushaartha ke praalabdha ki praapti dekhne chaahte hain। sirf bhavishya nahin lekin abhi bhi yeh sab rekhaayen sada anubhav mein aayen kyonki abhi ke yeh divya sanskaar aapka naya sansaar bana raha hai। to check karo, check karna aata hai na! svayan hi svayan ke checker bano। to sarva bhaagya ki rekhaayen abhi bhi anubhav hoti hain? aise to nahin samajhte ki yeh praalabdha ant mein dikhaai degi? praapti bhi ab hai to praalabdha ka anubhav bhi abhi karna hai। bhavishya sansaar ke sanskaar abhi pratyaksha jeevan mein anubhav hona hai। to kya check karo? bhavishya sansaar ke sanskaaron ka gaayan karte ho ki bhavishya sansaar mein ek raajya hoga। yaad hai na woh sansaar! kitne baar us sansaar mein raajya kiya hai? yaad hai ki yaad dilaane se yaad aata hai? kya the, woh smriti mein hai na? lekin vahi sanskaar abhi ke jeevan mein pratyaksha roop mein hain? to check karo abhi bhi man mein, buddhi mein, sambandh-samparka mein, jeevan mein ek raajya hai? va kabhi-kabhi aatma ke raajya ke saath-saath maaya ka raajya bhi to nahin hai? jaise bhavishya praalabdha mein ek hi raajya hai, do nahin hai। to abhi bhi do raajya to nahin hai? jaise bhavishya raajya mein ek raajya ke saath ek dharma hai, woh dharma kaun sa hai? sampoorn pavitrata ki dhaarna ka dharma hai। to abhi check karo ki pavitrata sampoorn hai? svapna mein bhi apvitrata ka naamnishaan nahin ho। pavitrata arthaat sankalp, bol, karma aur sambandh-samparka mein ek hi dhaarna sampoorn pavitrata ki ho। brahmaachaari ho। apni checking karne aati hai? jisko apni checking karni aati hai woh haath uthaao। aati hai aur karte bhi hain? karte hain, karte hain? teachers ko aata hai? double foreigners ko aata hai? kyon? abhi ki pavitrata ke kaaran aapke jad chitra se bhi pavitrata ki maang karte hain। pavitrata arthaat ek dharma ab ki sthaapna hai jo bhavishya mein bhi chalti hai। aise hi bhavishya ka kya gaayan hai? ek raajya, ek dharma aur saath mein sada sukh-shanti, sampatti, akhanda sukh, akhanda shanti, akhanda sampatti। to ab ke aapke svaraajya ke jeevan mein, woh hai vishwa raajya aur is samay hai svaraajya, to check karo avinaashi sukh, parmaatma sukh, avinaashi anubhav hota hai? koi saadhan va koi salvation ke aadhaar par sukh ka anubhav to nahin hota? kabhi kisi bhi kaaran se duhkh ki lahar anubhav mein nahin aani chaahiye। koi naam, maan-shaan ke aadhaar par to sukh anubhav nahin hota hai? kyon? yeh naam maan shaan, saadhan, salvation yeh svayan hi vinaashi hain, alpakaal ke hain। to vinaashi aadhaar se avinaashi sukh nahin milta। check karte jaao। abhi bhi sunte bhi jaao aur apne mein check bhi karte jaao to pata padega ki ab ke sanskaar aur bhavishya sansaar ki praalabdha mein kitna antar hai! aap sabne janmate hi baapdaada se vaayda kiya hai, yaad hai vaayda ki bhool gaya hai? yahi vaayda kiya ki ham sabhi baap ke saathi ban, vishwa kalyaankaari ban naya sukh shaantimay sansaar banaane vaale hain। yaad hai? apna vaayda yaad hai? yaad hai to haath uthaao। pakka vaayda hai ya thoda gadbad ho jaati hai? naya sansaar ab parmaatma sanskaar ke aadhaar se banaane vaale hain। to sirf abhi purushaartha nahin karna hai lekin purushaartha ki praalabdha bhi abhi anubhav karni hai। sukh ke saath shanti ko bhi check karo - ashaanta circumstance, ashaanta vaayumandal usmein bhi aap shanti saagar ke bachche sada kamal pushpa samaan ashaanti ko bhi shanti ke vaayumandal mein parivartan kar sakte ho? shant vaayumandal hai, usmein aapne shanti anubhav ki, yeh koi badi baat nahin hai lekin aapka vaayda hai ashaanti ko shanti mein parivartan karne vaale hain। to check karo - check kar rahe hain na? parivartak ho, parvash to nahin ho na? parivartak ho। parivartak kabhi parvash nahin ho sakta। isi prakaar se sampatti, akhut sampatti, woh svaraajya adhikaari ki kya hai? gyaan, gun aur shaktiyaan svaraajya adhikaari ki sampattiyaan yeh hain। to check karo - gyaan ke saare vistaar ke saar ko spashta jaan gaye ho na? gyaan ka arth yeh nahin hai ki sirf bhaashan kiya, course karaaya, gyaan ka arth hai samajh। to har sankalp, har karma bol, gyaan arthaat samajhdaar, knowledgeful banke karte hain? sarvagun practical jeevan mein emerge rehte hain? sarva hain va yathaashakti hain? isi prakaar sarva shaktiyaan - aapka title hai - master sarvashaktivaan, shaktivaan nahin hain। to sarva shaktiyaan sampanna hain? aur doosri baat sarva shaktiyaan samay par kaarya karti hain? samay par haazir hoti hain ya samay beet jaata hai phir yaad aata hai? to check karo teenon hi baaten ek raajya, ek dharma aur avinaashi sukh-shanti, sampatti kyonki naye sansaar mein yeh baaten jo abhi svaraajya ke samay ka anubhav hai, woh nahin ho sakega। abhi in sabhi baaton ka anubhav kar sakte hain। abhi se yeh sanskaar emerge honge tab anek janma praalabdha ke roop mein chalenge। aise to nahin samajhte hain ki dhaaran kar rahe hain, ho jaayega, ant tak to ho hi jaayenge!

baapdaada ne pahle se hi ishaara de diya hai ki bahutkaal ka abhi ka abhyaas bahutkaal ki praapti ka aadhaar hai। ant mein ho jaayega nahin sochna, ho jaayega nahin, hona hi hai। kyon? svaraajya ka jo adhikaar hai woh abhi bahutkaal ka abhyaas chaahiye। agar ek janma mein adhikaari nahin ban sakte, adheen ban jaate to anek janma kaise honge! isliye baapdaada sabhi chaaron or ke bachchon ko baar-baar ishaara de rahe hain ki abhi samay ki raphtaar teevragti mein ja rahi hai isliye sabhi bachchon ko abhi sirf purushaarthi nahin banna hai lekin teevra purushaarthi ban, purushaartha ki praalabdha ka abhi bahutkaal se anubhav karna hai। teevra purushaartha ki nishaaniyaan baapdaada ne pahle bhi sunaai hain। teevra purushaarthi sada master daata hoga, levta nahin devta, dene vaala। yeh ho to mera purushaartha ho, yeh kare to main bhi karoon, yeh badle to main bhi badloon, yeh badle, yeh kare, yeh daataapan ki nishaani nahin hai। koi kare na kare, lekin main baapdaada samaan karoon, brahma baap samaan bhi, saakaar mein bhi dekha, bachche karen to main karoon - kabhi nahin kaha, main karke bachchon se karaaoon। doosri nishaani hai teevra purushaartha ki, sada nirmaan, kaarya karte bhi nirmaan, nirmaan aur nirmaan donon ka balance chaahiye। kyon? nirmaan bankar kaarya karne mein sarva dvaara dil ka sneh aur duaayen milti hain। baapdaada ne dekha ki nirmaan arthaat seva ke kshetra mein aajkal sabhi achhe umang-utsaah se naye-naye plan bana rahe hain। iski baapdaada chaaron or ke bachchon ko mubaarak de rahe hain।

baapdaada ke paas nirmaan ke, seva ke plan bahut achhe-achhe aaye hain। lekin baapdaada ne dekha ki nirmaan ke kaarya to bahut achhe lekin jitna seva ke kaarya mein umang-utsaah hai utna agar nirmaan stage ka balance ho to nirmaan arthaat seva ke kaarya mein saphalta aur jyaada pratyaksha roop mein ho sakti hai। baapdaada ne pahle bhi sunaaya hai - nirmaan svabhaav, nirmaan bol aur nirmaan sthiti se sambandh-samparka mein aana, devtaaon ka gaayan karte hain lekin hai braahmanon ka gaayan, devtaaon ke liye kehte hain unke mukh se jo bol nikalte woh jaise heere moti, amoolya, nirmal vaani, nirmal svabhaav। to baapdaada ne dekha ki nirmal vaani, nirmaan sthiti usmein abhi attention chaahiye।

baapdaada ne khajaane ke teen khaate jama karo, yeh pahle bataaya hai। to result mein kya dekha? teen khaate kaun se hain? woh to yaad hoga na! phir bhi revise kar rahe hain - ek hai apne purushaartha se jama ka khaata badhaana। doosra hai - sada svayan bhi santushta rahe aur doosre ko bhi santushta kare, bhinna-bhinna sanskaar ko jaante hue bhi santushta rehna aur santushta karna, isse duaaon ka khaata jama hota hai। agar kisi bhi kaaran se santushta karne mein kami rah jaati hai to punya ke khaate mein jama nahin hota। santushtata punya ki chaabi hai, chaahe rehna, chaahe karna। aur teesra hai - seva mein bhi sada nihsvaartha, main pan nahin। mainne kiya, ya mera hona chaahiye, yeh main aur meraapan jahaan seva mein aa jaata hai vahaan punya ka khaata jama nahin hota। meraapan, anubhvi ho yeh royal roop ka bhi meraapan bahut hai। royal roop ke merepan ki list saadhaaran merepan se lambi hai। to jahaan bhi main aur merepan ka svaartha aa jaata hai, nihsvaartha nahin hai vahaan punya ka khaata kam jama hota hai। merepan ki list phir kabhi sunaayenge, badi lambi hai aur badi sookshm hai। to baapdaada ne dekha ki apne purushaartha se yathaashakti sabhi apna-apna khaata jama kar rahe hain lekin duaaon ka khaata aur punya ka khaata woh abhi bharne ki aavashyakta hai। isliye teenon khaate jama karne ka attention। sanskaar variety abhi bhi dikhaai denge, sabke sanskaar abhi sampanna nahin hue hain lekin hamaare oopar auron ke kamjor svabhaav, kamjor sanskaaron ka prabhaav nahin padna chaahiye। main master sarvashaktivaan hoon, kamjor sanskaar shaktishaali nahin hain। mujh master sarvashaktivaan ke oopar kamjor sanskaar ka prabhaav nahin padna chaahiye। safety ka saadhan hai baapdaada ki chhatrachhaaya mein rehna। baapdaada ke saath combined rehna। chhatrachhaaya hai shreemat। achha।

seva ka tarna eastern zone ka hai , ( bangaal-bihaar , udeesa , aasaam , nepaal , taamilnaadu zone):- yeh to bahut achha, sabhi zone vaalon ne chance lene ki vidhi achhi banaai hai। achha aap sabne koi nai invention nikaali hai, seva ki naveenta sochi hai? zone ke sabhi taraph ki vishesh teachers haath uthaao। bhinna-bhinna sthaan ki head, ek zone head nahin, lekin bhinna-bhinna sthaan ki ek-ek head। achha। to aap sabhi ne seva mein naveenta ka plan kya banaaya? koi banaaya hai? aage vaali teachers banaaya hai ki bana rahe hain? bana rahe hain kyonki aapka zone jo hai usmein vistaar bahut hai, kitni aatmaayen hain, kitne raajya hain, kitne gaanv hain। to aisa plan banaao, jaise baapdaada ne dekha to foreign mein aphreeka vaalon ne sirf plan nahin banaaya, lekin practical mein sab area cover ki hai, to aapki taraph to bahut area hai to kitne log samay samaapta hone par vanchit rah jaayenge na! to mil karke aisa koi plan banaao।

dekho, baapdaada ne sabhi bachchon ko umang-utsaah aur himmat ka vardaan ek jaisa diya hai। kisko jyaada, kisko kam nahin diya hai। to jahaan umang-utsaah hai, vahaan himmat hai to kya nahin ho sakta hai। asambhav bhi sambhav ho sakta hai।

sabhi poochhte hain aage kya karna hai? baapdaada ka sankalp hai ki abhi jyaada mein jyaada bani banaai stage par chance lo। unhon ko sahayogi banaao aur aap sakaash do।

kyonki baapdaada ne dekha hai ki snehi, sahayogi har zone mein yatha shakti hain lekin unhon ko seva ke saathi banaao। unhon ko bhi umang-utsaah ke pankh do। hain chaaron or kyonki baapdaada chakkar to lagaate hain na! to apne bachchon ko bhi dekhte hain aur snehi-sahayogi aatmaon ko bhi dekhte hain। baapdaada ki nazar mein hain lekin chance nahin diya hai, practical chance nahin liya hai। to yeh varsha unhon ko nimitta banaao, snehi-sahayogiyon ko umang-utsaah mein laao। laana padta hai। nahin to woh bhi aapko ulhana denge ki hamko to aapne bataaya hi nahin ki aisa bhi kar sakte hain isliye abhi chance dene vaale bano। achha।

double videsheeh baapdaada sada kehta hai ki double videshi madhuban ka vishesh shrangaar hain। jaise desh apne-apne umang-utsaah se badh rahe hain aise videsh bhi kam nahin hai। videsh ne bhi thode samay mein vistaar achha kiya hai। abhi videsh ko sirf ek hi inaam lena hai, bataayen kaun sa inaam lena hai, khaas double videshiyon ko? chaaron or sva aur seva ke balance ka inaam lena hai। pasanda hai? videshi pasanda hai? lena hai? haath uthaao। welcome। mubaarak, in advance mubaarak।

achha। abhi baapdaada ne jo drill bataai thi yaad hai? 5-5 minute saare din mein anek baar drill karni hai। woh kiya hai? jisne woh drill ki hai, woh haath uthaao। thodon ne haath uthaaya hai। kyon? thoda time kiya hai? bahut time nahin kiya hai to abhi kya karenge? kam se kam bataayen, kam se kam 8 baari saare din mein kar sakte ho? kar sakte ho? ismen haath uthaao। karenge? achha hai। phir jab doosri season shuru hogi na, to usmein baapdaada sabhi se result mangaayenge। peechhe ek baat bataayenge, abhi nahin bataayenge। peechhe baat bataayenge। madhuban vaale to karenge na? pahla number। to is varsha ka homework, is season ka homework doosri season tak kam se kam 8 baari yeh drill zaroor karni hai। zaroor, dekhenge nahin, karni hi hai। chaahe miss ho jaae to ek ghante mein anek baar karke poora karna। neend peechhe karna। sona peechhe, pahle drill, aath baari poora karke peechhe sona। theek hai na teachers! bahut achha, teachers ka vaayumandal svatah hi phailega।

aaj baapdaada sabhi ko yeh dekhna chaahte hain, abhi abhi dekhna chaahte hain ki ek second mein svaraajya ke seat par controlling power, ruling power ke sanskaar mein emerge roop se second mein baith sakte hain! to ek second mein do teen minute ke liye raajya adhikaari ki seat par set ho jaao। achha। (drill)

chaaron or ke bachchon ki yaadapyaar ke patra aur saath-saath jo bhi science ke saadhan hain unhon dvaara yaadapyaar baapdaada ke paas pahunch gai hai। apne dil ka samaachaar bhi bahut bachche likhte bhi hain aur roohrihaan mein bhi sunaate hain। baapdaada un sabhi bachchon ko respond de rahe hain ki sada sachchi dil par saaheb raazi hai। dil ki duaayen aur dil ka dulaar baapdaada ka vishesh un aatmaon prati hai। chaaron or ke jo bhi samaachaar dete hain, sabhi achhe-achhe umang-utsaah ke plan jo bhi banaaye hain, uski baapdaada mubaarak bhi de rahe hain aur vardaan bhi de rahe hain, badhte chalo, badhaate chalo।

chaaron or ke baapdaada ke koton mein koi, koi mein bhi koi shreshtha bhaagyavaan bachchon ko baapdaada ka vishesh yaadapyaar, baapdaada sabhi bachchon ko himmat aur umang-utsaah ki mubaarak bhi de rahe hain। aage teevra purushaarthi banne ki, balance ki padma-padamguna blessing bhi de rahe hain। sabhi ke bhaagya ka sitaara sada chamakta rahe aur auron ka bhaagya banvaate rahen iski bhi duaayen de rahe hain। chaaron or ke bachche apne apne sthaan par sun bhi rahe hain, dekh bhi rahe hain aur baapdaada bhi sabhi chaaron or ke door baithe bachchon ko dekh-dekh khush ho rahe hain। dekhte raho aur madhuban ki shobha sada badhaate raho। to sabhi bachchon ko dil ki duaaon saath namaste।

daadi jaanki ji ne sabhi ko ahamdaabaad hospital se yaadapyaar di hai।

daadi ratanmohini:- ham sabhi ne itna samay shaantipoorvak baba ki achhi achhi baaten suni। abhi jo ham sabhi ne suna hai usko apne andar manan karna hai aur manan karte apna kadam aage badhaate rehna hai। baba ne to ham sabko bahut achhi shikshaayen di hain, un shikshaaon ko ham aur bhi apne andar manan karke svayan ke andar woh shakti jaagrat kar sabhi ko sukh dete rahenge। jo baba ne kaha hai un baaton ko apne jeevan mein dhaaran karte hue sabko baap ka sandesh pahunchaate rahenge।