Murli du jour du jeudi 15 novembre 2018

15-11-2018 praatahmurli om shanti "baapdaada"' madhuban

"meethe bachche - apni buddhi va vichaaron ko itna shuddh, svachchha banaao jo shreemat ko yathaartha reeti dhaaran kar baap ka naam baala kar sako''

prashn:- bachchon ki kaun-si avastha hi baap ka show karegi?

uttar:- jab bachchon ki nirantar harshitmukh, achal-adol, sthir aur masta avastha banen tab baap ka show kar sake। aisi ekras avastha vaale hoshiyaar bachche hi yathaartha reeti sabko baap ka parichay de sakte hain।

geet:- marna teri gali mein…

om shanti। bachchon ne geet suna। kehte hain aaye hain tere dar pay jeete ji marne ke liye। kiske dar par? phir bhi yahi baat nikalti ki agar geeta ka bhagwan krishna kahen to yeh sab baaten ho na saken। na krishna yahaan ho sake। woh to hai satayug ka prince। geeta koi krishna ne nahin sunaai, geeta to parampita ne sunaai। saara madaar ek baat par hai। bhakti mein tum itni mehnat karte aaye ho woh to darkaar nahin। yeh to second ki baat hai। sirf yeh ek baat hi siddha karne ke liye bhi baap ko kitni mehnat karni padti hai। kitni knowledge deni padti hai। praacheen knowledge jo bhagwan ne di hai vahi knowledge hai, saari baat geeta par hai। parampita paramatma ne hi aakar devi-devta dharma ki sthaapna ke liye sahaj raajayog aur gyaan sikhlaaya hai, jo ab praayahlop hai। manushya to samajhte hain krishna kabhi phir aakar geeta sunaayega। parantu ab tumko yeh achhi reeti gole ke chitra par siddha karna hai ki geeta paarlaukik parampita paramatma gyaan saagar ne sunaai। krishna ki mahima aur hai, parampita paramatma ki mahima aur hai। woh hai satayug ka prince, jisne sahaj raajayog se raajya-bhaagya paaya hai। padhte samay naam roop se aur hai aur phir jab raajya paaya tab aur hai - yeh siddha kar bataana hai। patit-paavan krishna ko kabhi nahin kahenge। patit-paavan hai hi ek baap। abhi phir se shreekrishna ki aatma patit-paavan dvaara raajayog seekh bhavishya paavan duniya ka prince ban rahi hai। yeh siddha kar samjhaane mein bhi yuktiyaan chaahiye। foreigners ko bhi siddha kar bataana padta hai। number one hai hi geeta। sarva shaastra-mai shreemat bhagvat geeta maata। ab maata ko janma kisne diya? baap hi maata ko adopt karte hain na। geeta kisne sunaai? aise nahin kahenge ki Christ ne Bible ko adopt kiya। Christ ne jo shiksha di unka phir Bible banaakar padhte hain। ab geeta ki shiksha kisne di, jo phir baad mein pustak banaakar padhte rehte hain? yeh kisko pata nahin। aur sabke shaastron ka to pata hai। yeh jo sahaj raajayog ki shiksha hai, woh kisne di hai, yeh siddha karna hai। duniya to din-pratidin tamopradhaan banti jaati hai। yeh sab svachchha buddhi mein hi baith sakta hai। jo shreemat par nahin chalte, unko dhaarna ho na sake। shreemat kahegi tum bilkul samjha nahin sakte ho। apne ko gyaani mat samjho। pahle to mukhya baat yeh siddha karni hai ki geeta ka bhagwan parampita paramatma hai, vahi patit-paavan hai। manushya to sarvavyaapi kah dete hain va brahm tatva kah dete va saagar kah dete। jo aaya so kah dete - bigar arth। bhool saari geeta se nikli hai, jo geeta ka bhagwan shreekrishna kah diya hai। to samjhaane liye geeta uthaani pade। banaaras vaale gupta ji ko bhi kehte the ki banaaras mein yeh siddha kar batlaao ki geeta ka bhagwan krishna nahin। ab sammelan to hote hain, sab religious manushya kehte hain kya upaay karen jo shanti ho jaae? ab shanti sthaapan karna patit manushyon ke haath mein to hai nahin। kehte bhi hain patit-paavan aao। phir bhi patit kaise shanti sthaapan kar sakte, jabki bulaate rehte hain parantu patit se paavan banaane vaale baap ko jaante nahin hain। bhaarat paavan tha, abhi patit hai। ab patit-paavan kaun hai? yeh koi ki buddhi mein nahin aata। kah dete hain raghupti raaghav...... ab woh raam to hai nahin। jhootha bulaava karte hain। jaante kuchh nahin। ab yeh kaun jaakar bataaye? bade achhe bachche chaahiye। samjhaane ki badi yukti chaahiye। bada gola bhi banvaaya hai, jisse siddha ho jaae ki geeta bhagwan ne rachi। woh to kah dete koi bhi ho, hain to sab bhagwan। baap kehte hain tum besmajh ho। mainne aakar paavan raajya sthaapan kiya, uske badle phir shreekrishna ka naam daal diya। patit ko hi paavan banaakar first prince banaata hoon। bhagvaanuvaach - main krishna ki aatma ko adopt kar brahma banaae un dvaara gyaan deta hoon। woh phir is sahaj raajayog se first prince satayug ka ban jaata hai। yeh samjhaani aur koi ki buddhi mein hai nahin।

tumhein pahle to yeh bhool siddhakar dikhaani hai ki shreemat bhagvat geeta hai sab shaastron ki maai baap। uska rachayita kaun tha? jaise Christ ne Bible ko janma diya, woh hai Christian dharma ka shaastra। achha Bible ka baap kaun? Christ। unko maai-baap nahin kahenge। mother ki to vahaan baat hi nahin। yeh to yahaan maat-pita hai। Christian ne rees ki hai krishna ke dharma se, yoon to woh Christ ko maanne vaale hain। jaise buddha ne dharma sthaapan kiya to bauddhiyon ka shaastra bhi hai। ab geeta kisne sunaayi? usse kaun-sa dharma sthaapan hua? yeh koi nahin jaante। kabhi nahin kehte ki patit-paavan parampita paramatma ne gyaan diya hai। abhi gola aisa banaaya hai, jisse samajh saken ki barobar parampita paramatma ne gyaan diya hai। raadhe-krishna to satayug mein hain। unhonne apne ko to gyaan nahin diya। gyaan dene vaala to doosra chaahiye। koi ne to unhon ko paas karaaya hoga। yeh raajaai praapta karaane ka gyaan kisne diya? kismat aapehi to nahin banti। kismat banaane vaala ya to baap ya to teacher chaahiye। kehte hain guru gati dete hain। parantu gati sadgati ka bhi arth nahin samajhte। pravritti maarga vaalon ki sadgati hoti hai। baaki gati maana sab baap ke paas jaate hain। yeh baaten koi bhi samajhte nahin। woh to bhakti maarga mein bahut bade-bade dukaan kholkar baithe hain। sachche gyaan maarga ki dukaan yeh ek hi hai baaki sab bhakti maarga ki dukaanen hain। baap kehte hain yeh ved-shaastra aadi sab bhakti maarga ki saamagri hai। in jap-tap, ved-shaastra aadi ka adhyayan karne se main nahin milta hoon। main to bachchon ko gyaan dekar paavan banaata hoon। saari srishti ka sadgati daata hoon। via gati mein jaakar phir sadgati mein aana hai। sab to satayug mein nahin aayenge। yeh drama bana hua hai। jo kalpa pahle tumko sikhaaya tha, jo chitra banvaaye the, woh ab banva rahe hain।

manushya kehte hain 3 dharmon ki taangon par srishti khadi hai। ek devta dharma ki taang tooti hui hai isliye hilte rehte hain। pahle ek dharma rehta jisko advet raajya kaha jaata hai। phir woh ek taang kam ho 3 taange nikalti hain, jismen kuchh bhi taakat nahin rehti hai। aapas mein hi ladaai-jhagda chalta rehta hai। dhani ko jaante nahin। nidhanke ban pade hain। samjhaane ki badi yukti chaahiye। pradarshani mein bhi yeh baat samjhaani hai ki geeta ka bhagwan krishna nahin hai, parampita paramatma hai। jiska birth place bhaarat hai। krishna to hai saakaar, woh hai niraakaar। unki mahima bilkul alag hai। aisi yukti se cartoon banaana chaahiye jo siddha ho jaae ki geeta kisne gaai? andho ke aage badi aarsi (aaina) rakhna hai। yeh hai hi andho ke aage aaina। jaasti tu mach mein nahin jaana hai। kadi bhool yeh hai। parampita paramatma ki mahima alag hai, uske badle krishna ko mahima de di hai। lakshmi-naaraayan ke chitra mein neeche raadhe-krishna hain। vahi phir lakshmi-naaraayan bante hain। lakshmi-naaraayan satayug mein, raam-seeta treta mein। pahla number bachcha shreekrishna hai, unko phir dvaapar mein le gaye hain। yeh sab hai bhaktimaarga ki noondh। vilaayat vaale in baaton se kya jaanen। drama anusaar yeh gyaan kiske paas bhi hai nahin। kehte bhi hain gyaan din, bhakti raat। brahma ka din, brahma ki raat। satayug sthaapan karne vaala kaun hai? brahma aaya kahaan se? sookshm vatan mein kahaan se aaya? parampita paramatma hi sookshm srishti rachte hain। vahaan brahma dikhaate hain। parantu vahaan to prajaapita brahma hota nahin। zaroor prajaapita brahma aur hai। woh kahaan se aaya, yeh baaten koi samajh nahin sakte। krishna ke antim janma mein unko paramatma ne apna rath banaaya hai, yeh kiski buddhi mein nahi hai।

yeh bada bhaari class hai। teacher to samajhte hain na - yeh student kaisa hai? to kya baap nahi samajhte honge? yeh behad ke baap ka class hai। yahaan ki baat hi niraali hai। shaastron mein to pralay aadi dikhaakar kitna rola kar diya hai। kitna ghamanda hai। raamaayan, geeta aadi kaise baith sunaate hain। krishna ne to geeta sunaai nahin। usne to geeta ka gyaan sunkar raajya pad paaya hai। siddha kar samjhaate hain, geeta ka bhagwan yeh hai। unke gun yeh hain, krishna ke gun yeh hain। is bhool ke kaaran hi bhaarat kaudi jaisa bana hai। tum maataayen unko kah sakti ho ki tum log kehte ho maata narka ka dvaar hai parantu paramatma ne to gyaan ka kalash maataaon par rakha hai, maataayen hi svarga ka dvaar banti hain। tum ninda kar rahe ho। parantu bolne vaale bade hoshiyaar chaahiye। points sab note kar samjhaana chaahiye। bhakti maarga vaastav mein grihasthiyon ke liye hai। yeh hai pravritti maarga ka sahaj raajayog। ham siddha kar samjhaane liye aaye hain। bachchon ko show karna hai। sadaiv harshitmukh, achal, sthir, masta rehna chaahiye। aage chal mahima nikalni zaroor hai। tum sab ho to brahmaakumaar kumaariyaan। kumaari woh jo 21 janmon liye baap se varsa dilaaye। kumaariyon ki mahima bahut bhaari hai। mukhya kumaari tumhaari mama hai। chandrama ke aage phir achha star bhi chaahiye। yeh gyaan soorya hai। yeh gupta mama alag hai। is raaz ko tum bachche hi samajhkar samjha sakte ho। us mama ka naam alag hai, mandir uske hain। is gupta budhi maa ka mandir thode hi hai। yeh maat-pita combined hai। duniya yeh nahin jaanti। krishna to ho nahin sakta। woh phir bhi satayug ka prince hai। krishna mein bhagwan aa na sake। samjhaana bahut sahaj hai। geeta ke bhagwan ki mahima alag hai। woh patit-paavan saari duniya ka guide, liberator hai। manushya chitron se samajh jaayenge ki barobar paramatma ki mahima alag hai, sab ek thode hi ho sakte hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apni avastha badi masta, achal adol banaani hai। sada harshitmukh rehna hai।

2) gyaan ke shuddh ghamanda (nashe) mein rah kar baap ka show karna hai। geeta ke bhagwan ko siddha kar baap ki sachchi pahchaan deni hai।

vardaan:- sarva praaptiyon ki anubhooti dvaara maaya ko vidaai de badhaai paane vaale khushanseeb aatma bhav

jinka saathi sarvashaktimaan baap hai, unko sada hi sarva praaptiyaan hain। unke saamne kabhi kisi prakaar ki maaya aa nahin sakti। jo praaptiyon ki anubhooti mein rah maaya ko vidaai dete hain unhein baapdaada dvaara har kadam mein badhaai milti hai। to sada isi smriti mein raho ki svayan bhagwan ham aatmaon ko badhaai dete hain, jo socha nahin woh pa liya, baap ko paaya sab kuchh paaya aisi khushanseeb aatma ho।

slogan:- svachintan aur prabhuchintan karo to vyartha chintan svatah samaapta ho jaayega।