Murli du jour du jeudi 16 février 2023

16-02-2023 praatahmurli om shanti "baapdaada"' madhuban

“meethe bachche - is samay sabhi ke sukh sampatti ka devaala raavan paanch vikaaron ne nikaala hai, tum abhi raavan roopi dushman par jeet paakar jagatjeet bante ho''

prashn:- drama ke kis raaz ko jaanne ke kaaran tum bachchon ke khyaalaat bade oonche rehte hain?

uttar:- tum jaante ho drama anusaar automatic prabhaav nikalta jaayega। phir bhakton ki bheed lagegi us samay service nahin ho sakegi। 2. jo baba ke bachche doosre dharmon mein convert ho gaye hain vo nikal aayenge isliye tumhaare khyaalaat bahut oonche rehte ki kahaan se koi nikle jo bachcha ban behad baap se apna varsa le। tumhein yeh khyaal nahin rehta ki koi nikle jo paisa de। lekin shivbaaba padhaate hain yeh nishchay baithe aur baba se varsa lene ke liye bhaage।

geet:- le lo duaayen maa baap ki…

om shanti। seva ko service bhi kehte hain। pahle maat-pita seva karte hain। ab dekho practical mein kar rahe hain na। abhi se hi sabhi kaayde kaanoon parampita paramatma aakar sthaapan karte hain। tum bachche aate ho, mama baba kehte ho to mama baba bhi tumhaari seva karte hain। had ke maa baap bhi bachchon ki seva karte hain। maa, baap, guru, woh sab hain laukik, yeh hai paarlaukik। laukik ko to sab jaante hain, barobar baap janma dete hain। teacher padhaate hain arthaat shiksha dete hain। phir vaanaprastha avastha mein guru kiya jaata hai। yeh rasam-rivaaz kab se shuru hui? abhi se hi yeh aarambha hoti hai। is samay hi satguru aate hain, samjhaate hain main tumhaara baap bhi hoon, teacher bhi hoon, satguru bhi hoon। baap ke to bachche bane ho। teacher roop mein inse shiksha pa rahe ho। ant mein satguru ban tumko sachkhanda mein le jaayenge। teenon kaam practical mein karte hain। tum bachche maat-pita kehte ho to baap bhi sveekaar karte hain। yeh to jaante hain sabhi bachche ek samaan sapoot nahin ho sakte hain। yahaan bhi behad ka baap kehte hain - sab bachche sapoot nahin hain। yeh to tum bhi jaante ho। abhi hai raavan raajya। yeh koi vidvaan, pandit aadi nahin jaante hain। jab koi aate hain to pahle to unse poochhna hai tum kya chaahte ho? phir koi shanti chaahte hain isliye guru dhoondhate hain। satayug mein to koi guru aadi nahin dhoondhate kyonki vahaan duhkhi nahin hain। vahaan koi apraapta vastu nahin hai। yahaan to koi na koi vastu ki laalsa rakh guru ke paas jaate hain। koi ka sunenge ki unki manokaamna poori hui to khud bhi unke pichhaadi mein jaayenge। sannyaasi pavitra bante hain to unhon ki mahima to badhni hi hai। bahut shishya ban jaate hain। vivek bhi kehta hai jo pavitra bante hain, unki mahima zaroor baap ko karaani hai। tum pavitra bante ho to tumhaari kitni mahima hoti hai। tumhaare dvaara manushyon ka 21 janmon ke liye kalyaan ho jaata hai। sarva manokaamnaayen 21 janmon ke liye poori ho jaati hain। yeh bhi tum jaante ho, duniya mein yeh bhi koi nahin jaante hain ki paramatma kab aate hain, jagat amba kaun hai, jis dvaara hamaari sabhi manokaamnaayen poori ho jaati hain। ab sab ghor andhiyaare mein hain। yatha raaja raani tatha praja.... pahle kam andhiyaara hota hai phir kaliyug mein ghor andhiyaara hota hai। maaya ke raajya ko ghor andhiyaara kaha jaata hai। baap kehte hain bhaarat ka bade te bada dushman bhi maaya roopi 5 vikaar hain। tum jaante ho is maaya raavan ne seetaaon ko haran kiya arthaat apni janjeeron mein kaid kiya। baap aate hain is bade te bade dushman se liberate karne। yeh bhi koi ko pata nahin ki bhaarat jo itna maalaamaal tha, unko itna kangaal kisne banaaya? yahi raavan bada dushman hai। inki praveshta ke kaaran bhaarat ka yeh haal ho gaya hai। kaha jaata hai na tumhaare mein krodh ka bhoot hai। parantu manushya samajhte nahin hain ki 5 vikaaron ko bhoot kaha jaata hai। yeh bhoot arthaat raavan hi sabse bada dushman hai। aise nahin ki musalmaanon va Christian ne bhaarat ko kangaal banaaya। nahin, sabke sukh sampatti ka devaala isi raavan ne nikaala hai। yeh baat koi nahin jaante hain। ab sannyaas dharma ko 1500 varsha hue hain। unhon ki sankhya bahut vriddhi ko paai hui hai। vriddhi ko paate-paate abhi aakar jadajdeebhoot avastha ko pahunche hain। tumhaara to ab satopradhaan naya jhaad hai।

tum abhi raavan ke saath yuddha kar rahe ho। geeta mein raavan ka naam nahin hai। unhonne phir hinsak yuddha dikha di hai। baap kehte hain tum in 5 vikaar roopi raavan par jeet paane se jagatjeet banenge। anya sabhi dharmon ko to vaapis jaana hai kyonki satayug mein to hoga hi ek dharma, ek raajya। so jinhonne kalpa pahle liya tha, jo sooryavanshi bane the vahi satopradhaan number one raajya karenge। satayug mein tha hi ek dharma। phir punarjanma lete-lete abhi to bahut vriddhi ho gai hai। jaise anya dharmon mein bhi anek prakaar ki vriddhi ho gai hai। vaise ismen bhi brahm samaaji, aarya samaaji, sannyaasi aadi kitne hain, wonder hai। hain to sabhi bhaaratvaasi, ek aadi sanaatan devi-devta dharma ke na। sijra to oopar se vahi chala aata hai na। bhaaratkhanda hai sachkhanda, jahaan baap aakar devi-devta dharma mein transfer karte hain। yeh tum jaante ho। pahle 7 roz bhatthi mein rakh shoodra se brahman banaana padta hai। sannyaasiyon ko to vairaagya aata hai, jo jangal mein chale jaate hain। unhon ka raasta hi alag hai। ghar-baar chhod jaate hain। unhon ko koi takleeph nahin hai। haan, mansa mein to sankalp aayenge। kaam vikaar se to chhoot hi jaate hain। baaki krodh aata hai, unmein bhi nambarvaar to hote hain na। koi uttam, koi madhyam, koi kanishta, koi to ekdam dirty bhi hote hain। satayug mein bhi bhal sukhi to sab hote hain parantu nambarvaar martaba to hai na। sooryavanshi raaja raani, praja, chandravanshi raaja raani, praja..... uttam, madhyam, kanishta to hote hain। yeh sabhi dharmon mein hote hain। to baap sabhi raaz baith samjhaate hain। is maarga mein difficulty bahut hai, sannyaas maarga mein itni nahin hai। unhon ko to vairaagya aaya, sannyaas liya khalaas। koi-koi fail hote hain। baaki jo pakke hote hain unhon ka vaapis aana mushkil hai। yahaan to yeh hai grihastha vyavhaar mein rehte pavitra rehna। baap samjhaate hain bahaadur woh jo donon ikatthe raho aur beech mein gyaan yog ki talvaar ho। aise ek kahaani bhi hai ki usne kaha ki ghada bhal sir par rakho parantu tera ang mere ang se na lage arthaat vikaar ki bhaavna na ho। unhonne phir shareer samajh liya hai। baat saari vikaar ki hai arthaat nangan nahin hona hai। kaam agni mein jalna nahin hai। badi manzil hai to praapti bhi bahut badi hai। sannyaasi pavitra bante hain to unhon ko bhi kitni praapti hai। bade-bade mahaamandaleshvar ban baithe hain, mahlon mein rehte hain। bahut log jaakar paisa rakhte hain। charan dhokar peete hain। bahut mahima hoti hai। parantu number one mahima hai eeshvar ki। vahi svarga ka rachayita hai। vahaan maaya ka naam nishaan nahin rehta। sannyaasi bhi yeh nahin samajhte ki maaya 5 vikaar hain, sirf pavitra rehte hain। unhon ka drama mein yahi part hai। unhon ka hai hi hathayog sannyaas। tumhaara hai raajayog sannyaas। woh raajayog to sikhla na sake। woh hai shankaraachaarya, yeh hai shivaachaarya। tum bhi parichay dete ho hamko bhagwan aakar padhaate hain। woh to zaroor svarga ka maalik banaayega। narka ka to nahin banaayenge। woh rachta hi svarga ka hai। to grihastha mein rahkar pavitra rehna - ismen hi mehnat hai। kanyaaon ko shaadi bigar rahne nahin dete hain। aage vikaar ke liye shaadi karte the। ab vikaari shaadi cancel kar gyaan chita par baith pavitra joda bante hain। to apni jaanch karni hoti hai ki maaya kahaan chalaaymaan to nahin karti hai? man mein toofaan to nahin aate hain? bhal man mein sankalp aate ho parantu karmendriyon se vikarma kabhi nahin karna। bhaai-behen samajhne se, gyaan chita par rahne se kaam agni nahin lagegi। agar aag lagi to adhogti ko pa lenge। yoon to saari duniya bhaai-behen hai। parantu jab baap aate hain to ham unke bante hain। abhi tum practical mein brahma mukh vanshaavli ho, tumhaara yaadgaar bhi yahaan hai। adharkumaari ka mandir bhi hai na। jo kaam chita se utar gyaan chita par baithte hain - unko adhar kumaari kaha jaata hai। tum sannyaasiyon ko bhi samjha sakte ho। baaki koi se phaaltu maatha nahin maarna chaahiye। paatra jigyaasu hoga, woh to akela aakar prem se samjhega। kai hansi udaane ke liye bhi aate hain isliye nabja dekh aisi davaai deni chaahiye। baap ne kaha hai paatra ko daan dena hai।

aajkal duniya bahut kharaab hai। sannyaasi log to kaphni pahan lete hain aur jaakar alag rehte hain। kuchh na kuchh mil jaata hai। maje se khaate peete rehte hain। aajkal unhon ka prabhaav hai na। tumhaare mein bhi jo achhi service karte hain to unhon ki mahima se auron ki bhi mahima nikal padti hai। jo bachche achhi service karte hain to sab kahenge inke maa baap bhi aise honge। mehnat zaroor karni hai। sannyaasiyon ko to ghar baithe vairaagya aa jaata hai to haridvaar chale jaate। vahaan koi guru kar lete। yahaan ki rasam hi niraali hai। inka kahaan varnan hai hi nahin। geeta ko hi jhootha bana diya hai। yeh pahli baat khul jaaye to sab bi.ke. bahut naameegraami ho jaao। sab tumhaare par sadke jaayen (balihaar jaayen)। prabhaav nikalna to hai na। abhi to tumhaara bahut saamna karte hain। pahle to ghar ke hi dushman bante hain। is baba ke bhi kitne dushman banen। shreekrishna ke liye bhi kehte hain na - bhagaata tha। kitne kalank lagaaye hain। yeh bhi drama mein noondh hai। drama anusaar automatically prabhaav nikalta jaayega। phir bhakton ki bheed aakar hogi। parantu bheed mein phir service ho nahin sakegi। sannyaasiyon ke paas bheed hoti hai to woh khush hote hain। yahaan tum jaante ho koto mein koi niklega। sannyaasi to yahi sochenge ki inse koi niklenge jo paise denge। tumhaara khyaal chalta hai ki inse koi nikle jo bachcha ban varsa leve। to kitna farka hai। tum bhaashan karte ho to jo apne bachche aur dharmon mein convert ho gaye hain woh niklenge। koi aarya samaaj se, koi kahaan se nikal aate hain। to jab phir log sunte hain yeh hamaare dharma ka brahmaakumaar-brahmaakumaariyon ke paas bhaag gaya hai to samajhte hain hamaari naak kat gai। ismen samjhaane ki badi yukti chaahiye। pahle to baap ka parichay dena hai। bhal koi likhkar bhi dete hain। barobar shivbaaba padhaate hain parantu usmein khush nahin hona hai। nishchay bilkul nahin baitha hai। bhal kai bachche patra bhi likhte hain। parantu baba likh dete hain - tumko nishchay bilkul nahin hai। nishchay baithe - most beloved baap se varsa milta hai to ek second bhi thahre nahin। vivek kehta hai ki gareeb jhat bhaagenge। saahookaar koi birla niklega। saadhaaran kuchh niklenge। koi bhi aaye bolo yeh raajayog ki paathshaala hai। jaise doktari yog vaise yeh raajayog hai, jisse raajaaon ka raaja banna hai। hamaara em object hai hi manushya se devta banna। achha।

baapdaada ka meethe-meethe sikeeldhe bachchon prati nambarvaar purushaartha anusaar yaadapyaar। dil par woh chadhte hain jo purushaartha kar aap samaan banaate hain। baaki baap sabhi ko pyaar to karenge hi। achha-roohaani baap ki roohaani bachchon ko namaste।

dhaarna ke liye mukhya saar:-

1) karmendriyon se koi bhi vikarma nahin karna hai। gyaan aur yogbal se man ke toofaanon par vijay praapta karni hai।

2) seva aisi karni hai jisse maat-pita ka naam baala ho। sabki duaayen milti rahen।

vardaan:- apne anaadi swaroop mein sthit rah sarva samasyaaon ka hal karne vaale ekaantavaasi bhav

aatma ka svadharma, sukarma, sva swaroop aur svadesh shant hai। sangamayug ki vishesh shakti silence ki shakti hai। aapka anaadi lakshan hai shant swaroop rehna aur sarva ko shanti dena। isi silence ki shakti mein vishwa ki sarva samasyaaon ka hal samaaya hua hai। shant swaroop aatma ekaantavaasi hone ke kaaran sada ekaagra rehti hai aur ekaagrata se parakhne va nirnay karne ki shakti praapta hoti hai jo vyavhaar va parmaartha donon ki sarva samasyaaon ka sahaj samaadhaan hai।

slogan:- apni drishti, vritti aur smriti ki shakti se shanti ka anubhav karaana hi mahaadaani banna hai।