Murli du jour du lundi 12 juin 2023

12-06-2023 praatahmurli om shanti "baapdaada"' madhuban

meethe bachche - “most sweetest baap is kaduvi duniya ko badal sweet banaate hain, tumhein bhi sweet baap aur varse ko yaad kar most sweetest banna hai''

prashn:- svayan ko perfect banaane ki kaun-kaun si yuktiyaan baap ne sunaai hain?

uttar:- svayan ko perfect banaana hai to eemaandaari se svayan ki jaanch karo ki

1- mere mein abhi tak kya-kya khaamiyaan hain?

2- saare din mein mansa-vaacha-karmana kisi ko bhi duhkh to nahin deta hoon?

3- baap ki yaad ki current lekar bhooton ko nikaalne ka purushaartha karta hoon?

4- doosron ki service ke saath main apni bhi service karta hoon?

5- kitna samay baap ki yaad mein rah athaah sukhon ka anubhav karta hoon? satopradhaan kitna bana hoon?

om shanti। baap bachchon se poochhte hain meethe bachche apna bhavishya ka purushottam mukh dekhte ho? purushottam chola dekhte ho? samajh mein aata hai ki ham bhavishya nai satayugi duniya mein in (lakshmi naaraayan) ke vanshaavli mein jaayenge arthaat sukhdhaam mein jaayenge athva purushottam banenge! student jab padhte hain to buddhi mein rehta hai na main phalaana banoonga। tum bhi jaante ho ham vishnu ki dynasty mein jaayenge kyonki vishnu ke do roop hain - lakshmi naaraayan। abhi tumhaari buddhi alaukik hai, aur koi ki buddhi mein yeh baaten raman nahin karengi। yahaan tum jaante ho ham sat baba, shivbaaba ke sang mein baithe hain। oonch te oonch baap hamko padha rahe hain। woh hai most sweetest। us sweetest baap ko bahut lav se yaad karna hai kyonki baap kehte hain bachchon mujhe yaad karne se tum aisa purushottam banenge aur gyaan ratnon ko dhaaran karne se tum bhavishya 21 janmon ke liye padmapti banenge। baap jaise var dete hain। var milega meethi-meethi sajni ko athva meethe-meethe sapoot bachchon ko। meethe-meethe bachchon ko dekh baap khush hote hain।

meethe bachche jaante hain is naatak mein sabhi part baja rahe hain। behad ka baap bhi is behad ke drama mein sammukh ka part baja rahe hain। sweet baap ke tum sweet bachchon ko sweetest baap sammukh nazar aata hai। aatma hi is shareer ke organs se ek do ko dekhti hai। to tum ho sweet children। baap jaante hain main bachchon ko bahut sweet banaane aaya hoon। yeh lakshmi naaraayan most sweet hain na। inhon ki raajdhaani bhi sweet hai, vaise inki praja bhi sweet hai। jab mandir mein jaate hain to inhon ko kitna sweet dekhte hain। kahaan mandir khule to ham sweet devtaaon ka darshan karen। darshan karne vaale samajhte hain yeh sweet svarga ke maalik the। shiv ke mandir mein bhi kitne dher manushya jaate hain kyonki woh bahut sweetest te sweetest hai। us sweetest shivbaaba ki bahut mahima karte hain। tum bachchon ko bhi most sweet banna hai। most sweetest baap tum bachchon ke sammukh baithe hain kyonki incognito hai। in jaisa sweet aur koi ho nahin sakta। baap jaise sweet ka pahaad hai। sweet baap hi aakar kaduvi duniya ko badal sweet banaate hain। bachche jaante hain sweetest baba hamko most sweetest bana rahe hain। hoobhu aap samaan banaate hain। jo jaisa hoga vaisa banaayega na। to aisa sweetest banne ke liye sweet baap ko aur sweet varse ko yaad karna hai।

baba baar-baar bachchon ko kehte hain meethe bachche, apne ko ashareeri samajh mujhe yaad karo to main pratigya karta hoon yaad se hi tumhaare sab kalah-kalesh mit jaayenge। tum ever healthy ever wealthy ban jaayenge। tum most sweet ban jaayenge। aatma sweet banegi to shareer bhi sweet milega। bachchon ko yeh nasha rehna chaahiye most beloved baap ke ham bachche hain to hamko baba ki shreemat par chalna hai। bahut meetha-meetha baba hamko bahut sweet banaate hain। most beloved baap kehte hain tumhaare mukh se sadaiv ratna nikle। koi bhi kaduva patthar nahin nikalna chaahiye। jitna sweet banenge utna baap ka naam baala karenge। tum bachche baap ko follow karo to tumko phir aur sabhi follow karenge।

baap teacher bhi hai na। to teacher zaroor bachchon ko shiksha denge bachche, yaad ka roz apna chart rakho। jaise vyaapaari log raat ko muraadi sambhaalte hain na। to tum vyaapaari ho, baap se kitna bada vyaapaar karte ho। jitna baap ko jaasti yaad karenge utna baap se athaah sukh paayenge। satopradhaan banenge। roz apne andar dekhna hai, jaise naarad ko kaha na ki apni shakla dekho ki main lakshmi ko varne laayak hoon? tumko bhi dekhna hai ham aisa banne laayak hain, nahin to hamaare mein kya-kya khaamiyaan hai? kyonki tum bachchon ko perfect banna hai। baap aaye hi hain perfect banaane liye। to imaandaari se apni jaanch karni hai hamaare mein kya-kya khaami hain? jis kaaran samajhta hoon ki oonch pad nahin pa sakoonga। in bhooton ko bhagaane ki yukti baap bataate rehte hain। baap baith sabhi aatmaon ko dekhte hain, kisi mein khaami dekhte hain to phir unko current dete hain ki inka yeh vighna nikal jaaye। jitna baap ko madad kar baap ki mahima karte rahenge to yeh bhoot bhaagte rahenge aur tumko bahut khushi hogi isliye apni poori jaanch karni hai। saare din mein mansa, vaacha, karmana duhkh to nahin diya? saakshi ho apni chalan ko dekhna hai auron ki chalan ko bhi dekh sakte ho parantu pahle apne ko dekhna hai। sirf doosre ko dekhne se apna bhool jaayenge। harek ko apni service karni hai। doosron ki service karna maana apni service karna। tum shivbaaba ki service nahin karte ho। shivbaaba to service par aaye hain na।

meethe bachche tum valuable heere bante ho। valuable heere javaahar jo hote hain unko safety ke liye hamesha bank mein rakhte hain। tum brahman bachche bhi valuable ho, jo shivbaaba ki bank mein safety mein baithe ho। tum jaante ho duniya ke sabhi manushya marne vaale hain। tum baba ki safe mein rahkar amar bante ho। tum kaal par vijay pa rahe ho। shivbaaba ke bane to safe ho gaye। baaki oonch pad paane liye purushaartha karna hai। duniya mein manushyon paas kitna bhi dhan-daulat hai parantu woh sabhi khatma ho jaana hai। kuchh bhi nahin rahega। tum bachchon ke paas to abhi kuchh bhi nahin hai। yeh deh bhi nahin hai। yeh bhi baap ko de do। to jinke paas kuchh nahin hai unke paas jaise ki sab kuchh hai। tumne behad ke baap se sauda kiya hi hai bhavishya nai duniya ke liye। kehte ho baba deh sahit yeh jo kuchh kakhpan hai sabhi kuchh aapko dete hain aur aap se phir vahaan sabhi kuchh lenge। to tum jaise safe ho gaye। sabhi kuchh baba ke tijori mein safe ho gaya। tum bachchon ke andar mein kitni khushi honi chaahiye baaki thoda samay hai phir ham apni raajdhaani mein honge। tumko koi poochhe, to bolo vaah! ham to behad ke baap se behad sukh ka varsa le rahe hain। ever healthy, wealthy bante hain। hamaari sabhi manokaamnaaen poori ho rahi hain।

baba jaante hain is samay koi sampoorn bana nahin hai। maaya ke saath tumhaari yuddha pichhaadi tak chalti rahegi। yuddha banda tab hogi jab mahaabhaari yuddha lagegi, phir result ka pata padega। apne oopar bahut nazar rakhni padti hai। dekhna chaahiye main most beloved baba ko kitna samay yaad karta hoon? baba jaante hain kai bachchon ko yaad karne ki bhi phursat nahin hai। baap kehte hain mujhe bahut pyaar se yaad karo, phir bhi yaad nahin karte hain to samjhenge na phursat nahin hai। maaya poora samay le leti hai। baap ko yaad karne ki phursat nahin deti hai। saara madaar hai yaad ki yaatra par। yaad mein hi maaya vighna daalti hai। yaad bhula deti hai isliye baap samjhaate hain meethe bachchon dehi-abhimaani bano। yog ki taakat se hi tum kisko thoda bhi samjhaayenge to unko jhat teer lag jaayega। jisko teer lagta hai to ekdam ghaayal kar dete hain। pahle ghaayal hote hain phir baba ke bante hain। baap ko pyaar se yaad karte hain to baap ko bhi kashish hoti hai। kai to bilkul hi yaad nahin karte। baba ko taras padta hai phir bhi kahenge bachche unnati ko paao। aage number mein aao। jitna oonch pad paayenge utna najdeek aayenge aur athaah sukh paayenge। patit-paavan to ek hi baap hai isliye ek baap ko yaad karna hai। sirf ek baap bhi nahin, saath-saath phir sweet hom ko bhi yaad karna hai। sirf sweet home ko bhi nahin, maal-milkiyat bhi chaahiye isliye svargadhaam ko bhi yaad karna hai। pavitra zaroor banna hai। jitna ho sake bachchon ko antarmukh rehna hai, jaasti bolo nahin, shant mein raho। baap bachchon ko shiksha dete hain meethe bachche ashaanti nahin phailaani hai। apne ghar-grihastha mein rehte bhi bahut shanti mein raho। antarmukh ho raho। bahut meetha bolo। koi ko duhkh na do, krodh na karo। krodh ka bhoot hoga to yaad mein rah nahin sakenge। baap kitna meetha hai, to bachchon ko bhi samjhaate hain bachche bahut-bahut meethe bano, baaharmukhi mat bano, antarmukhi bano।

jaise baap ati lovely aatma pure hai, aise pure banna hai। bahut lav se baap ko yaad karna hai। baba aapke sivaae hamaare saamne doosra koi na aaye। baap jaisa pyaara koi hai nahin। har ek us ek maashook ke aashik bante hain। to us maashuk ko bahut yaad karna hai। baba ne bataaya hai woh jismaani aashik-maashuk koi ikatthe nahin rehte, ek baar dekh liya bas। aise nahin ki aapas mein shaadi aadi hoti hai, nahin। baap kehte hain meethe bachchon maamekam yaad karo to beda paar hai। jis meethe baap dvaara ham heere jaisa bante hain aise baap ke saath hamaara kitna lav hai। bahut prem se baap ko yaad kar andar ekdam thar jaana chaahiye। (sheetal ho jaana chaahiye) romaanch khade ho jaane chaahiye। jo bhi defects hain unko nikaal pure diamond banna hai। agar thodi bhi kami hogi to value kam ho jaayegi। apne ko bahut valuable heera banaana hai। baap ki yaad bhoolni nahin chaahiye balki aur hi yaad sataani chaahiye। baba-baba kah ekdam pyaar mein sama jaao।

tum bachchon ko yeh bhi nishchay hai ki behad ke baap dvaara ham svarga ke maalik ban rahe hain। svarga ke maalik banne mein khushi bahut hoti hai। to baap baith bachchon ko dekhte hain, inmen kaun-kaun se gun hain? kaun-kaun se avgun hai? bachche bhi jaante hain isliye baba kehte hain apni khaamiyaan aapehi likhkar aao। sampoorn to koi bana nahin hain। haan banna hai। kalpa-kalpa bane hain। baap samjhaate hain khaami mukhya hai saari deh-abhimaan ki। deh-abhimaan bahut tang karta hai। avastha ko badhne nahin deta। is deh ko bhi bhoolna hai। yeh puraana shareer chhod jaana hai, daiveegun bhi yahaan hi dhaaran karne hai। jaana hai to koi bhi flaw nahin hona chaahiye। tum heere bante ho na। kya-kya flaw hai yeh to jaante ho। us heere mein bhi flaw hote hain parantu unse flaw ko (daag ko) nikaal nahin sakte hain kyonki jad hai na। unko phir kat karna padta hai। tum to chaitanya heere ho। to jo bhi flaw hai unko ekdam nikaal flawless banna hai। agar flaw nahin nikaalenge to value kam ho jaayegi। tum chaitanya hone kaaran flaw ko nikaal sakte ho।

tum bachche is avinaashi part bajaane mein athak ho, kabhi thakte nahin ho। jaante ho ham anginat baar is chakra mein aaye hain। kitna wonderful khel hai। is wonderful khel ko samajhne se kitna khushi hoti hai। us khel ko dekhkar khush hote hain milta kuchh bhi nahin, is khel ko samajhne se tum khush bhi hote ho aur tum vishwa ke maalik bante ho isliye baap roz-roz samjhaate hain, meethe bachche dehi-abhimaani bano। is shareer mein hote bhi samjho yeh shareer hamaara nahin hai, yeh to khatma ho jaana hai। hamko to baba ke paas jaana hai। dehi-abhimaani banne se tumhaare mein kashish rahegi। is puraane shareer se mamatva nikaal dena hai। abhi to 84 janma poore hue, ab ghar jaana hai। bachchon ko sadaiv yahi yaad rahe। time to bahut bachta hai। 8 ghanta dhandhaadhori karo, 8 ghanta aaraam, baaki 8 ghanta baap se vaartaalaap, roohrihaan karo, roohaani service karo। maaya ke bhoot agar andar rahenge to success nahin honge। achha!

meethe meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) deh sahit jo bhi kakhpan hai woh sab shivbaaba ki bank mein jama kar bhavishya ke liye behad sukh ka varsa lena hai।

2) flawless heera banne ke liye antarmukhi ban deh abhimaan ki khaami ko nikaalna hai। kabhi ashaanta nahin hona hai, ashaanti nahin phailaani hai।

vardaan:- praaptiyon ki ichchha se ichchha maatram avidya ban sada bharpoor rahne vaale nishkaam sevaadhaari bhav

jo nishkaam sevaadhaari hain unke saamne sarva praaptiyaan svatah aati hain। lekin praapti aapke aage bhal aaye, aap praaptiyon ko sveekaar nahin karo। agar ichchha rakhi to sarva praaptiyaan hote bhi kami mahsoos hogi। sada apne ko khaali samjhenge isliye ichchha maatram avidya ban sarva praaptiyon se bharpoor raho। sangamayug par baapdaada dvaara jo bhi avinaashi praaptiyaan hui hain, unheen praaptiyon ke jhoole mein sada jhoolte raho to koi bhi bhoolen nahin hongi।

slogan:- apni avyakt sthiti se avyakt aananda, avyakt sneh va avyakt shakti praapta kar sakte ho।