Murli du jour du jeudi 26 octobre 2023

26-10-2023 praatahmurli om shanti "baapdaada"' madhuban

“meethe bachche - abhi ghor andhiyaara, bhayaanak raat poori ho rahi hai, tumhein din mein chalna hai, yeh brahma ke behad din aur raat ki hi kahaani hai''

prashn:- second mein jeevanmukti praapta karne va heere tulya jeevan banaane ka aadhaar kya hai?

uttar:- sachchi geeta। jo shreemad bhagvaanuvaach hai। baap tumhein sammukh jo direction de rahe hain yeh sachchi geeta hai, jisse tumhein second mein jeevanmukti pad ki praapti hoti hai। tum heere tulya bante ho।

prashn:- svarga ke ghanere sukh kis purushaartha ke aadhaar se milte hain?

uttar:- roz ki padhaai aur yog se, svarga ke ghanere sukh mil jaayenge isliye padhaai mein kabhi thakna nahin। baap teacher bankar padha rahe hain to tum achhe marks se paas hone ka purushaartha karo, ismen aasheervaad va kripa ki baat nahin hai।

geet:- raat ke raahi thak mat jaana…

om shanti। abhi yeh geet tum bachchon ne nahin banvaaye hain। yeh to film vaalon ne baith banvaaye hain। arth to kuchh bhi samajhte nahin। har ek baat ka yathaartha arth na jaanne se anartha ho jaata hai। gaate hain, samajhte kuchh bhi nahin hain। ab tum bachchon ko shreemat mili hui hai। kiski? bhagwan ki। bhagwan ko hi bhakta nahin jaante to un bhakton ki sadgati kaise ho sakti hai। bhakton ka rakshak hai bhagwan। raksha maangate hain, zaroor koi duhkh hai। hamaari raksha karo। bahut gaate hain parantu bhagwan kaun hai, kisse raksha karte hain, jara bhi nahin jaante। bhakta athva bachche apne baap ko na jaanne kaaran kitne duhkhi ho pade hain। abhi inka arth tum bachche samajhte ho। abhi hai ghor andhiyaari bhayaanak raat, aadhaakalpa ki raat hai। koi bhi vidvaan, aachaarya, pandit nahin jaante ki raat kisko kaha jaata hai। yoon to yeh jaanvar bhi jaante hain raat sone ki, din jaagne ka hota hai। chidiyaayen bhi raat ko so jaati hain। subah hote hi udne lagti hain। woh din-raat to common hai। yeh brahma ki behad ki raat aur behad ka din hai। behad ka din satayug-treta aur raat dvaapar-kaliyug। aadha-aadha chaahiye na। din ki aayu bhi 2500 varsha hai। is din-raat ka to kisko pata nahin hai। abhi tum bachche jaante ho ki raat poori hoti hai arthaat 84 janma poore hote hain athva drama ka chakra poora hota hai phir din shuru hota hai। raat ko din aur din ko raat banaane vaala kaun hai, yeh bhi koi nahin jaante। bhagwan ko hi nahin jaante to yeh sab baaten kaise jaan sakte। manushya pooja karte hain parantu samajhte nahin ki yeh kaun hain, jiski ham pooja karte hain। baap baith samjhaate hain - pahli-pahli mukhya baat hai geeta ko khandan karne ki। kehte hain shreemat bhagvat geeta। geeta ka pati hai bhagwan, na ki koi manushya। brahma, vishnu, shankar ko devta kaha jaata hai aur satayug ke manushyon ko devtaai gunon vaala kaha jaata hai। daivi dharma vaale shreshthaachaariyon ko devtaai gunon vaale kehte hain। bhaarat ke manushya shreshthaachaari the। vahi phir aasuri gun vaale ban pade hain। mukhya dharma shaastra chaar hain। aur koi dharma shaastra hain nahin। agar hain to bhi bahut chhote-chhote math sthaapan kiye hain। jaise sannyaasiyon ka math, bauddhiyon ka math। buddha ne bauddhi dharma sthaapan kiya। woh kahenge hamaara phalaana dharma shaastra hai। ab bhaaratvaasiyon ka dharma shaastra hai ek। satayugi devi-devta dharma ka shaastra hai ek, unko shreemat bhagvat geeta kaha jaata hai। geeta maata, unka rachayita hai parampita paramatma। shreekrishna ki aatma jab 84 janma poore karti hai tab phir geeta ke bhagwan, gyaan saagar parampita paramatma se sahaj raajayog aur gyaan seekh oonch pad paati hai। aise oonch te oonch dharma shaastra ko khandan kar diya hai, jis kaaran hi bhaarat kaudi tulya bana hai। yeh bhi drama mein ekaz bhool hai, jo geeta ko khandan kar diya hai। baap ab jo sachchi geeta suna rahe hain woh nikalni chaahiye। sachchi geeta government ko chhapaana chaahiye। yeh hai shreemat bhagvaanuvaach। bachchon prati baap direction dete hain - achhi reeti likhna chaahiye short mein। tum jaante ho sachchi geeta se second mein jeevanmukti mil jaati hai। baap ka ban baap se varsa lena hai। beej, jhaad aur drama ke chakra ko samjhaana hai, gaate bhi hain satayug aadi sat, hai bhi sat, hosi bhi sat। jhaad ko jaanna bhi sahaj hai। inka beej oopar mein hai, yeh variety dharmon ka jhaad hai। ismen sab aa gaye। baaki chhoti-chhoti taaliyaan to athaah hain, math-pantha bahut hain। bhaarat ka aadi sanaatan devi-devta dharma hai, woh kisne sthaapan kiya? bhagwan ne। koi manushya ne nahin kiya। shreekrishna to daivi gunon vaala manushya tha, woh 84 janma poore kar ab antim janma mein hai। sooryavanshi, chandravanshi, vaishyavanshi bante-bante kalaayen kam hoti jaati hain। sooryavanshi raajdhaani jo satayug mein shreshthaachaari thi so kaliyug mein ab bhrashtaachaari hai। ab phir shreshthaachaari ban rahi hai। tumhaari buddhi mein hai ki oonch te oonch part kiska hoga? abhi tum jaan gaye ho। mukhya hai hi shivaae namah, jo uski mahima hai woh brahma-vishnu-shankar ke liye nahin ga sakenge। president ki mahima prime minister ko athva aur koi ko denge kya? nahin। alag-alag title hain na। sab ek to nahin ho sakte। tum bachchon ko abhi buddhi mili hai। tum jaante ho Christ ko bhi apna Christian dharma sthaapan karne ka part mila hua hai। aatma hai to bindi। us aatma mein part bhara hua hai। Christian dharma ki sthaapna kar phir punarjanma lete paalna karte sato-rajo-tamo mein aana hai। pichhaadi mein saara jhaad jadajdeebhoot hona hi hai। harek ko kitna-kitna samay part mila hua hai। buddha ko kitna samay paalna karni hai - yeh tum jaante ho। bhinna-bhinna naam-roop mein janma lete rehte hain।

abhi baba tumhaari kitni vishaal buddhi banaate hain। parantu koi to shivbaaba ko yaad bhi nahin kar sakte। behad ka baap behad svarga ka varsa dete hain। yeh bhi tum samjha nahin sakte। baba ne bahut baar samjhaaya hai, aatma mein avinaashi part noondha hua hai। ek shareer chhod phir doosra lena hai। kitni guhya baaten hain samajhne ki। jo school mein roz padhte honge, vahi samjhenge। koi to chalte-chalte thak jaate hain। gaate bhi hain tum maat pita ham baalak tere… baap kehte hain ham tumko svarga ke sukh ghanere dene ka purushaartha kara rahe hain। tum thak nahin jaana। itni oonch te oonch padhaai padhna tum chhod dete ho। koi to padhaai chhod phir vikaar mein bhi chale jaate hain। jaise ka taisa ban jaate hain। chalte-chalte gir padenge to aur kya hoga। bhal vahaan sukh mein hain parantu pad mein to farka hai na। yahaan sab duhkhi hain। vahaan raaja-praja sabko sukh hai। phir bhi pad to ooncha lena chaahiye na। padhaai chhod di to maat-pita kahenge tum to laayak nahin ho। baap se svarga ka varsa lete-lete kai bachche thak jaate hain। chalte-chalte maaya vaar kar deti hai to laut jaate hain। jo jama kiya woh phir na ho jaati। baaki kya banenge? svarga mein bhal jaayenge, lekin bilkul saadhaaran praja jaakar banenge। baap kehte hain hamaara bankar phir thak kar baith gaye va traitor ban gaye to praja mein chandaal jaakar banenge। sabhi chaahiye na। svarga ka maalik bante-bante agar padhaai ko chhod dete to un jaisa mahaan moorkha duniya mein koi hota nahin। likhte bhi hain tum maat-pita ham baalak tere, tumhaari kripa se svarga ke bahut sukh ghanere milte hain। kripa karo। baap kahenge kripa ki to baat hi nahin। main teacher hoon, padhaaoonga, purushaartha tum karo, achhe marks se paas hone ka। baaki main thode hi baith sab par aasheervaad karunga। tum yog mein raho to taakat milti rahegi। sabhi thode hi gaddi par baithenge। ek do ke sir par baithenge kya। to dharma mukhya hain hi 4, shaastra bhi 4 hain। unmein mukhya hai geeta। baaki sab unke bachche hain। varsa to maat-pita se hi milta hai। ab baap sammukh samjha rahe hain। sirf geeta padhne se hi thode hi raajaaon ka raaja ban jaayenge। baba ne to geeta padhi hai। parantu unse hota kuchh bhi nahin hai। yeh sab hai bhakti maarga ke shaastra, tumko purushaartha kar 16 kala sampoorn banna hai। abhi to tumhaare mein koi kala, koi gun nahin raha hai। gaate bhi hain mujh nirgun haare mein koi gun naaheen, aapehi taras paroi… hamko phir 16 kala sampoorn banaao। jo ham the phir banaao। ab tum jaante ho baap sammukh aakar samjha rahe hain। ek nirgun sanstha bhi bana di hai। nirgun niraakaar ka arth bhi nahin jaante hain। shiv ka to aakaar bhi hai। jiska naam hai, to zaroor cheez bhi hai na। aatma itni sookshm hai, unka bhi naam hai। brahm mahtatva, jahaan aatmaayen nivaas karti hain, woh bhi naam hai na। naam-roop se nyaari to koi cheez hoti nahin। bhagwan ko kehte naam-roop se nyaara, phir unko sarvavyaapi kah dete hain। yeh kitni badi bhool hai। manushya jab in baaton ko samjhen tab to nishchay karen। baba hamne aapko jaana hai। kalpa-kalpa aapse raajya-bhaagya lete aaye hain। aisa nishchay ho tab padh sakte hain। yahaan se baahar nikalte aur bhool jaate hain isliye pahle-pahle to likhva lena chaahiye barobar shivbaaba aaya hai - raajayog sikhlaane। likhkar bhi dete phir padhte nahin। blood se bhi likhkar dete hain। parantu aaj hain nahin, maaya kitni teekhi hai। baap kitna baith samjhaate hain। tumhaari vihang maarga ki service tab hogi jab aise-aise patra likhenge। tumhaari shakti sena mein bhi nambarvaar hain। koi chief commander hai, koi captain hai, koi majors hain। koi sipaahiyon ke saath bojha uthaane vaale bhi hain। saari sena hai। baba to purushaartha karaayenge na। har ek ke purushaartha karne se samajh mein aata hai - yeh raaja-raani banenge va achhi saahookaar praja mein jaayenge, yeh saadhaaran praja mein jaayenge, yeh daas-daasi banenge। yeh to bilkul sahaj hai samajhne ka। to pahli mukhya baat ko uthaana hai। baba kitni lalkaar karte hain mahaarthiyon ko। to vihang maarga ki seva ke liye vichaar chalne chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) padhaai mein thakna nahin hai। oonch te oonch padhaai roz padhni aur padhaani hai।

2) vihang maarga ki service karne ki yuktiyaan nikaalni hain। yog mein rah baap se taakat leni hai। kripa, aarsheevaad maangani nahin hai।

vardaan:- vardaanon ki divya paalna dvaara sahaj aur shreshtha jeevan ka anubhav karne vaale sada khushanseeb bhav

baapdaada sangamayug par sabhi bachchon ki teen sambandhon se paalna karte hain। baap ke sambandh se varse ki smriti dvaara paalna, shikshak ke sambandh se padhaai ki paalna aur satguru ke sambandh se vardaanon ke anubhooti ki paalna.. ek hi samay par sabko mil rahi hai, isi divya paalna dvaara sahaj aur shreshtha jeevan ka anubhav karte raho। mehnat aur mushkil shabd bhi samaapta ho jaae tab kahenge khushanseeb।

slogan:- baap ke saath-saath sarva aatmaon ke snehi banna hi sachchi sadbhaavna hai।