Murli du jour du lundi 5 août 2024

05-08-2024 praatahmurli om shanti "baapdaada"' madhuban

“meethe bachche - tumhaare mein honest woh hai jo saare universe ki seva kare, bahuton ko aapasmaan banaaye, aaraam pasanda na ho''

prashn:- tum brahman bachche kaun-se bol kabhi bhi bol nahin sakte ho?

uttar:- tum brahman aise kabhi nahin bolenge ki hamaara brahma se koi connection nahin, ham to direct shivbaaba ko yaad karte hain। bina brahma baap ke brahman kahla nahin sakte, jinka brahma se connection nahin arthaat jo brahma mukh vanshaavli nahin woh shoodra thahre। shoodra kabhi devta nahin ban sakte hain।

om shanti। roohaani baap baith samjhaate hain daada ke dvaara - bachche museum athva pradarshani ka udghaatan karaate hain parantu udghaatan to behad ke baap ne kab se kar liya hai। ab yeh shaakhaayen athva branches nikalti rehti hain। paathshaalaayen bahut chaahiye na। ek to hai yeh paathshaala jismen baap rehte hain, iska naam rakha hai madhuban। bachche jaante hain madhuban mein sadaiv murli bajti rehti hai। kiski? bhagwan ki। ab bhagwan to hai niraakaar। murli bajaate hain saakaar rath dvaara। unka naam rakha hai bhaagyashaali rath। yeh to koi bhi samajh sakte hain। ismen baap pravesh karte hain, yeh to tum bachche hi samajhte ho। aur to koi na rachta ko, na rachna ke aadi-madhya-ant ko jaante hain। sirf bade aadmi governor aadi hain to unse udghaatan karaate hain। yeh bhi baba hamesha likhte rehte hain ki jinse udghaatan karaate ho, unko pahle parichay dena hai - baap kaise nai duniya sthaapan karte hain। unki yeh branches khul rahi hain। koi na koi se khulvaate hain taaki unka kalyaan ho jaaye। kuchh samjhen ki barobar baap aaya hua hai। brahma dvaara sthaapna ho rahi hai - vishwa mein shanti ke raajya ki va aadi sanaatan devi-devta dharma ki। uska udghaatan to ho chuka hai। abhi yeh branches khul rahi hain। jaise ki bank ki branches khulti jaati hain। baap ko hi aakar knowledge deni hai। yeh knowledge parampita paramatma mein hi rehti hai isliye unko hi gyaan saagar kaha jaata hai। roohaani baap mein hi roohaani gyaan hai jo aakar roohon ko dete hain। samjhaate hain - he bachchon, he aatmaon, tum apne ko aatma samjho। aatma naam to common hai। mahaan aatma, punya aatma, paap aatma kaha jaata hai। to aatma ko parampita paramatma baap bhi samjha rahe hain। baap kyon aayenge? zaroor bachchon ko varsa dene liye। phir satopradhaan nai duniya mein aana hai। world ki history-geography repeat kaha jaata hai। nai athva puraani duniya manushyon ki hi hai। baap kehte hain main aaya hoon nai duniya rachne। bigar manushyon ke to duniya hoti nahin। nai duniya mein devi-devtaaon ka raajya tha, jiski ab phir se sthaapna ho rahi hai। abhi tum bachche shoodra se brahman bane ho। phir tumko brahman se devta banaane aaya hoon। tum yeh suna sakte ho ki baap aise samjhaate hain। tum nai duniya mein kaise ja sakte ho। abhi to tumhaari aatma patit vikaari hai so ab nirvikaari banna hai। janma-janmaantar ke paapon ka bojha sir par hai। paap kab se shuru hote hain? baap kitne varshon ke liye punya aatma banaate hain? yeh bhi tum bachche abhi jaante ho। 21 janma tum punya aatma rehte ho phir paap aatma bante ho। jahaan paap hota hai, vahaan duhkh hi hoga। paap kaun se hain? woh bhi baap batlaate hain। ek to tum dharma ki glaani karte ho। kitne tum patit ban gaye ho। mujhe bulaate aaye ho - he patit-paavan aao, so ab main aaya hoon। paavan banaane vaale baap ko tum gaali dete, glaani karte ho isliye tum paap aatma ban pade ho। kehte bhi hain he prabhu janma-janmaantar ka paapi hoon, aakar paavan banaao। to baap samjhaate hain ki jisne sabse jaasti janma liye hain, unke hi bahut janmon ke ant mein pravesh karta hoon। baba bahut janma kisko kehte? bachche 84 janmon ko। jo pahle-pahle aaye hain, vahi 84 janma lete hain। pahle to yahi lakshmi-naaraayan aate hain। yahaan tum aate hi ho nar se naaraayan banne ke liye। katha bhi satya naaraayan ki sunaate hain। kab raam-seeta banne ki katha sunaai hai kisi ne? uski glaani ki hui hai। baap banaate hi hain nar se naaraayan, naari se lakshmi। jinki kabhi koi ninda nahin karte hain। baap kehte hain main raajayog sikhlaata hoon। vishnu ke do roop yeh lakshmi-naaraayan hain। chhotepan mein raadhe-krishna hain। yeh koi bhaai-behen nahin, alag-alag raajaaon ke bachche the। woh mahaaraajkumaar, woh mahaaraajkumaari, jinko svayanvar ke baad lakshmi-naaraayan kaha jaata hai। yeh sab baaten koi manushya nahin jaante। kalpa pahle yeh sab baaten jinki buddhi mein baithi hongi unki hi buddhi mein baithengi। in lakshmi-naaraayan, raadhe-krishna aadi sabke mandir hain, vishnu ka bhi mandir hai, jinko nar-naaraayan ka mandir kehte hain। aur phir lakshmi-naaraayan ka alag-alag mandir bhi hai। brahma ka bhi mandir hai। brahma devta namah phir kehte shiv parmaatmaae namah woh to alag ho gaya na। devtaaon ko kabhi bhagwan thode hi kaha jaata hai। to baap samjhaate hain pahle jisse udghaatan karaana hai, unko samjhaana hai, vishwa mein shanti sthaapan arth bhagwan ne foundation laga diya hai। vishwa mein shanti lakshmi-naaraayan ke raajya mein thi na। yeh satayug ke maalik the na। to manushya ko nar se naaraayan, naari se lakshmi banaane ki yeh badi godly university hai athva eeshvareey vishwa vidyaalay hai। vishwa vidyaalay to bahuton ne naam rakhe hain। vaastav mein woh koi world university hai nahin। universe to saari vishwa ho gai। saare vishwa mein behad ka baap ek hi college kholte hain। tum jaante ho vishwa mein paavan banne ki vishwa-vidyaalay keval yeh ek hi hai, jo baap sthaapan karte hain। ham saare vishwa ko shantidham, sukhdhaam le jaate hain isliye isko kaha jaata hai eeshvareey vishwa vidyaalay। eeshvar aakar saare vishwa ko mukti-jeevanmukti ka varsa dete hain। kahaan baap ki baat, kahaan yeh sab kehte rehte university। universe arthaat saari duniya ko change karna, yeh to baap ka hi kaam hai। hamko yeh naam rakhne nahin dete aur government khud rakhti hai। yeh to tumko samjhaana hai, woh bhi pahle to nahin samjhaayenge। bolo, hamaara naam hi hai brahmaakumaar-kumaariyaan। inka brahma naam hi tab pada hai jab baap ne aakar rath banaaya hai। prajaapita naam to mashhoor hai na। woh aaya kahaan se? unke baap ka naam kya hai? brahma ko devta dikhaate hain na। devtaaon ka baap to zaroor paramatma hi hoga। woh hai rachta, brahma ko kahenge pahli-pahli rachna। unka baap hai shivbaaba, woh kehte hain main inmen pravesh kar inki pahchaan tumko deta hoon।

to bachchon ko samjhaana hai - yeh eeshvareey museum hai। baap kehte hain mujhe bulaaya hi hai he patit-paavan aao, aakar patit se paavan banaao। ab he bachchon, he aatmaon, tum apne baap ko yaad karo to patit se paavan ban jaayenge। manamnaabhav yeh akshar to geeta ke hi hain। bhagwan ek hi gyaan saagar patit-paavan hai, shreekrishna to patit-paavan ho na sake। woh patit duniya mein aa na sake। patit duniya mein patit-paavan baap hi aayenge। ab mujhe yaad karo to paap bhasma honge। kitni sahaj baat hai। bhagvaanuvaach akshar zaroor kehna hai। parampita paramatma kehte hain kaam vikaar mahaashatru hai। pahle nirvikaari duniya thi, ab vikaari duniya hai। duhkh hi duhkh hai। nirvikaari honge to phir sukh hi sukh hoga। to yeh samjhaana hai bhagvaanuvaach kaam mahaashatru hai, is par jeet paane se tum jagatjeet banenge। ek baap ko yaad karo। ham bhi unko yaad karte hain। jaise koi college khulta hai to uska bhi udghaatan karaate hain na। yeh bhi college hai, dher centres hain। centres mein teachers mukrar hain। teacher ko bhi khyaal zaroor rakhna chaahiye। baba naye-naye centres par achhi-achhi braahmaniyon (teachers) ko rakhte hain isliye ki jaldi-jaldi aap samaan banaakar phir aur centres par bhaagna chaahiye service ko uthaane liye। dekhenge kaun-kaun theek reeti murli padhkar suna sakte hain, samjha sakte hain to unko kahenge ab tum yahaan baith class chalaao। aisi trial karaakar, unko bithaakar chala jaana chaahiye aur jagah centre jamaane। braahmaniyon ka kaam hai ek centre jamaaya phir jaakar aur centre jamaaven। ek-ek teacher ko 10-20 centres sthaapan karne chaahiye। bahut service karni chaahiye। dukaan kholte jaayen, aap samaan banaakar koi ko chhodte jaayen। dil mein aana chaahiye - koi ko aap samaan banaakar taiyaar karoon to aur centre khulen। parantu aise honest koi birle rehte hain। honest usko kaha jaata hai jo saare universe ki seva kare। ek centre khola, aap samaan banaaya, phir doosre sthaan par seva ki। ek hi sthaan par atak nahin jaana chaahiye। achha, kisko samjha nahin sakte ho to aur kaam karo। usmein deh-abhimaan nahin aana chaahiye। main to bade ghar ki hoon, yeh kaam kaise karoon… hamko darda hoga। thoda bhi kaam karne se haddi duhkhegi, isko deh-abhimaan kaha jaata hai। kuchh bhi samajhte nahin hain, auron ki service karni chaahiye na। jo phir woh bhi likhe ki baba phalaani ne hamko samjhaaya, hamaari jeevan bana di। service ka saboot milna chaahiye। ek-ek teacher banna chaahiye। phir khud hi likhe - baba, hamaare pichhaadi dher sambhaalne vaale hain, hamne bahut aap samaan banaaye hain, ham centre kholte jaayen। aise bachche ko kahenge phool। service hi nahin karenge to phool kaise banenge। phoolon ka bhi bageecha hai na।

to udghaatan karne vaale ko bhi samjhaana chaahiye। ham brahmaakumaar-kumaariyaan hain। shoodra se brahman ban devta bante hain। baap is brahman kul aur sooryavanshi-chandravanshi kul ki sthaapna karte hain। is samay to sab shoodra varna ke hain। satayug mein devta varna ke the phir kshatriy, vaishya varna ke banen। baba jaante hain kitni points bachche bhool jaate hain। pahle-pahle brahman varna, prajaapita brahma ki aulaad.. brahma kahaan se aaye। yeh brahma baitha hai na। achhi reeti samjhaana chaahiye। brahma dvaara sthaapna, kiski? braahmanon ki। phir unhon ko shiksha de devta banaate hain। ham baap se padh rahe hain। unhonne bhagvaanuvaach to likh diya hai arjun prati। ab arjun kaun tha, kisko pata nahin। tum jaante ho ham brahma ki aulaad brahman hain। agar koi kehte ham to shivbaaba ke bachche hain, brahma se hamaara connection nahin to phir devta woh kaise banenge? brahma ke through hi banenge na। shivbaaba ne tumko kaise, kis dvaara kaha mujhe yaad karo? brahma dvaara kaha na। prajaapita brahma ke to bachche ho na। brahmaakumaar-kumaari kahlaate ho। ham brahma ke bachche hain। to zaroor brahma yaad aayega। shivbaaba brahma tan se padhaate hain। brahma baba hai beech mein। brahman banne bigar devta kaise ban sakenge। main jis rath mein aata hoon, unko bhi jaanna chaahiye। brahman banna chaahiye। brahma ko baba nahin kahe to bachcha hi kaise thahra। brahman apne ko nahin samajhte to goya shoodra hain। shoodra se phat devta banen mushkil hai। brahman ban shivbaaba ko yaad karne bigar devta ban kaise sakenge, ismen moonjhane ki bhi darkaar nahin। to udghaatan karne vaalon ko bhi samjhaana hai ki baap dvaara udghaatan ho chuka hai। aapko bhi bataate hain ki sirf baap ko yaad karo to paap kat jaayenge। woh baap hi patit-paavan hai phir tum paavan ban devta ban jaayenge। bachche bahut service kar sakte hain। bolo, ham baap ka paigaam dete hain। ab karo, na karo, tumhaari marji। ham paigaam dekar jaate hain। aur koi bhi reeti se paavan hona hi nahin hai। jab phursat mile, service karo। samay to bahut milta hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) naye-naye centres ki vriddhi karne ke liye aap samaan banaane ki seva karni hai। centres kholte jaana hai। ek jagah par baithna nahin hai।

2) phoolon ka bageecha taiyaar karna hai। harek ko phool bankar doosron ko aap samaan phool banaana hai। kisi bhi seva mein deh-abhimaan na aaye।

vardaan:- sarva padaartho ki aasaktiyon se nyaare anaasakta, prakritijeet bhav

agar koi bhi padaartha karmendriyon ko vichlit karta hai arthaat aasakti ka bhaav utpanna hota hai to bhi nyaare nahin ban sakenge। ichchhaayen hi aasaktiyon ka roop hain। kai kehte hain ichchha nahin hai lekin achha lagta hai। to yeh bhi sookshm aasakti hai - iski maheen roop se checking karo ki yeh padaartha arthaat alpakaal sukh ke saadhan aakarshit to nahin karte hain? yeh padaartha prakriti ke saadhan hain, jab inse anaasakta arthaat nyaare banenge tab prakritijeet banenge।

slogan:- mere-mere ke jhamelon ko chhod behad mein raho tab kahenge vishwa kalyaankaari।