Murli du jour du samedi 15 mars 2025

15-03-2025 praatahmurli om shanti "baapdaada"' madhuban

“meethe bachche - ab vaapis ghar jaana hai isliye deh sahit deh ke sab sambandhon ko bhool ek baap ko yaad karo, yahi hai sachchi geeta ka saar''

prashn:- tum bachchon ka sahaj purooshaartha kya hai?

uttar:- baap kehte hain tum bilkul chup raho, chup rahne se hi baap ka varsa le lenge। baap ko yaad karna hai, srishti chakra ko phiraana hai। baap ki yaad se tumhaare vikarma vinaash honge, aayu badi hogi aur chakra ko jaanne se chakravarti raaja ban jaayenge - yahi hai sahaj purooshaartha।

om shanti। meethe-meethe roohaani bachchon prati roohaani baap phir se samjha rahe hain। roz-roz samjhaani dete hain। bachche to samajhte hain barobar ham geeta ka gyaan padh rahe hain - kalpa pahle muaaphik। parantu shreekrishna nahin padhaate, parampita paramatma hamko padhaate hain। vahi hamko phir se raajayog sikha rahe hain। tum abhi direct bhagwan se sun rahe ho। bhaaratvaasiyon ka saara madaar geeta par hi hai, us geeta mein bhi likha hua hai ki roodra gyaan yagya racha। yeh yagya bhi hai to paathshaala bhi hai। baap jab sachchi geeta aakar sunaate hain to ham sadgati ko paate hain। manushya yeh nahin samajhte। baap jo sarva ka sadgati daata hai, unko hi yaad karna hai। geeta bhal padhte aaye hain parantu rachayita aur rachna ko na jaanne kaaran neti-neti karte aaye hain। sachchi geeta to sachcha baap hi aakar sunaate hain, yeh hai vichaar saagar manthan karne ki baaten। jo service par honge unka achhi reeti dhyaan jaayega। baba ne kaha hai - har chitra mein zaroor likha hua ho gyaan saagar patit-paavan, geeta gyaan daata parmapriy parampita, paramshikshak, param satguru shiv bhagvaanuvaach। yeh akshar to zaroor likho jo manushya samajh jaaen - trimoorti shiv paramatma hi geeta ka bhagwan hai, na ki shreekrishna। opinion bhi is par likhaate hain। hamaari mukhya hai geeta। baap din pratidin nai-nai points bhi dete rehte hain। aise nahin aana chaahiye ki aage kyon nahin baba ne kaha? drama mein nahin tha। baba ki murli se nai-nai points nikaalni chaahiye। likhte bhi hain rise aur fall। hindi mein kehte hain bhaarat ka utthaan aur patan। rise arthaat construction oph deity dynasty, 100 percent purity, pees, prosperity ki sthaapna hoti hai phir aadhaakalpa baad fall hota hai। devil dynasty ka fall। rise and construction deity dynasty ka hota hai। fall ke saath destruction likhna hai।

tumhaara saara madaar geeta par hai। baap hi aakar sachchi geeta sunaate hain। baba roz is par hi samjhaate hain। bachche to aatma hi hain। baap kehte hain in deh ke saare pasaare (vistaar) ko bhool apne ko aatma samjho। aatma shareer se alag ho jaati hai to sab sambandh bhool jaati hai। to baap bhi kehte hain deh ke sab sambandh chhod apne ko aatma samajh mujh baap ko yaad karo। abhi ghar jaana hai na! aadhaakalpa vaapis jaane ke liye hi itni bhakti aadi ki hai। satayug mein to koi vaapis jaane ka purooshaartha nahin karte hain। vahaan to sukh hi sukh hai। gaate bhi hain duhkh mein simran sab karen, sukh mein kare na koi। parantu sukh kab hai, duhkh kab hai - yeh nahin samajhte hain। hamaari sab baaten hain gupta। ham bhi roohaani military hain na। shivbaaba ki shakti sena hain। inka arth bhi koi samajh na sake। deviyon aadi ki itni pooja hoti hai parantu koi ki bhi biography ko nahin jaante hain। jinki pooja karte hain, unki biography ko jaanna chaahiye na। oonch te oonch shiv ki pooja hai phir brahma-vishnu-shankar ki phir lakshmi-naaraayan, raadhe-krishna ke mandir hain। aur to koi hai nahin। ek hi shivbaaba par kitne bhinna-bhinna naam rakh mandir banaaye hain। abhi tumhaari buddhi mein saara chakra hai। drama mein mukhya actors bhi hote hain na। woh hai had ka drama। yeh hai behad ka drama। ismen mukhya kaun-kaun hain, yeh tum jaante ho। manushya to kah dete hain raam ji sansaar bana hi nahin hai। is par bhi ek shaastra banaaya hai। arth kuchh bhi nahin samajhte।

baap ne tum bachchon ko bahut sahaj purooshaartha sikhaaya hai। sabse sahaj purooshaartha hai - tum bilkul chup raho। chup rahne se hi baap ka varsa le lenge। baap ko yaad karna hai। srishti chakra ko yaad karna hai। baap ki yaad se tumhaare vikarma vinaash honge। tum nirogi banenge। aayu badi hogi। chakra ko jaanne se chakravarti raaja banenge। abhi ho narka ke maalik phir svarga ke maalik banenge। svarga ke maalik to sab bante hain phir usmein hai pad। jitna aapasmaan banaayenge utna oonch pad milega। avinaashi gyaan ratnon ka daan hi nahin karenge to return mein kya milega। koi saahookaar bante hain to kaha jaata hai isne past janma mein daan-punya achha kiya hai। abhi bachche jaante hain raavan raajya mein to sab paap hi karte hain, sabse punya aatma hain shri lakshmi-naaraayan। haan, braahmanon ko bhi oonch rakhenge jo sabko oonch banaate hain। woh to praalabdha hai। yeh brahma mukh vanshaavli brahman kul bhooshan shreemat par yeh shreshtha kartavya karte hain। brahma ka naam hai mukhya। trimoorti brahma kehte hain na। abhi to tumko har baat mein trimoorti shiv kehna pade। brahma dvaara sthaapna, shankar dvaara vinaash - yeh to gaayan hai na। viraat roop bhi banaate hain, parantu usmein na shiv ko dikhaate hain, na braahmanon ko dikhaate hain। yeh bhi tum bachchon ko samjhaana hai। tumhaare mein bhi yathaartha reeti mushkil koi ki buddhi mein baithta hai। athaah points hain na, jisko topics bhi kehte hain। kitni topics milti hain। sachchi geeta bhagwan ke dvaara sunne se manushya se devta, vishwa ke maalik ban jaate hain। topic kitni achhi hai। parantu samjhaane ka bhi akla chaahiye na। yeh baat clear likhni chaahiye jo manushya samjhen aur poochhen। kitna sahaj hai। ek-ek gyaan ki points laakhon-karodon roopayon ki hai, jisse tum kya se kya bante ho! tumhaare kadam-kadam mein padam hain isliye devtaaon ko bhi padam ka phool dikhaate hain। tum brahma mukh vanshaavli braahmanon ka naam hi gum kar diya hai। woh brahman log kachchha mein kuram, geeta lete hain। abhi tum ho sachche brahman, tumhaare kachchha (buddhi) mein hai satyam। unke kachchha mein hai kuram। to tumko nasha chadhna chaahiye - ham to shreemat par svarga bana rahe hain, baap raajayog sikhla rahe hain। tumhaare paas koi pustak nahin hai। lekin yeh simple badge hi tumhaari sachchi geeta hai, ismen trimoorti ka bhi chitra hai। to saari geeta ismen aa jaati hai। second mein saari geeta samjhaai jaati hai। is badge dvaara tum second mein kisko bhi samjha sakte ho। yeh tumhaara baap hai, inko yaad karne se tumhaare paap vinaash honge। train mein jaate, chalte phirte koi bhi mile, tum unko achhi reeti samjhaao। krishnapuri mein to sab jaana chaahte hain na। is padhaai se yeh ban sakte hain। padhaai se raajaai sthaapan hoti hai। aur dharma sthaapak koi raajaai nahin sthaapan karte। tum jaante ho - ham raajayog seekhte hain bhavishya 21janma ke liye। kitni achhi padhaai hai। sirf roz ek ghanta padho। bas। woh padhaai to 4-5 ghante ke liye hoti hai। yeh ek ghanta bhi bas hai। so bhi savere ka time aisa hai jo sabko free hai। baaki koi baandhele aadi hain, savere nahin aa sakte hain to aur time rakhe hain। badge laga hua ho, kahaan bhi jaao, yeh paigaam dete jaao। akhbaaron mein to badge daal nahin sakte hain, ek taraph ka daal sakenge। manushya aise to samajh bhi nahin sakenge, sivaae samjhaane। hai bahut sahaj। yeh dhandha to koi bhi kar sakte hain। achha, khud bhal yaad na bhi kare, doosron ko yaad dilaaven। woh bhi achha hai। doosre ko kahenge dehi-abhimaani bano aur khud deh-abhimaani honge to kuchh na kuchh vikarma hota rahega। pahle-pahle toofaan aate hain mansa mein, phir karmana mein aate hain। mansa mein bahut aayenge, us par phir buddhi se kaam lena hai, bura kaam kabhi karna nahin hai। achha karma karna hai। sankalp achhe bhi hote hain, bure bhi aate hain। bure ko rokna chaahiye। yeh buddhi baap ne di hai। doosra koi samajh na sake। woh to wrong kaam hi karte rehte hain। tumko abhi right kaam hi karna hai। achhe purooshaartha se right kaam hota hai। baap to har baat bahut achhi reeti samjhaate rehte hain। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) yeh ek-ek avinaashi gyaan ka ratna laakhon-karodon roopayon ka hai, inhen daan kar kadam-kadam par padmon ki kamaai jama karni hai। aap samaan banaakar oonch pad paana hai।

2) vikarmon se bachne ke liye dehi-abhimaani rahne ka purooshaartha karna hai। mansa mein kabhi bure sankalp aayen to unhein rokna hai। achhe sankalp chalaane hain। karmendriyon se kabhi koi ulta karma nahin karna hai।

vardaan:- roohaaniyat ke prabhaav dvaara pharishte pan ka make up karne vaale sarva ke snehi bhav

jo bachche sada baapdaada ke sang mein rehte hain - unhein sang ka rang aisa lagta hai jo har ek ke chehre par roohaaniyat ka prabhaav dikhaai deta hai। jis roohaaniyat mein rahne se pharishte pan ka make up svatah ho jaata hai। jaise make up karne ke baad koi kaisa bhi ho lekin badal jaata hai, make up karne se sundar lagta hai। yahaan bhi pharishte pan ke make up se chamakne lagenge aur yeh roohaani make up sarva ka snehi bana dega।

slogan:- brahmacharya, yog tatha divyagunon ki dhaarna hi vaastavik purooshaartha hai। rn

maateshvari ji ke anmol mahaavaakya

“karma-bandhan todne ka purushaartha''

bahut manushya prashn poochhte hain ki humein kya karna hai, kaise apna karma-bandhan toden? ab harek ki janmapatri ko to baap jaanta hai। bachche ka kaam hai ek baar apni dil se baap ko samarpit ho jaaye, apni javaabdaari unke haath mein de deve। phir vo harek ko dekh raay dega ki tumko kya karna hai, sahaara bhi practical mein lena hai, baaki aise nahin sirf sunte raho aur apni mat par chalte chalo। baap saakaar hai to bachche ko bhi sthool mein pita, guru, teacher ka sahaara lena hai। aise bhi nahin aagya mile aur paalan na kar sake to aur hi akalyaan ho jaaye। to pharmaan paalan karna bhi himmat chaahiye, chalaane vaala to ramazbaaz hai, vo jaanta hai iska kalyaan kismen hai, to woh aise direction dega ki kaise karma-bandhan todo। koi ko phir yeh khyaal mein nahin aana chaahiye ki phir bachchon aadi ka kya haal hoga? ismen koi gharbaar chhodne ki baat nahin hai, yeh to thode se bachchon ka is drama mein part tha todne ka, agar yeh part na hota to tumhaari jo ab seva ho rahi hai phir kaun kare? ab to chhodne ki baat heen nahin hai, magar paramatma ka ho jaana hai, daro nahin, himmat rakho। baaki jo darte hain vo na khud khushi mein rehte hain, na phir baap ke madadgaar bante hain। yahaan to unke saath poora madadgaar banna hai, jab jeete ji marenge tab hi madadgaar ban sakte hain। kahaan bhi atak padenge to phir vo madad dekar paar karega। to baba ke saath mansa-vaacha-karmana madadgaar hona hai, ismen jara bhi moh ki rag hogi to vo gira degi। to himmat rakho aage badho। kahaan himmat mein kamjor hote hain to moonjh padte hain isliye apni buddhi ko bilkul pavitra banaana hai, vikaar ka jara bhi ansh na ho, manzil koi door hai kya! magar chadhaai thodi tedhi-baanki hai, lekin samartha ka sahaara lenge to na dar hai, na thakaavat hai। achha। om shanti।

avyakt ishaare - satyata aur sabhyata roopi culture ko apnaao

aapka bol aur swaroop donon saath-saath hon - bol spashta bhi hon, usmein sneh bhi ho, namrata madhurta aur satyata bhi ho lekin swaroop ki namrata bhi ho, isi roop se baap ko pratyaksha kar sakenge। nirbhay ho lekin bol maryaada ke andar hon, phir aapke shabd kade nahin, meethe lagenge।