Murli du jour du samedi 20 décembre 2025

20-12-2025 praatahmurli om shanti "baapdaada"' madhuban

“meethe bachche - satguru aaya hai tumhaari oonchi takdeer banaane to tumhaari chalan bahut-bahut royal honi chaahiye''

prashn:- drama ka kaun sa plan bana hua hai isliye kisi ko dosh nahin de sakte hain?

uttar:- drama mein is puraani duniya ke vinaash ka plan bana hua hai, ismen koi ka dosh nahin hai। is samay iske vinaash ke liye prakriti ko jor se gussa aaya hai। chaaron or earthquake hogi, makaan girenge, flood aayegi, akaal padega isliye baap kehte hain bachche ab is puraani duniya se tum apna buddhiyog nikaal do, satguru ki shreemat par chalo। jeete ji deh ka bhaan chhod apne ko aatma samajh baap ko yaad karne ka purushaartha karte raho।

geet:- humein un raahon par chalna hai…

om shanti। kin raahon par chalna hai? guru ki raah par chalna hai। yeh kaun sa guru hai? uthte-baithte manushyon ke mukh se nikal jaata hai vaah guru। guru to anek hain। vaah guru kisko kahenge? kiski mahima gaayenge? satguru ek hi baap hai। bhakti maarga ke dher guru hain। koi kiski mahima karte, koi kiski mahima karte hain। bachchon ki buddhi mein hai sachcha satguru vo ek hai, jiski hi vaah-vaah maani jaati hai। sachcha satguru hai to zaroor jhoothe bhi honge। sach hota hai sangam par। bhakti maarga mein bhi sach ki mahima gaate hain। oonch te oonch baap hi sachcha hai, jo hi liberator, guide bhi banta hai। aajkal ke guru log to ganga snaan par va teerthon par le jaane ke guide bante hain। yeh satguru to aisa nahin hai। jisko sabhi yaad karte hain - he patit-paavan aao। patit-paavan, satguru ko hi kaha jaata hai। vahi paavan bana sakte hain। vo guru log paavan bana na saken। woh koi aise nahin kehte ki maamekam yaad karo। bhal geeta bhi padhte hain parantu arth ka pata bilkul nahin hai। agar samajhte satguru ek hai to apne ko guru nahin kahlaate। draamaanusaar bhakti maarga ki department hi alag hai jismen anek guru, anek bhakta hain। yeh to ek hi hai। phir yeh devi-devtaayen pahle number mein aate hain। abhi last mein hain। baap aakar inhon ko satayug ki baadshaahi dete hain। to aur sabko automatically vaapis jaana hai, isliye sarva ka sadgati daata ek kaha jaata hai। tum samajhte ho kalpa-kalpa sangam par hi devi-devta dharma ki sthaapna hoti hai। tum purushottam bante ho। baaki aur koi kaam nahin karte। gaaya bhi jaata hai gati-sadgati daata ek hai। yeh baap ki hi mahima hai। gati-sadgati sangam par hi milti hai। satayug mein to hai ek dharma। yeh bhi samajh ki baat hai na। parantu yeh buddhi deve kaun? tum samajhte ho baap hi aakar yukti bataate hain। shreemat dete hain kisko? aatmaon ko। woh baap bhi hai, satguru bhi hai, teacher bhi hai। gyaan sikhlaate hain na। baaki sab guru bhakti hi sikhlaate hain। baap ke gyaan se tumhaari sadgati hoti hai। phir is puraani duniya se chale jaate hain। tumhaara yeh behad ka sannyaas bhi hai। baap ne samjhaaya hai abhi 84 janmon ka chakra tumhaara poora hua hai। ab yeh duniya khatma honi hai। jaise koi beemaar serious hota hai to kahenge ab yeh to jaane vaala hai, usko yaad kya karenge। shareer khatma ho jaayega। baaki aatma to jaakar doosra shareer leti hai। ummeed toot jaati hai। bangaal mein to jab dekhte hain ummeed nahin hai to ganga par jaakar dubote hain ki praan nikal jaayen। moortiyon ki bhi pooja kar phir jaakar kehte hain doob ja, doob ja... abhi tum jaante ho yeh saari puraani duniya doob jaani hai। floods hongi, aag lagengi, bhookh mein manushya marenge। yeh sab haalten aani hain। earthquake mein makaan aadi gir padenge। is samay prakriti ko gussa aata hai to sabko khalaas kar deti hai। yeh sab haalten saari duniya ke liye aani hain। anek prakaar ka maut aa jaata hai। bombs mein bhi zahar bhara hua hai। thodi baans aane se behosh ho jaate hain। yeh tum bachche jaante ho ki kya-kya hone ka hai। yeh sab kaun karaate hain? baap to nahin karaate hain। yeh drama mein noondh hai। koi par dosh nahin denge। drama ka plan bana hua hai। puraani duniya so phir nai zaroor hogi। natural calamities aayengi। vinaash hone ka hi hai। is puraani duniya se buddhi ka yog hata dena, isko behad ka sannyaas kaha jaata hai।

ab tum kahenge vaah satguru vaah! jo hamko yeh raasta bataaya। bachchon ko bhi samjhaate hain - aisi chalan nahin chalo jo unki ninda ho। tum yahaan jeete ji marte ho। deh ko chhod apne ko aatma samajhte ho। deh se nyaari aatma ban baap ko yaad karna hai। yeh to bahut achha kehte hain vaah satguru vaah! paarlaukik satguru ki hi vaah-vaah hoti hai। laukik guru to dher hain। satguru to ek hi hai sachcha-sachcha, jiska phir bhakti maarga mein bhi naam chala aata hai। saari srishti ka baap to ek hi hai। nai srishti ki sthaapna kaise hoti hai, yeh bhi kisko pata nahin hai। shaastron mein to dikhaate hain pralay ho gai phir peepal ke patte par shreekrishna aaya। abhi tum samajhte ho peepal ke patte par kaise aayega। shreekrishna ki mahima karne se kuchh phaayda nahin hota। tumhein ab chadhti kala mein le jaane ke liye satguru mila hai। kehte hain na chadhti kala tere bhaane sarva ka bhala। to roohaani baap aatmaon ko baith samjhaate hain। 84 janma bhi aatma ne liye hain। har ek janma mein naam-roop doosra ho jaata hai। aise nahin kahenge phalaane ne 84 janma liye hain। nahin, aatma ne 84 janma liya। shareer to badalte jaate hain। tumhaari buddhi mein yeh sab baaten hain। saari knowledge buddhi mein rahni chaahiye। koi bhi aaye to unko samjhaayen। aadi mein tha hi devi-devtaaon ka raajya, phir madhya mein raavan raajya hua। seedhi utarte rahe। satayug mein kahenge satopradhaan phir sato, rajo, tamo mein utarte hain। chakra phirta rehta hai। koi-koi kehte hain baba ko kya padi thi jo 84 ke chakra mein hamko laaya। lekin yeh to srishti chakra anaadi bana hua hai, inke aadi-madhya-ant ko jaanna hai। manushya hokar agar nahin jaante to woh naastik hain। jaanne se tumko kitna oonch pad milta hai। yeh padhaai kitni oonch hai। bada imtahaan paas karne vaale ki dil mein khushi hoti hai na, ham bade te bada pad paayenge। tum jaante ho yeh lakshmi-naaraayan apne poorva janma mein seekh-kar phir manushya se devta banen।

is padhaai se yeh raajdhaani sthaapan ho rahi hai। padhaai se kitna oonch pad milta hai। wonder hai na। itne bade-bade mandir jo banaate hain athva jo bade-bade vidvaan aadi hain unse poochho satayug aadi mein inhonne janma kaise liya to bata nahin sakenge। tum jaante ho yeh to geeta vaala hi raajayog hai। geeta padhte aaye hain parantu usse phaayda kuchh nahin hai। ab tumko baap baith sunaate hain। tum kehte ho baba ham aapse 5 hazaar varsha pahle bhi mile the। kyon mile the? svarga ka varsa lene। lakshmi-naaraayan banne ke liye। koi bhi chhote, bade, boodhe aadi aate hain, yeh zaroor seekhkar aate hain। em object hi yeh hai। satya naaraayan ki sachchi katha hai na। yeh bhi tum samajhte ho, raajaai sthaapan ho rahi hai। jo achhi reeti samajh lete hain unko aantarik khushi rehti hai। baba poochhenge himmat hai na raajaai lene ki? kehte hain baba kyon nahin, ham padhte hi hain nar se naaraayan banne। itna samay ham apne ko deh samajh baithe the ab baap ne hamko righteous raasta bataaya hai। dehi-abhimaani banne mein mehnat lagti hai। ghadi-ghadi apne naam-roop mein phans padte hain। baap kehte hain is naam-roop se nyaara hona hai। ab aatma bhi naam to hai na। baap hai supreme parampita, laukik baap ko parampita nahin kahenge। param akshar ek hi baap ko diya hai। vaah guru bhi inko kehte hain। tum sikkha logon ko bhi samjha sakte ho। granth saaheb mein to poora varnan hai। aur koi shaastra mein itna varnan nahin hai jitna granth mein, jap saaheb sukhamni mein hai। yeh bade akshar hi do hain। baap kehte hain - saaheb ko yaad karo to tumko 21 janma liye sukh milega। ismen moonjhane ki to baat hi nahin। baap bahut sahaj karke samjhaate hain। kitne hindu transfer ho jaakar sikkha bane hain।

tum manushyon ko raasta bataane ke liye kitne chitra aadi banaate ho। kitna sahaj samjha sakte ho। tum aatma ho, phir bhinna-bhinna dharmon mein aaye ho। yeh variety dharmon ka jhaad hai aur koi ko yeh pata nahin hai ki Christ kaise aata hai। baap ne samjhaaya tha - nai aatma ko karmabhog nahin ho sakta। Christ ki aatma ne koi vikarma thode hi kiya jo saja mile। woh to satopradhaan aatma aati hai, jismen aakar pravesh karti hai unko cross aadi par chadhaate hain, Christ ko nahin। woh to jaakar doosra janma le bada pad paati hai। pope ke bhi chitra hain।

is samay yeh saari duniya bilkul hi worth not A penny hai। tum bhi the। ab tum worth pound ban rahe ho। aise nahin ki unhon ke vaaris pichhaadi mein khaayenge, kuchh bhi nahin। tum apne haath bharpoor kar jaate ho, baaki sab haath khaali jaayenge। tum bharpoor hone ke liye hi padhte ho। yeh bhi jaante ho jo kalpa pahle aaye hain vahi aayenge। thoda bhi sunenge to aa jaayenge। sab ikatthe to dekh bhi nahin sakenge। tum dher praja banaate ho, baba sabko thode hi dekh sakte hain। thoda bahut sunne se bhi praja bante jaate hain। tum ginti bhi nahin kar sakenge।

tum bachche service par ho, baba bhi service par hai। baba service bigar rah nahin sakte। roz subah ko service karne aate hain। satsang aadi bhi subah ko karte hain। us samay sabko phursat hoti hai। baba to kehte hain tum bachchon ko ghar se bahut savere bhi nahin aana hai aur raat ko bhi nahin aana chaahiye kyonki din-pratidin duniya bahut kharaab hoti jaati hai isliye gali-gali mein centre aisa nazdeek hona chaahiye, jo ghar se nikle centre par aaye, sahaj ho jaae। tumhaari vriddhi ho jaayegi tab raajdhaani sthaapan hogi। baap samjhaate to bahut sahaj hain। yeh raajayog dvaara sthaapna kar rahe hain। baaki yeh saari duniya hogi hi nahin। praja to kitni dher banti hai। maala bhi banni hai। mukhya to jo bahuton ki service kar aapasmaan banaate hain, vahi maala ke daane bante hain। log maala pherte hain parantu arth thode hi samajhte hain। bahut guru log maala pherne ke liye dete hain ki buddhi ismen lagi rahe। kaam mahaashatru hai, din-pratidin bahut kada hota jaayega। tamopradhaan bante jaate hain। yeh duniya bahut gandi hai। baba ko bahut kehte hain ham to bahut tang ho gaye hain, jaldi satayug mein le chalo। baap kehte hain dheeraj dharo, sthaapna honi hi hai - yeh khaatiri hai। yeh khaatiri hi tumko le jaayegi। bachchon ko yeh bhi bataaya hai tum aatmaayen paramdham se aai ho phir vahaan jaana hai, phir aayenge part bajaane। to param-dhaam ko yaad karna pade। baap bhi kehte hain maamekam yaad karo to vikarma vinaash honge। yahi paigaam sabhi ko dena hai aur koi paigambar messenger aadi hain nahin। ve to muktidhaam se neeche le aate hain। phir unko seedhi neeche utarna hai। jab poore tamopradhaan ban jaate hain tab phir baap aakar sabko satopradhaan banaate hain। tumhaare kaaran sabko vaapis jaana padta hai kyonki tumko nai duniya chaahiye na - yeh bhi drama bana hua hai। bachchon ko bahut nasha rehna chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is deh ke naam-roop se nyaara hokar dehi-abhimaani banna hai। aisi chalan nahin chalni hai jo satguru ki ninda ho।

2) maala ka daana banne ke liye bahuton ko aap samaan banaane ki seva karni hai। aantarik khushi mein rehna hai ki ham raajaai lene ke liye padh rahe hain। yeh padhaai hai hi nar se naaraayan banne ki।

vardaan:- nirantar yaad dvaara avinaashi kamaai jama karne vaale sarva khajaanon ke adhikaari bhav

nirantar yaad dvaara har kadam mein kamaai jama karte raho to sukh, shanti, aanand, prem...in sab khajaanon ke adhikaar ka anubhav karte rahenge। koi kashta, kashta anubhav nahin honge। sangam par braahmanon ko koi kashta ho nahin sakta। yadi koi kashta aata bhi hai to baap ki yaad dilaane ke liye, jaise gulaab ke pushpa ke saath kaanta unke bachaav ka saadhan hota hai। vaise yeh takleephen aur hi baap ki yaad dilaane ke nimitta banti hain।

slogan:- sneh roop ka anubhav to sunaate ho ab shakti roop ka anubhav sunaao।

avyakt ishaare - ab sampanna va karmaateet banne ki dhun lagaao

jaise saakaar mein dekha last karmaateet stage ka part sirf blainsing dene ka raha, belensa ki bhi visheshta aur blessing ki bhi kamaal rahi। aise follow father। sahaj aur shaktishaali seva yahi hai। ab vishesh aatmaon ka part hai blainsing dene ka। chaahe naynon se do, chaahe mastakamni dvaara।