Murli du jour du samedi 3 janvier 2026

03-01-2026 praatahmurli om shanti "baapdaada"' madhuban

“meethe bachche - kadam-kadam par shreemat par chalte raho, yeh brahma ki mat hai ya shivbaaba ki, ismen moonjho nahin''

prashn:- achhi brain vaale bachche kaun si guhya baat sahaj hi samajh sakte hain?

uttar:- brahma baba samjha rahe hain ya shivbaaba - yeh baat achhi brain vaale sahaj hi samajh lenge। kai to ismen hi moonjh jaate hain। baba kehte - bachche, baapdaada donon ikatthe hain। tum moonjho nahin। shreemat samajhkar chalte raho। brahma ki mat ka responsible bhi shivbaaba hai।

om shanti। roohaani baap bachchon ko samjha rahe hain, tum samajhte ho ham brahman hi roohaani baap ko pahchaante hain। duniya mein koi bhi manushyamaatra roohaani baap, jisko god father va parampita paramatma kehte hain, unko jaante nahin hain। jab woh roohaani baap aaye tab hi roohaani bachchon ko pahchaan de। yeh knowledge na srishti ke aadi mein rehti, na srishti ke ant mein rehti। abhi tumko knowledge mili hai, yeh hai srishti ke ant aur aadi ka sangamayug। is sangamayug ko bhi nahin jaante to baap ko kaise jaan sakenge। kehte hain - he patit-paavan aao, aakar paavan banaao, parantu yeh pata nahin hai ki patit-paavan kaun hai aur woh kab aayenge। baap kehte hain - main jo hoon jaisa hoon, mujhe koi bhi nahin jaante। jab main aakar pahchaan doon tab mujhe jaanen। main apna aur srishti ke aadi-madhya-ant ka parichay sangamayug par ek hi baar aakar deta hoon। kalpa baad phir se aata hoon। tumko jo samjhaata hoon woh phir praayah lop ho jaata hai। satayug se lekar kaliyug ant tak koi bhi manushya maatra mujh parampita paramatma ko nahin jaante hain। na brahma-vishnu-shankar ko jaante। mujhe manushya hi pukaarte hain। brahma-vishnu-shankar thode hi pukaarte hain। manushya duhkhi hote hain tab pukaarte hain। sookshm vatan ki to baat hi nahin। roohaani baap aakar apne roohaani bachchon arthaat roohon ko baith samjhaate hain। achha, roohaani baap ka naam kya hai? baba jisko kaha jaata hai, zaroor kuchh naam hona chaahiye। barobar naam ek hi gaate hain shiv। yeh naameegraami hai parantu manushyon ne anek naam rakhe hain। bhakti maarga mein apni hi buddhi se yeh ling roop bana diya hai। naam phir bhi shiv hai। baap kehte hain main ek baar aata hoon। aakar mukti-jeevanmukti ka varsa deta hoon। manushya bhal naam lete hain - muktidhaam, nirvaandhaam, parantu jaante kuchh nahin hain। na baap ko jaante hain, na devtaaon ko। yeh kisko bhi pata nahin hai baap bhaarat mein aakar kaise raajdhaani sthaapan karte hain। shaastron mein bhi aisi koi baat nahin hai parampita paramatma kaise aakar aadi sanaatan devi-devta dharma ki sthaapna karte hain। aise nahin satayug mein devtaaon ko gyaan tha, jo gum ho gaya। nahin, agar devtaaon mein bhi yeh gyaan hota to chalta aata। islaami, bauddhi aadi jo hain unhon ka gyaan chalta aata hai। sab jaante hain - yeh gyaan praayahlop ho jaata hai। main jab aata hoon to jo aatmaayen patit ban raajya gavaan baithi hain unhon ko aakar phir paavan banaata hoon। bhaarat mein raajya tha phir ganvaaya kaise hai, woh bhi kisko pata nahin isliye baap kehte hain bachchon ki kitni tuchchha buddhi ban gai hai। main bachchon ko yeh gyaan de praalabdha deta hoon phir sabhi bhool jaate hain। kaise baap aaya, kaise bachchon ko shiksha di, woh sab bhool jaate hain। yeh bhi drama mein noondh hai। bachchon ko vichaar saagar manthan karne ki badi buddhi chaahiye।

baap kehte hain yeh jo shaastra aadi tum padhte aaye ho yeh satayug-treta mein nahin padhte the। vahaan the hi nahin। tum yeh knowledge bhool jaate ho phir geeta aadi shaastra kahaan se aaya? jinhonne geeta sunkar yeh pad paaya hai vahi nahin jaante to aur phir kaise jaan sakte। devtaayen bhi jaan nahin sakte। ham manushya se devta kaise banen। woh purushaartha ka part hi banda ho gaya। tumhaari praalabdha shuru ho gai। vahaan yeh knowledge ho kaise sakti। baap samjhaate hain yeh knowledge tumko phir se mil rahi hai, kalpa pahle misal। tumko raajayog sikhlaae praalabdha di jaati hai। phir vahaan to durgati hai nahin। to gyaan ki baat bhi nahin uth sakti। gyaan hai hi sadgati paane ke liye। woh dene vaala ek baap hai। sadgati aur durgati ka akshar yahaan se nikalta hai। sadgati ko bhaaratvaasi hi paate hain। samajhte hain heavenly god father ne heaven racha tha। kab racha? yeh kuchh bhi pata nahin। shaastron mein laakhon varsha likh diya hai। baap kehte hain - bachchon, tumko phir se knowledge deta hoon phir yeh knowledge khalaas ho jaati hai to bhakti shuru hoti hai। aadhaakalpa hai gyaan, aadhaakalpa hai bhakti। yeh bhi koi nahin jaante hain। satayug ki aayu hi laakhon varsha de di hai। to maaloom kaise pade। 5 hazaar varsha ki baat bhi bhool gaye hain। to laakhon varsha ki baat kaise jaan saken। kuchh bhi samajhte nahin। baap kitna sahaj samjhaate hain। kalpa ki aayu 5 hazaar varsha hai। yug hi 4 hain। chaaron ka equal time 1250 varsha hai। braahmanon ka yeh mid-ged yug hai। bahut chhota hai un 4 yugon se। to baap bhinna-bhinna reeti se, nai-nai points sahaj reeti bachchon ko samjhaate rehte hain। dhaarna tumko karni hai। mehnat tumko karni hai। drama anusaar jo samjhaata aaya hoon woh part chala aata hai। jo bataane ka tha vahi aaj bata raha hoon। emerge hota rehta hai। tum sunte jaate ho। tumko hi dhaaran karna aur karaana hai। mujhe to dhaaran nahin karna hai। tumko sunaata hoon, dhaarna karaata hoon। hamaari aatma mein part hai patiton ko paavan banaane ka। jo kalpa pahle samjhaaya tha vahi nikalta rehta hai। main pahle se jaanta nahin tha ki kya sunaaoonga। bhal inki soul vichaar saagar manthan karti ho। yeh vichaar saagar manthan kar sunaate hain ya baba sunaate hain - yeh badi guhya baaten hain, ismen brain badi achhi chaahiye। jo service mein tatpar honge unka hi vichaar saagar manthan chalta hoga।

vaastav mein kanyaayen bandhanmukta hoti hain। woh is roohaani padhaai mein lag jaaen, bandhan to koi hai nahin। kumaariyaan achha utha sakti hain, unko hai hi padhna aur padhaana। unko kamaai karne ki darkaar nahin hai। kumaari agar achhi reeti se yeh knowledge samajh jaae to sabse achhi hai। sensible hogi to bas is roohaani kamaai mein lag jaayegi। kai to shauk se laukik padhaai padhti rehti hain। samjhaaya jaata hai - isse koi phaayda nahin। tum yeh roohaani padhaai padhkar service mein lag jaao। woh padhaai to koi kaam ki nahin hai। padhkar chale jaate hain grihastha vyavhaar mein। grihasthi maataayen ban jaati hain। kanyaaon ko to is knowledge mein lag jaana chaahiye। kadam-kadam shreemat par chal dhaarna mein lag jaana hai। mama shuru se aai aur phir is padhaai mein lag gai, kitni kumaariyaan to gum ho gai। kumaariyon ko achha chance hai। shreemat par chale to bahut first class ho jaaen। yeh shreemat hai va brahma ki mat hai - ismen hi moonjh padte hain। phir bhi yeh baba ka rath hai na। inse kuchh bhool ho jaae, tum shreemat par chalte rahenge to woh aapehi theek kar denge। shreemat milegi bhi in dvaara। sadaiv samajhna chaahiye shreemat milti hai phir kuchh bhi ho - responsible khud hai। inse kuchh ho jaata hai, baba kehte hain main responsible hoon। drama mein yeh raaz noondha hua hai। inko bhi sudhaar sakte hain। phir bhi baap hai na। baapdaada donon ikatthe hain to moonjh padte hain। pata nahin shivbaaba kehte hain va brahma kehte hain। agar samjhen shivbaaba hi mat dete hain to kabhi bhi hile nahin। shivbaaba jo samjhaate hain so right hi hai। tum kehte ho baba aap hi hamaare baap-teacher-guru ho। to shreemat par chalna chaahiye na। jo kahe us par chalo। hamesha samjho shivbaaba kehte hain - woh hai kalyaankaari, inki responsibility bhi un par hai। unka rath hai na। moonjhate kyon ho, pata nahin yeh brahma ki raay hai ya shiv ki? tum kyon nahin samajhte ho shivbaaba hi samjhaate hain। shreemat jo kahe so karte raho। doosre ki mat par tum aate hi kyon ho। shreemat par chalne se kabhi jhutka nahin aayega। parantu chal nahin sakte, moonjh padte hain। baba kehte hain tum shreemat par nishchay rakho to main responsible hoon। tum nishchay hi nahin rakhte ho to phir main bhi responsible nahin। hamesha samjho shreemat par chalna hi hai। woh jo kahe, chaahe pyaar karo, chaahe maaro… yeh unke liye gaayan hai। ismen laat aadi maarne ki to baat nahin hai। parantu kisko nishchay baithna hi bada mushkil hai। nishchay poora baith jaae to karmaateet avastha ho jaae। lekin woh avastha aane mein bhi time chaahiye। woh hogi ant mein, ismen nishchay bada adol chaahiye। shivbaaba se to kabhi koi bhool ho na sake, inse ho sakti hai। yeh donon hain ikatthe। parantu tumko nishchay bhi rakhna hai - shivbaaba samjhaate hain, us par hamko chalna pade। to baba ki shreemat samajhkar chalte chalo। to ulta bhi sulta ho jaayega। kahaan misunderstanding bhi ho jaati hai। shivbaaba aur brahma baba ki murli ko bhi bada achhi reeti samajhna hai। baba ne kaha va isne kaha। aise nahin ki brahma bolte hi nahin hai। parantu baba ne samjhaaya hai - achha, samjho yeh brahma kuchh nahin jaante, shivbaaba hi sab kuchh sunaate hain। shivbaaba ke rath ko snaan karaata hoon, shivbaaba ke bhandaare ki service karta hoon - yeh yaad rahe to bhi bahut achha hai। shivbaaba ki yaad mein rehte kuchh bhi kare to bahuton se teekhe ja sakte hain। mukhya baat hai hi shivbaaba ke yaad ki। alpha aur be। baaki hai detail।

baap jo samjhaate hain us par attention dena hai। baap hi patit-paavan, gyaan ka saagar hai na। vahi patit shoodron ko aakar brahman banaate hain। braahmanon ko hi paavan banaate hain, shoodron ko paavan nahin banaate, yeh sab baaten koi bhaagvat aadi mein nahin hain। thode-thode akshar hain। manushyon ko to yeh bhi pata nahin hai ki raadhe-krishna hi lakshmi-naaraayan hain। moonjh jaate hain। devtaayen to hain hi sooryavanshi-chandravanshi। lakshmi-naaraayan ki dynasty, seeta-raam ki dynasty। baap kehte hain bhaaratvaasi sweet children yaad karo, laakhon varsha ki to baat hi nahin hai। kal ki baat hai। tumko raajya diya tha। itna akeechaar (athaah) dhan daulat diya। baap ne saare vishwa ka tumko maalik banaaya, aur koi khanda the nahin, phir tumko kya hua! vidvaan, aachaarya, pandit koi bhi in baaton ko nahin jaante। baap hi kehte hain - are bhaaratvaasiyon, tumko raajya-bhaagya diya tha na। tum bhi kahenge shivbaaba kehte hain - itna tumko dhan diya phir tumne kahaan ganva diya! baap ka varsa kitna jabardasta hai। baap hi poochhte hain na va baap chala jaata hai to mitra-sambandhi poochhte hain। baap ne tumko itne paise diye sab kahaan ganvaayen! yeh to behad ka baap hai। baap ne kaudi se heere jaisa banaaya। itna raajya diya phir paisa kahaan gaya? tum kya javaab denge? kisko bhi samajh mein nahin aata hai। tum samajhte ho baba poochhte theek hain - itne kangaal kaise bane ho! pahle sab kuchh satopradhaan tha phir kala kam hoti gai to sab kuchh kam hota gaya। satayug mein to satopradhaan the, lakshmi-naaraayan ka raajya tha। raadhe-krishna se lakshmi-naaraayan ka naam jaasti hai। unhon ki koi glaani nahin likhi hai aur sabke liye ninda likhi hai। lakshmi-naaraayan ke raajya mein koi daitya aadi nahin bataate hain। to yeh baaten samajhne ki hain। baba gyaan dhan se jholi bhar rahe hain। baap kehte hain bachche is maaya se khabardaar raho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sensible ban sachchi seva mein lag jaana hai। javaabdaar ek baap hai isliye shreemat mein sanshay nahin uthaana hai। nishchay mein adol rehna hai।

2) vichaar saagar manthan kar baap ki har samjhaani par attention dena hai। svayan gyaan ko dhaaran kar doosron ko sunaana hai।

vardaan:- apne anaadi-aadi real roop ko realise karne vaale sampoorn pavitra bhav

aatma ke anaadi aur aadi donon kaal ka original svarup pavitra hai। apvitrata artificial, shoodron ki den hai। shoodron ki cheez brahman use nahin kar sakte isliye sirf yahi sankalp karo ki anaadi-aadi real roop mein main pavitra aatma hoon, kisi ko bhi dekho to uske real roop ko dekho, real ko realise karo, to sampoorn pavitra ban first class va air-condition ki ticket ke adhikaari ban jaayenge।

slogan:- parmaatma duaaon se apni jholi bharpoor karo to maaya sameep nahin aa sakti।

avyakt ishaare - is avyakti maas mein bandhanmukta rah jeevanmukta sthiti ka anubhav karo

majority bachchon ne abhi lohe ki janjeeren to kaat li hain lekin bahut maheen aur royal dhaage abhi bhi bandhe hue hain। kai personality feel karne vaale hain, svayan mein achchhaaeeyaan hain nahin lekin mahsoos aise hoti hain ki ham bahut achhe hain। ham bahut aage badh rahe hain। yeh jeevan-bandha ke dhaage majority mein hain, baapdaada ab in dhaagon se bhi mukta, jeevanmukta dekhna chaahte hain।