Murli du jour du mercredi 7 janvier 2026

07-01-2026 praatahmurli om shanti "baapdaada"' madhuban

“meethe bachche - kabhi bhi apne haath mein law nahin uthaao, yadi kisi ki bhool ho to baap ko report karo, baap saavdhaani denge''

prashn:- baap ne kaun sa contract (theka) uthaaya hai?

uttar:- bachchon ke avgun nikaalne ka contract ek baap ne hi uthaaya hai। bachchon ki khaamiyaan baap sunte hain to woh nikaalne ke liye pyaar se samjhaani dete hain। agar tum bachchon ko kisi ki khaami dikhaai deti hai to bhi tum apne haath mein law nahin uthaao। law haath mein lena yeh bhi bhool hai।

om shanti। meethe-meethe roohaani bachche aate hain baap se refresh hone kyonki bachche jaante hain - behad ke baap se behad vishwa ki baadshaahi leni hai। yeh kabhi bhoolna nahin chaahiye parantu bhool jaate hain। maaya bhula deti hai। agar na bhulaave to bahut khushi rahe। baap samjhaate hain - bachchon, is badge ko ghadi-ghadi dekhte raho। chitron ko bhi dekhte raho। ghoomte-phirte badge ko dekhte raho to pata pade, baap dvaara baap ki yaad se ham yeh ban rahe hain। daiveegun bhi dhaaran karne hain। yahi samay hai knowledge milne ka। baap kehte hain meethe-meethe bachchon… raat-din meethe-meethe kehte rehte hain। bachche nahin kah sakte - meethe-meethe baba। kehna to donon ko chaahiye। donon hi meethe hain na। behad ke baapdaada। parantu kai deh-abhimaani sirf baba ko meetha-meetha kehte hain। kai bachche to gusse mein aakar phir kabhi baapdaada ko bhi kuchh kah dete। kabhi baap ko kaha to daada ko bhi kaha, baat ek hi ho jaati। kabhi braahmani par, kabhi aapas mein naaraaz ho padte hain। to behad ka baap baith bachchon ko shiksha dete hain। gaanv-gaanv mein bachche to bahut hain, sabko likhte rehte hain। tumhaari report aati hai, tum gussa karte ho। behad ka baap isko deh-abhimaan kahenge। baap sabko kehte hain - bachchon, dehi-abhimaani bhav। sab bachche neeche-oopar hote rehte hain, ismen bhi maaya jisko samartha pahalvaan dekhti hai, unse hi ladaai karti hai। mahaaveer, hanumaan ke liye dikhaaya hai ki unko bhi hilaane ki koshish ki। is samay hi sabki pareeksha leti hai। maaya se haar-jeet sabki hoti rehti hai। ladaai mein smriti-vismriti sab hota hai। jo jitna smriti mein rehte hain, nirantar baap ko yaad karne ki koshish karte hain woh achha pad pa sakte hain। baap aaye hain bachchon ko padhaane, so to padhaate rehte hain। shreemat par chalte rehna hai। shreemat par chalne se hi shreshtha banenge, ismen koi se bigadne ki baat hi nahin। bigadna maana krodh karna। bhool aadi karte hain to baba ke paas report karni hai। khud kisko nahin kehna chaahiye phir jaise ki law haath mein le liya। government law haath mein uthaane nahin deti। koi ne ghoonsa maara to unko ghoonsa nahin maarenge। report karenge phir unka case hoga। yahaan bhi bachchon ko kabhi saamne kuchh nahin kehna chaahiye, baba ko bolo। sabko saavdhaani dene vaala ek baba hai। baba yukti bahut meethi bataayenge। meethepan se shiksha denge। deh-abhimaani banne se apna hi pad kam kar dete hain। ghaata kyon daalna chaahiye। jitna ho sake baba ko bahut pyaar se yaad karte raho। behad ke baap ko bahut pyaar se yaad karo, jo baap vishwa ki baadshaahi dete hain। sirf daiveegun dhaaran karne hain। kiski bhi ninda nahin karni hai। devtaayen kiski ninda karte hain kya? kai bachche to ninda karne ke bigar rehte nahin। tum baap ko bolo, to baap bahut pyaar se samjhaayenge! nahin to time vesta hota hai। ninda karne se to baap ko yaad karo to bahut-bahut faayda hoga। koi se bhi vaad-vivaad na karna bahut achha hai।

tum bachche dil mein samajhte ho - ham nai duniya ki baadshaahi sthaapan kar rahe hain। andar mein kitna fakhur rehna chaahiye। mukhya hai hi yaad aur daiveegun। bachche chakra ko yaad karte hi hain, woh to sahaj yaad padega। 84 ka chakra hai na। tumko srishti ke aadi-madhya-ant, duration ka pata hai, phir auron ko bhi bahut pyaar se parichay dena hai। behad ka baap hamko vishwa ka maalik bana rahe hain। raajayog sikhla rahe hain। vinaash bhi saamne khada hai। hai bhi sangamayug, jabki nai duniya sthaapan hoti hai aur puraani duniya khalaas hoti hai। baap bachchon ko saavdhaan karte rehte hain - simar-simar sukh paao, kalah klesh mite sab tan ke...। aadhaakalpa ke liye mit jaayenge। baap sukhdhaam sthaapan karte hain। maaya raavan phir duhkhadhaam sthaapan karte hain। yeh bhi tum bachche jaante ho - nambarvaar purushaartha anusaar। baap ka bachchon mein kitna lav hota hai। shuru se baap ka lav hai। baap ko maaloom hai, main jaanta hoon - bachche jo kaam chita par kaale ho gaye hain, unhon ko gora banaane jaata hoon। baap to knowledgeful hai, bachche dheere-dheere knowledge lete hain। maaya phir bhula deti hai। khushi aane nahin deti। bachchon ko to din-pratidin khushi ka paara chadha rehna chaahiye। satayug mein paara chadha hua tha। ab phir chadhaana hai yaad ki yaatra se। woh dheere-dheere chadhega। haar-jeet hote-hote phir nambarvaar purushaartha anusaar kalpa pahle misal apna pad pa lenge। baaki time to vahi lagta hai jo kalpa-kalpa lagta hai। paas bhi vahi honge jo kalpa-kalpa hote honge। baapdaada saakshi ho bachchon ki avastha ko dekhte hain aur samjhaani dete rehte hain। baahar centres aadi par rehte hain to itna refresh nahin rehte hain। centre se hokar phir baahar ke vaayumandal mein chale jaate hain, isliye yahaan bachche aate hi hain refresh hone ke liye। baap likhte bhi hain - parivaar sahit sabko yaad-pyaar dena। woh hai had ka baap, yeh hai behad ka baap। baap aur daada donon ka bahut lav hai kyonki kalpa-kalpa lovely service karte hain aur bahut pyaar se karte hain। andar taras padta hai। nahin padhte hain ya chalan achhi nahin chalte hain, shreemat par nahin chalte hain to taras padta hai - yeh kam pad paayenge। aur baba kya kar sakte hain! vahaan aur yahaan rahne mein bahut farka hai। parantu sab to yahaan nahin rah sakte hain। bachche vriddhi ko paate rehte hain। prabandha bhi karte rehte hain। yeh bhi baba ne samjhaaya hai - yeh aabu sabse bhaari teertha hai। baap kehte hain main yahaan hi aakar saari srishti ko, 5 tatvon sahit sabko pavitra banaata hoon। kitni seva hai। ek hi baap hai jo aakar sarva ki sadgati karte hain। so bhi anek baar kiya hai। yeh jaante hue bhi phir bhool jaate hain - tab baap kehte hain maaya badi jabardasta hai। aadhaakalpa inka raajya chalta hai। maaya haraati hai phir baap khada karte hain। bahut likhte hain baba ham gir gaya। achha phir nahin girna। phir bhi gir padte hain। girte hain to phir chadhna hi chhod dete hain। kitni chot lag jaati hai। sabko lagti hai। saara madaar hai padhaai par। padhaai mein yog hai hi। phalaana mujhe yeh padha rahe hain। ab tum samajhte ho baap hamko padha rahe hain। yahaan tum bahut refresh hote ho। gaayan bhi hai ninda hamaari jo kare mitra hamaara so। bhagvaanuvaach - meri glaani bahut karte hain। main aakar mitra banta hoon। kitni ninda karte hain, main to samajhta hoon sab hamaare bachche hain। kitni meri preet hai inke saath। ninda karna achha nahin hai। is samay to bahut khabardaari rakhni chaahiye। bhinna-bhinna avasthaaon vaale bachche hain, sab purushaartha karte rehte hain। koi bhool bhi hoti hai to purushaartha kar abhul banna hai। maaya sabse bhoolen karaati hai। boxing hain na। koi samay aisi chot lagti hai jo gira deti hai। baap saavdhaani dete hain - bachche, aise haarne se ki kamaai chat ho jaayegi। 5 manzil se gir padte hain। kehte hain baba aisi bhool phir kabhi nahin hogi। ab kshama karo। baba kshama kya karenge। baap to kehte hain purushaartha karo। baba jaante hain maaya bahut prabal hai। bahuton ko haraayegi। teacher ka kaam hai bhool par shiksha de abhul banaana। aise nahin ki kisi ne bhool ki to hamesha unki woh hoti rahegi। nahin, achhe gun gaaye jaate hain। bhool nahin gaai jaati hai। avinaashi vaidya to ek hi baap hai। woh davaai karenge। tum bachche kyon apne haath mein law uthaate ho। jismen krodh ka ansh hoga woh glaani hi karte rahenge। sudhaarna baap ka kaam hai, tum sudhaarne vaale thode hi ho। koi mein krodh ka bhoot hai। khud baith kiski glaani karte hain to goya apne haath mein law uthaaya, isse woh sudhrenge nahin। aur hi anban ho jaayegi। loonpaani ho jaayenge। sab bachchon ke liye ek baap baitha hai। law apne haath mein uthaae kiski glaani karna, yeh bhaari bhool hai। koi na koi kharaabi to sabmen hoti hai। sab sampoorn to nahin bane hain। koi mein kya avgun hai, koi mein kya hai। woh sab nikaalne ka contract baap ne uthaaya hai। yeh tumhaara kaam nahin। bachchon ki khaamiyaan baap sunte hain to woh nikaalne liye pyaar se samjhaani di jaati hai। abhi tak sampoorn koi bana nahin hai। sab shreemat par sudhar rahe hain। sampoorn to ant mein banna hai। is samay sab purushaarthi hain। baba sadaiv adol rehte hain। bachchon ko pyaar se shiksha dete rehte hain। shiksha dena baap ka kaam hai। phir us par chale na chalen, woh hui uski takdeer। kitna pad kam ho padta hai। shreemat par na chalne kaaran kuchh bhi aisa karne se pad bhrashta ho jaayega। dil andar khaayega, hamne yeh bhool ki hai। hamko bahut mehnat karni padegi। kiska bhi avgun hai to woh baap ko sunaana hai। dar-dar sunaana yeh deh-abhimaan hai। baap ko yaad nahin karte hain। avyabhichaari banna chaahiye na। ek ko sunaayenge to woh jhat sudhar jaayenge। sudhaarne vaala ek hi baap hai। baaki to sab hain ansudhre। parantu maaya aisi hai - maatha phira deti hai। baap ek taraph munh karte hain, maaya phir ghumaakar apne taraph kar leti hai। baap aaye hi hain sudhaar kar manushya se devta banaane। baaki dar-dar kiska naam badnaam karna yeh bekaayde hai। tum shivbaaba ko yaad karo। judgement bhi unke paas hoti hai na। karmon ka phal bhi baap dete hain। bhal drama mein hai parantu kiska naam to liya jaata hai na। baap to bachchon ko sab baaten samjhaate rehte hain। tum kitne bhaagyashaali ho। kitne mehmaan aate hain। jinke paas bahut mehmaan aate hain, woh khush hote hain। yeh bachche bhi hain, to mehmaan bhi hain। teacher ki buddhi mein to yahi rehta hai - main bachchon ko in jaisa sarvagun sampanna banaaoon। yeh contract baap ne uthaaya hai, drama ke plan anusaar। bachchon ko murli bhi kabhi miss nahin karni chaahiye। murli ka hi to gaayan hai na - ek bhi murli miss ki to jaise school mein absent pad gai। yeh hai behad ke baap ka school, ismen to ek din bhi miss nahin karna chaahiye। baap aakar padhaate hain, duniya mein kisko maaloom thode hi hai। svarga ki sthaapna kaise hoti hai, yeh bhi koi nahin jaante hain। tum sab kuchh jaante ho। yeh padhaai bahut-bahut athaah kamaai ki hai। janma-janmaantar ke liye is padhaai ka phal mil jaata hai। vinaash ka saara tailuk tumhaari padhaai se hai। tumhaari padhaai poori hogi aur yeh ladaai shuru hogi। padhte-padhte baap ko yaad karte jab marks poori ho jaati hai, imtahaan ho jaata hai tab ladaai lagti hai। tumhaari padhaai poori hui to ladaai lagegi। yeh nai duniya ke liye bilkul naya gyaan hai isliye manushya bichaare moonjhate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kisi ke avgun dekh uski ninda nahin karna hai। jagah-jagah par uske avgun nahin sunaane hain। apna meetha-pan nahin chhodna hai। krodh mein aakar kisi ka saamna nahin karna hai।

2) sabko sudhaarne vaala ek baap hai, isliye ek baap ko hi sab sunaana hai, avyabhichaari banna hai। murli kabhi bhi miss nahin karni hai।

vardaan:- sada saatheepan ki smriti aur saakshi stage ka anubhav karne vaale shivmai shakti svarup combined bhav

jaise aatma aur shareer donon ka saath hai, jab tak is srishti par part hai tab tak alag nahin ho sakte, aise hi shiv aur shakti donon ka itna hi gahra sambandh hai। jo sada shiv mai shakti svarup mein sthit hokar chalte hain to unki lagan mein maaya vighna daal nahin sakti। ve sada saatheepan ka aur saakshi stage ka anubhav karte hain। aise anubhav hota hai jaise koi saakaar mein saath ho।

slogan:- nirvighna aur ekras sthiti ka anubhav karne ke liye ekaagrata ka abhyaas karo।

avyakt ishaare - is avyakti maas mein bandhanmukta rah jeevanmukta sthiti ka anubhav karo

apne ko vartamaan samay main teacher hoon, main student hoon, main sevaadhaari hoon, is samajhne ke bajaae amritvele se yeh abhyaas karo ki main shreshtha aatma oopar se aai hoon - is puraani duniya mein, puraane shareer mein seva ke liye। main aatma hoon - yeh paath abhi aur pakka karo। main sevaadhaari hoon, yeh paath pakka hai lekin main aatma sevaadhaari hoon yeh paath pakka kar lo to jeevanmukta ban jaayenge।