Murli du jour du mercredi 14 janvier 2026

14-01-2026 praatahmurli om shanti "baapdaada"' madhuban

“meethe bachche - kadam-kadam baap ki shreemat par chalte raho, ek baap se hi suno to maaya ka vaar nahin hoga''

prashn:- oonch pad praapta karne ka aadhaar kya hai?

uttar:- oonch pad praapta karne ke liye baap ke har direction par chalte raho। baap ka direction mila aur bachchon ne maana। doosra koi sankalp tak bhi na aaye। 2- is roohaani service mein lag jaao। tumhein aur koi ki yaad nahin aani chaahiye। aap muye mar gai duniya tab oonch pad mil sakta hai।

geet:- tumhein paake hamne…

om shanti। meethe-meethe roohaani bachchon ne yeh geet suna। vo hai bhakti maarga ka gaaya hua। is samay baap iska rahasya samjhaate hain। bachche bhi samajhte hain - ab ham baap se behad ka varsa pa rahe hain। woh raajya hamaara koi chheen na sake। bhaarat ka raajya bahuton ne chheena hai na। musalmaanon ne chheena, angrejon ne chheena। vaastav mein pahle to raavan ne chheena hai, aasuri mat par। yeh jo bandaron ka chitra banaate hain - hear no evil, si no evil.... inka bhi koi rahasya hoga na। baap samjhaate hain ek taraph hai raavan ki aasuri sampradaay, jo baap ko nahin jaante hain। doosri taraph ho tum bachche। tum bhi pahle nahin jaante the। baap inke liye bhi sunaate hain ki isne bhi bahut bhakti ki hai, inka yeh hai bahut janmon ke ant ka janma। yahi pahle paavan the, ab patit bane hain। inko main jaanta hoon। abhi tum aur kiski mat suno। baap kehte hain, main tum bachchon se baat karta hoon। haan, kabhi koi mitra-sambandhiyon aadi ko le aate hain to thodi baat kar leta hoon। pahli baat to hai pavitra banna hai tab hi buddhi mein dhaarna hogi। yahaan ke kaayde bahut kade hain। aage kehte the 7 roz bhatthi mein rehna hai, aur koi ki yaad na aaye, na patra aadi likhna hai। raho bhal kahaan bhi। parantu saara din bhatthi mein rehna pade। abhi to tum bhatthi mein padkar phir baahar nikalte ho। koi to aashcharyavat sunanti, kathanti, aho maaya phir bhaaganti ho gaye। yeh hai badi bhaari manzil। baap ka kehna nahin maante। baap kehte hain tum to vaanaprasthi ho। tum kyon muphta mein phans pade ho। tum to is roohaani service mein lag jaao। tumhein aur koi ki yaad nahin aani chaahiye। aap muye mar gai duniya tab oonch pad mil sakta hai। tumhaara purushaartha hi hai - nar se naaraayan banne ka। kadam-kadam baap ke direction par chalna pade। parantu ismen bhi himmat chaahiye। sirf kahne ki baat nahin hai। moh ki rag kam nahin hai, nashtomoha hona hai। mera to ek shivbaaba, doosra na koi। ham to baba ki sharan lete hain। ham vish kabhi nahin denge। tum eeshvar taraph aate ho to maaya bhi tumko chhodegi nahin, khoob pachhaadegi। jaise vaidya log kehte hain - is davaai se pahle saari beemaari baahar niklegi। darna nahin। yeh bhi aise hai। maaya khoob sataayegi, vaanaprastha avastha mein bhi vikaar ke sankalp le aayegi। moh utpanna ho jaayega। baba pahle se hi bata dete hain ki yeh sab hoga। jahaan tak jiyenge, yeh maaya ki boxing chalti rahegi। maaya bhi pahalvaan ban tumko chhodegi nahin। yeh drama mein noondh hai। main thode hi maaya ko kahoonga ki vikalpa na laao। bahut likhte hain baba kripa karo। main thode hi kis par kripa karunga। yahaan to tumko shreemat par chalna hai। kripa karoon phir to sab mahaaraaja ban jaaen। drama mein bhi hai nahin। sab dharma vaale aate hain। jo aur-aur dharma mein transfer ho gaye honge woh nikal aayenge। yeh sapling lagta hai, ismen badi mehnat hai। naye jo aate hain to sirf kehna hai baap ko yaad karo। shiv bhagvaanuvaach, shreekrishna to 84 janmon mein aate hain। anek mat, anek baaten hain। yeh buddhi mein poora dhaaran karna hai। ham patit the। ab baap kehte hain tum paavan kaise bano। kalpa pahle bhi kaha tha - maamekam yaad karo। apne ko aatma samajh deh ke sab dharma chhod jeete ji maro। mujh ek baap ko hi yaad karo। main sarva ki sadgati karne aaya hoon। bhaaratvaasi hi oonch bante hain phir 84 janma le neeche utarte hain। bolo, tum bhaaratvaasi hi in devi-devtaaon ki pooja karte ho। yeh kaun hain? yeh svarga ke maalik the na। abhi kahaan hain? 84 janma kaun lete hain? satayug mein to yahi devi-devta the। abhi phir is mahaabhaarat ladaai dvaara sabka vinaash hona hai। abhi sab patit tamopradhaan hain। main bhi inke bahut janmon ke ant mein hi aakar pravesh karta hoon। yeh poora bhakta tha। naaraayan ki pooja karta tha। inmen hi pravesh kar phir inko naaraayan banaata hoon। ab tumko bhi purushaartha karna hai। yeh deity raajdhaani sthaapan ho rahi hai। maala banti hai na। oopar mein hai niraakaar phool, phir meru yugal। shivbaaba ke neeche ekdam yeh khade hain। jagatpita brahma aur jagat amba sarasvati। abhi tum is purushaartha se vishnupuri ke maalik bante ho। praja bhi to kehti hai na - bhaarat hamaara hai। tum bhi samajhte ho ham vishwa ke maalik hain। ham raajaai karenge, aur koi dharma hoga hi nahin। aise nahin kahenge - yeh hamaari raajaai hai, aur koi raajaai hai nahin। yahaan bahut hain to hamaara tumhaara chalta hai। vahaan yeh baaten hi nahin। to ab baap samjhaate hain - bachche, aur sab baaten chhod maamekam yaad karo to vikarma vinaash honge। aise nahin koi saamne baith nishtha (yog) karaaye, drishti de। baap to kehte hain chalte-phirte baap ko yaad karna hai। apna chart rakho - saare din mein kitna yaad kiya? savere uth kitna samay baap se baaten ki? aaj baba ki yaad mein baithe? aise-aise apne se mehnat karni hai। knowledge to buddhi mein hai phir auron ko bhi samjhaana hai। yeh kiski buddhi mein nahin aata hai ki kaam mahaashatru hai। 2-4 varsha rahkar phir maaya ka thappad jor se lagne se gir padte hain। phir likhte hain baba hamne kaala munh kar diya। baba likh dete kaala munh karne vaale ko 12 maas yahaan aane ki darkaar nahin hai। tum baap se pratigya kar phir bhi vikaar mein gire, mere paas kabhi nahin aana। badi manzil hai। baap aaye hi hain patit se paavan banaane। bahut bachche shaadi kar pavitra rehte hain। haan, kisi bachchi par maar padti hai to unko bachaane liye gandharvi vivaah kar pavitra rehte hain। usmein bhi koi-koi ko to naak se maaya pakad leti hai। haar kha lete hain। striyaan bhi bahut haar kha leti hain। baap kehte hain tum to soopankha ho, yeh sab naam is samay ke hi hain। yahaan to baba koi vikaari ko baithne bhi na de। kadam-kadam par baap se raay leni pade। surrender ho jaae to phir baap kahenge ab trustee bano। raay par chalte raho। potaamel bataayenge tab to raay denge। yeh badi samajhne ki baaten hain। tum bhog bhal lagaao parantu main khaata nahin hoon। main to daata hoon। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

raatri class - 15-6-68

past jo ho gaya hai unko rivaaeej karne se jinki kamzor dil hai to unhon ke dil ki kamzori bhi rivaaeej ho jaati hai isliye bachchon ko drama ke patte par thahraaya gaya hai। mukhya phaayda hai hi yaad se। yaad se hi aayu badi honi hai। drama ko bachche samajh jaayen to kab khyaal na ho। drama mein is samay gyaan seekhne aur sikhaane ka chal raha hai। phir part banda ho jaayega। na baap ka, na hamaara part rahega। na unka dene ka part, na hamaara lene ka part hoga। to ek ho jaayenge na। hamaara part nai duniya mein ho jaayega। baba ka part shantidham mein hoga। part ka reel bhara hua hai na, hamaara praarabdha ka part, baba ka shantidham ka part। dene aur lene ka part poora hua, drama hi poora hua। phir ham raajya karne aayenge, woh part change hoga। gyaan stop ho jaayega, ham woh ban jaayenge। part hi poora to baaki pharka nahin rahega। bachche aur baap ka bhi part nahin rahega। yeh bhi gyaan ko poora le lete hain। unke paas bhi kuchh rehta hi nahin hai। na dene vaale paas rahe, na lene vaale mein kami rahi to donon ek do ke samaan ho gaye। ismen vichaar saagar manthan karne ki buddhi chaahiye। khaas purushaartha hai yaad ki yaatra ka। baap baith samjhaate hain। sunaane mein to moti baat ho jaati hai, buddhi mein to sookshm hai na। andar mein jaante hain shivbaaba ka roop kya hai। samjhaane mein mota roop ho jaata hai। bhakti maarga mein bada ling bana dete hain। aatma hai to chhoti na। yeh hai kudrat। kahaan tak ant paayenge? phir pichhaadi mein beanta kah dete। baba ne samjhaaya hai saara part aatma mein bhara hua hai। yeh kudrat hai। ant nahin paaya ja sakta। srishti chakra ka ant to paate hain। rachayita aur rachna ke aadi madhya ant ko tum hi jaante ho। baba knowledgeful hai। phir ham bhi full ho jaayenge। paane liye kuchh rahega nahin। baap ismen pravesh kar padhaate hain। woh hai bindi। aatma ka va paramatma ka saakshaatkaar hone se khushi thode hi hoti hai। mehnat kar baap ko yaad karna hai to vikarma vinaash honge। baap kehte hain mere mein gyaan banda ho jaayega to tere mein bhi banda ho jaayega। knowledge le oonch ban jaate hain। sabhi kuchh le lete hain phir bhi baap to baap hai na। tum aatmaayen aatma hi rahenge, baap hokar to nahin rahenge। yeh to gyaan hai। baap baap hai, bachche bachche hain। yeh sabhi vichaar saagar manthan kar deep mein jaane ki baaten hain। yeh bhi jaante hain jaana to sabhi ko hai। sabhi chale jaane vaale hain। baaki aatma jaakar rahegi। saari duniya hi khatma honi hai। ismen nidar rehna hota hai। purushaartha karna hai nidar ho rahne ka। shareer aadi ka koi bhi bhaan na aave। usi avastha mein jaana hai। baap aap samaan banaate hain, tum bachche bhi aap samaan banaate rehte ho। ek baap ki hi yaad rahe aisa purushaartha karna hai। abhi time pada hai। yeh rehearsal teekhi karni pade। practice nahin hogi to khade ho jaayenge। taange thirakne lag padegi aur heart fail achaanak hota rahega। tamopradhaan shareer ko heartfail hone mein deri thode hi lagti hai। jitna ashareeri hote jaayenge, baap ko yaad karte rahenge utna nazdeek aate jaayenge। yog vaale hi nidar rahenge। yog se shakti milti hai, gyaan se dhan milta hai। bachchon ko chaahiye shakti। to shakti paane liye baap ko yaad karte raho। baba hai avinaashi surgeon। woh kab patient ban na sake। abhi baap kehte hain tum apni avinaashi davaai karte raho। ham aisi sanjeevni booti dete hain jo kab koi beemaar na pade। sirf patit-paavan baap ko yaad karte raho to paavan ban jaayenge। devtaayen sadaiv nirogi paavan hain na। bachchon ko yeh to nishchay ho gaya hai ham kalpa kalpa varsa lete hain। immemoriyal time baap aaya hai jaise abhi aaya hai। baba jo sikhlaate, samjhaate hain yahi raajayog hai। woh geeta aadi sabhi bhakti maarga ke hain। yeh gyaan maarga baap hi bataate hain। baap hi aakar neeche se oopar uthaate hain। jo pakke nishchay buddhi hain vahi maala ka daana bante hain। bachche samajhte hain bhakti karte karte ham neeche girte aaye hain। abhi baap aakar sachchi kamaai karaate hain। laukik baap itni kamaai nahin karaate jitni paarlaukik baap karaate hain। achha bachchon ko goodnight aur namaste।

dhaarna ke liye mukhya saar:-

1) maaya pahalvaan ban saamne aayegi, usse darna nahin hai। maayaajeet banna hai। kadam-kadam shreemat par chal apne oopar aapehi kripa karni hai।

2) baap ko apna sachcha-sachcha potaamel bataana hai। trustee hokar rehna hai। chalte-phirte yaad ka abhyaas karna hai।

vardaan:- roohe gulaab ban door-door tak roohaani khushbu phailaane vaale roohaani sevaadhaari bhav

roohaani roohe gulaab apni roohaani vritti dvaara roohaaniyat ki khushbu door-door tak phailaate hain। unki drishti mein sada supreme rooh samaaya hua rehta hai। ve sada rooh ko dekhte, rooh se bolte। main rooh hoon, sada supreme rooh ki chhatra-chhaaya mein chal raha hoon, mujh rooh ka karaavanhaar supreme rooh hai, aise har second hajoor ko haajir anubhav karne vaale sada roohaani khushbu mein avinaashi aur ekras rehte hain। yahi hai roohaani sevaadhaari ki number one visheshta।

slogan:- nirvighna ban seva mein aage number lena arthaat number one bhaagyashaali banna।

avyakt ishaare - is avyakti maas mein bandhanmukta rah jeevanmukta sthiti ka anubhav karo

brahman jeevan mein deh ka bandhan, sambandh ka bandhan, saadhnon ka bandhan - sab khatma ho gaya na! koi bandhan nahin। bandhan apne vash mein karta hai aur sambandh sneh ka sahayog deta hai। to deh ke sambandhiyon ka deh ke naate se sambandh nahin lekin aatmik sambandh hai। aise brahman arthaat jeevan-mukta।