Murli du jour du jeudi 22 janvier 2026

22-01-2026 praatahmurli om shanti "baapdaada"' madhuban

“meethe bachche - padhaai aur daivi characters ka register rakho, roz check karo ki hamse koi bhool to nahin hui''

prashn:- tum bachche kis purushaartha se raajaai ka tilak praapta kar sakte ho?

uttar:- 1. sada aagyaakaari rahne ka purushaartha karo। sangam par farmaanbardaar ka teeka do to raajaai ka tilak mil jaayega। bevphaadaar arthaat aagya ko na maanne vaale raajaai ka tilak nahin praapta kar sakte। 2. koi bhi beemaari surgeon se chhipaao nahin। chhipaayenge to pad kam ho jaayega। baap jaisa pyaar ka saagar bano to raajaai ka tilak mil jaayega।

om shanti। roohaani baap roohaani bachchon ko samjha rahe hain, padhaai maana samajh। tum bachche samajhte ho yeh padhaai bahut sahaj aur bahut oonchi hai aur bahut oonch pad dene vaali hai। yeh sirf tum bachche hi jaante ho ki yeh padhaai ham vishwa ka maalik banne ke liye padh rahe hain। to padhne vaalon ko bahut khushi honi chaahiye। kitni oonchi padhaai hai! yeh vahi geeta episode bhi hai। sangamayug bhi hai। tum bachche ab jage ho, baaki sab soye pade hain। gaayan bhi hai maaya ki neend mein soye pade hain। tumko baba ne aakar jagaaya hai। sirf ek baat par samjhaate hain - meethe bachche, yaad ki yaatra ke bal se tum saare vishwa par raajya karo। jaise kalpa pahle kiya tha। yeh smriti baap dilaate hain। bachche bhi samajhte hain humein smriti aai - kalpa-kalpa ham is yogbal se vishwa ka maalik bante hain aur phir daiveegun bhi dhaaran kiye hain। yog par hi poora dhyaan dena hai। is yogbal se tum bachchon mein automatically daiveegun aa jaate hain। barobar yeh imtahaan hai hi manushya se devta banne ka। tum yahaan aaye ho yogbal se manushya se devta banne ke liye। aur yeh bhi jaante ho ki hamaare yogbal se saara vishwa pavitra hona hai। pavitra tha, ab apvitra bana hai। saare chakra ke raaz ko tum bachchon ne samjha hai aur dil mein bhi hai। bhal koi naya ho to bhi yeh baaten bahut sahaj hain samajhne ki। tum devta poojya the, phir pujaari tamopradhaan bane aur koi aise batla bhi na sake। baap clear bataate hain woh hai bhakti maarga, yeh hai gyaan maarga। bhakti past ho gai। past ki baat chitvo nahin। vo to girne ki baat hai। baap ab chadhne ki baaten suna rahe hain। bachche bhi jaante hain - hamko daiveegun dhaaran karne hai zaroor। roz chart likhna chaahiye - ham kitna samay yaad mein rehte hain? hamaare se kya kya bhoolen hui? bhool ki bhaari chot bhi lagti hai, us padhaai mein bhi characters dekhe jaate hain। ismen bhi character dekha jaata hai। baap to tumhaare kalyaan ke liye hi kehte hain। usmein bhi register rakhte hain - padhaai ka aur character ka। yahaan bhi bachchon ka daivi character banaana hai। bhool na ho, yeh sambhaal karni hai। mere se koi bhool to nahin hui? isliye kachahri bhi karte hain। aur koi school aadi mein kachahri nahin hoti। apne dil se poochhna hai। baap ne samjhaaya hai maaya ke kaaran kuchh-na-kuchh avagyaayen hoti rehti hain। shuru mein bhi kachahri hoti thi। bachche sach bataate the। baap samjhaate rehte hain - agar sach na bataaya to woh bhoolen vriddhi ko paati rahengi। ulta aur bhool ka danda mil jaata hai। bhool na bataane se phir naapharmaanbardaar ka teeka lag jaata hai। phir raajaai ka tilak mil na sake। aagya nahin maante hain, bevphaadaar bante hain to raajaai pa nahin sakte। surgeon bhinna-bhinna prakaar se samjhaate rehte hain। surgeon se agar beemaari chhipaayenge to pad bhi kam ho jaayega। surgeon ko bataane se koi maar to nahin padti hai na। baap sirf kahenge saavdhaan। phir agar aisi bhool karenge to nuksaan ko paayenge। pad bahut kam ho jaayega। vahaan to natural daivi chalan hogi। yahaan purushaartha karna hai। ghadi-ghadi fail nahin hona hai। baap kehte hain - bachche, jaasti bhool na karo। baap bahut pyaar ka saagar hai। bachchon ko bhi banna hai। yatha baap tatha bachche। yatha raaja raani tatha praja। baba to raaja hai nahin। tum jaante ho baba hamko aap samaan banaate hain। baap ki jo mahima karte hain, woh tumhaari bhi honi chaahiye। baba samaan banna hai। maaya badi prabal hai, tumko register rakhne nahin deti hai। maaya ke phande mein to poore phanse hue ho। maaya ki jel se tum nikal nahin sakte ho। sach bataate nahin ho। to baap kehte hain accurate yaad ka chart rakho। subah ko uth baba ko yaad karo। baap ki hi mahima karo। baba, aap hamko vishwa ka maalik banaate ho to ham aapki mahima karenge। bhakti maarga mein kitni mahima gaate hain, unko to kuchh bhi pata nahin। devtaaon ki mahima hai nahin। mahima hai tum braahmanon ki। sabko sadgati dene vaala bhi ek baap hai। woh creator bhi hai, director bhi hai। service bhi karte hain aur bachchon ko samjhaate bhi hain। practical mein kehte hain। vo to sirf bhagvaanuvaach sunte rehte hain shaastron se। geeta padhte aate hain phir unse milta kya hai? kitna prem se baith padhte hain, bhakti karte hain, pata nahin padta ki inse kya hoga! yeh nahin jaante ki ham neeche hi seedhi utar rahe hain। din-pratidin tamopradhaan banna hi hai। drama mein noondh hi aisi hai। is seedhi ka raaz sivaae baap ke koi samjha na sake। shivbaaba hi brahma dvaara samjhaate hain। yeh bhi inse samajhkar phir tumko samjhaate hain। mool bada teacher, bada surgeon to baap hi hai। unko hi yaad karna hai। aise nahin kehte ki braahmani ko yaad karo। yaad to ek ki rakhni hai। kabhi bhi kisi ke saath moh nahin rakhna hai। ek baap se hi shiksha leni hai। nirmohi bhi banna hai। ismen badi mehnat chaahiye। saari puraani duniya se vairaagya। yeh to khatma hui padi hai। ismen lav va aasakti kuchh bhi nahin। kitne bade-bade makaan aadi banaate rehte hain। unhon ko yeh bhi pata nahin ki yeh puraani duniya baaki kitna samay hai। tum bachche ab jage ho auron ko bhi jagaate ho। baap aatmaon ko hi jagaate hain, ghadi-ghadi kehte hain apne ko aatma samjho। shareer samajhte ho to jaise soye pade ho। apne ko aatma samjho aur baap ko bhi yaad karo। aatma patit hai to shareer bhi patit milta hai। aatma paavan to shareer bhi paavan milta hai।

baap samjhaate hain tum hi is devi-devta gharaane ke the। phir tum hi ban jaayenge। kitna sahaj hai। aise behad ke baap ko ham kyon nahin yaad karenge। subah uthkar bhi baap ko yaad karo। baba aapki to kamaal hai, aap hamko kitna oonch devi-devta banaakar phir nirvaandhaam mein baith jaate ho। itna oonch to koi bana na sake। aap kitna sahaj kar batlaate ho। baap kehte hain - jitna time mile, kaamkaaj karte hue bhi baap ko yaad kar sakte ho। yaad hi tumhaara beda paar karne vaali hai arthaat kaliyug se us paar shivaalay mein le jaane vaali hai। shivaalay ko bhi yaad karna hai, shivbaaba ka sthaapan kiya hua svarga - to donon ki yaad aati hai। shivbaaba ko yaad karne se ham svarga ke maalik banenge। yeh padhaai hai hi nai duniya ke liye। baap bhi nai duniya sthaapan karne aate hain। zaroor baap aakar koi to kartavya karenge na। tum dekhte bhi ho main part baja raha hoon, drama ke plan anusaar। tum bachchon ko 5 hazaar varsha pahle vaali yaad ki yaatra aur aadi-madhya-ant ka raaz bataata hoon। tum jaante ho har 5 hazaar varsha ke baad baba hamaare sammukh aata hai। aatma hi bolti hai, shareer nahin bolega। baap bachchon ko shiksha dete hain - aatma ko hi pure banaana hai। aatma ko ek baar hi pure hona hota hai। baba kehte hain mainne anek baar tumko padhaaya phir bhi padhaaoonga। aise koi sanyaasi kah na sake। baap hi kehte hain - bachche, main drama ke plan anusaar padhaane aaya hoon। phir 5 hazaar varsha ke baad aise hi aakar padhaaoonga, jaise kalpa pahle tumko padhaakar raajdhaani sthaapan ki thi, anek baar tumko padhaakar raajaai sthaapan ki hai। yeh kitni wonderful baaten baap samjhaate hain। shreemat kitni shreshtha hai। shreemat se hi ham vishwa ke maalik bante hain। bahut-bahut bada martaba hai! koi ko badi lottery milti hai to maatha kharaab ho jaata hai। koi chalte-chalte hopeless ho jaate hain। ham padh nahin sakte। ham vishwa ki baadshaahi kaise lenge। tum bachchon ko bahut khushi honi chaahiye। baba kehte hain ateendriy sukh aur khushi ki baaten mere bachchon se poochho। tum jaate ho sabko khushi ki baaten sunaane। tum hi vishwa ke maalik the phir 84 janma bhog gulaam bane ho। gaate bhi hain main gulaam, main gulaam tera। samajhte hain apne ko neech kehna, chhota hokar chalna achha hai। dekho, baap kaun hai! unko koi jaante nahin। unko bhi sirf tumne jaana hai। baba kaise aakar sabko bachcha-bachcha kah samjhaate hain। yeh aatma aur paramatma ka mela hai। unse hamko svarga ki baadshaahi milti hai। baaki ganga snaan aadi karne se koi svarga ki raajaai nahin milti। ganga snaan to bahut baar kiya। yoon to paani saagar se aata hai parantu yeh barsaat kaise padti hai, inko bhi kudrat kahenge। is samay baap tumko sab kuchh samjhaate hain। dhaarna bhi aatma hi karti hai, na ki shareer। tum feel karte ho barobar baba ne hamko kya se kya bana diya hai! ab baap kehte hain - bachche, apne par raham karo। koi avagya na karo। deh-abhimaani mat bano। muphta apna pad kam kar denge। teacher to samjhaayenge na। tum jaante ho baap behad ka teacher hai। duniya mein kitni dher bhaashaayen hain। koi bhi cheej chhapti hai to sab bhaashaaon mein chhapaani chaahiye। koi literature chhapaate ho to sabko ek-ek kaapi bhej do। ek-ek copy library mein bhej deni chaahiye। kharche ki baat nahin। baba ka bhandaara bahut bhar jaayega। paisa apne paas rakhkar kya karenge। ghar to nahin le jaayenge। agar kuchh ghar le jaayen to paramatma ke yagya ki chori ho jaaye। tobaan-tobaan, aisi buddhi shal kiski na ho। paramatma ke yagya ki chori! un jaisa mahaan paap aatma koi ho na sake। kitni adhmagti ho jaati hai। baap kehte hain yeh sab drama mein part hai। tum raajaai karenge woh tumhaare servant banenge। servant bigar raajaai kaise chalegi! kalpa pahle bhi aise hi sthaapna hui thi।

ab baap kehte hain - apna kalyaan karna chaahte ho to shreemat par chalo। daiveegun dhaaran karo। krodh karna daiveegun nahin hai। woh aasuri gun ho jaata hai। koi krodh kare to chup kar dena chaahiye। response nahin karna chaahiye। har ek ki chalan se samajh sakte hain, avgun to sabmen hain। jab koi krodh karte hain to unki shakla taambe jaisi ho jaati hai। mukh se bomb chalaate hain। apna hi nuksaan kar dete hain। pad bhrashta ho jaayega। samajh honi chaahiye। baap kehte hain jo paap karma karte ho, woh likh do। baba ko bataane se maaph ho jaayega। bojh halka ho jaayega। janma-janmaantar se tum vikaar mein jaane lage ho। is samay tum koi paap karma karenge to sauguna ho jaayega। baap ke aage bhool ki to sauguna danda pad jaayega। kiya aur bataaya nahin to aur hi vriddhi ho jaayegi। baap to samjhaayenge ki apne ko nuksaan nahin pahunchaao। baap bachchon ki buddhi saalim (achhi) banaane aaye hain। jaante hain yeh kaisa pad paayenge। woh bhi 21 janmon ki baat hai। jo serviceable bachche hain, unka svabhaav bahut meetha chaahiye। koi jhat baap ko batlaate hain - baba yeh bhool hui। baba khush hote hain। bhagwan khush hua to aur kya chaahiye। yeh to baap teacher guru teenon hi hai। nahin to teenon hi naaraaz honge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) shreemat par chal apni buddhi saalim (achhi) rakhni hai। koi bhi avagya nahin karni hai। krodh mein aakar mukh se bomb nahin nikaalna hai, chup rehna hai।

2) dil se ek baap ki mahima karni hai। is puraani duniya se aasakti va pyaar nahin rakhna hai। behad ka vairaagi aur nirmohi banna hai।

vardaan:- yaad ke aadhaar dvaara maaya ki keechad se pare rahne vaale sada cheerful bhav

koi kaisi bhi baat saamne aaye sirf baap ke oopar chhod do। jigar se kaho - thabaaba''। to baat khatma ho jaayegi। yeh baba shabd dil se kehna hi jaadu hai। maaya pahle-pahle baap ko hi bhulaati hai isliye sirf is baat par attention do to kamal pushpa ke samaan apne ko anubhav karenge। yaad ke aadhaar par maaya ke samasyaaon ki keechad se sada pare rahenge। kabhi kisi bhi baat mein halchal mein nahin aayenge, sada ek hi mood hogi cheerful।

slogan:- pavitrata ki dhaarna va dharma ko jeevan mein laane vaale hi mahaan aatma hain।

avyakt ishaare - is avyakti maas mein bandhanmukta rah jeevanmukta sthiti ka anubhav karo

svayan ko bandhanon se mukta karne ke liye apni chalan ko aur jo kada sanskaar hai use change karo। bandhan daalne vaale apna kaam karen, aap apna kaam karo। unke kaam ko dekh ghabraao nahin। jitna vo apna kaam force se kar rahe hain, aap apna force se karo। unke gun uthaao ki woh kaise apna kartavya kar rahe hain, aap bhi karo। apne ko bandhanon se mukta karne ki yukti racho।