Murli du jour du lundi 9 février 2026

09-02-2026 praatahmurli om shanti "baapdaada"' madhuban

“meethe bachche - gareeb nivaaz baba tumhein kaudi se heere jaisa banaane aaye hain to tum sada unki shreemat par chalo''

prashn:- pahle-pahle tumhein sabhi ko kaun sa ek guhya raaz samjhaana chaahiye?

uttar:- “baap-daada'' ka। tum jaante ho yahaan ham baapdaada ke paas aaye hain। yeh donon ikatthe hain। shiv ki aatma bhi ismen hai, brahma ki aatma bhi hai। ek aatma hai, doosra param aatma। to pahle-pahle yeh guhya raaz sabko samjhaao ki yeh baapdaada ikatthe hain। yeh (daada) bhagwan nahin hai। manushya bhagwan hota nahin। bhagwan kaha jaata hai niraakaar ko। woh baap hai shantidham mein rahne vaala।

geet:- aakhir woh din aaya aaj…

om shanti। baap, daada dvaara arthaat shivbaaba brahma daada dvaara samjhaate hain, yeh pakka kar lo। laukik sambandh mein baap alag, daada alag hota hai। baap se daada ka varsa milta hai। kehte hain daade ka varsa lete hain। woh hai gareeb nivaaz। gareeb nivaaz unko kaha jaata hai jo aakar gareeb ko sirtaaj banaaye। to pahle-pahle pakka nishchay hona chaahiye ki yeh kaun hain? dekhne mein to saakaar manushya hai, inko yeh sab brahma kehte hain। tum sab brahmaakumaar-kumaariyaan ho। jaante ho hamko varsa shivbaaba se milta hai। jo sabka baap aaya hai varsa dene ke liye। baap varsa dete hain sukh ka। phir aadhaakalpa baad raavan duhkh ka shraap dete hain। bhakti maarga mein bhagwan ko dhoondhane liye dhakka khaate hain। milta kisko bhi nahin hai। bhaaratvaasi gaate hain tum maat-pita....... phir kehte hain aap jab aayenge to hamaara ek hi aap honge, doosra na koi। aur koi saath ham mamatva nahin rakhenge। hamaara to ek shivbaaba। tum jaante ho yeh baap hai gareeb nivaaz। gareeb ko saahookaar banaane vaala, kaudi ko heere tulya banaate hain arthaat kaliyugi patit kangaal se satayugi sirtaaj banaane ke liye baap aaye hain। tum bachche jaante ho yahaan ham baapdaada ke paas aaye hain। yeh donon ikatthe hain। shiv ki aatma bhi ismen hai, brahma ki aatma bhi hai, do hui na। ek aatma hai, doosra param aatma। tum sabhi ho aatmaayen। gaaya jaata hai aatmaayen paramatma alag rahe bahukaal...... pahle number mein milne vaali ho tum aatmaayen arthaat jo aatmaayen hain woh paramatma baap se milti hain, jiske liye hi pukaarte hain O god father। tum unke bachche thahre। father se zaroor varsa milta hai। baap kehte hain bhaarat jo sir-taaj tha woh abhi kitna kangaal bana hai। abhi main phir tum bachchon ko sirtaaj banaane aaya hoon। tum double sirtaaj bante ho। ek taaj hota hai pavitrata ka, usmein light dete ho। doosra hai ratan jadit taaj। to pahle-pahle yeh guhya raaz sabko samjhaana hai ki yeh baapdaada ikatthe hain। yeh bhagwan nahin hai। manushya bhagwan hota nahin। bhagwan kaha jaata hai niraakaar ko। woh baap hai shantidham mein rahne vaala। jahaan tum sabhi aatmaayen rehti ho, jisko nirvaan dhaam athva vaanaprastha kaha jaata hai phir tum aatmaon ko shareer dhaaran kar yahaan part bajaana hota hai। aadhaakalpa sukh ka part, aadhaakalpa hai duhkh ka। jab duhkh ka ant hota hai tab baap kehte hain main aata hoon। yeh drama bana hua hai। tum bachche yahaan aate ho bhatthi mein। yahaan aur kuchh baahar ka yaad nahin aana chaahiye। yahaan hai hi maat-pita aur bachche। aur yahaan shoodra sampradaay hai nahin। jo brahman nahin hain unko shoodra kaha jaata hai। unka sang to yahaan hai hi nahin। yahaan hai hi braahmanon ka sang। brahman bachche jaante hain ki shivbaaba brahma dvaara hamko narka se svarga ki raajdhaani ka maalik banaane aaye hain। ab ham maalik nahin hain kyonki ham patit hain। ham paavan the phir 84 ka chakra lagaae sato-rajo-tamo mein aaye hain। seedhi mein 84 janmon ka hisaab likha hua hai। baap baithkar bachchon ko samjhaate hain। jin bachchon se pahle-pahle milte hain phir unhon ko hi pahle-pahle satayug mein aana hai। tumne 84 janma liye hain। rachta aur rachna ki saari knowledge ek baap ke paas hi hai। vahi manushya srishti ka beejroop hai। zaroor beej mein hi knowledge hogi ki is jhaad ki kaise utpatti, paalna aur vinaash hota hai। yeh to baap hi samjhaate hain। tum ab jaante ho ham bhaaratvaasi gareeb hain। jab devi-devta the to kitne saahookaar the। heeron se khelte the। heeron ke mahlon mein rehte the। ab baap smriti dilaate hain ki tum kaise 84 janma lete ho। bulaate bhi hain - he patit-paavan, gareeb-nivaaz baba aao। ham gareebon ko svarga ka maalik phir se banaao। svarga mein sukh ghanere the, ab duhkh ghanere hain। bachche jaante hain is samay sab poore patit ban pade hain। abhi kaliyug ka ant hai phir satayug chaahiye। pahle bhaarat mein ek aadi sanaatan devi-devta dharma tha, ab woh praayahlop ho gaya hai aur sab apne ko hindu kahlaate hain। is samay Christian bahut ho gaye hain kyonki hindu dharma vaale bahut convert ho gaye hain। tum devi-devtaaon ka asul karma shreshtha tha। tum pavitra pravritti maarga vaale the। ab raavan raajya mein patit pravritti maarga vaale ban gaye ho, isliye duhkhi ho। satayug ko kaha jaata hai shivaalay। shivbaaba ka sthaapan kiya hua svarga। baap kehte hain main aakar tum bachchon ko shoodra se brahman banaae tumko sooryavanshi, chandravanshi raajdhaani ka varsa deta hoon। yeh baapdaada hai, inko bhoolo mat। shivbaaba brahma dvaara hamko svarga ka laayak bana rahe hain kyonki patit aatma to muktidhaam mein ja na sake, jab tak paavan na banen। abhi baap kehte hain main aakar tumko paavan banne ka raasta bataata hoon। main tumko padmapti svarga ka maalik banaakar gaya tha, barobar tumko smriti aai hai ki ham svarga ke maalik the। us samay ham bahut thode the। abhi to kitne dher manushya hain। satayug mein 9 laakh hote hain, to baap kehte hain main aakar brahma dvaara svarga ki sthaapna, shankar dvaara vinaash kara deta hoon। taiyaari sab kar rahe hain, kalpa pahle muaaphik। kitne bombs banaate hain। 5 hazaar varsha pahle bhi yeh mahaabhaarat ladaai lagi thi। bhagwan ne aakar raajayog sikhaae manushya ko nar se naaraayan banaaya tha। to zaroor kaliyugi puraani duniya ka vinaash hona chaahiye। saare bhambhor ko aag lagegi। nahin to vinaash kaise ho? aajkal bombs mein aag bhi bharte hain। mooslaadhaar barsaat, arth quakes aadi sab hongi tab to vinaash hoga। puraani duniya ka vinaash, nai duniya ki sthaapna hoti hai। yeh hai sangamayug। raavan raajya murdaabaad ho raam-raajya jindaabaad hota hai। nai duniya mein shreekrishna ka raajya tha। lakshmi-naaraayan ke badle shreekrishna ka naam le lete hain kyonki shreekrishna hai sundar, sabse pyaara bachcha। manushyon ko to pata nahin hai na। shreekrishna alag raajdhaani ka, raadhe alag raajdhaani ki thi। bhaarat sirtaaj tha। abhi kangaal hai, phir baap aakar sirtaaj banaate hain। ab baap kehte hain pavitra bano aur maamekam yaad karo to tum satopradhaan ban jaayenge। phir jo service kar aap samaan banaayenge, woh oonch pad paayenge, double sirtaaj banenge। satayug mein raaja-raani aur praja sab pavitra rehte hain। abhi to hai hi praja ka raajya। donon taaj nahin hain। baap kehte hain jab aisi haalat hoti hai tab main aata hoon। abhi main tum bachchon ko raajayog sikha raha hoon। main hi patit-paavan hoon। ab tum mujhe yaad karo to tumhaari aatma se khaad nikal jaae। phir satopradhaan ban jaayenge। abhi shyaam se sundar banna hai। sone mein khaad padne se kaala ho jaata hai to ab khaad ko nikaalna hai। behad ka baap kehte hain tum kaam chita par baith kaale ban gaye ho, ab gyaan chita par baitho aur sabse mamatva mita do। tum aashik ho mujh ek maashook ke। bhagat sab bhagwan ko yaad karte hain। satayug-treta mein bhakti hoti nahin। vahaan to hai gyaan ki praalabdha। baap aakar gyaan se raat ko din banaate hain। aise nahin ki shaastra padhne se din ho jaayega। woh hai bhakti ki saamagri। gyaan saagar patit-paavan ek hi baap hai, woh aakar srishti chakra ka gyaan bachchon ko samjhaate hain aur yog sikhaate hain। eeshvar ke saath yog lagaane vaale yog yogeshvar aur phir bante hain raaj raajeshvar, raaj raajeshvari। tum eeshvar dvaara raajaaon ka raaja bante ho। jo paavan raajaayen the phir vahi patit bante hain। aapehi poojya phir aapehi pujaari ban jaate hain। ab jitna ho sake yaad ki yaatra mein rehna hai। jaise aashik maashook ko yaad karte hain na। jaise kanya ki sagaai hone se phir ek-do ko yaad karte rehte hain। abhi yeh jo maashook hai, unke to bahut aashik hain bhakti maarga mein। sab duhkh mein baap ko yaad karte hain - he bhagwan duhkh haro, sukh do। yahaan to na shanti hai, na sukh hai। satayug mein donon hain।

abhi tum jaante ho ham aatmaayen kaise 84 ka part bajaate hain। brahman, devta, kshatriy, vaishya, shoodra bante hain। 84 ki seedhi buddhi mein hai na। ab jitna ho sake baap ko yaad karna hai to paap kat jaaen। karma karte hue bhi buddhi mein baap ki yaad rahe। baba se ham svarga ka varsa le rahe hain। baap aur varse ko yaad karna hai। yaad se hi paap katte jaayenge। jitna yaad karenge to pavitrata ki light aati jaayegi। khaad nikalti jaayegi। bachchon ko jitna ho sake time nikaal yaad ka upaay karna hai। savere-savere time achha milta hai। yeh purushaartha karna hai। bhal grihastha vyavhaar mein raho, bachchon ki sambhaal aadi karo parantu yeh antim janma pavitra bano। kaam chita par nahin chadho। abhi tum gyaan chita par baithe ho। yeh padhaai bahut oonchi hai, ismen sone ka bartan chaahiye। tum baap ko yaad karne se sone ka bartan bante ho। yaad bhoolne se phir lohe ka bartan ban jaate ho। baap ko yaad karne se svarga ke maalik banenge। yeh to bahut sahaj hai। ismen pavitrata mukhya hai। yaad se hi pavitra banenge aur srishti chakra ko yaad karne se svarga ka maalik banenge। tumhein gharbaar nahin chhodna hai। grihastha vyavhaar mein bhi rehna hai। baap kehte hain 63 janma tum patit duniya mein rahe ho। ab shivaalay amarlok mein chalne ke liye tum yeh ek janma pavitra rahe to kya hua। bahut kamaai ho jaayegi। 5 vikaaron par jeet paani hai tab hi jagatjeet banenge। nahin to pad pa nahin sakenge। baap kehte hain marna to sabko hai। yeh antim janma hai phir tum jaae nai duniya mein raajya karenge। heere-javaahraaton ki khaaniyaan bharpoor ho jaayengi। vahaan tum heere-javaahraaton se khelte rahenge। to aise baap ke bankar unki mat par bhi chalna chaahiye na। shreemat se hi tum shreshtha banenge। raavan ki mat se tum bhrashtaachaari bane ho। ab baap ki shreemat par chal tamopradhaan se satopradhaan banna hai। baap ko yaad karna hai aur koi takleeph baap nahin dete hain। bhakti maarga mein to tumne bahut dhakke khaaye hain। ab sirf baap ko yaad karo aur srishti chakra ko yaad karo। svadarshan chakradhaari bano to tum 21 janmon ke liye chakravarti raaja ban jaayenge। anek baar tumne raajya liya hai aur ganvaaya hai। aadhaakalpa hai sukh, aadhaakalpa hai duhkh। baap kehte hain - main kalpa-kalpa sangam par aata hoon। tumko sukhdhaam ka maalik banaata hoon। abhi tumko smriti aai hai, ham kaise chakra lagaate hain। yeh chakra buddhi mein rakhna hai। baap hai gyaan ka saagar। tum yahaan behad ke baap ke saamne baithe ho। oonch te oonch bhagwan prajaapita brahma dvaara tumko varsa dete hain। to ab vinaash hone ke pahle baap ko yaad karo, pavitra bano। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) nirantar baap ki yaad mein rahne ke liye buddhi ko sone ka bartan banaana hai। karma karte bhi baap ki yaad rahe, yaad se hi pavitrata ki light aayegi।

2) murli kabhi miss nahin karni hai। drama ke raaz ko yathaartha reeti samajhna hai। bhatthi mein kuchh bhi baahar ka yaad na aaye।

vardaan:- aapas mein ek do ki visheshta dekhne aur varnan karne vaale shreshthata sampanna holeehans bhav

sangamayug par har bachche ko knowledge dvaara koi na koi vishesh gun avashya praapta hai, isliye holeehans ban har ek ki visheshta ko dekho aur varnan karo। jis samay kisi ki kamjori dekhte ya sunte ho to samajhna chaahiye ki yeh kamjori inki nahin, meri hai kyonki ham sab ek hi baap ke, ek hi parivaar ke, ek hi maala ke manke hain। jaise apni kamjori ko prasiddha nahin karna chaahte aise doosre ki kamjori ka bhi varnan nahin karo। holeehans maana visheshtaaon ko grahan karna aur kamjoriyon ko mitaana।

slogan:- samay ko bachaane vaale teevra purushaarthi hi sada vijayi hain।

ye avyakt ishaare - ekta aur vishvaas ki visheshta dvaara saphalta sampanna bano

jaise mankon ki visheshta hoti hai - ek jaise manke maala ke ek hi dhaage mein piroye jaate hain। aise aap sabhi vaijayanti maala ke manke bhi jab ekmat, ek ki hi lagan mein ekras sthiti vaale ek dikhaai denge tab hi maala mein piroye jaayenge। agar aapas mein do maten hoti hain to woh doosri arthaat 16000 ki maala ke daane ban jaate hain।