Murli du jour du samedi 14 mars 2026

14-03-2026 praatahmurli om shanti "baapdaada"' madhuban

“meethe bachche - ek baap hi number one actor hai jo patiton ko paavan banaane ki act karte hain, baap jaisi act koi kar nahin sakta''

prashn:- sannyaasiyon ka yog jismaani yog hai, roohaani yog baap hi sikhlaate hain, kaise?

uttar:- sannyaasi brahm tatva se yog rakhna sikhlaate hain। ab woh to rahne ka sthaan hai। to woh jismaani yog ho gaya। tatva ko supreme nahin kaha jaata। tum bachche supreme rooh se yog lagaate isliye tumhaara yog roohaani yog hai। yeh yog baap hi sikhla sakte, doosra koi bhi sikhla na sake kyonki vahi tumhaara roohaani baap hai।

geet:- tu pyaar ka saagar hai…

om shanti। bachche, bahut log kehte hain om shanti arthaat apni aatma ki pahchaan dete hain। parantu khud samajh nahin sakte। om shanti ka arth bahut nikaalte hain। koi kehte hain om maana bhagwan। parantu nahin, yeh aatma kehti hai om shanti। aham aatma ka svadharma hai hi shant isliye kehte hain main hoon shant swaroop। yeh mera shareer hai jisse ham karma karte hain। kitna sahaj hai। vaise baap bhi kehte hain om shanti। parantu main sabka baap hone kaaran, beejroop hone kaaran bhi jo rachna roopi jhaad hai, kalpavriksha uske aadi-madhya-ant ko jaanta hoon। jaise tum koi bhi jhaad dekho to uske aadi madhya ant ko jaan jaao, woh beej to jad hai। to baap samjhaate hain yeh kalpa vriksha hai, iske aadi madhya ant ko tum nahin jaan sakte, main jaanta hoon। mujhe kehte hi hain gyaan ka saagar। main tum bachchon ko baith aadi madhya ant ka raaz samjha raha hoon। yeh jo naatak hai, jisko drama kaha jaata, jiske tum actors ho baap kehte hain main bhi actor hoon। bachche kehte hain he baba patit-paavan actor ban aao, aakar patiton ko paavan banaao। ab baap kehte hain main act kar raha hoon। mera part sirf is sangam samay hi hai। so bhi mujhe apna shareer nahin hai। main is shareer dvaara act karta hoon। mera naam shiv hai। bachchon ko hi to samjhaayenge na। paathshaala koi bandaron va jaanavron ki nahin hoti hai। parantu baap kehte hain ki in 5 vikaaron ke hone kaaran shakla to manushya jaisi hai lekin kartavya bandaron jaise hain। bachchon ko baap samjhaate hain ki patit to sab apne ko kahlaate hi hain। parantu yeh nahin jaante ki hamko patit kaun banaate hain aur paavan phir kaun aakar banaate hain? patit-paavan kaun? jisko bulaate hain, kuchh bhi samajh nahin sakte। yeh bhi nahin jaante ham sab actors hain। ham aatma yeh chola lekar part bajaati hain। aatma paramdham se aati hai, aakar part bajaati hai। bhaarat ke oopar hi saara khel bana hua hai। bhaarat paavan, bhaarat patit kisne banaaya? raavan ne। gaate bhi hain ki raavan ka lanka par raajya tha। baap behad mein le jaate hain। he bachchon, yeh saari srishti behad ka taapu hai। woh to had ki lanka hai। is behad ke taapu par raavan ka raajya hai। pahle raamraajya tha ab raavan raajya hai। bachche kehte hain baba raamraajya kahaan tha? baap kehte hain bachche woh to yahaan tha na, jisko sab chaahte hain।

tum bhaaratvaasi aadi sanaatan devi-devta dharma ke ho, hindu dharma ke nahin ho। meethe-meethe sikeeldhe laadle bachchon, tum hi pahle-pahle bhaarat mein the। tumko woh satayug ka raajya kisne diya tha? zaroor heavenly god father hi yeh varsa denge। baap samjhaate hain ki kitne aur-aur dharmo mein convert ho gaye hain। musalmaanon ka jab raajya tha to bahuton ko musalmaan banaaya। Christian ka raajya tha to bahuton ko Christian banaaya। bauddhiyon ka to yahaan raajya bhi nahin hua to bhi bahuton ko bauddhi banaaya। convert kiya hai apne dharma mein। aadi sanaatan dharma jab praayahlop ho jaae tab to phir us dharma ki sthaapna ho। to baap tum sabhi bhaaratvaasiyon ko kehte hain ki meethe-meethe bachche, tum sab aadi sanaatan devi-devta dharma ke the। tumne 84 janma liye। brahman, devta, kshatriy.... varna mein aaye। ab phir brahman varna mein aaye ho devta varna mein jaane ke liye। gaate bhi hain brahman devtaae namah, pahle braahmanon ka naam lete hain। braahmanon ne hi bhaarat ko svarga banaaya hai। yeh hai hi bhaarat ka praacheen yog। pahle-pahle jo raajayog tha, jiska geeta mein varnan hai। geeta ka yog kisne sikhlaaya tha? yeh bhaaratvaasi bhool gaye hain। baap samjhaate hain ki bachche yog to mainne sikhlaaya tha। yeh hai roohaani yog। baaki sab hain jismaani yog। sannyaasi aadi jismaani yog sikhlaate hain ki brahm se yog lagaao। woh to wrong ho jaata hai। brahm tatva to rahne ka sthaan hai। woh koi supreme rooh nahin thahra। baap ko bhool gaye hain। tum bhi bhool gaye the। tum apne dharma ko bhool gaye ho। yeh bhi drama mein noondh hai। vilaayat mein yog tha nahin। hathayog aur raajayog yahaan hi hai। woh nivritti maarga vaale sannyaasi kab raajayog sikhla na saken। sikhaaye woh jo jaanta ho। sannyaasi log to raajaai bhi chhod dete hain। gopeechanda raaja ka misaal hai na। raajaai chhod jangal mein chala gaya। uski bhi kahaani hai। sannyaasi to raajaai chhudaane vaale hain, woh phir raajayog kaise sikhla sakte। is samay saara jhaad jad jadeebhoot ho gaya hai। abhi gira ki gira। koi bhi jhaad jab jadajdeebhoot ho jaata hai to ant mein usko giraana padta hai। vaise yeh manushya srishti roopi jhaad bhi tamopradhaan hai, inmen koi saar nahin hai। inka zaroor vinaash hoga। inke pahle aadi sanaatan devi-devta dharma ki sthaapna yahaan karni hogi। satayug mein koi durgati vaala hota nahin। yeh vilaayat mein jaakar yog sikhlaate hain parantu woh hai hathayog। gyaan bilkul nahin। anek prakaar ke hathayog hain। yeh hai raajayog, isko roohaani yog kaha jaata hai। woh sab hain jismaani। manushya, manushya ko sikhaane vaale hain।

baap bachchon ko samjhaate hain ki main tumko ek hi baar yeh raajayog sikhaata hoon aur koi kadaachit sikha na sake। roohaani baap roohaani bachchon ko sikhaate hain ki maamekam yaad karo to tumhaare sab paap mit jaayenge। hathayogi kab aise kah na saken। baap aatmaon ko samjhaate hain। yeh nai baat hai। baap tumko ab dehi-abhimaani bana rahe hain। baap ko deh hai nahin। iske tan mein aate hain, iska naam badal dete hain kyonki marjeeva bana hai। jaise grihasthi jab sannyaasi bante hain to marjeeva bane, grihastha aashram chhod nivriti maarga le liya। to tumhaara bhi marjeeva banne se naam badal jaata hai। pahle shuru mein sabke naam laaye the phir jo aashcharyavat sunanti, kathanti, bhaaganti ho gaye to naam aana banda ho gaya isliye ab baap kehte hain ki ham naam den aur phir bhaag jaayen to phaaltu ho jaata hai। pahle aane vaalon ke jo naam rakhe, woh bahut ramneek the। ab nahin rakhte hain। unka rakhen jo sadaiv kaayam bhi rahen। bahuton ke naam rakhe phir baap ko phaarakti de chale gaye isliye ab naam nahin badalte hain। baap samjhaate hain ki yeh gyaan Christian ki buddhi mein bhi baithega। itna samjhenge ki bhaarat ka yog niraakaar baap ne hi aakar sikhaaya tha। baap ko yaad karne se hi paap bhasma honge aur ham apne ghar chale jaayenge। jo is dharma ka hoga aur convert ho gaya hoga to woh thahar jaayega। tum jaante ho ki manushya, manushya ki sadgati nahin kar sakte। yeh daada bhi manushya hai, yeh kehta hai ki main kiski sadgati nahin kar sakta। yeh to baba hamko sikhlaate hain ki tumhaari sadgati bhi yaad se hogi। baap kehte hain bachchon, he aatmaon mere saath yog lagaao to tumhaare vikarma vinaash honge। tum pahle golden aged pure the phir khaad pad gai hai। jo pahle devi devta 24 carat sona the, ab iron ej mein aakar pahunche hain। yeh yog kalpa-kalpa tumko seekhna padta hai। tum jaante ho usmein bhi koi poora jaante, koi kam jaante। koi to aise hi dekhne aate hain ki yahaan kya sikhaate hain। brahmaakumaar kumaariyaan itne dher bachche hain। zaroor prajaapita brahma hoga na jiske itne bachche aakar bane hain, zaroor kuchh hoga to jaakar unhon se poochhe to sahi। tumko prajaapita brahma se kya milta hai? poochhna chaahiye na! parantu itni buddhi bhi nahin hai। bhaarat ke liye khaas kehte hain। gaaya bhi jaata hai pattharbuddhi so paarasbuddhi। paarasbuddhi so pattharbuddhi। satayug treta mein paaras-buddhi golden ej the phir silver ej do kala kam hui isliye naam pada chandravanshi kyonki naapaas hue hain। yeh bhi paathshaala hai। 33 marks se jo neeche hote hain woh fail ho jaate hain। raam seeta phir unki dynasty sampoorn nahin hai isliye sooryavanshi ban na saken। naapaas to koi honge na kyonki imtahaan bhi bahut bada hai। aage government ka aai.si.S. ka bada imtahaan hota tha। sab thode hi padh sakte the। koton mein koi nikalte hain। koi chaahe to ham sooryavanshi mahaaraaja mahaaraani banen to unmein bhi badi mehnat chaahiye। mama baba bhi padh rahe hain shreemat se। ve pahle number mein padhte hain phir jo maat pita ko follow karte vahi unke takhta par baithenge। sooryavanshi 8 dynasty chalti hain। jaise Edward the first, the second chalta hai। tumhaara connection in christians se adhik hai। Christian gharaane ne bhaarat ki raajaai hap ki। bhaarat ka athaah dhan le gaye phir vichaar karo to satayug mein kitna athaah dhan hoga। vahaan ki bhent mein to yahaan kuchh bhi nahin hai। vahaan sab khaaniyaan bhartu ho jaati hain। ab to har cheej ki khaaniyaan khaali hoti jaati hain। phir chakra repeat hoga to phir sab khaaniyaan bhartu ho jaayengi।

meethe-meethe bachchon tum ab raavan par jeet paakar raajaai le rahe ho phir aadhaakalpa baad yeh raavan aayega phir tum raajaai ganva baithenge। abhi bhaaratvaasi tum kaudi misal ban gaye ho। hamne tumko heere jaise banaaya। raavan ne tumko kaudi jaisa banaaya hai। samajhte nahin ki yeh raavan kab aaya? ham kyon unko jalaate hain। kehte hain ki yeh raavan to parampara se chala aata hai। baap samjhaate hain ki aadhaakalpa ke baad yeh raavan raajya shuru hota hai। vikaari banne kaaran apne ko devi devta kah nahin sakte। vaastav mein tum devi devta dharma ke the। tumhaare jitna sukh koi nahin dekh sakte। sabse adhik gareeb bhi tum bane ho। doosre dharma vaale baad mein vriddhi ko paate hain। Christ aaya, pahle to bahut thode the। jab bahut ho jaaen tab to raajaai kar saken। tumko to pahle raajaai milti hai। yeh to sab gyaan ki baaten hain। baap kehte hain he aatmaayen mujh baap ko yaad karo। aadhaakalpa tum deh-abhimaani rahe ho। ab dehi-abhimaani bano। ghadi-ghadi yeh bhool jaate ho kyonki aadhaakalpa ki kat chadhi hui hai। is samay tum brahman choti ho। tum ho sabse oonch। sannyaasi brahm se yog lagaate hain unse vikarma vinaash nahin hote। har ek ko sato rajo tamo mein aana zaroor hai। vaapis koi bhi ja nahin sakte। jab sabhi tamopradhaan ban jaate hain tab baap aakar sabhi ko satopradhaan banaate hain arthaat sabhi ki jyoti jag jaati hai। har ek aatma ko apna-apna part mila hua hai। tum ho hero heroine paartadhaari। tum bhaaratvaasi sabse oonche ho jo raajya lete ho phir ganvaate ho aur koi raajya nahin leta। woh raajya lete hain baahubal se। baba ne samjhaaya hai jo vishwa ke maalik the vahi banenge। to sachcha raajayog baap ke sivaae koi sikhla na sake। jo sikhaate hain woh sab aythaartha yog hai। vaapis to koi bhi ja nahin sakte। abhi hai ant। sabhi duhkh se chhootte hain phir nambarvaar aana hai। pahle sukh dekhna hai phir duhkh dekhna hai। yeh sab samajhne ki baaten hain। kaha jaata hai hath kaar de dil yaar de। kaam karte raho baaki buddhi yog baap se ho।

tum aatmaayen aashik ho ek maashook ki। abhi woh maashook aaya hua hai। sabhi aatmaon (sajniyon) ko gul-gul banaae le jaayenge। behad ka saajan behad ki sajniyaan hain। kehta hai main sabko le jaaoonga। phir nambarvaar purushaartha anusaar jaakar pad paayenge। bhal grihastha vyavhaar mein raho, bachchon ko sambhaalo। he aatma tumhaari dil baap ki taraph ho। yahi yaad ki practice karte raho। bachche jaante hain abhi ham svargavaasi bante hain, baap ko yaad karne se। student ko to bahut khushi mein rehna chaahiye। yeh to bada sahaj hai। drama anusaar sabko raasta bataana hai। koi se debate karne ki darkaar nahin hai। abhi tumhaari buddhi mein saari knowledge aa gayi hai। manushya beemaari se chhootte hain to badhaaeeyaan dete hain। yahaan to saari duniya rogi hai। thode samay mein jayjay-kaar ho jaayegi। achha!

meethe-meethe sikeeldhe bachchon prati maat pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sachche-sachche aashik ban haathon se kaam karte buddhi se maashook ko yaad karne ki practice karni hai। baap ki yaad se ham svargavaasi ban rahe hain, is khushi mein rehna hai।

2) sooryavanshi dynasty mein takhtansheen banne ke liye maat-pita ko poora-poora follow karna hai। baap samaan knowledgeful ban sabko raasta bataana hai।

vardaan:- taaj aur tilak ko dhaaran kar baapdaada ke madadgaar banne vaale diltakhtansheen bhav

jab koi takhta par baithte hain to tilak aur taaj unki nishaani hoti hai। aise jo dil takhtansheen hain unke mastak par sadaiv avinaashi aatma ki sthiti ka tilak door se hi chamakta hua najar aata hai। sarva aatmaon ke kalyaan ki shubh bhaavna unke naynon se va mukhde se dikhaai deti hai। unka har sankalp, vachan aur karma baap ke samaan hota hai।

slogan:- saral yaad ke liye saralta ka gun dhaaran karo, sanskaaron ko saral banaao।

ye avyakt ishaare- “nishchay ke foundation ko majboot kar sada nirbhay aur nishchint raho"

vijayi banne ka foundation hai “nishchay'', foundation agar pakka hai to building hil nahin sakti, nishchint rehte hain। lekin sirf baap mein nishchay nahin, apne aapmen bhi nishchay aur drama mein bhi nishchay। vaah drama vaah! agar drama mein nishchay hoga to akalyaan ki baat bhi kalyaan mein badal jaayegi।