Murli du jour du jeudi 14 mai 2026

14-05-2026 praatahmurli om shanti "baapdaada"' madhuban

“meethe bachche - jaise baba pyaar ka saagar hai, unke jaisa pyaar duniya mein koi kar nahin sakta, aise tum bachche bhi baap samaan bano, kisi ko ranj (naaraaz) mat karo''

prashn:- kis prakaar ke khyaalaat (vichaar) chalte rahen to khushi ka paara chadha rahega?

uttar:- abhi ham gyaan ratnon se apni jholi bhar rahe hain phir yeh khaaniyaan aadi sab bharpoor ho jaayengi। vahaan (sat-yug mein) ham sone ke mahal banaayenge। 2- hamaara yeh brahman kul uttam kul hai, ham sachchi-sachchi satya naaraayan ki katha, amraktha sunte aur sunaate hain… aise aise khyaalaat chalte rahen to khushi ka paara chadha rahega।

om shanti। bachche baap ki yaad mein baithe hain, yeh shreemat arthaat shreshtha te shreshtha mat milti hai। yaad ki yaatra bahut meethi hai। bachche nambarvaar purushaartha anusaar jaante hain ki jitna baap ko yaad karenge utna baba sweet lagega। saccharin hai na। ek baap hi pyaar karte hain baaki to sab maar dete hain। duniya saari ek do ko thukraati hai। baap pyaar karte hain, unko sirf tum bachchon ne jaana hai। baap kehte hain - main jo hoon, jaisa hoon, kitna bada hoon, bataao hamaara baap kitna bada hai? to kehte hain bindi hai aur to koi jaante nahin। bachche bhi ghadi-ghadi bhool jaate hain। kehte hain bhakti maarga mein to bade-bade chitron ki pooja karte the। ab bindi ko kaise yaad karen? bindi, bindi ko hi yaad karegi na। aatma jaanti hai ham bindi hain। hamaara baap bhi aise hai। aatma hi president hai, aatma hi naukar hai। part aatma hi bajaati hai। baap hai sabse sweet। sab yaad karte hain he patit-paavan, duhkh-harta sukh-karta aao। ab tum bachchon ko yeh nishchay hai ham jisko bindi kehte hain, woh bahut sookshm hai parantu mahima kitni bhaari hai। bhal mahima gaate bhi hain gyaan ka saagar, shanti ka saagar hai, parantu samajhte nahin ki woh kaise aakar sukh dete hain। meethe-meethe children har ek samajh sakte hain - kaun-kaun kitna shreemat par chalte hain। shreemat milti hai service karne ki। bahut manushya beemaar rogi hain, bahut hain jo healthy bhi hain। bhaaratvaasi jaante hain satayug mein aayu bahut badi average 125-150 varsha ki thi। har ek apni full aayu poori karte hain। yeh to bilkul hi chhi-chhi duniya hai jo baaki thoda samay hi hai।

manushya badi-badi dharmashaalaayen aadi abhi tak banaate rehte hain। jaante nahin hain, yeh baaki kitna samay hogi। mandir aadi banaate hain, laakhon roopaya kharcha karte hain। unki aayu baaki kitna samay hogi? tum jaante ho yeh to toote ki toote। tumko baba makaan aadi banaane ke liye kabhi mana nahin karte hain। tum apne hi ghar mein ek kamre mein hospital kam university banaao। bigar koi kharcha, health, wealth, happiness 21 janmon ke liye lena hai, is knowledge se। yeh bhi samjhaaya hai - tumko sukh bahut milta hai। jab tamopradhaan bane tab jaasti duhkh hota hai। jitna-jitna tamopradhaan bante jaayenge utna duniya mein duhkh-ashaanti badhti jaayegi। manushya bahut duhkhi honge। phir jay-jaykaar ho jaayegi। tum bachchon ne jo vinaash, divya drishti se dekha hai so phir practical mein dekhna hai। sthaapna ka saakshaatkaar bhi bahuton ne kiya hai। chhoti bachchiyaan bahut saakshaatkaar karti thi। gyaan kuchh bhi nahin tha। puraani duniya ka vinaash bhi zaroor hona hai। tum bachche jaante ho - baap hi aakar svarga ka varsa dete hain। parantu bachchon ko phir purushaartha karna hai, oonch pad paane ka। tum bachchon ko baap baith, yeh sab baaten samjhaate hain, woh thode hi jaante hain ki baaki thoda samay hai। baap kehte hain - main hoon daata, main tumko dene aaya hoon। manushya kehte hain - patit-paavan aao, aakar hamko paavan banaao।

baap kehte hain - pahle tum kitne samajhdaar the, satopradhaan the। abhi to tamopradhaan ban pade ho। tumhaari buddhi mein bhi ab aaya hai, aage thode hi samajhte the ki ham vishwa par raajya karte the। tum vishwa ke maalik the phir zaroor banenge। history-geography repeat hogi। baap ne samjhaaya hai - 5000 varsha pahle main aaya tha, tumko svarga ka maalik banaaya tha। phir tum 84 janmon ki seedhi utarte ho। yeh vistaar koi bhi shaastra mein nahin hai। shivbaaba ne koi shaastra aadi padha hai kya? unko to gyaan ki authority kaha jaata hai। vo log bhi shaastra aadi padhkar shaastron ki authority bante hain। woh bhi to gaate hain - patit-paavan aao। ganga snaan karne jaate hain। vaastav mein yeh bhakti hai hi grihasthiyon ke liye। baap baith samjhaate hain, unko bhi pata nahin ki sadgati daata kaun hai। baap samjhaate hain - tum mujhe bulaate bhi ho, he patit-paavan aao। main tumko paavan banaata hoon। main tumko padhaane ke liye aata hoon, aise nahin ki ham par kripa karo। main to teacher hoon, tum kripa aadi kyon maangate ho? aasheervaad to anek janma lete aaye ho। ab aakar maa-baap ki milkiyat ka maalik bano aur aasheervaad kya karenge! bachcha paida hua aur baap ki milkiyat ka maalik bana। laukik baap ko kehte hain, ki kripa karo। yahaan to kripa ki baat nahin hai। sirf baap ko yaad karna hai। yeh bhi kisko pata nahin hai ki baba bindu hai। abhi tumko baap ne bataaya hai, sabhi kehte bhi hain parampita paramatma, god father, supreme soul। to param aatma thahre na। woh hai supreme। baaki sab aatmaayen hain na। supreme baap aakar aap samaan banaate hain aur kuchh nahin hai। koi ki buddhi mein hoga kya ki behad ka baap jo svarga ka rachayita hai, woh aakar svarga ka maalik banaate hain! tum abhi jaante ho, shreekrishna ke haath mein svarga ka gola hai। garbha se bachcha baahar nikalta hai tab se aayu shuru hoti hai। shreekrishna to poore 84 janma lete hain। garbha se baahar aaya, us din se 84 janma ginenge। lakshmi-naaraayan ko to bada hone mein 30-35 varsha lage na। to woh 30-35 varsha 5 hajaar se kam karna pade। shivbaaba ka to ginti nahin kar sakte। shivbaaba kab aaye, time de nahin sakte। shuru se saakshaatkaar hote the। musalmaan log bhi bageecha aadi dekhte the। yeh naudha bhakti to koi ne nahin ki। ghar baithe aapehi dhyaan mein jaate rehte the। woh to kitni naudha bhakti karte hain।

abhi baap baith sammukh samjhaate hain। baba doordesh se aaya hai, yeh bachche jaante hain। ismen pravesh kar hamko padhaate hain। lekin phir baahar jaane se nasha kam ho jaata hai। yaad rahe to khushi ka paara bhi chadha rahe aur karmaateet avastha ho jaae, parantu usmein time chaahiye। ab dekho, shreekrishna ki aatma ko antim janma mein full gyaan hai phir garbha se baahar niklenge, paai ka bhi gyaan nahin hoga। baap aakar samjhaate hain - shreekrishna ne koi murli bajaai nahin। woh to gyaan jaante hi nahin। lakshmi-naaraayan hi nahin jaante to phir rishi, muni, sannyaasi aadi kaise jaanenge। vishwa ke maalik lakshmi-naaraayan ne hi nahin jaana to phir yeh sannyaasi log kaise jaanenge। kehte hain shreekrishna saagar mein peepal ke patte par aaya, yeh kiya... yeh sab kahaaniyaan hain, jo baith likhi hain। kehte hain nadi mein pair daala to woh neeche chali gai, vichaar karo - manushya kya-kya baaten bana sakte hain। ab baap samjhaate hain, koi bhi ulti-sulti baaton par kabhi vishvaas nahin karna। shaastra aadi kitne manushya padhte hain। baap kehte hain - padha hua sab bhool jaao। is deh ko bhi bhool jaao। aatma hi ek shareer chhod doosra lekar part bajaati hai। bhinna-bhinna naam, roop, desh chola pahankar। ab baap kehte hain - yeh chhi-chhi vastra hain। aatma aur shareer donon patit hain। aatma ko hi shyaam aur sundar kaha jaata hai। aatma pavitra thi to sundar thi phir kaam chita par baithne se kaale bane hain। ab phir baap gyaan chita par bithaate hain। patit-paavan baap kehte hain - mujhe yaad karo to yeh khaad hi nikal jaayegi। aatma mein hi khaad padti hai। kaliyug ant mein tum gareeb ho। vahaan satayug mein phir tum sone ke mahal banaayenge। wonder hai, yahaan heeron ka dekho kitna maan hai। vahaan to pattharon misal hote hain। abhi tum baap se gyaan ratnon ki jholi bhar rahe ho। likha hua hai saagar se ratnon ki thaaliyaan bhar le aate hain। saagar se jitna bhi chaahiye utna lo। khaaniyaan hi bhartu ho jaati hain। tumne saakshaatkaar kiya hai। maaya-machchhandar ka bhi khel dikhaate hain। usne dekha sone ki eeten padi hain, le jaata hoon। neeche aaya to kuchh tha nahin। vahaan to sone ki eeton ke mahal banaayenge। aise-aise khyaalaat aane chaahiye to khushi ka paara chadhe। baap ka parichay dena hai। shivbaaba 5 hajaar varsha pahle bhi aaya tha, yeh kisko pata nahin hai। tum jaante ho 5 hajaar varsha pahle aakar tumko raajayog sikhaaya tha, kalpa-kalpa tumko hi sikhaayenge। jo-jo aakar brahman banenge woh phir devta banenge। viraat roop bhi banaate hain। usmein braahmanon ki choti gum kar di hain। braahmanon ka kul bahut uttam gaaya jaata hai, woh hai jismaani। tum ho roohaani। tum sachchi-sachchi katha sunaate ho। yahi satya naaraayan ki katha, amraktha hai। tumko amraktha sunaae amar bana rahe hain। yeh mrityulok khatma hona hai।

shivbaaba kehte hain - main tumko lene aaya hoon। kitni dher aatmaayen hongi। aatma vaapas ghar mein jaati hai to koi aavaaj thode hi hota hai। madhumakkhiyon ka jhunda jaata hai to aavaaj kitna hota hai। raani ke pichhaadi madhumakkhiyaan sab bhaagti hain। unki aapas mein kitni ekta hai। bhramri ka bhi misaal yahaan ka hai। tum manushya se devta bana dete ho। patiton ko tum gyaan ki bhoon-bhoon karte ho to paavan vishwa ka maalik ban jaate hain। tumhaara hai pravritti maarga, usmein bhi majority maataaon ki hai isliye vande maatram kaha jaata hai। brahmaakumaari woh jo baap dvaara 21 janma ka varsa dilaati hai। baap sada sukh ka varsa dete hain। jo service karenge, likhenge-padhenge honge navaab...। raaja banna achha va naukar banna achha। pichhaadi ke samay tumko sab maaloom pad jaayega। ham kya banenge? phir pachhtaayenge। ham shreemat par kyon nahin chale! baap kehte hain - follow karo। aise bhi nahin koi ek kamra de dete hain, centre ke liye, khud meet aadi khaate rehte hain। woh punya aatma, woh paap aatma, phir aashram nahin rahega। ghar mein svarga banaate hain to khud bhi svarga mein hone chaahiye na। sirf aasheervaad par nahin thaharna hai। baap ko yaad karna hai। pavitra banaakar hi saath le jaayenge। tumko to bahut khushi rahni chaahiye, kitni bhaari lottery milti hai। baap ko jitna yaad karenge, utna vikarma vinaash honge। baap jitna pyaar, duniya mein koi kar nahin sakta। unko kaha hi jaata hai - pyaar ka saagar। tum bhi aise bano। agar kisko duhkh diya, ranj (naaraaj) kiya to ranj hokar marenge। yeh koi baba shraap nahin dete hain, samjhaate hain। sukh do to sukhi honge, sabko pyaar karo। baba bhi pyaar ka saagar hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kisi bhi ulti-sulti baat par vishvaas nahin karna hai। jo bhi ulta padha hai use bhool ashareeri banne ka abhyaas karna hai।

2) sirf aasheervaad par nahin chalna hai। svayan ko pavitra banaana hai। baap ko har kadam mein follow karna hai, kisi ko bhi duhkh nahin dena hai। naaraaz nahin karna hai।

vardaan:- sachchi lagan ke aadhaar par aur sang tod ek sang jodne vaale sampoorn vaphaadaar bhav

sampoorn vaphaadaar unhein kaha jaata hai jinke sankalp va svapna mein bhi sivaae baap ke aur baap ke kartavya va baap ki mahima ke, baap ke gyaan ke aur kuchh bhi dikhaai na de। ek baap doosra na koi... buddhi ki lagan sada ek sang rahe to anek sang ka rang lag nahin sakta isliye pahla vaayda hai aur sang tod ek sang jod - is vaayde ko nibhaana arthaat sampoorn vaphaadaar banna।

slogan:- satyata ki sva-sthiti paristhitiyon mein bhi sampoorn bana degi।

ye avyakt ishaare - sada achal, adol, ekras sthiti ka anubhav karo

ham oonch te oonch baap ke bachche hain, yeh yaad rahne se ekras avastha rahegi। jab ek se sambandh rehta hai tab avastha bhi ekras rehti hai। agar aur kahaan sambandh ki rag jaati hai to ekras avastha nahin rahegi। to ekras avastha banaane ke liye sivaae ek ke aur kuchh bhi dekhte hue na dekho।