Murli du jour du jeudi 25 juin 2026

25-06-2026 praatahmurli om shanti "baapdaada"' madhuban

“meethe bachche - paavan banne ka ekmaatra upaay hai - baap ki yaad, yaad ki mehnat hi ant mein kaam aayegi''

prashn:- sangam par kaun sa tilak do to svarga ki raajaai ka tilak mil jaayega?

uttar:- sangam par yahi tilak do ki ham aatma bindi hain, ham shareer nahin। andar mein yahi ghotte raho ki ham aatma hain, humein baap se varsa lena hai। baba bhi bindi hai, ham bhi bindi hain। is tilak se svarga ki raajaai ka tilak praapta hoga। baba kehte hain main guarantee karta hoon - tum yaad karo to aadhaakalpa ke liye rone se chhoot jaayenge।

om shanti। yeh phurna chaahiye ki mujh aatma ko baap ko zaroor yaad karna hai tab paavan ban sakte hain। mehnat jo kuchh hai, woh yahi hai, jo mehnat bachchon se pahunchti nahin hai। maaya bahut hairaan karti hai। ek baap ki yaad bhula deti hai, doosre ki yaad aa jaati hai। baap athva saajan ko yaad nahin karte hain। aise saajan ko to kam se kam 8 ghanta yaad karne ki service deni hai arthaat saajan ko madad deni hai - yaad karne ki। athva bachchon ko baap ko yaad karna chaahiye - yeh hai bahut badi mehnat। geeta mein bhi hai manamnaabhav। baap ko yaad karte raho। uthte-baithte, chalte-phirte ek baap ko hi yaad karte raho aur kuchh nahin। pichhaadi ko yeh yaad hi kaam aayegi। apne ko aatma ashareeri samjho, ab hamko vaapis jaana hai। yeh mehnat bahut karni hai। savere snaan aadi karke phir ekaanta mein oopar chhat par va haal mein aakar baith jaao। jitna ekaanta ho utna achha hai। hamesha yahi khyaal karo ki hamko baap ko yaad karna hai। baap se poora varsa lena hai। yeh mehnat har 5 hajaar varsha baad tumko karni padti hai। satayug, treta, dvaapar, kaliyug - kahaan bhi tumko yeh mehnat nahin karni padegi। is sangam par hi tumko baap kehte hain ki mujhe yaad karo, bas। yahi vela hai jab baap kehte hain mujhe yaad karo। baap aate bhi sangam par hain aur kabhi baap aate hi nahin। tum bhi nambarvaar purushaartha anusaar jaante ho। bahut bachche baap ko bhool jaate hain isliye bahut dhokha khaate hain, raavan bahut dhokhebaaj hai। aadhaakalpa ka yahi dushman hai isliye baap kehte hain roz savere uthkar yeh vichaar saagar manthan karo aur yahi chart rakho - kitna samay hamne baap ko yaad kiya! kitni junk utri hogi! saara madaar yaad ke oopar hai। bachchon ko poori koshish karni hai, apna poora varsa paane liye। nar se naaraayan banna hai। yeh hai sachchi satya naaraayan ki katha। bhakta log poornamaasi ke din satya naaraayan ki katha karte hain। abhi tum jaante ho 16 kala sampoorn banna hai। woh banenge satya baap ko yaad karne se। baap hai shreemat dene vaala। baap kehte hain grihastha mein raho, dhandha-dhori aadi kuchh bhi karo। baap ko yaad zaroor karna hai aur paavan banna hai। bas। yaad nahin karenge to raavan se kahaan na kahaan dhokha khaate rahenge isliye mool baat samjhaate hain yaad ki। shivbaaba ko yaad karna hai। deh sahit deh ke jo bhi sambandhi hain unko bhool apne ko aatma nishchay karo। baap baar-baar samjhaate hain - apne ko aatma samajh baap ko yaad karna hai। nahin to phir ant mein bahut-bahut pachhtaayenge। bahut dhokha khaayenge। koi aisa jor se thappad lagega jo maaya ekdam kaala munh kara degi। baap aaye hain gora munh banaane। is samay sab ek do ka kaala munh karte rehte hain। gora banaane vaala ek hi baap hai, jiski yaad se tum gore svarga ke maalik banenge। yeh hai hi patit duniya। baap aate hi hain patiton ko paavan banaane। baaki tumhaare dhandhe-dhori aadi se baba ka koi sambandh nahin hai। shareer nirvaah arth tumko jo karna hai so karo। baap to sirf kehte hain manamnaabhav। tum kehte bhi ho ham kaise paavan duniya ka maalik banen। baap kehte hain sirf mujhe yaad karo। bas। aur koi upaay paavan banne ka hai nahin। kitna bhi daan-punya aadi karen, kitni bhi mehnat karen। chaahe aag se aate jaate rahen, kuchh bhi kaam nahin aa sakta - sivaae ek baap ki yaad ke। bahut simple baat hai, isko kaha jaata hai - sahaj yog। apne se poochho ham apne meethe-meethe baap ko saare din mein kitna yaad karte hain! neend mein to koi paap nahin hote hain। ashareeri ho jaate hain। baaki din mein bahut paap hote rehte hain aur puraane paap bhi bahut hain। mehnat karni hai yaad ki। yahaan aate ho to yeh mehnat karni hai। baahar ke vaahyaat sankalpon ko uda do। nahin to vaayumandal bada kharaab kar dete hain। ghar ke, kheti-baadi ke khyaalaat chalte rehte hain। kabhi bachche yaad padenge, kabhi guru ki yaad aayegi। sankalp chalte rahenge to vaayumandal ko kharaab kar denge। mehnat nahin karne vaale vighna daalte hain। yeh itni maheen baaten hain। tum bhi abhi jaante ho - phir kabhi nahin jaanenge। baap abhi hi varsa dete hain phir aadhaakalpa ke liye nishchint ho jaate hain। laukik baap ke phurne (khyaalaat) aur behad baap ke phurne mein kitna antar hai। baap kehte hain ki bhakti maarga mein mujhe kitna phurna rehta hai। bhagat kitna ghadi-ghadi yaad karte hain। satayug mein koi bhi yaad nahin karte। baap kehte hain ki tumko itna sukh deta hoon jo tumko mujhe vahaan yaad karne ki darkaar hi nahin rahegi। ham jaante hain hamaare bachche sukhdhaam, shantidham mein baithe hain। doosra koi manushya samajh na sake। aise baap mein nishchaybuddhi hone mein maaya vighna daalti hai। baap kehte hain ki sirf mujhe yaad karo to tumhaare mein jo alloy pad gai hai, chaandi, taamba, loha…woh nikal jaayegi। golden ej se silver mein aane se bhi do kala kam hoti hain। yeh baaten tum sunte aur samajhte ho। jo sachcha brahman hoga unko achhi reeti buddhi mein baithega, nahin to baithega nahin। yaad tikegi nahin। saara madaar baap ko yaad karne par hai। baar-baar kehte hain bachche baap ko yaad karo। yeh baba bhi kahenge shivbaaba ko yaad karo। shivbaaba khud bhi kahenge mujh baap ko yaad karo। aatmaon ko kehte hain he bachchon। woh niraakaar paramatma bhi aatmaon ko kahenge। mool baat hi yeh hai। koi bhi aaye to unko pahle-pahle bolo ki alpha ko yaad karo aur koi teek-teek nahin karni hai। sirf bolo - apne ko aatma samajh baap ko yaad karo। yahi andar ghotna hai। ham aatma hain, gaate bhi hain na tulseedaas chandan ghise, tilak det raghuveer...tilak koi sthool thode hi hai। tum samajhte ho ki tilak vaastav mein is samay ka yaadgaar hai। tum yaad karte rehte ho goya raajaai ka tilak dete ho। tumko raajaai ka tilak milega, double sirtaaj banenge। raajaai ka tilak milega arthaat svarga ke mahaaraaja, mahaaraani banenge। baap kitna sahaj bataate hain। bas sirf yeh yaad karo - ham aatma hain, shareer nahin। hamko baap se varsa lena hai।

tum jaante ho ham aatma bindi misal hain, baba bhi bindi hai। baba gyaan ka saagar, sukh ka saagar hai। woh hamko vardaan dete hain। inke baaju mein aakar baithte hain। guru apne shishya ko baaju mein bithaae sikhaate hain। yeh bhi baaju mein baithe hain। bachchon ko sirf kehte hain apne ko aatma samjho, maamekam yaad karo। satayug mein bhi tum apne ko aatma samajhte ho, parantu baap ko nahin jaante ho। ham aatma shareer chhodte hain phir doosra lena hai। drama anusaar tumhaara part hi aisa hai isliye tumhaari aayu vahaan badi rehti hai, pavitra rehte ho। satayug mein aayu badi rehti hai, kaliyug mein chhoti ho jaati hai। vahaan hain yogi, yahaan hain bhogi। pavitra hote hain yogi। vahaan raavan raajya hi nahin hai। aayu badi rehti hai। yahaan aayu kitni chhoti hoti hai, isko karma bhog kaha jaata hai। vahaan akaale mrityu kabhi hota nahin। to baap kehte hain ki baap ko pahchaana hai to shreemat par chalo। ek baap ko yaad karo। apne ko aatma samjho। hamko ab jaana hai, yeh shareer chhodna hai। baaki time service mein lagaana hai।

tum bachche bahut gareeb ho isliye baap ko taras padta hai। tum budhiyon, kubjaaon aadi ko koi takleeph nahin dete hain। budhi ko kubja kaha jaata hai। budhiyon ko samjhaaya jaata hai - baap ko yaad karo। tumse koi poochhe kahaan jaati ho? bolo, geeta paathshaala mein jaate hain।

bachche pradarshani aadi par kitna kharcha karte hain, likhte bhi hain phalaana achha prabhaavit hua। parantu baba kehte hain ek bhi aise nahin likhta ki barobar is samay behad ka baap is brahma tan mein aaya hua hai, usse hi svarga ka varsa mil sakta hai। baba samajh jaate hain ki ek ko bhi nishchay nahin hua hai। sirf prabhaavit hote hain, yeh gyaan bahut achha hai। seedhi theek reeti se dikhaai hai। parantu khud yog mein rah tamopradhaan se satopradhaan banen, woh nahin karte। sirf kehte hain - samjhaani bahut achhi hai, paramatma se varsa paane ki। parantu khud paayen, woh nahin। kuchh bhi purushaartha nahin karte hain, praja dher banegi। baaki raaja banen woh mehnat hai। har ek apni dil se poochhe ki ham kahaan tak baap ki yaad mein harshit rehte hain? ham phir se so devta bante hain। aise-aise apne saath ekaanta mein baith baaten karo, try karke dekho। baap ko yaad karte raho to baap guarantee dete hain - tum aadhaakalpa kabhi royenge nahin। abhi tum kehte ho baba aakar hamko raavan maaya par jeet pahnaate hain। jo jitni mehnat karte hain, apne liye hi karte hain। phir tum aayenge nai duniya mein। puraani duniya ka hisaab-kitaab bhi chuktu karna hai jabki tumko tamopradhaan se satopradhaan banna hai। paavan banne ki yukti bhi bataate hain। yeh hai kayaamat ka samay, sabka vinaash hona hai। nai duniya ki sthaapna honi hai। tum jaante ho ham is mrityulok mein yeh shareer chhod phir nai duniya amarlok mein aayenge। ham padhte hi hain nai duniya ke liye aur koi aisi paathshaala nahin, jahaan bhavishya ke liye padhaate ho। haan, jo bahut daan-punya karte hain to raaja ke paas janma lete hain। golden spoon in mouth kaha jaata hai। satayug mein tumko milta hai, kaliyug mein bhi jo raajaaon ke paas janma lete hain unko bhi milta hai phir bhi yahaan to anek prakaar ke duhkh rehte hain। tumko to bhavishya 21 janma ke liye koi duhkh nahin hoga। kabhi beemaar nahin padenge, golden spoon in svarga। yahaan hai alpakaal ke liye raajaai। tumhaari hai 21 janma ke liye। buddhi se achhi reeti kaam lena hai, phir samjhaana hai। aise nahin ki bhakti maarga mein raaja nahin ban sakte hain। koi college athva hospital banaate hain to unko bhi evja milta hai। hospital banaate hain to doosre janma mein achhi tandaroosti rahegi। kehte hain na - inko saari aayu mein bukhaar bhi nahin hua। badi aayu hoti hai। bahut daan aadi kiya hai, hospital aadi banaate hain tab aayu badhti hai। yahaan to yog se tum ever healthy-wealthy bante ho। yog se tum 21 janma ke liye shapha paate ho। yeh to bahut badi hospital, bahut badi college hai। baap har baat achhi reeti samjhaate hain। baap kehte hain jisko jahaan maza aaye, jahaan dil lage, vahaan jaakar padhaai padh sakte hain। aise nahin ki hamaare centre par aayen, inke paas kyon jaate hain। nahin, jisko jahaan chaahiye vahaan jaaye। baat to ek hi hai। murli to padhkar sunaate hain। woh murli yahaan se jaati hai phir koi vistaar se achha samjhaate hain, koi sirf padhkar sunaate hain। bhaashan karne vaale achhi lalkaar karte honge। kahaan bhi bhaashan ho - pahle-pahle bataao shivbaaba kehte hain apne ko aatma samajh mujh baap ko yaad karo to tumhaare vikarma vinaash honge aur paavan ban paavan duniya ka maalik banenge। kitna sahaj samjhaate hain। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baahar ke vaahyaat (vyartha) khyaalaaton ko chhod ekaanta mein baith yaad ki mehnat karni hai। savere-savere uthkar vichaar saagar manthan karna aur apna chart dekhna hai।

2) jaise bhakti mein daan-punya ka mahatva hai, aise gyaan maarga mein yaad ka mahatva hai। yaad se aatma ko ever healthy-wealthy banaana hai। ashareeri rahne ka abhyaas karna hai।

vardaan:- combined roop ki seva dvaara aatmaon ko sameep sambandh mein laane vaale combined roopdhaari bhav

sirf aavaaj dvaara seva karne se praja banti ja rahi hai lekin aavaaj se pare sthiti mein sthit ho phir aavaaj mein aao, avyakt sthiti aur phir aavaaj - aise combined roop ki seva vaaris banaayegi। aavaaj dvaara prabhaavit hui aatmaayen anek aavaaj sunne se aavaagman mein aa jaati hain lekin combined roopdhaari ban combined roop ki seva karo to un par kisi bhi roop ka prabhaav pad nahin sakta।

slogan:- saadhnon mein behad ke vairaagyavritti ki saadhna merge hone na do।

ye avyakt ishaare - sada harshit rahne ke liye apni nature ko saral banaao, sahansheel bano।

jo sahansheel bachche hain ve apni sahansheelta ki shakti se kaise bhi kathor sanskaar vaale ko, kaise bhi kathin kaarya ko sheetal bana dete hain va sahaj kar dete hain। sahansheelta ke gun vaala gambheer hoga aur gahraai mein jaayega। woh kabhi ghabraayega nahin। gahraai mein jaakar saphalta praapta karega।