Murli du jour du samedi 1 août 2026

01-08-2026 praatahmurli om shanti "baapdaada"' madhuban

“meethe bachche - parchintan chhod apna kalyaan karo, tum sone jaisa bankar auron ko raasta bataao''

prashn:- ashareeri banne ka abhyaas jo sada karte rehte, unki mukhya nishaani sunaao?

uttar:- ve hath se apni karmendriyon ko vash nahin karte। lekin unki karmendriyaan svatah sheetal ho jaati hain। ham aatma bhaai-bhaai hain, yeh smriti svatah rehti hai। deh-abhimaan chhootta jaata hai। naam roop ka nasha khatma hota jaata hai। doosron ki yaad nahin aati hai।

geet:- tu pyaar ka saagar hai…

om shanti। yeh koi sirf pyaar ka saagar nahin, gyaan ka saagar hai। gyaan aur agyaan। gyaan ko din, agyaan ko raat kaha jaata hai। gyaan akshar hi achha hai। agyaan akshar bura hai। aadhaakalpa hai gyaan ki praalabdha। aadhaakalpa hai agyaan ki praalabdha, agyaan ki praalabdha hai duhkh। gyaan ki praalabdha sukh hai। yeh to bahut sahaj samajhne ki baaten hain, din hai gyaan ka। raat hai agyaan, yeh bhi kisko pata nahin hai। gyaan kisko kaha jaata hai, agyaan kisko kaha jaata hai, yeh behad ki baaten hain। tum sabko samjhaate ho gyaan kya hai, bhakti kya hai। gyaan se tum poojya ban rahe ho। jab poojya ban jaate ho to pooja ki saamagri ko jaan jaate ho। yeh bhi tum jaante ho ki yeh jo mandir aadi hain, yeh sab yaadgaar hain। unki jeevan kahaani ko bhi tum jaante ho। jo pooja karne jaate hain woh khud nahin jaante। pooja ko bhakti kaha jaata hai, bhagwan ko bhakton se milna hai - bhakti ka phal dene ke liye। so bhagwan hi aakar pujaari se poojya banaate hain। poojya satayug mein pujaari kaliyug mein hote hain। tum bachche jaante ho aaj kya hain, kal kya hona hai। vinaash to zaroor hone ka hai, koi bhi samay ho sakta hai। taiyaari ho rahi hai। gaaya hua bhi hai anek kudarti aapdaayen hoti hain। yeh to likh dena chaahiye - grih yuddha aur kudarti aapdaayen, unko koi eeshvareey aapdaayen nahin kahenge। yeh to drama ki noondh hai, jismen natural calamities sab aane vaali hain। vinaash mein bhi madad karenge। mooslaadhaar barsaat padegi। bhookhon marenge, earthquake aadi sab aane ki hain। in dvaara hi vinaash hone ka hai। bachche jaante hain, yeh to zaroor hone ka hai। nahin to satayug mein itne thode manushya kaise honge, zaroor ikattha vinaash hoga। bachche achhi reeti jaante hain, yeh sab kapde dhoye jaayenge। yeh behad ki badi machinery hai। gaaya jaata hai moot paleeti kapad dhoe... in kapdon ki baat nahin। yeh hai shareer ki baat। aatmaon ko yogbal se dhona hai। is samay 5 tatva tamopradhaan hain to shareer bhi aise bante hain। patit-paavan baap aakar paavan banaate hain aur sab khalaas ho jaate hain। tum jaante ho paavan kaise bante hain। raasta bahut sahaj bataate hain। manushya to kuchh bhi nahin samajhte। jahaan-jahaan bhakti yagya aadi hote hain, vahaan jaakar samjhaana chaahiye ki jinki tum bhakti karte ho unki biography samajhne se hi tum devta ban sakte ho। unhonne jeevanmukti kaise paai so to samjho, to tum bhi jeevanmukti pa sakte ho। mandiron mein baith jeevan kahaani samjhaane se achhi reeti samjhenge।

tum bhi baap se abhi jeevan kahaani sunte ho, tum bachchon ko kitni samajh milti hai। parampita paramatma ki jeevan kahaani koi bhi nahin jaante। sarvavyaapi kahne se jeevan kahaani thode hi ho jaati hai। tum bachche abhi parampita paramatma ki jeevan kahaani ko jaante ho, yaani aadi-madhya-ant ko jaante ho। is samay ko aadi kahenge। jabki baap aakar patiton ko paavan banaate hain phir madhya mein bhakti ka part chalta hai। baap kehte hain is samay main aakar sthaapna karta, karaata hoon। karan-karaavanhaar hoon। prerna ko karna nahin kahenge। baba aakar inki karmendriyon dvaara karte hain, ismen prerna ki baat nahi। karan-karaavanhaar to zaroor sammukh ho karaayenge। prerna se kuchh bhi nahin ho sakta। aatma, bigar shareer kuchh bhi nahin kar sakti hai। bahut kehte hain eeshvar hi prerna se sab kuchh karta hai। baba aap prerna karo, hamaare pati ki buddhi theek ho jaae। baap kehte hain - prerna ki to ismen baat hi nahin। phir shiv jayanti kyon manaai jaati। prerna se kaam ho to phir aaye hi kyon? ek to eeshvar kya cheez hai, yeh nahin jaante। sirf kah dete eeshvar ki prerna se sab kuchh hota hai। niraakaar prerna se kaise karenge, woh to karnakraavanhaar hai। aakarke raasta bataate hain। karmendriyon se murli chalaate hain। jab tak karmendriyon ka aadhaar na le, tab tak murli kaise chalaaye। gyaan ka saagar hai to sunaane ke liye mukh chaahiye na।

ab tum bachchon ko saari duniya ke aadi-madhya-ant ka pata pada hai। poori knowledge mili hai। samajhte hain gyaan bigar gati nahin। gyaan kaun de। agyaan maarga aur gyaan maarga mein farka to dekho na। vigyaan bhi kehte hain। agyaan hain andhiyaara, baaki gyaan aur vigyaan ko ham mukti-jeevanmukti bhi kah sakte hain। tumko ab paavan banne ka gyaan milta hai। tum svadarshan chakradhaari bante ho। koi sunenge to wonder khaayenge। kahenge aatma gyaan leti hai to aatma zaroor sanskaar le jaayegi na। manushya se devta bante ho to gyaan rehna chaahiye। parantu baap samjhaate hain yeh purushaartha hai praalabdha ke liye। praalabdha mil gai phir gyaan ki kya darkaar hai। satayug hai hi tum bachchon ke liye praalabdha। yeh baaten sunne se hi wonder khaayenge। yeh gyaan parampara kyon nahin chalta, baap kehte hain yeh praayahlop ho jaata hai। din ho gaya phir agyaan to hai nahin, jo gyaan ki darkaar rahe। yeh bhi samajhne samjhaane ki baaten hain। phat se koi samajh nahin sakte। shivbaaba bhaarat mein hi aate hain, bachchon ke liye saugaat le aate hain, bhakti ka phal dene liye। bhakti ke baad hai sadgati। yeh vinaash bhi hoga zaroor। aasaar khade hain। tum sunte rahenge - chingaari lagti hai to ek do ghante mein saara makaan jalkar bhasma ho jaata hai। yeh koi nai baat nahin hai, vinaash to hona zaroor hai। satayug mein hote hi hain thode manushya, shreshthaachaari। to shreshthaachaari banne mein kitni mehnat lagti hai। maaya naak se ekdam pakad leti hai। aise girne vaalon ko chot bahut lagti hai। time lag jaata hai। bade te badi chot hai kaam vikaar ki isliye kaha jaata hai - kaam mahaashatru hai। yahi patit banaate hain। jhagda hota hi hai vikaar par। vikaar ke liye nahin chhodenge to zaroor kahenge - isse to bartan saaph karen vo achha hai। jhaadu ponchha lagaayengi parantu pavitra rahengi, ismen himmat bahut chaahiye। jab koi baap ki sharan mein aate hain to phir maaya bhi ladna shuru karti hai। 5 vikaaron ki beemaari aur hi adhik uthal khaati hai। pahle to pakka nishchaybuddhi hona chaahiye। jeete ji mare hue hain। yahaan se langar utha liya hai। kaliyugi, vikaari kinaara tumne chhod diya hai। ab ham yaatra par ja rahe hain - ham ashareeri ho apne ghar jaate hain। aatma ko yeh gyaan hai ki ham ek shareer chhod doosre mein jaayenge। ham grihastha vyavhaar mein rehte kamal phool samaan pavitra ban yaatra par rehte hain। buddhi mein yaad rahe ki yeh to kabristaan hai, phir ham sukhdhaam mein jaayenge। hamko baba varsa dene ki yukti bata rahe hain। paavan banne ke liye ham yog mein rehte hain। yaad se hi vikarma vinaash honge tab aatma shareer chhodegi। yaatra kitni wonderful hai। sirf baap ko yaad karo, apni raajdhaani ko yaad karo। itni sahaj baat bhi yaad nahin padti hai। alpha ko yaad karo, bas। parantu maaya woh bhi yaad karne nahin deti, mehnat lagti hai। aatma ko gyaan mila hai, hamaara baba aaya hua hai। aatma padhti hai na। aatma shareer dvaara janma leti hai। aatma bhaai-bhaai hai। deh-abhimaan mein aane se phir anek sambandh ho jaate hain। yahaan tum bhaai-behen ho gaye। aapas mein bhaai-bhaai bhi ho, behen bhaai bhi ho। pravritti maarga hai na। donon ko varsa chaahiye। aatma hi purushaartha karti hai। apne ko aatma samajhna - yahi mehnat hai। deh-abhimaan na rahe। shareer hi nahin to vikaar kisse karenge। ham aatma hain, baap ke paas jaana hai। shareer ka bhaan hi na rahe। jitna yogi bante jaayenge, karmendriyaan shant hoti jaayengi। deh-abhimaan mein aane se karmendriyaan chanchal hoti hain। aatma jaanti hai hamko praapti ho rahi hai। shareer se alag hote jaayenge, to karmendriyaan shant hoti jaayengi। sannyaasi log davaai khaakar karmendriyon ko shant karte hain। woh to hathayog ho gaya na। tumko to yog se kaam lena hai। kya yogbal se tum vash nahin kar sakte ho? jitna aatma-abhimaani hote jaayenge to karmendriyaan shant ho jaayengi। badi mehnat karni padti hai, praapti to bahut oonch hai na। baap kehte hain - yogbal se tum vishwa ke maalik bante ho। karmendriyon par jeet pahante ho isliye bhaarat ka yog naameegraami hai। tum manushya se devta, patit se paavan bante ho। praja bhi svargavaasi to hai na। yogbal se tum svargavaasi bante ho। baahubal se nahin ban sakte ho। mehnat koi bahut nahin hai। kumaariyon ke liye to jaise mehnat hi nahin hai। free hain। vikaar mein gai to badi panchaayat ho jaati hai। kumaari rehna achha hai। nahin to phir adhar kumaari naam pad jaata hai। yugal bhi kyon banen! ismen bhi naam roop ka nasha chadhta hai। yeh bhi moorkhata hai। yugal banne ke baad pavitra rahne ke liye badi achhi himmat chaahiye। gyaan ki poori paraakaashtha chaahiye। bahut hain jo himmat karte hain parantu aag ki aanch aa jaati hai to khel khalaas isliye baba kehte hain kumaari phir bhi achhi hai। adharkumaari banne ka khyaal bhi kyon karna chaahiye। kumaariyon ka naam baala hai। baal brahmachaari hain। baal brahmachaari rehna achha hai, taakat rehti hai। doosre koi ki yaad nahin aayegi। baaki himmat hai to karke dikhaao, parantu mehnat hai। do ho padte hain na। kumaari hai to akeli hai। do se dvet aa jaata hai। jahaan tak ho sake kumaari ho rehna achha hai। kumaari seva par nikal sakti hai। bandhan mein padne se phir bandhan vriddhi ko paate hain। aisa jaal bichhaana hi kyon chaahiye jo buddhi phans pade। aise jaal mein phansana theek nahin hai। kumaariyon ke liye to bahut achha hai। kumaariyon ne naam bhi nikaala hai। kanhaiya naam gaaya jaata hai na। kumaari ho rehna bada achha hai। inhon ke liye bahut sahaj hai। student life pavitra life bhi hai। buddhi bhi fresh rehti hai। kumaaron ko bheeshma pitaamah jaisa banna hai। kalpa pahle bhi rahe hain tab to delvaada mandir mein yaadgaar bana hua hai।

ab baap bachchon ko pharmaan karte hain, mujhe yaad karo। aur sab baaton ko chhod tum apna kalyaan karo। baap ko yaad karne mein hi kalyaan hai। bhool-chook hoti hai, bachche gir padte hain, tum parchintan ko chhod apna kalyaan karo। doosre chintan mein jaao hi nahin। tum sone jaisa ban jaao auron ko bhi raasta bataao। satopradhaan banne ka ek hi upaay hai। paavan banne ke bigar muktidhaam mein ja nahin sakte। upaay ek hi hai phir ant mati so gati ho jaayegi। jharmui jhagmui chhod do। nahin to apna hi nuksaan karenge। baap koi shraap nahin dete hain। shreemat par nahin chalte to aapehi apne ko shraapit karte hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) nishchaybuddhi ban jeete ji is puraani duniya se apna langar utha lena hai। baap ke har pharmaan ko paalan kar apna kalyaan karna hai।

2) doosron ka chintan chhod apni buddhi ko svachchha sone jaisa banaana hai। jharmui-jhagmui mein apna samay nashta nahin karna hai। yogbal se apni karmendriyon ko shant, sheetal banaana hai।

vardaan:- apni vijay va saphalta ko nishchit samajhkar sada nishchint rahne vaale nishchaybuddhi bhav

jo bachche sada baap mein, svayan ke part mein aur drama ki har second ki act mein 100 pratishat nishchaybuddhi hain unki vijay va saphalta nishchit hai। nishchit vijay hone ke kaaran ve sada nishchint rehte hain। unke chehre se chinta ki koi bhi rekha dikhaai nahin degi। unhein sada nishchay rehta hai ki yeh kaarya va yeh sankalp siddha hua hi pada hai। unhein kabhi kisi baat mein question nahin uth sakta।

slogan:- sunne-sunaane mein bhaavna aur bhaav ko badal dena hi vaayumandal kharaab karna hai।

ye avyakt ishaare - apvitrata ke beej ko bhi samaapta kar sampoorn svachchha (pavitra) bano

sampoorn pavitrata ke hisaab se vyartha sankalp bhi apvitrata ka beej hai। vyartha sankalp chalna, majority bachchon mein abhi yeh sanskaar raha hua hai। vyartha sankalp ka aadhaar man hai, jo manamnaabhav hone nahin deta isliye shreemat roopi lagaam tight kar vyartha sankalpon ki apvitrata ko khatma karo।