Murli du jour du vendredi 25 septembre 2026

25-09-2026 praatahmurli om shanti "baapdaada"' madhuban

“meethe bachche - tatvon sahit sabhi manushya maatra ko badalne vaali university keval ek hi hai, yahaan se hi sabki sadgati hoti hai''

prashn:- baap mein nishchay hote hi kaun si raay phauran amal mein laani chaahiye?

uttar:- 1- jab nishchay hua ki baap aaya hai to baap ki pahli-pahli raay yeh hai ki in aankhon se jo kuchh dekhte ho use bhool jaao। ek meri mat par chalo। is raay ko phauran amal mein laana chaahiye। 2- jab tum behad ke baap ke bane ho to patiton ke saath tumhaari len-den nahin honi chaahiye। nishchay buddhi bachchon ko kabhi kisi baat mein sanshay nahin aa sakta।

om shanti। yeh ghar ka ghar bhi hai aur university bhi hai। isko hi god fatherly world university kaha jaata hai kyonki saari duniya ke manushya maatra ki sadgati hoti hai। real world university yeh hai। ghar ka ghar bhi hai। maat-pita ke sammukh baithe hain phir university bhi hai। spiritual father baitha hua hai। yeh roohaani knowledge hai jo roohaani baap dvaara milti hai। spiritual knowledge sivaae spiritual father ke aur koi manushya de nahin sakte। unko hi gyaan ka saagar kaha jaata hai aur gyaan se hi sadgati hoti hai isliye gyaan saagar, sarva ka sadgati daata ek baap hi hai। baap dvaara sarva universe ke manushya to kya parantu har cheez 5 tatva bhi satopradhaan ban jaate hain। sabki sadgati hoti hai। yeh baaten badi samajhne ki hain। abhi sabki sadgati honi hai। puraani duniya aur duniya mein rahne vaale sab change ho jaayenge। jo kuchh yahaan dekhte ho woh sab badalkar naya hone ka hai। gaaya bhi jaata hai - yahaan hai jhoothi maaya, jhoothi kaaya… yeh jhooth khanda ban jaata hai। bhaarat sachkhanda tha, abhi jhooth khanda hai। rachayita aur rachna ke baare mein jo manushya kahenge woh jhooth। abhi tum baap dvaara jaante ho - bhagvaanuvaach। bhagwan ek baap hai na। woh hai niraakaar, asul mein to sab aatmaayen niraakaar hain phir yahaan saakaar roop leti hain। vahaan aakaar nahin hai। aatmaayen mool vatan va brahm mahtatva mein nivaas karti hain। woh hai ham aatmaon ka ghar, brahm mahtatva। yeh aakaash tatva hai, jahaan saakaari part chalta hai। world ki history-geography repeat hoti hai, iska arth bhi samajhte nahin, kehte hain repeat hoti hai। golden ej, silver... phir kya? phir golden ej zaroor aayegi। sangamayug ek hi hota hai। satayug, treta va treta aur dvaapar ka sangam nahin kaha jaata, woh wrong ho jaata hai। baap kehte hain - main kalpa-kalpa, kalpa ke sangamayuge aata hoon। mujhe bulaate hi tab hain jab patit bante hain। kehte hain aap paavan banaane aao। paavan hote hi hain satayug mein। abhi hai sangam, inko kalyaankaari sangamayug kaha jaata hai। aatma aur paramatma ke milan ka sangam, inko kumbha bhi kaha jaata hai। woh phir dikhaate hain nadiyon ka mela। do nadiyaan to hain, teesri phir gupta nadi kehte hain। yeh bhi jhooth। gupta nadi koi ho sakti hai kya? science vaale bhi nahin maanenge ki koi gupta nadi ho sakti hai। teer maara ganga nikal aai, yeh sab hai jhooth। gaaya hua hai gyaan, bhakti, vairaagya। yeh akshar pakad liya hai parantu arth nahin samajhte hain। pahle-pahle hai gyaan-din sukh, phir hai bhakti-raat duhkh। brahma ka din, brahma ki raat। ab ek ki to ho na sake, bahut honge na। din hota hai aadhaakalpa ka, phir raat bhi hoti hai aadhaakalpa ki। phir hota hai saari puraani duniya se vairaagya।

baap kehte hain - deh sahit jo kuchh bhi tum in aankhon se dekhte ho unko gyaan se bhoolna hai। dhandha aadi sab karna hain। bachchon ko sambhaalna hai। parantu buddhi ka yog ek se lagaana hai। aadhaakalpa tum raavan ki mat par chalte ho। ab baap ka bane ho to jo kuchh karo so baap ki raay se karo। tumhaara len-den itna samay patiton se chala aaya hai, uska nateeja kya hua hai। din-pratidin patit hi bante aaye ho kyonki bhakti-maarga hai hi utarti kala ka maarga। satopradhaan, sato rajo tamo mein aana hota hai। utarna hi hai zaroor। isse koi chhuda na sake। lakshmi-naaraayan ke bhi 84 janma bataaye hain na। angreji ke akshar bade achhe hain। golden ej, silver ej ... aise khaad padti jaati hai। is samay aakar iron aged bane hain। golden ej mein nai duniya thi, naya bhaarat tha। in lakshmi-naaraayan ka raajya tha। kal ki baat hai। shaastron mein likh diya hai laakhon varsha। ab baap kehte hain tumhaare shaastra right hain ya main right hoon? baap ko kaha jaata hai - world almighty authority। jo ved-shaastra bahut padhte hain unko authority kaha jaata hai। baap kehte hain - yeh sab bhakti maarga ki authority hain। gyaan ke liye to mera gaayan karte hain - aap gyaan ke saagar ho, ham nahin hain। manushya sab bhakti ke saagar mein doobe hue hain। satayug mein koi vikaar mein jaate nahin। kaliyug mein to manushya aadi-madhya-ant duhkhi hote rehte hain। baap ne kalpa pahle bhi aise samjhaaya tha, ab phir samjha rahe hain। bachche samajhte hain kalpa pahle bhi behad ke baap se varsa liya tha ab phir padhkar pa rahe hain। samay bahut thoda hai। yeh to vinaash ho jaayenge isliye behad ke baap se poora varsa lena chaahiye। woh baap, teacher, guru bhi hai। supreme father, supreme teacher bhi hai। world ki history-geography kaise repeat hoti hai, saari knowledge dete hain। yeh aur koi samjha na sake। abhi bachche samajhte hain 5 hajaar varsha pahle muaaphik, yeh vahi geeta ka bhagwan hai, shreekrishna nahin hai। manushya ko bhagwan nahin kaha jaata। bhagwan to hai hi punarjanma rahit। inko divya janma kehte hain। nahin to main niraakaar boloon kaise। mujhe to zaroor aakar paavan banaana hai to yukti bataani pade। tum jaante ho ham aatma amar hain। raavan raajya mein tum sab deh-abhimaani ban pade ho। satayug mein dehi-abhimaani hote hain। baaki paramatma rachta aur unki rachna ko vahaan bhi koi nahin jaante। agar vahaan bhi maaloom ho ki hamko phir aise girna hai to raajaai ki khushi hi na rahe isliye baap kehte hain - yeh knowledge vahaan praayahlop ho jaati hai, jabki tumhaari sadgati ho jaati hai phir gyaan ki darkaar hi nahin। gyaan ki darkaar hi durgati mein hoti hai। is samay sab durgati mein hain, sab kaam-chita par baith jal mare hain। baap kehte hain - mere bachche, aatmaaen jo shareer dvaara aakar part bajaati hain, woh kaam-chita par baith tamopradhaan ban padi hain। bulaate bhi hain ki ham patit ban pade hain। patit bante hi hain kaam-chita se। krodh va lobh se patit nahin bante hain। saadhu-santa aadi paavan hain, devtaayen paavan hain to patit manushya jaakar maatha tekte hain। gaate bhi hain aap nirvikaari, ham vikaari hain। viceless world, vicious world gaaya jaata hai na। bhaarat hi viceless world tha। ab vicious hai। bhaarat ke saath saara world hi vicious hai। viceless world mein aaj se 5 hajaar varsha pahle ek hi dharma tha, pavitrata thi to pees, prosperity teenon hi the। purity hai first। abhi purity nahin hai to pees prosperity bhi nahin hai।

gyaan ka saagar, sukh ka saagar, pyaar ka saagar ek hi baap hai। tumko bhi aisa pyaara banaate hain। in lakshmi-naaraayan ki raajdhaani mein sab pyaare hain। manushya maatra jaanvar aadi sab pyaare hain। sher bakri ikatthe jal peete hain। yeh ek drishtaanta hai। vahaan aisi cheez ganda karne vaali hoti nahin। yahaan beemaariyaan, machchhar aadi bahut hain। vahaan aisi cheez hoti nahin। saahookaar aadmiyon ke paas furniture bhi first class hota hai। gareebon ka furniture bhi saadhaaran। bhaarat abhi gareeb hai, kitna kichda laga hua hai। satayug mein kitni saphaai rehti hai। sone ke mahal aadi kitne first class honge। vaikuntha ki gaayen bhi dekho kitni first class hoti hain। shreekrishna ko kitni achhi gaayen dikhaate hain। krishnapuri mein gaayen to hongi na। vahaan cheejen kitni first class hoti hain। heaven to phir kya! is puraani chhi-chhi duniya mein to bahut kichda hai। yeh sab is gyaan yagya mein svaaha ho jaayega। kaise-kaise bombs banaate rehte hain। bomb phenke to aag nikal aaye। aajkal to aise jeevaanu bhi daalte hain, aisa vinaash karte hain, jo behad mein khatma ho jaayen। hospital aadi to rahenge nahin, jo davaai aadi kar saken। baap kehte hain - bachchon ko koi takleeph nahin honi chaahiye isliye gaaya hua hai natural calamities, moosaldhaar barsaat। bachchon ne vinaash ka saakshaatkaar bhi kiya hai। buddhi bhi kehti hai vinaash to zaroor hona hai। koi kahe vinaash ka saakshaatkaar ho tab maanen, achha nahin maanon, tumhaari marji। koi kahe ham aatma ka saakshaatkaar karen tab ham maanen। achha aatma to bindi hai। dekh liya to kya hua! kya isse sadgati hogi? kehte hain - paramatma akhanda jyoti swaroop, hajaaron soorya se tejomay hai। parantu aise hai nahin। geeta mein likha hai - arjun ne kaha bas karo, ham sahan nahin kar sakta hoon। aisi baat nahin hai। baap ko bachche dekhen aur kahen ham sahan nahin kar sakte, aise kuchh bhi hai nahin। jaisi aatma hai vaise parampita paramatma baap hai। sirf woh gyaan ka saagar hai। tumhaare mein bhi gyaan hai। baap hi aakar padhaate hain aur koi baat hi nahin, jo-jo jis bhaavna se yaad karte hain, woh bhaavna poori kar deta hoon। woh bhi drama mein noondh hai। baaki bhagwan kisko mil nahin sakta। meera saakshaatkaar mein kitna khush hoti thi। doosre janma mein bhi bhaktin bani hogi। vaikuntha mein to ja nahin sakti। abhi tum bachche vaikuntha mein jaane ki taiyaari kar rahe ho। jaante ho ham vaikuntha, krishnapuri ke maalik ban rahe hain। yahaan to sab narka ke maalik hain। history-geography repeat hogi na।

tum bachche jaante ho ham apna raajya-bhaagya phir se le rahe hain। yeh hai raajayog bal। baahubal ki ladaaeeyaan to anek baar, anek janma chali hain। yogbal se tumhaari chadhti kala hai। jaante ho barobar svarga ki raajdhaani sthaapan ho rahi hai। jinhonne kalpa pahle purshaartha kiya hoga vaise hi karenge। tumko heartfail nahin hona chaahiye। jo pakke nishchaybuddhi hain, unko kabhi sanshay nahin aa sakta। sanshaybuddhi bhi hote zaroor hain। baba ne kaha hai aashcharyavat sunanti, kathanti, bhaaganti... aho maaya tum in par jeet pa leti ho। maaya bahut balvaan hai। achhe-achhe first class service karne vaale, centre chalaane vaale ko bhi maaya thappad maar deti hai। likhte hain baba shaadi kar munh kaala kar diya। kaam-kataari se hamne haar kha li। ab to baba aapke saamne aane laayak nahin rahe hain। phir likhte hain baba sammukh aayen। baba likhte hain kaala munh kiya ab yahaan nahin aa sakte ho। yahaan aakar kya karenge। phir bhi vahaan rahkar purshaartha karo। ek baar gira so gira। aise nahin raajaai pad pa sakenge। kaha jaata hai na - chadhe to chaakhe vaikuntha ras, gire to ekdam chandaal... hadda gudda toot padte hain। 5 manzil se girte hain phir koi-koi sach likhte hain। koi to sunaate hi nahin hain। indraprastha ki pariyon ka bhi misaal hai na। yeh hai saare gyaan ki baat। is sabha mein koi patit ko baithna, hukm nahin hai। parantu koi haalat mein bithaana hota hai। patit hi to aayenge na। abhi to dekho kitni dropdiyaan pukaarti hain, kehti hain baba hamko nangan karne se bachaao। baandheliyon ka bhi part chalta hai। kaameshu, krodheshu hote hain na। badi khitpit hoti hai। baba ke paas samaachaar aate hain। behad ka baap kehte hain bachche in par jeet pahno। ab pavitra raho, mujhe yaad karo to guarantee hai vishwa ke maalik banoge। akhbaaron mein bhi khud daalte hain ki koi prerak hai jo hamse yeh bombs aadi banvaate hain, isse apne hi kul ka naash hoga। parantu kya karen drama mein noondh hai, din-pratidin banaate jaate hain। time bahut to nahin hai na। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ka namaste।

dhaarna ke liye mukhya saar:-

1) satayugi pyaar ki raajdhaani mein chalne ke liye bahut-bahut pyaara banna hai। raajaai pad ke liye paavan zaroor banna hai। pavitrata first hai isliye kaam mahaashatru par vijay paani hai।

2) is puraani duniya se behad ka vairaagi banne ke liye in aankhon se deh sahit jo kuchh dikhaai deta hai, use dekhte bhi nahin dekhna hai। har kadam par baap se raay lekar chalna hai।

vardaan:- saare vriksha ki knowledge ko smriti mein rakh tapasya karne vaale sachche tapasvi va sevaadhaari bhav

bhakti maarga mein dikhaate hain ki tapasvi vriksha ke neeche baithkar tapasya karte hain। iska bhi rahasya hai। aap bachchon ka nivaas is srishti roopi kalpa vriksha ki jad mein hai। vriksha ke neeche baithne se saare vriksha ki knowledge buddhi mein svatah rehti hai। to saare vriksha ki knowledge smriti mein rakh saakshi hokar is vriksha ko dekho। to yeh nasha, khushi dilaayega aur isse battery charge ho jaayegi। phir seva karte bhi tapasya saath-saath rahegi।

slogan:- tan ki beemaari koi badi baat nahin lekin man kabhi beemaar na ho।

ye avyakt ishaare - ab apne daata swaroop ko pratyaksha karo

daata ke bachche sada sarva sampattivaan hote hain। kabhi bhaktapan va bhikhaareepan ke sanskaar emerge na ho। aisa sankalp bhi na aaye ki baba mujhe kuchh madad kare, aasheervaad de। baba mujhe sahayog chaahiye, shakti chaahiye। yeh chaahiye shabd daata, vidhaata, vardaata bachchon ke aage shobhta nahin। daata ke bachche sarva shaktiyon se sampanna hote hain। yahi sampanna sthiti sampoorn sthiti ko sameep laati hai।