Murli du jour du jeudi 22 octobre 2026

22-10-2026 praatahmurli om shanti "baapdaada"' madhuban

“meethe bachche - mahaaveer bano, maaya ke toofaanon se ladne ke bajaae achal-adol bano''

prashn:- brahma baba ke saamne anek hangaamen hote bhi kabhi ranj nahin hue - kyon?

uttar:- kyonki baba ko nasha tha ki humein baap se varsa lena hai। yeh to sab kalpa pahle muaaphik ho raha hai nothing new। gaaliyaan to sabse adhik baap ko mili। phir shreekrishna ko bhi gaali dete। agar humein bhi gaali khaani pade to kya badi baat। duniya hamaari baaton ko jaanti hi nahin to zaroor gaali degi isliye koi bhi baat mein ranj nahin hua। aise hi follow father।

geet:- bholenaath se niraala…

om shanti। yeh bhaktimaarga vaalon ka geet hai। gyaan maarga mein geet aadi nahin gaaya jaata hai, na banaaya jaata hai, na jaroorat hai kyonki gaaya hua hai - baap se second mein jeevanmukti ka varsa milta hai। usmein geet aadi ki koi baat hi nahin। tum jaante ho humein behad ke baap se behad ka varsa milta hai। jo bhakti maarga ki rasam-rivaaj hai, woh ismen nahin aa sakti। bachche kavita aadi banaate hain woh bhi auron ko sunaane ke liye। woh bhi jab tak tum nahin samjhaao tab tak koi samajh na sake। ab tum bachchon ko baap mila hai to khushi ka paara chadhna chaahiye। baap ne 84 janmon ke chakra ka knowledge bhi sunaaya hai। khushi honi chaahiye ki abhi ham svadarshan chakradhaari bane hain। baap se vishnupuri ke maalik ban rahe hain। nishchaybuddhi hi vijayanti। jisko nishchay hota woh satayug mein jaayenge hi। to bachchon ko sadaiv khushi rahni chaahiye, follow father। bachche jaante hain niraakaar baba jab se is tan mein pravesh hua hai, to inke paas bhi bade hangaamen hue। bhaaeeyon ke jhagde, shahar ke jhagde, saare sindha ke jhagde chale। bachche bade hue kahenge, jaldi shaadi karo। shaadi bigar kaam kaise chalega। geeta padhna miss nahin karte the, jab maaloom pad gaya ki geeta ka bhagwan shiv hai to woh geeta padhna chhoot gai। phir nasha chadh gaya ki ham to vishwa ke maalik bante hain। yeh to shiv bhagvaanuvaach hai to us geeta ko chhod diya aur phir pavitrata par bada hangaama hua। bhaai, kaake, chaache aadi kitne the। ismen bahaaduri chaahiye na। tum ho hi mahaaveer mahaaveerni। sivaae ek ke aur koi ki parvaah nahin। purush hai rachta। rachta khud paavan banta hai to rachna ko bhi paavan banaana hai। pavitra hans aur apvitra bagule, ikatthe kaise rah sakte hain। creator to jhat hukm karega hamaari mat par chalna hai to chalo, nahin to nikal jaao। tumko pata hai laukik bachchi shaadi ki hui thi। unko mila gyaan, to bole vaah! baap kehte hain pavitra bano to ham kyon nahin banenge। javaab de diya pati ko ki ham vish nahin denge। bas is baat par hi bahuton ka jhagda chala। bade-bade gharon se bachchiyaan nikal aai, koi bhi parvaah nahin ki। jinki takdeer mein nahin hai to samajh bhi na saken। pavitra rehna hai to raho, nahin to jaakar apna prabandha karo। itni himmat bhi to chaahiye na। baap ke saamne kitne hangaamen hue। baba ko kabhi ranj hua dekha! America tak akhbaaron mein nikal gaya। nothing new। yeh to kalpa pahle muaaphik hota hai, ismen dar ki baat kya hai। hamko to apne baap se varsa lena hai। apni rachna ko bachaana hai। baap jaante hain saari creation is samay patit hai। mujhe hi sabko paavan banaana hai। baap ko hi sab kehte hain he patit-paavan, liberator aao। to unko hi taras padta hai। merciful hai na। to baap samjhaate hain ki bachche koi bhi baat mein daro mat। darne se itna oonch pad pa nahin sakenge। atyaachaar, maataaon par hi hote hain। yeh bhi nishaani hai। dropdi ko nangan karte hain। baap 21 janmon ke liye nangan hone se bachaate hain। duniya in baaton ko nahin jaanti hai। sadgati daata to main hoon na। jab tak manushya durgati ko na paayen tab tak main kaise aakar sadgati doon। patit tamopradhaan srishti bhi banni hai। har cheez nai se puraani zaroor hoti hai। puraane ghar ko chhodna hi padta hai। nai duniya golden ej, puraani duniya iron ej। sadaiv nai to rah na sake। tum bachche jaante ho yeh srishti ka chakra hai। devi devtaaon ka raajya phir se sthaapan ho raha hai। baap kehte hain phir se tumko geeta gyaan sunaata hoon। yahaan raavanraajya mein duhkh hai। raamraajya kisko kaha jaata hai, yeh bhi kisko pata nahin aur samajhte bhi nahin hain। baap kehte hain main svarga athva raamraajya ki sthaapna karne aaya hoon। tum bachchon ne anek baar raajya liya aur phir ganvaaya hai। yeh sabki buddhi mein hai। 21 janma satayug mein rehte hain, usko kaha jaata hai 21 peedhi arthaat jab boodhe hote hain tab shareer chhodte hain। akaale mrityu kabhi hoti nahin। ab tum jaise trikaaldarshi ban gaye ho। abhi tum jaante ho ham janma-janmaantar bhakti karte hain। raavan raajya mein bhi bhabhka dekho kitna hai। yeh hai pichhaadi ka bhabhka। raamraajya satayug mein hoga - vahaan yeh vimaan aadi sab the phir yeh sab gum ho gaye। phir is samay yeh sab nikle hain। abhi yeh sab seekh rahe hain। jo seekhne vaale hain woh sanskaar le jaayenge। phir aakar vahaan vimaan banaayenge। yeh tumko bhavishya mein sukh dene vaale hain। yeh vimaan aadi bhaaratvaasi bhi bana sakte hain। koi nai baat nahin। aklamand to hain na। yeh science tumko phir kaam aayegi। abhi yeh science duhkh ke liye hai phir vahaan sukh ke liye hogi। vahaan to har cheez nai hogi। abhi to nai duniya ki sthaapna ho rahi hai। baap hi nai duniya ki raajdhaani sthaapan kar rahe hain। to bachchon ko mahaaveer banna hai। duniya mein yeh koi thode hi jaante ki bhagwan aaya hua hai।

baap kehte hain - grihastha vyavhaar mein rehte kamal phool samaan pavitra raho। ismen darne ki baat nahin, karke gaali denge। gaali inko bhi bahut di hain। shreekrishna ne gaali khaai, aisa dikhaate hain। ab shreekrishna to gaali kha na sake। gaali to kaliyug mein khaate hain। tumhaara roop jo abhi hai phir kalpa baad is samay hoga। beech mein ho na sake। janma by janma features badalte jaate hain। ek aatma ko 84 janmon mein ek jaise features mil na sake। sato rajo tamo mein aate jaate hain, features badalte jaate hain। yeh drama bana hua hai। 84 janmon mein jo features vaale janma liye hain, vahi lenge। ab tum jaante ho inke features badal doosre janma mein yeh lakshmi-naaraayan ho jaayenge। tumhaari buddhi ka taala ab khula hai। ab yeh hai nai baat। baba bhi naya, baaten bhi nai। yeh baaten kiski samajh mein jaldi nahin aayengi। jab takdeer mein ho tab kuchh samjhen। mahaaveer koi toofaan se darenge nahin। woh avastha pichhaadi mein honi hai isliye gaaya hua hai ateendriy sukh poochhna ho to gop gopiyon se poochho। baap aaye hi hain tum bachchon ko svarga ke laayak banaane। kalpa pahle misal narka ka vinaash to hona hi hai। satayug mein to ek hi dharma hoga। chaahte bhi hain oneness ho। ek dharma hona chaahiye। yeh bhi kisko pata nahin hai ki raamraajya, raavan raajya alag-alag hai। yahaan vikaar bigar janma ho na sake। moot paleeti hain na। ab baap mein nishchay hai to shreemat par poori reeti chalna pade na। har ek ki nabja bhi dekhi jaati hai। us anusaar raay bhi di jaati hai। baba ne bhi bachchon ko kaha ki agar shaadi karni hai to jaakar karo। bahut mitra-sambandhi aadi baithe hain, unko shaadi kara lenge। to har ek ki nabja dekhi jaati hai। poochhte hain baba; is haalat mein hain, ham pavitra rahne chaahte hain, hamaare sambandhi hamko ghar se nikaalne chaahte hain। ab kya karna hai? yeh poochhte ho, pavitra rehna hai। agar nahin rah sakte ho to jaakar shaadi karo। achha samjho kiski sagaai hui hai। raazi karna hai, harja thode hi hain। hathiyaala jab baandhate hain to bhi kehte hain - yeh tumhaara pati guru hai। achha us samay tum unse likhvaate jaana। maanti ho main tumhaara guru eeshvar hoon, likho। achha ab main tumko hukm deta hoon, pavitra rehna hai। himmat chaahiye na। manzil bahut bhaari hai। donon ikatthe kaise rehte hain, yeh sabko dikhlaana hai। praapti bahut jabardasta hai। aag tab lagti hai jab praapti ka pata nahin hai। baap kehte hain - itni badi praapti hoti hai to ek janma pavitra raho, to kya badi baat hai। ham tumhaara pati eeshvar hain। hamaari aagya par pavitra rehna padega। baap yuktiyaan bata dete hain। bhaarat mein yeh kaayda hai, stri ko kehte hain tumhaara pati eeshvar hai, unki aagya par chalna hai। pati ke paanv dabaana hai kyonki samajhte hain lakshmi ne naaraayan ke paanv dabaaye the। yeh aadat kahaan se nikli? in jhoothe chitron se। satayug mein to aisi baaten hoti nahin। naaraayan kab thakta hai kya jo lakshmi baith paanv dabaayegi? thakaavat ki baat ho na sake। yeh to duhkh ki baat ho jaati hai। vahaan duhkh kahaan se aaya। to kitni jhoothi baaten likh di hain। baba ko chhotepan se hi vairaagya rehta tha, isliye bhakti karte the।

baba bachchon ko yukti bahut achhi bataate hain। koi bachche ko sambandhi tang karte hain, achha shaadi kar lo। stri tumhaari ho gai। phir koi kuchh kar na sake। aapas mein mil pavitra raho, companion ho gaye। vilaayat mein boodhe hote hain to sambhaal ke liye companion rakh dete hain। civil marriage karte hain। vikaar mein nahin jaayenge। ab tum jaante ho ham ek baap ke bachche hain, aapas mein bhaai-behen ho gaye। daade se varsa lete hain। baap ko bulaate bhi patit duniya mein hain। he patit-paavan, sab seetaaon ke raam। manushya raam-raam japte hain to seeta ko thode hi yaad karte hain। unse badi to lakshmi hai। parantu yaad to ek baap ko karte hain। lakshmi-naaraayan ko phir bhi jaante hain, shiv ko to koi jaante nahin। aatma bindi hai to aatmaon ka baap bhi bindi hoga na। aatma mein saara gyaan hai। unko kaha jaata hai gyaan ka saagar। tum aatma bhi gyaan saagar banti ho। gyaan saagar baith tum aatmaon ko samjhaate hain। aatma chaitanya hai। tumhaari aatma gyaan ka saagar ban rahi hai। saari srishti ke aadi madhya ant ka gyaan tumko hai। meethe bachchon ko himmat rakhni chaahiye। hamko baba ki shreemat par chalna chaahiye na। behad ka baap behad ke bachchon ko svarga ka maalik banaate hain to baap kehte hain tum bhi apni rachna ko haath mein rakho। agar bachcha tumhaari aagya nahin maanta hai to bachcha, bachcha nahin। woh to kapoot thahra। aagyaakaari, pharmaanbardaar bachcha ho to varse ka hakdaar ban sakta। behad ka baap bhi kehte hain meri shreemat par chalenge to tum aise shreshtha banenge। nahin to praja mein chale jaayenge। baap tumko nar se naaraayan banaane aaye hain। yeh hai sachchi satya naaraayan ki katha। tum raajaai praapta karne aaye ho। ab mama baba raaja raani bante hain to tum bhi himmat karo। baap to zaroor aap samaan banaayenge। praja banne mein hi raazi nahin hona chaahiye। purushaartha karna hai - ham baap se poora varsa lenge, vaari jaayenge। tum unko apna vaaris banaayenge to yeh tumko 21 janmon ke liye varsa denge। baap bachchon par vaari jaate hain। bachche kehte hain baba yeh tan-man-dhan sab aapka hai। aap baap bhi ho to bachche bhi ho। tvamev maata cha pita tvamev। ek baap ki mahima kitni badi hai। duniya mein in baaton ko koi nahin jaante। bhaarat ki hi saari baat hai। tum bachche jaante ho yeh vahi 5 hajaar varsha pahle vaali ladaai hai। abhi svarga ki sthaapna ho rahi hai। to bachchon ko sadaiv bahut khushi mein rehna chaahiye। bhagwan ne tumko adopt kiya hai to tumko khushi honi chaahiye। phir tum bachchon ka baap shrringaar kar rahe hain। padhaate bhi hain - behad ka baap, gyaan ka saagar hai। hamko saari srishti ke aadi madhya ant ka raaz samjhaate hain। jo baap ko hi nahin jaante, woh hain naastik। tum baap aur rachna ko jaante ho, tum ho aastik। lakshmi-naaraayan aastik hain ya naastik? tum kya kahenge? tum khud kehte ho satayug mein paramatma ko koi yaad nahin karte hain। vahaan hai sukh, to sukh mein paramatma ka simran karte nahin kyonki paramatma ko jaante nahin। is samay tum aastik bankar varsa pa rahe ho। phir vahaan yaad hi nahin karte ho। yahaan yaad karte hain parantu unko jaante nahin hain isliye naastik kaha jaata hai। vahaan jaante bhi nahin to yaad bhi nahin karte। unhon ko yeh bhi pata nahin hoga ki yeh varsa hamko shivbaaba se mila hai। lekin unko naastik nahin kahenge kyonki paavan hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) shreemat par chalne ki poori-poori himmat rakhni hai। kisi bhi baat mein darna va ranj (naaraaj) nahin hona hai।

2) apni rachna apne haath mein rakhni hai। unhein vikaaron se bachaana hai। paavan banne ki raay deni hai।

vardaan:- sada baap ke sammukh rah khushi ka anubhav karne vaale athak aur aalasya rahit bhav

koi bhi prakaar ke sanskaar ya svabhaav ko parivartan karne mein dilshikasta hona ya albelaapan aana bhi thakna hai, isse athak bano। athak ka arth hai jismen aalasya na ho। jo bachche aise aalasya rahit hain ve sada baap ke sammukh rehte aur khushi ka anubhav karte hain। unke man mein kabhi duhkh ki lahar nahin aa sakti isliye sada sammukh raho aur khushi ka anubhav karo।

slogan:- siddhi swaroop banne ke liye har sankalp mein punya aur bol mein duaayen jama karte chalo।

ye avyakt ishaare - paropkaar ki bhaavna se sampanna ban apkaari par bhi upkaar karo

jiska aapke prati shubh bhaav hai uske prati aap bhi shubh bhaav rakhte ho, upkaari par upkaar karte ho, yeh koi badi baat nahin hai। lekin koi aapko baar-baar giraane ki koshish kare, aapke man ko dagmag kare, phir bhi aapko uske prati sada shubhchintak ka, achal-atal bhaav ho, baat ke kaaran bhaav na badle, koi apkaar kare, aap ek second mein apkaar ko upkaar mein parivartit kar do tab kahenge kamaal।